1. Nttonkace nlattakihero ninoonihera nlattuni ninlamuliyeehu utthuna uhooleliya ni Yehova.

 MUUPUWELE wiira nhorimela ntakhwani. Iyo ikhanle itakhwa yowoopiha: cihaavo inama cowoopiha, asinttuuttu ooluma ni oovaha iretta, miri coohapala, malikitti ni maluku owoopiha wuukakathulani. Nyuuva khamwaahala utepa woova wakhalaka wiira nri ni ntthu noohoolelani nocuwela sana-saana iyo itakhweeyo ni nocuwela mapuroni anoopiha ni mapuroni anreera uvira. Ituninya inkhaleehu iri khampa itakhwa yowoopiha. Khacimala citthu cimpheela uhonona upatthaniihu ni Yehova. Masi, haavo ntthu oocuwelaca nonihoolela: Yehova. Uyo naaniviriha mapuro ahirivo citthu cowoopiha ni naanikavihera uphiya unrweehu: upeephoni unhaleehu ukhalana ukumi woohimala.

2. Yehova nonihoolela cani?

² Yehova nonihoolela cani? Venci-venci, uyo nonihoolela avarelaka nteko Nuulumo nawe, Ibiiblya. Masi uyo ciicammo nawaaruma apinaatamu unihoolela. Wootakihera, uyo naaruma “iphottha yookhuluvelya ni yankhili” wiira initthenkacere iyoolya yo mminepani ni inikavihere ulakela upanka citthu comaana. (Mat. 24:45) Yehova ciicammo nawaaruma apinaatamu akiina wiira anihoolele, toko mamootoli osirikwiitu ni mahumu o wanlokoni. Ayo anaanilipiha ni anaanivaha malakihero wiira anikavihere uviriha masankiho. Hi ninansukhuru cinene Yehova nlattu woonihoolela saana ukati woorikarika unkhaleehuula, uhanlyaaya vakaani umalamalihiya ila ituninyeela. Unihoolela wawe unaanikavihera uhihiya ukhalana upatthani womaana nuuyova ni uhihiya weettela iphiro yomaana.

3. Ninhala wiitthucani?

³ Hataa nicuwelaka iyo itthwiiyo, atthunaka ukati nkiina unaanirika weettela mattharelelo a Yehova. Utepa wakhalaka wiira ayo malakiherwaayo nivahiye naapinaatamu oopahuwa. Masi nlattuni unnirikaaya weettela? Atthunaka pooti ukhalaka wiira hiiva khaninoona ukhala yosariya ikano ivahiyeehu ni ninoopuwela wiira khinkhuma wa Yehova.  Uyo phuukati unlamuliyeehu utepa ukhuluvela wiira Yehova phinaahoolela apoovwaawe ni ukhuluvela wiira ikano cinnivahaawe cinaanipanka ratta. Ula mwahoola utthenkaciye wiira unikavihere ulipihaca ukhuluvela wihu wiira Yehova phinaahoolela apoovwaawe. Ninaahala woopela mwaha (1) manannani Yehova caahoolelaawe apoovwaawe khalayi, (2) manannani cinaahoolelaawe apoovwaawe nna co ni (3) kontha isiyani uhihiya ukhuluvela malakihero a Yehova unaaniphwanyiha ifayita.

MANANNA YEHOVA CAAHOOLELAAWE ASARAYELI

4-5. Yehova oonihenre cani wiira phanvahacenre Moceesi waahoolela asarayeli? (Nwehe ilatarato yo wakaapani.)

⁴ Yehova ahonthanla Moceesi wiira aakumihe apoovu a Nluku u Egito. Yehova ahowoonihera asarayeli sana-saana wiira uyova phanvahacenre Moceesi waahoolela. Wootakihera, Yehova ahowaana nihutte naakhala iriyaryaaya ni weelaka nno nihuttenno naakhala mooro. (Nkw. 13:21) Moceesi antthara nno nihuttennno ni nno nahaarweeha u Mar Vermelho. Apoovu yahotuthuwa ukati wonnaaya wiira uhoolo waya yaari maaci, masi uttuli waya yanwa anatoropa o Egito. Ayo yahancera wuupuwela wiira Moceesi ahovonyanana nttala, phimaana aarweehaka umaacini. Masi Moceesi khaavonyananne nttala. Yehova phaalakenle waarweeha nwo ni phaamwiirihile Moceesi waaviriha uyo nttalooyo. (Nkw. 14:2) Nlattu woopanka commo, Yehova ahoonihera ikuru cawe nimananna ootikhiniha.—Nkw. 14:26-28.

⁵ Myaakha coottharanaca 40 caavinre, Moceesi khaahiile ukhuluvela mattharelelo a Yehova ukati waahoolelaawe asarayeli muuthakoni. a Nuuwakatyaaya, Yehova ahohiya nne nihuttenne waheemani ya Moceesi wiira asarayeli otheene yoone. (Nkw. 33:7, 9, 10) Iriyari nno nihuttenno, Yehova phoolumaawe anvahaka malakihero Moceesi, ni Moceesi aanawaahimerya apoovu malakihero otheene. (Isaa. 99:7) Asarayeli yaanawoona sana-saana wiira Yehova ahonvahacera Moceesi waahoolela.

6. Asarayeli yaawehera cani malakihero yaavahiyaaya ni Yehova? (Manummeru 14:2, 10, 11)

⁶ Masi asarayeli enci yahohiya woona wiira Yehova phaahoolela ni anruma Moceesi waavaha malakihero. (Nsome Manummeru 14:2, 10, 11. b) Ikwaha cinci, ayo yahoonihera uhikupali wiira Yehova anvahacenre Moceesi waahoolela. Phimaana, Yehova aholakela wiira ile ikhurupwiile khayaahala ukela ilapo yaakhuluvelihilyaawe waavaha apoovwaawe.—Manu. 14:30.

7. Asarayeli akiina yoonihenre cani wiira yaanaakhuluvela mananna Yehova caahoolelaawe. (Manummeru 14:24.) (Nwehe ciicammo ilatarato.)

⁷ Waanookhalaru commo, yahaavo asarayeli yaatthanre malakihero a Yehova. Wootakihera, Yehova aheera co: “Kalepe . . . khahiile ukiitthara ninrimaawe wotheene.” (Nsome Manummeru 14:24. c) Yehova ahontthuvela Kalepe ni mpaka ahomwiirela wiira athanle mwaaneennyaawe nipuro naahala uncivela ukhala nhina ilapo Yehova yaakhuluvelihilyaawe waavaha apoovwaawe. (Jos. 14:12-14) Ikhurupu ikiina yaasarayeli yaayaryeele muuthankoni ciicammo khayaahiile umwiiwelela Yehova. Moceesi ukhwa wawe ni uthanliya wawe Josuwe wiira aahoolele apoovu, ayo ‘yahonhisima mahuku otheene yaakhanlyaaya.’ (Jos. 4:14) Phimaana, Yehova ahaacaaliha asarayeli ni ahaakelila ilapo yenryaawe wiira anhala waavaha.—Jos. 21:43, 44.

8. Ntaphulele mananna Yehova caahoolelaawe apoovwaawe ukati wo mamwene. (Nwehe ciicammo ilatarato.)

⁸ Uvira waya myaakha, Yehova ahaathanla alopwana  yeehaniya masuwiisi wiira yaahoolele apoovwaawe. Wahoolo, ukati waaryaaya mamwene, Yehova ahaathanla maporofeeta wiira yaahoolele apoovwaawe. Mamwene yaamwiiwelela Yehova yanvahiya ikano naayo maporofeetaayo. Wootakihera, Davidi aheeyeviha ni ahotthuna ikano yaavahiyaawe niporofeeta Nataa. (2 Sam. 12:7, 13; 1 Ikor. 17:3, 4) Mwene Yehosafaa aheettela ikano yaavahiyaawe niporofeeta Jaaziel. Uyo ukatyuuyo, uyo apheela ucuwela isiyani yaahalaawe waapanka apoovu ni manannani aahalaawe waalipiha wiira ‘awaamini maporofeeta a Nluku.’ (2 Ikor. 20:14, 15, 20) Mwene Ezekiyani anaattottha porofeeta Isaiya ukati waakhalaawe nimasukhuli. (Isai. 37:1-6) Mamwene yeettelaka mattharelelo a Yehova, yaanaacaalihiya ni apoovu otheene yaanaakhikiceriya. (2 Ikor. 20:29, 30; 32:22) Waanawoonannya sana-saana wiira Yehova phaaruma ayo maporofeetaayo wiira yaahoolele apoovwaawe. Waanookhalaru commo, mamwene menci ni hataa ciicammo apoovu yahaakhotta maporofeeta a Yehova.—Jer. 35:12-15.

YEHOVA AAHOOLELA CANI MAKRISTAU OOPACERA?

9. Tipani Yehova anvahacenryaawe waahoolela makristau oopacera? (Nwehe ciicammo ilatarato.)

⁹ Yehova aatthenkacile nloko neekristau ukati waatthapeleliyaaya ifesta yeehaniya Pentekositi, mwaakha wo 33. Vano, aahoolela cani ayo makristau oopaceraayo? Yehova honthanla Yesu wiira akhale nhooleli o nloko notheene no makristau. (Efesu 5:23) Masi Yesu khaamuulumana khula nkristau wiira anhimerye isiyani yaalamuliyaawe upanka. Uyo ahaaruma maapostolu ni mahumu o Yerusalemu wiira yaavahe malakihero makristau oopacera. (Mite. 15:1, 2) Ciicammo, yahothanliya mahuku akhwaawe wiira naayo yaavahe malakihero makristau o mmalokoni.—1 Atesal. 5:12; Titu 1:5.

10. a) Makristau enci yaawehenre cani malakihero yaavahiyaaya? (Miteko 15:30, 31) b) Kontha isiyani atthu akiina khayaakhuluvenle apinaatamu Yehova yaavahacenryaawe waahoolela apoovwaawe? (Nwehe ikwaaturu “ Kontha isiyani atthu akiina khanaamini wiira Yehova nawaavahacera apinaatamu waahoolela apoovwaawe?”)

¹⁰ Niireke wiira makristau oopacera yahokhuluvela mananna Yehova aahoolelaawe apoovwaawe? Iyee. Makristau enci waanaatteela nrima nlattu wootthara malakihero yaavahiyaaya. Ni ayo ‘waanaatteela nrima nlattu woolipihiya.’ (Nsome Miteko 15:30, 31. d) Vano mahukwaala, Yehova naahoolela cani apoovwaawe?

 YEHOVA NAAHOOLELA CANI APOOVWAAWE ILELO?

11. Nttonkace ntakihero ninoonihera mananna Yehova naahoolelaawe apoovwaawe ilelo.

¹¹ Yehova nanlelo nawaahoolela apoovwaawe. Uyo naahoolela avarelaka nteko Ibiiblya ni ciicammo honvahacera mwanawe, Yesu, nhooleli o nloko no makristau. Niireke wiira ninawoona citthu cinthoonyera sana-saana wiira Yehova nanlelo nawaaruma apinaatamu wiira yaavahe malakihero apoovwaawe? Iyee. Muupuwele citthu ciirannyeele ukhuma mwaakha wo 1870. Charles Taze Russell ni asipatthannyaawe, ciicammo yaasoma Ibiiblya, yahocuwelela wiira mwaakha wo 1914 yanhala wiirannya itthu yuulupale nhina Umwene wa Nluku. (Dan. 4:25, 26) Wiira acuwelele iyo itthwiiyo, ayo yahosoma cinene inatiri co mbiiblyani. Niireke wiira Yehova ahaacaaliha wiira yiiweehe citthu caasomasomaaya? Khweeliini, ahaacaaliha. Itthu yiirannyeele ntuninyani mwaakha wo 1914 inthoonyera wiira khweeli uyo mwaakhooyo phancenryaaya ulamulela Umwene wa Nluku. Yooyo mwaakhooyo, phaapacenryaaya ikhotto yuulupale yo ntuninyani ni ukhuma uyo mwaakhooyo cinvira citepaka winciva iretta, uttettemelaca itthaya ni itala. (Luka 21:10, 11) Khweeliini, Yehova ahaacaaliha ayo alopwanaayo wiira yaakavihere apoovwaawe.

12-13. Ukati waalavaniyaaya ikhotto yonayeeli yo ntuninyani isiyani yaapankiye wiira nteko woolalyeera urwee uhoolo?

¹² Muupuwele ciicammo citthu ceerannyeele ukati waalavaniyaaya ikhotto yonayeeli yo ntuninyani. Mayamunna o nipuro naahooleliya miteko cihu ntuninyani motheene yahosoma itthu inhimyaaya Apokalipise 17:8. Uweheeha waya iyo iveeruswiiyo, ayo yahoona wiira ile ikhottweele khayaahala umalela u Harmacetooni. Masi wanhala uphiya ukati wo nnema vakaani wiira nteko woolalyeera urwee uhoolo. Vano ayo yaholakela utthenkaca icikola yo Gileade wiira asomihiye mamisiyonaariyu yaahala uvira yalalyeeraka ntuninyani motheene. Ciicammo, ipottha yookhuluvelya yahotthenkaca Ikuurusu yo Miteko ca Nluku yeehaniye Curso do Ministério Teocrático e wiira atthu otheene mmalokoni yiitthucihiye ulalyeera ni usomiha Ibiiblya. Ala manannaala, apoovu a Nluku yantthenkaciya wiira avare nteko mwinci wahoolo.

¹³ Noopuwelaka citthu ciirannyaale khalayi, unawoonannya wiira Yehova aanawaahoolela apoovwaawe ule ukati woorikoole. Ni ukhuma ukati waapacenryaaya ikhotto yonayeeli yo ntuninyani, apoovu a Yehova ilapo cinci anaakhitiri uvara nteko  woolalyeera woohilupatthiya venci. Khweeliini, nteko woolalyeera ntuninyani motheene unvira utepaka urwaa uhoolo.

14. Kontha isiyani nihaana nikhuluvelaka malakihero o mumphwinkoni wa Yehova ni o mahumu? (Apokalipise 2:1) (Nwehe ciicammo ilatarato.)

¹⁴ Ilelo, mayamunna o Mphwinko wo Mahumu Unhoolela khunhiya utthara malakihero a Yesu. Nlattu wootthara malakiherwaawe, ayo anawiikurumica wiira citthu cotheene cinlakelaaya cihivirikane niitthu impheelaawe Yesu. Ciicammo, mamootoli osirikwiitu ni mahumu anaarumiya wiira yaavahe malakihero mayamunna mmalokoni. f Mahumu akhanle makristau oothanliya ari wantatani no nlopwana na Yesu. (Nsome Apokalipise 2:1. g) Khweeliini mahumu otheene akhanle oopahuwa ni anaavonya. Moceesi ni Josuwe ciicammo cihaavo citthu caavonyihalyaaya. (Manu. 20:12; Jos. 9:14, 15; Aroo. 3:23) Unookhalaru commo, hiiva ninawoona wiira Yehova naahoolela ipottha yookhuluvelya ni nawaahoolela mahumu. Ni uyo khanhala uhiya waakavihera ayo alopwanaayo ‘mahuku otheene mpaka wiimaleloni ila ituninya yoohinamaaneela.’ (Mat. 28:20) Phimaana, otheene cihu nihaana nikhuluvelaka malakihero anvahiyeehu ni Yesu naaruma ayo alopwana ookhuluvelyaayo wiira anivahe malakihero.

KONTHA ISIYANI UNAAREERA WAAKHULUVELA ATTHU YEHOVA ANAARUMAAWE UNIHOOLELA?

15-16. Nyuuva nnowiitthucera isiyani atthu yaatthanre ikano ca Yehova?

¹⁵ Nattharaka malakihero a Yehova, hi ninaaphwanya ifayita cinci. Wootakihera, amunna Andy ni amwaaraya aneehaniya Robyn yahotthara ikano invahiyeehu niipottha yookhuluvelya inhimya wiira nihikhale nitothaka ukhalana mihakhu cinci. (Nwehe niwehero no Matewus 6:22 nhina Bíblia de Estudo.) Nlattu woopanka commo, ayo yahokhitiri ukavihera nteko wootekateka mumphwinkoni wa Yehova. Anuunu Robyn aheera: “Ikwaha cikhwaawe, hi nahaana nikhalaka inupa coophuryaaca cinene coohikhalana icozinha yo mpaani. Mi ciicammo kahaana kitumihaka maakinaaka menci oolatha ifootu, hataa ukhalaka wiira yankicivela. Mi mpaka kahonla ukati waatumihacilyaaka ayo maakinaayo. Masi toko Sara, amwaara a Aparahaamu, mi kaholakela uhiweha uttuli.” (Mabere. 11:15) Masi amunna Andy ni amwaaraya anoonela cani upanka waya commo? Anuunu Robyn aheera: “Hi wahonitteela  nrima cinene nlattu woocuwela wiira naananvaha Yehova yotheene yaakhitiriihu. Navaraka nteko mumphwinkoni wa Yehova, hi ninaakhitiri woona vakaani mananna makhalelweehu cinhalaaya ukhala upeephoni.” Vano awannyaya, amunna Andy, aheera co: “Hi unaanitteela nrima nlattu woocuwela wiira ninaavarela nteko ukatiihu ni ikuru cihu cotheene wiira nikavihere miteko ca Yehova.”

¹⁶ Moone itthu ikhwaawe inoonihera nlattuni unreeraaya utthara malakihero a Yehova. Anuunu Márcia umaliha waya usoma icikola, yaholakela utthara ikano yaavahiyaaya yowancera uvara nteko weepiyoneera. (Mat. 6:33; Aroo. 12:11) Ayo aneera: “Mi kahovahiya ibolsa de estudo; maanaaya wiira pooti waarwaaka usoma wuuniversidade myaakha 4 woohiliva. Masi mi kaapheela unvarela nteko Yehova cinene. Phimaana, kaholakela urwaa icikola yankaani insomihaniya miteko co mmatatani wiira kikhitiri uphwanya nteko ukati waahalaaka ukhala piyoneera. Ni kinawoona wiira kahopanka saana. Nna co, mi kinvara nteko weepiyoneera ni kinaakhalana ukati wookavihera u Peteli ni wompankela Yehova citthu comaana cikhwaawe.”

17. Iparakhani-tho ninhaleehu waakhela naahihiyeke utthara ikano ca Yehova? (Isaiya 48:17, 18)

¹⁷ Ukati nkhwaawe, hi ninaavahiya ikano cinnikhikicera mumphwinkoni wa Yehova. Wootakihera, ninaahimeriya wiira ukhala nitothaka uphwanya mihakhu cinci unawoopiha ni uhiiwelela malamulo a Nluku ciicammo unawoopiha. Nattharaka nnyo ikanonnyo, ninawoonelela wiira umwiiwelela Yehova unaanipanka saana. Unaanitaphuwa nrima ni ninaanyema masakha menci. (1 Tim. 6:9, 10) Napankaka commo, hi ninaakhitiri unswalela Yehova ninrimeehu wotheene! Khiivo hataa itthu ntuninyani inhala unitteeliha nrima cinene uvikana utteeliya unkhalaneehu nlattu wootthara malakihero a Yehova.—Nsome Isaiya 48:17, 18. h

18. Kontha isiyani nyuuva khannopheela uhiya utthara malakihero a Yehova?

¹⁸ Ukati wo myaakha 1.000 unhalaawe ulamulela Yesu, Yehova khanhala uhiya waaruma apinaatamu wiira yaavahe malakihero apoovwaawe. (Isaa. 45:16) Niireke wiira ninaahala utthara malakihero anhaleehu uvahiya hataa ukhalaka wiira waanicivenle upanka itthu ikiina? Hi khunhala unirikela wiiwelela malakihero uyo ukatyuuyo, wakhalaka wiira nenna co ninawiikurumica wiiwelela malakihero anvahiyeehu. Phimaana, khanimpheela uhiya wiiwelela malakihero a Yehova. (Isai. 32:1, 2; Mabere. 13:17) Naahihiyeke untthara ule nonihoolela, Yehova, hi pooti wahinooveehu hataa itthu. Uyo naahala univiriha mapuro ahirivo citthu cowoopiha ni khaninhala uhiya umpatthanana mahuku otheene mpaka upeephoni.