Nihuku nimoca, anuunu ankhala u Nova Zelândia yahoona ividiyu nhina jw.org inhimya kontha isiyani Yehova khanwoonela uthunku paahi atthwaayo, masi uyo ciicammo naapanka itthu wiira aakavihere. (Isai. 63:7-9) Vano, ayo anuunwaayo yaholakela weettela itthu yeetthucilyaaya ni yahototha mananna oomoonihera uthunku ntthu. Iwoora ikiina, nenne nihukunne, ayo yahorwaa ulooca ni yahowoona athiyana yahaarina inupa ni yaarupa mmaparapaarani. Ukati ayo anuunwaayo waaturuwaaya ulooca anacisile icoolya caarweelyaaya uthumathuma, yahaalalyeera ale athiyanaale yavarelaka nteko ifolyetu ineera Uhuva Unaarwaa Umala Wanihukuni?

Athiyanaayo yahokela wunla. Ayo yaheera wiira khalayi yoonuwihiye khampa Saahiti a Yehova, masi wahoolo yahohiya unswalela Yehova ni cahovira myaakha cinci anahiileene unswalela. Masi mphiyaaruni yahonlompa yanlepelaka Yehova wiira aakavihere unturuwela. Anuunwiihu yahaasomela Ibiiblya ayo athiyanaaya ni yahaaleehanana wiira yancere waasomiha Ibiiblya. a

Hiiva ciicammo pooti untakiha Yehova ni uwoonihera uthunku atthu otheene, hataa ciicammo asimuciihu ni mayamunneehu o wanlokoni. Ciicammo, pooti wanaatotheehu atthu oohala uwoonihera uthunku naahimeryaka myaha ca Yehova.