MWAHA WOOSOMIYA 11
NCIPO 129 Nimphavela Ovilela
Nvilele hataa ciwiiranyelakani citthu cahaaweherereenyu
“Nyuuva khamoocele ni nhovilela citthu cinci nlattu woncina naka.”—APOKA. 2:3.
ITTHU INHALEEHU WIITTHUCA
Woona mananna ninhaleehu ukhitiri uvilela ninswalelaka Yehova hataa ciwiiranyelakani citthu cahaaweherereehu.
1. Kontha isiyani unaareera ukhala mumphwinkoni wa Yehova?
NIHAANA iparakha yookhala mumphwinkoni wa Yehova ala mahuku ookhiceraala. Ukati makhalelo ntuninyani antepaaya urika, Yehova honivaha amuci oominepani akhanle mayamunna ni mayanuunu owaataana. (Isaa. 133:1) Yehova naanikavihera ukhalana amuci oolipa ni otteeliya. (Efesu 5:33–6:1) Ni uyova naanivaha ucuwelaca nimpheeleehu wiira nikhalane nnema neekhweeli wanrimani wihu.
2. Isiyani inlamuliyeehu upanka, ni nlattuni?
2 Masi, nihaana niikurumicaka nswalela Yehova woohihiyerera. Kontha isiyani? Kontha pooti wanrusiyeehu ni citthu cinvonyaaya akhwiihu ni pooti unirika uvilela citthu cinvonyeehu naasineneehu venci-venci yakhalaka wiira ihaavo itthu ninvonyeehu. Ninlamuliya uvilela ninswalelaka Yehova woohihiyerera. (1) Wakhalaka wiira munneehu awula nuunwiihu naapanka itthu inniriipiha nrima, (2) wakhalaka wiira awannyiihu awula amwariihu anaapanka itthu inniriipiha nrima, ni (3) wakhalaka wiira unaniriipa nrima ni citthu cinepankeleehu. Nhina ula mwahoola, ninaahala woona khula itthu ni ciicammo woopela mwaha isiyani inhaleehu wiitthucera nintakihero nimoca no mbiiblyani.
NVILELE WAKHALA WIIRA MAYAMUNNEEHU AWULA MAYANUUNWIIHU OWANLOKONI ANAAWURIIPIHANI NRIMA
3. Marikarikoni atthunaka otheene cihu anhaleehu waanana?
3 Marikariko. Ahaavo mayamunneehu awula mayanuunwiihu arina makhalelo ahinnicivela awula pooti ukhalaka wiira ayo anaaniwacera ni mananna oohinamaana. Mahumu akhanle oopahuwa ni cihaavo citthu cinvonyaaya. Nnyo citthunnyo pooti uwiiriha atthu akiina utikhinaca wakhala wiira khweeliini ula mphwinko wa Nluku. Ayo atthwaayo uhiya unswalela Nluku yaatanaka ni mayamunnaaya awula ni mayanuunwaaya, ayo atthunaka anaahiya uwuulumana atthu yaatthekenle awula ciicammo uhiya urwaa umikutthaanoni. (Sof. 3:9) Masi niireke ayo ahaana isariya? Nttwee noone itthu imoca nimwiithucereehu ntthu mmoca noolumiya mbiiblyani yankhumelenle iyo itthwiiyo.
4. Marikarikoni Paulu aanannyaawe?
4 Ntakihero no Mbiiblyani. Apostolu Paulu ancuwela wiira mayamunnaawe ni mayanuunwaawe yaari atthu oopahuwa. Wootakihera Paulu khaweheriya saana ukati wancenryaawe uthukumana ni mayamunna. (Mite. 9:26) Ukati nkhwaawe, mayamunna yammuuluma pusya yapheelaka unanariha makhalelwaawe. (2 Akor. 10:10) Paulu ahomoona munna arina mirintti wanlokoni alakelaka upanka itthu yoohinamaana ni atthunaka yaawiirihile atthu akhwaawe ukakathuwa. (Akalas. 2:11, 12) Ni ntthu mmoca anvelelaka Paulu mmikwaahani wawe ahonriipiha nrima venci. (Mite. 15:37, 38) Paulu atthunaka pooti waahalaawe wiihiyerera wiira ala marikariko yankhumelelaala, wiira ahiye waathukumanana mayamunna ni atthu yanriipiha nrima. Uhiya commo Paulu anweheeha citthu comaana mayamunnaawe ni mayanuunwaawe yaarinaaya ni khaahiyerenre nswalela Yehova. Vano, isiyani yankavihenre Paulu uvilela?
5. Isiyani yankavihenre Paulu uhaahiya mayamunnaawe? (Akolosu 3:13, 14) (Nwehe ciicammo ilatarato.)
5 Paulu aanaafenta mayamunnaawe ni mayanuunwaawe. Nifento Paulu naarinaawe nahonkavihera uhiweheeha citthu caavonyihaya mayamunnaawe, masi, uyova anweheeha makhalelo omaana ayova yaarinaaya. Nifento Paulu naarinaawe nahonkavihera upanka itthu yantikhilyaawe nhina Akolosu 3:13, 14. (Nsome. a) Moone mananna nnyo iveerusunnyo cikhanlyaaya ikhweeli niitthu yaapankilyaawe. Unookhalaru wiira Marku ahonhiya Paulu nkwahaawe weemisiyonaariyu, Paulu khakhanle oorusiya nuuyova. Nuuwakatyaaya, Paulu ahowantikhela iwarakha mayamunnaawe nloko no Akolosu ni nhina iyo iwarakheeyo ahonttottopela Marku, eeraka: “Uyo mpatthani omaana ni naavara nteko saana.” (Akol. 4:10, 11) Ukati Paulu waatthukeliyaawe u Roma, uyo ahonlepela Marku wiira ankavihere. (2 Tim. 4:11) Unawoonannya wiira Paulu khaanyanyanle mayamunnaawe. Isiyani hiiva nimwiitthucereehu apostolu Paulu?
Ahaavo nanrokottole Paulu, Bernabe ni Marku. Masi apostolu Paulu ahohiya uttuli cotheene nnyo ni ahancera uvara nteko nkhayi ni Marku (Nwehe iparaagarafu 5)
6-7. Isiyani nhala unikavihera uhihiya waafenta mayamunneehu, hataa yaavonyaka? (1 Joau 4:7)
6 Itthu nineetthuceehu. Yehova nopheela wiira hi nivilele naathoonyeraka nifento mayamunneehu ni mayanuunwiihu. (Nsome 1 Joau 4:7. b) Wakhala wiira munneehu awula nuunwiihu khathoonnyenre makhalelo eekristau, pooti wankupaliihu wiira uyova naapheela weetteela ikano co mbiiblyani ni wiira citthu civonyihilyaawe pankile woohilakela. (Miru. 12:18) Nluku nawaafenta aswalyaawe hataa ukhalaka wiira citthu cikhwaawe ayova anaavonya. Nluku khaninyanyaala ni uyo khannisunkera nruukwa. (Isaa. 103:9) Ikhanle itthu yofayita waatakiha apaapeehu oolevelela!—Efesu 4:32–5:1.
7 Nhiliyale wiira ukati woomala ila ituninyeela, ninaapheela venci cinene ukhala owaataana ni mayamunneehu ni mayanuunwiihu. Pooti wanweherereehu wiira ulupatthiya unaavira watepaka. Ni pooti wantthukeliyeehu mmaakhatteya nlattu wowaamini wihu. Yaakhumelelaka iyo itthwiiyo ninaahala waapheela mayamunneehu ni mayanuunwiihu venci. (Miru. 17:17) Moone itthu yankhumelenle munna mmoca neehaniya Josefu, c humu o nloko no Espanha. Uyo munnooyo ni mayamunna makhwaawe yahotthukiya nlattu woohipanka mphantte osiyaasa. Ayo aheera: “Nlattu wookhala nkhayi miiva ni mayamunnaaka yaatthukelaninyaaka isaala imoca khanapica unyonyiihana. Masi nahaana nivilelanaaka weekhweeli. Upanka commo, wannikavihera hiivano wiicoona ukhala owaataana ni okhikiceriya. Nakhalaka nimapereso yahanswalela Yehova. Uhaavo ukati miivano karinaaka nikhwatta waamononi kaahoheliya iceesu, nlattu wonno nikhwatta karinaaka waamononinno, miiva akaakhitiri upanka itthu. Masi munna mmoca kaatthukelaninyaaka, anaakikavihera ukattha ikuwo caka ni ukikavihera citthu cikhwaawe, kihoothonyiiheriya nifento neekhweeli ukati miiva waapheelaaka.” Phimaana nihaana niikurumicaka umananiha ummaliha nanrokottole otheene unkhalaneehu ni mayamunneehu nennaco!
NVILELE WAKHALAKA WIIRA AWANNYINYU AWULA AMWAARINYU ANAAWURIPIHANI NRIMA
8. Marikarikoni anamathelana anaananaaya?
8 Marikariko. Anamathelana otheene anawaanana marikariko. Ibiiblya inaahimya sana-saana wiira ale athelanne anaahala waaphwanya “masakha muukumini waya.” (1 Akor. 7:28) kontha isiyani? Kontha uthelanaca unkhala waatthu eeli oopahuwa, aarina makhalelo oovirikana, moopuwelelo oovirikana, ni uthanla upanka citthu cinoncivela awula cihinoncivela, nuukatyaaya pooti woonenela makhalelo owiipithya yaahoneneliya ukati waaryaaya ahinathelanaca. Nnya citthunnya pooti uphwanyiha masakha. Wiira amananihe umaaliha masakha arinaaya, ayo atthunaka anawothereriha amwaaraya awula awannyaya, naayo pooti wuupuwela umwalanaca wiira amalamalihe masakha arinaaya. Masi niireke wiira umwalanaca ikhanle itthu yomaana? d Nttwee noone itthu inhaleehu umwiitthucera ntthu mmoca nooluminya mbiiblyani aakhitinri uvilela masakha moolupale yankhumelenle.
9. Marikarikoni Apikayili anannyaawe?
9 Ntakihero no mbiiblyani. Apikayili atheliye ninlopwana eehaninya Napaali, toko cinhimyaaya Ibiiblya Napaali aari nlopwana ootakhala nrima ni arina makhalelo ohinamana. (1 Sam. 25:3) Khweeliini, Apikayili waahonrikela ukhala ninlopwana khampa uyo. Niireke Apikayili ahophwanya mananna omwalanaca nawannyaawe? Inanna imoca Apikayili yaahalaawe upanka wiira amwaalanace naawanyaawe, waari ukati Davidi waawilyaawe apheelaka umwiiva Napaali, ukati uyova wanruwannyaawe Davidi nkhayi naanakhottwaawe. (1 Sam. 25:9-13) Apikayili atthunaka pooti wanhiyaawe Davidi apankaka itthu yaalakenlyaawe yomwiiva Napaali. Masi uyo khapankile commo, nimananna omaana Apikayili ahonhiha Davidi itthu yaalakenlyaawe yomwiiva Napaali. (1 Sam. 25:23-27) Isiyani yaamwiiriha Apikayili upanka iyo itthwiiyo?
10. Isiyani yaamwiirihile Apikayili uvilela hataa ikacamentwaawe inaarina marikariko?
10 Nlattu wonfenta Yehova, Apikayili anttitthimiha ikacamentu khampa Yehova cinttitthimihaawe. Atthunaka Apikayili ancuwela itthu Yehova yaamwiirenlyaawe Atamu ni Hawa uwakati waatthenkaciyaaya ikacamentu yoopacera. (Upha. 2:24) Apikayili ancuwela wiira Yehova noonela ikacamentu ukhala yowaarya. Apikayili apheela unciveliha Yehova, atthunaka iyo yankurumica upanka itthu yaapheelaawe wiira oopole atthu yaakhala uwannyawe ciicammo naawanyaawe. Phimaana, Apikayili ahopanka itthu wowaakuvyaaca wene wiira anhihe Davidi upheela umwiiva Napaali. Apikayili aheevaherera ulepela uleveleliya wo itthu yaapankilyaawe Napaali. Woohannyihacere, Yehova ananfenta ula nthiyana oolipa nrimoola ni owiivahereroola. Isiyani alopwana oothela ni athiyana ootheliya aneetthuceraaya nintakihero na Apikayili?
11. a) Isiyani Yehova inwehereraawe wiira anamathelana apanke? (Efesu 5:33) b) Isiyani ineetthuceehu ni mananna Carmen eekurumicilyaawe wiira ikhalihe saana itthokwaawe? (Nwehe ciicammo ilatarato.)
11 Itthu nineetthuceehu. Yehova noweherera wiira anamathelana akhaleke nkhayi, hataa ukhalaka wiira nlopwana awula nthiyana naarikarikiha itthokweeyo. Yehova naakhala ootteeliya amoonaka nlopwana awula nthiyana eekurumicaka wiira ammalihe nanrokottole watthokoni wawe, ooniheraka nifento ni ihisima. (Nsome Efesu 5:33. e) Moone ntakihero na Carmen. Uvira waya myaakha 6 natheliyeene, Carmen ahopacera usoma Ibiiblya ni Masaahiti a Yehova ni ahopattisiya. Masi Carmen ahaana uvilela venci, woophiyaaka myaakha 50 uyo aneekurumica wiira akhikicere ikacamentwaawe wiira akhale saana ni woonihera nifento ni ihisima. Uyo naahimya: “Awannyaaka khawaacivenle hataa vakaani miiva ukhala Saahiti a Yehova. Ayo khaacivela Yehova mpaka yankiveeha ni ukopopihera ukihiya. Uvira waya ukati, miiva kahopacera woona mananna awannyaaka ceecoonaaya ni ahomananiha uwuulumana ni mananna omaana. Ucuwela wiira Yehova nooneela ikacamentu ukhala yowaarya wahokiiriha ukhalana ikuru wiira ikacamentwaaka ikhale saana. Mi Akaahiile wiikurumica wiira ikacamentwaaka ikhale saana kontha kaanonfenta Yehova.” f Wakhalaka wiira nyuuva nhaana marikariko watthokoni winyu, nhaana nkupaliki wiira Yehova naahala wuukaviherani uvilela.
Nyuuva pooti wiitthucera ntakihero na Apikayili niitthu yaapankilyaawe wiira oopole itthokwaawe? (Nwehe iparaagarafu 11)
NVILELE WAKHALAKA WIIRA NYUUVA NNAAWIRIIPIHA NRIMA MWAANENEENYU
12. Marikarikoni atthunaka anhaleehu waanaana navaraka itampi yuulupale?
12 Marikariko. Atthunaka nyuuva nnaalakela uhiya cotheene nlattu woovara matampi moolupale. Ibiiblya ineera wiira matampiihu pooti uniiriha wiicoona uhikhalana ifayita ni uniriipa nrima. (Isaa. 51:17) Munna mmoca neehaniya Robert, aheekurumica myaakha cinci wiira akhale nruminya o wanlokoni. Masi uyo ahovara itampi yuulupale ni ahocuwela wiira ahonriipiha nrima Yehova. Uyo neera co: “Moopuwelelwaaka yahovirikana venci ni kaaheecoona ukhala khampa kiri munlittini nowiisya cinene. Mi kaanonla ni kaanonlompa Yehova, masi mi kuupuwela wiira Yehova kaahala wiiwa-tho ulompa waka. Khweeliini, nlattuni uyo aahalaawe upanka commo, hataa ukhalaka wiira mi kahonriipiha nrima cinene?” Navaraka itampi yuulupale, hiiva pooti ulolovaca ni wuupuwela wiira Yehova honinyanyala. Uhiya commo, pooti wiicoona uhikhalana ifayita wiira ninswalele. (Isaa. 38:4) Wakhala wiira nyuuva nnawiicoona commo, mweemele ni muupuwele ntakihero na ntthu mmoca noohimiya mbiiblyani aavilenle hataa avaraka matampi.
13. Matampini Peturu yaavanryaawe, ni itampini yaaverihenle?
13 Ntakihero no mbiiblyani. Uhiyu Yesu hinaaya ukhwa, Peturu ahovara itampi yuulupale. Masi isiyani yaamwiirihile Peturu uvara iyo itampi yuulupaleeyo? Wiipaceroni, Peturu aheecoona ukhala ookhuluvelya ni aheera kaahala uhiya ukhala ookhuluvelya, hataa ukhalaka wiira maapostolu akiina ananhiya Yesu. (Mark. 14:27-29) Nuuwakatyaaya, ayo anari ujardim yo Getsêmani, Peturu ikwaha cinci khakhitinri ukhala oohiitthala. (Mark. 14:32, 37-41) Ukati apoovu waapilyaaya wiira anvare Yesu, Peturu ahonhiya. (Mark. 14:50) Peturu ahonkhotta ikwaha tthaaru, eeraka: ‘Akinoncuwela Yesu,’ ni ciicammo uyo aholapha wiira khancuwela Yesu. (Mark. 14:66-71) Vano, manannani Peturu eecoonnyaawe ucuwela wawe wiira ahovara itampi yuulupale? Uyova aheecoona uhikhala ntthu, ahonla cinene ni wahonriipa nrima nlattu wo itthu yaapankilyaawe. (Mark. 14:72) Muupuwele mananna Peturu wanriipilyaaya nrima ucuwela wawe wiira Yesu ahookhwa. Peturu atthunaka oopuwela wiira khaarina ifayita!
14. Isiyani yankavihenre Peturu uvilela ni uhihiya unswalela Yehova? (Nwehe ciicammo ilatarato yo wakaapani.)
14 Cahaavo ciitthu cinci cankavihenre Peturu uhihiyerera uvilela ni unswalela Yehova. Woopacera, uyo khaahiile ukhala nimayamunna ni anweherera wiira anhala ukaviheriya ni umalihiya nimayamunna. (Luka 24:33) Uhiya commo, ukati Yesu wunwelelihiyaawe ahomphwanya Peturu ni ahonlipiha. (Luka 24:34; 1 Akor. 15:5) Uhiya umpwapwela nlattu wo itthu Peturu yaavonyilyaawe, Yesu ahommaaliha mpatthannyaawe, amwiirelaka wiira anhala waakhela mirintti cikhwaawe co wanlokoni. (Joau 21:15-17) Peturu ancuwela wiira ahovonya, masi uhookhalaru commo, uyo khaahiyerenre upanka citthu comaana. Kontha isiyani? Kontha uyo ankhuluvela wiira mwiitthucihyaawe, Yesu, khannyanyanle uyova. Atthari akhwaawe a Yesu ciicammo khayaahiyerenre unkavihera Peturu. Isiyani ineetthuceehu nintakihero na Peturu?
Joau 21:15-17 unawoonannya wiira Yesu khanhiile Peturu. Uyo ahonkurumica Peturu uvilela (Nwehe iparaagarafu 14)
15. Isiyani Yehova impheelaawe wiira nikupali? (Isaalimu 86:5; Arooma 8:38, 39) (Nwehe ciicammo ilatarato.)
15 Itthu nineetthuceehu. Yehova noopheela wiira hiiva ninkhuluvele wiira uyo naanifenta ni naanilevelela. (Nsome Isaalimu 86:5; Arooma 8:38, 39. g) Khweeliini, hiiva navaraka matampi moolupale, ninawiicoona ukhala ni masukhuli. Iyo itthwiiyo inawiirannya ni ciicammo inaanikavihera. Masi khaninlamuliya wuupuwela wiira nlattu woovara ayo matampyaayo, hiiva khunniphwanela ufentiya ni uleveleliya ni Nluku. Uhiya commo, nihaana naavyaka ukaviheriya. Robert, romoliye wiipaceroni, hohimya ifayita urinaaya waavya ukaviheriya wowaakuvyaaca. Uyo eera: “Miiva kahovara matampi kontha keecoona ukhala oolipa mminepani ni wiira kanhala ukhitiri ulipa kakhalaka oottehattehiya. Ukhuma ukati kaavilyaaka ukaviheriya nimahumu, mi kahoona wiira Yehova ankifenta ni aanaavarela nteko mahumu wiira miiva koone ukifenta wawe. Mahumu khayaakinyanyanle ni yaahokikavihera ukhuluvela wiira Yehova ciicammo khakinyanyanle.” Hiiva ciicammo pooti wankhuluveleehu wiira Yehova naanifenta cinene ni naanilevelela nakhalaka oottharuwa itampi cinvareehu. (1 Jo. 1:8, 9) Nakhalaka ookhuluvelya wiira Yehova naanifenta ni naapheela unilevelela, hiiva khaninhala uhiya unswalela hataa nivaraka itampi.
Manannani nnohaleenyu wiicoona wakhalaka wiira nnakaviheriya ni mayamunna owuuluvala? (Nwehe iparaagarafu 15)
16. Nlattuni nyuuva nlakenleenyu uvilela ni unswalela Yehova?
16 Yehova naavaha ifayita venci cinene yotheene hiiva impankeehu wiira ninswalele ala mahuku ookhiceraala. Ni naakaviheriyaaka ni Yehova, ninaahala ukhitiri uvilela hataa cinikhumelelaka citthu cooriipiha nrima. Khaninlamuliya uhiya waafenta mayamunneehu ni mayanuunwiihu ni waalevelela wakhalaka wiira ahopanka itthu inhala uniriipiha nrima. Ciicammo, ninlamuliya woonihera unfenta wihu Yehova, nahisimaka uthelanaca ukati nineekurumiceehu ummaliha nanrokottole watthokoni naamwaariihu awula naawannyiihu. Ni naakhalaka ovara matampi moolupale, naavyeke ukaviheriya ni Yehova ni pooti wankhuluveleehu nifento nawe ni ulevelela urinaawe, nihihiyereraka unswalela. Pooti wankhuluveleehu wiira ninaahala waakhela iparakha cinci naahihiyerereke upanka citthu comaana.—Akalas. 6:9.
MANANNANI NINHALEEHU UVILELA NINSWALELAKA YEHOVA . . .
-
wakhalaka wiira munna naanipanka itthu inhala uniriipiha nrima?
-
wakhalaka wiira awannyihu awula amwaarihu anaanipanka itthu inhala uniriipiha nrima?
-
wakhalaka wiira ninaapanka itthu inhala uniriipiha nrima mwaaneeneehu?
NCIPO 139 Muupuweleke Muryeene oParayiisu
a Akolosu 3:13 Nhihiye uvilelana ni ulevelelana niiraati, hataa ntthu akhalanaka isariya yonviruwela nkhunanawe. Toko Yehova cuulevelenlyaaweni niiraati, nyuuva nhaana mpankaka ciicammo. 14 Masi, uhiya citthu cotheene nnya, nthoonyere nifento, kontha nno ninawaataaniha.
b 1 Joau 4:7 Mayamunna, nihihiye ufentana, kontha nifento ninkhuma wa Nluku, ni otheene ule nofenta yariye ni Nluku ni nancuwela Nluku.
c Macina makhwaawe ahaakakhanihiya.
d Ibiiblya ineetthuciha wiira khinakhala itthu yomaana nlopwana ni nthiyana umumulelana; maanaaya wiira alopwanaayo awula athiyanaayo uthama wapuwani va ni urwaa ukhala nipuro nikhwaawe wiira yaamumulele amwaaraya awula awannyaya. Ibiiblya ciicammo inthoonyera wiira iyo itthwiiyo yeerannyaaka, khaavo nokhalana isariya yoothela awula utheliya nintthu nkhwaawe. Masi, pooti ukhumelaka citthu cinwiiriha makristau makhwaawe ulakela umumulelana. Nwehe mphantte uneera Mwiiweehe Saana N.° 4 “Ukhumelana” nhina ilivuru Mphwanye Utteeliya Uhimmala!.
e Efesu 5:33 Ciicammo, khula ntthu waryaawe aafenteke amwaarawe khampa cinfentaawe irutthwaawe; wiikina, nthiyana haana aahisimaka cinene awanuwawe.
f Nwehe ntakihero nikhwaawe nhina isayiti jw.org ividiyu Nihuuthepyeni nnema noohikhweeli!—Darrel ni Deborah.
g Isaalimu 86:5 Kontha nyuuva, Yehova, nkhanle namaana ni khula ukati nnaatthuna ulevelela; nikhanle nuulupale nifento nookhuluvelya ninwoonihereenyu atthu otheene anooswalelani.
Arooma 8:38 Kontha kinaakupali wiira nanka ukhwa, nanka ukumi, nanka malayikha, nanka makuvernu, nanka citthu cirivo, nanka citthu cinhala uwa, nanka ikuru, 39 nanka irekamelo, nanka yiiserero, ni khiivo nanka itthu ikhwaawe yumpiye inhala ukhitiri unimwalaniha nnifentoni na Nluku, niri iriyari wa Yesu Kristu, Apwiiyeehu.
