1-2. a) Yubilewu isiyani? (Uwehe ikwaaturu “ Yubilewu yaari isiyani?”) b) Isiyani Yesu yoolumalyaawe nhina Luka 4:16-18?

ILAPO cikhwaawe, atthu anaapankaka isukuhuulu mwene awula apwiyamwene yavirihaka myaakha 50 alamulelaka. Nnyo isukuhuulunnyo cineehaniya Yubilewu. Isukuhuulu co Yubilewu pooti ukhala co nihuku nimoca, isumana imoca awula mahuku menci. Masi hataa cikhalaka commo, nnyo cinaamala. Ni utteeliya wotheene unkhalanaaya atthu ukati wo nnyo isukuhuulunnyo, woohipica unaaliyaliya.

² Caviraka myaakha 50, atthu o Isarayeli khalayi yaanaapanka isukuhuulu yo Yubilewu yo mwaakha mmoca. Isukuhuulu yo Yubilewu yaanawaataphula asarayeli. Nlattuni ninlamuliyeehu upheela wiitthuca iyo isukuhuulwiiyo? Kontha mwaakha wo Yubilewu waasarayeli unaanuupusera Yubilewu muulupale cinene Yehova ntthenkacalyaawe wiira aniphwanyihe utaphuwa woohimala. Yesu ahooluma nwo utaphuliyanwo. Nttwee niiweehe ratta iyo itthwiiyo.—Usome Luka 4:16-18.

3. Toko cinthoonyeraaya Levitiku 25:8-12, manannani isukuhuulu yo Yubilewu caakaviheraaya asarayeli?

³ Wiira niiweehe moolumo a Yesu ukati woopenlyaawe mwaha utaphuliya, woopacera nihaana niitthucaka isukuhuulu yo Yubilewu Nluku yaarumalyaawe apoovwaawe upanka khalayi. Yehova ahowiirela asarayeli: “Nreerihe mwaakha wonahansiini ni nlalyeere utaphuliya wo atthu otheene o nlaponi winyu. Uyo mwaakhooyo unhala ukhala Yubilewu awinyu, ni khula ntthu naahala uturuwela wanipuroni nawe, ni khula ntthu naahala uturuwela waamucyaawe.” (Usome Levitiku 25:8-12.) Mwaha uvinre, niheetthuca wiira nlamulo no Isapaatu naanaakavihera asarayeli. Vano Yubilewu, niireke aanaakavihera asarayeli? Wuupuwele wiira nsarayeli mmoca aanaalokihiya ni holakela utumiha ikhutu cawe wiira anlive ntthu nonlokiha. Waphiyaka  mwaakha wo Yubilewu, uyo aanaahokoloseriya ikhutu cawe. Ayo manannaayo, nsarayeli ‘aanaaturuwela wanipuroni nawe,’ ni pooti waakhuluvelaawe wiira aanaahala waahiyera asaanaawe ikhutu cawe. Vano, umuupuwele nlopwana yankhumelenle itthu yoosankiha ni aalakenle untumiha mwanawe mmoca—awula wiitumiha—wiira akhale ipottha ni akhitiri uliva itthu inlokihiyaawe. Waphiyaka mwaakha wo Yubilewu, ntthu aakhanle ipottha aanaatthuniheriya “uturuwela waamucyaawe.” Ayo manannaayo, khaavo ntthu aahala ukhala ipottha, woohiweherera utthukuliya wanihukuni. Iyo khweeliini inthoonyera wiira Yehova aanawaawacera apoovwaawe!

4-5. Nlattuni ukhanlyaaya itthu yofayita cinene wiitthuca isukuhuulu yo Yubilewu?

⁴ Manannani makhwaawe isukuhuulu yo Yubilewu caakaviheraaya apoovu? Yehova ahohimya: “Khaavo nlamuliya ukhala masikhini iriyariinyu, kontha Yehova khweeliini naahala wuuvaha iparakha nlaponi Yehova Nlukwaa inoovahaawe wiira ukhalane khampa itthuvo yoohiyeriya.” (Deut. 15:4) Iyo khweeliini inaavirikana ni itthu inkhumelela mahuku olelo! Ilelo, ntthu khanle masikhini naavira atepaka ukhala masikhini, ni mathaciri anaavira yatepaka uthaciri.

⁵ Ukhala wiira hiiva nikhanle makristau, khanineettela Nlamulo na Moocesi. Iyo maanaaya wiira hiiva khanineettela nlamulo naaruma upankiya Yubilewu—toko waataphula atthu akhanle ipottha, waalevelela atthu otheene anaalokiheehu ni waaturusela ikhutu caya. (Aroo. 7:4; 10:4; Efesu 2:15) Masi, ikhanle itthu yofayita cinene wiitthuca isukuhuulu yo Yubilewu. Nlattuni? Kontha toko Yehova caataphulaawe apoovwaawe ukati wo Yubilewu, hiiva ciicammo pooti utaphuliya.

6. Nlattuni apinaatamu otheene umpheelaaya utaphuliya?

⁶ Otheene cihu ninaapheela utaphuliya. Nlattuni? Kontha otheene nihokhalihiya ipottha niitthu yoonihuviha cinene—itampi. Nlattu wookhalana itampi, ninawuuluvala, ninaaweryaaciya ni ninaakhwa. Atthu enci anaakhitiri woona mananna itampi cinniirihacaaya yeewehaka waloolani awula yarwaaka umoonanana meetiku  usipiritaali. Ni otheene cihu ninaakhala ooriipiya nrima navaraka matampi. Apostolu Paulu heera wiira mwiirutthuni wawe, yahaavo itthu ‘yampurulela upanka matampi.’ Uyo ciicammo heera: “Kihotakhaliya! Tipani nhala ukoopola mwiirutthuni waka inkirweeha wuukhwani?”—Aroo. 7:23, 24.

7. Isaiya aahimyale inatirini nhina utaphuliya?

⁷ Wootteeliha nrima, Yehova hotthenkaca mananna oonoopola, awula unitaphula mmatampini. Yesu phikhitirihale wiira hiiva nitaphuliye. Myaakha coopwaha 700 uttuli hinaaya Yesu uwa watuninyani, porofeeta Isaiya ahohoolelihera uhimya wiira waanaahala ukhala utaphuliya—utaphuliya wooverihela wuunuwa, uvikana utaphuliya waakhalanaaya asarayeli khalayi ukati wo Yubilewu. Isaiya hantikha: “Nnepa wa Nkhulupale Pwiiya Yehova uri ni miiva, kontha Yehova hokithanla wiira kaalalyeere ihapari comaana atthu owaatanannya. Hokiveleeliha wiira kaavonihe ale ari ni nrima wooriipiya, wiira kilalyeere utaphuliya waatthu atthukiye.” (Isai. 61:1) Iyo inatiriiyo yaamwaaca pani?

8. Inatiri ya Isaiya yaamuuluma pani?

⁸ Iyo inatiriiyo yancenre wiirannya ukati Yesu waapacenryaawe uvara ntekwaawe watuninyani. Ukati Yesu waarwaalyaawe wasinakoka yo wasittatti yoonuwenlyaawe, uNasaree, uyo ahaasomela ayuuta yaari wasinakoka inatiri ya Isaiya. Ni uyo aheera wiira iyo inatiriiyo yaamwaaca uyova. Yesu aheera: “Nnepa wa Yehova uri ni miiva, kontha Uyo hokithanla wiira kaalalyeere ihapari comaana amasikhini. Hokiveleeliha wiira kilalyeere utaphuliya waatthu atthukiye ni utthukuliya meetho atthu ahinoona, wiira kiwoopole atthu anhuvihiya, wiira kilalyeere mwaakha wootthunnya wa Yehova.” (Luka 4:16-19) Yesu eerannyeehale cani iyo inatiriiyo?

9. Atthu enci ukati wa Yesu yaaweherera utaphuliya manannani?

⁹ Woopoliya awula utaphuliya waahimiye nnatirini ya Isaiya ni waasomalyaawe Yesu, wancenre wiirannya ukati wa Yesu. Yesu ahohimyeeha iyo ukati weeralyaawe: “Ilelo aheerannya moolumo owantikhiya yiiwaleenyu.” (Luka 4:21) Atthu enci yaamwiiwale Yesu asomaka inatiri ya Isaiya atthunaka yaaweherera wiira utaphuliya waya waahala ukhala nhina nsiyaasani, toko ilapo yo Isarayeli utaphuliya wiira ihiye uhooleliya ni aRooma. Atthunaka ayo yoopuwela toko alopwana eeli yeerale: “Hiiva naaweherera wiira uyo nlopwanooyo phuule aahala uwoopola asarayeli.” (Luka 24:13, 21) Masi hiiva ninaacuwela wiira Yesu khaasovenrihale attharyaawe waarukunuwela ahooleli o Rooma yaatulumu atthu. Uhiya commo, Yesu aarumale makristau ila itthwiila:  “Munlive Sesari itthu ya Sesari.” (Mat. 22:21) Vano manannani Yesu caataphunlyaawe atthu ule ukatyuule?

10. Yesu hohula iphiro wiira atthu ataphuliye inannani?

¹⁰ Mwaana a Nluku wile watuninyani wiira aataphule atthu ni mananna meeli. Yoopacera, Yesu hohula iphiro wiira atthu ataphuliye nhina citthu cowoothiya ceetthucihaaya ahooleli ottiini. Ayuuta enci ule ukatyuule yaakhala oohitaphuwa nlattu wolema ni citthu cowoothiya ceetthucihiya. (Mat. 5:31-37; 15:1-11) Ale yaalamuliya waahoolela apoovu o Isarayeli wiira yiitthuce myaha ca Nluku, pooti waneereehu wiira yaari atthu oohoona. Ayo yaanankhotta Mesiya ni ikhweeli ceetthucihaawe. Phimaana, khayaahiya ukhala wapiphini ni mmatampini. (Joau 9:1, 14-16, 35-41) Yesu aanaawiitthuciha citthu comaana atthu owaatanannya ni aanawaavaha ntakihero nomaana. Commo, uyo aanaalalya utaphuliya woominepani, awula, aanawaataphula ayo atthwaayo wiira ahithepiye ni citthu cowoothiya ceetthucihiya.—Mark. 1:22; 2:23–3:5.

11. Inannani yonayeeli Yesu naataphulaawe atthu?

¹¹ Yonayeeli, Yesu hokhitiriha atthu utaphuliya mmatampini. Avarelaka nteko wiivaherera wa Yesu, Nluku naalevelela itampi caya ale anaamini woopoliya wihu ni Yesu ni anthoonyera waamini waya ni citthu cimpankaaya. (Mabere. 10:12-18) Yesu heera: “Mwaana awoopolakani, nyuuva nnaahala khweeli utaphuwa.” (Joau 8:36) Nwo utaphuliyanwo, khweeliini ukhanle wooverihela wuunuwa uvikana utaphuliya waakhalanaaya asarayeli ukati wo Yubilewu! Nsarayeli aataphuliya ukati wo Yubilewu, atthunaka aanaahala uturuwela ukhala ipottha wahoolo, ni hataa ukhalaka cani, wahoolo uyo aamalela ukhwa. Masi utaphuliya ukhitirihalyaawe Yesu khunhala umala.

12. Atthuni waapacenre waaphwanya utaphuliya Yesu woolumalyaawe?

¹² Nihuku no Pentekositi mwaakha wo 33, Yehova ahaathanla ni nnepa wowaarya maapostolu, alopwana ni athiyana akhwaawe ookhuluvelya. Uyo haathanla ayo atthwaayo khampa asaanaawe wiira wahoolo yonwelelihiye ni yalamulele nkhayi ni Yesu wiirimu. (Aroo. 8:2, 15-17) Ayo phaatthu waapacenre waaphwanya utaphuliya Yesu waahimyalyaawe wasinakoka uNasaree. Ayo atthwaayo yahotaphuliya nhina citthu cowoothiya ni ilema coohinamaana caahooleli ottiini. Uhoolo wa Nluku, ayo yahotaphuliya nhina itampi inaarwaana atthu muukhwani. Yehova phitthenkacale nwo utaphuliyanwo, upacenre naale yaathanliye mwaakha wo 33, ni unhala umalela ukati wo Umwene wo Myaakha  1.000 wa Yesu. Citthuni comaana cinhala wiirannya ukhuma nna va, mpaka ukati unhalaaya umala Umwene wo Myaakha 1.000 wa Yesu?

13-14. Waahiya makristau oothanliya, atthuni-tho unaaphwanya utaphuliya Yesu woolumalyaawe?

¹³ Mahuku olelo, atthu enci ookhuluvelya olapo cotheene ntuninyani ampanka mphantte ikhurupu yo “ikhontwaa cikiina.” (Joau 10:16) Ayo khathanliye ni Nluku wiira arwee yalamulele nkhayi ni Yesu. Masi ahaana nweherero wo mbiiblyani wookhala wapeephoni mpaka. Iyo phi itthu weeva inwehereraa?

¹⁴ Hataa nenna co, weeva uhaana iparakha cikiina cirinaaya ale athanliye. Nlattu wo waamini wiivaherera wa Yesu, weeva pooti unlepela Yehova wiira oolevelele matampyaa. Commo, weeva unanciveliha Yehova ni unaakhalana nrima wootaphuwa. (Efesu 1:7; Apoka. 7:14, 15) Wuupuwele mananna cinnitteelaaya nrima nlattu wootaphuliya wiira nihithepiye ni citthu cowoothiya. Yesu aheera: “Nnaarwaa ucuwela ikhweeli, ni ikhweeli inaarwaa wuukhalihani ootaphuwa.” (Joau 8:32) Khweeliini, unaanitteela nrima cinene nlattu wootaphuliya ayo manannaayo!

15. Utaphuliyani unhala wiirannya ni iparakhani cinhaleehu waakhela woohipica?

¹⁵ Pooti wankupaliihu wiira unaahala wiirannya utaphuliya wooverihela wuunuwa. Woohipica, Yesu naahala umalamaliha wo nkwaha mmoca ittiini cowootha cotheene ni ikuvernu  caapinaatamu coohinamaana. Nluku naahala ukhikicera “mphwinko muulupale” wo atthu anonswalela ni naahala waacaaliha aavahaka ukumi woohimala upeephoni watuninyani va. (Apoka. 7:9, 14) Atthu enci anaahala wunwelelihiya ni anaahala utaphuliya mmasakhani aniwaanenlyaaya itampi ya Atamu—Mite. 24:15.

16. Utaphuliyani unhalaaya ukhalana apinaatamu wahoolo?

¹⁶ Ukati wo Umwene wo Myaakha 1.000, Yesu ni ale anhala ulamulela ni uyova anaahala waakavihera apinaatamu ukhalana ukumi womaana ni upatthani woohipahuwa ni Nluku. Uyo unhala ukhala ukati wootaphuliya apinaatamu, toko asarayeli caakhalaaya ootaphuliya ukati wo Yubilewu. Atthu otheene anonswalela Yehova anaahala ukhala oohipahuwa; anaahala utaphuliya mmatampini.

17. Isiyani Isaiya 65:21-23 inhimyaaya nhina mananna cinhalaaya ukhala apoovu a Nluku wahoolo? (Uwehe ilatarato iri wakaapani.)

¹⁷ Inatiri ya Isaiya 65:21-23, inaataphulela mananna makhalelo cinhalaaya ukhala watuninyani. (Usome.) Uyo ukatyuuyo khaninhala weemela paahi, woohivara itthu. Uhiya commo, Ibiiblya inthoonyera wiira ninaahala ukhalana nteko wofayita ni wootteeliha nrima. Pooti wankupaliihu wiira wuumaleloni Umwene wo Myaakha 1.000 wa Kristu, “cowumpiya cinaahala uhiya ukhala ipottha coopahuwa ni cinaahala uphwanya utaphuwa woottitthima waasaana a Nluku.”—Aroo. 8:21.

18. Nlattuni ninkhuluveleehu wiira ninaahala ukhala ootteeliya nrima cinene wahoolo?

¹⁸ Yehova ahopanka malamulo wiira asarayeli akawanihe ratta ukati waavirihaaya yavaraka nteko ni ukati waavirihaaya yamumulaka. Ni iyo phi itthu Yehova impheelaawe wiira apoovwaawe yapanke ukati wo Umwene wo Myaakha 1.000 wa Kristu. Uyo khweeliini unhala ukhala ukati woohoolelihera uvara miteko coominepani. Ilelo, wiira niphwanye utteeliya weekhweeli, nihaana ninswalelaka Nluku; ni upeephoni ninaahala ukhalana ukati woopanka iyo. Khweeliini, apinaatamu ookhuluvelya otheene unaahala waatteela nrima cinene nlattu wookhalana nteko wowaatteeliha ni nlattu wonswalela Nluku ukati wo Umwene wo Myaakha 1.000 wa Kristu.