MWAHA WOOSOMIYA 22
Nhihiye weetta “iphiro yowaarya”
“Nwo inaahala ukhala iparapaara, iyee, iphiro imoca inhala wiihaniya Iphiro Yowaarya.”—ISAI. 35:8.
NCIPO 31 Anda Sempre com Jeová
NINHALA WIITTHUCANI? a
1-2. Itthuni yofayita ayuuta yaalamuliyaaya ulakela anari u Babilooniya? (Nwehe Estra 1:2-4.)
MWENE ahohimya! Ayuuta yaatthukeliye myaakha 70 u Babilooniya, pooti waaturuwelaaya uwannyaya, ilapo yo Isarayeli. (Nsome Estra 1:2-4. b) Woohaakanyaca, Yehova phaahoolela iyo itthwiiyo. Kontha isiyani? Kontha ababilooniya khayaatthukula atthu yaatthukelaaya. (Isai. 14:4, 17) Ni nhooleli onaanaano o Babilooniya ahaaleva ayuuta wiira pooti waakhumaaya u Babilooniya. Phimaana, ayuuta otheene, venci-venci ale yaarina asaana, yahaana yalakelaka ukhuma u Babilooniya awula uhikhuma. Ulakela iyo itthwiiyo wahorika. Kontha isiyani?
2 Ayuuta enci yahooluvala, phimaana waanaahala waarikela uturuwela ilapo yo Isarayeli. Ayuuta enci yaayaryenle u Babilooniya ni iyo phi ilapo yaacuwelaaya ukhala uwannyaya. U Isarayeli yoona ukhala ilapo yaasithumwanaya awula yaasitaataaya ni yaasipiipyaaya. Ayuuta akiina atthunaka yahaana mihakhu cinci u Babilooniya. Phimaana, ayo yoona ukhala itthu yoorika uhiya inupa caya ni anakoswaaya wiira arwee nipuro nahaacuwelaaya ni wiira yapacere-tho upanka nnyo citthunnyo.
3. Kontha isiyani yaahalaaya ukhala itthu yomaana ayuuta ookhuluvelya uturuwela ilapo yo Isarayeli?
3 Ayuuta ookhuluvelya yoona ukhala iparakha yuulupale uturuwela ilapo yo Isarayeli ni yahotthuna uleva citthu cikhwaawe cotheene wiira ahihaleele iyo iparakheeyo. Ayo yuupuwenle wiira itthuvo yuulupale yaahalaaya waakhela waari unswalela Yehova. Uhookhalaru wiira u Babilooniya cahaavo itempulu 50 yaaswaleliya anluku oohikhweeli, khayaarivo hataa itempulu imoca waaswaleliyaawe Yehova, ni khayaarivo hataa ikhilompi yaahala uvareliya nteko wiira civahereriye itthuvo khampa caarumaaya malamulo Nluku yanvahilyaawe Moceesi. Ciicammo, u Babilooniya khayaarivo ikhurupu yoothotokanihiya yaanankuttho wiira avaherere itthuvo. Uhiya commo, apoovu a Yehova yaarukureeriye naatthu yahaahisima malamulo a Yehova. Phimaana, ayuuta ookhuluvelya yoona upica uphiya ukati wooturuwela uwannyaya, wiira yaturuwele uswali waya weekhweeli.
4. Isiyani Yehova yaakhuluvelihilyaawe ayuuta yaahala uturuwela u Isarayeli?
4 Ukhuma u Babilooniya ni urwaa mpaka u Isarayeli yaari itthu yoorika ni waahala ukhala nkwaha wo myeeri 4. Masi Yehova ahokhuluveliha wiira anhala umalamaliha citthu cotheene caahala waahiiha apoovwaawe uturuwela ilapwaaya. Porofeeta Isaiya hantikha co: “Ntthenkace nttala wa Yehova! Mumpankele Nlukwiihu iparapaara yowookwa muuthakoni . . . Itthaya yo malikitti inaahala ukhala yowookwa; ni itthaya yoohookwa inaahala wookwa.” (Isai. 40:3, 4) Muupuwele ila itthwiila: iriyari uthako, malikitti menci ni myaako yanhala ukhala iparapaara yowookwa. Atthu otheene yaahala uvira iyo iparapaareeyo wanhala waacivela cinene! Waahala ukhala nkwaha woohirikarika ni wowaakuva, ukhala wiira yaari iparapaara yowookwa ni khayaahala uwela ittuttu awula urukunuwaca wiira ahapuwe myaako.
5. Iparapaara ihimilyaawe Isaiya ivahiye ncinani?
5 Iparapaara co mahukwaala cinaavahiya ncina awula cinaakhalana nummeru. Iparapaara Isaiya ihimilyaawe ciicammo ihovahiya ncina. Isaiya 35:8 ineera: “Ni nwo inaahala ukhala iparapaara, iyee, iphiro imoca inhala wiihaniya Iphiro Yowaarya. Ntthu nopanka citthu coohinamaana khanhala uvira iyo iphirweeyo.” Manannani itthwiiyo ceeraneelyaaya ukati wa asarayeli? Ni kontha isiyani ikhanlyaaya itthu yofayita mahukweehwaala?
“IPHIRO YOWAARYA”—YO KHALAYI NI YO MAHUKWAALA
6. Nlattuni “Iphiro Yowaarya” ivahiyaaya nno ncinanno?
6 “Iphiro Yowaarya”—nno nikhanle ncina nooreera wiihaneliya iparapaara! Masi kontha isiyani iyo iphirweeyo ukhanlyaaya yowaarya? Iriyari ya ayuuta yaaturuwela ilapwaaya, khanaahala ukhala nipuro na ntthu oopanka citthu coohinamaana, toko urupihana woohiloka, waaswalela attontto awula itampi cikiina cuulupale. Ale ayuutaale yaahala ukhala “apoovu owaarya a Yehova.” (Deut. 7:6) Masi khweeliini, wiira antteelihe nrima Yehova, ayo yahaana yapankaka marukunuso.
7. Marukunusoni ayuuta akiina yaalamuliyaaya upanka? Ntakihere.
7 Toko coonileehu, ayuuta enci yahaayara asaana u Babilooniya ni atthunaka yaholamalela makhalelo o Babilooniya. Cinavinre myaakha 70 ayuuta oopacera anaturuwenle u Yerusalemu, Estra ahoonenela wiira ayuuta akiina yahaathela athiya olapo cikhwaawe. (Nkw. 34:15, 16; Estra 9:1, 2) Ni uhoolo waya, nhooleli Nemiya wahonrusa ukati waacuwenlyaawe wiira asaana asarayeli khayaacuwela wuuluma iluuka ya ayuuta. (Deut. 6:6, 7; Nem. 13:23, 24) Moolumo a Nluku menci yantikhiye niiluuka iheperewu. Vano ayo asaanaayo yaahala ukhitiri cani wiitthuca unswalela Nluku ni unfenta, yaahiiweke ni yaahuulumeke iluuka iheperewu? (Estra 10:3, 44) Unawoonannya wiira ayo ayuutaayo yahaana yapankaka marukunuso moolupale muukumini waya. Masi khawaahala waarikela upanka ayo marukunuswaayo yarwaaka ilapo yo Isarayeli, kontha naari nipuro waaturuseliyaaya uswali weekhweeli vakaani-vakaani.—Nem. 8:8, 9.
Ukhuma mwaakha wo 1919 alopwana, athiyana ni asaana imiliyacene anaakhuma Ibabilooniya Yuulupale ni ahopacera weetta “Iphiro Yowaarya” (Nwehe iparaagarafu 8)
8. Kontha isiyani itthu yaakhumelenle ayuuta myaakha cinci uttuli inaanaaca hiivano ciicammo? (Nwehe ilatarato yo wakaapani.)
8 Atthu akiina pooti wuupuwela co: ‘Ila ihantisiila ikhanle yomaana, masi niireke wiira hiiva ninaakela nhina itthu yaakhumelenle ayuuta myaakha cinci uttuli?’ Khweeliini, iyo ihantisiiyo inaanaaca hiivano ciicammo, kontha hataa nimananna makhwaawe hiiva ciicammo ninaweettela “Iphiro Yowaarya.” Hataa nikhalaka nhina ikhurupu yo makristau oothanliya awula nhina ikhurupu yo “ikhontwaa cikiina,” otheene cihu nihaana neettelaka “Iphiro Yowaarya.” Upanka commo unaahala unikavihera uhihiya unswalela Yehova nenna co ni ciicammo wahoolo, ukati unhaleehu waakhela iparakha co Umwene wa Nluku. c (Joau 10:16) Ukhuma mwaakha wo 1919, alopwana, athiyana ni asaana imiliyau cene aneera yakhumaka Ibabilooniya Yuulupale, awula ittiini cowootha, ni anaapacera upanka ikwaha yuulupale yeettaka mparapaarani yowaarya. Atthunaka nyuuva nri nhina ikhurupu yo ayo atthwaayo. Mwaakha wo 1919 phipaceriyaaya weettiya nhina iyo iphirweeyo, masi wahaana uvariyaka nteko mwinci uhinaphiya uyo mwaakhooyo.
UTHENKACIYA IPHIRO
9. Toko cinhimyaaya Isaiya 57:14, manannani “Iphiro Yowaarya” citthenkaciyaaya?
9 Yehova ahokhuluveliha wiira citthu cotheene caahala uwiiriha ayuuta uhikhuma u Babilooniya canhala umalamalihiya. (Nsome Isaiya 57:14. d) Niireke mahukwaala ihokhumelela itthu yoolattanaca ni “Iphiro Yowaarya”? Iyee. Myaakha cinci uhinaphiya mwaakha wo 1919, Yehova ahaavarela nteko alopwana ookhuluvelya wiira ukhitirye atthu akiina ukhuma Ibabilooniya Yuulupale. (Nwehe ciicammo Isaiya 40:3.) Ayo alopwanaayo yahotthenkaca iphiro wiira atthu ooreera nrima akhume ittiini cowootha ni answalele Yehova nkhayi naapoovwaawe. Masi ayo yaatthenkacile cani iyo iphirweeyo? Nttwee noone citthu caapankiye.
Alopwana ookhuluvelya yahokavihera utthenkaciya iphiro wiira atthu akiina akhume Ibabilooniya Yuulupale alopwana ookhuluvelya (Nwehe iparaagarafu 10-11)
10-11. Manannani nteko wo wimpirimiriya ni utaphuleliya Ibiiblya waakavihenryaaya atthu enci? (Nwehe ciicammo ilatarato.)
10 Nteko wo wimpirimiriya. Uhinaphiya mwaakha wo 1450, Ibiiblya yooneliya yantikhiyaka nimatata. Uyo ntekooyo wanvira ukati mwinci uvariyaka, phimaana caari Ibiiblya vakaani ni caanaatumihiya nsurukhu mwinci. Masi ukati wooneneliyaaya maakina owimpirimiri ilivuru, nteko woopanka ni wookawa Ibiiblya wahancera uhirika.
11 Nteko wootaphuleliya. Myaakha cinci uttuli, Ibiiblya cinci caaphwanyannya niiluuka ineehaniya latim. Masi atthu yaasomile icikola cuulupale paasi pheewa ni phooluma iyo iluukeeyo. Nteko wo wimpirimiriya ilivuru wahancera uhirika, phimaana atthu yaapheela unswalela Nluku yahovara nteko mwinci wiira ataphulele Ibiiblya niiluka coolumaaya atthu enci. Iyo itthwiiyo yahaakavihera atthu ulattaniha citthu ceetthucaaya mmakereeca niitthu Ibiiblya inhimyaaya.
Alopwana ookhuluvelya yahokavihera utthenkaciya iphiro wiira atthu akiina akhume Ibabilooniya Yuulupale alopwana ookhuluvelya (Nwehe iparaagarafu 12-14) f
12-13. Nttonkace ntakihero nimoca ninoonihera mananna anamasoma Ibiiblya caapacenryaaya uhimya citthu cowoothiya ceetthucihiya mmattiinini.
12 Ikaruma cinkavihera usoma Ibiiblya. Anamasoma Ibiiblya yaanaasoma Nuulumo na Nluku sana-saana, phimaana yaheetthuca citthu cinci. Ni itthu yaatepa waarusa ahooleli ottiini enci, ukhalaka wiira anamasoma Ibiiblya yaanaahimerya akhunanaya citthu ceetthucaaya. Wootakihera, mwaakha wo 1835 alopwana yaahisimu Nuulumo na Nluku yahokawa makhanta yaahimya citthu cowoothiya ceetthucihiya mmakereeca.
13 Uyo ukatyuuyo nlopwana mmoca aapheela unswalela Nluku weekhweeli eehaniya Henry Grew ahokawa nikhanta naahimya isiyani inonkhumelela ntthu akhwaaka. Ahooleli o mmakereeca yaholamalela wiitthuciha wiira ntthu noyariya ninnepa uhinkhwa. Avarelaka nteko Ibiiblya, Henry Grew ahoonihera wiira iyo itthwiiyo yaari yowoothiya ni wiira Nluku khanumpale wiira nikhwe. Mwaakha wo 1837, nhooleli ottiini neehaniya George Storrs aholokottha nikhanta nimoca nooluma nnyo myahannyo. Usoma wawe nno nikhantanno, uyo ahoona wiira ahophwanya ikhweeli yofayita cinene. Vano, uyo aholakela uwiitthuciha akhunanawe itthu yeetthucilyaawe. Mwaakha wo 1842, uyo ahotaphulela ikwaha cinci mwaha weera co: “Niireke wiira atakhali khankhwa?” Citthu caataphulenlyaawe George Storrs cahonvara nrima mmirawo mmoca eehaniya Charles Taze Russell.
14. Manannani amunna Russell ni atthu yaakavihera caaphwanyenryaaya ifayita nteko wootthenkaciya iphiro waavariye? (Nwehe ciicammo ilatarato.)
14 Manannani amunna Russell ni atthu yaakavihera caaphwanyenryaaya ifayita nteko wootthenkaciya iphiro waavariye? Nlattu wo uyo ntekooyo, amunna Russell ni atthu yaakavihera yahokhalana ikaruma caakavihenre ukati waasomaaya Ibiiblya, toko adicionariyu, índice yo moolumo o mbiiblyani ni Ibiiblya cikiina cootaphuleliya. Ni myaha co mbiiblyani coonelenlyaaya alopwana toko Henry Grew ni George Storrs ciicammo cahaakavihera. Amunna Russell ni atthu yaakavihera ciicammo yahokavihera utthenkaca iphiro ukati wantikhilyaaya ilivuru ni makhanta menci yooluma myaha co mbiiblyani.
15. Isiyani yaakhumelenle mwaakha wo 1919?
15 Mwaakha wo 1919, Ibabilooniya Yuulupale yahohiya waahoolela apoovu a Yehova. Uyo phi mwaakha upacenryaaya uvara nteko “ipottha yookhuluvelya ni yankhili,” yaakavihenre atthu upacera weettela “Iphiro Yowaarya.” (Mat. 24:45-47) Nlattu wo nteko wotheene uvariye wiira itthenkaciye “Iphiro Yowaarya,” ale anvira uyo nttalooyo ahoncerera uncuwela waya Yehova ni citthu cimpheelaawe. (Miru. 4:18) Ni ayo ahopanka marukunuso wiira yeettele ikano ca Yehova. Masi Yehova khawiirenle apoovwaawe wiira apanke marukunuso otheene wonkwaha mmoca. Uhiya commo, uyo haakavihera apoovwaawe vakaani-vakaani. (Nwehe ikwaaturu “ Yehova nawaakavihera apoovwaawe vakaani-vakaani.”) Ni wahoolo unaahala utepa ureera ukati ninhaleehu upanka citthu cotheene cinontteeliha nrima Nlukwiihu, Yehova!—Akol. 1:10.
“IPHIRO YOWAARYA” NANLELO KHINATTHUKIYA
16. Ikhumelo mwaakha wo 1919, “Iphiro Yowaarya” unlokihaciya cani? (Nwehe Isaiya 48:17; 60:17.)
16 Iparapaara cotheene cihaana ulokihaciya wiira cikhaleke saana. Ikhumelo mwaakha wo 1919, “Iphiro Yowaarya” ciicammo ineera ilokihaciyaka, ni nlattu wo iyo itthwiiyo, atthu enci ahokhitiri ukhuma Ibabilooniya Yuulupale. Mwaakha wo 1921, “ipottha yookhuluvelya ni yankhili” inapacenre phiyaaru uvara nteko, yahotthenkaca ikaruma imoca yaakavihenre atthu enci usoma Ibiiblya. Iyo yaari ilivuru yeehaniya “A Harpa de Deus”. Nnyo ilivurunnyo cahempirimiriya cookhalaka 6 milhões niiluuka 36, ni atthu enci yaheetthuca ikhweeli yavarelaka nteko iyo ilivurwiiyo. Mphiyaaruni, ihopankiya ilivuru yo naanaano insomiheriya Ibiiblya, Mphwanye Utteeliya Uhimmala!. Nlattu wa Yehova ni mphwinkwaawe woothotokanihiya, khinnithwa iyoolya yo mminepani ala mahuku ookhiceraala. Iyo iyoolya yo mminepaniiyo inaanikavihera otheene cihu weetta “Iphiro Yowaarya.”—Nsome Isaiya 48:17; 60:17. e
17-18. “Iphiro Yowaarya” immalela vayi?
17 Pooti waneereehu wiira khula ikwaha ntthu nokupalyaawe usomihiya Ibiiblya, uyo haana iparakha yo weetta “Iphiro Yowaarya.” Atthu akiina khampica uhiya weettela iyo iphirweeyo. Atthu akiina anaalakela uhihiya weetta iyo iphirweeyo mpaka wanhalaaya uphiya nipuro nimmalelaaya. Masi nipuroni nenno?
18 Ale arina niweherero noorwaa ukhala wiirimu, iyo iphirweeyo immalela wiirimu “upeephoni ya Nluku.” (Apoka. 2:7) Vano ale arina niweherero noorwaa ukhala va watuninyani va, iyo iphirweeyo immalela wiimaleloni ukati wo myaakha 1.000 unhalaawe ulamulela Kristu, ukati hiiva otheene ninhaleehu ukhala atthu oohipahuwa. Wakhala wiira nyuuva munneetta “Iphiro Yowaarya,” nhiwehe uttuli ni nhihapuwe iyo iphirweeyo mpaka wanhaleenyu uphiya nipuro nimmalelaaya, upeephoni! Ni nimpheela wiira “mweetteke salaama!”
NCIPO 24 Venham Para o Monte de Jeová!
a Khalayi, ayuuta yahaana yakhumaka u Babilooniya ni uturuwela u Isarayeli. Yehova ahaatthenkacera iparapaara yeehannyaawe “iphiro yowaarya.” Niireke wiira Yehova haatthenkacera apoovwaawe o mahukwaala nttala woolikanaca nuuyo? Iyee. Ukhuma mwaakha 1919 nawile Kristu, atthu imiliyau cene anaakhuma Ibabilooniya yuulupale ni anawancera weettela iphiro yowaarya. Otheene cihu hiiva nihaana nihihiyaka weetta iyo iphirweeyo mpaka uphiya nipuro nimmalelaaya.
b Estra 1:2 Cole phineeraawe Siiru, mwene o Persiya: “Yehova, Nluku o wiirimu, hokivaha ilapo cotheene co watuninyani wiira kilamulele, ni hokivahacera untekela inupa u Yerusalemu, u Yuuta. 3 Khula ntthu iriyariinyu khanle poovu a Yehova, Nlukwaawe akhale nuuyova. Vano, haana arwaaka u Yerusalemu, u Yuuta, wiira arwee ateke inupa yaari u Yerusalemu, inupa ya Yehova, Nluku o Isarayeli, Nluku eekhweeli. 4 Otheene ule khanle mmalaponi, hataa akhalaka nipuroni, attamanannyaawe ahaana yanvahaka iparaata, iwooru, mihakhu, mihuwo, ni ciicammo itthuvo cinhalaawe uvaherera wanupani ya Nluku eekhweeli, yaatekiye u Yerusalemu.”
d Isaiya 57:14 Ni uyo naahala wiira: “Nteke, nteke iparapaara! Ntthenkace iphiro! Nkumihe iriyari iyo iphirweeyo khula itthu yaahala waakakathula apoovwaaka.”
e Isaiya 48:17 Co phineeraawe Yehova, Moopolyaa, Owaarya o Isarayeli: “Miiva Yehova, ki Nlukwaa, Ule nowiitthuciha itthu inoophwanyiha ifayita, Ule noweettiha munttalani unlamuliyaa weetta.” 60:17 “Nipuro niri ikoopiri mi kinhala uwaana iwooru, nipuro niri iyuuma mi kinhala uwaana iparata, nipuro niri ithaapwa mi kinhala uwaana ikoopiri, ni nipuro niri maluku mi kinhala uwaana iyuuma. Kinaahala uwaana nnema wiira nuuhooleleni ni isariya wiira yuuwehaweheni.”
f ILATARATO: Ukati amunna Russell ni atthu yaakavihera waasomaaya Ibiiblya, ayo yaavarenle nteko ikaruma caatthenkaciye khalayiiru.
