WEEVA unawiicoona ukhala ntthu oosukhuru? Otheene cihu nihaana nuupuwelaka nno nikohonno. Ibiiblya yahohimya wiira mahuku ankhaleehu, atthu yaahala ukhala “oohisukhuru.” (2 Tim. 3:2) Atthunaka ahaavo atthu weeva unaacuwelaa anoopuwela wiira ahaana yapankeliyaka citthu naatthu otheene. Ayo anoopuwela wiira unawaaphwanela upankeliya citthu, phimaana pooti wahinsukhurwaaya. Ukhala naatthu commo khweeliini khunreera, keera?

Masi atthu anonswalela Yehova anaasovenrihiya: “Moonihere wiira nnaasukhuru.” Hiiva nihaana ‘nisukhuruku citthu cotheene.’ (Akol. 3:15; 1 Atesal. 5:18) Usukhuru unaaniphwanyiha ifayita. Cihaavo citthu cinci cinthoonyera nlattuni usukhuru unniphwanyihaaya ifayita.

Itthu yuulupale inthoonyera nlattuni ninlamuliyeehu ukhala ntthu oosukhuru, ukhalaka wiira usukhuru unaanikavihera wiiwehera ratta. Ntthu asukhuruku, uyo pooti wiicoona ratta; ciicammo ntthu nsukhurwiiya naakhala ootteeliya. Kontha isiyani usukhuru hiivano unaanitteeliha nrima ni unantteeliha nrima ule nonsukhurweehu? Wuupuwele ila: Ntthu oopankelaka itthu, uyo noopuwela wiira weeva uhaana ifayita, khunaamini? Khweeli, uyo nawuuwacera ni nawuutteeliha nrima. Hiiva pooti wantanicereehu wiira iyo phi itthu yaamwiirannyenle Ruti. Boaz ahonkavihera Ruti. Khweeliini, Ruti ahokhala ootteeliya cinene nlattu woocuwela wiira ahaavo ntthu anwacera.—Ruti 2:10-13.

Itthu ikhwaawe yofayita ukhanle unsukhuru Nluku. Khweeliini, uhaavo ukati weeva unoopuwelakaa citthu cinci comaana Nluku cuuvahalyaawe ni nanlelo cinoovahaawe. (Deut. 8:17, 18; Mite. 14:17) Masi uhiya wuupuwela wowaakuvyaaca unamaana wa Nluku, unoonela cani ukumiha ukati wiira wuupuwele ratta iparakha cinci caakhenlyaa ni caakhenlyaaya atthu unaafentaa? Woopuwelaka ratta unamavaha wa Mpattusiihu, weeva unaahala utepa unsukhuru ni ukhuluvela wiira Yehova nawuufenta ni nawuuwacera.—1 Jo. 4:9.

Uhuupuwele paahi iparakha Yehova cinvahaawe, masi ciicammo uhaana unsukhuruku. (Isaa. 100:4, 5) Namantikhaca mmoca heera: “Usukhuru ikhanle itthu yuulupale inonkavihera pinaatamu ukhala ootteeliya.”

Itthu ikhwaawe inthoonyera nlattuni ninlamuliyeehu usukhuru ukhalaka wiira usukhuru unaalipihaca upatthaniihu naakhwiihu. Otheene cihu ninaapheela wooniya naakhwiihu ukhalana ifayita. Weeva wansukhuru ntthu nlattu wo itthu yuupankenlyaawe, upatthaniinyu unaatepa ukhala woolipa. (Aroo. 16:3, 4) Uhiya iyo, atthu oosukhuru anawaakavihera akhwaaya. Ayo anaasukhuru yakaviheriyaka ni anaapheela ciicammo umpankela itthu yomaana ntthu aakavihenre. Khweeliini, waakavihera akhwiihu unaanitteeliha nrima. Yesu ahaana isariya ukati weeralyaawe: “Uvaha unaatteeliha nrima cinene uvirikana ni waakhelela.”—Mite. 20:35.

Director oovarelela miteko coosomasomiya co Universidade yo Califórnia neehaniya Robert Emmons, heera co: “Wiira nisukhuru, ninlamuliya ukupali wiira nihaana nikaviheriyaka naakhwiihu. Ukati nkhwaawe, hiiva ninampankela citthu nkhunanihu, ni ukati  nkhwaawe, nkhunanihu ciicammo naanipankelaka citthu. Ikhweeli phiila: wiira nikhale akumi ni nikhalane ukumi woonitteeliha nrima, ninlamuliya ukaviheriya naakhwiihu ni mananna oovirikanaca. Wootakihera, akwiihu pooti univaha iyoolya awula unikavihera nawerennyaka. (1 Akor. 12:21) Ntthu oosukhuru naathoonyera wiira ihoncivela itthu ipankeliyaawe naakhunanaawe. Phimaana nihaana wiikoha co: ‘Kiireke miiva kinaasukhuruku ntthu akipankelaka itthu?’

Itthu ikiina inthoonyera nlattuni ninlamuliyeehu ukhala atthu oosukhuru ukhalaka wiira usukhuru unaanikavihera uweheeha citthu comaana, uhiya uweheeha citthu coohinamaana. Pooti waneereehu wiira moopuwelelweehu anvara nteko toko iseefa. Ayo anaanikavihera uweheeha citthu comaana ni uhiwacera citthu cikhwaawe. Ntthu nsukhuru naaweheeha cinene citthu comaana ni khantepa uweheeha cinene masakha. Wakhalaka ntthu oosukhuru, weeva unaahala woona citthu cinci comaana ni unaahala utepa usukhuru. Uweheeha citthu comaana unaahala wuukavihera utthara ikano ya apostolu Paulu: “Nhihiye ukhala ootteeliya iriyari wa Apwiiya.”—Afili. 4:4.

Weeva unaahala woona wiira usukhuru unaanikavihera uhuupuwela cinene citthu cooripiha nrima. Unaarika cinene ntthu oosukhuru ukhalana nttima, uriipiya nrima awula ukhalana nruukwa. Khunkupali? Uhiya commo, atthu oosukhuru khankhala atthu oohoolelihera mihakhu muukumini waya. Ayo anaavaha ifayita citthu cirinaaya ni khankhala ukati wotheene amananihaka uphwanya citthu cinci.—Afili. 4:12.

Khampa nkristau, weeva unaacuwela wiira Sotwani mpheela wiira weeva ukhale ni masukhuli ni ooriipiya nrima nlattu wo masankiho ankhumelela ala mahuku ookhiceraala. Uyo waahala uncivela weeva unakhanle ntthu ooweheeha citthu coohiloka ni oottekutta. Ukhalana ala makhalelwaala waanaahala uhonona ntekwaa woolalyeera. Masi usukhuru unaavaranaca ni nhokorokho wo nnepa wa Nluku, toko waamini ni utteeliya. Wootakihera, hiiva ninaakhala ootteeliya nlattu wo citthu comaana cotheene Nluku cinnivahaawe ni ninawaamini inatiri cawe cotheene cinhala wiirannya uhoolo.—Akalas. 5:22, 23.

Nlattu wookhala nkhayi naapoovu a Yehova, atthunaka weeva unawaamini citthu cihimiye nhina ula mwahoola. Hataa ukhalaka commo, ukati nkiina unaarika usukhuru ni uwehera citthu ratta. Uhikhale ni masukhuli nlattu wo iyo. Weeva pooti ukhitiri ukhala ntthu oosukhuru. Unhala ukhitiri cani? Khula nihuku, ukumihe ukati wiira wuupuwele citthu comaana co muukumini waa cinlamuliyaa usukhurweela. Upanka commo, khunhala utepa wuurika usukhuru. Coo, weeva unaahala ukhala ootteeliya cinene, waavikana ale antepa wuupuwela masakha o muukumini. Wuupuwele citthu comaana cimpankaawe Nluku ni cimpankaaya atthu akhwaawe wiira yuutteelihe nrima ni yuulipihe makhuva. Unoonela cani, khawaareera wantikha nipuro citthu piili awula tthaaru cinookhumelela khula nihuku cinlamuliyaa usukhurweela?

Anamasoma cinene ahoona wiira neelemalelihaka waasukhuru akhwiihu, iyo pooti ukavihera ukookweehu uvara nteko saana ni unikavihera wuupuwela citthu comaana. Ntthu oosukhuru naatteeliya venci. Phimaana, wuupuwele iparakha cinaakhelaa, wuupuwele citthu comaana cinookhumelela ni khula ukati usukhuru! Uhiya wuupuwela wiira cinawuuphwanela citthu comaana cinkhumelela muukumini waa, ‘unsukhuru Yehova, kontha uyo namaana’ ni ‘usukhuru citthu cotheene.’—1 Ikor. 16:34; 1 Atesal. 5:18.