MWAHA WOOSOMIYA 30
Nhihiye woonihera nifento
“Noonihere nifento ni nuunuwe niinanna cotheene.”—EFESU 4:15.
NCIPO 2 O Teu Nome É Jeová
NINHALA WIITTHUCANI? a
1. Ikhweelini ceetthucileenyu ukati wancenreenyu usomihiya Ibiiblya?
NYUUVA nnawuupuwela ukati wancenreenyu usomihiya Ibiiblya? Pooti ukhalaka wiira mwahokhala ootikhinihiya nlattu woocuwela wiira Nluku haana ncina. Awula waahootaphuwani nrima nlattu woocuwela wiira Nluku khanaapaha atthu wamooroni. Ni atthunaka wahootteelani nrima nlattu woocuwela wiira nnaahala uwoona-tho atthu anaafenteenyu akhwile, wanhalaaya wunwelelihiya wiira ahokoleele ukhala watuninyani upeephoni.
2. Uhiya usoma Nuulumo na Nluku paahi isiyani nyuuva yaapankileenyu-tho wiira muunuwe mminepani? (Nwehe Efesu 5:1, 2.)
2 Ukati waavireenyu nsomaka Nuulumo na Nluku nyuuva mwaanaavira ntepaka unfenta. Ni nwo unfentanwo waanawuukurumicani weettela itthu yeetthuceenyu. Vano nyuuva mwahancera uvara citthu comaana, nttharaka malakihero o mbiiblyani. Nyuuva mwahancera ukhalana meettelo omaana kontha mwaapheela untteeliha nrima Nluku. Ni khampa mwaana cinaatakihaawe athumwaane, nyuuva mwahancera waatakiha athumwaninyu owiirimu.—Nsome Efesu 5:1, 2. b
3. Isiyani inlamuliyeehu wiikoha?
3 Hiiva pooti waneekoheehu co: ‘Kiireke wiira ilelo kinanfenta Yehova toko waakhanlyaaka nkristau wiipaceroni? Kiireke wiira kinneekurumica woonihera meettelo omaana ni upanka citthu kintakihaka Yehova? Kiireke wiira kinnoonihera waafenta mayamunnaaka ni mayanuunwaaka?’ Wakhala wiira nyuuva nnawoonenela wiira nifento narineenyu wiipaceroni nihoririyaca, nhikhale ni masukhuli. Makristau oopacera yahowiirannyeela iyo itthwiiyo. Yesu khawoocyaale ni uyo khweeliini nyuuva ciicammo khanhala uwoocyaani. (Apoka. 2:4, 7) Uyo naacuwela wiira hiiva neekurumicaka ninaakhitiri uhokoleela ukhalana nifento naarineehu ukati weetthuceehu ikhweeli co mbiiblyani.
4. Ninhala wiitthucani nhina ula mwahoola?
4 Nhina ula mwahoola nihaala woona manannani ninlamuliyeehu uhihiyerera woonihera unfenta wihu Yehova ni akhunanihu. Ni ninaahala woona iparakha ninhaleehu uphwanya naahihiyeke unfenta Yehova ni nimayamunneehu.
MUNCERERE UNFENTA WINYU YEHOVA
5-6. Marikarikoni yamphwanyile apostolu Paulu ukati waavaraawe nteko wa Nluku Yehova ni isiyani yankurumicile uhihiya unswalela?
5 Apostolu Paulu waanantteela nrima cinene ukati wanswalelaawe Yehova, masi uhaavo ukati waakhanlyaawe ni marikariko. Paulu ahaana arwaaka mapuro oottayi, masi weetta ule ukatyuule waanaarika. Ikwaha ceettaawe Paulu caanankhumelela “citthu cowoopiha mmamyoolokoni” ni “waanawoopiha waaphwanya malatarawu”. Ni ikwaha cikiina Paulu ahaattakaciya. (2 Akor. 11:23-27) Ni ikwaha cikhwaawe mayamunna khayoona ukhalana ifayita wiikurumica wawe wiira aakavihere.—2 Akor. 10:10; Afili. 4:15.
6 Isiyani yankavihenre Paulu uhihiya unswalela Yehova? Paulu aheetthuca makhalelo a Yehova nhina cowantikhiya cowaarya ni ciicammo aheetthucera citthu cankhumelenle. Uyo ankupaleela wiira Yehova Nluku aananfenta. (Aroo. 8:38, 39; Efesu 2:4, 5) Ni Paulu ahancera unfenta cinene Yehova. Ni uyo ahoonihera unfenta wawe Yehova ukati weekurumicilyaawe waakavihera ale yaakhanle owaarya ni uhihiyerera waakavihera.—Mabere. 6:10.
7. Manannani ninlamuliyeehu wuncerera unfenta wihu Yehova?
7 Hiiva ninhala wuncerera unfenta wihu Nluku neekurumicaka usoma sana-saana Nuulumo nawe. Wo khula ukati unsomeenyu Ibiiblya mmananihe wuupuwela wo khula ihantisi itthu inniitthucihaaya makhalelo a Yehova. Mwiikohe co: ‘Manannani ila ihantisiila cinooniheraaya wiira Yehova naakifenta? Manannani ila ihantisiila cinkikurumicaaya utepa unfenta Yehova?’
8. Manannani makhwaawe cinhaleehu wuncerera unfenta wihu Nluku?
8 Inanna ikhwaawe yo wuncerera unfenta wihu Yehova, ukhanle unhimerya citthu cotheene cinniira wanrimani wihu ukati wonlompa. (Isaa. 25:4, 5) Yehova naahala waakhula ulompa winyu. (1 Jo. 3:21, 22) Anuunwiihu amoca ankhala u Ásia aneehaniya Khanh, aheera: “Wiipaceroni mi kananfenta Yehova, kontha kancuwenle phiyaaru, ukati wonnyaaka wiira Yehova nawaakhula ulompa waka mi kahanca utepa unfenta. Iyo itthwiiyo yaanakikurumica upanka citthu cinontteeliha nrima.” c
MUNCERERE WAAFENTA WINYU AKHWIINYU
9. Nincuwela cani wiira Timotiyu anawaafenta mayamunnaawe ni mayanuunwaawe?
9 Cinavinreene myaakha Paulu nakhanle nkristau, uyo ahoncuwela mmirawo mmoca ookhuluvelya eehaniya Timotiyu. Timotiyu ananfenta Yehova ni ciicammo anawaafenta akhwaawe. Paulu ahowiirela Afilipo: “Khaavo nomoonaaka owiikurumica toko uyova ni nohala wuuwacerani saana.” (Afili. 2:20) Paulu, khaahimya ucuwelaca Timotiyu waarinaawe wowoorya uhoolela maloko awula utaphulela myaha saana. Masi khweeliini, Paulu aari ootikhinihiya mananna Timotiyu caafentaawe mayamunnaawe ni mayanuunwaawe. Khweeliini maloko Timotiyu ootolaawe, mayamunna yaanonweherera wiira amwaakhelele.—1 Akor. 4:17.
10. Manannani anuunu Anna ni awannyaya yoonihenryaaya waafenta mayamunna?
10 Hiiva ciicammo ninawaavyaavya mananna owaakavihera mayamunneehu. (Mabere. 13:16) Moone ntakihero naanuunwiihu Anna, aromoliye mwaha uvinre. Uvira wawe sikolooni, ayo ni awannyaya yaahorwaa uthotola inupa yaakhala amuci Masaahiti a Yehova ni yahoona wiira waculu waya inupeeyo yahokwanyulaciya. Nlattu wo iyo itthwiiyo ayo khayaarina ikuwo coowara comaana. Anuunu Anna aheera: “Hi nahokusa ikuwo wiira nakatthe ni naaturusile ninenkomanri ni ninapinttacile. Moonelweehu, kanaapankile itthu yuulupale, masi nlattu wo iyo itthwiiyo hiiva nihaana upatthani woolipa mpaka nna.” Nifento arinaaya anuunu Anna ni awannyaya, nihaakurumica waakavihera mayamunnaaya.—1 Jo. 3:17, 18.
11. a) Atthu akhwaawe aneecoona cani hiiva nawooniheraka nifento? b) Khampa cinhimyaaya Miruku 19:17, Yehova nokhala cani hiiva nooniheraka nifento?
11 Nakhalaka atthu ooreera nrima ni naafentaka akhwiihu, ayo pooti woonenela wiira hiiva nimmananiha untakiha Yehova. Ikwaha cikiina hiiva pooti wahincuweleehu mananna ayo cinvahaaya ifayita wiikurumica wihu. Anuunwiihu Khanh yuulumiye wiipaceroni, anawuupuwela ayova mananna yaawaceriyaaya ni mayamunnaaya. Ayo aheera: “Mi kinawaasukhuru mayanuunu yaakikusaka wuulalyaani. Ayo yankiweela uwaani wiira kaalyaane ni yankiturusela uwaani. Ilelo mi phinoonaaka wiira ayo yanvara nteko cinene. Ni ayo yapankaka yooniheraka nifento.” Khweeliini khunakhala wiira atthu otheene anaavareleehu citthu anaahala usukhuru. Anuunu Khanh anaawuuluma mayanuunu yaakavihenre yiiraka: “Mi wankicivela kinaapankenle ciicammo citthu cotheene akipankenlyaaya, masi akincuwela unkhalaaya. Masi Yehova naacuwela, phimaana mi kinanlepela wiira aakavihere itthu mi kihinkhitiryaaka upanka.” Anuunu Khanh anhimya ikhweeli. Yehova naaweheeha citthu cotheene cimpankeehu noonihera nifento hataa cikhalaka citthu cooyevaca. Uyo naavaha ifayita wiikurumica unoonihereehu ni niwehera khampa ninankopiha ni naahala uniliva.—Nsome Miruku 19:17 d
Ntthu eekurumicaka wuunuwa mminepani, naawehaweha mananna owaakavihera akhunanawe (Nwehe iparaagarafu 12)
12. Manannani mayamunna anlamuliyaaya woonihera nifento wanlokoni? (Nwehe ciicammo ilatarato.)
12 Wakhala wiira nyuuva nkhanle munna, manannani nnolamuliyeenyu uwoonihera nifento akhwiinyu ni upanka itthu wiira mwaakavihere? Mmirawo mmoca neehaniya Jordan ahonkoha humu, isiyani yaalamuliyaawe upanka wiira akavihere wanlokoni. Humuuyo ahonttottopela nlattu wowuunuwa wawe nhina mminepani ni ahonvaha ikano comananna ookavihera wanlokoni. Wootakihera, humu, ahomwiirela wiira aalamuliya uphiya umikutthaanoni ihinaphiya iwoora cipanceraaya mikutthaano, wiira akhitiriki uwuulumiha mayamunna akiina. Uhiya commo, wiira ahaana eekurumicaka uvaha ikomentaariyu mikutthaano cotheene, ulalyeera woohihiyerera ni mayamunna okhurupwaawe yo wuulalyeerani ni waavya mananna owaakavihera mayamunna makhwaawe. Ni Jordan ahotthara ayo malakiherwaayo. Upanka wawe commo, uhiya paahi citthu eetthucilyaawe cophiyaaru, ahoncerera nifento nawe nimayamunna ni mayanuunu. Jordan aheetthuca itthu. Wakhalaka wiira munna naakhala namakavihera owanlokoni, uyo khunakhala wiira naapacera waakavihera mayamunna masi nawiira wuncerera waakavihera mayamunna.—1 Tim. 3:8-10, 13.
13. Manannani nifento, munna Christian nankurumicilyaaya uturuwela ukhala humu?
13 Vano wakhalaka wiira khalayi nyuuva mwaari nrumiya owanlokoni awula humu, vano nhohiya? Yehova khaliyanle nteko wotheene munvarenleenyu ni nifento moonihenreenyu nookurumicileni uvara uyo ntekooyo. (1 Akor. 15:58) Yehova ciicammo, nawoona nifento nyuuva nanlelo nnoonihereenyu. Munna mmoca neehaniya Christian wahonriipa nrima cinene ukati waahilyaawe ukhala humu owanlokoni. Waahookhalaru commo, uyo heera: “Mi kaholakela wiira kanhala upanka yotheene yaahalaaka ukhitiri wiira kihihiye unswalela Yehova ni kihihiye unfenta, hataa kakhalanaka awula mena mirintti wanlokoni.” Nuuwakatyaaya munna Christian ahoturuwela ukhala humu owanlokoni. Uyo heera: “Mi kahoova uturuwela ukhala humu, masi kaholakela wiira ukhala wiira Yehova nlattu wookonela uthunku ni ukilevelela, ampheela wiira kituruwele ukhala humu, paasi mi phaahalaaka upanka yeeyo nlattu wonfenta uyova, mayamunnaaka ni mayanuunwaaka.”
14. Ntakihero naanuunwiihu Helena ninniitthuciha isiyani?
14 Aswali a Yehova ciicammo, anawoonihera waafenta akhunanaya. (Mat. 22:37-39) Wootakihera, arokorihu ankhala u Geórgia aneehaniya Helena, aheera: “Wiipaceroni, itthu imoca yaakikurumica ulalya ihapari comaana, waari unfenta Yehova. Masi ukati waaviraaya wincivaka unfenta waka Yehova, waafenta waka atthu ciicammo waanaatepa. Mi kammananiha wuupuwela masakha yankhumelela khula ntthu kamphwanyaaka wuulalyeerani ni kaanawuupuwela mwahani waahala unvara nrima. Uwakati weekurumicaaka uwuupuwela atthu iyo inanneeyo, kaanaatepa upheela waakavihera.”—Aroo. 10:13-15.
YEHOVA NAAHALA UNITTHUVELA NAWOONIHERAKA NIFENTO AKHWIIHU
Upanka itthu yomaana hataa ikhalaka yankaani pooti waaphwanyiha ifayita atthu enci (Nwehe iparaagarafu 15-16)
15-16. Toko cinthoonyeraaya ilatarato, citthuni comaana cinkhumelela naathoonyiheraka nifento akhwiihu?
15 Naafentaka vale mayamunneehu, atthu akhwaawe ciicammo anaaphwanyera ifayita. Uwakati waapacenryaaya iretta yo COVID-19, Munna mmoca neehaniya Paolo ni amwaarawe ahaakavihera mayanuunwiihu owuuluvala enci unvarela nteko telefooni wuulalyeerani. Anuunwiihu amoca waarikela cinene unvarela nteko telefooni, yahokhitiri ulalyeera ni telefooni. Ayo yaahonvarela nteko telefooni yaalattulaka atthu wiira yoone nuupuwelelo. Asimucyaaya 60 yahoona nuupuwelelo niivideoconferência! Nlattu wowiikurumica munna Paolo ni amwaarawe, ayo anuunwiihwaayo ni asimucyaaya yahophwanyera ifayita. Uhoolo waya anuunwaayo yahomwantikhela munna Paolo yeeraka: “Kinawuusukuruni venci nlattu wowaakavihera mayamunna owuuluvala wanlokoni. Mi akinhala uliyala mananna Yehova cinniwaceraawe ni wiikurumica winyu.”
16 Citthu cowiirannya toko nnyo, cahomwiitthuciha itthu yofayita munna Paolo. Uyo aheetthuca wiira ufenta ikhanle itthu yuulupale uvikana ucuwelaca. Uyo munnooyo heera co: “Mi kaari mootoli osirikwiitu khalayi, ni kinawoona ilelo wiira hataa ukhalaka wiira mayamunna khanoopuwela myaha caataphulelaaka ule ukatyuule ayo anawuupuwela citthu comaana cipankilyaaka wiira kaakavihere.”
17. Tipani-tho nophwanyera ifayita hiiva neekurumicaka waafenta akhwiihu?
17 Naafentaka akhwiihu, hiiva ciicammo ninaaphwanyera ifayita ni mananna cahaaweherereehu. Munna Jonathan, nokhala u Nova Zelândia, naacuwela sana-saana iyo itthwiiyo. Ikwaha imoca isaapatu ucoocilo, waanavihaviha cinene ni uyo ahomoona piyoneeru alalyeeraka veekha. Munna Jonathan aholakela urwaa unvarana nteko uyo piyoneeruuyo isaapatu cikhwaawennyo. Ayo yaari mananna owoonihera unamaana khoopuwela wiira upanka iyo itthwiiyo wanhala umphwanyiha ifayita venci. Munna Jonathan heera co: “Ule ukatyuule mi khawaakicivela cinene ulalyeera. Masi umoona waka ule piyoneeruule mananna ceetthucihaawe, ni woona waka wiira waanankhumela ratta mi wahancera ukicivela nteko woolalyeera. Mi kahomphwanya mpatthannyaaka omaana aakikavihenre wuunuwa nhina mminepani, ukicivela nteko woolalyeera ni wiira kitepe umpatthanana Yehova.”
18. Isiyani Yehova nopheelaawe wiira hiiva nipanke?
18 Yehova nopheela wiira hiiva nitepe unfenta uyova ni waafenta akhunanihu. Toko ciitthucileehu nhina ula mwahoola, hiiva pooti wiitthuca ulipihaca unfenta wihu Yehova nisomaka Nuulumo nawe, nuupuwelaka itthu insomeehu ni ciicammo ninlompaka. Ni hiiva pooti wuncerera waafenta wihu mayamunneehu ni mayanuunwiihu neekurumicaka upanka citthu wiira naakavihere. Ufenta wihu Yehova wincivaka ninaatepa umpatthanana, ni ninawaatanaca saana naamuciihu oominepani. Ni upatthaniihu ni Yehova nimayamunneehu khunhala umala!
NCIPO 109 Demonstra Verdadeiro Amor
a Hataa ukhalaka wiira niitthucile ikhweeli mphiyaaruni awula khalayi, otheene cihu nihaana nihihiyaka wuunuwa mminepani. Nhina ula mwahoola ninaahala wiitthuca inanna yuulupale yowuunuwa nhina mminepani, ukhanle wuncerera unfenta wihu Yehova ni waafenta wihu akhunanihu. Mwasomaka ula mwahoola mmananihe wuupuwela manannani nyuuva cinkhitiriinyu woonihera nifento ni manannani cinlamuliyeenyu utepa woonihera nno nifentonno.
b Efesu 5:1 Vano, muntakihe Nluku, khampa asaana oofentiya 2 ni nhihiye weettela nifento, toko Kristu cinifentalyaawe ni toko ciivaherenryaawe khampa itthuvo yonciveliha Nluku.
c Macina makiina ahaakakhanihiya.
d Miruku 19:17 Nommeela masikhini nkopihalee Yehova, Ni Yehova naahala unliva