1. Manannani makristau anlamuliyaaya ukhala khampa mwiri? (Nwehe ciicammo ilatarato.)

 AHAAVO atthu aneeraka co: “Iphyoo khinonta mwiri woohilipalipa. Iyo maanaaya wiira cihaavo miri cihinontya yaviraka iphyoo nlattu wookhala coovevyaala ni coohilipalipa. Woolikanaca, wiira nikhitiri unswalela Yehova wanitteelaka nrima, nihaana nikhalaka atthu oohilipalipa yanikhumelelaka marikariko muukumini wihu. Wiira nikhitiri uvilela marukunuso muukumini wihu ni wiira nihisime citthu akhunanihu cinoopuwelaaya awula cinlakelaaya upanka, nihaana nikhalaka atthu oohilipalipa ni ooreera nrima.

2. Makhaleloni anhala unikavihera uvilela marukunuso ni isiyani ninhaleehu woona nhina ula mwahoola?

² Khampa aswali a Nluku, nimpheela woonihera ukhala atthu oohilipalipa, owiiyeviha ni uthoonyera unamaana. Nhina ula mwahoola, ninaahala woona manannani ayo makhalelwaayo yaakavihenryaaya makristau waanana marukunuso yaaphwanyale. Ni ciicammo ninaahala woona manannani ayo makhalelwaayo anhalaaya unikavihera. Masi woopacera, nttwee noone isiyani inlamuliyeehu umwiitthucera Yehova ni Yesu, kontha ayo yahoonihera sana-saana uhilipalipa ni ureera nrima.

3. Nincuwela cani wiira Yehova khanle oohilipalipa?

³ Yehova neehaniya “Mwala” kontha uyo khanle oolipa ni oohittikhinyaa. (Deut. 32:4) Masi ciicammo, Yehova khanle oohilipalipa. Makhalelo o ntuninyani anvira yarukunuwaka, masi iyo itthwiiyo khinonsankiha Yehova, kontha uyo khanle oohilipalipa ni citthu cikhuluvelihilyaawe cotheene cinaahala wiirannya. Yehova wumpile apinaatamu nimakhalelo mamocaaru nuuyova, phimaana hiiva ninaakhitiri wiilemaleliha marukunuso ankhumelela muukumini wihu. Mbiiblyani, hi ninaaphwanya mattharelelo annikavihera ulakela upanka citthu comaana, hataa yanikhumelelaka marikarikoni.  Mananna Yehova cinweheraawe makhalelo o ntuninyani ni mattharelelo o nivahilyaawe mbiiblyani anaanikavihera ucuwelela wiira hataa uyova akhalaka “Mwala”, uyo ciicammo khanle oohilipalipa.

4. Nvahe ntakihero nimoca ninoonihera wiira Yehova khanle oohilipalipa. (Nwehe Levitiku 5:7, 11.)

⁴ Citthu cotheene Yehova nopankaawe cikhanle coohipahuwa ni cinawoonihera wiira khanle oohilipalipa. Uyo naawoonihera unamaana apinaatamu. Moone mananna caawoonihenryaawe asarayeli uhilipalipa wawe: Uyo khaalepela wiira mathaciri awula amasikhini avahe itthuvo cimocaaru. Ikwaha cikhwaawe, uyo aananhiya khula ntthu uvaha itthu yaarinaawe.—Nsome Levitiku 5:7, 11. b

5. Nttonkace matakihero anoonihera wiiyeviha ni uthunku wa Yehova.

⁵ Wiiyeviha ni uthunku wa Yehova unaamwiiriha ukhala oohilipalipa. Wootakihera, wiiyeviha wa Yehova woonannyeele ukati waapheelaawe umalamaliha isittatti yo Sotoma. Yehova ahoruma malayikha urwaa umwiirela Loti wiira atthawele ncoko wo mmyaakoni. Masi Loti ahoova ni khaatthunne urwaa uyo ncokooyo. Vano uyo naamucyaawe aholepela wiira atthawele ncoko weehaniya Zoar, isittatti yankaani Yehova yaalakenlyaawe umalamaliha ciicammo. Unari wiira Yehova khanle oolipalipa, uyo aahala umwiirela Loti wiira eettele itthu yeereliyaawe. Masi uhiya commo, Yehova ahotthuna itthu Loti yaalepenlyaawe ni ahorukunusa itthu yaalakenlyaawe; uyo aheera wiira khaahala umalamalihe ile isittattiile. (Upha. 19:18-22) Unavinreene ukati mwinci, Yehova ahowoonela uthunku atthu yaakhala u Niinive. Uyo ahonruma porofeeta Jonas urwaa uhimya wiira iyo isittattiiyo ni atthu otheene yaakhala nhina waya yanhala umalamalihiya. Masi ukati atthu o Niinive waattharuwilyaaya, uyo ahowoonela uthunku ni khaatankanyale iyo isittattiiyo.—Jonas 3:1, 10; 4:10, 11.

6. Nttonkace matakihero anoonihera wiira Yesu ahontakiha Yehova ni ahoonihera uhilipalipa.

⁶ Yesu ahontakiha Yehova ni ahoonihera ukhala ntthu oohilipalipa, awula oohikhanyerera itthu. Uyo aaveleeliyiye watuninyani wiira aalalyeere paahi atthu yaari “ikhontwaa coorimela co nloko no Isarayeli”. Masi uyo ahoonihera uhilipalipa ni ahaalalyeera atthu akiina yahaari asarayeli. Wootakihera, ukwaha imoca, athiyana yahaari asarayeli yahonlepela Yesu wiira anvonihe mwanaya mwanthiyana ‘aarina ciini anhuviha cinene.’ Nlattu woothunku, Yesu ahopanka itthu yanlepenlyaaya ale athiyanaale ni ahonvoniha mwanaya. (Mat. 15:21-28) Moone ntakihero nikiina. Wiipaceroni ntekwaawe woolalyeera, Yesu aheera: “Ule nokikhotta . . . , ni mi ciicammo kinaahala unkhotta.” (Mat. 10:33) Masi Yesu khankhottile Peturu, hataa ukhalaka wiira Peturu ahonkhotta Yesu ikwaha tthaaru. Uyo ancuwela wiira Peturu ahottharuwa ni aari nlopwana ookhuluvelya. Wunwelelihiya wawe, Yesu ahomphwanya Peturu ni  unawoonannya wiira ahomwiirela wiira aananfenta ni wiira ahonlevelela.—Luka 24:33, 34.

7. Toko cinhimyaaya Afilipo 4:5, hiiva nimpheela ucuweliya wiira nikhanle atthu owiira cani?

⁷ Mpaka va, nihoona wiira Yehova ni Yesu akhanle oohilipalipa. Masi hiiva? Yehova noweherera wiira hiiva nintakihe. (Nsome Afilipo 4:5. c) Ihaavo Ibiiblya itaphulenle iyo iveeruswiiyo co: “Ncuweliye wiira mwaatthu oohilipalipa [awula oohikhanyerera itthu].” Hi nihaana niikohaka co: ‘Kiireke wiira atthu anaakoona ukhala ntthu oohilipalipa ni owaakuva uleva itthu? Awula kinooniya ukhala ntthu oolipalipa, ookhanyerera ni oopica uleva itthu? Kinawaakhanyereriha akhwaaka upanka citthu cotheene khampa cinkicivelaaya miiva? Awula kinawiiwelela miruku caakhwaaka ni kinaweettela?’ Inanna cinoonihereehu uhilipalipa wihu, phinthoonyera wakhala wiira ninantakiha Yehova ni Yesu awula mena. Nttwee noone mananna meeli ninlamuliyeehu ukhala atthu oohilipalipa: wakhalaka wiira ahorukunuwa makhalelweehu ni wakhalaka wiira citthu cinlakelaaya upanka akhunanihu ni moopuwelelwaaya anaavirikana naayo awihu.

8. Isiyani inhala unikavihera ukhala atthu oohilipalipa yarukunuwaka makhalelweehu? (Nwehe ciicammo niwehero.)

⁸ Makhalelweehu yarukunuwaka, nihaana nikhalaka atthu oohilipalipa. Ayo marukunuswaayo pooti uwaana itafaawuti cahaaweherereehu, toko uwerennya venci, unithwaa nsurukhu awula uhuva nlattu wo nanrokottole osiyaasa ncoko unkhaleehu. (Ekles. 9:11; 1 Akor. 7:31) Hataa ciicammo uhihiya nteko waavareehu pooti uniwaanela marikariko menci. Masi hataa yanikhumelelaka isiyani, hi pooti ukhitiri wiilemaleliha makhalelo onaanaano napankaka nnya citthu cesennya: (1) ukupali itthu innikhumelela, (2) uweheeha citthu coohoolo, (3) uweheeha citthu comaana, ni (4) waapankela citthu comaana akhwiihu. d Nttwee noone citthu ciwiirannyenle akhwiihu cinoonihera wiira nnyo citthu cesennyo pooti unikavihera.

9. Manannani anamathelana mamisiyonaariyu yaavilenlyaaya marikariko yahaawehereraaya?

⁹ Nkupali itthu inookhumelelani. Amunna Emanuele ni amwaaraya, Francesca, yaholattuliya urwaa uvara nteko weemisiyonaariyu ilapo ikhwaawe. Upacera waya wiitthuca iluuka yo nno nipuronno ni waapacenryaaya waacuwela mayamunna ni mayanuunu o wanlokoni, yahopacera iretta yo COVID-19 ni ayo yahaana yakhalaka wapuwani paasi. Woohivira ukati mwinci, anumwanaya anuunu Francesca yahokhwa ni ayo yampheela wiira arwee yakhale nkhayi naamucyaaya. Masi nlattu woretta yo koronaviiru, ayo khayaakhitinri urwaa. Isiyani yaakavihenre anuunu Francesca uvilela ayo masakhaayo? Itthu yaakavihenre waari ulompa waapankaaya nkhayi ni awannyaya yalepelaka ucuwelaca. Itthu ikiina yaakavihenre waari uhikhala yuupuwelaka masakha o nihuku no meelo, masi ukhala khula nihuku ikwahaayaru. Yehova ahaakhula ulompa waya avarelaka nteko iyoolya yo mminepani yaawaaniya iwoora yaapheelaaya. Wootakihera, ayo yaholipihiya cinene niitthu yoolumilyaawe munna mmoca ukati waakhulaawe makoho ontrevista yaapankiyaawe. Uyo enre co: “Hiiva naakuvaka wiilemaleliha itthu innikhumelela, khaninhala upica uturuwela ukhala ootteeliya ni ninaahala ukumihera ifayita makhalelweehu onaanaano.” e Ayo ciicammo yaholakela unvarela nteko saana telefooni wuulalyeerani ni mpaka yahokhitiri waaphwanya atthu owaasomiha Ibiiblya. Uhiya commo, ayo yahotthuna ukaviheriya ni ulipihiya nimayamunna o wanlokoni naya ni yahosukhurweela venci nlattu  wo iyo itthwiiyo. Wootakihera, anuunu amoca o wanlokoni yanwantikhelaka imensagem khula nihuku niiveerusu yo mbiiblyani. Wahoviriha mwaakha mmoca yapankaka iyo itthwiiyo. Ni hiiva ciicammo nakupaleelaka marukunuso ankhumelela muukumini wihu, ciicammo ninaahala utteeliya ukati woopanka itthu inkhitiriihu.

10. Mananna anuunu amoca yaakhitinri cani wiilemaleliha itthu yaarukunusile makhalelwaaya?

¹⁰ Nweheehe citthu coohoolo ni nweheehe citthu comaana. Anuunu amoca aneehaniya Christina o Romênia ankhala u Japão, wahaaripa nrima ukati weewilyaaya wiira nloko noluuka Inglês naarwaakaaya khanaahala uthukumaniya-tho. Waahookhalaru commo, ayo khayaakhanle yuupuwelaka itthu yeerannyeele. Uhiya commo, ayo yahorwaa umikutthaanoni coluuka Japonês ni yaheekurumica upanka inkhitiryaaya wiira alalyeere niiyo iluukeeyo. Ayo yahonlepela nthiyana anvaranaaya nteko khalayi wiira aakavihere usoma ni wuuluma iluuka yo Japão. Ayo yahonlepela wiira awiitthucihe iyo iluukeeyo avarelaka nteko Ibiiblya ni ibroxura Mphwanye Utteeliya Uhimmala! ni uyo nthiyanooyo ahotthuna. Phimaana, uhiya paahi anuunwiihu wiitthuca iyo iluukeeyo, nthiyana aawiitthucihooyo cahancera uncivela myaha co mbiiblyani. Hiiva naahikhanyerereke citthu cokhalayi ni natothaka woona citthu comaana, ninawoonenela wiira marukunuso anikhumelenle pooti uniwaanela iparakha cahaaweherereehu.

11. Manannani anamathelana caakhitinryaaya uvilela, hataa waathwaaka nsurukhu?

¹¹ Mwaapankele citthu akhunaninyu. Anamathelana amoca ankhala ncoko unkhottihiyaaya miteko cihu, yahopacera waakhumelela marikariko ukati waapacenryaaya uthwaa nsurukhu iyo ilapweeyo. Yaakhitinri cani wiilemaleliha makhalelo onaanaano? Yoopacera, ayo yahopanka marukunuso wiira ahikhalane mihakhu cinci. Vano, uhiya ukhala yuupuwelaka citthu cokhalayi, ayo yaholakela uviriha ukati mwinci yalalyeeraka ni yaakaviheraka akhwaaya. (Mite. 20:35) Amunnaayo aheera co: “Uviriha ukatiihu nilalyeeraka, wahonikavihera uhiviriha ukati mwinci nuupuwelaka citthu coohinamaana ni iyo itthwiiyo yahonikavihera uweheeha itthu impheelaawe Yehova.” Makhalelweehu yarukunuwaka, itthu yofayita inlamuliyeehu wuupuwela ukhanle uhihiyerera waakavihera akhwiihu, venci-venci naalalyeeraka.

12. Manannani ntakihero na Paulu ninhalaaya unikavihera wiira nikhitiri urukunusa mananna oolalyeera?

¹² Wuulalyeerani, nihaana ukhala atthu oohilipalipa. Wuulalyeerani, hi ninawaaphwanya atthu oovirikana nhina makhalelwaaya, ileema caya ni anaamini citthu coovirikana. Apostolu Paulu ancuwela wiilemaleliha citthu cahaalemalenlyaawe, ni hiiva pooti wanontakiheehu. Yesu ahonthanla Paulu wiira akhale “apostolu aamalaponi”. (Aroo. 11:13) Paulu ahaalalyeera akereeku, ayuuta, atthu oosoma ni oohisoma, ahooleli ni mamwene. Wiira aavare nrima atthu otheene ayo, Paulu aheekhaliha “citthu cotheene iriyari yaatthu otheene.” (1 Akor. 9:19-23) Uyo ananweha ntthuuyo, antotha woona nipuro naakhumaawe ni itthu yaaminnyaawe. Nlattu woopanka commo, Paulu ankhitiri waavara nrima atthu otheene. Hi ciicammo pooti wampankeehu iyo itthwiiyo wiira nikhitiri waavara nrima atthu, nawehaceraka makhalelwaaya ni wiilemaleliha ayo makhalelwaayo.

13. Itthuni yowoopiha ihimiye nhina 1 Akorintu 8:9 inhala unikavihera unyema naahisimaka itthu inoopuwelaaya akhwiihu?

¹³ Ukhala atthu oohilipalipa unaahala unikavihera uhisima itthu inoopuwelaaya akhwiihu. Wootakihera, mayanuunu akiina unawaacivela wiireerihaca uwiitho, awula wootta maquiagem. Masi mayanuunu akiina khunaacivela. Mayamunna akiina anaalakela uwurya nipha, masi woohihapaliya; ni mayamunna akiina khampheela uwurya nipha. Otheene cihu ninaapheela ukhalana ukumi womaana, masi khula ntthu nolakela  mwaaneennyaawe mananna oowacera ukumyaawe. Hiiva noopuwelaka wiira nihaana isariya ukati wotheene ni namananihaka waakhanyereriha akhwiihu upanka citthu toko hiiva cimpankeehu, unawoopiha hiiva waahapusa awula uhiwiiwananiha mayamunna o wanlokoni. Khweeliini, hi khanimpheela wiira iyo itthwiiyo yiirannye! (Nsome 1 Akorintu 8:9; f 10:23, 24) Ninaahala woona vano mananna meeli anoonihera wiira neettelaka mattharelelo o mbiiblyani, ninaahala ukhitiri uwehera ratta citthu ni ukhalakhala ninnema.

14. Isiyani ninlamuliyeehu wuupuwela ukati woolakela mananna oowara ni wiiphwaneliha?

¹⁴ Mawarelo ikuwo ni mananna oomettha ikharari. Yehova khannihimerya ikuwoni cinlamuliyeehu uwara, masi uyo honivaha mattharelelo annikavihera ucuwela mananna oowara. Nihaana niwaraka ikuwo cowoonihera wiira hiiva ninanhisima Nluku, khanineecuunuwiha ni wiira naatthu “ankhili omaana.” (1 Tim. 2:9, 10; 1 Pet. 3:3) Hiiva khanimpheela uwara ikuwo wiira nooniye naakhunanihu. Mattharelelo o mbiiblyani ciicammo pooti waakavihera mahumu o wanlokoni uhikumihera malamulo nhina mananna oowara ni wiiphwaneliha. Wootakihera, mahumu o nloko nimoca yaapheela waakavihera amirawo o wanlokoni yaapacenre utthara itthu yaawile na moda yo weetta niikharari coohivaciya. Manannani ayo mahumwaayo caahalaaya waakavihera ayo amirawaayo woohikhala toko wiira anaavaha ikettelo caya? Mootoli osirikwiitu ahaavaha nruku ayo mahumwaayo awiirelaka co: “Wakhalaka wiira nyuuva nri nsalau ntaphulelaka mwaha; vano atthwaayo yoowehakani venci nyuuva uhiya uviriyana mwaha untaphuleleenyu, maanaaya wiira ihaavo ihiri saana nhina mananna ciwanreenyu.” Iyo itthwiiyo yahaakavihera mahumu umalamaliha iyo itafaawutiiyo woohikumiherera ikettelo. g

15. Malamuloni ni matthareleloni o mbiiblyani anhala unikavihera napheelaka ulakela nhina ukumiihu? (Nwehe Arooma 14:5.)

 ¹⁵ Uwacera ukumi. Khula nkristau awerennyaka, haana ulakela mananna nohalaawe uwacera ukumyaawe. (Akalas. 6:5) Nkristau apheelaka uthanla mananna oowacera ukumyaawe, ikano nolamuliyaawe utthara phi nnye cinooluma uhiheleliya iphome ni unyema citthu co maciini, ihako ni citthu caale aneehimya ukhala akulukhano. (Mite. 15:20; Akalas. 5:19, 20) Uhiya nnyo, khula nkristau pooti ulakela mananna oowaceriya nohalaawe upheela. Akiina anrwaa usipiritaali wiira iwaceriye irettaaya, masi akiina anaavya mananna makiina oowacera irettaaya. Hiiva nihaana nihisimaka mananna itthu inlakelaawe upanka khula munna nhina matafiteliyo iretta ahinvonyaniha Ibiiblya, hataa hiiva naaminiki awula mena. Phimaana, hi nihaana nuupuwelaka nnya citthunnya: (1) Umwene wa Nluku paasi phinhala umalamaliha iretta cotheene. (Isai. 33:24) (2) Khula nkristau haana ‘akupaleehaka’ isiyani inoonaawe ukhala itthu yomaana ukati woothanla mananna ootafitiya irettaawe. (Nsome Arooma 14:5. h) (3) Khaninlamuliya uwuuluma pusya akhwiihu nlattu wo itthu ilakenlyaaya ni khaninlamuliya wuuluma awula upanka hataa itthu inhala waakakathula. (Aroo. 14:13) Ni (4) Makristau anaafentana ni anaacuwela wiira wiiwanana wanlokoni ikhanle itthu yofayita cinene uvikana citthu cinoopuwelaaya. (Aroo. 14:15, 19, 20) Noopuwelaka ukati wotheene nnya citthunnya, ninaahala ukhalana upatthani woolipa nimayamunneehu ni uwaana nnema wanlokoni.

16. Mahumu anoonihera cani wiira akhanle atthu oohilipalipa ukati woolakela nkhayi itthu yoohala upankiya? (Nwehe ciicammo ilatarato.)

¹⁶ Mahumu anlamuliya uvaha ntakihero ni woonihera ukhala atthu oohilipalipa. (1 Tim. 3:2, 3) Wootakihera, humu khanlamuliya uweherera wiira anaahala utthariya ankhilyaawe otheene nlattu wookhala muulupale waapwaha mayamunna akiinaayo. Uyo naacuwela wiira nnepa wowaarya wa Yehova pooti unhoolela khula humu wiira avahe ankhili anhala ukavihera nloko. Ni, wakhalaka wiira mahumu encyaayo anaalakela upanka itthu ihinvonyaniha mattharelelo o mbiiblyani, humu oohilipalipa naahala ukupaleela itthu ilakeliye, hataa ukhalaka wiira kahi phi itthu incivenle wiira ipankiye.

17. Uhilipalipa unniwaanela iparakhani?

¹⁷ Makristau yakhalaka oohilipalipa anawaakhela iparakha cinci. Wootakihera, hi ninaakhalana upatthani woolipa nimayamunna ni nimayanuunu, ni iyo itthwiiyo inaawaana nnema wanlokoni. Hi ninaakhala ootteeliya ni inkhala iparakha yuulupale waacuwela atthu okhapila ni o makhalelo oovirikana ni unaareera ucuwela wiira, hataa nivirikanaka, otheene cihu ninonswalela Yehova naataanaka. Ni itthu itepile ukhala yofayita ni innitteeliha nrima ukhanle ucuwela wiira ninontakiha Yehova Nluku, ule khanle oohilipalipa ni oohikukurya.