1. Khampa cinhimyaaya 1 Peturu 5:2, nrinttini mahumu arinaaya wanlokoni?

 MAHUMU ahovahiya nrintti woowacera ikhontwaa ca Yehova wanlokoni. Ayo anaavaha ifayita cinene uyo nteko avahaceriyaayooyo wowaakavihera mayamunna ni mayanuunu. Phimaana, ayo anawiikurumica venci wiira akhale makampuci anwacera saana ikhontwaa caya. (Jer. 23:4; nsome 1 Peturu 5:2. b) Ni hiiva ninkhala oosukhuru cinene nlattu wookhalana ayo alopwana ookhuluvelyaayo wanlokoni wihu!

2. Marikarikoni atthunaka mahumu makhwaawe anaananaaya?

² Ukati anwaceraaya mirintti caya, mahumu anawaanana marikariko moolupale. Wootakihera, mahumu ahaana yavaraka nteko mwinci wiira awacere nloko. Humu mmoca neehaniya Tony, nokhala u Estados Unidos, ahaana eetthucaka uhimya wakhala wiira anhala utthuna awula mena uvahaceriya-tho mirintti cikiina co wanlokoni. Uyo heera co: “Wiipaceroni iretta yo COVID-19, mi kaaneekurumica venci wiira kitthonkomanihe nteko woolalyeera ni ciicammo mikutthaano co wanlokoni. Masi kaanaavararu nteko mwinci, caanaakhumelela miteko cikhwaawe caalamuliyaaka uvara. Uhoolo waya, mi kahanca uhikhalana ukati woopanka usoma Ibiiblya wo veekha ni woolompa.” Humu nkhwaawe neehaniya Ilir o Kosovo, ahaana marikariko makhwaawe. Ukati waaryaawe ncoko waaniya ikhotto, wahonrikela utthara malakihero o mumphwinkoni wa Yehova. Uyo heera: “Miiva kahoova venci cinene ukati mayamunna u Peteli waakilepenlyaaya urwaa waawacera mayamunna ni mayanuunu yaakhala ncoko wowoopiha. Uhimya ikhweeli mi akaarina ulipa nrima wiira kirwee, ni mi kooniha toko ayo malakiherwaayo khayaahala ukhumela saana.” Vano munna Tim, misiyonaariyu mmoca u Ásia, wanonrikela cinene uvara paahi miteko cawe co khula nihuku. Uyo neera: “Ikwaha cikhwaawe, mi kaanoocya cinene.” Isiyani inhala waakavihera mahumu anaanana marikariko toko ala?

3. Ntakiheroni suwiisi Gideau nihiyenryaawe otheene cihu?

 ³ Suwiisi Gideau khanle ntakihero nomaana mahumu anlamuliyaaya utakiha. (Mabere. 6:12; 11:32) Gideau anawaakhikicera ni anawaahoolela apoovu a Nluku. (Masuw. 2:16; 1 Ikor. 17:6) Gideau ni hataa ciicammo mahumu ahovahaceriya waahoolela apoovu a Nluku ukati woorika. (Mite. 20:28; 2 Tim. 3:1) Gideau khanle ntakihero nomaana nhina uhiicuunuwiha, wiiyeviha ni wiiwelela ikano. Ni uyo ahaana eekurumicaka nhina nteko wanvarelaawe Yehova. Otheene cihu hiiva nihaana navahaka ifayita miteko cinvaraaya mahumu wanlokoni. Ciicammo, nihaana naakaviheraka ayo alopwana ookhuluvelyaayo, anvara miteko cuulupale wiira yaakavihere mayamunna wanlokoni.—Mabere. 13:17.

4. Gideau oonihenre cani wiira aari nlopwana oohiicuunuwiha ni owiiyeviha?

⁴ Gideau aari nlopwana owiiyeviha ni oohiicuunuwiha. c Ukati nlayikha na Yehova naawilyaaya unhimerya wiira ahothanliya ni uyo phaahala uwoopola apoovu o Isarayeli mmatatani mwa apoovu okuru o Midiã, uyo ahaakhula ooniheraka wiiyeviha: “Nloko naka khaninakhala itthu wamiithoni wa Manaseesi, ni mi kikhanle ntthu kitepile uhikhalana ifayita wanlokoni na apaapa.” (Masuw. 6:15) Uyova kheecoona ukhalana makhalelo otheene omaana wiira avare uyo ntekooyo. Masi Yehova naacuwela citthu cotheene, ni uyo ahonkavihera Gideau uvara saana nteko wanvahacenryaawe.

5. Ikwahani cikhwaawe mahumu unhalaaya waarikela wiiyeviha ni uhiicuunuwiha?

⁵ Mahumu anawiikurumica venci cinene wiira akhale atthu owiiyeviha ni oohiicuunuwiha. (Mik. 6:8; Mite. 20:18, 19) Ayo khankhala yuulumaka citthu ankhitiryaaya upanka awula citthu cotheene apankilyaaya. Ni ayo khaneecoona ukhala oololovaca nlattu wo citthu cihinkhitiryaaya upanka ni citthu anvonyaaya. Masi ukhalana makhalelo khampa ayo khinakhala itthu ihinrika. Wootakihera, humu mmoca pooti utthuna uvahaceriya mirintti cinci wanlokoni, ni wahoolo waya uhikhitiri uvara miteko cotheene caavahaceriyaawe. Awula pooti ukhalaka wiira naattottopeliya nlattu woovara ratta miteko cawe cotheene, awula pooti wuulumiya pusya nlattu wo mananna cipankilyaawe citthu caavahaceriyaawe. Yeerannyaaka itthu toko iyo, mahumu anlamuliya untakiha cani Gideau?

6. Manannani mahumu anlamuliyaaya utthara ntakihero na Gideau? (Nwehe ciicammo ilatarato.)

⁶ Nlepele ukaviheriya. Ntthu oohiicuunuwiha naacuwela wiira cihaavo citthu uyova cihinkhitiryaawe  upanka. Nlattu woohiicuunuwiha, Gideau anlepela ukaviheriya naakhwaawe. (Masuw. 6:27, 35; 7:24) Unaareera mahumu yapankaka commo. Tony, romoliye wiipaceroni, naattonkaca: “Nlattu wo mananna cuunuwihiyaaka, mi wankicivela waakhela mirintti cinci masi woohicuwela inanna caahalaaka uwacera. Vano, mi kaholakela wiira nanhala woopela mwaha uhiicuunuwiha muuswalini wihu waamuci. hiya commo, kahaakoha amwaaraka wakhala wiira kaanaapanka citthu caka saana. Ni ciicammo mi kahoona-tho nsayitini wihu ividiyu ineera Imite Jesus no Modo de Treinar, Confiar e Delegar.” Munna Tony ahanca ukawaniha miteko caarinaawe nimayamunna akhwaawe o wanlokoni. Vano isiyani yeerannyeele? Uyo heera: “Nnaco, nloko ninaawaceriya nimananna omaana ni miiva kinaakhalana ukati woolipihaca upatthannyaaka ni Yehova.”

7. Manannani mahumu anlamuliyaaya untakiha Gideau yoolumiyaka pusya? (Nwehe Tiyaku 3:13.)

⁷ Nhinyoonyiye moolumiyaka pusya. Itthu ikhwaawe mahumu inaarikihela uhiicuunuwiha ni wiiyeviha ukhanle wuulumiya pusya. Nanlelo, ntakihero na Gideau pooti waakavihera. Gideau ancuwela wiira uyova aari oopahuwa. Iyo itthwiiyo yahonkavihera ukati woolumiyaawe pusya naalopwana o Efraim. (Masuw. 8:1-3) Gideau khaaviruwile. Uyo ahoonihera wiira ahaana wiiyeviha wo mmoopuweleloni wawe, awiiwelelaka citthu cotheene coolumaaya ayo alopwanaayo. Nlattu woopanka iyo, ahaamaalihaca. Unaareera mahumu untakiha Gideau yoolumiyaaka pusya, yiiwelelaka saana citthu cinhimiya ni umaala. (Nsome Tiyaku 3:13. d) Nyuuva mwapankaka commo, nnaakavihera ukhala nnema wanlokoni.

8. Isiyani mahumu inlamuliyaaya upanka yattottopeliyaka nlattu wootaphulela saana myaha caya? Ntakihere.

⁸ Munvahe uttitthimihiya wotheene Yehova. Ukati waattottopeliyaawe nlattu woowoopola apoovu a Nluku mmatatani wa apoovu o Midiã, Gideau anvahale Yehova uttitthimihiya wotheene. (Masuw. 8:22, 23) Manannani mahumu anlamuliyaaya untakiha Gideau? Ayo pooti unvaha Yehova uttitthimihiya wotheene wo citthu ankhitiryaaya upanka. (1 Akor. 4:6, 7) Wootakihera, humu mmoca attottopeliyaka nlattu wootaphulela saana myaha cawe, uyo pooti waneeraawe wiira khitinri utaphulela ratta kontha citthu cuulumilyaawe kumihile nnuulumoni na Nluku, Ibiiblya; awula nlattu wootaphulela attharaka malakihero anvahiyeehu mumphwinkoni wa Yehova. Ikwaha cikhwaawe, humu pooti weemela ni wuupuwela wakhala wiira khaneettitthimiha mwaneennyaawe. Moone itthu yaamwiirannyenle humu mmoca neehaniya Timothy. Uthanliya wawe wiira akhale humu o wanlokoni, uyo waanoncivela cinene utaphulela myaha. Uyo neera: “Woopacera, mmyahani caka mi kampanka matakihero omaana. Nlattu wo iyo, atthu enci yankittottopela. Wooriipiha nrima, mi kaaneettitthimiha, uhiya unttitthimiha Yehova ni hataa Ibiiblya.” Uvira waya ukati, munna Timothy ahoonelela wiira ahaana alokihacaka inanna yeetthucihaawe wiira hiittitthimihe mwaaneennyaawe. (Miru. 27:21) Vano isiyani yeerannyaale? Uyo naahimyaca: “Nnaco kataphulelaka mwaha, mayamunnaayo anaawa ukihimerya mananna caakavihenryaaya wiira akhitiri uvilela masakha anaakhumelela, waanana marikariko arinaaya awula mananna anlamuliyaaya umphiyeera Yehova. Nnaco, mi kinawiicoona ukhala ootteeliya, kontha mayamunnaayo ansukhurweela mwahooyo, kahi miiva.”

9. Kontha isiyani waakhanlyaaya itthu yoorika Gideau wiiwelela ni ulipa nrima? (Nwehe ilatarato yo wakaapani.)

⁹ Gideau ukhala wawe suwiisi o Isarayeli, uyo ahaana akhalaka owiiwelela ni oolipa nrima. Iyo yaari itthu yoorika. Uyova ahovahaceriya nrintti wowoopiha: ukomolaca ikhilompi nipuro athumwaane yanswalelaaya Bahaali. (Masuw. 6:25, 26) Uhoolo waya, wookhalaka ikwaha piili, Yehova ahomwiirela Gideau wiira aawukule anakhotto yaarinaawe. (Masuw. 7:2-7) Ni uyova ciicammo, ahorumiya  wiira aatuphele amwiinani uhiyu iriyari.—Masuw. 7:9-11.

10. Manannani mahumu waahalaaya waarikela wiiwelela malakihero?

¹⁰ Mahumu ahaana yakhalaka owiiwelela. (Tiya. 3:17) Humu akhalaka owiiwelela khunonrikela weettela itthu inhimyaaya Ibiiblya ni ciicammo mphwinko wa Yehova. Nlattu woopanka commo, anawaavaha ntakihero akhwaaya. Masi ikwaha cikhwaawe, unaarika ukhala owiiwelela. Wootakihera, ikwaha cikhwaawe mahumu anawaakhela malakihero menci, awula ayova ahaana yarukunusaka nimananna owaakuvya citthu calamalenlyaaya upanka. Ni ikwaha cikhwaawe, ayova pooti uhala wiikoha wakhala wiira malakihero avahiyaaya anaahala waakhumela saana. Ni ikwaha cikhwaawe, ayova anaacuwela wiira yatthunaka malakihero avahiyaaya pooti utthukeliya nkhattya. Vano manannani mahumu anlamuliyaaya utthara ntakihero na Gideau yawiirannyeelaka iyo itthwiiyo?

11. Isiyani inhala waakavihera mahumu ukhala owiiwelela?

¹¹ Mwiiwelele saana ni mweettele malakihero nnovahiyeenyu. Yehova ahonvaha malakihero Gideau o mananna aalamuliyaawe ukwanyulaca ikhilompi yaathumwaane, mananna aalamuliyaawe uteka ikhilompi ikhwaawe ni inamani caalamuliyaawe uvaherera. Gideau khakohakohile kontha isiyani aalamuliyaawe upanka commo. Uyo aacile wiiwelela paasi. Ilelo, mphwinko wa Yehova unaaveleeliha iwarakha ni ciicammo mahimyo wiira waalakihere mahumu inanna anlamuliyaaya waawacera mayamunna nhina mminepani ni nhina citthu cinaathwaa. Hi ninawaafenta venci mahumu, kontha ayo anaatthara malakihero anvahiyaaya. Iyo itthwiiyo inaakavihera nloko notheene.—Isaa. 119:112.

12. Manannani mahumu anlamuliyaaya utthara ikano imphwanyannya nhina Maberewu 13:17 yaakhelaka ikano conaanaano?

¹² Ntthune upanka marukunuso. Muupuwele itthu Yehova yaamwiirenlyaawe Gideau wiira apanke. Uyo ahaana aaturusaka anakhotto akiina. (Masuw. 7:8) Gideau pooti waahalaawe wiikoha co: ‘Kiireke wiira kihaana waavukula khweeliini? Kiireke wiira ninaahala utthema?’ Uhookhalaru commo, Gideau aheewelela. Ilelo, mahumu o wanlokoni anaatthara ntakihero na Gideau yattharihelelaka malakihero Yehova naavahaawe. (Nsome Maberewu 13:17. e) Wootakihera, mwaakha wo 2014, Mphwinko wo Mahumu Unhoolela wahaakakhaniha mananna oowacera miteko cootekatekiya Isalau co Umwene ni Isalau co Mithukumano Cuulupale. (2 Akor. 8:12-14) Khalayi, maloko yalakelaka uteka Isalau yo Umwene awula Isalau yo Mithukumano Cuulupale, mayamunna yanawaacimihiya nsurukhu ni mphwinko wa Yehova ni uhoolo waya yanliva. Ilelo, mayamunna o ntuninyani motheene anaavaha micanko, vano mphwinko wa Yehova unaavarela nteko micanko cinvahiya wiira citekiye Isalau co Umwene ni Isalau co Mithukumano Cuulupale, hataa ukhala wiira mayamunna ahaana awula mena nsurukhu wooliva. Munna mmoca neehaniya José weewilyaawe ayo marukunuswaayo, uyo khaamini wiira yaanaahala ukhitirya iyo itthwiiyo.  Uyo ahoopuwela co: ‘Naala manannaala khinhala utekiya hataa Isalau yo Umwene imoca, kontha kahi commo phimpankiyaaya.’ Vano isiyani yankavihenre munna José ukupali ile yaalakeliye? Uyo heera: “Moolumo amphwanyannya nhina Miruku 3:5 ni 6 ahokuupusera wiira mi kihaana kinkhuluvelaka Yehova. Nlattu woopankiya ayo marukunuswaayo, nteko wootekateka unaweetta saana! Nnava hi ninaakhitiri uteka Isalau co Umwene cinci ni kahi iyo paasi. Hiiva ciicammo nineera niitthucaka uvaha micanko nimananna ninkhitiriihu wiira hataa mayamunna ahirina nsurukhu akhalaneke Isalau yo Umwene.”

13. a) Itthuni Gideau yaakupalyaawe? b) Manannani mahumu anlamuliyaaya untakiha Gideau? (Nwehe ciicammo ilatarato.)

¹³ Nlipe nrima ni mpanke itthu impheelaawe Yehova. Gideau ahomwiiwelela Yehova hataa oovaka ni hataa ukhalaka wiira waanoopiha upankiya itthu yowoopiha. (Masuw. 9:17) Yehova unlipiha wawe Gideau, uyova ahokhuluvela wiira anhala unkavihera ukati waahalaawe waahoolela apoovwaawe. Mahumu menci ankhala ncoko unkhottihiyaaya ntekweehu woolalyeera anaatthara venci ntakihero na Gideau. Ayo akhanle mayamunna oolipa nrima ni anaahoolela wiira cipankiye mikutthaano ni ciicammo uvariye nteko woolalyeera. Pooti ukhalaka wiira unawoopiha ayova uhaleela ntekwaaya, waattakaciya ni ukohakohiya mmatiripunaali. f Yapaceraka masakha moolupale, mahumu anaahala upheela ulipa nrima wiira akhitiri wiiwelela ikano anhalaaya uvahiya ni mphwinko wa Yehova, hataa ikhalaka itthu yowoopiha upanka. Ayo malakiherwaayo pooti ukhala mananna oolalyeera ihapari cohukhumu ni itthu yoopanka wiira noopwe ukhottoni ya Gogue o Magogue.—Ezek. 38:18; Apoka. 16:21.

14. Ukatini Gideau wanrikenlyaaya uvilela?

¹⁴ Wiira akhale suwiisi aasarayeli, Gideau ahaana akhalanaka ikuru. Ukati atthu o Midiã waatthawilyaaya ile ikhottweele uhiyu iriyari, Gideau ahowoomolaniha ukhuma u Jezreel mpaka mooloko Jordão, nipuro atthunaka naarukureeriye nimiri cinci ni nimiiwa. (Masuw. 7:22) Niireke wiira uphiya wawe uyo moolokooyo Gideau aheemela? Mena! Waahookhalaru wiira yahoocyaaca, uyova wamoca naanakhottwaawe 300, yaholapuwaca mooloko ni  uwoomolaniha. Uhoolo waya ayo yahaavara ni yahotthema ile ikhottweele.—Masuw. 8:4-12.

15. Ukatini atthunaka mahumu anlamuliyaaya uvilela?

¹⁵ Humu nolamuliya ukhala oovilela wiira akhitiri uwacera nloko ni amucyaawe. Nlattu wookhalana mirintti cinci mahumu pooti woocya. Yakhumelelaka iyo, manannani mahumu anlamuliyaaya untakiha Gideau?

16-17. Isiyani yankavihenre Gideau uvilela ni mahumu isiyani inlamuliyaaya ukupali? (Nwehe Isaiya 40:28-31.) (Nwehe ciicammo ilatarato.)

¹⁶ Munkhuluvele Yehova wiira naahala wuulipihani. Gideau ankhuluvela wiira Yehova phaahala unvaha ikuru, ni iyo phi itthu Yehova yampankenlyaawe. (Masuw. 6:14, 34) Nkwaha mmoca, Gideau wamoca naanakhottwaawe yahowoomolaniha mamwene meeli o Midiã. Nkoopuwelani ayova yaatthawa vathi ni atthunaka mamwennyaayo yaari nkameluni. (Masuw. 8:12, 21) Ni yakaviheriyaka ni Yehova, ayo yahokhitiri waavara ayo mamwennyaayo ni yahotthema iyo ikhottweeyo. Mahumu ciicammo pooti unkhuluvela Yehova, ule ‘hinoocya ni hinkhala woohikuru.’ Yehova naahala wuuvahani ikuru cimpheeleenyu.—Nsome Isaiya 40:28-31. g

¹⁷ Moone itthu yankhumelenle munna Matthew, nokavihera Ikhurupu yo Mayamunna Inwuulumana Mameetiku. Isiyani yankavihenre uvilela? Uyo neera: “Mi kihoona imwaneennyaaka itthu inhimyaaya Afilipo 4:13. Ikwaha cinci miiva kaanoocyaaka, kihooryaka upanka itthu. Mi kaanonlompa Yehova venci, kanlepelaka wiira akivahe ikuru wiira kikhitiri waakavihera mayamunna. Ni ukati yooyo mi kaheecoona wiira nnepa wowaarya wa Yehova uneera ukivahaka ikuru wiira kikhitiri uvilela.” Khampa Gideau, mahumu o wanlokoni wihu anawiikurumica venci wiira yaawacere apoovu a Yehova, hataa ikhalaka itthu yoorika. Masi khweeliini ayo ahaana yacuwelaka wiira cihaavo miteko cihinhalaaya ukhitiri uvara, hataa yapheelaka. Ni ayova pooti ukupali wiira Yehova naahala wiiwa ulompa waya yanlepelaka wiira aakavihere ni aavahe ikuru wiira avilele.—Isaa. 116:1; Afil. 2:13.

18. Khampa noonaleehu nhina ula mwahoola, mahumu anlamuliya untakiha cani Gideau?

¹⁸ Khampa noonileehu, mahumu pooti utthara ntakihero na Gideau. Ayo anlamuliya ukhala atthu oohiicuunuwiha ni owiiyeviha ukati woolakela mirintti mikavi cinlamuliyaaya waakhela, yoolumiyaka pusya awula yattottopeliyaka nlattu wo itthu apankilyaaya saana. Ayova anlamuliya ukhala oolipa nrima ni owiiwelela mattharelelo, venci-venci uwakati ninaattameleehu wiimaleloni wo ila ituninyeela. Ni ayova ahaana yakhuluvelaka wiira Yehova naahala waavaha ikuru ampheelaaya, hataa yaananaka marikarikoni. Khampa cinhimyaaya Ibiiblya, hiiva ‘ninawaasukhurweela’ ayo alopwana ookhuluvelyaayo ni ninaavaha ifayita miteko cotheene cinvaraaya.—Afili. 2:29.