MWAHA WOOSOMIYA 25
NCIPO 7 Yehova ti Ikuru Sahu
Nhiliyale wiira Yehova khanle “Nluku nkumi”
“Yehova khanle nkumi!”—ISAA. 18:46.
ITTHU INHALEEHU WIITTHUCA
Ninaahala woona nnlattuni unreeraaya ucuwela wiira Nluku nonswaleleehu khanle nkumi.
1. Isiyani inaakavihera aswali a Nluku uhihiyerera unswalela hataa yaanana marikariko?
IBIIBILIYA ineera wiira ula ukati unkhaleehuula akhanle “mahuku oorika uvilela.” (2 Tim. 3:1) Atthu anonswalela Yehova anawaakhumelela masakha o ila ituninyeela, masi ciicammo anaalupatthiya. Vano isiyani innikavihera unswalela Yehova, hataa yanikhumelelaka masakha otheene ayo? Itthu imoca innikavihera ukhanle ucuwela wiira Yehova khanle “Nluku nkumi.”—Jer. 10:10; 2 Tim. 1:12.
2. Isiyani nincuweleehu ya Yehova inilipiha venci?
2 Yehova khanle okhweeli ni khweeliini haavo. Khula ukati unniphwanyaaya masakha, uyo nawaavya mananna oonikavihera. (2 Ikor. 16:9; Isaa. 23:4) Noopuwelaka wiira Nlukwiihu naaniwacera ni naapheela unikavihera, ninaakhalana ikuru wiira nivilele khula inanna yo masakha anhala uniphwanya. Ninaahala woona mananna uyo cankavihenryaawe Davidi ni aswali akhwaawe.
3. Isiyani Davidi yaapheelaawe uhimya wiira wawe “Nluku eekhweeli”?
3 Davidi aanancuwela Yehova sana-saana ni aanankhuluvela. Ukati waalupatthiyaawe naawanannyaawe ni hataa nimwene Sawuli, Davidi ahonlompa Yehova ni ahonlepela wiira ankavihere. (Isaa. 18:6) Ukati Yehova waakhunlyaawe ulompa wa Davidi ni wankavihenryaawe, Davidi aheera co: “Yehova khanle nkumi!” (Isaa. 18:46) Isiyani Davidi yaapheelaawe uhimya? Ilivuru imoca yaanamasoma ihohimya wiira, nno nipuronno, Davidi aapheela uhimya wiira aanaakhuluvela wiira Yehova phiri Nluku eekhweeli ni uyo nawaakavihera atthu anonswalela khula ukati. Davidi ahooneeha mwaaneennyaawe wiira khula ukati wakhalaawe ni masakha, Yehova aari wakhiviru wiira ankavihere. Iyo phi itthu yankavihenre Davidi uhihiya unswalela ni unttottopela Yehova.—Isaa. 18:28, 29, 49.
4. Kontha isiyani ikhanlyaya itthu yofayita ucuwela wiira Yehova khanle Nluku eekhweeli?
4 Ukhuluvela wiira Yehova khanle Nluku nkumi unaahala unikavihera unswalela unitteelaka nrima. Ni unswalela unitteelaka nrima phinhala unikavihera uvilela khula masakha ni uhihiya wiikurumica unswalela. Ciicammo, napankaka commo phinhaleehu uhihiya ukhalana upatthani womaana nuuyova.
NLUKU NKUMI NAAHALA WUULIPIHANI
5. Isiyani inhala unikavihera utepa ukhuluvela naananaka marikariko? (Afilipo 4:13.)
5 Naahiliyaleke wiira Yehova khanle Nluku nkumi ni naahala unikavihera khula ukati, ninaahala ukhitiri uvilela khula masakha, yuunuwe wala ayeve. Uhimya ikhweeli, khaavo masakha Yehova anoonaawe utepa wuunuwa mpaka wooceela unikavihera, kontha uyo khanle Nluku Nakuru-Cotheene ni naanivaha ikuru cimpheeleehu. (Nsome Afilipo 4:13. a) Phimaana, hi ninaahala ukhitiri uvilela masakha otheene anhala uniphwanya. Noonaka wiira Yehova naanikavihera uvilela masakha mankaani, ninaatepa unkhuluvela wiira uyo naahala unikavihera yanikhumelelaka masakha moolupale.
6. Isiyani yaamwiirannyenle Davidi ukati waaryaawe mmirawo ni isiyani yamwiirihile utepa unkhuluvela Yehova?
6 Moone citthu piili caamwiirannyenle Davidi cankavihenre utepa unkhuluvela Yehova. Ukati Davidi waaryaawe mmiravo ni waalihaawe ikhontwaa caathumwaane, ikwaha imoca ahonkhumelela urso ni ikwaha ikiina, kharamu. Nnyo inamannyo cahocisa ikhontwaa, masi Davidi ahoomolaniha ni ahoopola ikhontwaa caathumwaane. Davidi khoopuwenle wiira aakhitinri upanka commo niikuru cawe. Uyo ancuwela wiira Yehova phankavihenre ulipa nrima ni phanvahile ikuru wiira akhitiri umwiiva urso ni kharamu. (1 Sam. 17:34-37) Davidi khaaliyanle itthu yaamwiirannyenle nnyo ikwaha piilinnyo. Oopuwelaka itthu yeerannyeele, uyo aanaatepa unkhuluvela Yehova ni ucuwela wiira uyo khaahala uhiya unkavihera wahoolo.
7. Isiyani Davidi yaakhuluvelaawe, ni iyo yankavihenre cani upheela umwanana Koliyasi?
7 Wahoolo, atthunaka nanlelo nari mmiravo, Davidi ahorwaa mpaka nipuro naryaaya anatoropa o Isarayeli. Uyo ahoona wiira ayo anatoropaayo yaanawoopopihaciya ninlopwana mmoca nfilisteu muulupale ni nakuru cinene eehaniya Koliyasi. Uyo ‘aapheela uwaattakanana anatoropa o Isarayeli.’ (1 Sam. 17:10, 11) Anatoropa o Isarayeli yahoova nlattu wokuru caarinaawe uyo nlopwanooyo ni nlattu wo citthu coolumaawe wiira awoopopihe. (1 Sam. 17:24, 25) Masi Davidi khaari toko ale anatoropaale. Davidi ancuwela wiira Koliyasi khaaveehile anatoropa o Isarayeli paahi, masi aaveehile anatoropa a Nluku nkumi. (1 Sam. 17:26) Davidi aamuupuwela Yehova, uhiya wuupuwela ikuru cawe ule nlopwanoole. Uyo ancuwela wiira Nluku anhala unkavihera, khampa cankavihenryaawe ukati waalihaawe ikhontwaa caathumwaane. Davidi ankhuluvela wiira anhala ukaviheriya ni Nluku. Phimaana, Davidi ahokhitiri umwaattakanana Koliyasi, toko cincuweleehu, uyo ahontthema!—1 Sam. 17:45-51.
8. Isiyani inhala unikavihera utepa ukhuluvela wiira Yehova naahala unikavihera ukati womasakha? (Nwehe ciicammo ilatarato.)
8 Hiiva ciicammo ninaahala ukhitiri waanana khula inanna yo masakha naahiliyaleke wiira Nlukwiihu khula ukati nokhala wakhiviru wiira anikavihere. (Isaa. 118:6) Noopuwelaka mananna Yehova caanikavihenryaawe khalayi, ninaahala ulipihaca unkhuluvela wihu. Phimaana, nsome ihantisi co mbiibiliyani cinoonihera mananna Yehova caakavihenryaawe aswalyaawe. (Isai. 37:17, 33-37) Ciicammo, nsome ihantisi co mayamunneehu ni mayanuunwiihu cimphwanyannya nsayitini jw.org. Nnyo ihantisinnyo cinawoonihera wiira Yehova nawaakavihera aswalyaawe mahukwaala. Mmananihe ciicammo wuupuwela ikwaha Yehova cookavihenryaaweni waanana masakha khalayi. Nyuuva atthunaka khannohala woona wiira yahookhumelelani masakha moolupale cinene oolikanaca nuumwaattakanana urso awula kharamu. Hataa ukhalaka commo, nyuuva nnaahala woona wiira Yehova ukati wotheene nokhala ninyuuva wiira oovareni moono yookhumelelakani itthu! Nhiliyale wiira Yehova phuwiihanneni wiira nkhale mpwanaawe. (Joau 6:44) Ni nyuuva nnokhitiri uhihiya umwiiwelela Yehova kontha uyova nawuukaviherani. Vano, nnoonela cani unlompa Yehova ni unlepela wiira ookavihereni wuupuwela ikwaha caakhunlyaawe ulompa winyu, ukati mwaasankileenyu ni ookavihenryaaweni? Wuupuwela mananna Yehova cookavihenryaaweni unaahala wuukaviherani utepa unkhuluvela wiira uyo khanhala uhiya wuukaviherani.
Yehova naawacera mananna ninaananeehu marikariko (Nwehe iparaagarafu 8-9)
9. Isiyani inlamuliyeehu wuupuwela naananaka masikariko? (Miruku 27:11)
9 Wuupuwela wiira Yehova khanle Nluku nkumi ciicammo unaahala unikavihera uwehera ratta masakha annikhumelela. Manannani? Yanikhumelelaka masakha, nihaana nuupuwelaka isiyani ikhanle itthu yofayita cinene. Sotwani neera wiira yanikhumelelaka maskaha, ninaahala unhiya Yehova. Phimaana, itthu inhaleehu upanka yanikhumelelaka masakha inaahala ukavihera umwaakhula Sotwani. (Jó 1:10, 11; nsome Miruku 27:11. b) Navilelaka masakha annikhumelela woohinhiya Yehova, hi ninawoonihera wiira ninanfenta ni ninawoonihera wiira Sotwani nawootha. Vano nyuuva? Nyuuva nnaalupatthiya niikuvernu ncoko unkhaleenyu? Unawuuthwani nsurukhu? Mwarwaaka wuulalyeerani, atthwaayo khanaakhelela saana ihapari cinlalyeenyu? Awula, anawuukhumelelani marikariko makhwaawe? Wakhala commo, nhiliyale wiira marikariko anookhumelelani anawuuvahani ukati wontteeliha nrima Yehova ni woonihera wiira Sotwani nawootha. Masi nhiliyale: Yehova khanhala wuuhiyererani yookhumelelakani masakha ahinhaleenyu ukhitiri uvilela. (1 Akor. 10:13) Uyo khanhala uhiya wuuvahani ikuru cimpheeleenyu wiira nkhitiri uvilela.
NLUKU EEKHWEELI NAAHALA WUUCAALIHANI
10. Isiyani Nluku yaakhuluvelihilyaawe ale anonswalela?
10 Yehova khanhiya waacaaliha ale anonswalela. (Mabere. 11:6) Uyo naanivaha nnema nenna co ni wahoolo naahala univaha ukumi woohimala. Hi ninankhuluvela Yehova ninrimeehu wotheene, kontha ninaacuwela wiira uyo naahala unicaaliha ni haana ikuru yoopanka iyo itthwiiyo. Phimaana, nihihiyerere upanka ile inkhiritiihu wiira ninswalele Yehova, khampa yaapankilyaaya aswali okhalayi. Iyo phi itthu yaapankilyaawe Timotiyu.—Mabere. 6:10-12.
11. Nlattu Timoriyu waapankilyaawe yaakhitiryaawe wiira aakavihere mayamunna? (1 Timotiyu 4:10)
11 Nsome 1 Timotiyu 4:10. c Timotiyu aanaamwaamini Nluku, phimaana, aanaapanka ile yaakhitiryaawe para Yehova ni waakavihera mayamunna. Aapankile cani iyo itthwiiyo? Apostolu Paulu ahonkurumica ukhala mwiitthucihi omaana wanlokoni ni wuulalyeerani, ciicammo, Paulu ahomwiirela wiira aahana uwoonihera ntakihero nomaana mayamunna amirawo ni owuuluvala. Uyo, ahovahiya miteko coorika cinene, khampa waavaha ikano coolipiha mayamunna yaahala upheela ulipihiya, masi awooniheraka nifento. (1 Tim. 4:11-16; 2 Tim. 4:1-5) Ikwaha cikhwaawe, atthu akiina khayaahala woona nteko Timotiyu waahalaawe uvara ni hataa unsukuru nlattu wonteko aahalaawe uvara. Masi, uyo ancuwela wiira ntthu ofayita cinene ancuwela nteko waavaraawe ni anhala untthuvela.—Aroo. 2:6, 7.
12. Nlattuni mahumu impankaaya inkhitiryaaya wiira yaakavihere mayamunna? (Nwehe ciicammo ilatarato.)
12 Mahumu ciicammo, pooti ukhuluvela wiira Yehova nawoona nteko wotheene unvaraaya ni naavaha ifayita cinene. Uhiya paahi, waawacera mayamunna, wiitthuciha wuulalyeerani, mahumu menci anaakavihera nteko wootekateka ni waakavihera mayamunna cinaakhumelela ihasara. Makhwaawe, anaakavihera ikhurupu yomayaamunna inaathotola ale anwerennya mmasipitaali. Mahumu aneevaherera uvara nnyo mitekonnyo, anaacuwela wiira nloko nikhanle na Yehova kahi napinaatamu. Phimaana, ayo anaapanka inkhitiryaaya ni anaakupali wiira Yehova naahala waatthuvela nlattu wowiikurumica waya.—Akol. 3:23, 24.
Nluku eekhweeli naahala wuutthuvelani nlatthu wo citthu cotheene cinaapankeleenyu mayamunna (Nwehe iparaagarafu 12-13)
13. Yehova nokhala cani anoonaka niikurumicaka unswalela?
13 Khanlamuliya atthu otheene ukhala mahumu, masi otheene cihu, pooti wanonvaheehu itthu Yehova. Nlukweehu naakhala ootteeliya napankaka inkhitiriihu wiira ninvarele nteko. Uyo, nawoona micanko ninvaheehu wiira nikavihere miteko colapo yotheene, hataa cikhalaka vakaani. Uyo ciicammo, naakhala ootteeliya nahiyaka woova wihu ni nunwusaka ntata wiira nikomentari umikutthaanoni, ni naatepa utteeliya naliyalaka itthu nipankiyeehu yootakhala ni nalevelela munneehu. Hataa nyuuva moonaka toko khannompakela Yehova citthu cinci, nyuuva munkhuluvele Yehova ni nvahe ifayita citthu cinkhitiriinyu upanka. Yehova nawuufentani cinene nlattu wowiikurumica winyu ni naahala wuutthuvelani.—Luka 21:1-4.
NHIHIYERERE UKHALA WAKHIVIRU NI NLUKU EEKHWEELI
14. Manannani ukhalana upatthani woolipa ni Yehova unikaviheraaya uhihiya unswalela? (Nwehe ciicammo ilatarato.)
14 Namoonaka Yehova khampa ntthu riwo, khunhala unirikela ukhala ookhuluvelya wamiitthoni wawe. Iyo phiitthu yankhumelele Yusufu. Uyo ahokhottha urupihana woohiloka kontha ancuwela wiira iyo itthwiiyo yanhala unripiha nrima cinene Yehova. (Upha. 39:9) Napheela umoona Yehova khampa ntthu riwo, nihaana ukumiha ukati wiira nimuulumane, nisomaka nuulumo nawe. Upanka commo, unaahala utepa ulipa upatthaniihu nuuyova khula nihuku. Ni khampa Yusufu, nakhalanaka upatthani woolipa ni Yehova, khaninhala upheela upanka itthu yaahala unriipiha nrima.—Tiya. 4:8.
Uhihiya umwaattamela Nluku eekheeli unaahala wuukaviherani uhihiya unswalela (Nwehe iparaagarafu 14-15)
15. Isiyani ninwiitthucereehu asarayeli ukati waaryaaya muuthakoni? (Maberewu 3:12)
15 Ale anliyala wiira Yehova khanle ntthu rivo, pooti wanhiyaaya umwiiwelela. Moone itthu yaawiirannyenle asarayeli ukati waaryaaya muuthakoni. Ayo, yancuwela wiira Yehova ahaavo, masi yahopacera wiikoha wakhala wiira Yehova anhala waawacera. Vano, ayo yahokoha: “Yehova ri nihiiva awula mena?” (Nkw. 17:2, 7) Nlattu wo iyo itthwiiyo, ayo yahonrukunuwela Yehova. Hi, khanimpheela ukhala toko asarayeli ni unrukunuwela Yehova.—Nsome Maberewu 3:12. d
16. Manannani waamini wihu unhalaaya uttehattehiya?
16 Ikhanle itthu yoorika unswalela Yehova ila ituninya ninkhaleehwiila. Hataa atthu enci aneera wiira Nluku khaavo. Ni unkhala toko ale ahinonwacera Nluku anaakhala saana. Noonaka iyo itthwiiyo yiirannyaaka, waamini wihu pooti uttehattehiya. Khweeiini, khaninhala wuupuwela wiira Nluku khaavo masi pooti wampacereehu wiikoha wakhala wiira Yehova naahala unikavihera. Nasaalimu ikapitulu 73 yahomwiirannyeela iyo itthwiiyo. Uyo anwoona atthu ahiwaceraka malamulo a Nluku ni yaapanka itthu yaacivela. Nlattu wo iyo itthwiiyo, uyo ahopacera wiikoha wakhala wiira yaari itthu yomaana uhihiya unswalela Yehova.—Isaa. 73:11-13.
17. Isiyani inhala unikavihera umwaattamela Yehova?
17 Isiyani yankavihere uyo nasaalimuuyo urukunusa moopuwelelwaawe? Uyo ahoopuwela itthu inhala uwiirannyeela ale anonliyala Yehova. (Isaa. 73:18, 19, 27) Ni uyo ciicammo, aheemela ni wuupuwela ifayita irivo nlattu wonswalela Nluku. (Isaa. 73:24) Hiiva ciicammo, pooti wanoopuweleehu iparakha cotheene Yehova nivahilyaawe. Mmananihe wuupuwela mananna caahalaaya ukhala ukumiinyu unari wiira khamwanswalela Yehova. Wuupuwela nnyo citthunnyo, unaahala unikavihera uhihiyerera unswalela Yehova, ni wiira khampa nasaalimu: “Masi miiva, umwaattamela Nluku ikhanle itthu yootepa ukicivela.”—Isaa. 73:28.
18. Kontha isiyani uhinlamuliyeehu woova itthu inhala wiirannya wahoolo?
18 Hiiva ninaahala ukhitiri waanana marikariko otheene anhala unikhumelela ala mahuku ookhiceraala, kontha nikhanle “aswali a Nluku eekhweeli.” (1 Atesal. 1:9) Nlukwiihu Yehova, khanle ntthu rivo ni khanhala uhiya unikavihera. Uyo khaahiile aswalyaawe okhalayi ni hiiva khanhala unihiya. Woohipica anaahala upacera masakha moolupale. Masi hi khaninhala ukhala veekha. Yehova nohala ukhala nihiiva. (Isai. 41:10) Vano, otheene cihu pooti wankhalaneehu ‘ulipa nrima ni wiira: “Yehova phinikavihero naka, akinhala woova.’”—Mabere. 13:5, 6.
NCIPO 3 Yehova Onninivaha Ikuru, Nlipelelo, ni Nroromelo
a Afilipo 4:13 Citthu cotheene kinkhitiri nlattu wa ule nokivaha ikuru.
b Miruku 27:11 Ukhalane ankhili, mwanaka, wankitteelihaa nrima, wiira kimwaakhule ule nkiveehaca.
c 1 Timotiyu 4:10 Phimaana hi ninawiikurumica cinene uvara nteko, kontha nweherero nihu ninkhuma wai Nluku nkumi, ule khanle Moopoli atthu otheene, venci-venci ale ammwiiwelela.
d Maberewu 3:12 Mayamunna, ratta, wiira hikhale nohala ukhalana nrima woothakhala ni woohamini, unhala umwiiriha uhiya umwiiwelela Nluku nkumi;
