MWAHA WOOSOMIYA 13
NCIPO 127 Mweettelo Aka Okhaleke Woowi Sai?
Nhikhale ni masukhuli—Yehova naawoonani ukhala ntthu omaana
“Mi kinaamwaamini.”—LUKA 3:22.
ITTHU INHALEEHU WIITTHUCA
Umalamaliha moopuwelelo oohinamaana anniriiha waannyihera, ni ucuwela wiira Yehova naanivaha ifayita.
1. Aswali akhwaawe a Yehova atthunaka aneecoona cani?
ISAALIMU 149:4 inaanimaaliha: “Yehova naaciveliya naapoovwaawe.” Masi ukati nkiina, atthu akhwaawe anaakhala nimasukhuli venci ni wancera wuupuwela co: Kiireke miiva Yehova naakoona ukhalana ifayita?’ Hataa aswali ookhuluvelya a Yehova okhalayi wahaavo ukati weeconnyaaya commo.—1 Sam. 1:6-10; Jó 29:2, 4; Isaa. 51:11.
2. Phaapani Yehova anwoonaawe ukhala atthu omaana?
2 Ibiiblya inawoonihera sana-saana wiira apinaatamu oopahuwa pooti ukhitiri untteeliha nrima Yehova ni wooniya ukhala atthu omaana nuuyova. Manannani? Nihaana nooniheraka umwaamini Yesu ni nihaana nipattisiyaka. (Joau 3:16) Napankaka commo, ninawoonihera wiira nihottharuwa itampi cihu ni nihonkhuluveliha Yehova wiira ninaahala upanka ile impheelaawe. (Mite. 2:38; 3:19) Yehova unantteela nrima cinene napankaka commo wiira nimwaatanane. Neekurumicaka upanka itthu inkhuluvelihileehu, Yehova naahala unoona ukhala atthu omaana ni asipatthannyaawe.—Isaa. 25:14.
3. Ninhala wiitthucani nhina ula mwahoola?
3 Vano, nlattuni atthu akiina anoopuwelaaya wiira khanooniya ukhala atthu omaana ni Yehova? Isiyani Yehova impankaawe inoonihera wiira uyo naanoona ukhala atthu omaana? Ni ninhala ulipihaca cani ukhuluvela wihu wiira Yehova unantteela nrima aniwehaka?
NLATTUNI ATTHU AKIINA ANOOPUWELAAYA WIIRA KHANOONIYA UKHALA ATTHU OMAANA NI YEHOVA?
4-5. Hataa nyuuva nhiicoonaka ukhalana ifayita, isiyani inlamuliyeenyu ukupali?
4 Mayamunna enci khaneecoona ukhalana ifayita ikhumelo inamwannyaaya. (Isaa. 88:15) Munna mmoca neehaniya Adrián heera: “Ukhuma nenne nokhalayi, mi kinoopuwela wiira akirina ifayita. Waaryaaka, mi kihopaca unlompa Yehova ni unlepela wiira amucyaaka arwee yakele upeephoni. Masi miiva veekhacakaru akeecoona wiira unaakiphwanela ukela upeephoni.” Munna nkiina neehaniya Tony kheetthucile ikhweeli ikhumelo inamwannyaawe. Uyo heera: “Apaapa ni amaama khayaapacile thanku ukiirela wiira anaakifenta awula yaanaaciveliya nimiiva. Khula ukati, ayo yaanawoonihera wiira citthu cotheene akaapanka saana.”
5 Wakhalaka wiira uhaavo ukati nyuuva unancereenyu wuupuwela wiira khanrina ifayita, nhiliyale wiira Yehova mwaaneennyaawe, phuuthanlileni wiira munswalele. (Joau 6:44) Yehova nawoona citthu comaana cirinaawe khula ntthu. Uyo naacuwela sana-saana nrimeehu. Ni mananna cinniweheraawe anaavirikana nimananna cineewehereehu asineeneehu. (1 Sam. 16:7; 2 Ikor. 6:30) Phimaana, mwaamini ni nkupali wiira Yehova khanootha, eeraka wiira naawoonani ukhalana ifayita venci.—1 Jo. 3:19, 20.
6. Paulu oopuwelaka citthu caavonyihilyaawe khalayi, eecoona cani?
6 Nihinaaya wiitthuca ikhweeli co mbiiblyani, atthunaka cihaavo citthu caapankileehu cinniiriha wuupuwela wiira khaninakhala atthu omaana. (1 Pet. 4:3) Ni pooti ukhalaka wiira atthu akhwaawe yancenre unswalela Yehova khalayi, cihaavo citthu cootakhala nanlelo cinaarika uhiya upanka. Vano nyuuva? Niireke wiira uhaavo ukati unoopuwelakeenyu wiira Yehova khoolevelenleni? Wakhala commo, unaahala ureera wuupuwela wiira hataa aswali ookhuluvelya a Yehova yahoopuwela commo. Wootakihera, apostolu Paulu oopuwelaka citthu caavonyihaawe, aakhala nimasukhuli menci. (Aroo. 7:24) Ninaacuwela wiira apostolu Paulu ahottharuwa itampi cawe ni ahopattisiya. Waanookhalaru commo, uyo eera wiira ‘phaatepile uhikhalana ifayita iriyari yo maapostolu otheene’ ni phaari ‘namatampi oopacera.’—1 Akor. 15:9; 1 Tim. 1:15.
7. Isiyani ninlamuliyeehu ukupali?
7 Yehova heera wiira nattharuwaka itampi cihu, uyo naahala unilevelela. (Isaa. 86:5) Phimaana, wakhalaka wiira khweeliini nihottharuwa itampi caavanreehu, nikupali wiira Yehova nohimya ikhweeli—uyo honilevelela.—Akol. 2:13.
8-9. Isiyani inhala unikavihera uhiya wuupuwela wiira Yehova khantteeliya nihiiva naahivareke cinene ntekwaawe?
8 Otheene cihu nimpheela unvarela nteko Yehova cinene. Masi ukati nkiina, nlattu wo wuuluvala awula uweryaaciya, hiiva khaninkhitiri uvara cinene nteko wa Yehova toko cimpheeleehu. Nlattu wo iyo itthwiiyo, hiiva atthunaka ninawancera wuupuwela wiira Yehova khannoona ukhala atthu omaana, kontha khaninvara ntekwaawe cinene. Arokorihu amoca aneehaniya Amanda aheera: “Ikwaha cinci, mi kinopuwelaka wiira kihaana kivaraka cinene nteko wa Yehova wiira kintteelihe nrima. Phimaana, kinaamananihaka upanka citthu cihinkhitiryaaka. Ni kooceelaka, unaakiriipa nrima ni kinoopuwelaka wiira akikhitinri untteeliha nrima Yehova.”
9 Ninhala ukhitiri cani uhiya wuupuwela wiira khaninvara cinene nteko wa Yehova. Nhiliyale ila itthwiila: Yehova khannilepela ni khannikhanyereriha upanka citthu cihinkhitiriihu. Uyo naasukhurweela khula itthu inompankeleehu, nampankelaru ile inkhitiriihu. Ciicammo, nyuuva pooti uwuupuwela atthu o mbiiblyani yaapankile ile yaakhitiryaaya. Mmuupuwele Paulu. Uyo ahokhala myaakha cinci avaraka nteko cinene, eettaka mapuro oottayi ni ahokavihera utthenkaca maloko menci. Masi ukati makhalelwaawe waarukunuwilyaaya ni wahaalamuliyaawe ulalyeera cinene toko caapankaawe khalayi, niireke wiira Yehova ahancera uhitteeliya nrima nlattu wa Paulu? Mena. Paulu khaahiile wiikurumica upanka citthu caakhitiryaawe ni Yehova ahoncaaliha. (Mite. 28:30, 31) Inanna imocaaru, pooti uphiya ukati hiiva uhikhitiriihu uvara cinene nteko wa Yehova toko caavareehu khalayi. Itthu yofayita cinene khunakhala uvara venci nteko wa Yehova, masi ukhanle upheela wihu umpankela ile inkhitiriihu. Vano, nttwee noone manannani Yehova nooniheraawe wiira naanoona ukhala atthu omaana.
ISIYANI YEHOVA IMPANKAAWE INOONIHERA WIIRA UYO NAANOONA UKHALA ATTHU OMAANA?
10. Ninhala ‘umwiiwa’ cani Yehova eeraka wiira naanoona ukhala atthu omaana? (Joau 16:27)
10 Mbiiblyani. Yehova unancivela uwoonihera aswalyaawe wiira nawaafenta ni unantteela nrima awehaka citthu cimpankaaya. Ibiiblya inawuuluma ikwaha piili Yehova aamwiirenlyaawe Yesu wiira uyo khanle mwanawe, nonfentaawe ni nomwaamiinyaawe. (Mat. 3:17; 17:5) Nyuuva wanhala wuucivelani umwiiwa Yehova eeraka commo awacakani nyuuva? Mahukwaala, hi khanimmwiiwa Yehova oolumaka wiirimu. Masi uyo nonuulumana mbiiblyani. Nasomaka moolumo a Yesu yaahimenryaawe attharyaawe, unkhala khampa ninaamwiiwa Yehova anuulumelaka ayo moolumwaayo. (Nsome Joau 16:27. a) Yesu ahaatakiha sana-saana Athumwaane. Phimaana, nasomaka citthu comaana Yesu caawuulumenlyaawe atthu oopahuwa, hiiva pooti wuupuwela khampa wiira Yehova phinooluma nnyo citthunnyo.—Joau 15:9, 15.
Yehova naanoona ukhalana ifayita nimananna oovirikana (Nwehe iparaagarafu 10)
11. Kontha isiyani masakha annikhumelela khanthoonyera wiira Yehova hohiya unoona ukhala atthu omaana? (Tiyaku 1:12)
11 Nhina wo citthu cinnipankelaawe. Khula ukati, Yehova naawoonihera wiira naapheela unikavihera. Wootakihera, uyo naanivaha citthu cimpheeleehu, toko iyoolya ni citthu cikiina. Ukati nkhwaawe, Yehova pooti uhiyerera yanikhumelelaka masakha, toko cankhumelenlyaaya Jó. (Jó 1:8-11) Masi uniphwanya masakha khunthoonyera wiira Yehova hohiya unoona ukhala atthu omaana. Uhiya commo, uyo unkhala ukati wo woonihera wiira ninanfenta ni ninankhuluvela cinene Nluku. (Nsome Tiyaku 1:12. b) Ni anikaviheraka wiira nikhitiri uvilela, hi ninawoona wiira uyo khweeliini naanifenta.
12. Itthu iwiirannyenle amunna Dmitrii iwiitthucihileni isiyani?
12 Moone itthu yaawiirannyenle amunna amoca u Ásia aneehaniya Dmitrii. Ayo wahomala nteko waavaraaya ni yahokhala myeeri cinci woohikhitiri umphwanya nteko nkiina. Phimaana, yaholakela wuncerera ukati waavirihaaya yalalyeeraka. Upanka waya commo, yahoonihera unkhuluvela Yehova. Cahovira-tho myeeri cinci, masi nanlelo khaayaakhitinri uphwanya nteko. Vano, yahancera uwerennya cinene, mpaka uhikhitiri-tho wunwa wankorini. Ayo yaahopacera wuupuwela wiira khayaarina ifayita wapuwani waya khampa ntheli ni nnyari. Wahophiya ukati waapacenryaaya wiikoha wakhala wiira Yehova khaahiile uwoona ukhala ntthu omaana. Nihuku nimoca uhiyu, mwanaya mwanthiyana ahocisa nikhanta nantikhaciye moolumo a Isaiya 30:15, ineera: “Ikurwiinyu inhala ukhala umaala winyu ni ukhuluvela winyu.” Uyo ahaavaha nno nikhantanno ni ahowiirela: “Paapa, mwaahiicooneke saana, muupuwele ila iveeruswiila.” Amunna Dmitrii yahoopuwela wiira Yehova khaahiile waakavihera, kontha amucyaaya khayaathwaa iyoolya, yaahaana ikuwo ni inupa. Amunna Dmitrii aheera: “Itthu yaalamuliyaaka upanka waari paahi umaala ni uhihiya unkhuluvela Nlukwaaka.” Nyuuva yoophwanyakani masakha toko ayo, nkhuluvele wiira Yehova naahala wuuwacerani ni wuukaviherani uvilela.
Yehova naanoona ukhalana ifayita nimananna oovirikana (Nwehe iparaagarafu 12) e
13. Phaapani Yehova anaakurumicaawe wiira anoonihere wiira uyova naanoona ukhala atthu omaana?
13 Mayamunneehu. Yehova pooti waakurumica mayamunneehu wiira anoonihere wiira naanoona ukhala atthu omaana. Uyo pooti waakurumica mayamunna akhwaawe wiira yuulume itthu inhala unilipiha ukati umpheeleehu ulipihiya. Iyo itthwiiyo yahowiirannyeela anuunwiihu amoca ankhala u Ásia ukati waakhumelenlyaaya masakha. Ayo yahokhala woohinteko ni yahowerennya cinene. Vano, awannyaya yahovara itampi yuulupale ni yahohiya ukhala humu o wanlokoni. Ayo aheera: “Mi akaacuwela nlattuni citthu cotheene nnyo ceerannyaaya. Mi kahancera wuupuwela wiira atthunaka ihaavo itthu yootakhala yaapankilyaaka ni Yehova aanooriipiya nrima nlattu wawaka.” Ayo anuunwaayo yahonlompa Yehova ni yahonlepela wiira awoonihere wakhala wiira khweeliini aanawaafenta. Isiyani Yehova yaapankilyaawe? Anuunwiihu aheera: “Mahumu yahokuulumana ni yahokikhuluveliha wiira Yehova naakifenta cinene.” Nuukatyaaya, ayo anuunwaayo yahonlepela Yehova wiira aakavihere. Ayo ahohimya, yiiraka co: “Nihuku nanlompilyaaka Yehova, mi kahaakhela iwarakha yo mayamunna o wanlokoni. Iyo iwarakheeyo yahokimaaliha. Ukati waasomaaka, mi kaanawoona wiira Yehova ahokiviriyana.” Khweeliini, ukati nkiina, Yehova nawaakurumica mayamunneehu wiira anoonihere wiira naanoona ukhala atthu omaana.—Isaa. 10:17.
Yehova naanoona ukhalana ifayita nimananna oovirikana (Nwehe iparaagarafu 13) f
14. Manannani-tho Yehova nooniheraawe wiira naanoona ukhala atthu omaana?
14 Yehova ciicammo nawoonihera wiira naanoona ukhala atthu omaana aakurumicaka mayamunna wiira anivahe ikano cimpheeleehu. Wootakihera, Yehova ahonruma apostolu Paulu wantikha iwarakha 14 ni uveleerihera maloko. Nhina nnyo iwarakhannyo, Paulu ahooluma ikano woohikhuwakhuwa, masi ooniheraka waafenta mayamunna. Masi nlattuni Yehova wanrumilyaawe Paulu wantikha ikano toko nnyo? Kontha Yehova khanle nnyari ooreera nrima ni uyo nawaalaka asaanaawe anaafentaawe. (Miru. 3:11, 12) Phimaana, nalakiyaka niikano cinkumihiya mbiiblyani, khunakhala wiira Yehova hohiya unoona ukhala atthu omaana, masi inkhala itthu inoonihera wiira uyo naanifenta. (Mabere. 12:6) Manannani-tho makiina Yehova nooniheraawe wiira naanoona ukhala atthu omaana?
CITTHU CIKIINA CINOONIHERA WIIRA YEHOVA NAANOONA UKHALA ATTHU OMAANA
15. Phaapani Yehova naavahaawe nnepaawe wowaarya, ni iyo innikupaliha isiyani?
15 Yehova nawaavaha nnepaawe wowaarya ale anwoonaawe ukhala atthu omaana. (Mat. 12:18) Mwiikohe co: ‘Miiva kinaakhitiriki woonihera makhalelo o nhokorokho wo nnepa wowaarya?’ Munnokhitiri woona wiira nna co muntthu oopica urusiya uvikana ukati waakhanleenyu phiyaaru Saahiti a Yehova? Mwakhitiriki woonihera makhalelo omaana o nhokorokho wo nnepa wowaarya, nyuuva nnaahala utepa ukupali wiira Yehova naawoonani ukhala ntthu omaana!—Nwehe ikwaaturu “ Makhalelo o nhokorokho wo nnepa wowaarya akhanle . . . ”
Manannani nyuuva nnohaleenyu woona wiira Yehova naawuvahani ifayita? (Nwehe iparaagarafu 15)
16. Phaapani Yehova yaakhuluvenlyaawe wiira alalyeere ihapari comaana, ni nyuuva nneecoona cani nlattu woocuwela iyo? (1 Atesalonika 2:4)
16 Yehova naavahacera paahi ulalyeera ihapari comaana ale anwoonaawe ukhala atthu omaana. (Nsome 1 Atesalonika 2:4. c) Moone manannani anuunwiihu aneehaniya Jocelyn caaphwanyenryaaya ifayita ulalyeera ihapari comaana. Nihuku nimoca, ayo yonwile unaariipile nrima. Ayo aheera: “Mi akaarina ikuru hataa vakaani ni akeecoona ukhalana ifayita. Masi mi kaari piyoneera ni naari nihuku naka noorwaa wuulalyeerani. Vano kaholompa ni kahorwaa wuulalyeerani.” Yoole uwicisuule, anuunu Jocelyn yahaacuwela athiyana mmoca aneehaniya Mary. Ayo yaari athiyana ooreera nrima ni yahotthuna usomihiya Ibiiblya. Uvira waya myeeri, ayo athiyanaayo yahohimya wiira nihuku anuunu Jocelyn naaphwanyilyaaya wiira yaalalyeere, ayo yahonlompa Nluku yanlepelaka wiira aakavihere. Anuunu Jocelyn yiitthucenre isiyani iyo itthwiiyo? Ayo aheera: “Waakhala toko Yehova aakiirela co: ‘Mi kinaawaamini ukhala ntthu omaana.’” Hi ninaacuwela wiira ahaavo atthu ahinhala utthuna uniiwelela naalalyeeraka, masi hi pooti ukhuluvela wiira Yehova naakhala ootteeliya anoonaka neekurumicaka wiira naalalyeere akhwiihu ihapari comaana.
Manannani nyuuva nnohaleenyu woona wiira Yehova naawuvahani ifayita? (Nwehe iparaagarafu 16) g
17. Itthu anuunu Vicky yuulumilyaaya yaacaka woopoliya wihu iwiitthucihileni isiyani? (Isaalimu 5:12)
17 Yehova ahotthenkaca woopoliya wihu ni Yesu Kristu wiira aakavihere ale anwoonaawe ukhala atthu omaana. (1 Tim. 2:5, 6) Vano isiyani inhala wuukaviherani wakhalaka wiira unawuurikani ukupali wiira Yehova naawoonani ukhala ntthu omaana, hataa nkupaliki woopoliya wihu ni Yesu ni mpattisiyaka? Muupuwele ila itthwiila: khaninlamuliya ukhuluvela moopuwelelweehu, masi ninlamuliya unkhuluvela Yehova. Uyo naawoona ukhala atthu omaana ale anoonihera waamini woopoliya wihu ni Yesu ni hokhuluveliha wiira naahala waacaaliha. (Nsome Isaalimu 5:12; d Aroo. 3:26) Anuunwiihu amoca aneehaniya Vicky yahoona mananna caarenryaaya wuupuwela woopoliya wihu. Ayo aheera: “Mi kahoona wiira Yehova ahokivilela ukati mwinci. . . . Masi miiva uhiya unsukhuru, wakhala khampa kaamwiirela co: ‘Nyuuva khannokifenta venci wiira nkoopole; wiivaherera wawe mwaninyu khuntosera wiira cileveleliye itampi caka.’” Ukati ayo anuunwaayo woopuwenlyaaya woopoliya waya, yahancera wiicoona ufentiya ni Yehova. Hiiva ciicammo noopuwelaka woopoliya wihu, ninaahala woona wiira Yehova naanifenta.
Manannani nyuuva nnohaleenyu woona wiira Yehova naawuvahani ifayita? (Nwehe iparaagarafu 17)
18. Isiyani inhala wiirannya naahihiyeke waafenta Apaapeehu o wiirimu?
18 Uhimya ikhweeli, hataa nyuuva mwiikurumicaka weettela citthu ciitthucileenyu nhina ula mwahoola, anaahala ukhala mahuku anhalaaya wuuriipani nrima ni wuupuwela wiira atthunaka Yehova khanwoonani ukhala ntthu omaana. Yeerannyaaka iyo itthwiiyo, nhiliyale wiira Yehova naawoona ukhala atthu omaana ale ahinhiya unfenta. (Tiya. 1:12) Phimaana, nhihiye wiikurumica ukhalana upatthani woolipa ni Yehova. Mmananihe woona citthu cotheene Yehova cimpankaawe cinoonihera wiira naawoonani ukhala ntthu omaana. Ni nhiliyale wiira Yehova “khari uttayi wo khula ntthu.”—Mite. 17:27.
NNOHALA WAAKHULA CANI?
-
Nlattuni atthu akiina anoopuwelaaya wiira Yehova khanwoona ukhala atthu omaana?
-
Manannani Yehova nooniheraawe wiira naanoona ukhala atthu omaana?
-
Nlattuni ninlamuliyeehu ukupali wiira Yehova naanoona ukhala atthu omaana?
NCIPO 88 Mukiixuttihe Iphiro Sanyu
[Mawehero]
a Joau 16:27 Ukhala wiira Apaapa anawuufentani, kontha nyuuva nnaakifenta ni nnawaamini wiira mi kiveleelihiye ni Nluku.
b Tiyaku 1:12 Ootteeliya thi ule hinhiya uvilela ukati wo masakha, kontha avilelaka masakha uyo naahala waakhela ukumi Yehova ukhuluvelihalyaawe waavaha ale ahinhiya unfenta.
c 1 Atesalonika 2:4 Ukhala wiira Nluku honaamini wiira nivare nteko woolalyeera ihapari comaana, hi ninawuuluma kahi wiira naatteelihe nrima atthu, masi Nluku, noweheeha nrimeehu.
d Isaalimu 5:12 Kontha nyuuva Pwiiya Yehova nnaahala waacaaliha atthu aneettela isariya; nyuuva nnaahala uwoona ukhala atthu omaana ni waakhikicera.
