MWAHA WOSOMIYA 21
Manannani Yehova cinaakhulaawe ulompa wihu?
“Ninaacuwela wiira ninaahala ukhalana citthu cilepenleehu, ukhala wiira ninlepenle uyova.”—1 JO. 5:15.
NCIPO 41 “Ouve a Minha Oração”
NINHALA WIITTHUCANI? a
1-2. Isiyani atthu akiina aneekohaaya?
NYUUVA nhotoko utikhinaca wakhala wiira Yehova nawaakhulaka ulompa winyu? Wakhala wiira nhopaca, khanri veekha. Mayamunna enci ahohimya wiira ahopaca wiicoona commo, venci-venci yaaphwanyaka masakha. Yakhumelelaka iyo itthwiiyo, atthunaka pooti unirikela ucuwela wakhala wiira Yehova nawaakhula ulompa wihu.
2 Ula mwahoola ninaahala woona kontha isiyani hiiva ninlamuliyeehu ukhuluvela wiira Yehova nawaakhula ulompa waaswalyaawe. (1 Jo. 5:15) Ciicammo, ninaahala waakhula ala makohwaala: Kontha isiyani ikwaha ikhwaawe hiiva ninawuupuwelaka wiira Yehova khanaakhula ulompa wihu? Ni manannani Yehova naakhulaawe ulompa wihu ilelo?
YEHOVA KHANAAKHULA ULOMPA WIHU IKWAHA COTHEENE KHAMPA CINWEHEREREEHU
3. Kontha isiyani Yehova nopheelaawe wiira hiiva ninlompe?
3 Ibiiblya inaanikhuluveliha wiira Yehova naanifenta venci ni wiira nonoona ukhala ofayita venci cinene. (Ageu 2:7; 1 Jo. 4:10) Phimaana, uyo naanilepela wiira nimphiyeere nilompaka. (1 Pet. 5:6, 7) Yehova naapheela venci cinene unikavihera wiira nimphiyeere uyova ni nikhitiri waanana masakha annikhumelela muukumini wihu.
Yehova ahaakhula ulompa wa Davidi ukati waamooponlyaawe wiira hipankiye pusya naamwiinannyaawe (Nwehe iparaagarafu 4)
4. Nincuwela cani wiira Yehova nawaakhula ulompa waaswalyaawe? (Nwehe ciicammo ilatarato.)
4 Mbiiblyani ninaaphwanya ihantisi cinci co mananna Yehova caakhunlyaawe ulompa waaswalyaawe. Nyuuva nnaakhitiri wuupuwela ntakihero nimoca? Atthunaka nyuuva nhoopuwela ntakihero na mwene Davidi. Muukumini wawe, uyo ahowaanana amwiinannyaawe, ni ikwaha cinci aholepela ukaviheriya ni Yehova alompaka, ikwaha imoca uyo aholompa co: “Oo Yehova, wiiwe ulompa waka, uviriyane mavekelwaaka wiira ukikavihere. Ukaakhule nuukhuluvelya waa ni niisariyaa.” (Isaa. 143:1) Yehova ahaakhula ulompa wa Davidi ni ahomoopola ukati waalupatthiyaawe naawanannyaawe. (1 Sam. 19:10, 18-20; 2 Sam. 5:17-25) Phimaana, Davidi ahaana isariya yowiira: “Yehova ri wakhiviru waale anonswalela.” Hiiva pooti wankupaliihu iyo itthwiiyo.—Isaa. 145:18.
Yehova ahaakhula ulompa wa Paulu ukati wanvahilyaawe ikuru wiira avilele (Nwehe iparaagarafu 5)
5. Niireke wiira Yehova aanaakhula ulompa waaswalyaawe okhalayi nimananna caawehereraaya? Ntakihere. (Nwehe ciicammo ilatarato.)
5 Yehova atthunaka khanaakhula ulompa wihu khampa caaweherereehu. Iyo phi itthu atthunaka yaamwiirannyenle apostolu Paulu. Uyo ahonlepela Yehova wiira amalihe “mwiiwa wanhoma mwiirutthuni wawe.” Ikwaha tthaaru Paulu aholompa aromolaka iyo itthwiiyo. Niireke wiira Yehova ahaakhula ulompa wa Paulu? Iyee. Masi khaakhunle khampa Paulu caawehereraawe. Uhiya umaliha itafaawuti Paulu yaarinaawe, Yehova ahonvaha ikuru caapheelaawe wiira arweehele uhoolo ukhuluvelya wawe ni nteko wa Yehova waavaraawe.—2 Akor. 12:7-10.
6. Kontha isiyani ikwaha cikhwaawe pooti ukhalaka toko Yehova khanaakhula ulompa wihu?
6 Ikwaha cikiina, Yehova pooti uhaakhula ulompa wihu nimananna hiiva caaweherereehu. Masi, pooti wankupaliihu wiira Yehova naacuwela itthu impheeleehu hiivano. Uyo pooti “upanka citthu cuulupale cinene coopwaha khula itthu inkhitiriihu wuupuwela.” (Efesu 3:20) Phimaana, Yehova pooti waakhula ulompa wihu ukati ni nimananna hiiva nahaaweherereehu
7. Kontha isiyani atthunaka hiiva nihaana nirukunusaka itthu ninlepeleehu ukati unlompeehu? Ntakihere.
7 Hiiva nihaana nirukunusaka itthu ninlepeleehu ukati unlompeehu nacuwelelaka isiyani impheelaawe Yehova. Moone itthu yaakhumelenle amunna Martin Poetzinger. Mahuku vakaani anathenle, amunna Martin yahotthukiya nipuro yaarwaaniyaaya atthu yaatthukiya niipartiitu Nazi. Wiipaceroni, ayo yaholompa yanlepelaka Yehova wiira aakumihe nipuro naatthukeliyaaya wiira ayo yaawacere amwaaraya ni arwaanele uhoolo nteko woolalyeera. Masi, cinavinreene isumana piili, wahoonannyaa wiira iyo itthwiiyo khayaari yootthuna ya Yehova. Vano, ayo yahopacera ulompa, yiiraka co: “Pwiiya Yehova, sontte nkoonihere isiyani inkipheeleleenyu.” Vano, ayo yahopacera uwuupuwela mayamunna akhwaawe ciicammo yaatthukiye nipuro naaryaaya. Mayamunna enci yaatthukiye yaari niiwasiwaasi nlattu waasaaraya ni asaanaaya. Wahoolo waya, amunna Martin yaholompa: “Pwiiya Yehova, kihoosukhuruni nlattu wo nteko wonaanaano ukivahileenyu wo waalipiha mayamunnaaka nna nipuronna. Sontte, nkikavihere waalipiha.” Ni ayo amunnaayo yahoviriha myaakha 9 yapankaka iyo itthwiiyo!
8. Isiyani hiiva ninlamuliyeehu wuupuwela ukati unlompeehu?
8 Hiiva nihaana nuupuwelaka wiira Yehova naahala upanka impheelaawe ukati uyova ulakenlyaawe. Iyo inhela nhina umalamalihiya masakha otheene anniwaanela uhuva, ihasara, iretta ni ukhwa. Ni Yehova naahala upanka itthu impheelaawe yoowaana umwennyaawe. (Dan. 2:44; Apoka. 21:3, 4) Masi, nihinaaya uphiya nno nihukunno, Yehova nanhiya Sotwani wiira ahoolele ituninya. b (Joau 12:31; Apoka. 12:9) Unari wiira Yehova ahomaliha masakha aapinaatamu ilelo, waahala ukhala toko wiira ikuvernu ya Sotwani phiri yomaana. Phimaana, iyo itthwiiyo inthoonyera wiira nihaana ninwehereraka Yehova upanka citthu cikhuluvelihilyaawe. Masi iyo khimpheela uhimya wiira Yehova naanihiya woohinikavihera. Nttwee noone mananna Yehova nonikaviheraawe ilelo.
MANANNA YEHOVA CINAAKHULAWE ULOMPA WIHU ILELO
9. Manannani Yehova nohalaawe unikavihera napheelaka ulakela itthu yofayita? Moopele mwaha ihantisi yo mparaagarafuni.
9 Yehova naanivaha ucuwelaca. Yehova naanikhuluveliha wiira naahala univaha ucuwelaca wiira nilakele citthu comaana. Ni hiiva ninaapheela ucuwelaca wawe ukati unlakeleehu citthu cofayita muukumini wihu, toko ukati woolakela ukhala athupa awula uthela. (Tiya. 1:5) Moone ihantisi yaanuunweehu amoca athupa aneehaniya Maria. c Ayo yaavara nteko weepiyoneeru owiicaaverya. Vano, yahoncuwela munna mmoca. Ayo aneera: “Mi ni uyo nahopatthanaca ni nuukatyaaya nahopacera ucivelana. Mi kancuwela wiira kahaana kilakelaka itthu yoohala upanka. Phimaana, mi kahonlompa venci Yehova. Mi kaapheela wiira Yehova akihoolele, masi ciicammo kancuwela wiira uyo khaahala ukilakelela itthu yoopanka.” Anuunwiihu Maria ahoona wiira Yehova ahaakhula ulompa waya yalepelaka ucuwelaca. Manannani? Ayo yahototha ucuwela ratta uyo mwahooyo nhina ilivuru cihu, ni yahokhitiri uphwanya myaha caakavihenre ucuwela citthu caarikarika. Ayo ciicammo yaheewelela ikano caavahiyaaya naanumwanaya. Citthu cotheene nnyo cahaakavihera anuunwiihu wuupuwela saana nhina citthu cotheene caapheelaaya. Uhoolo waya, ayo yahokhitiri ulakela upanka itthu yomaana.
Manannani Yehova nonivahaawe ikuru nimpheeleehu wiira nivilele? (Nwehe iparaagarafu 10)
10. Toko cinhimyaaya Afilipo 4:13, isiyani Yehova impankaawe wiira aakavihere aswalyaawe? Ntakihere. (Nwehe ciicammo ilatarato.)
10 Yehova naanivaha ikuru wiira nikhitiri uvilela. Khampa cankavihenryaawe apostolu Paulu, Yehova naanivaha ikuru wiira nikhitiri uvilela masakha otheene annikhumelela. (Nsome Afilipo 4:13. d) Moone mananna Yehova cankavihenryaawe munna mmoca neehaniya Benjamin waanana marikariko yaarinaawe. Benjamim hoviriha ukati mwinci nari mmirawo nkhayi naamucyaawe yakhalakhalaka mapuro yaakhalaaya atthu yaatthawa ikhotto u África. Benjamin heera: “Mi kaanonlompa Yehova, kanlepelaka ikuru wiira akikavihere upanka itthu yomaana wamiithoni wawe. Yehova ahaakhula ulompa waka akikaviheraka wiicoona ukhala munnemani, akivahaka ulipa nrima wiira kilalyeere ni ciicammo akivahaka ilivuru cihu caakilipiha mminepani. Usoma ihantisi co mayamunna makhwaawe ni ucuwela wiira ahaakavihera wahokikavihera miiva ulakela uhihiya unvaresesa.”
Yehova hopaca wuukaviherani aavarelaka nteko mayamunneenyu? (Nwehe iparaagarafu 11-12) g
11-12. Manannani Yehova cinaavarelaawe nteko mayamunneehu wiira aakhule ulompa wihu? (Nwehe ciicammo ilatarato.)
11 Yehova nawaavarela nteko mayamunneehu wiira anikavihere. Uhiyu woomalela hinaaya ukhwa,Yesu aholompa cinene. Yesu khaapheela wiira atthu yuupuwele wiira uyova ahonanariha ncina na Nluku. Phimaana, uyo ahonlepela Yehova wiira hihiyerere iyo itthwiiyo yiirannyaaka. Masi uhiya upanka itthu Yesu yaalepenlyaawe, Yehova ahoveleeliha nlayikha wiira ninlipihe. (Luka 22:42, 43) Yehova ciicammo pooti unikavihera anvarelaka nteko munna wiira anilikarele awula anithotole wiira anilipihe. Khweeliini, otheene cihu pooti upheelaca ukati wiira nivahe “moolumo omaana” awula wiira naalipihe mayamunneehu.—Miru. 12:25.
12 Moone itthu imoca yaawiirannyenle anuunwiihu aneehaniya Miriam. Uvira waya isumana vakaani awannyaya anakhwile, anuunu Miriam yaari veekha uwannyaya, yaari ooriipiya nrima ni yeecoona ukhala veekha. Ayo yaanaaviriha ukati mwinci yunlaka. Ciicammo, ayo yaanompheela ntthu wiira amoopane mwaha. Ayo aneera: “Mi akaakhitiri unlikarela ntthu, phimaana kahonlompa Yehova. Ukati kunlaaka ni ciicammo kilompaka, telefoonnyaaka ahoruma. Aari humu mpatthannyaaka cinene.” Anuunu Miriam yaheecoona ukhala oolipihiya nlattu wookaviheriya nuuyo humuuyo ni amwaarawe. Anuunu Miriam anaakupali wiira Yehova phanrumale uyo humuuyo wiira aalikarele.
Manannani Yehova naavarelaawe nteko ale ahinonswalela wiira anikavihere? (Nwehe iparaagarafu 13-14)
13. Nttonkace ihantisi inoonihera wiira Yehova pooti waavarela nteko atthu ahinonswalela wiira aakhule ulompa wihu.
13 Yehova pooti waavarela nteko atthu ahinonswalela wiira anikavihere. (Miru. 21:1) Ikwaha cikhwaawe, Yehova pooti waakhula mavekelweehu aapankihaka atthu ahinonswalela wiira anikavihere. Wootakihera, Yehova ahomwiiriha mwene Artaxerxes untthunihera Nemiya uturuwela u Yerusalemu wiira akavihere utekiya isittatti. (Nem. 2:3-6) Ilelo ciicammo, Yehova pooti waapankiha atthu ahinonswalela upanka itthu imocaaru.
14. Itthu yaawiirannyenle anuunwiihu Soo Hing yuulipihaleni cani nyuuva? (Nwehe ciicammo ilatarato.)
14 Anuunwiihu amoca aneehaniya Soo Hing yahoona mananna Yehova caakavihenryaaya anvarelaka nteko meetikwaaya. Mwaamwanaya cinanwerya iretta cinci co mmuru. Waapankilyaaya asitente, ayo naawannyaya yaholakela uhiya miteko caya wiira anwacere mwanaya. Nlattu wo iyo itthwiiyo, ayo yahopacera uhuvahuva wapuwani. Anuunu Soo Hing aheera wiira yahoocyaa nlattu wo iyo itthwiiyo ni khayaacuwela wakhala wiira yanhala ukhitiri uvilela. Masi ayo yahonlompa Yehova ninrimaaya wotheene yanlepelaka wiira aakavihere. Vano meetiku anwacera mwanaya aholakela waakavihera. Nlattu wo iyo itthwiiyo, anuunu Soo Hing ni awannyaya yahokhitiri ukaviheriya niikuvernu ni yahaaveriya inupa yoohala ukhala. Wahoolo waya, ayo aheera: “Hi nihoona ntata na Yehova nanikaviheraka. Uyo khweeliini khanle ‘Namwiiwelela ulompiya.’”—Isaa. 65:2.
WAAMINI UNAANIKAVIHERA WOONENELA NI UTTHUNA MANANNA YEHOVA CINAAKHULAAWE ULOMPA WIHU
15. Isiyani yaakavihenre anuunwiihu ucuwelela wiira Yehova aanaakhula ulompa waya?
15 Ikwaha cinci ulompa wihu khunaakhuliya nimananna nimpheeleehu. Masi mananna Yehova cinaakhulaawe ulompa wihu phi itthu hiiva impheeleehu wiira nihihiye unvaresesa. Phimaana, nhiitthaale wiira nkhitiri ucuwelela mananna Yehova cinaakhulaawe ulompa winyu. Anuunu amoca aneehaniya Yoko yooniha wiira Yehova khaakhula ulompa waya. Phimaana, ayo yahopacera wantikha citthu cotheene canlepelaaya Yehova. Uvira waya ukati vakaani, ayo yahoona wiira Yehova ahaakhula citthu cinci canlepenlyaaya, ni mpaka citthu caaliyanlyaaya. Phimaana, unaareera weemela ni wuupuwela mananna Yehova cinaakhulaawe ulompa wihu.—Isaa. 66:19, 20.
16. Manannani makhwaawe ninoonihereehu wiira nihaana waamini? (Nwehe Maberewu 11:6)
16 Hiiva ninawoonihera umwaamini Yehova nanlompaka, masi ciicammo natthunaka mananna cinaakhulaawe ulompa wihu, hataa uyo aakhulaka nimananna yahaaweherereehu. (Nsome Maberewu 11:6. e) Moone ntakihero na amunna Mike ni amwaaraya, Chrissy. Ayo yaheehelela mpika woopheela uvara nteko u Peteli. Ayo aheera co: “Hi nahantikha ipetisau myaakha cinci ni nahonlompa Yehova nlattu wo iyo itthwiiyo, masi khaneehaniya.” Amunna Mike ni amwaaraya yankupali wiira Yehova ancuwela mapuro yaahalaawe waaruma uvara ntekwaawe. Ayo yahopanka yaakhitiryaaya yavaraka nteko weepiyoneeru owiicaaverya mapuro yaapheeliya anamalalyeera ni yakaviheraka nteko wootekatekiya. Ilelo, ayo anvara nteko woothotola maloko. Amunna Mike ahoncerera, yiiraka: “Ikwaha cikiina Yehova khanaakhula ulompa wihu nimananna caaweherereehu, masi ikwaha cotheene ninlompeehu uyo nawaakhula ni pooti unaakhula nimananna yahuupuweleehu.”
17-18. Toko cinhimyaaya Isaalimu 86:6, 7, isiyani hiiva inlamuliyeehu ukhuluvela?
17 Nsome Isaalimu 86:6, 7. f Nasaalimu Davidi ankupali wiira Yehova aanaakhula ulompa wawe. Ni nyuuva ciicammo pooti wankhuluveleehu iyo itthwiiyo. Citthu coowiirannyeela mayamunneehu coonileehu nhina ula mwahoola cinaanikhuluveliha wiira Yehova pooti univaha ucuwelaca ni ikuru cimpheeleehu wiira nivilele. Uyo pooti waavarela nteko mayamunneehu ni ciicammo atthu ahinonswalela wiira anikavihere nimananna nahaaweherereehu.
18 Khweeliini, cihaavo ikwaha Yehova hinaakhulaawe ulompa wihu khampa cimpheeleehu, masi ikhweeli phi ila: uyo naahala waakhula ulompa wihu. Uyo naahala univaha itthu impheeleehu hiiva ukati umpheeleehu. Phimaana, nhihiyerere ulompa mooniheraka waamini wiira Yehova naahala wuuwacerani nenna co ni upeephoni naahala ‘waatteeliha nrima’ apinaatamu otheene.—Isaa. 145:16.
NCIPO 46 Obrigado, Jeová
a Yehova naanikhuluveliha wiira nawaakhula ulompa wihu. Nalompaka nimananna anoncivela, nakhalanakavale masakha pooti wankupaliihu wiira Yehova naahala unikavihera ukati umpheeleehu wiira nihihiye ukhala ookhuluvelya wamiithoni wawe. Nhina ula mwahoola, ninaahala woona mananna Yehova cinaakhulaawe ulompa wihu.
b Wiira ncuwele-tho kontha isiyani Yehova nonhiyaawe Sotwani alamulelaka ituninya, nwehe mwaha uneera: “Não se esqueça do que é mais importante” nrevistani Ukhalenla yo Junho yo 2017, yeekunya.
c Macina makiina ahaakakhanihiya.
d Afilipo 4:13 Citthu cotheene kinkhitiri nlattu wa ule nokivaha ikuru.
e Maberewu 11:6 Ciicammo, woohaamini khawankhitiryaa unciveliha Nluku, kontha ule nomwaattamela Nluku haana akupaliki wiira Nluku haavo ni nawaatthuva ale anontotha niikuru caya cotheene.
f Isaalimu 86:6 Mwiiwe ulompa waka, sontte Pwiiya Yehova, ni nkiviriyane sana-saana ukati unoolepelaakani ukikavihera. 7 Kinawuulompani nihuku ninsankaaka, kikhuluvelaka wiira nyuuva nnaahala ukaakhula.
g ILATARATO: Athiyana ni mwaamwanaya yaphiyaka ilapo ikiina untthawelaaya atthu antthawa ikhotto. Mayamunna ni mayanuunu anaawaakhelela ninifento ni anawaakavihera.
