Asithumwanaka yahothama u Estônia ukati waalavaniyaaya ikhotto yonayeeli yo ntuninyani ni yahothamela u Alemanha uyareliyaaka. Uyariya waka u Alemanha, nahothamela u Canadá ni naakhala ncoko waattamanne u Ottawa. Hiiva naakhala nnikhupini waarupaaya ilakhu. Uhimya ikhweeli, hi naari amasikhini, masi itthu imoca yahaanihaleela yaari mooce ukati walyeehu khula uwicisu.

Nihuku nimoca, Masaahiti a Yehova yahaasomela amaama Apokalipise 21:3, 4. Iyo iverisiikulwiiyo yahaavara nrima amaama ni yahancera wunla. Amaama ni apaapa khayaapicile nuwunuwa mminepani ni yahopattisiya.

Asithumwanaka khayaacuwela mena vakaani Inglês. Waanookhalaru commo, ayova yanawiikurumica uvaresesa ikhweeli yeetthucilyaaya. Khula Isaapatu, ayo yannikusaka mi ni mwanrokoraka Sylvia wiira nalalyeere ni khula isumana nansomaka irevista Ukhalenla otheene cihu. Amaama ni apaapa phaakikavihenre miiva wiitthuca unfenta Yehova. Phimaana, mi kahonvaherera ukumyaaka Yehova mwaakha wo 1956 kinarina myaakha 10. Nifento ninci asithumwanaka naarinaya ni Yehova phaakikavihenre miiva uhihiya unswalela Yehova.

Ukati wamalihalyaaka usoma, cahancera ukicara citthu coopheela upanka. Ni miiva kooniha wiira kavaraka nteko wepiyoneeru, aakahala ukhitiri utakaniha nsurukhu wiira kiirannyeehe itthu yaakicivela upanka ikhumelo kaaryaaka mwanhima: upanka ikwaha muntteekeni wiira kicuwelace ilapo cinci. Mi kahancera uvara nteko uraatiyuni wookumihera iporogaraama cocipo. Mi wankicivela uyo ntekooyo. Masi, kahaana kavaraka nteko mpaka uhiyu. Nlattu wo iyo itthwiiyo, mi kahanca ulova umikutthaanoni khula isumana ni kahancera ukhalana apatthani yahanfenta Yehova. Wootteeliha nrima, moopuwelelwaaka ootthenkaciya niibiblya yahokikavihera upanka marukunuso.

Mi kahothamela u Oshawa isittatti ikiina, yakhala u Ontário. Nwo, phancuwenlyaka Ray Norman ni mwanrokorawe, Lesli ni mapiyoneeru makiina. Ayo yahokitafiti nimananna oomana. Ukati woonaaka utteeliya waarinaaya, kahoopuwela kimpheela isiyani muukumini waka. Ayo, yahokikuruca upacera uvara nteko weepiyoneeru ni mi kahopanka iyo mweeri wo Setembro, mwaakha wo 1966. Mi kaari ootteeliya muukumi waka ni kaanoopuwelaka marukunusoni anhala wiirannya muukumini waka.

Kihinamaliha usoma, mi kahantikha ipetisau wiira kavare nteko u Peteli yo Canadá. Wahoolo, kinari piyoneeru kaholattuliya urwaa uvara nteko u Peteli  myaakha 4. Masi mi ankicivela venci cinene Lesli ni miiva kaanoova wiira katthunaka urwaa u Peteli akaahala umuulumana. Kaholompa venci ni kahotthuna urwaa u Peteli. Ukiweryaaka nrima, mi kahonleeha Lesli.

Mi kahovara nteko wookattha ikuwo u Peteli ni nuukatyaaya khampa sekretariyu. Lesli ahokhala piyoneeru oowiivaherera u Gatineau, u Quebec. Ukati mwinci mi kaakhala kuupuwelaka isiyani uyo yaapankaawe ni wakhala wiira mi kaaholakela upanka itthu yomaana. Masi, yaherannya itthu yahawehereraaka muukumini waka. Ray, mwanrokorawe Lesli aholattuliya u Peteli ni naakhalakhala ikwaartu imoca! Nlattu wo iyo itthwiiyo, kahoturuwela umuulumana Lesli. Hi naathelanne nihuku naamalelaaya ntekwaaka u Peteli, nihuku 27 no Fevereiro, mwaakha wo 1971.

Miiva ni Lesli nahothanliya ukhala mapiyoneeru oowiivaherera nloko noolumiya ifrancês, u Quebec. Cinavinre myaakha vakaani, mi kahoova ukati waacuwenlyaaka wiira kaholattuliya wiira kavare nteko wo wootoola maloko, ukhala wiira kaarina myaakha 28 paahi. Mi keecoona ukhala mmiravo cinene ni akaarina ucuwelaca venci. Masi moolumo amphwanyannya nhina Jeremiya 1:7, 8 yahokilipiha. Uyo ukatyuuyo Lesli ahaapanka asitente niikaaro ni, nlattu wo iyo itthwiiyo, uyo waananrika urupa. Phimaana, nahoona wiira wanhala unirikela uvara nteko wo wootola maloko. Masi Lesli aheera: “Ukhala wiira Yehova phinnilattula, nihinrweelani?” Hi nahotthuna nno nlattululonno ni naakhala ootteeliya nlattu wo uyo ntekooyo, uvirihaleehu myaakha 17 nivaraka.

Ukhala waka mootoli osirikwiitu, mi kanvara nteko mwinci ni akaakhalana ukati wiira kikhale naamwaaraka Lesli. Mi kampheela wiitthuca itthu ikhwaawe. Nihuku nimoca, naari Nihuku Nookeliya Nteko uwicisu, wahaattiya nkhora. Ukati kaarweelyaaka uweha akampwanyale ntthu, kaaphwanyale paahi itthuttu inarina itowaaliya, mihokhoroko, iqueijo, iphaawu, ikaraafa yoviinyu, ikoophau ni iwarakha yaahanhimya ntthu antikhile, yeera co: “Mwaakuse amwaarinyu ni mwaarwaane nipuro ninthukathukiya.” Naari nihuku nomaana, mi kahowiirela amwaarala Lesli wiira kahaana myaha caalamuliyaaka utthenkaca ni wiira akaahala ukhitiri urwaa. Amwaaraka yaheewa, masi wahaaripa nrima. Ukati wancenryaaka utthenkaca myaha akaahiya wuupuwela iyo itthwiiyo. Mi kahoopuwela itthu inhimyaaya Efesu 5:25-28. Waakhala khampa Yehova anaakuupusera nnyo iveerusunnyo wiira kaatafiti amwaaraka. Kaholompa ni kahowiirela amwaaraka Lesli co: “Nttwee!” Ayo wahaatteela nrima cinene. Hi nahorwaa nipuro nooreera cinene nowaattamela mooloko, nahaatala itowaaliya vathi ni nne naari nihuku noocivacivaca cinene naavinreehu nkhayi. Ni ukati nkiina kahotthenkaca myaha cotheene

Mapuro naathanleliyeehu urwaa uvara nteko wo wootola maloko yaari menci ni uyo ntekooyo wannitteeliha nrima cinene. Naheetta micoko cotheene co iyo ilapweeyo, ukhuma u Colúmbia Britânica mpaka ncoko uneehaniya Terra Nova. Uyo ukatyuuyo, mi kampanka itthu yaapheelaaka upanka ukhuma waaryaaka mwanhima, ucuwelaca ilapo cikiina.  Mi kahoopuwela wantikha ipetisau wiira kasome icikola yo Gileade, masi khawaakicivela ukhala misiyonaariyu ilapo cikhwawe. Mi koona wiira mamisiyonaariyu yaakhala atthu ofayita cinene. Phimaana, mi akeecoona ukhalana ifayita wiira kikhale misiyonaariyu. Uhiya commo, mi kaanoova urwaaniya ilapo yo África, yaarivo ikhotto ni iretta. Mi kaari ootteeliya venci u Canadá.

Mwaakha wo 1992, Masaahiti a Yehova yahotthuniheriya uturuwela ulalyeera ilapo caapanka mphantte nhina União Soviética. Vano, mayamunna yahonikoha wakhala wiira hi nanhala utthuna uthamela u Estônia ni ukhala mamisiyonaariyu. Hiiva nahotutuseriya ni nahaana nilompaka nlattu wo iyo itthwiiyo. Naheekoha-tho co: “Ukhala wiira Yehova phinnilattula, nihinrweelani?” Hi nahothuna nno lattulonno ni kahoopuwela co: “Ukhala wiira khaninrweetthu u África, khinahimweetthu.”

Hiiva woohipica nahancera wiitthuca iluuka yo Estônia, ni cinavinreene myeeri vakaani, hi nahothanliya urwaa uvara nteko wo wootola maloko. Hi nahootola maloko ookhalaka 46 niikhurupu cikiina u Estônia, Letônia, Lituânia ni ciicammo u Kaliningrado, ncoko wo Rússia. Phimaana, nahaana niitthucaka vakaani khula iluuka co uyo ncokooyo: iluuka yo Letônia, Lituâni ni yo Rússia. Masi upanka iyo wahonirika. Mayamunna yankhala ootteeliya ukati wanoonaaya niikurumicaka ni yannikavihera. Mwaakha wo 1999, yahotthenkaciyia ipeteli u Estônia ni miiva kaholattuliya wiira kakavihere nhina Ikhurupu yo Mahumu Anhoolela Ipeteli, nkhayi naala mayamunnaala: Toomas Edur, Lembit Reile ni Tommi Kauko.

Hi nahaacuwela mayamunna khalayi yaarwaaniye u Sibéria. Waanookhalaru wiira ayo mayamunnayo yahohuvihiya cinene ni yahokhala uttayi naamucyaaya, ayo khayaakhanle atthu onanara nrima. Uhiya commo, ayo waanaatteela nrima ni yaaneekurumica wuulalyeerani. Ntakihero naayo mayamunnaayo nihoniitthuciha wiira hiiva pooti ukhitiri uvilela wanitteelaka nrima, hataa yanikhumelelaka masakha oorika.

Cahovira myaakha cinci navaraka nteko wa Yehova ni khanaakhalana mahuku menci oomumula. Phimaana, wahophiya ukati amwaaraka Lesli wancenryaaya woocyaaca cinene, masi hi khanuupuwela wiira iyo yaari iretta ineehaniya fibromialgia. Ni uyo phuukati wancenreehu wuupuwela venci uturuwela u Canadá. Hi naholattuliya urwaa u Patterson, Nova Iorque, Estados Unidos wiira nasome icikola yo Mahumu Anhoolela Ipeteli. Mi kaaneekoha wakhala wiira nanhala ukhitiri, masi naholompa venci ni nahotthuna nno nlattulonno ni Yehova ahonicaaliha. Wonwo ucikolaninwo hiiva phoonelenleehu iretta amwaaraka yaarinaaya ni ayo yahotafitiya mpaka wiicoona saana. Vano, nahoturuwela uvara nteko saana.

Uhiyu mmoca, nikhalakoono u Estônia mwaakha wo 2008, kaholikareliya ni mayamunna o nipuro ninhooleliya miteko cihu ntuninyani motheene. Ayo yahokikoha wakhala wiira hiiva nanhala utthuna urwaa uvara nteko ilapo yo Congo. Iyo yaari itthu yahaaweherereehu ni kahotuthuwa, ukhala wiira nahaana naakhulaka waaseele. Mi akaahimenrye amwaaraka yoole uhiyuule, kontha kancuwela wiira ayo khayaahala urupa ikhove. Masi khweeliini thi mi kahaarupile. Kahoviriha uhiyu wotheene kilompaka nlattu wo masukhuli kaakhalanaaka koopuwelaka uthamela u África.

 Waaseele, miiva kahaahimyacera amwaaraka iyo itthwiiyo ni hi nahoona wiira Yehova phaanilattula wiira nirwee u África. Vano nahoopuwela co: “Ninhala ucuwela cani wiira khaninkhitiri woohipaca utteha?” Phimaana, hi nahorwaa u Kinshasa, Congo, ninavirihileene myaakha 16 nikhalaka u Estônia. Ipeteli yo Congo yahaana ijardim yomaana ni nno naari nipuro noomaalya. Itthu yoopacera amwaaraka yeesilyaaka ukwartu wihu nari nikhanta nantikhiye co: “Wuutteele nrima khula nipuro ninhalaa urwaa.” Ayo yahaana nno nikhantanno ukhuma ukati waariihu u Canadá. Hi nahaacuwela mayamunna, nahaana atthu yaasomiheehu Ibiiblya ni nahokhala ootteeliya ukati waavareehu nteko weemisiyonaariyu. Vano, yahonikhumelela itthu ikhwaawe yaanitteelihale nrima. Nuukatyaaya hiiva nahookhalana iparakha yowootola Ipeteli colapo 13 co África. Iyo itthwiiyo yahonikavihera waacuwela atthu o khula ikhapila. Woova waarinaaka wuupaceroni wohomalamala ni nahonsukhurweela Yehova ukhala wiira ahonithanla wiira nirwee u África.

U Congo, nahovahiya icoolya coovirikana, toko icoroope awula acerere, ni nnyo caari icoolya cahoopuweleehu wiira nanhala ukhitiri ulya. Masi ukati naawooneehu mayamunna caacivaka nnyo icoolyannyo, hi naholakekala ulawiha ni ciicammo cahancera uniciva.

Hi nahopanka nkwaha wiira nawootole mayamunna mphantte unkhuma ncuwa wo Congo wiira naalipihe ni naakavihere ale yaakhumelenle ihasara awula ikhotto. Nnyo micokonnyo yahaavo anakhotto yaakela mmaaliteeya, yaahuviha athiyana ni asinamwane. Waanookhalaru commo, mayamunneehu yahaana nweherero wo wunwelelihiya atthu ookhwa, yaananfenta Yehova ni yanvaresesa mphwinkwaawe woothotokanihiya. Nlattu wo masakha yaakhumelela ayo mayamunnaayo, hiiva nahancera wiikoha isiyani yaaniiriha unswalela Yehova ni ntakihero naya naholipihaca waamini wihu. Iyo itthwiiyo ihokuupusera wiira mihakhu pooti umala wanihukuni ni wiira itthu itepale ukhalana ifayita ukhanle umpatthani wihu ni Yehova. Waanookhalaru wiira mayamunneehu yaanawaakhumelela masakha menci, ayo khayaakhala yeecukulelaka ukati wotheene. Woona iyo itthwiiyo uhonikavihera hiivano uvilela marikariko yaarineehu ni uweryaaciya wihu nilipaka nrima.

Yahonikhumelela-tho itthu ikiinaa yahaaweherereehu: hi naholattuliya urwaa uvara nteko Ipeteli yo Hong Kong. Hiiva naari nihinaaya wuupuwela wiira  wanihukuni nanhala ukhala u Ásia. Masi ukhala wiira nahoona ikwaha cinci mananna Yehova caanikavihenryaawe khula ikwaha yaalattuliyeehu, hiiva nahotthunna nno nlattulonno. Mwaakha wo 2013, nonlakoono nahaahiya apatthaniihu ilapo yooreera yo África, nihicuwelaka itthu yaahala unikhumelela.

Ukhala isittatti yuulupale ni yaatthu enci yo Hong Kong wahorukunusa venci makhalelweehu, venci-venci kontha nahaana niitthucaka iluuka yo China. Masi mayamunna yaari oofentana ni iyoolya yaalyaaya yaaari yomaana. Ntekweehu woolalyeera waaneera wuunuwaka, masi iperesu conupa ciicammo caanaavira ciwelaka. Phimaana, Mphwinko wo Mahumu Unhoolela wahoonihera ucuwelaca ni waholakela utumiha inupa cinci caavareliya nteko niipeteeli. Vano mwaakha wo 2015, hi nahothamela u Coreia do Sul unkhaleehu nnaco. Uno, toothooni nineera niitthucaka iluuka yoorika: iluuka yo Coreia. Masi mayamunna anaanikurumica yaniirelaka wiira hiiva ninneera nuulumaka ratta khula nihuku ninvira.

Ukhalana apatthani onaanaano unaarika, masi hi nihoonelela wiira naalattulaka mayamunna uwaani wiira niwoopane mwaha, ninawaakuva waapatthanana. Hi niheethuca wiira mayamunna o ntuninyani motheene khatepale uvirikana ni wiira Yehova numpale wiira nikhitiri waafenta apatthaniihu otheene.—2 Akor. 6:11.

Hi ninnoona ifayitaaya waafenta wihu atthu toko Yehova cinaafentaawe. Ciicammo, unaareera neekurumicaka woona mananna Yehova cinnifentawe ni cinnihoolelaawe. Khula ukati hi wancereehu wiikoha wakhala wiira mayamunna yanciveliya nihiivano, naanaakumiha ukati wiira nisome iwarakha caanantikhelaaya asipatthaniihu. Myaakha civinre cotheene, hi nihoona mananna Yehova caakhunlyaawe ulompa wihu. Iyo itthwiiyo inaalipihaca waamini wihu ni inaanikupaliha wiira Yehova naanifenta cinene.

Myaakha civinre, mi ni amwaaraka Lesli niheetthuca citthu cinci: niheetthuca mananna cinreeraaya ukumiha ukati wiira nikhale nkhayi, hataa ukhalaka wiira nihaana miteko cinci. Ciicammo, niheetthuca wiira khaninlamuliya uviruwa navonyaka itthu, masi nihaana niithyaaka, utepa wakhalaka wiira nineetthuca iluuka. Khula uhiyu, hi nanansukhurweela Yehova nlattu wo itthu yomaana iniirannyenle nno nihukunno.

Uhimya ikhweeli, mi akuupuwela mena vakaani wiira wanihukuni kanhala ukhala misiyonaariyu awula wiira kanhala urwaa ukhala ilapo ikhwaawe. Masi unaakitteela nrima nlattu wo woona wiira citthu cotheene cinawiirannya nikaviheriyaka ni Yehova. Mi ankinliyala moolumo a porofeeta Jeremiya, wenryaawe co: “Nyuuva nhokithepya, oo Pwiiya Yehova.” (Jer 20:7) Yehova hokipankela citthu cinci cahaawehereraaka ni hokicaaliha venci, nimananna miiva yahoopuwelaaka. Uyo mpaka hokikavihera upanka itthu yaapheelaka ikhumelo inamwannyaaka: weetta muntteekeni. Hiivano niheetta mapuro menci uvikana mapuro yoopuwelaka waaryaaka mwanhima. Hi nihootola Ipeteeli nhina ikontinente 5. Mi kinawaasukhuru venci amwaaraka Lesli ukhala wiira ukati wothene ayo ahokikavihera nhina miteko cotheene caakhenlyaaka.

Hiiva nanawiikurumica wuupuwela wiira citthu cotheene cimpankeehu, nimpanka kontha ninanfenta Yehova. Iparakha cirineehu ilelo cinawoonihera mananna cinhalaaya ukhaliya uwakathi Yehova unhalaawe ‘Utaphula ntata nawe ni waatteeliha nrima atthu otheene.’—Isaa. 145:16.