KHWEELIINI, nyuuva nnaasukhurweela itthuvo cotheene Yehova oovahilyaaweni, uhela nhina utaphuwa wuuvahilyaaweni wiira nlakele mwaaneeneenyu mananna oovarela nteko nnyo itthuvonnyo. Khampa inhimyaaya Ibiiblya, nipha ciicammo, ikhanle itthuvo ya Yehova. Ibiiblya ineera co: “Iphaawu impankiya wiira intteelihe nrima ntthu. Ni ciicammo, nipha ninantteeliha nrima ntthu.” (Ekles. 10:19; Isaa. 104:15) Masi nyuuva pooti nhotoko wiiwa wiira atthu akiina ahaana masankiho nlattu wo nipha. Uhiya commo, atthu enci ahaana moopuwelelo oovirikana nhina nipha nlattu wolapo inkhalaaya ni wokhapilaaya. Vano, isiyani inhala waakavihera makristau ulakela wakhala wiira anaahala uwurya nipha awula mena?

Hataa nikhalaka mapuroni awula niyariyaka manannani, hiivano nihaana ukhuluvela ikano ca Nluku. Commo, thinhaleehu ukhalana ukumi wootteeliya.

Nyuuva atthunaka nhotoko wiiwa wiiriyaka atthu enci ntuninyani motheene anaawurya venci woohihiyerera. Akiina anwurya atthunaka nlattu wowaacivaciva wanrimani waya va ni akiinaayo anaahapaliya wiira aliyale masankiho arinaaya. Mapuro makhwaawe, ntthu nohapaliya venci nooniya khampa nakuru awula naapuhihiya.

Khweeliini, makristau ahaana yavarelaka nteko malakihero omaana a Mpattusyaaya. Wootakihera, Yehova naahimyaca citthu cowoopiha cinkhumelela nlattu wohapaliya awula uwurya venci. Nhina Miruku 23:29-35, nawuulumiya ntthu aawunrye cinene mpaka uhapaliya ni anaahimiya masakha yankhumelenle. a Daniel, humu mmoca o Europa, nawuupuwela mananna ukumyaawe waaryaaya hinancuwela Yehova ni hineetthuca ikano cawe. Uyo neera: “Miyaano kanhapaliya venci ni nlattu wo iyo, mi kaholakela upanka citthu cowoopiha, ni yankikhumelela masakha. Mpaka nna va, keemelaka kuupuwelaka nnyo citthunnyo, mi kinkhala pusya.”

Manannani ninhaleehu ulakela saana uwurya awula uhiwurya nipha ni usempa masakha? Hi nihaana uhiya moopuwelelo a Nluku yeettihaka citthu cinlakeleehu upanka.

Nttwee noone itthu Ibiiblya inhimyaaya nhina uwurya nipha, ni nlattuni atthu akiina anaawurya nipha.

Ibiiblya khinhimya wiira uwurya nipha niihelelaka mpika ikhanle itthu yootakhala. Khweeliini, iyo ineera wiira “uwurya nipha ikhanle itthu unaatteeliha nrima.” (Ekles. 9:7) Uwakati nkiina, Yesu anwurya ciicammo ni aswali akiina okhuluvelya a Yehova ciicammo yanwurya.—Mat. 26:27-29; Luka 7:34; 1 Tim. 5:23.

Ibiiblya inaahimya mananna cinvirikanaaya uwurya nipha vakaani ni uhapaliya: “Iyo inahimya sana-saana wiira nhihapaliye.” (Efesu 5:18) Iyo ciicammo inaahimya wiira ‘ananhapaliya khanhala ukela muumweneni wa Nluku.’ (1 Akor. 6:10) Unawoonannya sana-saana wiira Yehova nanrusa cinene ntthu nowurya venci ni unanrusa venci uhapaliya. Uhiya waatakiha atthu o ntuninyani, hiiva nihaana ulakela upanka citthu Nluku cimpheelaawe.

Atthu enci anoopuwela wiira pooti uwurya venci, masi woohihapaliya. Iyo ikhanle itthu yowoopiha. Ibiiblya inaahimya sana-saana wiira ntthu neepanka ipottha yonipha pooti untthekela Yehova ni upanka itampi yuulupale. (Titu 2:3; Miru. 20:1) Yesu ciicammo ahohimya wiira ntthu nowurya venci pooti uhikela ipeephoni Nluku ikhuluvelihilyaawe. (Luka 21:34-36) Vano isiyani inhala  waakavihera makristau unsempa masakha ankhumelela nlattu woohapaliya?

Yaahala ukhala itthu yowoopiha waatakiha atthu o nipuro niyariyeehu ni ulakela uwurya nipha nlattu atthwaayo ciicammo anaawurya. Khampa makristau, nimpheela upanka khula itthu inkhitiriihu wiira nintteelihe nrima Yehova, hataa nhina ulya ni uwurya. Upanka iyo unawoonihera ucuwelaca. Ibiiblya inaanuupusera wiira wapheela ulye ni uwurye ni upanke khula itthu inkhitiriinyu wiira muntteelihe nrima Nluku. (1 Akor. 10:31) Muupuwele makoho ni mattharelelo o mbiiblyani anhimiya vathiva:

Miiva kinwurya nipha wiira atthu aciveliye ni mi? Ilivuru ya Nkwaha 23:2 ineera: ‘Nhipanke itthu nlattu woowoona atthu enci yapankaka iyo itthwiiyo.’ Yehova aapheela uwuupusera asarayeli wiira ahaatakihe atthu yahanciveliha Yehova. Ila ikanweela nanlelo ihaana ifayita ni ciicammo nihaana neettelaka mahukweehwaala. Hiiva naahiyereraka atthu akiina yanihapusaka nhina mananna cinoopuweleehu ni cinlakeehu mananna oowurya nipha, hiivano pooti wanonhiyeehu unswalela Yehova ni utthara ikano cawe.—Aroo. 12:2.

Kiireke wiira kinwurya nipha wiira atthu akiina akoone ukhala oolipa? Mapuro makiina uwurya venci ikhanle itthu ilemaleliye ni ihinooniya ukhala yoohoopiha. (1 Pet. 4:3) Masi moone ikano yo mbiiblyani inhimiya nhina 1 Akorintu 16:13, ineera: “Nhiitthaale, nlipihace waamini winyu, nlipe nrima, nkhalane ikuru.” Vano niireke wiira nipha pooti unkavihera ntthu ukhala oolipa? Mena, masi nno pooti umwiriha ntthu uhikhitiri wuupuwela saana wiira alakele upanka citthu comaana. Phimaana, uwurya venci uhiya uvaha ikuru ntthu, unaamoocyeehaca. Isaiya 28:7 ineera wiira atthu aneehiyerera ni nipha anahaala wiihononaaca.

Ikuru ceekhweeli cinwa wa Yehova ni nnyo ikurunnyo cinaanikavihera ‘uhiitthaala ni ukhalana waamini woolipa.’ (Isaa. 18:32) Hiiva ninhala woonihera uhiitthaala neekurumicaka ulakela upanka citthu cinhala ukhikicera upatthaniihu ni Yehova. Yesu ahoonihera ukhalana nnyo ikurunnyo ukati waaryaawe va watuninyani va, ni atthu enci yaananhisimu kontha uyo aanaalipa nrima ni aholakela upanka citthu comaana.

Miiva kinwurya nipha wiira kiliyale masakha ankikhumelela? Nasaalimu mmoca hantikha co: “Ukati waakhanlyaaka nimasukhuli nyuuva Pwiiya [Yehova] mwahokimaaliha.” (Isaa. 94:19)  Phimaana, nyuuva mwakhalaka nimasukhuli nlattu wo wuukhumelelani masakha, munkhuluvele Yehova, nhikhuluvele nipha. Inanna imoca yowoonihera unkhuluvela Yehova ukhanle unlompa cinene. Atthu enci anaatotha ukaviheriya nimunna o wanlokoni ni upanka commo wahaakavihera wiicoona ratta. Khweeliini, uwurya nipha wiira nvilele masakha anookhumelelani pooti wuulolovihani ni khannohala ukhalana ikuru yoopanka citthu comaana. (Ose. 4:11) Munna Daniel, romoliye wiipaceroni, heera: “Mi kaakhala nimasukhuli menci ni wankiriipa nrima cinene. Phimaana, kaanaawurya nipha wiira kimalihe ayo masukhulyaayo. Masi nlattu woopanka commo, masakhaaka yahowiira utepaca ni upatthani waarinaaka naasimpwanaaka wahomala.” Isiyani yankavihenre munna Daniel? Uyo heera: “Mi kahoona wiira kahaana kintothaka Yehova, kahi nipha. Wiimaleloni, mi kahokhitiri uvilela masakhaaka.” Yehova nokhala niiraati khula ukati wiira anikavihere, hataa ukhalaka wiira masakheehu akhanle moolupale cinene.—Afili. 4:6, 7; 1 Pet. 5:7.

Wakhala wiira nyuuva nnaawuryaka, muupuwelace wakhala wiira nhaana mpankaka marukunuso nhina ikwaha cinwuryeenyu awula uvukula nipha ninwuryakeenyu. Nyuuva pooti wiikoha co: ‘Haavo mmucyaaka awula mpatthannyaaka thoonyenre wiira nokhala niisukhuli nlattu miiva woowurya cinene awula ikwaha cinci?’ Wakhala wiira haavo, paahi iyo inthoonyera wiira woohicuwelela, nyuuva nhokela uwurya cinene awula ikwaha cinci. ‘Nna va kihancera uwurya nipha cinene uvikana mananna caawuryaaka khalayi?’ Ntthu immwiirannyeela iyo itthwiiyo, pooti ukhalaka wiira khinankela iviisiyu yoowurya venci, masi woohipica uyo pooti ukhalana iyo iviisiyu iyo. ‘Miiva kinawoorya ukhala mahuku menci woohiwurya nipha?’ Wakhala wiira khannoorya, iyo inthoonyera wiira nyuuva nhokhalana iviisiyu yoowurya cinene. Wakhala commo, atthunaka nhaana ntothaka ukaviheriya nimeetiku wiira nkhitiri uhiya iyo iviisiyu iyo.

Ukhala wiira uwurya nipha pooti unwaanela ntthu masakha, ahaavo atthu anlakela uhiwurya. Atthu akiina, khanwurya nipha kontha khaninaacivela. Yaahala ukhala itthu yomaana hiiva uhisimu itthu ilakenlyaaya akhunanihu woohiwuuluma pusya.

Pooti ukhalaka wiira nyuuva nholakela wiihelela mpika nipha ninwuryeenyu. Awula wiihelela mpika  ikwaha cinwuryeenyu; atthunaka nlakenle uwurya ikwaha imoca paahi khula isumana awula uwurya vakaani mwamalihaka ulya. Atthu akhwaawe aholakela niphani nihinhalaaya uwurya, toko ulakela uwurya iviinyu ni cerveja paahi, ni uhiwurya mapha ootepa uhapala. Nyuuva mweehelelaka mipika toko nnyo, khunhala wuurikani weettela nnyo mipikannyo ukati woowurya. Nkristau ookhomaala neehelela nnyo mipikannyo khanoona ihaaya nlattu wo itthu inhalaaya wuupuwela akhunanawe.

Unaareera ciicammo uwacera isiyani atthu akiina inhalaaya wuupuwela. Arooma 14:21 ineera: “Phataari uhikhuura inama, uhiwurya iviinyu wala uhipanka hataa itthu inhala unkakathula munneenyu.” Nnohala weettela cani iyo ikanweeyo? Mooniheraka nifento. Moonaka wiira haavo munna uhinhala uncivela awoonakani nwuryaka nipha, phataari nyuuva uhiwurya uyo munnooyo akhalaka wakhiviru. Ayo manannaayo, nnaahala woonihera wiira nnaawacera itthu inoopuwelaaya akhunaninyu ni khannototha upanka paahi ile inoocivelani.—1 Akor. 10:24.

Ciicammo, pooti ukhalaka wiira ikuvernu ncoko unkhaleenyu ihokumihera malamulo nhina uwurya mapha. Wakhalaka commo, nkristau haana eettelaka ayo malamulwaayo. Wootakihera, ayo malamulwaayo pooti uhimya wiira atthu ahinaaya upiihera myaakha khaata khanlamuliya uwurya nipha awula malamulo pooti uhimya wiira ntthu wunrye nipha khanlamuliya weettiha ikaaro ni uvarela nteko ikaruma cikiina.—Aroo. 13:1-5.

Yehova honivaha itthuvo comaana, ni itthuvo imoca inivahilyaawe ukhanle uthanla mwaaneeneehu mananna oovarela nteko nnyo itthuvonnyo. Iyo inhela nhina ulakela itthu yoohala ulya ni uwurya. Khweeliini, hi ninansukhuru cinene Yehova nlattu woonivaha nwo utaphuwanwo, ni nimpheela woonihera unsukhuru wihu nalakelaka upanka citthu cinontteeliha nrima.