MWAHA WOOSOMIYA 5
‘Nifento na Kristu ninaanikurumica’
“Masi nifento na Kristu phinnikurumica . . . wiira ale ari akumi ahiicivelihe imwaneennyaaya.”—2 AKOR. 5:14, 15.
NCIPO 13 Cristo, o Nosso Exemplo
NINHALA WIITTHUCANI? a
1-2. a) Hiiva nineecoona cani noopuwelaka makhalelo a Yesu ni citthu cipankilyaawe? b) Ninhala wiitthucani nhina ula mwahoola?
AKHWAAKA ntthu anfenteehu cinene, hiiva naaninukhela cinene uyo ntthuuyo! Atthunaka wiipaceroni, nyuuva unawuuriipani nrima nlattu wo wuupuwela citthu cankhumelenle uyo hinaaya ukhwa, utepa wakhalaka wiira ahohuva cinene. Masi nuuwakatyaaya, nyuuva nnaakhala ootteeliya moopuwelaka citthu ciwiitthucihalyaaweni awula cuuhimenryaaweni cootteelihaleni nrima ni coolipihaleni.
2 Woolikanaca, hiiva ninkhala ooriipiya nrima nasomaka masakha yaavinryaawe Yesu hinaaya ukhwa. Venci-venci uwakati wo Nuupuwelelo, hi ninaakumiha ukati wiira nuupuwele ifayita irinaaya ukhwa wa Yesu. (1 Akor. 11:24, 25) Unookhalaru commo, hiiva ninaakhala ootteeliya noopuwelaka citthu Yesu caapankilyaawe ni coolumilyaawe waaryaawe va watuninyani va. Ni ciicammo, ninaakhala oolipihiya cinene noopuwelaka itthu impankaawe nenna va ni citthu cinhalaawe unipankela wahoolo. Khampa cinhaleehu wiitthuca, wuupuwela nnyo citthunnyo ni nifento Yesu ninithoonyihenryaawe unaanikurumica upanka citthu cinthoonyera wiira ninsukhurweela.
USUKHURU UNAANIKURUMICA UNTTHARA YESU
3. Isariyani nirineehu wiira nisukhurweele woopoliya wihu?
3 Noopuwelaka makhalelo ni ukhwa wa Yesu ninaatepa usukhurweela. Yesu waaryaawe va watuninyani va, ahowiitthuciha atthu enci wiira Umwene wa Nluku unaahala uwaana nnema. Hi ninaavaha ifayita cinene itthu Ibiiblya ineetthucihaaya yuulumaka woopoliya wihu. Ni hiiva ninaasukhurweela wiivaherera wa Yesu, kontha unawaaka nttala wiira nimpatthanane cinene Yehova ni Yesu. Ale ammwaamini Yesu ahaana niweherero noorwaa ukhala mpaka ni uwaakhela amucyaaya akhwile khalayi. (Joau 5:28, 29; Aroo. 6:23) Hi khacinniphwanela nnyo iparakhannyo ni khaninhala ukhitiri unliva Yehova ni Yesu citthu cinipankenlyaaya. (Aroo. 5:8, 20, 21) Masi pooti wanoonihereehu wiira ninaasukhurweela. Manannani?
Ntakihero na Maria Madalena ninnikurumica cani uthoonyera usukhuru? (Nwehe iparaagarafu 4-5)
4. Manannani Maria Madalena caathoonyihenryaawe wiira ahonsukhurweela Yesu? (Nwehe ilatarato.)
4 Moone ntakihero nimoca naathiyana ayuuta yeehaniya Maria Madalena. Ayo yanhuvihiya cinene nimaciini 7. Atthunaka iyo yaari itthu yaawiirihile wuupuwela wiira khayaahala waakhuma-tho ayo maciinnyaayo. Phimaana, khunrika wuupuwela mananna caasukhunrwaaya ukati waavonihiyaaya ni Yesu. Nlattu woosukhuru waya, ayo yaholakela ukhala ntthari a Yesu ni uvaha ikuru caya ni citthu caarinaaya wiira ankavihere Yesu uvara ntekwaawe. (Luka 8:1-3) Maria Madalena anvaha ifayita cinene itthu yaapankeliyaawe ni Yesu, masi atthunaka uyo khaakhitiri wuupuwela itthu yuulupale yaahalaawe upanka Yesu wahoolo. Uyo anhala uvaha ukumyaawe wiira anoopole otheene, wiira “ule nhala umwaamini hitankanyiye, masi aphwanye ukumi woohimala.” (Joau 3:16) Waanookhalaru commo, Maria Madalena ahothoonyihera wiira aanansukhuru Yesu. Ukati Yesu waaryaawe wanipottoni naakhomeliyaawe, Maria Madalena aari vaava wiira ammaalihe Yesu ni aamaalihe atthu akiina. (Joau 19:25) Yesu ukhwa wawe, Maria Madalena ni athiyana akiina yahothuma citthu wiira atthenkace irutthu ya Yesu. (Mark. 16:1, 2) Maria Madalena ahocaalihiya nlattu wonvaresesa wawe Yesu. Maria Madalena ahovahiya iparakha yoomoona ni umuulumana Yesu ukati wonwelelihiyaawe—iyo yaari iparakha hataa attharyaawe yahaarinaaya.—Joau 20:11-18.
5. Manannani hiiva ninhaleehu uthoonyera wiira ninaasukhuru citthu Yehova ni Yesu cinnipankelaaya?
5 Hiiva ciicammo pooti woonihera wiira ninansukhurweela Yehova ni Yesu nlattu wo citthu cotheene cinnipankelaaya. Ninhala woonihera waasukhuru navarelaka nteko ukatiihu, ikuru cihu ni citthu cirineehu wiira nikavihere nteko wo Umwene wa Nluku. Wootakihera, hiiva pooti waneevaherereehu wiira nikavihere utekateka Isalau co Umwene ni ciicammo ulokihaca inupa cinswaleliya Nlukwiihu, Yehova.
UNFENTA WIHU YEHOVA NI YESU UNAANIKURUMICA WAAFENTA AKHUNANIHU
6. Nlattuni nnokupaliinyu wiira ukhwa wa Yesu ikhanle itthuvo ivahiyeenyu nyuuva?
6 Neemelaka nuupuwelaka nifento ninnithoonyeraaya Apaapeehu Yehova ni Yesu, hiiva ninaapheela ciicammo waafenta. (1 Jo. 4:10, 19) Ni nacuweleehaka wiira Yesu khwile nlattu wawihu, hiiva ninaatepa unfenta Yehova ni Yesu. Apostolu Paulu oonihenre wiira ansukhurweela woopoliya wawe ni Yesu ukati wantikhilyaawe co: “Mwaana a Nluku . . . [hokifenta] ni heevaherera wiira akoopole miiva.” (Akalas. 2:20) Nlattu wo woopoliya wihu ni Yesu, Yehova howiihanani nyuuva wiira nkhale mpatthannyaawe. (Joau 6:44) Yehova ihaavo iwonnyaaweni yomaana ni holiva iperesu yuulupale wiira akhale mpatthaniinyu. Iyo itthwiiyo khinwiirihani nyuuva upheela unsukhuru? Khinookurumicani utepa unfenta Yehova ni Yesu? Hiiva nihaana niikohaka co: ‘Isiyani nno nifentonno ninhalaaya ukikurumica upanka?’
Unfenta wihu Yehova ni Yesu unaanikurumica waalalyeera atthu otheene ihapari co Umwene (Nwehe iparaagarafu 7)
7. Khampa cinthoonyeraaya ilatarato, manannani hiiva ninhaleehu woonihera wiira ninanfenta Yehova ni Yesu? (Nwehe 2 Akorintu 5:14, 15; 6:1, 2.)
7 Nifento na Yehova ni na Yesu ninaanikurumica waafenta akhunanihu. (Nsome 2 Akorintu 5:14, 15; 6:1, 2. b) Inanna imoca yoothoonyihera nno nifentonno ukhanle uvara nteko woolalyeera. Hi ninaawoopana mwaha atthu otheene, hataa yakhalaka ikhapilani, nlokoni, hataa yoolumaka iluukani, hataa yakhalaka mathaciri awula amasikhini. Ayo manannaayo, hi ninaahala upanka itthu impheelaawe Yehova: “Uyo nopheela wiira atthu okhapila cotheene yoopwe ni acuwele ikhweeli.”—1 Tim. 2:4.
8. Manannani ninhaleehu uthoonyera wiira ninawaafenta mayamunneehu ni mayanuunwiihu?
8 Hiiva ninthoonyihera wiira ninanfenta Yehova naawaceraka mayamunneehu. (1 Jo. 4:21) Hiiva ninawaawacera mayamunneehu ni ninawaakavihera ukati umpheelaaya. Munneehu akhweliyaka, ninammaaliha; awerennyaka, ninanthotola; ni acukulacaka, ninaapanka inkhitiriihu wiira nintteelihe nrima. (2 Akor. 1:3-7; 1 Atesal. 5:11, 14) Hi ninawaalompela mayamunneehu, kontha “ulompa wowaakuleliha wa ntthu neettela isariya, unaaphwanyiha ikuru.”—Tiya. 5:16.
9. Manannani makiina owoonihera wiira hiiva ninawaafenta mayamunneehu ni asirokorihu?
9 Inanna ikhwaawe yoothoonyihera wiira ninawaafenta mayamunneehu ni mayanuunwiihu ukhanle wiikurumica wiira nikhalane nnema naayova. Yehova nikhanle ntakihero nuulupale nhina ulevelela. Hiiva pooti wanontakiheehu. Wakhala wiira Yehova honvaherera mwanawe wiira anoopole ni anilevelele itampi cihu, niireke wiira hiiva khaninlamuliya waalevelela mayamunneehu? Hi khanimpheela ukhala khampa ipottha yoolumilyaawe Yesu. Iyo yaholeveleliya nlattu wo nsurukhu mwinci waalokihiyaaya, masi iyo ipottheeyo khayaakhitinri unlevelela nkhunanaya yanlokihaaya nsurukhu vakaani paahi. (Mat. 18:23-35) Wakhalaka wiira haavo munna o wanlokoni himmwiiwananeenyu, khawaahala ureera nyuuva urwaa ummaliha nanrokottole rineenyu nuuyo nihinaphiya nihuku no nuupuwelelo? (Mat. 5:23, 24) Mwapankaka commo, nnaahala woonihera wiira khweeliini nnanfenta Yehova ni Yesu.
10-11. Manannani mahumu cinlamuliyaaya uthoonyihera wiira ananfenta Yehova ni Yesu? (Nwehe 1 Peturu 5:1, 2.)
10 Manannani mahumu anthoonyeraaya wiira ananfenta Yehova ni Yesu? Itthu yuulupale ni yofayita ukhanle uwacera ikhontwaa ca Yesu. (Nsome 1 Peturu 5:1, 2. c) Ni Yesu ahonttonkela Peturu iyo itthwiiyo sana-saana. Peturu unkhotta wawe Yesu imaara tthaaru, ahosanka ni aapheela ucuwela mananna oothoonyera wiira aananfenta Yesu. Uwakati Yesu wonwelelihiyaawe, Yesu ahonkoha Peturu: “Simau, mwaana a Joau, weeva unaakifenta?” Peturu aanaapheela upanka yotheene yaakhitiryaawe wiira athoonyihere wiira aananfenta mwiitthucihyaawe. Yesu ahomwiirela Peturu: “Uwacere ikhontwaa caka.” (Joau 21:15-17) Ukhuma ule ukatyuule ni mpaka waakhwilyaawe, Peturu ahowacera ratta ikhontwaa ca Yesu. Upanka wawe commo, uyo ahothoonyera wiira khweeliini aananfenta uyova.
11 Ukati wo Nuupuwelelo, nyuuva mahumu nnohala uthoonyera cani wiira nnawoona ukhalana ifayita itthu Yesu yanhimenryaawe Peturu? Nyuuva pooti uthoonyera wiira nnanfenta Yehova ni Yesu nkumihaka uwakati wiira mwaalipihe mayamunna ni waakavihera uhokoleela unswalela Yehvoa ale ahiile unswalela. (Ezek. 34:11, 12) Nyuuva ciicammo pooti waakurumica ni uwaakhelela ratta ale ansomihiya Ibiiblya ni atthu akhwaawe anwa woona Nuupuwelelo. Unaareera upanka commo, kontha ayo atthwaayo ciicammo pooti ukhala atthari a Kristu.
UNFENTA YESU UNAANIKURUMICA ULIPA NRIMA
12. Kontha isiyani itthu yoolumilyaawe Yesu hinaaya ukhwa inaanilipiha nrima? (Nwehe Joau 16:32, 33.)
12 Uhiyu woomalela wa Yesu watuninyani, uyo ahowiirela attharyaawe co: “Ntuninyani, nyuuva nnaahala ukhalana masakha, masi nlipe nrima! Kontha mi kihotthema ituninya.” (Nsome Joau 16:32, 33. d) Isiyani yankavihenre Yesu ulipa nrima uhoolo waalupatthyaawe ni uhihiya umwiiwelela Nluku mpaka waakhwilyaawe? Uyo ahonkhuluvela cinene Yehova. Yesu aanaacuwela wiira attharyaawe ciicammo yanhala uttehiya. Phimaana uyo wanlepenlyaawe Yehova wiira aakavihere. (Joau 17:11) Kontha isiyani iyo itthwiiyo inaanilipiha nrima? Kontha Yehova khanle nakuru cinene waavikana ale annilupattha. (1 Jo. 4:4) Yehova nawoona citthu cotheene cineerannya. Phimaana, hi pooti wanonkhuluveleehu ni pooti wankupaliihu wiira uyo naahala unikavihera umaliha woova wihu ni unikavihera ulipa nrima.
13. Manannani Yusufu o Arimateia caalipilyaawe nrima?
13 Moone ntakihero na Yusufu o Arimateia. Uyo aari nlopwana aahisimiya cinene ncoko wo uyuuta. Uyo aanaapanka mphantte nhina itiripunaali yuulupale ya ayuuta yeehaniya isineetiriyu. Masi uwakati Yesu waavaraawe nteko woolalyeera watuninyani, Yusufu khaari ntthu oolipa nrima. Joau heera wiira Yusufu “aari ntthari a Yesu, masi aanawiivithavitha kontha aanaawoova ayuuta.” (Joau 19:38) Yusufu aanaamwaamini cinene Yesu, masi uyo aanawiivithavitha wiira hooniye naatthu akhwaawe. Pooti ukhalaka wiira uyo anawoova uhiya uhisimiya naatthu yaahala ucuwela wiira aari ntthari a Yesu. Masi Ibiiblya ineera wiira Yesu Kristu waakhwilyaawe, Yusufu “aholipa nrima, ahorwaa wa Pilatos ni aholepela irutthu ya Yesu.” (Mark. 15:42, 43) Vano, atthu otheene yahocuwela wiira uyo aari ntthari a Yesu ni uyo ahohiya woova ucuweliya naatthu wiira aari ntthari a Yesu.
14. Isiyani nyuuva inlamuliyeenyu upanka wakhalaka wiira unawuurikani uhiya umoova pinaatamu?
14 Nyuuva nnaawoova apinaatamu khampa Yusufu o Arimateia? Nhopaca woona ihaya wiihimyaca wiira nkhanle Saahiti a Yehova ucikolani awula untekoni? Nnaahiya uviraka ukati mwinci wiira nkhale namalalyeera awula wiira mpattisiye nlattu wo woova mananna atthu akhwaawe cinhalaaya wuuweherani? Nhihiye nwo woovanwo wuuhiihakani upanka itthu incuweleenyu wiira ikhanle yomaana. Munlompe Yehova ninrimeenyu wotheene ni munlepele wiira ookavihereni ulipa nrima wiira mpanke itthu impheelaawe. Moonelelaka wiira Yehova nawaakhula ulompa winyu, nyuuva nnaahala utepa ulipa nrima.—Isai. 41:10, 13.
UTTEELIYA NRIMA UNAANIKURUMICA UNSWALELA YEHOVA WOOHILOLOVACA
15. Utteeliya nrima waakhalannyaaya atthari a Yesu waakurumicale upanka isiyani? (Nwehe Luka 24:52, 53.)
15 Atthari a Yesu yaari ooriipiya nrima uwakati Yesu waakhwilyaawe. Mmananihe wiicuupuwela nnari nyuuva! Ahokhwa mpatthannyaaya yanfentaaya cinene ni khayaarina niweherero. (Luka 24:17-21) Masi khayaakhanle ooriipiya nrima ukati mwinci. Woohipica, Yesu ahaaphwanya. Uyo ahokumiha ukati wiira aakavihere attharyaawe ucuwela mananna ukhwa wawe ceerannyeehalyaaya inatiri co mbiiblyani. Uyo ciicammo ahaavaha nteko wofayita wiira avare. (Luka 24:26, 27, 45-48) Uvira waya mahumu 40, Yesu ahorwaa wiirimu. Uriipiya nrima waarinaaya attharyaawe, wahorukunuwa ni yahancera utteeliya nrima. Ayo yaari ootteeliya nrima kontha yancuwela wiira Yesu aari nkumi ni anhala waakavihera khula ukati waahalaaya upheela wiira akhitiri uvara nteko waavahaceriyaaya. Utteeliya nrima waarinaaya wahaakurumica unswalela Yehova woohilolovaca.—Nsome Luka 24:52, 53; e Mite. 5:42.
16. Ninhala waatakiha cani atthari a Yesu?
16 Ninhala waatakiha cani atthari a Yesu? Nyuuva pooti wuutteelani nrima nlattu wonswalela Yehova kahi paahi ukati wo Nuupuwelelo, masi mwaakha wotheene. Wiira nkhitiri, nhaana nhooleliheraka Umwene wa Nluku muukumini winyu. Mayamunna enci ari moopanka iyo itthwiiyo. Ahaavo mayamunna avukunle ukati unvirihaaya yavaraka nteko wiira akhalane ukati mwinci woolalyeera, woorwaa umikutthaanoni ni upanka uswali waamuci khula isumana. Akhwaawe ahaamini uleva mihakhu atthu enci cinoonaaya wiira cikhanle cofayita. Ayo apankile commo wiira akhalane ukati wookavihera miteko co wanlokoni ni wiira akavihere mapuro anthwaa anamalalyeera. Uvilela wiira nihihiye unswalela Yehova unaarika. Masi uyo naakhuluveliha univaha iparakha cinci nahooleliheraka muukumini wihu Umwennyaawe.—Miru. 10:22; Mat. 6:32, 33.
Uwakati wo Nuupuwelelo muupuwele citthu cotheene Yehova ni Yesu cuupankenlyaayani (Nwehe iparaagarafu 17)
17. Isiyani ilakenleenyu upanka uwakati wo Nuupuwelelo? (Nwehe ilatarato.)
17 Hiiva ninoona upica uphiya nihuku ninhaleehu wuupuwelela ukhwa wa Yesu nantano. Ninhala ukhala nameeli, nihuku 4 mweeri wo Abril. Masi hi khaninlamuliya uweherera uphiya nno nihukunno wiira nuupuwele makhalelo a Yesu ni nifento uyova ni Yehova ninnithoonyeraaya. Muupuwele citthu cotheenennyo uwakati wo Nuupuwelelo. Wootakihera, nkumihe ukati wiira nsome ni muupuwele citthu ceerannyaale cimphannyannya nhina mwaha uneera: “A última semana de Jesus na Terra.” Uyo mwahooyo umphwanyannya nhina apêndice B12 mbiiblyani Tradução do Novo Mundo. Ukati unhaleenyu usoma citthu ceerannyaale, ntothe iveerusu co mbiiblyani cinhala wuncerera usukhuru winyu, ufenta winyu ni utteeliya nrima urineenyu.—Apoka. 2:19.
NCIPO 17 “Eu Quero!”
a Uwakati wo Nuupuwelelo hiivano ninlamuliya wuupuwela ukumi ni ukhwa wa Yesu ni nifento uyova ni Yehova ninnithonyeeraaya, wuupuwela uyo ittwiiyo pooti unikurumica unvarela nteko Yehova cinene. Ula mwahoola ninaahala woona isiyani ninlamuliyeehu upanka wiira nisukurwele nifento nithonyihenryaawe Yesu avahaka ukumyaawe, wiira ninaafenta Yehova ni Yesu ni ciicammo ninahala wiitthuca isiyani inhala unikavihera wiira naafente mayamunneehu ni mayanuunwiihu, ukhala oolipa nrima ni unitteela nrima nlaattu wo nteko unonvareleehu Nluku Yehova.
b 2 Akorintu 5:14 Masi nifento na Kristu phinnikurumica, kontha hiiva ninaakupali ila itthwiila: Nlopwana mmoca paahi hokhwa wiira awoopole atthu otheene, ukhala wiira otheene yaahokhwa. 15 Ni uyo khwile nlattu waatthu otheene, wiira ale ari akumi ahiicivelihe imwaneennyaaya, masi ancivelihe ule khwile nipuro naya, ni onwelelihiye. 6:1 Nivaraka nteko nkhayi nuuyo, ninawuuhimeryani ciicammo wiira nhitthune maana oonironya a Nluku nuukela uvyaavyeehaca. 2 Nluku neera co: “Ukati woophwanelana kihowiiwa ni nihuku nowoopoliya mi kihookaviherani.” Moone! Nna phi nihuku no woopoliya.
c 1 Peturu 5:1 Phimaana, miiva humu nkhunaninyu, kihoona uhuva wa Kristu ni kinaaweherera uttitthimihiya ukati unhalaaka wunweleliya wamoca ni ale athanliye. Mi kinwiirelani co nyuuva mahumu: 2 Mweettihere ratta ikhontwaa ca Nluku civahaceriyeenyu wiira nwacere, nhoolelaka wohikhanyererihiya, masi ninrimeenyu wotheene toko cimpheelaawe Nluku; woohinyonkaca, masi nciveliyaka;
d Joau 16:32 Mwiiwe! Unaahala uphiya ukati — ni uyo ukatyuuyo khweeliini uhophiya — otheene cinyu unhaleenyu ukitthawa ni khula ntthu urwaa uwannyawe ni nnaahala ukihiya veekha. 33 Miivano kihoohimeryani nnya citthunnya wiira, nlattu wawaka, nkhalane nnema. Ntuninyani nnaahala ukhalana masakha, masi, nlipe nrima! Mi kihotthema ituninya.
e Luka 24:52 Ayo yahonkhoromacela ni yahoturuwela u Yerusalemu waatteelaka nrima. 53 Ayo yaari ootteeliya nrima ukati wotheene ntempulu, yanttottopelaka Nluku.
