Nyuuva nhosoma ratta irevista Ukhalenla co nantano? Vano, mmananihe waakhula ala makohwaala:

‘Urehererya moopuwelelweehu’ maanaaya wiira cani? (Aroo. 12:2)

Khaninlamuliya wiikurumica upanka citthu comaana paahi. Nihaana niiwehaka wanrimani wihu ni upanka marukunuso wiira nintteelihe nrima Yehova.—w23.01, ipaag. 8-9.

Manannani ninlamuliyeehu uwehera citthu cineerannya ntuninyani?

Hi ninaapheela ucuwela citthu cineerannya ntuninyani kontha ninaacuwela wiira cinawiirannyeeha inatiri co mbiiblyani. Masi uhiya umananiha veekha cihu uvira nimwaruselaka citthu cinoopuweleehu wiira phinhala wiirannya, unaareera uweha citthu cikumiheriye mphiyaaruni mumphwinkoni wa Yehova. (1 Akor. 1:10)—w23.02, ipaag. 16.

Upattisiya wa Yesu unvirikana cani nuupattisiya waattharyaawe?

Yesu khaalamuliya ulompa avahereraka ukumyaawe wa Yehova, kontha aayariye nloko naatthu yeevaherenre wa Nluku. Uyo aari nlopwana oohimatampi, phimaana khaalamuliya uttharuwa itampi.—w23.03, ipaag. 5.

Nnohala waakavihera cani akhunaninyu ukomentari umikutthaanoni?

Nyuuva nnolamuliya wuuluma vakaani mweehaniyaka wiira nkomentari. Commo, akhwiinyu ciicammo anaahala ukhalana ukati wookomentari. Ciicammo, khaninlamuliya ukomentari ipontu cinci. Mwakomentariki iparaagarafu yotheene, akhwiinyu khanhala uhalana itthu yoohala ukomentari.—w23.04, ipaag. 23.

“Iphiro Yowaarya” inoolumiya nhina Isaiya 35:8 inaaciya isiyani?

Iyo iphirweeyo khinakhala iphiro yokhweeli. Masi unaaciya nkwaha ayuuta waakhalannyaaya ukati waahalaaya ukhuma u Babilooniya yarwaaka u Yerusalemu. Masi iyo iphirweeyo maanaya isiyani ilelo? Uhinaphiya mwaakha wo 1919, yahotthenkaciya iphiro uvariyaka nteko wootaphulela, wimpirimiri ilivuru cihu ni miteko cikhwaawe. Apoovu a Nluku anaweetta “Iphiro Yowaarya” inhala waapiiha upeephoni yo mminepani ni waakhela iparakha co Umwene wa Nluku.—w23.05, ipaag. 15-19.

Miruku ikapiitulu 9 inaawuuluma athiyana eeli. Athiyanani yaayo?

Ilivuru yo Miruku inaamuuluma “nthiyana nlolo” ni nlattulo nawe ninawaarweeha atthu “Mmahiye.” Iyo ciicammo inaamuuluma nthiyana oocuwelaca ni ineera wiira uyo nthiyanooyo ukhanle “ucuwelaca weekhweeli.” Nlattulo nawe ninawaaphwanyiha atthu ‘ucuwelaca’ ni ukumi woohimala. (Miru. 9:1, 6, 13, 18)—w23.06, ipaag. 22-24.

Nhina mananna Yehova canwacenryaawe Loti, oonihenre cani wiira nawiiyeviha ni khanlipalipa?

Yehova ahomwiirela Loti wiira atthawele ncoko woomwaakoni. Masi Loti aholepela utthawela u Zoar ni Yehova ahontthunela.—w23.07, ipaag. 21.

Isiyani athiyana inlamuliyaaya upanka wakhalaka wiira awannyaya anawoona ipornografia?

Athiyana ahaana yuupuwelaka wiira khunakhala nlattu wawaya. Ayo ahaana yiikurumicaka ulipihaca upatthannyaaya ni Yehova ni waatakiha athiyana anoolumiya mbiiblyani waariipile nrima, masi yaamaalihiye. Ayo ciicammo pooti waakavihera awannyaya unyema citthu caahala uwiiriha woona ipornografia.—w23.08, ipaag. 14-17.

Nakohakohiyaka citthu cinkupaliihu, uwehera ratta makohwaayo unhala unikavihera cani waakhula saana?

Uhiya wuupuwela wiira ntthu nonikohakoha nopheela univeeha, waanaareera uwehera makohwaawe khampa itthu inhala unikavihera ucuwela isiyani khweeliini inoonaawe ukhalana ifayita. Commo, ninaahala ukhitiri umwaakhula saana.—w23.09, ipaag. 17.

Ntakihero na Maria ninniitthuciha isiyani nhina ulepela ukaviheriya?

Ukati Maria waacuwenlyaawe wiira anhala unnyara Mesiya, uyo ahototha ukaviheriya naatthu akhwaawe. Nlayikha Gabriel ni ciicammo Elisapeti ahonlipiha Maria yanromolelaka Cowantikha Cowaarya. Hiiva ciicammo ninaahala ulipihiya nimayamunna.—w23.10, ipaag. 15.

Yehova naakhula cani ulompa wihu?

Uyo heera wiira naahala waakhula ulompa wihu ni nawuupuwela wakhala wiira itthu inlepeleehu inaavaranaca niitthu uyova impheelaawe. (Jer. 29:12) Yehova pooti waakhula nimananna oovirikana mavekelo meeli oolikanaca. Masi inanna inaakhulaawe inaahala unaanikavihera khula ikwaha.—w23.11, ipaag. 21-22.

Arooma 5:2 inawuuluma “niweherero.” Vano kontha isiyani ninawuulumiya-tho niweherero nhina iveerusu 4?

Ukati ntthu uneewaawe ihapari comaana, uyo pooti ukhalana niweherero wiira naahala ukhalana ukumi woohimala wapeephoni va watuninyani va. Masi yankhumelelaka masakha, nno niwehereronno ninaatepa ukhala noolipa ni ninaavirikana niniweherero naarinaawe wuupaceroni.—w23.12, ipaag. 12-13.