MWAHA WOOSOMIYA 1
Nkupali wiira Nuulumo na Nluku “nikhanle ikhweeli”
IVEERUSU YO MWAAKHA WO 2023: “Nuulumo naa nikhanle ikhweeli.”—ISAA. 119:160.
NCIPO 96 O Livro de Deus é Um Tesouro
NINHALA WIITTHUCANI? a
1. Nlattuni atthu enci ahinkhuluvelaaya Ibiiblya?
ATTHU enci ilelo khanoncuwela ntthu onkhuluvela. Ayo mpaka unawaarika waakhuluvela atthu anaatikhinacaaya ni anaakupalyaaya, khampa anasiyaasa, masiyentista ni ananakoso oolupale. Ciicammo, atthu enci ahohiya waakhuluvela ahooleli aanattiini, ni ukala wiira ayo ahoolelyaayo aneehimya weettela Ibiiblya, atthu enci khankhuluvela Ibiiblya.
2. Toko cinthonyeraaya Isaalimu 119:160, isiyani ninlamuliyeehu ukupali?
2 Hiiva aswali a Yehova, ninaakupali wiira uyo khanle Nluku nohimya ikhweeli ni nonipheelela wiira nikhalane nnema ukati wotheene (Isaa. 31:5; Isai. 48:17) Hiiva pooti wankhuluveleehu wiira citthu ninsomeehu mbiiblyani ‘cikhanle ikhweeli’ ca Nluku. b (Nsome Isaalimu 119:160. c) Ni hiiva ninaakupaleela itthu ihimilyaawe namasoma mmoca: “Khiivo itthu Nluku inoolumaawe ikhanle yowoothiya, awula ihinhala wiirannya. Apoovu a Nluku pooti wankupalyaaya citthu cotheene cinhimyaawe, kontha anaacuwela wiira uyo khanle Nluku ookhuluvelya.”
3. Ninhala wiitthucani inhina ula mwahoola?
3 Ninhala waakavihera cani atthu akhwaawe ukhuluvela Nuulumo na Nluku toko hiiva cinkhuluveleehu? Nttwee noopele mwaha citthu tthaaru cinniriha ukhuluvela Ibiiblya: uhivirikanihiya itthu yantikhiye wiipaceroni, wiirannya inatiri caya ni urukunusa makhalelo aatthu.
NINCUWELA CANI WIIRA IBIIBLYA KHIVIRIKANIHIYE IKHUMELO NENNE NANTIKHIYAAYA?
4. Kontha isiyani atthu akhwaawe khankupali Ibiiblya?
4 Yehova ahaaruma alopwana ookhuluvelya 40 wiira yantikhe ilivuru co mbiiblyani. Masi ilivuru coopacera cantikhiye, khacivo-tho ilelo. Moolumo otheene ampwanyannya mbiiblyani ilelo, yooneliye mmalivuruni coopacera. Phimaana, atthu akhwaawe unawaarika ukupali wiira citthu ninsomeehu mbiiblyani ilelo cinaalikanaca nicitthu cantikhiye wiipaceroni. Masi hi ninaakupali wiira moolumo ansomeehu mbiiblyani khavirikanne nimoolumo yantikhiye wiipaceroni. Nlattuni?
Atthu yoonela cowantikhiya ceeheperewu yaanawiikurumica cinene wiira yoonele Nuulumo na Nluku khampa cantikhiyaaya wiipaceroni ni wiira ahivonyanihe hataa itthu (Nwehe iparaagarafu 5)
5. Manannani Cowantikhiya niiluka iheperewu cooneliyaaya? (Nwehe ilatarato yo wakapani.)
5 Wiira akhikicere Ibiiblya, Yehova ahowiirela aswalyaawe woonela moolumo oopacera wiira yantikhe mmalivuruni cikhwaawe. Uyo ahowiirela mamwene o Isarayeli wiira yoonele malamulo yavahiyaaya ni yantikhe mmalivuruni cikhwaawe, ni ahaathanla malevita wiira awiitthucihe apoovu o Isarayeli ayo malamulwaayo. (Deut. 17:18; 31:24-26; Nem. 8:7) Ayuuta urwaaniya waya u Babilooniya, yahaavo ikhurupu yaatthu yaavara nteko wo woonela Ibiiblya. (Estra 7:6, niwehero) Ayo alopwanaayo yaanawoonela ratta-raatta ni yamalihaka woonela, yaanaalikela khula nuulumo ni khula ileetera kontha khayaapheela uvonyaniha haata itthu. Masi waahookhalaru commo, ayo alopwanaayo yaari oopahuwa, phimaana yahovonyaniha citthu cikhwaawe. Masi ukhala wiira yahaavo atthu enci yoonenle Ibiiblya, citthu caavonyanihaciye cahokhitiryaa wooneneliya. Manannani?
6. Unkhitirya cani wooneneliya citthu yaavonyanihacilyaaya atthu yoonela ilivuru co mbiiblyani cantikhiye wiipaceroni?
6 Anamasoma ilelo anaakhitiri woonenela mapuro yavonyanihilyaaya alopwana yoonenle ilivuru coopacera. Wootakihera, muupuwele wiira alopwana 100 ahaana yoonelaka itthu yowantikhiya ni wantikha nnikhanttani nikhwaawe. Vano nlopwana mmoca naavonyaniha. Wiira nooneneleliye nipuro nivonyilyaawe, ihaana ilattanihiyaka itthu yantikhilyaawe niitthu yoonenlyaaya alopwana akhwaawe. Inanna imocaaru, calattanihiyaka ilivuru cinci cantikhiye naatthu yoonela mmalivuruni coopacera, unaakhitirya woonenela mapuro yaavirikanihilyaaya ni yatuphilyaaya.
7. Nincuwela cani wiira khirukunusiye itthu caahimyaaya ilivuru co mbiiblyani cantikhiye wiipaceroni?
7 Atthu yoonela ilivuru co mbiiblyani yaaneekurumica cinene uvara uyo ntekooyo. Moone ntakihero nimoca ninthoonyera iyo. Ilivuru cowantikhiya niiluuka iheperewu citepile ukhala co khalayi, cikhanle co mwaakha 1008 awula 1009 nawile Kristu. Nnyo cineehaniya Códice de Leningrado. Masi mphiyaaruni, cihophwanyiya ilivuru citepile ukhala cokhalayi, co myaakha 1000 uttuli uvikana Códice de Leningrado. Atthu akhwaawe yoopuwela wiira nnyo ilivuru cootepa ukhala co khalayinnyo caanahala uvirikana cinene niitthu yantikhiye nhina Códice de Leningrado. Ayo yoopuwenle commo kontha cahovira myaakha 1000 cowantikhiya coopacera cooneliyaka ni cantikhiyaka mmalivuruni ikwaha cinci. Masi wahooneneliya wiira khacaavirikanne. Calattanihiya ilivuru cokhalayi cinene niilivuru co Códice de Leningrado, yahooneneliya wiira yaavirikanne moolumo vakaani pahi, masi itthu yahimyaaya moolumwaaya khayavirikanne ni khaayarukunusiye.
8. Cowantikhiya ceekereku cinvirikana cani niilivuru cikhwaawe caaphwanyannya ule ukatyuule?
8 Makristau oopacera ciicammo yanawoonela cowantikhiya niiluuka iheperewu ni wantikha mmakhantani makhwaawe. Ayo ciicammo yahoonela ratta-raatta ilivuru 27 cimphwanyannya nhina cowantikhiya ceekereku caavarelaaya nteko mmamikutthaanoni ni wuulalyaani. Namasoma mmoca aholattaniha cowantikhiya ceekereku niilivuru cikhwaawe caaphwanyannya ule ukatyuule ni aheera: “Ilelo cinaapwanyannya cowantikhiya ceekereku cinci uvikana ilivuru cikhwaawe co ule ukatyuule . . . ni ilivuru co mbiiblyani cirivo, phiri coolikana.” Ilivuru imooca iheera: “Hi pooti wankhuluveleehu wiira moolumo ansomeehu ilelo nhina cowantikhiya ceekereku anhimya itthu yantikhiye wiipaceroni.”
9. Toko cinthonyeraaya Isaiya 40:8, Ibiiblya iphiyale cani mpaka ilelo?
9 Myaakha cinci, yahaavo atthu yaavanre nteko mwinci yoonelaka ilivuru coopacera co mbiiblyani ni wantikha mmakhantani makhwaawe wiira ikhumelele Ibiiblya nirineehu ilelo. d Khweeliini, Yehova phiirihile wiira itthu yaahimyaaya khalayi nuulumo nawe ihirukunusiye ni wiira Ibiiblya iniphwanye mpaka mahuku ninkhaleehu ilelo. (Nsome Isaiya 40:8. e) Uhookhalaru commo, pooti ukhumelelaka atthu ankupali wiira khweeli Ibiiblya khirukunusiye itthu inhimyaaya, masi ahinaaminni wiira Ibiiblya ikhanle Nuulumo na Nluku. Phimaana, nttwee noone itthu inthoonyera wiira Ibiiblya ikhanle Nuulumo na Nluku.
INATIRI CO MBIIBLYANI CIKHANLE COOKHULUVELYA
Left: C. Sappa/DeAgostini/Getty Images; right: Image © Homo Cosmicos/Shutterstock
Inatiri co mbiiblyani ciheerannya khalayi ni nanlelo cinawiirannya (Nwehe iparaagarafu 10-11) j
10. Muupuwelaka 2 Peturu 1:21, nttonkace mananna ciirannyaalyaaya inatiri. (Nwehe ilatarato.)
10 Ibiiblya ihaana inatiri cinci cirannyaale. Inatiri cikhwaawe cirannyaale cinavinre myaakha cinci ukhuma ukati woolumiyaaya. Ni anamasoma ihantisi ahoneeha wiira cinawiirannya. Hi khaninkhala ootikhinihiya, kontha ninaacuwela wiira nnyo cikhanle inatiri ca Yehova. (Nsome 2 Peturu 1:21. f) Wootakihera, muupuwele inatiri inooluma ukanyulaciya wosittatti yo Babilooniya. Iseekulu 8 hinawa Kristu, porofeeta Isaiya ahorumiya ni Nluku wantikha inatiri yaahimya wiira isittatti yo Babilooniya yaanaahala utthemiya. Uyo mpaka ahohimya wiira nlopwana mmoca eehaniya Siiru anhala utthema iyo isittattiiyo ni ahohimya mananna caahalaawe utthema iyo isittattiiyo. (Isai. 44:27–45:2) Porofeeta Isaiya ciicammo ahohimya wiira wanhala uphiya ukati waahalaaya umalamalihiya iyo isittattiiyo ni uhikhaliya-tho. (Isai. 13:19, 20) Ni iyo khweeliini phiitthu yiirannyaale. Isittatti yo Babilooniyia yahotthemiya naatthu o Média ni o Pérsia, mwaakha wo 539 hinawa Kristo. Ilelo, nipuru yaaryaaya iyo isittattiiyo amphwanyannya maluku paahi.—Moone ividiyu Ibiiblya yahottonkaca khalayiiru ukwanyulaciya wosittatti yo Babilooniya, nhina ilivuru Mphwanye Utteeliya Uhimmala! mpantta 3 ipontu 5.
11. Inatiri imphwanyannya nhina Daniele 2:41-43 ineerannyaaya cani ilelo?
11 Inatiri co mbiiblyani khaciiranyeele khalayi pahi. Ilelo ciicammo cinawiirannya. Wootakihera, muupuwele inatiri ya Daniele inooluma ikuvernu yuulupale ineehaniya Anglo-Americana. (Nsome Daniele 2:41-43. g) Iyo inatiriiyo inaathoonyera ratta-raatta wiira iyo ikuverunwiiyo yaahala ukhala yuulupale ni yoolipa khampa iyuuma, masi mphantte nkhwaawe woohilipa khampa uloko. Ni ilelo ninawoona wiira iyo itthwiiyo ikhanle ikhweeli. Ikuverunu yo Grã-Bretanha ni yo Estados Unidos cihaana ikuru cinene khampa iyuuma. Ikuvernu coopiili cihothoonyera ukhulupalyaaya ukati wokhotto cuulupale co ntuninyani coopiili ni nanlelo cihaana ikaruma cuulupale cokhotto. Masi nnyo ikuvernunnyo khacinkhitiri woonihera ikuru caya cotheene, kontha ikwaha cinci apoovu anaapanka manifestasau, yapheelaka uwaceriya ihakhi caya. Nlopwana mmoca nosoma isiyasa co ntuninyani heera: “Ilelo, khiivo ikuvernu intepa uhiiwananiya nhina isiyasa uvikana Estados Unidos. U Reino Unido, uhaavo uhiiwananiya venci nhina mananna iyo ilapweeyo cinlamuliyaaya uwacera mphwinko wo União Europeia. Nlattu wo nwo uhiiwananiyanwo, ikuvernu yo ntuninyani ineehaniya Anglo-Americana khinkhitiri uvara ntekwaaya saana ni woonihera ikuru irinaaya.
12. Wiirannya wonatiri co mbiiblyani cinnikhuluveliha isiyani?
12 Inatiri cinci ciirannyaale khalayi cinaanikhuluveliha wiira inatiri ca Nluku cinhimya citthu co uhoolo ciicammo cinaahala wiirannya, hi ninakupali itthu ahimilyaawe na saalimo mmoca ukati waalompaawe. Uyo enre co: “Mi kinaaweherera cinene woopoliya ni weeva, khontha Nuulumo naa nikhanle ikhweeli” (Isaa. 119:81) Mbiiblyani Yehova naanivaha niweherero no uhoolo. (Jer. 29:11) Niweherero nirineehu no uhoolo khinahimwe itthu inoolumiya na apinatamu cikhanle citthu Yehova cinnikhuluvelihaawe. Phimaana nihihiye usoma Nuulumo na Nluku ni ulipihaca ukhuluvela wihu nno Nuulumo nno.
IKANO CO MBIIBLYANI CINAWAAKAVIHERA ATTHU ENCI
13. Toko cinthonyeraaya Isaalimu 119:66, 138, isiyani-tho ithoonyera wiira Ibiiblya ikhanlee ilivuru yookhuluvelya?
13 Itthu ikhwaawe inthoonyera wiira hiiva pooti wankhuluvelehu Ibiiblya, kontha Ibiiblya inawaakavihera atthu enci. (Nsome Isaalimu 119:66, 138. h) Wootakihera, ikano co mbiiblyani cihaakavihera anamathelana yahala vakaani umwalanaca ni nna co anaatteliya wa tthokoni waya. Asaanaaya ayo anamathelanaayo anawunnuwihiya saana ni anaafentiya.—Efesu 5:22-29.
14. Nttonkace ntakihero ninthonyihera wiira ikano co mbiibliyani cinaarukunusa makhalelo aatthu.
14 Atthu yaari anakhirini ni yooniya ukhala owoophiha, ahokhitiri urukunusa makhalelwaaya ukati wancenryaaya usoma ni wettela ikano co mbiiblyani. Moone mananna iyo itthwiiyo caamwiiranenlyaaya peresu mmoca nehaniya Jack. i Uyo aari nakhirini muulupale ni ikhurupu yo maperesu yaaryaawe yahukhumwiiye wiivakaciiya uyo paari peresu ootepa woopiha. Nihuku nimoca Jack ahokhala nipuro naasomihiya Ibiiblya peresu nkhwaawe. Mananna mayamunna canthonyihenryaaya unamaana ule peresuule wahomwiiriha Jack upheela ciicammo usomihiya ibiiblya. Vano ahopacera wettela citthu ceetthucaawe phimaana ahorukunusa makhalelwaawe ni ahokhala ntthu oorera nrima. Nuuwakatyaaya Jack ahokhala namalalyeera ni ahopattisiya, uyo anawalalyeera maperesu akhunanawe ni ahokhitiri waakavihera atthu acese wiitthuca ikhweeli, nihuku naahalawe wiiviya nahophiya, masi Jack ahorukunusa makhalelwaawe, nlophwana mmoca ankavihera wulumacera mwahaawe utiripunaali aheera: “Jack khahinmwe nlophwana khampa ancuwenlyaaka mwaakha 20 uttuli uyo hosomihiya ni masahiti a Yehova ni horukunusa makhalelwaawe. Jack aheeviya masi ntakihero nawe ninthonyera wiira hiiva pooti wankhuluveleehu Nuulumo na Nluku ni wiira unno nihaana ikuru yoorukhunusa makhalelo aatthu.—Isai. 11:6-9.
Ikano co mbiiblyani cinawaakavihera atthu enci oovirikana urukunusa makhalelwaaya (Nwehe iparaagarafu 15) k
15. Weettela ikano co mbiiblyani unwiiriha cani apoovu a Yehova uvirikana naatthu akhwaawe? (Nwehe ilatarato.)
15 Apoovu a Yehova anawiwanana kontha anaweettela ikano co mbiiblyani. (Joau 13:35; 1 Akor. 1:10) Nnema nihu ni wiiwanana wihu ikhanle itthu yomaana unvirikana nuuhiwananiya nlattu wo isiyaasa, nlattu woovirikana ikhapila unooneehu ntuninyani motheene. Wiiwanana wa apoovu a Nluku uhonvara nrima mmirawo mmoca neehaniya Jean, uyo oonuwihiye ilapo imoca yo África. Uwakati waakhumelenlyaaya ikhotto ncoko waakhalaawe, uyo ahetakanihera nhina ikhurupu ya anatoropa ni uwakati nkwaawe ahotthawela ilapo yaattamananne ni ilapo yaakhalaawe. Vano iyo ilapweeyo ahaacuwela masahiti a Yehova, Jean heera: “Mi kahetthuca wiira atthu aneettela ittiini yeekhweeli khanlamuliya wiikelakeliha citthu co isiyaasa ni khaneekawaniha uhiya commo ayo anaafentana. Mi kihorihakaca ukatyaaka womaana muukumini waka kimananihaka waakiha ilapwaaka, masi uwakati weetthucilyaaka ikhweeli mi kahovaherera ukumyaaka wa Yehova. Jean ahorukunusa makhalelwaawe muukumini wawe. Vano uhiya urwa ukhottoni wiira awaattakanane atthu o ikhapila coovirikana ni ikhapilaawe Jean nawiikurumica wiira aalalyeere atthu ihapari co mbiiblyani cinwiwananiha atthu, ikano co mbiiblyani cinawaakavihera atthu enci o mapuro oovirikana, iyo itwiiyo inthonyera wiira Nuulumo na Nluku nikhanle nookhuluvelya.
NHIHIYE UKHULUVELA NUULUMO NA NLUKU
16. Nlattuni ninlamuliyeehu ulipihaca ukhuluvela wihu Nuulumo na Nluku?
16 Makhalelo o ila ituninyeela anaavira yatepaka ukhala ohinamaana. Phimaana, ukhuluvela wihu Nuulumo na Nluku unaahala utepa uttehiya. Atthu o ntuninyani pooti uniiriha uhikupali Nuulumo na Nluku. Wootakihera, ayo pooti uniirela wiira Ibiiblya khinkhuluvelya awula uniirela wiira Yehova khanvarela nteko ipottha yookhuluvelya ni yankhili wiira ineettihere. Masi nakupaleehaka wiira Nuulumo na Nluku nikhanle ikhweeli, ayo atthwaayo khanhala uwukula waamini wihu. Hi ninaahala ulakela “wiiwelela marumo a Yehova ukati wotheene mpaka umwiiso.” (Isaa. 119:112) Khaninhala woona ihaaya waahimerya akhwiihu ikhweeli ni waakurumica ciicammo weettela ikano co mbiiblyani. (Isaa. 119:46) Ciicammo, ninaahala ukhitiri uvilela masakha, toko ulupatthiya ni “uvilela unitteelaka nrima.”—Akol. 1:11; Isaa. 119:143, 157.
17. Iveerusu yo nantano inhala unikavihera cani?
17 Khweeliini, hi ninansukhuru Yehova nlattu woonivaha ikhweeli. Ikhweeli cawe cinaanikavihera uhitepa usanka, uhoova ni cinaaniitthuciha mananna ookhala saana ituninya yoohinamaana inkhaleehu. Ikhweeli ciicammo inaanivaha niweherero nomaana nooholo ninhaleehu ukhalana wapaceraka ulamulela umwene wa Nluku watuninyani. Iveerusu yo mwaakha wo 2023 inahala unikavihera utepa ukhuluvela wiira Nuulumo na Nluku nikhanle ikhweeli!—Isaa. 119:160.
NCIPO 94 Muito Obrigado Pela Bíblia
a Isaalimu 119:160 ihothanliya wiira ikhale iveerusu yo mwaakha wo 2023. Iyo ineera: “Nuulumo naa nikhanle ikhweeli.” Khweeliini nyuuva nnaakupali ayo moolumwaayo ni akhanle moolumo anlipiha waamini wihu. Masi atthu enci khankupali wiira Ibiiblya inhimya ikhweeli ni wiira pooti univaha ikano comaana. Nhina ula mwahoola, ninaahala woona citthu tthaaru cinhaleehu uvarela nteko wiira naakavihere atthu ukhuvela Ibiiblya ni ikano caya.
b NUULUMO NOOTAPHULELIYA: Niiluka iheperewu, moolumo aneeera: “nuulumo naa nikhanle ikhweeli” maanaaya wiira moolumo otheene a Nluku akhanle ikhweeli.
c Isaalimu 119:160 Nuulumo naa nikhanle ikhweeli ni ihukhumu caa cosariya cotheene khacimmala.
d Wiira ncuweleehe mananna citthu caahimyaaya Ibiiblya cihirukunusiyaaya myaakha cotheene civinre, nkele nsayitini jw.org yeekunya. Nipuro cintothiya citthu, mwantikhe: “A História e a Bíblia.”
e Isaiya 40:8 Malasi makithi anawuuma, ittuva cinaanyaala; masi, nuulumo na Nlukwiihu khaninvira.
f 2 Peturu 1:21 Kontha inatiri thanku khiphattuwale naapinaatamu, masi apinaatamu yuulumale citthu ca Nluku, toko caakurumiciyaaya ni nnepa wowaarya.
g Daniele 2:41 Ni khampa pwiiya conneenyu, mettonnyo ni makokhwaayo, caahootakaneela iyuuma ni uloko; iyo maanaaya wiira umwennyooyo unhala ukhala wookawannyaaca; masi unaahala ukhala woosilipa nlattu woyuumeeyo, masi khampa pwiiya conneenyu, inhala ukhala iyuuma yootakaneela nuuloko wowoolwa. 42 Vano ukhala wiira makokho onnyannyaayo yaari otakaneela iyuuma ni uloko, iyo manaaaya wiira umwennyooyo mphantte nkinooyo unhala ukhala woolipa ni nkinooyo woohilipa. 43 Toko pwiiya conneenyu iyuuma yootakaniheriya uloko woothuluwa, ayo anaahala wiitakanihera naapoovu; masi ayo khanhala uvaranaca, toko uloko cihinvaranaaya niiyuuma.
h Isaalimu 119:66 Uyo naakiitthuciha wiira kikhalane ankhili omaana ni ucuwelaca, kontha kinaakhuluvela marumwaawe. 138 Ikano cinkuupuseraa cinkhala cosariya ni cookhuluvelya cinene.
i Macina makhwaawe ahakakhanihiya.
