NUULUMO “ikaaro” nantikhiye nhina Tradução do Novo Mundo niiluuka ikereeku pooti waaciya ikaaro coovirikana. (Mite. 8:28, 29, 38) Masi unkhala toko wiira ikaaro yeettanaawe nkwaha uyo nlopwanooyo yaari yuulupale uvikana ikaaro cokhotto caavareliya nteko ukati woopankiya icorrida co kaaro. Moone citthu cinnikupaliha commo.

Uyo nlopwanooyo ahaana ikhatera yuulupale ukuvernu ni aheetta nkwaha muulupale. Uyo aari nanteko muulupale aapwiyaamwene yeehaniya Candace ni uyo phaavahaceriye uwacera mihakhu caapwyaamwene. (Mite. 8:27) Ilapo yo Etiópia khalayi yaahela nhina ilapo yo Sudão, iri uhitto waya ilapo yo Egito. Pooti ukhalaka wiira uyo aheettiha ikaaro coovirikana munkwahani wawe. Masi, uyo anhala upheela ikaaro yuulupale wiira apakhirye mirintti cawe cotheene. Pooti ukhalaka wiira uyo apakhenrye mirintti cinci ule nkwaha muulupalyoole. Iseekulu yoopacera, cahaavo ikaaro co maroota macese ni cookhuneeliya caavareliya nteko wiira apakheriye atthu. Ilivuru imoca intaphulela myaha co mbiiblyani ineera wiira ikaaro toko nnyo cahaana ikhato yuulupale wiira cipakherye mirintti, atthwaaayo yaanawonkoma sana-saana ni, atthunaka, caari ikaaro caavareliya nteko mikwaha cuulupale.

Uyo nlopwanooyo ansoma ukati Filipe waamwaattamenlyaawe. Ihantisi yo nlivuruni yo Miteko ineera: “Filipe ahotthawa mpaka waattamenlyaawe ile ikaarweele, ni ahomwiiwa ule nlopwanoole asomaka ilivuru ya porofeeta Isaiya.” (Mite. 8:30) Ikaaro cavareliya nteko wiira cipankiye mikwaha cuulupale khacaapankiya wiira citthawe cinene. Phimaana, ule nlopwanoole ankhitiri usoma coowantikiya cowaarya ikaarweeyo yeettakoono ni ciicammo Filipe ahokhitiri utthawelela ni uphiyeera ikaarweeyo.

“Uyo nlopwanooyo ahonlepela Filipe wiira awele nkaaroni ni amoonkomaane.” (Mite. 8:31) Ikaaro caavareliya nteko wiira apankiye masinttano owoomolihana ikaaro, ntthu eettihooyo aakhala oweemela. Vano ikaaro caavareliya nteko wiira cipankaninye nkwaha, caakhala cuulupale. Phimaana yahaavo ikhato wiira onkome nlopwanooyo nkhayi ni Filipe.

Hi nintthara itthu insomeehu nhina Miteko ikapiitulu 8 ni citthu coonelenlyaaya anamasoma ihantisi cokhalayi. Phimaana, ilatarato co mmalivuruni wihu nokhumela nlopwanooyo ni Filipe anari nkaaroni yuulupale uvikana ikaaro caavareliya nteko ule ukatyuule wiira apankiye masinttaano.