MWAHA WOOSOMIYA 4
Yehova naacaaliha wiikurumica wihu wiira nuupuwelele ukhwa wa Yesu Kristu
“Nhihiyerere upanka ila nkuupuwelelaka.”—LUKA 22:19.
NCIPO 19 A Ceia do Senhor
NINHALA WIITTHUCANI? a
1-2. Kontha isiyani myaakha cotheene ninawuupuwelela ukhwa wa Yesu?
MYAAKHA 2.000 uttuli, Yesu ahovaha ukumyaawe wiira anoopole. Nlattu wo iyo itthwiiyo, hiiva ninaahala ukhalana ukumi woohimala. Uhiyu woomalela Yesu hinaaya wiiviya, uyo ahowiirela attharyaawe wiira ahihiye wuupuwelela ukhwa wawe nimananna oohirikarika, avarelaka nteko iphaawu ni iviinyu.—1 Akor. 11:23-26.
2 Hiiva ninawiiwelela itthu ihimyalyaawe Yesu kontha ninanfenta cinene. (Joau 14:15) Myaakha cotheene, nihuku no Nuupuwelelo, hi ninawoonihera wiira ninaasukhuru itthu Yesu inipankenlyaawe. Ninoohihera usukhuru wihu nakumihaka ukati nno nihukunno wiira nuupuwelele ukhwa wawe ni wuupuwela ifayita urinaaya muukumini wihu. Ciicammo, ninawiikurumica wuulalyeerani naalattulaka atthu wiira yuupuwelele ukhwa wawe nno nihukunno. Ni hiiva khanimpheela uhiyerera hataa itthu inihiihaka ukhala nno nipuronno wanuupuweleloni.
3. Isiyani inhaleehu woopela mwaha?
3 Nhina ula mwahoola, ninaahala woona citthu tthaaru apoovu a Yehova cimpankesaaya wiira yuupuwelele ukhwa wa Yesu: (1) upanka Nuupuwelelo no nookhwa na Kristu khampa Yesu ciitthucihalyaawe, (2) waalattula atthu wiira yoone Nuupuwelelo ni (3) woona Nuupuwelelo hataa yakhalaka masankiho.
UPANKA NUUPUWELELO KHAMPA YESU CIITTHUCIHILYAAWE
4. Ikhweelini cinoopuseriyeehu khula mwaakha wanuupuweleloni, ni nlattuni ninlamuliyeehu uvaha ifayita nnyo ikhweelinnyo? (Nwehe Luka 22:19, 20.)
4 Khula mwaakha, ukati wo wuupuweleliya ukhwa wa Yesu Kristu, hiiva ninaaviriyanaka mwaha untaphuleliya ivareliyaka nteko Ibiiblya ni unttonkaca kontha isiyani Yesu khwilyaawe. Hiiva ninawiitthucaka kontha isiyani apinaatamu umpheelaaya woopoliya ni ninawiitthuca manannani ukhwa wa ntthu mmoca paahi cinkhitirihaaya uleveleliya matampi aatthu otheene. Ni ninawuupuseriya tipani nlamuliya ukhuura iphaawu, uwurya iviinyu ni nnyo citthu piilinnyo cinhimya isiyani (Nsome Luka 22:19, 20. b) Uhiya commo, inawoopeliyaka mwaha iparakha inwehereraaya ale anhala ukhala va watuninyani va mpaka. (Isai. 35:5, 6; 65:17, 21-23) Ikhanle itthu yofayita cinene uwacera nnyo ikhweelinnyo. Atthu enci khancuwela nnyo citthunnyo ni khanvaha ifayita ukhwa wa Yesu Kristu. Ciicammo, ayo khanoopuwelela ukhwa wa Yesu khampa uyo ciitthucihalyaawe. Nineerelani commo?
5. Ukhwa waya maapostolu a Yesu enci, isiyani yeerannyaale?
5 Waakhwilyaaya maapostolu a Yesu enci, yahokhumelela makristau afaalusu wanlokoni neekrisatau. (Mat. 13:24-27, 37-39) Ayo yahancera wuuluma “citthu cinci cowoothiya wiira yaahapuse atthari enci.” (Mite. 20:29, 30) Itthu imoca yowoothiya yeetthucihaaya ayo makristau afaaluswaayo yaahimya wiira Yesu khavaherenre irutthwaawe “ikwaha imoca paahi wiira akuse itampi ca atthu enci,” khampa Ibiiblya cinhimyaaya. Ayo yaahimya wiira wiivaherera wa Yesu wahaana waakuleliyaka ikwaha cinci. (Mabere. 9:27, 28) Ilelo, atthu enci anaakupali iyo itthu yowoothiyeeyo. Ayo anaarwa ukereeca khula isumana, ni uhaavo ukati unrwaaya mahuku otheene wiira akavihere uvahereriya irutthu ya Yesu. Ayo aneehana iyo itthwiiyo “imiisa.” c Mmattiinini cikhwaawe, atthu khantepa wuupuwelela ukhwa wa Yesu ikwaha cinci, masi khancuweleeha isiyani ikhanle wiivaherera wa Yesu. Ayo atthwaayo anawiikoha co: ‘Ukhwa wa Yesu khweeliini unaakhitiriha uleveleliya itampi caka?’ Atthu akiina unawaarika ukupali iyo itthwiiyo kontha anwiiwelela ale aneera wiira ukhwa wa Yesu khunkhitiriha uleveleliya matampiihu. Manannani makristau eekhweeli cinaakaviheraaya ayo atthwaayo ucuwela mananna owuupuwelela ratta ukhwa wa Yesu?
6. Mwaakha wo 1872, ikhurupu yaanamasoma Ibiiblya yoonelenle isiyani?
6 Mwaakha wo 1870, amunna Charles Russell ni ikhurupu yaatthu vakaani yahancera usoma cinene Ibiiblya. Ayo atthwaayo yaapheela ucuweleeha wiivaherera wa Yesu khweeliini ikhanle isiyani ni manannani caalamuliyaaya wuupuwelela ukhwa wawe. Phimaana, mwaakha wo 1872, ayo yahokhitiri wooneeha mbiiblyani wiira khweeliini Yesu aakhwiile wiira awoopole apinaatamu. Ayo yahaahimyeera atthu enci iyo itthwiiyo, yavarelaka nteko ilivuru, ijornali ni irevista. Uvira waya ukati vakaani, ayo yahancera wuupuwela ukhwa wa Yesu ikwaha imoca khula mwaakha, khampa caapankaaya maapostolu.
7. Manannani citthu coonelenlyaaya anamasoma Ibiiblya khalayi cinniphwanyihaaya ifayita?
7 Ilelo, thi hiiva nimphwanyera ifayita citthu cotheene coonelenlyaaya ale anamasoma Ibiiblyaale. Manannani? Yehova honikavihera ucuweleeha wiira wiivaherera wa Yesu khweeliini unawoonihera citthu cinhalaawe waapankela apinaatamu wahoolo. (1 Jo. 2:1, 2) Masi ciicammo ninaakhitiri wiiweeha wiira ahaavo maweherero meeli arinaaya apinaatamu anonswalela Nluku—ahaavo anweherera urwaa ukhala wiirimu ni atthu enci akhwaawe anweherera urwaa ukhala va watuninyani va mpaka. Wuupuwela mananna Yehova cinnifentaawe ni mananna wiivaherera wa Yesu cinniphwanyihaaya ifayita unaanikavihera utepa umpatthanana Yehova. (1 Pet. 3:18; 1 Jo. 4:9) Phimaana, khampa mayamunna ookhuluvelya okhalayi, hi ninawaalattula akhunanihu wiira yuupuwelele ukhwa wa Yesu khampa mwaneene ciitthucihalyaawe.
WAALATTULA ATTHU WIIRA YUUPUWELELE UKHWA WA YESU
Isiyani nyuuva inlamuliyeenyu upanka wiira nkavihere cinene ukawa malattulo? (Nwehe iparaagarafu 8-10) i
8. Isiyani apoovu a Yehova ukhuma nenne nokhalayi ipankaaya wiira yaalattule atthu wuupuwelela ukhwa wa Yesu? (Nwehe ilatarato.)
8 Ukhuma nenne nokhalayi, apoovu a Yehova anawaalattula atthu wiira yuupuwelele ukhwa wa Yesu Kristu. Mwaakha wo 1881, irevista Ukhalenla yahaalattula mayamunna ni mayanuunu wiira athukumane wapuwani wawe munna mmoca ncoko uneehaniya Allegheny, u Pennsylvania, waahalaaya woona uyo nkutthaano muulupalyooyo. Wahoolo, khula nloko nahancera wuupuwelela ukhwa wa Yesu. Mweeri wo Março wo 1940, anamalalyeera yahokurumiciya wiira yaalattule atthu akhwaawe wuulalyaani yaahala upheela wuupuwelela ukhwa wa Yesu Kristu. Ni mwaakha wo 1960, yaari ikwaha yoopacera Ipeteli yempiriminryaaya malattulo menci wiira alattuliye atthu woona Nuupuwelelo. Ukhuma uyo ukatyuuyo mpaka nna co, anaakawiya malattulo menci. Masi nlattuni nineekurumiceehu cinene waalattula atthu?
9-10. Waalattula atthu wiira yuupuwelele ukhwa wa Yesu unonkavihera tipani? (Nwehe Joau 3:16.)
9 Itthu imoca inniiriha waalattula atthu wiira yuupuwelele ukhwa wa Yesu, ukhalaka wiira ale ampaceriha wuupuwelela ukhwa wa Yesu anawiitthuca isiyani Yehova ni Yesu innipankelaaya otheene cihu. (Nsome Joau 3:16. d) Hi ninweherera wiira ukati wo Nuupuwelelo, citthu cotheene ayo atthwaayo cinhalaaya woona ni wiiwa caavare nrima wiira apheele wiitthuca myaha co mbiiblyani ni yancere unswalela Yehova. Masi kahi wiira ayo atthwaayo paahi phinkaviheriya.
10 Hiiva ciicammo ninawaalattula ale ahiile ukhala Masaahiti a Yehova. Nimpanka commo kontha nimpheela uwuupusera wiira Yehova nanlelo nawaafenta cinene. Enci anaatthuna nlattulo nihu ni hi ninaakhala ootteeliya cinene nlattu woowoona. Woona Nuupuwelelo pooti uwuupusera inanna caatteeliyaaya nrima uwakati wanswalelaaya Yehova. Moone ntakihero na Monica aahiile ulalyeera. e Ukati woretta yo COVID-19, uyo ahohokoleela ulalyeera ni Masaahiti a Yehova. Woona wawe Nuupuwelelo no 2021, aheera: “Nno Nuupuwelelonno nahokicivela cinene. Nhina myaakha 20 civinre, iyo phi ikwaha yoopacera yaakumihilyaaka ukati wiira kaalattule atthu wiira yoone Nuupuwelelo. Mi kinansukhuru cinene Yehova ni Yesu nlattu wo itthu ikipankenlyaaya. Phimaana, kiheekurumica waalattula atthu.” (Isaa. 103:1-4) Hi ninawiikurumica upanka yotheene inkhitiriihu wiira naalattule atthu. Hataa ayo yatthunaka nlattulo nihu awula yahitthunaka. Itthu yuulupale cinene ukhalaka wiira Yehova naavaha ifayita cinene wiikurumica wihu.
11. Manannani Yehova cincaalihaawe wiikurumica wihu waalattula atthu wiira yuupuwelele ukhwa wa Yesu? (Nwehe Ageu 2:7.)
11 Yehova naacaaliha cinene wiikurumica wihu waalattula atthu wiira yoone Nuupuwelelo. Mwaakha wo 2021, hataa ikhalaka iretta yo COVID-19, atthu 21.367.603 yahoopuwelela ukhwa wa Yesu Kristu. Nno nummerunno ninaavikana ikwaha piili nummeru no Masaahiti a Yehova ntuninyani motheene. Hi ninaacuwela wiira Yehova khanwacera nummeru naatthu. Itthu impheelaawe cinene ukhanle umoona khula ntthu oopuwelelaka ukhwa wa Yesu Kristu. (Luka 15:7; 1 Tim. 2:3, 4) Hi ninaakupali wiira naalattulaka atthu wiira yuupuwelele ukhwa wa Yesu, Yehova naanikavihera waaphwanya ale arina nrima womaana.—Nsome Ageu 2:7. f
WOONA NUUPUWELELO HATAA YANIKHUMELELAKA MASAKHA
Yehova naanicaaliha neekurumicaka wiira noone Nuupuwelelo (Nwehe iparaagarafu 12) j
12. Isiyani atthunaka yaahala unirikihela woona Nuupuwelelo? (Nwehe ilatarato.)
12 Yesu aheera wiira uwakati wo mahuku ookhicera, yaanaahala unikhumelela masakha menci: ulupatthiya naamuciihu, ulupatthiya niikuvernu, ikhotto, iretta ni citthu cikhwaawe. (Mat. 10:36; Mark. 13:9; Luka 21:10, 11) Nnyo citthunnyo pooti unirikihela cinene woona Nuupuwelelo. Isiyani mayamunneehu ni mayanuunwiihu impankaaya wiira yuupuwelele ukhwa wa Yesu, hataa yaakhumelelaka ayo masakhaayo? Ni manannani Yehova cinaakaviheraawe?
13. Manannani Yehova caacaalihalyaawe ulipa nrima wa munneehu Artem ni ulakela wawe wuupuwelela ukhwa wa Yesu Kristu hataa akhalaka nkhattya?
13 Utthukeliya nkhattya. Mayamunna atthukeliye nkhattya nlattu wo waamini waya anaapanka yotheene inkhitiryaaya wiira yuupuwelele ukhwa wa Yesu. Moone ntakihero na munneehu neehaniya Artem. Uwakati wo Nuupuwelelo no 2020, uyo aari nkhattya yankaani nkhayi nimaperesu 5. Hataa ukhalaka commo, uyo ahokhitiri utthonkomaniha citthu caahalaawe uvarela nteko wiira oopuwelele ukhwa wa Yesu Kristsu. Ahotthonkomaniha iphaawu, iviinyu ni ahotthenkaca veekha cawe mwaha waahalaawe utaphulela. Masi maperesu akinaayo yaananlya sikaaro ni yaanaaveeha cinene. Uyo ahaalepela wiira avirihe iwoora imoca woohinnuula sikaro ni woohuuluma citthu cooveeha. Vano yaheerannya itthu yahaawehereraawe munneehu. Ayo mapereswaayo yahotthuna itthu yaalepenlyaawe. Munna Artem ahopheela waahimyacera Nuupuwelelo ikhanle isiyani. Ule ukatyuule unookhalaru wiira ayo khayaaphenle umwiiwelela munna Artem, uwakati waamoonalyaaya oopuwelelaka ukhwa wa Yesu, ayo yahancera umpanka makoho menci.
14. Manannani apoovu a Yehova cikhitinryaaya wuupuwelela ukhwa wa Yesu hataa ikhalaka iretta yo COVID-19?
14 Iretta yo COVID-19. Nlattu woretta yo koronaviiru, Masaahiti a Yehova khayaalamuliya uthukumana nipuro nimoca wiira yuupuwelele ukhwa wa Yesu Kristu. Masi iyo itthwiiyo khayaahiihile wuupuwelela ukhwa wa Yesu. g Maloko o Masaahiti a Yehova yaakhitinri ukhalana interneti yahoopuwelela ukhwa wa Yesu niivideoconferência. Masi atthu enci khayaarina interneti. Vano yaapankile cani? Ilapo cikhwaawe, mwaha wo Nuupuwelelo wahoviriyaniya mmaraatiyuni awula mmateeveni. Ciicammo, Ipeteli cinci cahokaravari mwaha wo Nuupuwelelo niiluuka coopwaha 500, ni mayamunna yahocisa uyo mwaha wookaravariyooyo ni waarweehela ale yaapheela. Hataa ale yaakhala mapuro oorika uphinnya, yahokhitiri wuupuwelela ukhwa wa Yesu Kristu.
15. Itthu yankhumelenle Sue inwiitthucihani isiyani?
15 Ulupatthiya naamuciihu. Atthu akhwaawe unawaarika woona Nuupuwelelo nlattu woolupatthiya naamucyaaya. Moone itthu yankhumelenle namasoma Ibiiblya mmoca neehaniya Sue. Mwaakha wo 2021, nihaleelaka nihuku nimoca wiira nuupuwelele ukhwa wa Yesu, Sue ahowiirela arokorihu yansomiha Ibiiblya wiira nlattu woolupatthiya naamucyaawe, khaahala ukhitiri wuupuwelela ukhwa wa Yesu. Phimaana, arokorihu yansomiha Ibiiblya yahonsomela Luka 22:44. Vano, yahonhimyeera wiira yanikhumelelaka masakha, nihaana nintakihaka Yesu. Uyo khaahiya unlompa Yehova ni aanaahiya citthu cotheene mmatatani wa Yehova. Waaseele, Sue ahokhitiri utthenkaca iphaawu ni iviinyu ni ahoona mwaha wo uswali woowicisu nsayitini jw.org. Vano uhiyu, ahonkoma veekhaawe ukatti wawe ni ahoviriyana mwaha wo Nuupuwelelo ntelefooneni. Wahoolo, Sue ahowantikhela arokorihu yansomiha Ibiiblya co: “Itthu ikihimenreenyu ncana ihokilipiha venci. Mi kihopanka yotheene yaakhitinryaaka wiira kuupuwelele ukhwa wa Yesu ni Yehova khweeliini hokicaaliha. Mi akirina moolumo wiira kuuhimyeereni inanna cinkitteelaaya nrima cinene ni kinonsukhurwaaka Yehova.” Nyuuva nnaakupali wiira Yehova pooti wuukaviherani uvilela yookhumelelakani itthu toko iyo?
16. Kontha isiyani ninlamuliyeehu ukupali wiira Yehova naahala ucaaliha wiikurumica wihu wuupuwelela ukhwa wa Yesu? (Nwehe Arooma 8:31, 32.)
16 Yehova naavaha ifayita cinene wiikurumica wihu wiira nuupuwelele ukhwa wa Yesu Kristu. Pooti wankupaliihu wiira Yehova naahala unicaaliha nathoonyeraka usukhurweela itthu inipankenlyaawe. (Nsome Arooma 8:31, 32. h) Phimaana, nilakele woona Nuupuwelelo no nantano ni wiikurumica utepa uwacera citthu co mminepani uyo uwakati muulupalyooyo.
NCIPO 18 Obrigado Pelo Resgate!
a Nameeli, nihuku 4 no mweeri wo Abril wo 2023, atthu imiliyau cene ntuninyani motheene anaahala woona Nuupuwelelo no nookhwa na Yesu Kristu. Atthu akhwaawe anrwaa upaceriha woona, akhwaawe ahiile unswalela Yehova khalayi ni ahoviriha myaakha cinci ahoonaka Nuupuwelelo. Atthu akhwaawe anaahala waanana marikariko wiira akhitiri woona. Nyuuva pooti wankupaliinyu wiira Yehova naahala utteeliya cinene nlattu woowoonani mwiikurumicaka wiira moone Nuupuwelelo, hataa yuukhumelelakani masakha.
b Luka 22:19 Ciicammo, ahocisa iphaawu imoca, aholompa, ahomyaaniha ni ahaavaha, eeraka: “Ila inthoonyera irutthwaaka impheelaaka uvaha wiira mphwanye ifayita. Nhihiyerere upanka ila nkuupuwelelaka.” 20 Inanna imoca anamalihaleene ulya yoolya yo uhiyu, ahovaha ikoophu, eeraka: “Ila ikoophu ila inhimya nleehano no naanaano” nipankiye ni iphomyaaka, inhala umwarusiya wiira yuuphanyiheni ifayita.”
c Ayo atthwaayo ankupali wiira uyo ukatyuuyo, iphaawu ni iviinyu cinaatathuwa irutthu ni iphome ya Yesu Kristu. Ayo ankupali wiira irutthu ya Yesu ni iphomyaawe inaavahereriya khula ikwaha inrwaaya woona uyo nkutthaanooyo ukereeca.
d Joau 3:16 Kontha Nluku haafenta cinene apinaatamu, phimaana haavaha Mwanawe mmoca, wiira ntthu nhala umwaamini hitankanyiye, masi aphwanye ukumi woohimala.
e Macina makiina ahaakakhanihiya.
f Ageu 2:7 “Ni mi kinaarwaa waathukumeliha atthu olapo cotheene, ni cinaahala uwaaniya citthu cofayita colapo cotheene; ni ila inupeela kinaahala ucariha uttitthima waka,” neera Yehova, nhooleli aanakhotto.
g Nwehe ciicammo nsayitini jw.org yeekunya myaha cimphwanyannya wantikhiye “Memorial de 2021.”
h Arooma 8:31 Vano ninhala wuulumani, nhina nnya citthunnya? Ukhala wiira Nluku ri ni hiiva, tipani nhala unirukunuwela? 32 Uyo khoovelenle unvaha Mwanawe wiira akhwe nlattu wawihu hiiva otheene. Vano niireke wiira uyo khanhala univaha niiraati citthu cikhwaawe cotheene.
