MWAHA WOOSOMIYA 23
NCIPO 28 Tipani nohala ukhala mpatthani a Yehova?
Yehova honilattula wiira nikhale alettwaawe
“Heemaaka nohala ukhala naayo, ni mi kinhala ukhala Nlukwaaya.”—EZEK. 37:27.
ITTHU INHALEEHU WIITTHUCA
Hi ninaasukhuru nlattu Yehova woonilattula wiira nikhale aletto nheemani wawe ni uniwacera unooniheraawe ukhala wiira uyo hinilattunle.
1-2. Nlattuloni Yehova naapankelaawe aswalyaawe okhuluvelya?
MWAAHALA waakhula cani nyuuva mwakohiyaka co: Yehova nnomoonela khampa isiyani? Nyuuva atthunaka mwaahala waakhula co: ‘Kimmonela khampa Apaapaaka, Nlukwaaka ni mpatthannyaaka.’ Ni ahaavo mananna makhwaawe antaphulela mananna Yehova ciryaawe. Nyuuva ciicammo nhopaca wuupuwela wiira Yehova huulattuleni.
2 Ahimyaka mananna upatthaniihu ni Yehova cinkhalaaya, Davidi honlattaniha Yehova ukhala mwaakheleli ni aswalyaawe ukhala aletto. Davidi ahonkoha co: “Yehova, tipani nolamuliya ukhala nletto nheemani waa? Tipani nolamuliya ukhala umwaakoni waa wowaarya?” (Isaa. 15:1) Nlattu wo nnyo iveerusunnyo hiiva nihocuwela wiira pooti wankhaleehu aletto a Yehova awula ukhala apatthannyaawe. Nyuuva khanaamini wiira nno nikhanle nlattulo nomaana Yehova nonivahaawe?
YEHOVA NAWAALATTULA ALETTWAAWE
3. Tipani khanle nletto oopacera a Yehova?
3 Hinaaya wumpa citthu cotheene, Yehova ari veekha. Masi, nuuwakatyaaya uyo ahomumpa mwanaawe oopacera. Vano, waakhala khampa Yehova anawaalattula alettwaawe oopacera nheemani wawe, athoonyiheraka ukhala namaakhela uyo ahookhala ootteeliya venci. Ibiibiliya ineera wiira Yehova ‘anciveliya mahuku otheene,’ aakhalaawe nimwanaawe. Ni ciicammo, mwanaawe ‘ankhala ootteeliya ukati wotheene,’ aakhalaawe naathumwaane.—Miru. 8:30.
4. Taapani-tho yaari aletto a Yehova?
4 Nuuwakatyaaya, Yehova ahompa malayikha wiira ciicammo akhale alettwaawe. Ayo malayikhaayo aneehaniya “asaana a Nluku” ni Ibiibiliya inaahimya wiira anaakhala ootteeliya nlattu wookhala wamoca ni Yehova. (Jó 38:7; Dan. 7:10) Khalayi, aletto a Yehova yaari paahi ale yaakhala nkhayi nuuyo wiirimu. Masi nuuwakatyaaya, Yehova ahomuncerera heemaawe wiira awaakhelele apinaatamu ankhala va watuninyani va wiira akhale alettwaawe. Aletto akhwaawe ahiminye ri Enoki, Nowee, Aparahaamu ni Jo. Ibiibiliya ineera wiira ayo yaari apatthani a “Nluku eekhweeli” kontha yaaneewelela ni yankhuluvela ikano cawe.—Upha. 5:24; 6:9; Jó 29:4; Isai. 41:8.
5. Isiyani ineetthucereehu inatiri Ezekiyeli 37:26, 27?
5 Ikhumelo khalayi Yehova khahiile waalattula apatthannyaawe wiira akhale alettwaawe. (Nsome Ezekiyeli 37:26, 27. a) Wootakihera, inatiri Yezekiyeli, hi niheetthuca wiira Yehova noopheela wiira aswalyaawe akhalane upatthani woolipa nuuyova. Uyo hookhuluveliya upanka “nleehano nonnema naayova.” Iyo inatiriiyo inooluma ukati aswali oothanliya a Yehova wamoca ni ale arina niweherero nookhala upeephoni va watuninyani va, anhalaaya ukhala nkhayi nheemani khampa “ikhontwaa.” (Joau 10:16) Iyo inatiriiyo inawiirannya mahukwaala!
YEHOVA NANIIWACERA KHULA NIPURO
6. Manannani ntthu nokhalaawe nletto nheemani wa Yehova ni nipuroni niryaawe uyo heemooyo?
6 Khalayi, heema naari nipuro ntthu naamumulacaawe ni weecoonaawe ukhala ookhikicerya. Nletto nari nheemani, ankhala saana kontha ancuwela wiira anhala ukhala ookhikicerya. Ukati unvaherereehu ukumiihu wa Yehova hiiva ninaakhala aletto nheemani wawe. (Isaa. 61:4) Nhina uyo heemooyo hiiva nihaana iyoolya yinci yo mminepani wiira nihihiyerere ukhala apatthani a Yehova ni ukhala nkhayi naale ari alettwaawe. Hataa nikhalaka mapuroni, otheene cihu pooti ukhala aletto nheemani wa Yehova. Atthunaka nyuuva nhopaca urwaa ilapo cikhwaawe, wootakihera, wiira moone ikonkereesu yuulupale ni nwo nyuuva nnawaacuwela ciicammo mayamunna akhwaawe ari ootteeliya nlattu wookhala nheemani wa Yehova. Heema a Yehova naaphwanyannya mapuro otheene ari aswalyaawe.—Apok. 21:3.
7. Kontha isiyani nineereehu aswali a Yehova akhwile nanlelo akhanle aletto nheemani wawe? (Nwehe ciicammo ilatarato.)
7 Vano, aswali a Yehova ookhuluvelya akhwile? Niireke ciicammo ayo akhanle aletto a Yehova nheemani wawe? Iyee! Kontha isiyani nineereehu commo? Kontha para Yehova ayo atthwaayo nanlelo ahaavo akumi. Yesu ahotaphulela eeraka co: “Atthu ookhwa anaahala wunwelelihiya, hataa ciicammo Moceesi ahohimya iyo ihantisiiyo aacaka mwiri, ukati wamwiihanaawe Yehova ukhala ‘Nluku Aparahaamu, Nluku a Isaaki ni Nluku a Jako.’ Uyo khanakhala Nluku aatthu ookhwa, masi khanle Nluku aatthu akumi, kontha otheene nowoona ukhala akumi.”—Luka 20:37, 38.
Hataa aswali okhuluvelya akhwile pooti ukhala aletto a Yehova nheemani wawe (Nwehe iparaagarafu 7)
IFAYITA NI MIRINTTHI
8. Ifayitani imphwanyaaya aletto a Yehova?
8 Khampa heema nikhanlyaaya nipuro noreera umumula, ciicammo heema a Yehova naawiiriha alettwaawe ukhala ookhikicerya nicitthu caahala waaloloviha nhina mminepa ni naanivaha niweherero noohoolo. Nankhuluvelaka Yehova, Sotwani khanhala upanka hataa itthu inhala unihiiha ukhala nheemani wa Yehova mpaka. (Isaa. 31:23; 1 Jo. 3:8) Ni upeephoni, Yehova khanhala urwaa uhiyerera waakhikicera asipatthannyaawe okhuluvelya, uhiya paahi nhina mminepani masi ciicammo mukhwaani.—Apok. 21:4.
9. Isiyani Yehova inwehereraawe wiira alettwaawe apanke?
9 Khweeliini, ikhanle iparakha yuulupale ukhala nletto nheemani wa Yehova ni ukhalana upatthani woolipa nuuyova mpaka. Wakhala wiira hiiva naalettwaawe, isiyani inlamuliyeehu upanka? Wakhalaka wiira nyuuva nnaalattuliya nintthu wiira nrwee uwannyawe, nyuuva nnaahala upheela ucuwela itthu ntthuuyo impheelaawe wiira mpanke. Wootakihera, mwaanene inupa pooti upheela wiira nyuuva nhaana urula isapatu cinyu nhinaaya ukela mpaani, khweeliini nyuuva mwanhala upanka iyo itthwiiyo. Inanna imocaaru, hiiva ciicammo nihaana ucuwela itthu Yehova impheelaawe wiira alettwaawe apanke. Nifento nihu ni Yehova hinnikurumica wiira nipanke yotheene inkhitiriihu ‘wiira nintteelihe nrima.’ (Akol. 1:10) Yehova khanle khampa mpatthaniihu, masi nihaana nuupuwelaka wiira uyo phiri Nlukwiihu ni Apaapeehu, phimaana uyo hinomphwanela uhisimiya. (Isaa. 25:14) Wuupuwela ayo manannaayo, unaahala unikavihera unyema upanka itthu yaahala unriipiha nrima Yehova ni uhihiya ‘unkhuluvela ukati wotheene.’—Mik. 6:8.
YEHOVA KHAATHANLELA ASARAYELI
10-11. Mananna Yehova caawacenryaawe a Sarayeli ukati waaryaaya wuuthakoni u Sinai, unooniheraaya cani wiira khanaathanla atthu?
10 Yehova khanaathanlela alettwaawe ukati naawaceraawe. (Aroo. 2:11) Hiiva pooti ucuweleeha sana-saana uhithanlela wa Yehova nasomaka mananna caawacenryaawe a Sarayeli ukati waaryaaya wuuthakoni u Sinai.
11 Ukati awooponlyaawe apoovu mwiipotthani Weciitu, Yehova ahaathanla anankuttho wiira ahoolele ntabernaakulu. Yaahothanliya Malevita wiira awacera miteko cikhwaawe caavariya nne nipuro nowaaryanne. Niireke wiira ale yaavara miteko utabernaakulu awula yaattamenle itabernaakulu yahowaceriya ratta ni Yehova uvikana Malevita akhwaawe? Mena! Kontha Yehova khanthanla.
12. Waawacera wawe a Sarayeli wuuthakoni, mananna Yehova coonihenryaawe wiira atthu otheene akhanle amocaaru? (Nkwaha 40:38) (Nwehe ciicammo ilatarato.)
12 Hataa ukhalaka wiira yaakhala nipuro noottalivana awula nowaattamela nutabernaakulu. Wootakihera, Yehova ahowiiriha apoovu otheene woona nihutte ni mooro upharelaka waculu itabernaakulu. (Nsome Nkwaha 40:38. b) Ukati nihutte naapaceraaya weetta nirwaaka mphantte nkhwaawe, hataa atthu yaakhala woottalivana itabernaakulu yankhitiri woona. Vano ayo atthwaayo, yahaana atthonkomanihacaka citthu caya, watamihaca aheemaaya ni upacera weetta nkwaha. (Manu. 9:15-23) Uhiya commo, atthu otheene yahaana uviriyana itorompeta co parata ukati waalamuliyaaya wunwa atthu otheene. (Manu. 10:2) Ukhala wakhiviru nutabernaakulu khunakhala wiira anhala ukhalana upatthani woolipa ni Yehova uvirikana ale yaakhala uttayi nutabernaakulu. Uhiya commo, apoovu otheene yanswalela Yehova pooti waakhalaaya alettwaawe wiiwelela ikano cawe ni wiicoona ukhikiceriya nuuyova. Inanna imocaaru, hataa nikhalaka nipuroni, otheene cihu pooti waneecooneehu ufentiya, uwaceriya ni ukhikiceriya ni Yehova.
Itabernaakulu yaari iriyaari ilapo yoonihera wiira Yehova khanonthanla ntthu (Nwehe iparaagarafu 12)
MANANNA YEHOVA NONIIHERAAWE UHATHANLA MAHUKWAALA
13. Manannani Yehova nooniheraawe wiira khanonthanla ntthu mahukwaala?
13 Apoovu a Yehova akhwaawe ankhala waattamela mapuro anhooleliya miteko cihu ntuninyani motheene awula Mmapeteeli cikhwaawe. Hataa akhwaawe ankhala ayo mapurwaayo. Phimaana, atthu enci pooti ukavihera miteko cinvariya ayo mapurwaayo ni ukhala nkhayi naale anhoolela mphwinko. Akinakwaayo anvara nteko khampa mootoli osirikwiitu awula miteko cikhwaawe cinvariya mumphwinkoni. Nyuuva pooti ukupali wiira Yehova nawaafenta alettwaawe otheene hataa ahikhalaka mapuro anvariya miteko co mumphwinkoni. Ni uyo naahala wuuvahani citthu cotheene cimpheeleenyu. (1 Pet. 5:7) Otheene ale ampanka mphantte waapoovu a Yehova anawaakhela iyoolya yo mminepani, ikettelo cawe ni ukhikiceriya saana.
14. Ntakiheroni nikhwaawe ninoonihera wiira Yehova khanonthanla ntthu mahukwaala?
14 Ntakihero nikhwaawe ninoonihera wiira Yehova khanonthanla ntthu ni khanle namaakhela omaana, nlattu uyo woowiiriha atthu otheene ukhalana Ibiibiliya ntuninyani motheene. Cowantikhiya Cowaarya coopacera, cantikhiye niiluuka tthaaru coovirikana: Iheperewu, Aramayiku, ni Ikereeku. Niireke ale ancuwela usoma Ibiibiliya ninnya iluukannya, phirina upatthani woolipa ni Yehova uvikana ale ahincuwela nnya iluukannya? Mena.—Mat. 11:25.
15. Isiyani innikupaliha wiira Yehova khanonthanla ntthu? (Nwehe ciicammo ilatarato.)
15 Yehova khannilepela wiira nisome icikola cuulupale awula ucuwela iluuka cinci wiira nikhale apatthannyaawe. Yehova nawaapatthanana atthu otheene ni nawaavaha ucuwelaca, uhiya paahi ale asomile icikola cuulupale. Nuulumo nowaarya na Yehova, Ibiibiliya ihotaphuleliya iluuka cinci; naayo manannaayo atthu ntuninyani motheene anaakhitiri woona ifayita irinaaya wiiwelela citthu cineetthucihaawe ni wiira akhale apatthannyaawe.—2 Tim. 3:16, 17.
Kontha isiyani utaphuleliya wo Ibiibiliya iluuka cinci unthoonyeraaya wiira Yehova khanonthanla ntthu? (Nwehe iparaagarafu 15)
NHIHIYERERE UKHALA ‘NLETTO’ A YEHOVA
16. Khampa cinhimyaaya Miteko 10:34, 35, Isiyani nlamuliyeehu upanka wiira nihihiyerere ukhala aletto a Yehova?
16 Iparakha yuulupale ulattuliya ni Yehova wiira nikhale aletto nheemani wawe. Yehova khanle namaakhela omaana cinene, onifento ni hinlikakaninya. Uhiya commo, Yehova nowoona ulikana atthu otheene, uyo nawaalattula atthu otheene hataa akhalaka mapuroni, yuunuwelaka mapuroni, hataa asomaka icikolani, ikhapilani, nihimoni, myaakhani. Masi ale ahinhiyerera umwiiwelela Yehova hinhala ukhala alettwaawe.—Nsome Miteko 10:34, 35. c
17. Ninhala uphwanya vayi myaha cikhwaawe cinhimya mananna ookhala aletto a Yehova nheemani wawe?
17 Nhina Isaalimu 15:1, Davidi ahonkoha Yehova co: “Oo Yehova, tipani nolamuliya ukhala nletto nheemani waa? Tipani nolamuliya ukhala umwaakoni waa wowaarya?” Vano, Yehova ahonvarela nteko yooyo Davidyuuyo wiira aakhule ayo makohwaayo. Mwaha unttharelana, ninaahala woona citthu cinlamuliyeehu upanka wiira nihihiyerere ukhala aletto nheemani wa Yehova.
NCIPO 32 Rwaani wa Yehova!
a Ezekiyeli 37:26 Kinaahala upanka nleehano nonnema naayo, ninhala ukhala nleehano noohimala. Kinaahala waakhaliha enci, ikhilompyaaka inaahala ukhala naayo mpaka. 27 Heemaaka nohala ukhala naayo, ni mi kinhala ukhala Nlukwaaya, ni ayo anhala ukhala apoovwaaka.
b Nkwaha 40:38 Nihutte na Yehova naakhalaka ukati wotheene uculu waya utapernaakulu, ni mooro waakhalaka uhiiyu, waamwaleelaka apoovu osarayeli otheene, ukati wotheene weettaaya nkwahaaya.
c Miteko 10:34 Coo, Peturu ahancera wuuluma ni aheera: “Vano kihooneeha wiira Nluku khaavo nonthanlaawe, 35 masi khula ilapo, Nluku nantthuna ule mmoova ni mpanka citthu comaana.
