Makoho Aanamasoma
Isaalimu 12:7 ineera wiira Yehova naahala “waakhikicera” atthu “asankile” anoolumiya nhina iveerusu 5. Masi nhina iveerusu 6 anawuulumiya ciicammo “moolumo a Yehova.” Niireke wiira unaaciya Yehova waakhikicera ayo atthwaayo awula ukhikicera moolumwaawe?
Nawehaka iveerusu cotheene co iyo Isaalimwiiyo, unawoonannya wiira unaaciya Yehova waakhikicera atthwaayo.
Nhina Isaalimu 12:1-4, ninsoma wiira “atthu ookhuluvelya khaavo-tho; atthu ookhuluvelya ahomalamala.” Vano nhina Isaalimu 12:5-7, uyo phineeraawe co:
“‘Ukhala wiira ale asankila anaahuva,
Ni ukhala wiira amasikhini anaahuva,
Mi kinaahala upanka itthu,’ neera Yehova.
‘Mi kinaahala uwoopola wiira ahipankiye pusya naale anaathanya.’
Moolumo a Yehova akhanle ooreera;
Ankhala toko iparaata yoovirihiya wamooroni ikwaha 7 wiira itepe ureera.
Oo Yehova, nyuuva nnaahala waakhikicera;
Nyuuva nnaahala waakhikicera otheene caya mpaka.”
Iveerusu 5 ineera wiira Nluku naahala uwoopola ale asankile.
Iveerusu 6 ineera wiira “moolumo a Yehova akhanle ooreera,” ‘toko iparaata yoovirihiya wamooroni wiira itepe ureera.’ Ni khweeli hi ninawoona ureera Nuulumo na Nluku.—Isaa. 18:30; 119:140.
Vano moone itthu inhimyaaya iveerusu yo Isaalimu 12: 7: “Nyuuva nnaahala waakhikicera; nyuuva nnaahala waakhikicera otheene caya mpaka.” Vano weeriyaka “otheene caya” anaaciya apani?
Ukhala wiira iveerusu 7 inttharana niiveerusu inooluma “moolumo a Yehova,” ahaavo atthu anoopuwela wiira iveerusu 7 inaaca ukhikiceriya moolumo a Yehova, kahi atthu. Hi ninaacuwela wiira Nluku hokhikicera nuulumo nawe, Ibiibiliya, wiira ihimalamalihiye ni ihihinnye ukawiya.—Isai. 40:8; 1 Pet. 1:25.
Masi itthu inhimyaaya iveerusu 5 ciicammo ikhanle ikhweeli. Ukhuma nenne nokhalayi, Yehova nawaakavihera ni khanhala uhiya waakavihera atthu “anhuvihiya” ni waakhikicera ale “ansanka.”—Jó 36:15; Isaa. 6:4; 31:1, 2; 54:7; 145:20.
Vano, weeriyaka “otheene caya” nhina iveerusu 7 anaaciya apani?
Nasomaka Isaalimu yotheene, unawoonannya wiira weeriyaka “otheene caya” anaaciya atthu.
Wiipaceroni Isaalimu 12: 1, Davidi naawuuluma “aswali ookhuluvelya” a Yehova athepiye naatthu oohinamaana. Iveerusu 2 inhimya wiira Yehova naahala waahukhumu ale anootha. Hi pooti wankhuluveleehu wiira Yehova naahala upanka iyo itthwiiyo, kontha iveerusu 6 ineera wiira moolumo a Yehova akhanle ooreera.
Vano iveerusu 7 ineera wiira Yehova naahala waakhikicera ale anhuvihiya naatthu oohinamaana.
Moolumo “otheene caya” yahantikhiya nhina makhanta makhwaawe o Cowantikhiya Ceeheperewu. Nhina Ibiibiliya yoopacera utaphuleliya niiluuka ikereeku, nipuro nineera “otheene caya” waataphuleliya “hiiva” ikwaha piili para woonihera wiira anaaciya aswali ookhuluvelya a Nluku anhuvihiya naatthu oohiloka. Vano wiimaleloni, iveerusu 7 ineera wiira “otheene caya,” yaaciyaka aswali ookhuluvelya, anaahala ukhikiceriya wiira ahipankiye pusya naatthu oohinamaana. (Isaa. 12:7, 8) Ibiibiliya yantikhiye niiluuka Aramaico ineera co nhina iveerusu 7: “Nyuuva PWIIYA nnaahala waakhikicera atthu aneettela isariya. Nnaahala waakhikicera wiira ahipankiye pusya naala atthu oohinamaanaala.” Ayo moolumwaayo anoonihera wiira Isaalimu 12:7 khinaaca ukhikiceriya moolumo a Nluku.
Phimaana, pooti waneereehu wiira iyo Isaalimwiiyo inaanivaha niweherero wiira Nluku naahala uwaakiha “atthu ookhuluvelya.”
