MWAHA WOOSOMIYA 20
Mananna oolompa saana
“Munhimerye irineenyu wanrimani.”—ISAA. 62:8.
NCIPO 45 Os Pensamentos do Meu Coração
NINHALA WIITTHUCANI? a
Hiiva pooti wammoopaneehu mwaha Yehova ninlompaka ukati umpheeleehu ni pooti wanonlepeleehu ikano nhina citthu cotheene co muukumini wihu (Nwehe iparaagarafu 1)
1. Isiyani Yehova impheelaawe wiira aswalyaawe apanke? (Nwehe ciicammo ilatarato.)
NYUUVA mwapheelaka umaalihiya ni ulepela ikano nnomwaavya pani? Hi ninaacuwela waakhuliya waya nno nikohonno. Hiiva pooti wanomphiyeereehu Nluku Yehova nilompaka, ni iyo phi itthu impheelaawe wiira nipanke. Uyo nopheela wiira ‘nilompe woohihiyerera’ awula khula ukati. (1 Atesal. 5:17) Hiiva pooti wanonlompeehu Yehova ukati umpheeleehu ninlepelaka ikano nhina wo khula itthu nimpheeleehu upanka muukumini wihu. (Miru. 3:5, 6) Yehova khweeliini khanle Nluku namavaha. Ninkupali iyo nlattu wo itthu niirenlyaawe wiira hiiva pooti wanlompeehu ikwaha cotheene nimpheeleehu.
2. Isiyani ninhaleehu woona nhina ula mwahoola?
2 Ulompa ikhanle itthuvo yootepa ureera nivahiyeehu. Masi, nlattu wo makhalelweehu o khula nihuku, pooti unirikela ukumiha ukati wiira nilompe ni nyuuva pooti woona wiira nhaana mwaavyaka mananna oolompa saana. Wootteeliha nrima, Ibiiblya inaanikavihera ucuwela mananna oopanka iyo itthwiiyo. Nhina ula mwahoola, ninaahala woona manannani hiiva ninlamuliyeehu ukumiha ukati wiira nilompe nittharaka ntakihero na Yesu. Ciicammo, ninaahala woona citthu 5 ninlamuliyeehu wuuluma ukati woolompa wiira nilompe saana.
YESU ANKUMIHA UKATI WIIRA ALOMPE
3. Isiyani Yesu yaacuwelaawe nhina ulompa?
3 Yesu ancuwela wiira Yehova naavaha ifayita ulompa. Hinawa va watuninyani va Yesu anwoona athumwaane yaakhulaka ulompa waalopwana ni athiyana ookhuluvelya. Wootakihera, Yesu ahoona waakhuliya ulompa wa Ana, Davidi, Eliyasi ni ciicammo atthu akiina. (1 Sam. 1:10, 11, 20; 1 Mam. 19:4-6; Isaa. 32:5) Phimaana, Yesu ahowiitthuciha attharyaawe ulompa akhuluvelaka wiira Yehova anhala uwaakhula!—Mat. 7:7-11.
4. Ntakiheroni Yesu nihiyenryaawe?
4 Unlompa wawe Yehova, Yesu honihiyera ntakihero nooreera utthara. Ukati waavaraawe miteko cawe va watuninyani va, uyo anlompa woohihiyerera. Yesu anseelela ukati wiira alompe, kontha khaakhalana ukati mwinci ni aakhala iriyari yaatthu enci. (Mark. 6:31, 45, 46) Uyo onwa uwicisu wiira akhale veekha ni alompe. (Mark. 1:35) Ikwaha imoca, hotoko ulompa uhiyu mmoca nteru hinalakela itthu yoohala upanka. (Luka 6:12, 13) Ni uhiyu waya nihuku naavariyaawe, acuwelaka wiira waahaleela vakaani uphiya ukati waahalaawe uvira masakha oorika nhina nteko waavahiyaawe uvara, Yesu aholompa ikwaha cinci.—Mat. 26:39, 42, 44.
5. Manannani ninlamuliyeehu untakiha Yesu nhina ulompa?
5 Ntakihero na Yesu ninniitthuciha wiira hataa nihikhalanaka ukati mwinci, nihaana ukumiha ukati vakaani wiira nilompe. Khampa Yesu, nihaana upankela iporokaraama ulompa, atthunaka wunwa uwicisu awula ukati woorwaa urupa. Napankaka iyo, ninaamoonihera Yehova wiira ninaavaha ifayita itthuvo inivahilyaawe yoolompa. Anuunwiihu aneehaniya Lynne anawuupuwela mananna ceeconnyaaya ukati weetthucilyaaya ifayita yoolompa. Ayo aneera: “Ukati waacuwenlyaaka wiira pooti waamuulumanaaka Yehova iwoora impheelaaka, kahopacera umoona Yehova khampa mpatthannyaaka ni nlattu wo iyo itthwiiyo, mi kampheela ulompa saana.” Khweeliini, otheene cihu nineecoona ciicammo. Nttwee noone vano citthu 5 ninlamuliyeehu wuuluma ukati woolompa.
CITTHU 5 COFAYITA NNOLAMULIYEENYU WUULUMA UKATI UNLOMPEENYU
6. Toko cinhimyaaya Apokalipise 4:10, 11, isiyani Apaapeehu Yehova inaaphwanela waakhela?
6 Munttottopele Yehova. Joau ahokhalana iwooni yootikhiniha, ukati waawonnyaawe wiirimu mahumu 24 yanswalelaka Yehova. Ayo yaanonttottopela yiiraka wiira uyo waanomphwanela “uttitthimihiya, uhisimiya ni ukhalana ikuru.” (Nsome Apokalipise 4:10, 11. b) Malayikha ookhuluvelya ciicammo ahaana isariya yoopheela unttottopela ni unhisima Yehova, ayo ari wiirimu nkhayi nuuyo ni anancuwela saana. Ayo malayikhaayo anaacuwela ikhalelo ca Yehova nlattu wo citthu cotheene cimpankaawe ni yaweheehaka citthu cumpilyaawe cotheene, ayo anaapheela unttottopela.—Jó 38:4-7.
7. Nlattuni hiiva ninonttottopeleehu Yehova?
7 Hiiva ciicammo, nimpheela unttottopela Yehova ukati ulompeehu, ninhimeryaka nlattu hiiva ninontikhinaceehu ni ninonhisimeehu. Ukati unsomeenyu Ibiiblya, mmananihe ucuwelela makhaleloni a Yehova nyuuva anoocivelani venci. (Jó 37:23; Aroo. 11:33) Vano munhimerye Yehova nlattuni nyuuva anoocivelaayani ayo makhalelwaayo. Mananna makiina onttottopela Yehova, ukhanle unsukhurweela cinene nlattu wo citthu cotheene nonipankelaawe ni cinaapankelaawe mayamunneehu. Yehova naaniwacera ni naanikhikicera.—1 Sam. 1:27; 2:1, 2.
8. Isariyani inlamuliya uniiriha unsukhuru Yehova? (Nwehe 1 Atesalonika 5:18.)
8 Munsukhurweele Yehova. Hi nihaana isariya yonsukhuru Yehova ukati unlompeehu. (Nsome 1 Atesalonika 5:18. c) Hiiva pooti wanonsukhurweeleehu Yehova nlattu wo citthu cotheene cirineehu, kontha citthu comaana cotheene nirineehu uyo phinnivaha. (Tiya. 1:17) Wootakihera, hi pooti wanonsukhurweeleehu nlattu wo citthu cotheene umpilyaawe. Pooti wammwiireleehu wiira ninansukhurweela nlattu wookumiihu, waamuciihu, waasipatthaniihu ni nlattu wo niweherero nivahilyaawe noohoolo. Ni khweeliini nimpheela unsukhurweela Yehova nlattu woparakha inivahilyaawe yookhala asipatthannyaawe.
9. Kontha isiyani hiiva khaninlamuliya uliyala unsukhurweela Yehova?
9 Atthunaka hiiva nihaana niikurumicaka wiira nikhitiri wuupuwela citthu cotheene cinniiriha unsukhuru Yehova. Kontha, atthu enci ilelo khansukhuru. Ayo anaaviriha ukati mwinci yiikurumicaka wiira akhitiri ukhalana citthu cimpheelaaya, uhiya woonihera usukhuru nlattu wo citthu cirinaaya. Hiiva natakihaka ayo meettelwaayo, ulompa wihu unhala ukhala paahi ulepela. Wiira iyo ihiirannye, nihaana niikurumicaka wuupuwela ni usukhuru citthu cotheene Yehova cinipankenlyaawe.—Luka 6:45.
Unsukhurweela Yehova nlattu wo citthu cinnivahaawe pooti unikavihera uvilela (Nwehe iparaagarafu 10)
10. Manannani woonihera usukhuru waakavihenryaaya anuunwiihu uvilela masakha yaananaaya? (Nwehe ciicammo ilatarato.)
10 Ukhala atthu oosukhuru pooti unikavihera waanana masakha annikhumelela. Moone ntakihero nimoca naanuunwiihu aneehaniya Kyung-sook, nhina irevista Ukhalenla 15 yo Janeiro yo 2015, yeekunya. Mameetiku yahowiirela wiira yahaana iretta ineehaniya cancro yo mmaphavelani. Ayo aheera: “Ucuwela wiira kihaana iyo iretteeyo wahokiwerya cinene. Waakhanle khampa wiira ukumyaaka wahomalela ni kahoova cinene.” Isiyani yaakavihenre ayo anuunwaayo waanana ayo masakhaayo? Ayo aheera wiira uhiyu ahinarwaa urupa yankhumela mpirothi ni yanlompa yakumiheraka ncu naya vate, yansukhurweelaka Yehova citthu 5 caakhumelenle nenno nihukunno. Vano yamalihaka ulompa, ayo yaaneecona saana nlattu wonhimerya Yehova mananna canfentaaya. Ayo yahocuwelela wiira Yehova nawaafenta aswalyaawe ookhuluvelya yakhalaka nimasakha oorika ni wiira nihaana iparakha cinci uvikana masakha annikhumelela. Khampa anuunwiihu Kyung-sook, hi nihaana isariya yonttottopela Yehova hataa ukhala wiira ninaanana masakha ula ukatyuula. Ninsukhuru Yehova nlattu woonikavihera ukhala oomaala ni oovilela ala mahukwaala.
11. Kontha isiyani atthari a Yesu yahaana yalipaka nrima ukati waaturuwenlyaawe wiirimu?
11 Munlepele Yehova wiira nlipe nrima wiira nlalyeere. Mahuku vakaani Yesu hinaturuwela wiirimu, ahowiirela attharyaawe wiira alalyeere ihapari comaana “u Yerusalemu, u Yuuta wotheene ni u Samariya, ni mpaka micoko coottayi nviralyaaya ituninya.” (Mite. 1:8; Luka 24:46-48) Uvira waya mahuku vakaani, ahooleli ayuuta yahaatthuka maapostolu Peturu ni Joau ni yahaacisa mpaka utiripunaali ya ayuuta. Ayo yahaateelihiya ulalyeera ni yahoopopihaciya. (Mite. 4:18, 21) Isiyani Peturu ni Joau yaakhunlyaaya?
12. Toko cinhimyaaya Miteko 4:29, 31, isiyani atthari a Yesu yaapankilyaaya?
12 Peturu ni Joau ukati woopopihaciyaaya naahooleli, ayo yahowaakhula co: “Nhukhumu mwaasineeneenyu, wakhala wiira ikhanle itthu yomaana, uhoolo wa Nluku, uwiiwelelani nyuuva uhiya umwiiwelela Nluku. Hiivano, khaninlamuliya uhiya wuuluma citthu coonaleehu ni ciiwaleehu.” (Mite. 4:19, 20) Ukati Peturu ni Joau waatthukuliyaaya, atthari yahonlompa Yehova yanlepelaka wiira yaakavihere urwaanela uhoolo upanka itthu inoncivela uyova. Ayo yaholompa co: “Yehova woone cootakhala cinhalaaya unipanka ni unilipihe nrima wiira nihihiye ulalya moolumwaa.” Yehova ahaakhula ayo mavekelwaayo.—Nsome Miteko 4:29, 31. d
13. Isiyani yiitthucenreehu ntakihero na munna Jin-hyuk?
13 Wakhalaka wiira ahooleli ookuvernu anaanaateeliha ulalya ihapari comaana, hi pooti waatakiha maapostolu. Hi khaninhiya ulalya hataa yanihiihaka. Iyo phi itthu yankhumelenle munna mmoca neehaniya Jin-hyuk. Uyo ahotthukiya nlattu woohiikelakeliha isiyaasa. Ukhattya waatthukeliyaawe, uyo ahaana aawaceraka maperesu akiina yaari isaala yo veekha. Uyo eereliye wiira aahala uwuulumana ayo mapereswaayo paahi yapheelaka itthu. Uyo aanaateelihiya wuuluma hataa myaha co mbiiblyani. Uyo ahonlompa Yehova wiira akhalane moopuwelelo omaana ni wiira akhitiri ulalyeera ihapari comaana. (Mite. 5:29) Uyo munnooyo heera: “Yehova ahaakhula ulompa waka akivahaka ulipa nrima ni ucuwelaca. Mi kahopacera usomiha Ibiiblya wankhorani waya isaala cookhattya. Vano uhiyu, kaanantikhaka iwarakha yaahalaaka waavaha maperesu wasaaka.” Hiiva ciicammo pooti ulompa nilepelaka ulipa nrima ni ucuwelaca ni, khampa munna Jin-hyuk, pooti wankupaliihu wiira Yehova naahala unikavihera ulipa nrima ni ulalyeera.
14. Isiyani inhala unikavihera waanana masakheehu? (Nwehe Isaalimu 37:3, 5)
14 Munlepele Yehova ucuwelaca wiira nkhitiri waanana masakheenyu. Hiiva otheene cihu ninawaanana masakha oorika, kahi paahi o mwiirutthuni wihu, masi ciicammo o mmupuweleloni wihu. Atthu akiina ahookhweliya, akiina anawaanana masakha watthokoni, akiina anaalupatthiya awula ahaana masakha makhwaawe oorika. Ni wiira watepe, citthu toko iretta coomwaryeela ni ikhotto cinaatepa uniwaanela masakha. Phimaana munhulele nrimeenyu Yehova ni munhimerye citthu cotheene cinoovirani, khampa nnomuulumana mpatthaniinyu. Munkhuluvele Yehova, uyo naahala wuukaviherani.—Nsome Isaalimu 37:3, 5. e
15. Manannani ulompa unnikaviheraaya uvilela masakha arineehu? Ntakihere.
15 Itthu inhala unikavihera ‘uhihiya uvilela ukati wo masakha’ ukhanle uhihiyerera ulompa. (Aroo. 12:12) Yehova naacuwela itthu inaavira aswalyaawe ookhuluvelya. Uyo “nawiiwa ulepela waya ukaviheriya.” (Isaa. 145:18, 19) Anuunwiihu Kristie, apiyoneera arina myaakha 29, ahoona wiira iyo itthwiiyo ikhweeli. Ayo yahopacera uweryaaciya ni iyo itthwiiyo yahowiiriha ukhala oocukulaca. Ni wahoolo waya, ayo ahoonenela wiira anumwanaya ciicammo yahaana iretta yoohivoniya. Anuunwiihu Kristie aheera: “Mi kaanonlompa Yehova khula nihuku wiira kikhitiri waanana masakha yaarinaaka. Uhiya commo, akaahiyerenre woona mikutthaano cotheene ni upanka usoma wo veekha. Ulompa phikikavihenre uvira ale mahuku oorikaale. Mi kankupali wiira Yehova aari ni mi, ni nlattu wowuupuwela iyo itthwiiyo, kankhala oomaala. Iretta yaarinaaka khayaavinre, masi mi kahocuwelela wiira Yehova anaakhula ulompa waka. Iyo yaari itthu yaakivaha nnema ni yaakimaaliha.” Hi nihaana nuupuwelaka wiira “Yehova naakhitiri uwoopola ale anonswalela ari mmasakhani.”—2 Pet. 2:9.
Wiira nkhitiri uvilela uttehiya, (1) nlompe nlepelaka ukaviheriya ni Yehova, (2) mwiikurumice weettela itthu ilepenleenyu ni (3) nlipihace upatthaniinyu ni Yehova (Nwehe iparaagarafu 16-17)
16. Kontha isiyani nimpheeleehu ukaviheriya ni Yehova wiira nikhitiri uvilela uttehattehiya?
16 Munlepele Yehova wiira nkhitiri uvilela uttehattehiya. Hiiva nikhanle atthu oopahuwa, phimaana nihaana niikurumicaka wiira nihipanke itthu yootakhala. Sotwani naahala upanka yotheene inkhitiryaawe wiira anirikarikihele umwiiwelela Yehova. Itthu imoca invarelaawe nteko akhanle mathukelo oorupihaniya woohiloka. Ayo mathukelwaayo pooti uniiriha ukhalana moopuwelelo oohinamaana ni pooti unipankiha uvara itampi yuulupale ni umalamaliha upatthaniihu ni Yehova.—Mark. 7:21-23; Tiya. 1:14, 15.
17. Nalompaka nilepelaka ukaviheriya ni Yehova, isiyani inlamuliyeehu upanka? (Nwehe ciicammo ilatarato.)
17 Napheelaka utthema uttehattehiya wiira nipanke itthu yootakhala, nihaana ukaviheriya ni Yehova. Nhina ulompa waawiitthucihilyaawe attharyaawe, Yesu ahohela nhina iyo itthwiiyo: “Nhinihiye nimoraka ukati unttehiyeehu, masi nnoopole mmatatani wa Ntakhali.” (Mat. 6:13) Yehova naapheela unikavihera, masi hiiva ciicammo nihaana ninlepelaka wiira anikavihere ni nihaana neettelaka itthu inlepeleehu. Nihaana upanka yotheene inkhitiriihu wiira ninyeme moopuwelelo oohiloka o ntuninyani ya Sotwani. (Isaa. 97:10) Nasomaka ni noopuwelaka itthu insomeehu, ninaacariha mmuru wihu moopuwelelo omaana ni ooreera weettela. Urwaa umikutthaanoni ni wuulalyeerani unaahala ukhikicera moopuwelelweehu. Vano Yehova naahala upanka itthu ikhuluvelihilyaawe yoohinihiya naananaka masakha ahinkhitiriihu.—1 Akor. 10:12, 13.
18. Isiyani otheene cihu ninlamuliyeehu uhihiyerera upanka?
18 Otheene cihu nihaana nihihiyaka ulompa wiira nihihiye unvaresesa Yehova ala mahuku oorika ni ookhiceraala. Nkumihe ukati khula nihuku wiira nlompe. Yehova nopheela wiira ninlompe ni ninhimerye inniira wanrimani wihu. (Isaa. 62:8) Munsukhuru Yehova ni munttottopele nlattu wo citthu cotheene uyo cimpankaawe, munlepele wuukaviherani wiira nkhalane oolipa nrima wuulalyeerani. Nhihiyerere ulompa wiira nkhitiri waanana marikariko arineenyu ni wiira nkhitiri uvilela mwattehattehiyaka. Nhinhiye hataa ntthu oohiihakani nyuuva unlompa Yehova. Masi manannani Yehova naakhulaawe ulompa wihu? Waakhuliya waya nna nikoho nofayitanna ninhala woona nhina mwaha unttharana nuula.
NCIPO 42 A Minha Oração a Jeová
a Nimpheela wiira ulompa wihu ukhale khampa iwarakha nimmwantikheleehu mpatthaniihu ninonfenteehu. Uhookhalaru commo, ukati nkiina pooti unirikela ukumiha ukati wiira nilompe ni pooti unirikela wuupuwela itthu yoohala wuuluma ukati woolompa. Nhina ula mwahoola, ninaahala wuuluma iyo itthu yofayiteeyo.
b Apokalipise 4:10 Ni mahumu 24 ahokhoroma uhoolo wawe Ule onkomile wahiceni, ananswalela Ule nokhala ukati wotheene ni anaattikhela uhoolo wohice ikofiyo caya ceemwene, yiiraka: 11 “Thi weeva Yehova Nlukwiihu, unoophwanela uttitthimihiya, uhisimiya ni ukhalana ikuru, kontha uhumpa citthu cotheene ni nlattu wawaa cihokhumelela ni cihumpiya.”
c 1 Atesalonika 5:18 Nsukhuru citthu cotheene. Iyo phi itthu Nluku inoopheelelannyaawe iriyari wa Yesu Kristu.
d Miteko 4:29 “Vano, Yehova, woone cootakhala cinhalaaya unipanka, ni unilipihe nrima wiira nihihiyerere ulalya moolumwaa.” Umaliha waya ulompa, nipuro naathukumannyaaya nahottettemela. Ayo wahaacara nnepa wowaarya ni yahancera ulalya nuulumo na Nluku yalipaka nrima.
e Isaalimu 37:3 Unkhuluvele Yehova ni upanke citthu comaana; ukhale watuninyani ni ukhale ookhuluvelya. 5 Unhiye Yehova oohoolele; unkhuluvele ni uyo naahala wuukavihera.
