Kontha isiyani nlopwana neehaniya “Fulano” aheera wiira anhala uhonona nhakhu waahiyeriyaawe anthelaka Ruti? (Ruti 4:1, 6)

Khalayi, nlopwana akhwaaka woohaayara asaana yankhumelela makoho toko ala: “Imatta cawe caahala ukhala cani? Ncina nawe naanaahala uliyaliya mpaka? Nlamulo na Moceesi naanawaakhula ayo makohwaayo.

Isiyani yaalamuliya upankiya wakhalaka wiira nlopwana mmoca hokhwa woohaayara asaana awula hotumiha imatta cawe nlattu wookhala mmasikiini? Muulupalyaawe awula mmucyaawe nkhwaawe ahaana athumaka imatta cawe. Naala manannaala, nnyo imattanyo nanlelo caahala ukhala caamucyaawe.—Lev. 25:23-28; Manu. 27:8-11.

Vano wakhalaka wiira nlopwanooyo khwile woohaayara asaana, isiyani yaahala upankiya wiira ncina nawe nihiliyaliye? Athiyanaayo yaahaana atheliyaka ni muulupalyaawe awula ni mwanhimaawe nlopwana khwilyooyo. Iyo phiitthu yaamwiirannyenle Ruti. Nlopwanooyo ahaana aathelaka ale yaari amwaara amulupalyaawe awula amwanhimaawe wiira aayarane mwaana. Uyo mwaanooyo phaahala uhiyeriya imatta cawe nlopwana akhwilyooyo. Ni ala manannaala, ncina nawe khanaahala uliyaliya watthokoni. Iyo yaari itthu yaapankiya wiira yooniheriye nifento ni uwaceriya anaankhweli.—Deut. 25:5-7; Mat. 22:23-28.

Moone itthu yaamwiirannyenle Nowemi. Uyo aatheliye ni nlopwana eehaniya Elimeleki. uwakati Elimeleki ni asaanaawe eeli waakhwilyaaya, Nowemi kaarina-tho ntthu onwacera. (Ruti 1:1-5) Uwakati Nowemi waaturuwenlyaawe u Yuta, ahonruma Ruti wiira amwiirele Boaz athume awula oopole imatta ca Elimeleki, kontha Boaz aari mmucyaawe Elimeleki. (Ruti 2:1, 19, 20; 3:1-4) Masi, Boaz ahoopuwela wiira ahaawo nlopwana, eehaniya Fulano, ni uyo nlopwanooyo aari mmuci owaattamana ni Elimeleki. Iyo inhimya wiira uyo nlopwanooyo phaahala upacera wiivaherera woopola imatta ca Elimeleki.—Ruti 3:9, 12, 13.

Wiipaceroni, Fulano aahopheela unkavihera Nowemi. (Ruti 4:1-4) Hataa ukhalaka wiira upanka iyo itthwiiyo waanaahala umwiiriha uliva nsurukhu mwinci, uyo ahoona wiira Nowemi khaarina mwaana aahala uhalana imatta ca Elimeleki. Phimaana, nnyo imattannyo caahala ukhala ca Fulano, ni uyo awehenre iyo itthwiiyo khampa itthu yaahala umphwanyiha iluukuru.

Masi Fulano ahorukunusa moopuwelelwaawe ukati wonenenlyaawe wiira ahaana anthelaka Ruti. Uyo aheera co: “Mi akinpheela umoopola kontha akinpheela uhonona nhakhu uhiyeriyaka.” (Ruti 4:5, 6) Isiyani yaamwiirihile urukunusa moopuwelelwaawe?

Unari wiira Fulano awula nlopwana nkhwaawe ahonthela Ruti ni ahonnyara mwaana ni uyo, uyo mwaanooyo phaaha uhalana imatta ca Elimeleki. Vano manannani iyo itthwiiyo yaahalaya uhonona nhakhu wa Fulano? Ibiiblya khinhimya iyo itthwiiyo, masi cihaawo citthu ninlamuliyeehu wuupuwela.

• Yoopacera, uyo khaahala uphwanyera ilukuru nsurukhu waahalaawe uliva wiira atthume imatta ca Elimeleki, kontha wahoolo nnyo imattannyo caahala ukhala ca mwaana a Ruti.

• Yoonayeeli, uyo anaahala ukhalana nrintti wonwacera ni unliha Nowemi nkhayi ni Ruti.

• Yooneeraru, Ruti aayaraka asaana akhwaawe ni Fulano, ayo asaanaayo ni asaana akhwaawe yaarinaawe phaahala uhalana imatta ca Fulano.

• Yoonecese, wakhalaka wiira Fulano aari hinannyara mwaana, mwaana aahalaawe unnyarana Ruti phaahala uhalana imatta ca Elimeleki ni ca Fulano. Fulano akhwaaka, mwaana aahala uhalana imatta cawe, khaahala uvahiya ncina na Fulano, masi aahala uvahiya ncina na Elimeleki. Fulano khaapheela uleva mihakhu cawe wiira ankavihere Nowemi. Phimaana uyo ahonlepela mmucyaawe nkhwaawe wiira apanke iyo itthwiiyo. Boaz ahotthuna unkavihera Nowemi wiira nihiliyaliye ncina naawannyawe.—Ruti 4:10.

Unawoonannya wiira, Fulano apheela pahi wiira nihiliyaliye ncina nawe ni hihaleele mihakhu caarinaawe. Uyo aari nattora. Fulano khaapheela wiira niliyaliye ncina nawe, masi iyo phiitthu yiirannyeele. Ilelo, khaawo ntthu ncuwela ncina nawe. Uyo hohaleela iparakha yuulupale yaavahiyaawe Boaz. Ahokhala anhiya-taataawe Mesiya, Yesu Kristu. Iyo ihantisiiyo inawoonihera itthu inwiirannyeela anattora ni ale ahimpheela waakavihera akhunanaya!—Mat. 1:5; Luk 3:23, 32.