1-2. Wakhalaka wiira khannaaya wiitthenkaca wiira mpattisiye, nlattuni uhinlamuliyeenyu ukhala nimasukhuli? (Nwehe ilatarato yo wakaapani.)

 WAKHALA wiira nyuuva nnawuupuwelaca upattisiya, ninawuuttottopelani! Nyuuva nheetthenkaca wiira mpattisiye? Moona wiira nheetthenkaca ni mahumu yakupali wiira nyuuva pooti upattisiya, nhiviriihe ukati unhala upattisiya atthu wanlokoni winyu. Pooti wankupaliinyu wiira mwapankaka commo, nnaahala ukhalana ukumi womaana ukati unonswaleleenyu Yehova.

² Vano isiyani inlamuliyeenyu upanka mweereliyaka wiira khannaaya wiitthenkaca ni nhaana mpankaka marukunuso wiira mpattisiye? Awula pooti ukhalaka wiira mwaaneeneenyu nhoonelela iyo itthwiiyo. Wakhalaka commo, nhikhale nimasukhuli. Nyuuva pooti ukhitiri upanka marukunuso wiira mpattisiye, hataa nkhalaka mmirawo awula owuuluvala.

3. Isiyani nlopwana mmoca o Etiópia yankohilyaawe Filipe, ni nikohoni-tho ninkhumelela? (Nwehe Miteko 8:36, 38.)

³ Nsome Miteko 8:36, 38. b Nanteko mmoca aapwiyamwene o Etiópia ahonkoha namalalyeera Filipe co: “Isiyani inkihaleela wiira kipattisiye?” Uyo nlopwanooyo aapheela upattisiya. Masi niireke wiira khweeliini aheetthenkaca wiira apattisiye?

4. Nlopwana o Etiópia oonihenre cani wiira aanaapheela wiitthuca-tho?

⁴ Nlopwana o Etiópia “aarweele uswali u Yerusalemu.” (Mite. 8:27) Iyo itthwiiyo inthoonyera wiira uyo ahotthuna ittiini ya ayuuta. Ukhala wiira ahosoma Cowantikhiya Cowaarya niiluuka iheperewu, uyo aheetthuca citthu cinci ca Yehova. Masi uyo ampheela ucuwela-tho citthu cikhwaawe. Uwakati Filipe wamphwanyilyaawe uyo nlopwanooyo mparapaarani, uyo aasoma inatiri ca porofeeta Isaiya. (Mite. 8:28) Nnyo inatirinnyo caari ikhweeli cuulupale co mbiiblyani.  Phimaana, nlopwana o Etiópia khaapheela paahi ucuwela citthu coohirikarika co mbiiblyani, masi aapheela ucuwela myaha cikhwaawe.

5. Manannani nlopwana o Etiópia ceettenlyaawe citthu ceetthucaawe?

⁵ Uyo nlopwanooyo aari nanteko muulupale aapwiyamwene yeehaniya Candace o Etiópia. “Uyo phaavahaceriye uwacera mihakhu caya.” (Mite. 8:27) Phimaana, uyo aari nlopwana aakhala nimiteko cinci ni ahaana mirintti cinci. Hataa ukhalaka commo, uyo ahokumiha ukati wiira answalele Yehova. Uyo khaapheela paahi wiitthuca ikhweeli, masi ciicammo aapheela weettela citthu ceetthucaawe. Phimaana, uyo aholakela weetta nkwaha muulupale akhumaka u Etiópia mpaka u Yerusalemu wiira answalele Yehova ntempulu wawe. Uyo nkwahooyo khawaari mwankaani. Ni khweeliini, ahorihakaca nsurukhu mwinci wiira aphiye u Yerusalemu. Masi waanookhalaru commo, uyo aanaapheela cinene unswalela Yehova hataa inkhumelelaka isiyani.

6-7. Manannani nlopwana o Etiópia caathoonyenryaawe wiira aananfenta cinene Yehova?

⁶ Filipe ahomwiitthuciha nlopwana o Etiópia myaha cofayita ni myaha cimmuuluma Mesiya. (Mite. 8:34, 35) Uyo nlopwanooyo wahontteela nrima cinene nlattu wo wiitthuca wiivaherera wa Yesu wiira anoopole ni nlattu woocuwela mananna nwo woopoliyanwo camphwanyihaaya ifayita. Masi isiyani yaapankilyaawe wiitthuca wawe nnyo citthunnyo? Uyo aari nlopwana aahisimiya cinene nhina ittiini yaayuuta. Nari ntthu nkiina, uyo khaahala ukhuma iyo ittiiniiyo wiira hihiye uhisimiya. Masi uhiya upanka commo, unfenta wawe Yehova ni Yesu wahenciva. Uyo aholakela upanka nrukunuso nuulupale cinene muukumini wawe. Upattisiya ni ukhala ntthari a Yesu Kristu. Filipe ahoona wiira uyo nlopwanooyo aheetthenkaca wiira apattisiye. Phimaana, ahompattisa.

⁷ Nyuuva ciicammo nnaahala ukhitiri wiitthenkaca wiira mpattisiye mwantakihaka nlopwana o Etiópia. Toko uyo nlopwanooyo, nyuuva nnaahala ukupali wiira nheetthenkaca, mpaka nnaahala wiikoha co: “Inkihaleela isiyani wiira kipattisiye?” Nttwee noone manannani nyuuva cinlamuliyeenyu upanka citthu caapankilyaawe nlopwana o Etiópia wiira eetthenkace: “Uhihiya wiitthuca myaha ca Nluku, weettela citthu cineetthuceenyu ni wiikurumica utepa unfenta Yehova.”

8. Joau 17:3 inookurumicani upanka isiyani?

⁸ Nsome Joau 17:3. c Itthu Yesu yuulumilyaawe ihookaviherani nyuuva upheela usoma Ibiiblya. Iyo phi itthu iniirannyenle otheene cihu. Masi niireke wiira ayo moolumwaayo ciicammo anaanikurumica uhihiyerera wiitthuca myaha ca Nluku?  Hi khaninhala uhiya mena vakaani wiikurumica wiitthuca ni ‘uncuwela Nluku mmoca eekhweeli.’ (Ekles. 3:11) Hi khaninhala uhiya wiitthuca myaha ca Yehova mpaka. Ni neekurumicaka uncuwela cinene, ninaatepa umpatthanana.—Isaa. 73:28.

9. Isiyani inlamuliyeehu upanka namalihaka wiitthuca myaha coopacera co mbiiblyani?

⁹ Hi ninaacuwela wiira nanceraka wiitthuca myaha ca Yehova, nimpacera wiitthuca myaha coohirikarika co mbiiblyani. Nhina iwarakha apostolu Paulu yaawantikhenlyaawe makristau maberewu, uyo aheera wiira nnyo myahannyo cikhanle “citthu coopacera.” Uyo khaaphenle uhimya wiira nnyo myahannyo khacinakhala cofayita. Uhiya commo, uyo hoonihera wiira nnyo myahannyo cinlattanaca ni nipele ninaamwihiyaawe mwaana. (Mabere. 5:12; 6:1) Phimaana, uyo ahaakurumica makristau uhiitthuca paahi citthu coopacera, masi utotha wiitthuca myaha cuulupale co nnuulumoni na Nluku. Khweeliini, nyuuva unawuucivelani wiitthuca myaha coopacera awula coohirikarika co mbiiblyani. Masi niireke wiira nnaapheela uhihiyerera urwaa uhoolo ni wiitthuca myaha cikhwaawe ca Yehova ni citthu cimpheelaawe?

10. Kontha isiyani atthu akhwaawe pooti waanyoonya usoma myaha ca Nluku?

¹⁰ Enci unawaanyoonya usoma. Ukati nyuuva mwaasomeenyu ucikola, mwaanawaakuva wiiweeha citthu caasomihiyeenyu ni waanawuucivelani usoma? Awula waanawuunyoonyani ni waanawuurikani cinene usoma? Wakhala wiira waanawuunyoonyani ni waanawuurikani, nyuuva khanri veekha. Ahaavo atthu enci aneecoona commo. Masi Yehova pooti wuukaviherani. Uyo khanle Purusoore oohipahuwa ni omaana hinlikananiya.

11. Manannani Yehova cinooniheraawe wiira khanle “Mwiitthucihi Muulupale”?

¹¹ Yehova mwaneene enre wiira uyova khanle “Mwiitthucihi Muulupale.” (Isai. 30:20, 21) Uyo khanle Mwiitthucihi oopisa nrima, namaana ni owaawacera atthu anaasomihaawe. Uyo naatotha woona citthu comaana cimpankaaya ni cirinaaya wanrimani atthu anaasomihaawe. (Isaa. 130:3) Ni uyo khanweherera wiira nipanke citthu cihinkhitiriihu. Muupuwele wiira uyo phumpale ukookweehu, itthuvo yomaana inivahilyaawe (Isaa. 139:14) Otheene cihu ninaapheela cinene ni unaanicivela wiitthuca citthu conaanaano. Mpattusiihu naapheela wiira nihihiyerere wiitthuca mpaka, ni uyo nopheela wiira unicivele wiitthuca citthu conaanaano. Phimaana, unaahala ureera hiiva neekurumicaka upheela wiitthuca citthu co mbiiblyani ukhuma nenna co. (1 Pet. 2:2) Mwiihelele mipika nthanlaka citthu cimpheeleenyu wiitthuca ni nlakele usoma Ibiiblya woohihiyerera. (Jos. 1:8) Yehova ookaviherakani, nyuuva nnaahala ukhitiri uhuunyoonyani usoma Ibiiblya ni ilivuru cihu; ni nnaahala ukhitiri ukumiha ukati wiira muupuwele citthu cineetthuceenyu.

12. Nlattuni unreeraaya usoma makhalelo ni miteko ca Yesu?

¹² Nkumihe ukati wiira muupuwele makhalelo ni miteko caavaraawe Yesu. Napheelaka unswalela Yehova ratta, nihaana niikurumicaka untakiha Yesu, venci-venci ukati wo marikariko. (1 Pet. 2:21) Yesu khoothale ukati waawiirenlyaawe attharyaawe wiira yanhala waakhumelela masakha. (Luka 14:27, 28) Unookhalaru commo, uyo ancuwela wiira attharyaawe khayaahala uhiya umwiiwelela Yehova, toko uyova cahaahiilyaawe umwiiwelela. (Joau 16:33) Nsome sana-saana makhalelo a Yesu ni muupuwele mananna nnopheeleenyu untakiha khula nihuku.

13. Isiyani inlamuliyeehu unlepela Yehova ni nlattuni?

¹³ Ninaacuwela wiira ucuwela paahi myaha ca Nluku khuntosa. Ucuwela nnyo myahannyo pooti wuukaviherani utepa uncuwela Yehova ni utepa unfenta ni umwaamini. (1 Akor. 8:1-3) Ukati uneekurumiceenyu uhihiya uncuwela Yehova, munlepele wiira ookavihereni utepa umwaamini. (Luka 17:5) Uyo naahala waakhula ulompa winyu. Mwakhalanaka waamini woolipa, nlattu wo myaha ca Yehova ciitthucaleenyu, nyuuva nnaahala ukhitiri weettela citthu cinsomeenyu.—Tiya. 2:26.

14. Manannani apostolu Peturu coonihenryaawe ifayitaaya weettela citthu cineetthuceehu? (Nwehe ciicammo ilatarato.)

¹⁴ Apostolu Peturu ahoopela mwaha ntakihero na Nowee ni ahothoonyera ifayitaaya weettela citthu cineetthuceehu. Yehova ahomwiirela Nowee wiira anhala uwaana ucara wo maaci menci wiira aamalamalihe atthu oohinamaana o ule ukatyuule. Ucuwela paahi wiira Nluku aanaahala waamalamaliha atthu oohinamaana khawaahala umoopola Nowee ni amucyaawe. Noopuwelaka uyo mwahooyo, unaareera woona wiira Peturu ahovarela nteko moolumo aneera “yatekiyakoono ikalawa,” aacaka ukati wa Nowee uhinaaya uwa ucara wo maaci menci. (1 Pet. 3:20) Iyo inthoonyera wiira Nowee ni amucyaawe yaheettela itthu Nluku yaahimenryaaya waawiirenlyaawe wiira ateke ikalawa. (Mabere. 11:7) Peturu aholattaniha itthu yaapankilyaawe Nowee nuupattisiya. Uyo enre co: “Upattisiya, ulattanacale niiyo, ciicammo unaawoopolani nenna co.” (1 Pet. 3:21) Phimaana, pooti wanlattaniheehu wiikurumica winyu nyuuva wiira mwiitthenkace wiira mpattisiye nuwiikurumica wa Nowee naamucyaawe wiira ateke ikalawa. Manannani nyuuva cinlamuliyeenyu wiikurumica wiira mwiitthenkace wiira mpattisiye?

15. Nnohala uthoonyera cani wiira nyuuva khweeliini nhottharuwa?

¹⁵ Itthu yoopacera inlamuliyeehu upanka ukhanle uttharuwa itampi civaraleehu. (Mite. 2:37, 38) Hiiva ninhala ukhitiri upanka marukunuso muukumini wihu wakhalaka wiira khweeliini nihottharuwa. Nyuuva nhokhitiri uhiya upanka citthu cinonrusa Yehova caapankeenyu khalayi, toko urupihana woohiloka, unlya soone awula wuuluma citthu cooveeha? (1 Akor. 6:9, 10; 2 Akor. 7:1; Efesu 4:29) Wakhala wiira nyuuva nanlelo khannaaya ukhitiri uhiya nnyo citthunnyo, nhoocye; nhihiye wiikurumica. Munlepele ntthu noosomihani Ibiiblya wiira ookavihereni awula mwaalepele mahumu o wanlokoni. Wakhala wiira weeva ummirawo ni unkhala naasithumwana, waalepele wiira yuukavihere uhiya khula itthu yoohinamaana inoorikihela upattisiya.

16. Upanka citthu cinhala wuulipihacani mminepani unhela nhina isiyani?

¹⁶ Itthu ikhwaawe yuulupale cinene ukhanle upanka citthu cinhala wuulipihani mminepani. Nnyo citthunnyo cinhela nhina urwaa umikutthaanoni ni wiikurumica ukomentari. (Mabere. 10:24, 25)  Ni mwanceraka urwaa wuulalyeerani, mwiikurumice urwaa woohihiyerera. Mweekurumicaka uvara uyo nteko wowoopola ukumyuuyo, unaahala utepa wuucivelani. (2 Tim. 4:5) Ni wakhala wiira weeva ummiravo ni unkhala naasitthumena, wiikohe co: ‘Apaapa ni amaana ahaana yakikhanyererihaka wiira kirwee umikutthaano ni wuulalyeerani? Awula miiva veekha caka kinaalakelaka upanka nnyo citthunnyo.’ Ulakela veekha caa upanka nnyo citthunnyo unthoonyera wiira weeva uhaana waamini, unanfenta Yehova ni unaasukhurweela citthu cotheene cinoopankelaawe. Khampa cineeraaya Ibiiblya, upanka commo unkhala unswalela Nluku. Nimoolumelo makhwaawe, unkhala khampa unonvaha itthuvo Yehova. (2 Pet. 3:11; Mabere. 13:15) Citthu cotheene cinonvaheehu Yehova ninrimeehu wotheene ni cinlakeleehu upanka veekha cihu woohikhanyererihiya cinaatteeliha nrima cinene. (Nwehe ciicammo 2 Akorintu 9:7.) Unaanitteela nrima cinene wiikurumica unvaha Yehova citthu comaana cirineehu ni cinkhitiriihu upanka.

17-18. Itthuni yuulupale inhala wuukaviherani urwaa uhoolo mpaka wampattisiyeenyu, ni nlattuni? (Nwehe Miruku 3:3-6.)

¹⁷ Ukati uneetthenkaceenyu wiira mpattisiye, atthunaka anaahala wuukhumelelani marikariko. Atthu akhwaawe pooti wuutarawacani nlattu wo citthu nyuuva cinkupaliinyu. Akiina pooti wuurukunuwelani. (2 Tim. 3:12) Ciicammo, pooti ukhalaka wiira ihaavo itthu yoohinamaana inoorikani cinene uhiya upanka. Awula pooti wuuriipani nrima nlattu wo wuupuwela wiira khannohala ukhitiri wiirannyeeha mipica co mminepani ciihelenleenyu. Wakhala wiira nnyo phi citthu cinwiirani, isiyani inhala wuukaviherani uhoocya? Itthu yuulupale inhala wuukaviherani phi ila: “Unfenta Yehova.”

¹⁸ Unfenta winyu Yehova ikhanle itthu yofayita cinene. Iyo phi itthu yooreera cinene nyuuva irineenyu. (Nsome Miruku 3:3-6. d) Unfenta cinene Yehova unaahala wuukaviherani uvilela masakha o muukumini. Ibiiblya inawuuluma nifento nookhuluvelya Yehova ninaathoonyiheraawe atthu anonswalela. Nno nifentonno maanaaya wiira Yehova khanhala waanyanyala atthu anonswalela awula khanhala uhiya waafenta. (Isaa. 100:5) Nhiliyale wiira nyuuva mumpiye wiira nkhitiri utakiha makhalelo a Nluku. (Upha. 1:26) Vano manannani nyuuva nnohaleenyu ukhitiri ukhalana nifento nookhuluvelya toko Nluku?

19. Manannani nyuuva cinhaleenyu utepa usukhurweela citthu cotheene Yehova cinoopankelaaweni? (Nwehe Akalasiya 2:20.)

¹⁹ Itthu yoopacera inlamuliyeehu upanka wiira nikhalane nifento nookhuluvelya ukhanle usukhuru. (1 Atesal. 5:18) Khula nihuku, mwiikohe co: ‘Manannani Yehova cinooniheraawe wiira naakifenta?’ Vano, ukati unhaleenyu unlompa Yehova, nsukhurweele itthu yuupankenlyaawe. Yehova nawuufentani cinene ni cihaavo citthu uyova cinoopankelaaweni nyuuva veekheenyu paahi. Mmananihe ucuwelela nnyo citthunnyo khampa apostolu Paulu caacuwelenlyaawe. (Nsome Akalasiya 2:20. e) Mwiikohe co: ‘Miiva kinaapheela umoonihera Yehova wiira nimiiva ciicammo kinanfenta?’ Unfenta winyu Yehova phinhala wuukaviherani ukhotta upanka citthu cootakhala ni uvilela masakha. Ni nno nifentonno phinhala wuukaviherani uhihiya upanka citthu cinoolipihacani mminepani ni umoonihera mahuku otheene wiira nnanfenta cinene.

20. Unvaha Yehova ukumiinyu inkhala isiyani? Niireke iyo ikhanle itthu yuulupale inhaleenyu ulakela upanka?

²⁰ Nuuwakatyaaya, nlattu wonfenta winyu Yehova, nyuuva nnaahala upheela unlompa wiira munvahe ukumiinyu. Khampa nswali nvahale Yehova ukumyaawe, nyuuva nnaahala ukhalana niweherero nomaana: unswalela mpaka. Mwanvahaka Yehova ukumiinyu, nyuuva nnaahala unkhuluveliha unswalela cookhumelelakani citthu comaana ni hataa yookhumelelakani masakha. Unvaha Yehova ukumiinyu ninkhala nikhuluveliho nimpankeenyu ikwaha imoca paahi muukumini winyu. Khweeliini, iyo ikhanle itthu yuulupale inlamuliyeenyu upanka muukumini winyu. Masi nkoopuwelani ila itthwiila: Nhina citthu comaana cotheene nyuuva cinhaleenyu ulakela upanka muukumini winyu, unvaha Yehova ukumiinyu phi itthu yuulupale inhaleenyu ulakela. (Isaa. 50:14) Sotwani naahala umananiha uloloviha unfenta winyu Yehova. Uyo mpheela wiira nyuuva nhiye unvaresesa Yehova. Masi nhinhiyerere Sotwani ootthemakani! (Jó 27:5) Wakhalaka wiira unfenta winyu Yehova uholipa, nyuuva nnaahala ukhitiri wiirannyeeha itthu inkhuluvelihaleenyu uwakati wanvaheenyu ukumiinyu ni nnaahala utepa waapatthanana athumwaninyu Yehova.

21. Weeriyaka wiira upattisiya khunakhala uphiya umwiiso maanaaya isiyani?

²¹ Mwanvahaka Yehova ukumiinyu, nwuulumane mahumu o wanlokoni winyu wiira mpanke itthu inhaleeyo. Masi nhiliyale: “Upattisiya khunakhala uphiya umwiiso! Khweeliini, unkhala upacapaca paahi.” Mwapattisiyaka, nyuuva nnawancera unvarela nteko Yehova mpaka. Phimaana, ukhuma nenna co, nlipihace unfenta winyu Yehova. Mwiihelele mipika cinhala wuukaviherani wuncerera nno nifentonno. Upanka nnyo citthunnyo phinhala wuupiihani umpattisoni, nihuku nuulupale cinene no muukumini winyu! Masi nhiliyale wiira nwo ukhanle upacapaca paahi. Ninweherera wiira unfenta winyu Yehova ni Mwanawe uhihiye uvira wuunuwaka, mpaka wahoolo!