1. Namuupuwelaka Aparahaamu, isiyani atthunaka ineekoheehu?

 ATTHU enci aheewa oolumiyaka Aparahaamu, masi ayo khanoncuwela sana-saana. Hi ninancuwela sana-saana uyo nlopwana noolumiya mbiiblyanuuyo. Wootakihera, hi ninaacuwela wiira Aparahaamu heehaniya “apaapaaya atthu otheene arina waamini.” (Aroo. 4:11) Atthunaka nyuuva nnawiikoha co: ‘Kiireke miiva kinaahala ukhalana waamini woolipa toko caarinaawe Aparahaamu?’ Iyee, nyuuva pooti ukhala waamini toko uyo caarinaawe.

2. Kontha isiyani iryaaya itthu yofayita cinene usoma ntakihero na Aparahaamu? (Nwehe Tiyaku 2:22, 23.)

² Itthu imoca inhala wuukaviherani ukhalana waamini toko Aparahaamu ukhanle usoma matakihero nihiyenryaawe. Uwakati waarumiyaawe ni Nluku, Aparahaamu ahothamela uttayi nuuwannyawe ni ahokhala wonwo myaakha cinci mmaheemani. Ciicammo, uyo aholakela unvaha mwaamwanawe mmoca, Isaaki. Citthu cotheene nnyo cinnoonihera wiira Aparahaamu aanaamwaamini cinene Yehova. Waamini Aparahaamu wooniheraawe nhina citthu caapankaawe wahomwiiriha Nluku umoona uyova ukhala mpwanaawe. (Nsome Tiyaku 2:22, 23. b) Yehova nopheela wiira hiiva otheene, hataa ni nyuuva ciicammo, nikhale asimpwanaawe. Phimaana, uyo ahomwiiriha Paulu ni Tiyaku wantikha  mbiiblyani makhalelo a Aparahaamu anreera hiiva utakiha. Nhina ula mwahoola, ninaarwaa woona isiyani inniitthucihaaya Arooma ikapiitulu 4 ni Tiyaku ikapiitulu 2 nhina makhalelo a Aparahaamu. Nhina nnyo ikapiitulu piilinnyo, inawuulumiya itthu yuulupale cinene yaarinaawe Aparahaamu.

3. Iveerusuni yo mbiiblyani Paulu ni Tiyaku aromonlyaaya?

³ Paulu ni Tiyaku ahoromolaca ciicammo moolumo amphwanyannya nhina Uphattuwaca 15:6: “Aparahaamu ahomwaamini Yehova, ni iyo itthwiiyo yahomwiiriha wooniya ukhala nasariya.” Yehova nomoona ukhala ntthu nasariya awula omaana ule nopanka itthu impheelaawe ni nonswalela. Ikhanle itthu yooreera ucuwela wiira atthu oopahuwa toko hi, pooti wooniya ni Yehova ukhala anasariya, awula atthu omaana. Nyuuva khawoocivelani Yehova uwoonani ukhala ntthu commo? Masi vano nttwee noone kontha isiyani Yehova aamwiihannyaawe Aparahaamu nasariya ni isiyani ninlamuliyeehu upanka napheelaka wiira Yehova anoone ukhala atthu anasariya.

4. Isiyani inwiiriha apinaatamu uhikhala anasariya?

⁴ Nhina iwarakha yaawantikhenlyaawe arooma, Paulu hohimya wiira apinaatamu otheene ahaana matampi. (Aroo. 3:23) Vano unkhitirya cani Nluku uwoona apinaatamu akiina ukhala anasariya ni omaana? Wiira aakavihere makristau ucuweleeha iyo itthwiiyo, Paulu ahomuuluma Aparahaamu.

5. Kontha isiyani Yehova waalamuliyaawe umwiihana aparahaamu nasariya? (Nwehe Arooma 4:2-4.)

⁵ Waari uwakati Aparahaamu waakhalaawe ilapo yo Kanaa Yehova wenryaawe wiira uyo aari nasariya. Kontha isiyani Yehova enryaawe commo? Niireke wiira enre commo kontha Aparahaamu antthara malamulo a Moceesi woohivonyaniha? Mena. (Aroo. 4:13) Nincuwela iyo itthwiiyo kontha Nlamulo na Moceesi yaavahiya apoovu o Isarayeli cinavinreene myaakha 400 Nluku namwiirenleene Aparahaamu wiira aamoona ukhala nasariya. Vano nlattuni Yehova waamwiirenlyaawe Aparahaamu wiira khanle nlopwana nasariya? Yehova ahomoonihera Aparahaamu unamaana ni ahomwiihana nasariya nlattu wo waamini waarinaawe.—Nsome Arooma 4:2-4. c

6. Kontha isiyani Yehova nohalaawe uwoona ukhala anasariya apinaatamu oopahuwa?

⁶ Paulu hotaphulela mananna ntthu cinthoonyeraawe umwaamini Nluku. Uyo heera co: “Waamini winyu unaawiirihani ukhala atthu osariya.” (Aroo. 4:5) Paulu aheera-tho co: “Inanna imocaaru, Davidi ciicammo ahooluma utteeliya wa nlopwana Nluku nomoonaawe ukhala nasariya, woohiwehacera citthu cimpankaawe. ‘Ootteeliya phuule noleveleliya makoosyaawe ni ule noleveleliya itampi cawe. Ootteeliya phi ntthu hinooniya ni Yehova ukhala oottheka.’” (Aroo. 4:6-8; Isaa. 32:1, 2) Nluku nawaalevelela itampi caya ale anoonihera umwaamini. Uyo naalevelela matampyaaya otheene ni khanoopuwela-tho coovonya caya. Ni Yehova nomoonela uyo ntthuuyo ukhala nasariya ni oohipahuwa nlattu wo waamini wawe.

7. Kontha isiyani waneereehu wiira aswali ookhuluvelya okhalayi yaari anasariya?

⁷ Khweeliini, Aparahaamu, Davidi ni aswali a Yehova ookhuluvelya akhwaawe yaheehaniya anasariya. Waahookhalaru commo, ayova nanlelo yaari atthu oopahuwa ni nanlelo anatampi. Masi nlattu wo waamini waya, Yehova oonela ukhala oohipahuwa awula omaana, venci-venci aalikanihaka naatthu yahanswalela. (Efesu 2:12) Nhina iwarakha yaawantikhenlyaawe arooma, Paulu ahotaphulela wiira nihaana ukhalana waamini napheelaka ukhala apatthannyaawe Nluku. Vano toko Aparahaamu ni Davidi, namwaaminiki Yehova, hiiva ciicammo ninaahala ukhala apatthannyaawe.

8-9. Moopuweleloni oovirikana Paulu ni Tiyaku yantikhilyaaya, ni nlattuni?

⁸ Ukhuma nenne nokhalayi, ahooleli ottiini anaavaanyihana nhina isiyani irina ifayita: waamini awula citthu ntthuuyo cimpankaawe. Akiina aneetthuciha wiira ntthu apheelaka woopwa, haana ankupaliki Pwiiya Yesu Kristu. Nyuuva pooti nhotoko wiiwa wiiriyaka: “Mmwaakhelele Yesu ni nnawoopwa.” Ahooleli ottiini enci mpaka anaavarelaka nteko moolumo a Paulu: “[Ahaavo atthu] Nluku nowoonaawe ukhala nasariya, woohiwehacera citthu cimpankaawe.” (Aroo. 4:6) Akiina aneera wiira nyuuva pooti woopwa mwapankaka mikwaha nthotolaka mapuro answalaswaliya anooniya ukhala ofayita cinene niikereeca awula ittiini cineetteliya ni ciicammo aneera wiira nnohala woopwa mwapankaka citthu comaana. Ayova pooti uromola moolumo yantikhiye nhina Tiyaku 2:24, aneera: “Nlopwana nohala wooniya ukhala nasariya nlattu wo citthu cimpankaawe, kahi nlattu wo waamini paahi.”

⁹ Nlattu wo ayo moopuwelelo oovirikanaayo, anamasomasoma Ibiiblya ahomalihera yiiraka wiira Paulu ni Tiyaku anaavaanyihana yoolumacaka nhina waamini ni woonihera nwo waamininwo nhina citthu cimpankeehu. Ahooleli ottiini cikiina aneera wiira Paulu aakupali wiira ntthu haana ukhalana waamini wiira ancivelihe Nluku. Vano Tiyaku aakupali wiira ntthu haana apankaka citthu cowoonihera waamini wawe wiira ciicammo ancivelihe Nluku. Namasoma mmoca enre wiira Tiyaku kheeweeha kontha isiyani Paulu aahimyaawe wiira ntthu haana akhalanaka waamini apheelaka ukhala nasariya awula onciveliha Nluku ni uyo namasomooyo enre wiira Tiyaku aanaavaanyiha itthu yuulumilyaawe Paulu. Masi citthu cantikhilyaawe Paulu ni ciicammo Tiyaku cinkhuma wa Yehova. (2 Tim. 3:16) Phimaana, nihaana nitothaka ucuwela isiyani ineeriha ukhala toko wiira ile yuulumilyaawe Paulu inaavirikana niile yuulumilyaawe Tiyaku. Ni wiiweeha myaha cinoolumiya nhina iwarakha ca Paulu ni ya Tiyaku unaahala unikavihera wiiweeha uyo mwahooyo.

10. Paulu heera wiira ntthuuyo pooti wooniya ukhala nasariya, woohiwehaceriya citthu cimpankaawe. Citthuni caacaawe? (Nwehe Arooma 3:21, 28.) (Nwehe ciicammo ilatarato.)

 ¹⁰ Nhina Arooma ikapiitulu 3 ni 4, Paulu heera wiira ntthuuyo pooti wooniya ukhala nasariya, woohiwehaceriya citthu cimpankaawe. Masi citthuni caacaawe? Venci-venci, uyo aaca citthu apoovu caarumiyaaya upanka mmalamuloni Moceesi aavahiyaawe umwaakoni Sinai. (Nsome Arooma 3:21, 28. d) Unkhala toko wiira ukati wa Paulu, makristau enci yaari ayuuta waanaarika ukupali wiira khayaalamuliya weettela-tho malamulo a Moceesi ni citthu caarumiyaaya upanka nhina ayo malamulwaayo. Phimaana, Paulu ahomuuluma Aparahaamu, eeraka wiira ntthu pooti wooniya ukhala nasariya kahi nlattu wo “citthu cinrumaaya malamulo awula cimpankaawe,” masi nlattu wo waamini wawe. Iyo itthwiiyo inaanilipiha venci hiiva, kontha inaaniitthuciha wiira namwaaminiki Nluku ni Yesu, hiivano ninaahala wooniya ni Nluku ukhala anasariya

11. Citthuni Tiyaku caacaawe?

¹¹ Vano Tiyaku nhina ikapiitulu 2 khaacile “citthu caarumaaya malamulo” a Moceesi caacaawe Paulu. Tiyaku aaca citthu cotheene ntthuuyo cimpankaawe, awula citthu ni miteko makristau cinlamuliyaaya upanka khula nihuku. Cennyo miteko ciyo phinhala woonihera wakhala wiira uyo nkristauuyo khweeliini naamwaamini Nluku awula mena. Moone matakihero meeli.

12. Tiyaku taphulenle cani mananna waamini wihu cihinhiyanaaya nicitthu cimpankeehu? (Nwehe ciicammo ilatarato.)

¹² Ntakihero noopacera: Tiyaku ahowuuluma makristau wiira ahaana yaawaceraka akhunanaya mananna mamocaaru. Uyo ahovaha ntakihero na nlopwana mmoca anwacenre saana thaciri masi anthanyile mmasikhini. Tiyaku ahohimya wiira uyo nlopwanooyo eehimya ukhalana waamini, masi citthu caapankaawe caanoonihera wiira khaarina  waamini. (Tiya. 2:1-5, 9) Ntakihero nonayeeli: Tiyaku ahomuuluma munna awula anuunu amoca yahaarina itthu yoowara ni yoolya. Masi atthwaayo khayaapanka itthu wiira yaakavihere. Hataa ayo atthwaayo yiiraka wiira ahaana waamini, citthu caapankaaya caanoonihera wiira kharina waamini. Phimaana Tiyaku ahantikha eeraka: “Ntthu himpanka hataa itthu inoonihera waamini wawe, uyo ntthuuyo waamini wawe ukhanle wookhwa.”—Tiya. 2:14-17.

13. Ntakiheroni Tiyaku naattonkacilyaawe ninoonihera wiira nihaana nooniheraka waamini nicitthu cimpankeehu? (Nwehe Tiyaku 2:25, 26.)

¹³ Tiyaku ahonhimya Raabi ukhala ntakihero na ntthu aarina waamini ni oonihenre waamini wawe nicitthu caapankaawe. (Nsome Tiyaku 2:25, 26. e) Raabi aheewa oolumiyaka Yehova ni ancuwela wiira uyo aanaakhikicera asarayeli. (Jos. 2:9-11) Phimaana, Raabi ahoonihera waamini wawe nicitthu caapankilyaawe. Uyo ahaakhikicera anamahottela eeli o Isarayeli yaapheela wiiviya. Uyo khaari nthiyana nsarayeeli ni ahaana matampi, masi ahooniya ukhala nasariya, khampa Aparahaamu cooniyaawe ukhala nasariya. Ntakihero na Raabi ninaaniitthuciha wiira waamini wihu uhaana woonannyaaka nhina citthu cimpankeehu.

14. Nlattuni waneereehu wiira Paulu ni Tiyaku itthu yaahimilyaaya khinvirikana?

¹⁴ Phimaana, Paulu ni Tiyaku yaapheela paahi woonihera mananna waamini cihinhiyanaaya nicitthu cimpankeehu. Masi ayo ataphulenle uyo mwahooyo nimananna oovirikana. Paulu aapheela wiitthuciha wiira makristau ayuuta khayaahala ukhitiri unciveliha Yehova nlattu wo wiikurumica paahi woopanka citthu caarumaaya malamulo a Moceesi. Vano Tiyaku aapheela wiitthuciha wiira makristau otheene ahaana yooniheraka waamini waya nicitthu comaana cinaapankelaaya akhunanaya.

15. Manannani ninhaleehu woonihera waamini wihu nhina citthu cimpankeehu? (Nwehe ciicammo ilatarato.)

 ¹⁵ Yehova khenre wiira napheelaka wooniya ukhala anasariya nihaana nipanka citthu cimocaaru caapankilyaawe Aparahaamu. Masi ahaavo mananna menci owoonihera waamini wihu nicitthu cimpankeehu. Hiivano pooti uwaakhelela sana-saana atthu ampaceriha uwa wanlokoni, waakavihera mayamunna anaakhumelela masakha ni waawacera saana amuciihu. Napankaka commo, Yehova unaahala uncivela ni naahala unicaaliha. (Aroo. 15:7; 1 Tim. 5:4, 8; 1 Jo. 3:18) Mananna makhwaawe ofayita cinene owoonihera waamini wihu ukhanle ulalya ihapari comaana. (1 Tim. 4:16) Otheene cihu pooti woonihera nicitthu cimpankeehu wiira nihaana waamini ni wiira inatiri ca Yehova cikhanle ceekhweeli ni wiira citthu cotheene cimpankaawe cinaaniphwanyiha maana. Napankaka commo, Nluku naahala unoona ukhala anasariya ni ninaahala ukhala apatthannyaawe.

16. Niwehereroni Aparahaamu naarinaawe nankavihenre ukhalana waamini?

¹⁶ Nhina ikapiitulu 4 yo Arooma, inawuulumiya itthu ikiina immwiitthucereehu Aparahaamu: ifayitaaya nweherero. Yehova ahonkhuluveliha Aparahaamu wiira nlattu wawawe uyova, atthu enci yaahala ukhala oocaalihiya. Muupuwele inanna Aparahaamu caatteeliyaawe weewilyaawe iyo itthwiiyo. (Upha. 12:3; 15:5; 17:4; Aroo. 4:17) Masi, ukati weera uviraka ni Aparahaamu aarina myaakha 100 ni amwaarawe Sara yaarina 90. Ayoca nanlelo khayaarina mwaana. Moonelo wa apinaatamu, waakhala toko khawaahala woorannya wiira Aparahaamu ni Sara yanhala ukhalana-tho mwaana. Ni iyo yaari itthu yaahala unrikihela waamini Aparahaamu. ‘Masi aweheehaka nweherero, uyo ahaamini wiira aahala ukhala athumwanaya maloko menci.’ (Aroo. 4:18, 19) Wiimaleloni, mwaana aawehereriya ahoyariya ni Aparahaamu ahokhala athumwaane Isaaki.—Aroo. 4:20-22.

17. Nincuwela cani wiira hi pooti wooniya ukhala anasariya ni Nluku ni ukhala apatthannyaawe?

¹⁷ Khampa conneehu, nikupaliki wiira Yehova naahala unoona ukhala anasariya khampa caamonnyaawe Aparahaamu. Khweeliini, Paulu ahoolumaca-tho iyo itthwiiyo ukati wenryaawe co: “Masi, moolumo ‘nlattu wo iyo itthwiiyo ahokupaliya’ khayantikhiye nlattu wawawe [Aparahaamu] paahi, masi ciicammo nlattu wawihu, ukhala wiira hiiva ninkookupaliya, kontha nihomwaamini Ule munwelelihile Yesu, Pwiiyeehu.” (Aroo. 4:23, 24) Toko Aparahaamu, hiiva ciicammo nihaana nooniheraka waamini wihu nicitthu cimpankeehu ni ciicammo ukhalana nweherero. Paulu ahoolumaca-tho aacaka nweherero nhina Arooma ikapiitulu 5. Ni iyo phi itthu inhaleehu wuuluma nhina mwaha nwooyo.