1-2. Manannani makhalelweehu cinwaaya yarukunuwaka napattisiyaka?

 UNAANITTEELA nrima napattisiyaka ni nanceraka upanka mphantte waamuci a Yehova. Ale ankhalana iyo iparakheeyo anaakupaleela itthu inhimyaaya moolumo a Davidi, enre co: “Ootteeliya nrima phuule nyuuva [Yehova] nonthanleenyu ni nomwiihaneenyu wiira akhale wapuwani winyu.”—Isaa. 65:4.

² Yehova khammwiihana khula ntthu nomoonaawe wiira akhale wapuwani wawe. Toko niitthucileehu mwaha uvinre, uyo naawaattamela ale anoonihera wiira ampheela ukhalana upatthani woolipa nuuyova. (Tiya. 4:8) Nyuuva mweevahereraka wa Yehova ni mwapattisiyaka, nnaamwaattamela Yehova ni nnaakhalana upatthani woolipa nuuyova. Pooti wankhuluveleenyu wiira mwapankaka iyo itthwiiyo naahala “wuumwaruselani iparakha mpaka uhuhalelani hataa itthu.”—Mal. 3:10; Jer. 17:7, 8.

3. Makristau avaherenre ukumyaaya wa Yehova ni apattisiyaka isiyani nlamuliyaaya upanka? (Eklesyaste 5:4, 5)

³ Ninaacuwela wiira upattisiya ukhanle itthu yoopacera paahi. Nyuuva mwapattisiyaka nhaana mwiikurumicaka upanka itthu munkhuluvelihileenyu Yehova ukati mwanvaherereenyu ukumiinyu, hataa cuukhumelelakani citthu cinttehatteha waamini winyu. (Nsome Eklesyaste 5:4, 5. a) Khampa ntthari a Yesu, nyuuva nhaana muntakihaka ni mweettelaka malamulo a Yesu. (Mat. 28:19, 20; 1 Pet. 2:21) Ula mwahoola unaahala wuukaviherani upanka nnyo citthunnyo.

 NHIHIYE UNTTHARA YESU HATAA CUUKHUMELELAKANI CITTHU CINTTEHATTEHA WAAMINI WINYU

4. Manannani atthari a Yesu cincisaaya “nipotto naya noottaruseliya”? (Luka 9:23)

⁴ Mwapattisiyaka, khanhala uhiya wuukhumelelani masakha muukumini winyu. Yesu ahoonihera wiira attharyaawe yanhala ukusa “nipotto nawe noottaruseliya.” Ni ayo yaahala ukusa nno nipottonno “khula nihuku.” (Nsome Luka 9:23. b) Niireke wiira Yesu apheela uhimya wiira attharyaawe yaahala ukhala ukati wotheene yahuvaka? Mena. Uyo apheela waahimyeera wiira ayo yanhala waakhela iparakha, masi ciicammo yanhala waakhumelela masakha. Ni masakha makhwaawe yaahala waakhumelela, yaahala ukhala ooweerya cinene.—2 Tim. 3:12.

5. Iparakhani Yesu caakhuluvelihilyaawe ale aneekurumica uleva citthu caya wiira antthare?

⁵ Nyuuva atthunaka nhopaca ulupatthiya naamuciinyu, awula nhooleva citthu cikhwaawe khampa mihakhu wiira nhoolelihere Umwene wa Nluku khampa itthu yoopacera muukumini winyu. (Mat. 6:33) Wakhala wiira nhopanka commo pooti wankupaliinyu wiira Yehova hoona citthu comaana mpankileenyu. (Mabere. 6:10) Pooti ukhalaka wiira nyuuva nhoona wiira moolumo a Yesu akhanle eekhweeli, ukati wenryaawe co: “Khaavo hiile inupaawe, asunnawe, anumwaane, athumwaane, asaanaawe awula imatta cawe, nlattu wawaka ni nlattu wohapari comaana, hinhala waakhela imaara cene 100 nenna va alupatthiyakoono—inupa, asunnawe, anumwaane, athumwaane, asaanaawe ni imatta cawe—ni uhoolo ukumi woohimala.” (Mark. 10:29, 30) Iparakha nyuuva caakhenleenyu khweeliini cikhanle cinci uvikana citthu cotheene caalevileenyu.—Isaa. 37:4.

6. Nlattuni nyuuva nnolamuliyeenyu wiikurumica unyema “citthu cootakhala cinciveliha irutthu” mwapattisiyaka?

⁶ Mwapattisiyaka, atthunaka unaahala wuurikelani unyema citthu cinciveliha irutthu. (1 Jo. 2:16) Masi, nanlelo nyuuva nnohala ukhala ucuulu wa Atamu. Ukati nkiina nyuuva pooti wiicoona khampa apostolu Paulu ciicoonnaawe. Uyo hantikha co: “Miiva wanrimani waka, unaakicivela venci cinene uttharelela nlamulo na Nluku, masi kinoona ikuru ikhwaawe yo matampi mwiirutthuni waka yaananaka ikuru ineettihera moopuwelelwaaka ni inkipurulela upanka matampi.” (Aroo. 7:22, 23) Nyuuva atthunaka unaawuripani nrima nlattu woowuriikani unyema citthu cootakhala atthunaka cuucivenleeni upanka. Masi wuupuwela itthu ikhuluvelihileenyu ukati mwiivaherereenyu ukumiinyu wa Yehova unaahala ulipihaca itthu nkhuluvelihileenyu ni unyema upanka citthu cootakhala. Khweeliini itthu ikhuluvelihileenyu ukati mwiivaherereenyu inaahala urukunusa ukumiinyu wiira nkhitiri unyema upanka citthu cootakhala. Manannani?

7. Uvaherera ukumiinyu wa Yehova unhala wuukaviherani cani uhihiya umwiiwelela?

⁷ Nyuuva mweevahereraka wa Yehova, nnaawiira wiikhotta mwaaneeneenyu. Nwo wiikhottannwo maanaaya wiira nhaana nkhottaka citthu cinoocivelani mwaaneeneenyu cincuweleenyu wiira cinanrusa Yehova. (Mat. 16:24) Phimaana, yookhumelelakani masakha, nyuuva khannohala urihakaca ukati mmananihaka wuupuwela itthu yoohala upanka ni nyuuva nnaahala ukhotta upanka citthu cotheene cootakhala—ni nnohala utthuna upanka itthu imoca paahi umwiiwelela Yehova. Nyuuva nnaahala ulipihaca ulakela winyu upanka citthu cinoncivela Yehova. Mwapankaka commo nyuuva nnohala ukhala khampa Jó. Unookhalaru wiira uyo yahonkhumelela masakha menci oorika cinene, uyo aheera co: “Akinhala uhiya woonihera imaani!”—Jó 27:5.

8. Manannani wuupuwela ulompa winyu ukati waavaherereenyu ukumiinyu wa Yehova cinhalaaya wuukaviherani unyema upanka citthu cootakhala?

 ⁸ Moopuwelaka ulompa winyu ukati mweevaherereenyu wa Yehova, nyuuva nnaahala ukhalana ikuru wiira nkhotte wookhula itthu yootakhala. Wootakihera, niireke wiira nyuuva mwaahala unthonkoca mwanthiyana awula mwanlopwana ahikhanle amwaarinyu awula awannyinyu? Khamwaahala upanka commo! Nyuuva nhokhotta iyo itthwiiyo khalayiiru. Upanka commo nyuuva nnaahala unyema ukhala ooriipiya nrima nlattu woohihiyerera citthu cootakhala coonuwacaka wanrima winyu. Nyuuva nnaahala ukhotta weetta iphiro yaatthu oohinamaana.—Miru. 4:14, 15.

9. Manannani ulompa ni wiivaherera winyu unhalaaya wuukaviherani weesa nipuro noopacera miteko co mminepani?

⁹ Vano mwaaphwaanyaka nteko unhala uwiirihani uloova awula ucompa umikutthaanoni nnohala upankani? Nyuuva khannohala wuupuwelaca imaara piili wiira nlakele itthu yoohala upanka. Kontha nyuuva nhinaaya uphwanya uyo ntekooyo nyuuva nhokhotta khalayiiru iyo inanna yontekweeyo, ala manannaala khannohala urihakaca ukati muupuwelaka itthu yoohala upanka awula inanna yoopanka. Khampa Yesu waalakenlyaawe waatteeliha nrima athumwaane, nyuuva ciicammo nnaahala ukhotta upanka khula itthu nnooneenyu wiira inaahala unriipiha nrima Nluku munvaherenreenyu ukumiinyu.—Mat. 4:10; Joau 8:29.

10. Yehova nhala wuukaviherani cani uhihiya untthara Yesu mwapattisiyaka?

¹⁰ Khweeliini, citthu cinttehatteha waamini winyu cinawuvahani iparakha cinoonihera wiira nholakela untthara Yesu. Mwapankaka commo nyuuva pooti wankupaliinyu wiira Yehova naahala wuukaviherani. Ibiiblya ineera co: “Nluku okhuluvelya ni uyova khanhala wuuhiyererani nttehiyaaka waahihalenyu ukhitiri, masi mwaattehiyaaka uyo ciicammo naahala upanka itthu wiira nkhitiri uvilela.”—1 Akor. 10:13.

 MANANNANI CIHINHALEEHU UHIHIYA UNTTHARA YESU?

11. Manannani nnolamuliyeenyu uhihiyerera untthara Yesu? (Nwehe ciicammo ilatarato.)

¹¹ Yesu aanawiikurumica cinene ni khaahiya unlompa Yehova. (Luka 6:12) Inanna imoca yoohihiya untthara Yesu nnapattisiyeene ukhanle wiikurumica upanka citthu cinniiriha utepa umphiyeerya Yehova. Ibiiblya ineera: “Hataa ukhalaka wiira nihothoonyera wiira ninaarwaa uhoolo, niikurumice wiira nihihiye weetta iyo iphirweeyo.” (Afili. 3:16) Nyuuva nnaahala wiiwa citthu ciwiirannyenle mayamunneehu ni mayanuunwiihu aneekurumica cinene unvarela nteko Yehova. Atthunaka ayo ahopaca usoma icikola yaanamalalyeera u mwene awula yahothamela nipuro ninthwaaya anamalalyeera. Nyuuva mwakhitiriki wiihelela mpika nnyo citthunnyo, mpanke woohiweherera. Apoovu a Yehova anaapheela wuncerera cinene nteko unonvarelaaya Yehova. (Mite. 16:9) Vano wakhalaka wiira nyuuva khannohala ukhitiri upanka iyo itthwiiyo? Nhuupuwele wiira ale ankhitiri upanka nnyo citthunnyo ahaana ifayita wuuvikanani nyuuva. Itthu yuulupale cinene ukhanle nyuuva woonihera uvilela. (Mat. 10:22) Nhivyaavyeehe iparakha nrineenyu yonswalela Yehova mpankaka ni munvahaka ile nkhitiriinyu. Mwapankaka commo, ankhala mananna oohihiyerera untthara Yesu nnapattisiyeene.—Isaa. 26:1.

12-13. Isiyani nnolamuliyeenyu upanka moonaka wiira wiikurumica winyu unaavukuwa? (1 Akorintu 9:16, 17) (Nwehe ciicammo ikwaaturu ineera “ Nhihiyerere wiikurumica.”)

¹² Vano wakhalaka wiira nuuwakatyaaya, nyuuva nnawoona wiira ulompa winyu unkhala woohitthenkaciya saana ni ntekweenyu woolalyeera khurwaa uhoolo? Awula, moonaka wiira usoma winyu Ibiiblya khunoocivani toko khalayi? Cawiiranyelakani nnyo citthunnyo nyuuva nnapattisiyeene, nhuupuwele wiira Yehova hohiya wuuvahani nnepaawe wowaarya. Khampa pinaatamu oopahuwa, nnyo citthunnyo cinaahala  uwiirannyeelani. Moonaka wiira wiikurumica winyu uhancera uwukuwa, mmuupuwele apostolu Paulu. Waanookhalaru wiira apostolu Paulu anawiikurumica untakiha Yesu, cihaavo ikwaha caheecoonaawe ukhalana ikuru cinci. (Nsome 1 Akorintu 9:16, 17. c) Uyo aheera co: “Hataa mi kipankaka iyo itthwiiyo uhikicivelaka, nanlelo kinaakhuluveliya ni Nluku wiira kivare ula ntekoola.” Nimoolumelo makhwaawe, Paulu aholakela uvara ntekwaawe hataa uncivaka awula uhincivaka uvara uyo ntekooyo.

¹³ Nhilakele upanka citthu nlattu wo mananna cineecooneenyu paahi. Nlakele upanka citthu comaana hataa mwiicoonaka uhikhala saana. Citthu cinhaleenyu ulakela upanka cakhalaka comaana wahoolo pooti uwiirihani wiicoona ukhala saana. Hataa yiirannyaaka isiyani mwiikurumice upanka itthu inhala wuulipihani mminepani ni upanka nnyo citthunnyo cinaahala wuukaviherani uhihiya untthara Yesu nnapattisiyeene. Mayamunneenyu ni mayanuunwiinyu yoonaka uvilela winyu ni unswalela winyu Yehova, ayo anaahala ukhala oolipihiya.—1 Atesal. 5:11.

“NHIHIYE WIIWEHAWEEHA . . . NHIHIYE WIIPANKELA MWAAVI”

14. Nyuuva nhaana nkumihaka ukati wiira mpanke isiyani ni nlattuni? (2 Akorintu 13:5)

¹⁴ Nnapattisiyeene, ciicammo unaahala ureera wiiwehaweha mananna ciirinnyu. (Nsome 2 Akorintu 13:5. d) Nhihiyerere ukumiha ukati wiira mwiiwehawehe mananna ciryaaya ukumiinyu ni citthu cimpankeenyu, wiira moone wakhala wiira nnaakhitiri ulompa woohihiyerera, usoma Ibiiblya, urwaa umikutthaanoni ni wuulalyeerani. Mmananihe ucuwelela mananna owiikurumica upanka cinene nnyo citthunnyo. Wootakihera, mwiikohe co: ‘Mi kinaakhitiri wiitthuciha atthu akhwaawe ikhweeli cuulupale co mbiiblyani? Citthuni cinlamuliyaaka upanka wiira ukicivele ulalyeera? Ukati woolompa, kinanhimerya Yehova citthu cinlepelaaka ? Citthu cinonlepelaaka Yehova kanlompaka kinawonihera wiira kinaakhuluvela? Kinaakhitiri uhicompa awula uhilova umikutthaanoni ni isiyani inlamuliyaaka upanka wiira kihitthale ni wiira kikomentari umikutthaanoni?’

15-16. Itthu yaamwiirannyenle munna Robert, iwiitthucihileni isiyani?

¹⁵ Nyuuva ciicammo nnaahala upanka saana mweewehehaka mananna cinooneleenyu cootakhala cinoorikani ukhotta upanka. Munna mmoca neehaniya Robert naahimya itthu imoca yaamwiirannyenle, uyo eera: “Ukati waarinaka  myaakha 20. Uhaavo nteko wavaraka ukati vakaani, nihuku nimoca umalihawaka nteko nthiyana mmoca anvaranaka nteko ahokilattula urwaa uwannyawe, ni uyo enre wiira naahala ukhala atthu eeli ni nanhala uthuka cinene. Wiipaceroni, mi kahonlepela nswammaaha ni kahomwiirela mi akaahala urwaa kontha akaahala ukhalana ukati. Masi wahoolo mi kahonhimeryeeha wiira iyo itthwiiyo akintthuna ni nlattuni.” Munna Robert ahokhotta upanka itthu yootakhala ni unamphwanela uttottopeliya. Masi wahoolo uyo ahoopuwela itthu yeerannyeele ni aheera wiira wiipaceroni khapankile saana. Uyo heera: “Mi akaakhotteehile saana ile itthwiile toko caapankilyaawe Yusufu ukati waakhanyererihiyaawe naamwaara a Potifaari. (Upha. 39:7-9) Khweeliini, kahokhala ootikhinihinya nlattu wowoona mananna caakirikenlyaaya ukhotta. Iyo itthwiiyo yahokikavihera woona wiira mi kahaana kilipihacaka upatthannyaaka ni Yehova.”

¹⁶ Mweewehehaka toko caapankilyaawe munna Robert, nyuuva nnaahala wiikavihera. Hataa wakhalaka wiira nyuuva nhokhotta upanka itthu yootakhala, mwiikohe co: ‘Kiireke kihoviriha ukati mwinci wiira kikhotte?’ Moonaka wiira ihaavo nnolamuliyeenyu ulokihaca nhina makhalelweenyu nhikhale ni masukhuli. Wuutteeleni nrima nlattu wiira nhoonelela itthu nyuuva yuurikelani ukhotta. Munlompe Yehova wiira ookavihereni ukhitiri unyema yeeyo itthwiiyo ni mpanke citthu cinhala wuukaviherani ulipihaca yolakeleenyu wiiwelela malamulo a Yehova.—Isaa. 139:23, 24.

17. Manannani umwiiwelela winyu Yehova cinhalaaya uttitthimiha ncina nawe?

¹⁷ Ihaavo-tho itthu yaamwiirannyenle munna Robert. Uyo heera: “Ukati nthiyana anvaranaka nteko wakilattunlyaawe, mi kakhottaka, Uyo ahokiirela co: ‘Mi kanuutteha paahi.’ Mi kahekoha nlattuni wakittehaawe. Ni uyo ahokiirela wiira ahaana mpwanaawe ahiile ukhala Saahiti a Yehova, amwiirenle wiira amirawo masaahiti a Yehova otheene anaapanka citthu cootakhala, masi anaavithavitha. Vano, nthiyana anvaranaka ntekooyo, aheera wiira anaahala ukitteeha wiira oone wakhala wiira iyo yaari ikhweeli. Ule ukatyuule, mi wahokitteela nrima nlattu wottitthimiha ncina na Yehova.”

18. Isiyani nyuuva nlakenleenyu upanka nnapattisiyeene? (Nwehe ciicammo ikwaaturu “ Myaha cinhala wuucivelani.”)

¹⁸ Mwanvahereraka Yehova ukumiinyu ni mwapattisiyaka, nyuuva nnawoonihera wiira nnaapheela ureeriha ncina nawe hataa yiirannyaaka isiyani. Ni pooti wankhuluveleenyu wiira Yehova naawoona masakha anookhumelelani ni citthu cinttehatteha waamini winyu. Uyo naahala ucaaliha wiikurumica winyu wiira nhihiye umwiiwelela. Mwaamini wiira nnepaawe wowaarya unaahala wuuvahani ikuru wiira nkhitiri upanka iyo itthwiiyo. (Luka 11:11-13) Nkaviheriyaka ni Yehova, nyuuva nnaahala ukhitiri uhihiya untthara Yesu nnapattisiyeene.