MWAHA WOOSOMIYA 23
Ntetherye “mooro wa Yehova”
“Uviha [wo nifento] unkhala khampa mooro, mooro wa Yehova.”—NCI. 8:6.
NCIPO 131 O Que Jeová Uniu
NINHALA WIITTHUCANI? a
1. Manannani Ibiiblya cinoolumaaya nifento neekhweeli?
IBIIBLYA, inawuuluma nifento ni mananna omaana: “Uviha waya unkhala khampa mooro, mooro wa Yehova. Maaci oocaca khanttipiha ni myooloko coovira khacinkusa nno nifentonno.” b (Nci. 8:6, 7) Ala moolumwaala anawaavaha nikhuluveliho nomaana atthu oothelana: Nyuuva khweeliini pooti wooniherana nifento neekhweeli.
2. Isiyani anamathelana inlamuliyaaya upanka wiira nifento naya nihiririyace?
2 Nifento neekhweeli ni noohimala naanamathelana ninkhala saana yeekurumicaka atthu ooyeeli. Wootakihera, muupuwele mooro. Wiira uhittiphye, uhaana utetheriya ikhuni. Mwaahitetheryeke, uyo pooti uttiphya. Woolikanaca, nifento naatthu oothelana pooti ulipa mpaka, masi ahaana yawaceranaka. Ikwaha cikhwaawe, ayo pooti woona wiira nifento naya ninaaririyaca, venci-venci wakhalaka wiira anaanana masakha, toko uhikhalana nsurukhu, uwerennya awula waawacera asaanaaya. Vano, wakhalaka wiira nyuuva nhothela awula nhotheliya, manannani nyuuva nnohaleenyu utetherya mooro wa Yehova muuthelanacani winyu? Ula mwahoola, ninaahala woona citthu tthaaru nnolamuliyeenyu upanka wiira uthelana winyu ukhale woolipa ni wootteeliha nrima. c
NRWEEHELE UHOOLO ULIPIHACA UPATTHANIINYU NI YEHOVA
Khampa Yusufu ni Maria, anamathelana ahaana yakhalanaka upatthani woolipa ni Yehova (Nwehe iparaagarafu 3)
3. Manannani ulipihaca upatthani ni Yehova unoncereraaya nifento muuthelanani? (Nwehe Eklesyaste 4:12.) (Nwehe ciicammo ilatarato.)
3 Wiira uhittiphye mooro wa Yehova, anamathelana ahaana yiikurumicaka ukhalana upatthani woolipa ni Yehova. Kontha isiyani ikhanlyaaya itthu yomaana anamathelana upanka iyo? Anamathelana yavahaka ifayita upatthannyaaya ni Yehova, ayo anaweettela ikano cawe ni iyo inawaakavihera unyema ni waanana masakha yaahala uririihaca ufentana waya. (Nsome Eklesyaste 4:12. d) Ntthu oolipa nhina mminepani naapanka yotheene inkhitiryaawe wiira atakihe makhalelo a Yehova, toko unamaana, uvilela ni ulevelela. (Efesu 4:32–5:1) Anamathelana yooniheranaka ayo makhalelwaayo, nifento arinaaya ninaahala winciva. Arokorihu aneehaniya Lena, avirihile myaakha 25 anatheliye, aheera: “Khunrika ufenta ni uhisimu ntthu oolipa nhina mminepani.”
4. Kontha isiyani Yehova wanthanlilyaawe Yusufu ni Maria wiira akhale asithumwaane ule aahala ukhala Mesiya?
4 Nttwee noone ntakihero nimoca no mbiiblyani. Ukati Yehova waapheelaawe waathanla asithumwaane ule aahala ukhala Mesiya, uyo ahaana atthu enci oopheela waathanla yaari amucyaawe Davidi. Masi, uyo anthanlile Yusufu ni Maria. Kontha isiyani? Kontha ala atthu eelyaala yahaana upatthani woolipa ni Yehova. Ni Yehova ancuwela wiira ayo yanhala umweesa nipuro noopacera muuthelanani waya. Isiyani anamathelana inlamuliyaaya umwiitthucera Yusufu ni Maria?
5. Isiyani ale athenle inlamuliyaaya umwiitthucera Yusufu?
5 Yusufu khaapica wiiwelela ikettelo ca Yehova, ni iyo itthwiiyo yahomwiiriha ukhala ntheli omaana. Wookhalaka ikwaha tthaaru, Nluku ahonvaha Yusufu ikano caahela nhina amucyaawe. Ikwaha cotheenennyo, uyo aheewelela woohipica hataa ukhalaka wiira ahaana apankaka marukunuso moolupale. (Mat. 1:20, 24; 2:13-15, 19-21) Nlattu wo wiiwelela ikano ca Yehova, Yusufu ahonkavihera, ahonkhikicera ni ahonwacera Maria. Khweeliini, iyo itthwiiyo yahomwiiriha Maria wuncerera unhisima wawe Yusufu. Nyuuva pooti untakiha Yusufu, mwaavyaka ikano co mbiiblyani ukati unaawacereenyu amuciinyu. e Hataa ukhalaka wiira nhaana mpankaka marukunuso, nyuuva mwattharaka ikano co mbiiblyani nnawoonihera wiira nnawaafenta amwaarinyu ni nnaalipihaca uthelanaca winyu. Anuunu amoca u Vanuatu, avirihile myaakha 20 anatheliye, aheera: “Awannyaka yatothaka ni yattharaka ikano ca Yehova, mi kinaatepa waahisimu ni mi kinawiicoona ukhikiceriya ni kinaakhuluvela citthu cinlakelaaya.”
6. Isiyani athiyana ootheliya inlamuliyaaya umwiitthucera Maria?
6 Maria veekhacaweru ahaana upatthani woolipa ni Yehova. Waamini wawe khaalipihaca nlattu wa Yusufu. Uyo ancuwela sana-saana Cowantikhiya Cowaarya. (Nwehe niwehero no Luka 1:46 nhina Bíblia de Estudo yeekunya.) Uyo ciicammo, ankumiha ukati wiira oopuwele itthu yaasomaawe. (Luka 2:19, 51) Woohaakanyaca, Maria aari ntakihero nomaana nhina athiyana ootheliya. Ilelo, athiyana enci ootheliya anawiikurumica ukhala khampa Maria. Wootakihera, anuunwiihu amoca aneehaniya Emiko, aheera: “Miiva kaaryaaka nthupa, citthu cotheene kaapanka veekha wiira kiilihere nhina mminepani. Masi utheliya waka awannyaka phaalompa ni phaawacera uswali waamuci. Vano mi kahoonenela wiira kahopacera waahiyera citthu cotheene wiira akipankele. Masi ciicammo kahoona wiira kahaana kiwaceraka upatthannyaaka ni Yehova. Nna co kinaakumiha ukati wiira kimuulumane Yehova, kilompaka, kisomaka Ibiiblya ni kuupuwelaka itthu insomaaka.” (Akalas. 6:5) Athiyana ootheliya, nrweehele uhoolo ulipihaca apatthaniinyu ni Yehova. Ayo manannaayo asiwannyinyu anaahala woona itthu yowuuttottopelani ni yowuufentani.—Miru. 31:30.
7. Isiyani anamathelana immwiitthuceraaya Yusufu ni Maria nhina uswali nkhayi?
7 Wiira Yusufu ni Maria alipihace upatthannyaaya ni Yehova, ayo yanvara nteko nkhayi. Ayo yancuwela wiira yaari itthu yofayita unswalela Yehova nkhayi. (Luka 2:22-24, 41; 4:16) Iyo itthwiiyo pooti ukhalaka wiira yahaarikela, venci-venci ukati waayanryaaya asaana akiina, masi ayo yahokhitiri. Nno nikhanle ntakihero nomaana naanamathelana ilelo! Wakhala wiira nhaana asaana khampa Yusufu ni Maria, nyuuva pooti wuurikelani urwaa umikutthaanoni awula ukumiha ukati wiira mpake uswali waamuci. Atthunaka pooti wuurikelani useelela ukati wiira nsome, nlompe naamwaarinyu awula naawannyinyu. Masi, nhiliyale wiira mwanswalelaka Yehova nkhayi, nyuuva nnaamwaattamela ni ciicammo nnaalipihaca ufentana winyu. Phimaana, nhoolelihere citthu co mminepani.
8. Isiyani inhala waakavihera anamathelana unaarika upanka uswali waamuci?
8 Isiyani nyuuva nnolamuliyeenyu upanka wakhalaka wiira nnawaanana marikariko muuthelanani winyu? Atthunaka nyuuva khannokhalana ikuru wiira mpanke uswali waamuci nkhayi. Wakhala commo, wanhala ureera upacera niitthu yoohirika awula mwaha unoocivelani usoma nyuuva naamwaarinyu. Upanka iyo itthwiiyo, unaahala ulipihaca ufentana winyu ni upheela uvara miteko co mminepani nkhayi.
NVIRIHE UKATI NKHAYI
9. Kontha isiyani anamathelana ahaana avirihaka ukati nkhayi?
9 Anamathelana, nyuuva pooti ulipihaca nifento ninyu nvirihaka ukati nnari nkhayi. Iyo itthwiiyo inaahala wuukaviherani nyuuva uhikhala khampa khannocuwelana. Masi mwavirihaka ukati nkhayi, nnaahala ucuwelana sana-saana nhina moopuwelelweenyu ni nhina citthu cinwiirani. (Upha. 2:24) Moone isiyani Lilia ni Ruslan yoonelenlyaaya uvira waya myaakha 15 anathelanne. Anuunu Lilia aheera: “Hiiva nooniha toko nanhala uviriha ukati mwinci nkhayi, masi khayaakhumelenle iyo itthwiiyo. Ukati wotheene hiiva nahaana citthu coovara: ntekweehu, citthu co wapuwani ni asaaneehu. Vano hi nahoona wiira nahaana niseelelaka ukati wiira nikhale nkhayi, kontha waanoopiha hiiva uliyalana.”
10. Manannani anamathelana cinlamuliyaaya weettela itthu inhimyaaya Efesu 5:15, 16?
10 Isiyani anamathelana inlamuliyaaya upanka wiira avirihe ukati anari nkhayi? Atthunaka ayo ahaana yiitthenkacaka awula useelela ukati wiira akhale nkhayi. (Nsome Efesu 5:15, 16. f) Munna mmoca nokhala u Nigéria neehaniya Uzondo, heera: “Keetthenkacaka wiira kavare miteko caka, mi kinaaseelela ukati woohala ukhala naamwaaraka ni kinwehera iyo itthwiiyo khampa itthu yoopacera.” (Afili. 1:10) Moone ntakihero naanuunu amoca aneehaniya Anastácia ankhala Moldávia. Awannyaya akhanle mootoli osirikwiitu. Ayo ahoonenela mananna oovarela nteko saana ukatyaaya. Ayo aheera: “Mi kinaamananiha uvara miteko caka cotheene ukati awannyaka unvaraaya miteko caya. Kapankaka commo, ninaakhalana ukati wookhala nkhayi.” Vano wakhalaka wiira nyuuva unawuurikani ukumiha ukati wookhala nkhayi, isiyani inhala wuukaviherani?
Nyuuva anamathelana mitekoni nnolamuliyeenyu uvara nkhayi? (Nwehe Iparaagarafu 11-12)
11. Mitekoni Akila ni Pirisila caapankaaya nkhayi?
11 Anamathelana pooti wiitthucera ntakihero na Akila ni Pirisila. Ayo yaari anamathelana yaacivela wanlokoni no makristau oopacera. (Aroo. 16:3, 4) Ibiiblya khinooluma cinene uthelanaca waya, masi iyo inawoonihera wiira ayo yanvara nteko woolalyeera ni yaanaakavihera akhunanaya, ni citthu cotheenennyo yaapanka nkhayi. (Mite. 18:2, 3, 24-26) Khweeliini, khula ikwaha Ibiiblya inonromolaaya Akila ni Pirisila, ayo anromolaciya nkhayi.
12. Isiyani anamathelana inlamuliyaaya upanka wiira akhale nkhayi? (Nwehe ciicammo ilatarato.)
12 Manannani anamathelana anhalaaya untakiha Akila ni Pirisila? Muupuwele miteko nyuuva cirineenyu. Niireke wiira nyuuva pooti wanvareenyu nnyo mitekonnyo nkhayi? Nyuuva nnaaleehana wiira ikwaha cinci nrwee wuulalyeerani nkhayi? Akila ni Pirisila ciicammo yaavara nteko nkhayi. Pooti ukhalaka wiira nyuuva khannovara nteko mmocaaru, masi niireke khawaareera ukumiha ukati wiira nvare miteko co wapuwani nkhayi, toko ukwecakweca awula ulokihaca inupeenyu? (Ekles. 4:9) Wakhala wiira nnaakaviherana uvara nnyo mitekonnyo, nyuuva naahala wiicoona ukhala nkhayi ni nnaahala ukhalana ukati wiira moope mwaha. Amunna amoca aneehaniya Robert ni amwaaraya Linda ahoviriha myaakha 50 anathelanne. Ayo aheera: “Hi khanirina ukati mwinci wiira nikhale nkhayi nithukaka, masi mi karapihaka iparatho naamwaaraka awula kathikilacaka malasi wapuwani, vano amwaaraka yawaaka ukikavihera, mi unaakitteela nrima cinene. Upanka nnyo citthunnyo nkhayi unaanikavihera uviriha ukati nkhayi ni ufentana wihu unaavira utepaka winciva.”
13. Isiyani anamathelana inlamuliyaaya upanka wiira akhale nkhayi weekhweeli?
13 Masi nhiliyale itthu imoca: uviriha ukati nkhayi khunthoonyera wiira nnawiiwanana. Athiya amoca ootheliya u Brasil aheera: “Mahukwaala, cihaavo citthu cinci cinniiriha wuupuwela wiira niri nkhayi nlattu wo wonkomaca nipuro nimoca paahi, masi khweeliini khaniri nkhayi. Mi kiheetthuca wiira ukhala nkhayi nipuro nimoca paahi khuntosa; itthu impheeliya ukhanle khula ntthu unwacera nkhunanawe, kahi ukhala nkhayi paahi.” Moone itthu munna Bruno ni amwaarawe Tays ampankaaya wiira awacerane. Uyo heera: “Nakhalanaka ukati wiira nikhale nkhayi, hi ninawaahiya waapotolaca atelefooniihu wiira nilawe ukati ninviriheehu nkhayi.”
14. Wakhalaka wiira anamathelana khunaacivela uviriha ukati nkhayi, isiyani inlamuliyaaya upanka?
14 Masi wakhalaka wiira nyuuva khunoocivelani uviriha ukati nkhayi? Atthunaka nyuuva ni amwaarinyu cinoocivelani citthu coovirikana awula khannopica uvirusana mwakhalaka nkhayi. Vano, isiyani nnolamuliyeenyu upanka? Muupuwele-tho ntakihero no mooro. Mooro khumpharela venci urwaa-nuurwa, uhaana utetheriya ikhuni cooyevaca vakaani-vakaani, vano phimpharelaaya venci. Nttharaka nna ntakiheronna, kontha isiyani nyuuva nhipacereenyu ukumiha ukati vakaani paahi wiira nkhale nkhayi? Mmananihe upanka citthu nkhayi ni nnyeme citthu caahala uwiirihani unyoonyihana. (Tiya. 3:18) Mwapaceraka vakaani-vakaani, nyuuva pooti uparihela mooro wo nifento ninyu.
NWACERANE NIIHISIMA
15. Kontha isiyani ihisima ikhanlyaaya itthu yofayita muuthelanacani?
15 Ihisima ikhanle itthu yofayita muuthelanani. Ihisima pooti ulattaniheriya niiphyoo. Namananihaka upaha mooro woohivucelela, uyo moorooyo pooti uhipharela ni unaattiphya wowaakuvya. Woolikanaca, woohihisima, khunkhala ufentana muuthelanani awula nwo ufentananwo pooti uririyaca woohipica. Masi, wakhalaka wiira anamathelana anawiikurumica wooniherana ihisima, ayo anaarwaanela uhoolo ufentana waya. Pooti ukhalaka wiira nyuuva nnoopuwela wiira nnawoonihera ihisima, masi niireke wiira amwaarinyu awula awannyinyu anawiicoona uhisimiya? Anuunu Penny ni awannyaya Aret ahoviriha myaakha 25 anathelanne. Ayo aneera: “Ihisima ninooniheraneehu inaawaana nnema watthokoni wihu. Hi khaninoova woopaca mwaha nkhayi, kontha ninaacuwela wiira khula ntthu noopuwela itthu yofayita ya nkhunanawe.” Vano, isiyani nyuuva nnolamuliyeenyu upanka wiira amwaarinyu awula awannyinyu yiicoone uhisimiya? Nwehe ntakihero na Aparahaamu ni Sara.
Nlopwana oothela haana ooniheraka uhisimu itthu inoopuwelaaya amwaarawe ni uwiiwelela sana-saana (Nwehe iparaagarafu 16)
16. Isiyani anamathelana inlamuliyaaya umwiitthucera Aparahaamu? (Nwehe 1 Peturu 3:7.) (Nwehe ciicammo ilatarato.)
16 Aparahaamu anonwacera Sara niihisima. Uyo aneewelela citthu coolumaawe Sara ni anhisima citthu coopuwelaawe. Ikwaha imoca, Sara ahonyoonyiya venci ni ahonhimerya Aparahaamu citthu cotheene coopuwelaawe, mpaka ahomwiirela wiira uyo phaapankaca citthu ceerannya. Niireke wiira Aparahaamu ahonviruwela Sara? Mena. Uyo ancuwela wiira Sara aari nthiyana ookhuluvelya ni ankavihera. Aparahaamu ahomwiiwelela Sara ni ahomananiha umalihaca itthu yeerannya. (Upha. 16:5, 6) Isiyani ineetthuceehu? Atheli, ikhanle ikhweeli wiira thi nyuuva nrina ukhulupale woolakela citthu watthokoni. (1 Akor. 11:3) Uhookhalaru commo, wanhala ureera nyuuva wiiwelela citthu cinoopuwelaaya amwaarinyu nhinalakela upanka itthu. Venci-venci, wakhalaka wiira itthu inhaleenyu ulakela upanka inaahala waahela nhina amwaarinyu. (1 Akor. 13:4, 5) Ikwaha cikiina, pooti ukhalaka toko wiira amwaarinyu ahonyoonyiya ni ampheela uhimyaca citthu cotheene cinwiira. Niireke wiira nyuuva nnaahisima ni nnawiiwelela saana citthu cinoopuwelaaya? (Nsome 1 Peturu 3:7. g) Anuunu Angela ni awannyaya Dmitry ahoviriha myaakha 30 anathelanne. Ayo anaattonkaca itthu impankaaya awannyaya wiira yiicoone uhisimiya: “Awannyaka Dmitry anaakiiwelela karusiyaka ni kapheelaka paahi woopa mwaha. Ayo anaakiviriyana sana-saana, hataa ukhalaka wiira kihooviruwa.”
17. Isiyani athiyana ootheliya inlamuliyaaya wiitthucera ntakihero na Sara? (Nwehe 1 Peturu 3:5, 6.)
17 Sara aanaamoonihera ihisima venci Aparahaamu, ankaviheraka nhina citthu caalakelaawe. (Upha. 12:5) Ikwaha imoca, yahowa aletto ukati wahaawehereraaya. Aparahaamu ahaalattula wiira alye uwannyawe. Uyo ahonlepela Sara wiira ahiye itthu yaavaraawe ni oose iphaawu cinci. (Upha. 18:6) Sara ahotthuna itthu yaalakenlyaawe Aparahaamu ni ukati yooyo, ahopanka itthu yaalepeliyaawe. Athiyana ootheliya, nyuuva pooti untakiha Sara, ntthunaka citthu cinlakelaaya awannyinyu. Mwapankaka commo, nnaahala ulipihaca uthelanaca winyu. (Nsome 1 Peturu 3:5, 6. h) Amunna Dmitry aromoliye iparaagarafu ivinre, anaattonkaca isiyani amwaaraya impankaaya wiira ayo yiicoone uhisimiya. Ayo aneera: “Mi unaakicivela cinene mananna amwaaraka cinkikaviheraaya nhina citthu cinlakelaaka, hataa ukhalaka wiira citthu cinoopuweleehu cinaavirikanaka. Ni wakhalaka wiira itthu ilakenlyaaka khikhanle khampa caaweherereehu, ayo khancaca.” Unawoonannya wiira khunrika unfenta ntthu nonihisima!
18. Isiyani inhala ukhumelela anamathelana yeekurumicaka utetherya mooro wo nifento?
18 Ilelo, Sotwani naapanka yotheene inkhitiryaawe wiira amalihe ufentana muuthelanani. Uyo naacuwela wiira anamathelana yahiyaka ufentana ayo ciicammo anaahala uhiya unfenta Yehova. Masi nifento neekhweeli khanimmala. Mpanke yotheene inkhitiriinyu wiira ufentana winyu naamwaarinyu awula naawannyu ukhale khampa ufentana uhimiye nlivuruni yo Ncipo na Salomau. Mmweese Yehova nipuro noopacera muuthelanani winyu, nvirihe ukati nkhayi ni nhisime citthu amwaarinyu awula awannyu cinoopuwelaaya ni cimpheelaaya. Mwapankaka commo, nyuuva nnaahala unttitthimiha Yehova, ule ninonkhumakhuma nifento. Khampa mooro umpharela cinene, ufentana winyu khunhala uhiya ukhala woolipa mpaka.
NCIPO 132 Nós Somos Um
a Uthelanaca ikhanle itthuvo Yehova yaavahilyaawe apinaatamu wiira nlopwana ni nthiyana yooniherane nifento nomaana. Masi, nifento pooti uririyaca. Wakhala wiira nyuuva nhotheliya awula nhothela, ula mwahoola unaahala wuukaviherani utetherya nifento ninyu wiira nihittiphye ni ukhalana uthelanaca womaana.
b Nifento neekhweeli, nowooniheraniya khula nihuku ni ninkhala mpaka, nineehaniya “mooro wa Yehova” kontha Yehova phinvaha nno nifentonno.
c Hataa ukhalaka wiira amwaarinyu awula awannyinyu khanonswalela Yehova, ikano co ula mwahoola pooti wuukaviherani ulipihaca nifento ninyu muuthelanani winyu.—1 Akor. 7:12-14; 1 Pet. 3:1, 2.
d Eklesyaste 4:12 Ciicammo, ntthu mmoca akhalaka veekha pooti ukhitiriya, masi yakhalaka atthu eeli anaakhitiri ulipa ni uhitthemiya. Ni nkhoyi wo miripo miraru khunaakuva ukattuwa.
e Nyuuva pooti uphwanya ikano comaana nhina myaha co mphantte uneera “Ajuda para a Família” nsayitini jw.org yeekunya ni mwaaplikatiivuni JW Library®.
f Efesu 5:15 Nweheehe saana meettelweenyu wiira nhikhale khampa alolo, masi nkhale atthu oocuwelaca, 16 nvarelaka nteko ratta ukatiinyu, ukhala wiira ninkhala mahuku oohiloka.
g 1 Peturu 3:7 Nyu alopwana nthenle, nhihiyerere ukhala wamoca naamwaarinyu, ncuwelaka saana makhalelwaaya ni mwaawaceraka niihisima khampa mwaapu woovevyaala, ukhala wiira ayo athiyana. Kontha ayo ciicammo ahothoonyeriya maana owuuronyani athoonyeriyeenyu ni Nluku. Mwaawacere cole wiira mwalompavale, nhikhotteliyeni ni Nluku.
h 1 Peturu 3:5 Kontha cole phaapankaaya athiyana owaarya o khalayi yanweherera Nluku. Ayo yanwiiwelela asiwannyaya, 6 khampa Sara waamwiiwelelaawe Aparahaamu, amwiihanaka pwiiya. Weeva unaahala ukhala mwanawe, waahihiyeru upanka itthu yomaana ni waahihiyeke woopopihiyaka.
