Ibiiblya khinhimya nlattuni, masi cihaavo citthu cinhimyaaya cinoonihera nlattuni ayo waalakenlyaaya ukhala nanlelo u Belém.

Nlayikha nimoca nahomwiirela Maria wiira uyo anhala urupala irukulu ni unyara mwaana. Uwakati nlayikha nanhimenryaaya Maria iyo itthwiiyo, Maria ni Yusufu yaakhala u Nazaree, ilapo yaakhalaawe Yusufu, u Kalileya. (Luka 1:26-31; 2:4) Wahoolo, ukati waaturuwalyaaya Wiciipitu, ayo yaarweele u Nazaree. Yesu oonuwenle wonwo ni uyo ahokhala nnazaree. (Mat. 2:19-23) Phimaana, hiiva noopuwelaka u Nazaree, ninawaakuva umuupuwela Yesu, Yusufu ni Maria.

Maria ahaana amucyaawe yeehaniya Elisapete yaakhala u Yuuta. Ayo yaari amwaarawe nankuttho Zakariya ni ayo phaari anumwaane Joau Mpattisa. (Luka 1:5, 9, 13, 36) Maria ahomootola Elisapete ni ahokhala nkhayi nuuyo myeeri miraru u Yuuta. Vano, uyo ahohokoleela u Nazaree. (Luka 1:39, 40, 56) Phimaana, Maria aanaacuwela sana-saana ncoko wo Yuuta.

Wahoolo, Yusufu ahokhuma u Nazaree ni ahorwaa u Belém, kontha ikuvernu yo Roma yahaaruma atthu otheene wiira arwee isittatti yaayariyaaya ni ayantikhihe. u Belém phi nipuro naahalaawe uyariya Mesiya, khampa caahimyaaya inatiri yo mbiiblyani (Luka 2:3, 4; 1 Sam. 17:15; 20:6; Mik. 5:2) Vano, uyariya wawe Yesu u Belém, Yusufu khaapheela wiira Maria eette mpaka u Nazaree, kontha uyo aayanre phiyaaru. Phimaana, Yusufu ni Maria nanlelo yahokhala u Belém. Ukhuma u Belém mpaka u Yerusalemu caari ikiloometru 9. Ciicammo, nlamulo naahimya wiira ale yaayanre phiyaaru yahaana yavahaka itthuvo, nlattu wookhala wakhiviru ni u Yerusalemu, Yusufu ni Maria khawaahala waarika urwaa utempulu.—Lev. 12:2, 6-8; Luka 2:22-24.

Nlayikha nahomwiirela Maria wiira mwanawe anhala uvahiya “ihice ya Davidi” ni aahala “ukhala Mwene.” Pooti ukhalaka wiira Yusufu ni Maria wahaacivela nlattu wonyara Yesu wasittatti ya Davidi. (Luka 1:32, 33; 2:11, 17) Ayo atthunaka yahoopuwela wiira wanhala ureera ukhala wonwo, mpaka waahalaaya ucuwela itthu Nluku yaahalaawe waaruma upanka.

Hi khanincuwela mahuku makavi yaavinre ukhuma ukati waarwaalyaaya u Belém mpaka nihuku nootoliyaaya naalopwana yonne itthonttwa. Masi ninaacuwela wiira ayo yahaana inupa yaakhalaaya u Belém ni uyo ukatyuuyo Yesu aari “mwanhima,” kahi mwaana ooyariya phiyaaru. (Mat. 2:11) Unawoonannya wiira uhiya uhokoleela u Nazaree, ayo yahoviriha ukati mwinci yakhalaka u Belém, wiira athamele wonwo.

Heroti ahoruma wiira “asinamwane otheene o Belém . . . yaarina myaakha miili mpaka vathi” yahaana yiiviyaka. (Mat. 2:16) Nlayikha nimoca nahonhimerya Yusufu iyo itthwiiyo. Phimaana, uyo ni Maria yahotthawela Wiciipitu ni yahokhala wonwo mpaka waakhwilyaawe Heroti. Wahoolo, Yusufu ahaacisa amucyaawe ni yahorwaaca u Nazaree. Masi nlattuni wahaahokolenlyaaya u Belém? Ayo khayaaturuwenle u Belém kontha ule ukatyuule mwaana a Heroti phaahoolela u Belém ni uyo aari nlopwana oohinamaana. Ciicammo, nlayikha nimoca nahonhimerya Yusufu wiira yaahala ukhala itthu yowoopiha uturuwela u Belém. Phimaana, ayo yahorwaa u Nazaree, kontha naari nipuro nomaana wiira amuunuwihe Yesu.—Mat. 2:19-22; 13:55; Luka 2:39, 52.

Unkhala toko wiira Yusufu aakhwile Yesu hinaaya uhula iphiro wiira athanliye apinaatamu anhala wunwelelihiya ni urwaa ukhala wiirimu. Phimaana, Yusufu nohala wunwelelihiya wiira akhale va watuninyani va. Enci anaahala ukhalana iparakha yoncuwela ni unlepela wiira attonkace nlattuni uyova ni Maria waalakenlyaaya ukhala u Belém unyara waya Yesu.