1. Kontha isiyani Aparahaamu aalamuliyaawe ukupali wiira anhala ukhalana mwaana?

 YEHOVA ahonkhuluveliha mpatthannyaawe, Aparahaamu, wiira uyo aanaahala ukhalana mwaana ni maloko o wantuninyani otheene yaanaahala waakhela iparakha nlattu wawawe. (Upha. 15:5; 22:18) Aparahaamu aanaamwaamini cinene Nluku, phimaana uyo aanaakhuluvela wiira Nluku anhala wiirannyeeha inatiri cawe. Masi Aparahaamu ahopiiha myaakha 100 ni Sara, 90. Waanookhalaru commo, ayo yaari ahinanyara mwaana. (Upha. 21:1-7) Masi Ibiiblya ineera: “Nlattu wo niweherero, Aparahaamu ahaana waamini wiira anhala ukhala athumwanaya atthu olapo cinci, toko caakhuluvelihiyaawe”. (Aroo. 4:18) Ni nyuuva nnaacuwela wiira itthu Aparahaamu yaawehereraawe yaheerannya khweeliini. Uyo ahonnyara mwaana anwehereraawe, eehaniya Isaaki. Kontha isiyani Aparahaamu ahaana isariya yonkhuluvela Yehova?

2. Kontha isiyani Aparahaamu aahalaawe ukupali wiira inatiri ya Yehova yanhala wiirannya?

² Aparahaamu aanancuwela sana-saana Yehova. Phimaana, uyo ankupaleela wiira itthu Nluku yaakhuluvelihilyaawe yanhala wiirannya. (Aroo. 4:21) Yehova ahonkupali Aparahaamu ni ahomoona ukhala nasariya nlattu wo waamini wawe. (Tiya. 2:23) Toko cinooniheraaya Arooma 4:18, waamini wa Aparahaamu khawaahiyana niniweherero naarinaawe. Nttwee noone itthu Paulu innihimeryaawe nhina Arooma ikapiitulu 5 aacaka niweherero.

3. Isiyani Paulu yoolumilyaawe aacaka uweherera?

³ Paulu hohimya nlattuni ninlamuliyeehu ‘ukhuluvela niweherero nihu.’ (Aroo. 5:5) Uyo ciicammo naanikavihera ucuwela mananna niweherero nihu ninhalaaya ukhala noolipa. Hi ninaahala woopela mwaha itthu inhimyaaya Arooma 5:1-5, ni ukati unhaleehu woopela mwaha iyo itthwiiyo, mmananihe wuupuwela mananna niweherero ninyu ninviraaya nitepaka  ukhala noolipa. Itthu apostolu Paulu iwantikhenlyaawe arooma ciicammo inaahala wuukaviherani woona mananna oolipihaca waamini urineenyu mahukwaala. Masi woopacera, nttwee noone niweherero nomaana apostolu Paulu ninryaawe wiira hi pooti wankhuluveleehu.

4. Isiyani inoopeliya mwaha nhina Arooma 5:1, 2?

⁴ Nsome Arooma 5:1, 2. Ala akhanle moolumo Paulu aawantikhenlyaawe mayamunna o nloko no Roma. Mayamunna o nno nlokonno yaheetthuca ikhweeli ca Yehova ni ca Yesu. Waamini waya wahokhala woolipa ukati waakhanlyaaya makristau. Phimaana, Nluku ‘ahowoona ukhala anasariya nlattu wo waamini waya’ ni ahaathanla ninnepa wowaarya wiira wahoolo arwee yalamulele wiirimu nkhayi ni Yesu. Ayo yahaana yawehereraka iparakha yuulupale yaahalaaya uvahiya ni yaanaakupali wiira iyo khweeliini yanhala wiirannya.

5. Niwehereroni arinaaya makristau oothanliya?

⁵ Wahoolo, Paulu ahowantikhela iwarakha makristau o Efesu oolumaka niweherero naarinaaya. Nno niwehereronno naahela nhina ‘itthu inhalaaya waakhela ale akhanle owaarya.’ (Efesu 1:18) Ni ukati Paulu waawantikhenlyaawe iwarakha akoloso, uyo ahohimya nipuroni makristau oothanliya anhalaaya waakhela iparakha inwehereraaya. Paulu enre wiira ‘niweherero naya niri noosunkiya wiirimu.’ (Akol. 1:4, 5) Phimaana, niweherero no makristau oothanliya nikhanle wunwelelihiya wiira arwee yakhalane ukumi woohimala wiirimu, unhalaaya ulamulela nkhayi ni Kristu.—1 Atesal. 4:13-17; Apoka. 20:6.

6. Isiyani yaahimilyaawe munna mmoca oothanliya aacaka niweherero nawe?

⁶ Makristau oothanliya anaaweherera cinene nno niwehereronno. Munna mmoca ri nhina ikhurupu yo makristau oothanliya eehaniya Frederick Franz, ahohimya mananna ceecoonaawe. Uyo enre co: “Niweherero nihu nikhanle nookhuluvelya ni khweeliini ninaahala uwiirannyeela makristau oothanliya 144.000 otheene ni ninhala wiirannya nimananna nahoopuweleehu.” Mwaakha wo  1991, cinavinreene myaakha cinci yanvarelaka nteko Yehova sana-saana, amunna Franz yaheera-tho: “Hi khaninliyala ifayita irinaaya niweherero nihu. . . . Hi ninaalemeliha cinene niweherero nihu. Phataari uweherera, hataa civiraka myaakha imiliyau cene. Nna co, mi ninaatepa ukicivela cinene niweherero nihu.”

7-8. Niwehereroni makristau enci ookhuluvelya arinaaya? (Nwehe Arooma 8:20, 21.)

⁷ Atthu enci anonswalela Yehova ilelo arina niweherero nikiina. Ayo arina niweherero nimocaaru ninne naarinaawe Aparahaamu. Ayo anweherera ukhalana ukumi woohimala watuninyani, yalamuleliyaka nuumwene wa Nluku. (Mabere. 11:8-10, 13) Paulu ahantikha oolumaka nno niweherero nooreeranno. (Nsome Arooma 8:20, 21. b) Isiyani nyuuva yuuvanreni nrima ukati mwaasomeenyu Ibiiblya ni weetthucileenyu nno niweherero nomaananno? Niireke wiira itthu yuuvanreni nrima waari wiitthuca wiira unaahala uphiya ukati unhaleenyu ukhala woohimatampi ni ukhala ntthu oohipahuwa? Awula wuuttenleni nrima nlattu woocuwela wiira upeephoni nnaahala uwoona-tho atthu yoocivelani akhwile? Woohaakanyaca, cihaavo citthu cinci comaana cinweherereehu wiirannyaa wahoolo.

⁸ Hataa ukhalaka wiira niweherero nihu nikhanle urwaa ukhala wiirimu awula watuninyani, otheene cihu nihaana isariya yootteeliya nrima nlattu wo niweherero nihu. Nno niwehereronno pooti utepa ukhala noolipa. Paulu hohimya wiira iyo itthwiiyo pooti wiirannya. Itthu yantikhilyaawe inaanikavihera utepa ukhuluvela wiira niweherero nihu ninaahala wiirannya.

9-10. Toko cinthoonyeraaya ntakihero na Paulu, makristau ahaana yawehereraka isiyani? (Nwehe Arooma 5:3.) (Nwehe ciicammo ilatarato.)

⁹ Nsome Arooma 5:3. c Paulu enre wiira masakha annikhumelela pooti ulipiha niweherero  nihu. Iyo itthwiiyo pooti unitikhiniha, masi khweeliini atthari otheene a Yesu ahaana yawehereraka wiira anaahala waakhumelela masakha. Moone ntakihero na Paulu. Uyo ahowiirela makristau o Tesalonika co: “Uwakati naariihu ninyuuvaca, hi nahoohimeryani wiira yanhala unikhumelela masakha ni iyo phi itthu ineerannyaaka.” (1 Atesal. 3:4) Ni Paulu ahowantikhela akorintu co: “Khanimpheela wiira nyuuva mayamunna nkhale woohicuwela masakha anikhumelenle . . . mpaka khanaacuwela wakhala wiira nanhala ukhala akumi awula mena.”—2 Akor. 1:8; 11:23-27.

¹⁰ Mahukwaala, hi ciicammo pooti wanweherereehu unikhumelela masakha oohirikarika. (2 Tim. 3:12) Vano nyuuva? Nhopaca ulupatthiya nlattu woomwaamini Yesu? Niireke apatthaniinyu ni amuciinyu ahopaca wuutarawacani? Atthunaka ayo khanootafitini saana. Awula nyuuva anawuukhumelelani masakha untekoni winyu nlattu wookhotta wootha awula winnya. (Mabere. 13:18) Pooti ukhalaka wiira nyuuva nhopaca ulupatthiya niikuvernu nlattu woolalya ihapari comaana. Masi hataa yuuphwanyakani masakhani, Paulu enre wiira hi ninaakhala ootteeliya. Nlattuni?

11. Kontha isiyani ninlamuliyeehu upanka khula itthu inkhitiriihu wiira nivilele nihiwaceraka masakhani anhala unikhumelela?

¹¹ Hiivano pooti ukhala ootteeliya yanikhumelelaka masakha, kontha ayo masakhaayo anaanikavihera uthoonyera ratta ikhalelo yofayita cinene. Arooma 5:3 ineera wiira “uhuva unaawaana uvilela.” Makristau otheene anaahala waakhumelela masakha. Phimaana, makristau otheene ahaana yavilelaka. Vano nihaana nilakelaka uvilela hataa yanikhumelelaka masakhani. Commo phinhaleehu woona niirannyaaka niweherero nihu. Hi khanimpheela ukhala toko atthu Yesu yaalattanihenryaawe niipyo cimmorela wamwala. Ayo atthwaayo, wiipaceroni anaatthuna ikhweeli waatteelaka nrima. Masi ‘yaakhumelelaka masakha,’ ayo anaahiya umwaamini Nluku. (Mat. 13:5, 6, 20, 21) Ikhanle ikhweeli wiira ulupatthiya awula uhuva khunciva, masi navilelaka ninaaphwanya ifayita cinci. Manannani?

12. Iparakhani cimphwanyeehu wakhalaka wiira ninaavilela masakha?

¹² Tiyaku heera wiira uvilela masakha anniphwanya unaaniphwanyiha ifayita. Uyo hantikha co: “Nhiye uvilela winyu wiira umalihere ntekwaaya, wiira nkhale oolikana ni oohittheka nhina wo citthu cotheene, woohuuhaleelani itthu.” (Tiya. 1:2-4) Tiyaku heera wiira uvilela wihu unaaniphwanyiha ifayita. Ifayitani yeeyo? Uvilela wihu pooti unikavihera upisa nrima, ukhalana waamini ni unkhuluvela Yehova. Masi uvilela wihu pooti uniwaanela iparakha ikhwaawe yofayita.

13-14. Isiyani ineerannya uwakati ninvileleehu ni iyo itthwiiyo inkavihera cani niweherero nihu? (Nwehe Arooma 5:4.)

¹³ Nsome Arooma 5:4. d Paulu heera wiira uvilela wihu “unaaniiriha ukupaliya ni Nluku.” Iyo maanaaya wiira nyuuva mwavilelaka, Yehova naawoonani ukhala ntthu omaana. Masi khunakhala wiira uyo unantteela nrima nlattu woowoonani nhuvaka. Yehova unantteela nrima nlattu nyuuva woovilela, kahi nlattu woohuva winyu. Uvilela winyu unaawiirihani ukupaliya ni Nluku. Iyo khweeliini ikhanle iparakha yuulupale!—Isaa. 5:12.

¹⁴ Muupuwele wiira Aparahaamu ahovilela hataa yankhumelelaka masakha menci ni Yehova wahontteela nrima cinene nlattu wo iyo itthwiiyo. Yehova aamoona ukhala mpatthannyaawe ni ahomoona ukhala nasariya. (Upha. 15:6; Aroo. 4:13, 22) Iyo itthwiiyo pooti uniirannyeela. Ukupaliya wihu ni Yehova  khunakhala nlattu woovara cinene ntekhwawe, ni khunakhala nlattu woovahaceriya mirintti cinci wanlokoni. Masi Yehova nonikupali nlattu woovilela ni waamini wihu. Ni hataa nikhalaka owuuluvala, amirawo ni hataa yanikhumelelaka isiyani, otheene cihu ninaahala ukhitiri uvilela. Ahaavo masakha anookhumelelani nenna co ni anvileleenyu? Wakhala commo, nhiliyale wiira Yehova unantteela nrima cinene nlattu woowoonani nvilelaka. Noonaka wiira Yehova naanikupali, niweherero nirinehu wiira naahala wiirannyeeha citthu cikhuluvelihilyaawe ninaatepa ukhala noolipa.

15. Isiyani Paulu ihimilyaawe nhina Arooma 5:4, ni nikohoni ninkhumelela?

¹⁵ Toko Paulu cihimilyaawe, hiiva ninaakupaliya ni Yehova namwiiwelelaka ni navilelaka masakha. Moone itthu Paulu yaawantikhenlyaawe arooma. Uyo enre: “Vano uvilelanwo unaaniiriha ukupaliya ni Nluku, ukupaliya ni Nluku unaaniphwaniya niweherero, ni pooti wankhuluveleehu nno niwehereronno.” (Aroo. 5:4, 5) Ayo moolumwaayo pooti ukhalaka toko wiira anaavaanyiha itthu inhimyaaya Arooma 5:2, Paulu wenryaawe wiira makristau o Roma yahaakhela niweherero ‘ninkhuma wa Nluku.’ Phimaana, ntthu pooti wiikoha co: ‘Wakhala wiira ayo makristawaayo yahaakhela niweherero, vano nlattuni Paulu woolumilyaawe-tho niweherero?’

16. Manannani niweherero nirineehu ninhalaaya wuncererya? (Nwehe ciicammo ilatarato.)

¹⁶ Hi ninaakhitiri wiiweeha moolumo a Paulu noopuwelaka wiira niweherero nihu pooti wuncererya awula wuunuwa ni ulipa. Wootakihera, nyuuva nnawuupuwela ikwaha yoopacera yeewileenyu niweherero no Umwene wa Nluku ukati waasomihiyeenyu Ibiiblya? Wiipaceroni, nyuuva atthunaka moopuwela wiira iparakha yoorwaa ukhala wapeephoni va watuniyani va ihotepa ureera cinene, phimaana khinlamuliya ukhala ikhweeli. Masi wahoolo, ukati wancuwenleenyu ratta Yehova ni mwaacuwenleenyu saana inatiri cawe, mwahokela utepa ukhuluvela wiira citthu cikhuluvelihilyaawe cinaahala wiirannya.

17. Manannani niweherero nihu ninoonuwaaya, hataa ukhalaka wiira nihopattisiya?

 ¹⁷ Hataa ukati upattisiyeenyu, nyuuva khanhiile uncuweleeha Yehova ni niweherero ninyu nanvira nitepaka ulipa. (Mabere. 5:13–6:1) Nyuuva nnaahala woona mwaaneeneenyu wiira itthu inhimyaaya Aroma 5:2-4 ikhanle ikhweeli. Nyuuva atthunaka ahopaca wuukhumelelani masankiho menci, masi khamwaahiyerenre uvilela ni mwahoona wiira Yehova hotteeliya nrima nlattu woovilela winyu. Ni nlattu woocuwela wiira Yehova nawuufentani, nna co nyuuva nnaatepa ukhuluvela ni uweherera citthu cikhuluvelihilyaawe. Nwo uwehereranwo unaarukunusa makhalelweenyu otheene. Uhookaviherani waawacera saana amuciinyu, unaawiirihani ulakela upanka citthu comaana ni mpaka unaawiirihani uvarela nteko saana ukatiinyu.

18. Nikhuluvelihoni Yehova nonivahaawe?

¹⁸ Paulu ciicammo nawuuluma niweherero ninkhalaneehu Yehova anaaminiki. Uyo enre wiira niweherereonihu khweeliini ninaahala wiirannya. Isiyani innikupaliha iyo itthwiiyo? Paulu ahowantikhela makristau co: “Pooti wankhuluveleehu nno niwehereronno; kontha nifento na Nluku nihomwaruseliya wanrimani wihu nlattu wo nnepa wowaarya, nivahiyeehu.” (Aroo. 5:5) Khweeliini, hi nihaana isariya yookhuluvela niweherero Yehova nivahilyaawe.

19. Isiyani nyuuva inlamuliyeenyu ukupali nhina niweherero ninyu?

¹⁹ Nkumihe ukati wiira muupuwele iparakha Yehova cankhuluvelihilyaawe Aparahaamu ni mananna Yehova cankupanlyaawe Aparahaamu mpaka umoona ukhala mpwanaawe. Niweherero na Aparahaamu khanaari no mahala. Ibiiblya ineera: “Aparahaamu uviriha wawe ukati avilelaka, yaheerannya itthu yaakhuluvelihiyaawe.” (Mabere. 6:15; 11:9, 18; Aroo. 4:20-22) Itthu yaawehereraawe Aparahaamu yaheerannya. Nyuuva ciicammo nnaahala waakhela iparakha cinweherereenyu mwaahihiyeke umwiiwelela Nluku. Nyuuva nnaahala utthuveliya nlattu wooweherera! (Aroo. 12:12) Paulu hantikha co: “Nluku novaha niweherero atepe wuutteelihani nrima ni oovaheni nnema ninci, nlattu nyuuva wonkhuluvela. Ni nkaviheriyaka ninnepa wowaarya, nlipihe cinene niweherero ninyu.”—Aroo. 15:13.