MWAHA WOOSOMIYA 14
Mahumu—Nhihiye untakiha apostolu Paulu
“Nkitakihe.”—1 AKOR. 11:1.
NCIPO 99 Muitos Irmãos ao Meu Lado
NINHALA WIITTHUCANI? *
1-2. Kontha isiyani ntakihero na apostolu Paulu pooti waakavihera mahumu olelo?
APOSTOLU Paulu aanawaafenta cinene mayamunnaawe. Uyo aanaavara nteko cinene wiira aawacere. (Mite. 20:31) Phimaana, mayamunna o mmalokoni yaananfenta cinene apostolu Paulu. Ikwaha imoca, mahumu o nloko no Efesu yahancera wunla cinene ukati waacuwenlyaaya wiira khayaahala umoona-tho Paulu. (Mite. 20:37) Mahumu o mmalokoni wihu ilelo ari khampa apostolu Paulu. Ayo anawaafenta mayamunna o wanlokoni ni khanhiya wiikurumica wiira yaakavihere. (Afili. 2:16, 17) Masi ukati nkhwaawe, mahumu anaakhalana marikariko. Vano isiyani inhala waakavihera?
2 Itthu inhala waakavihera mahumu ukhanle untakiha apostolu Paulu. (1 Akor. 11:1) Apostolu Paulu aari nlopwana oopahuwa toko hiiva. Ukati nkhwaawe waananrika cinene upanka citthu comaana. (Aroo. 7:18-20) Ni ahaana masakha makhwaawe. Masi waahookhalaru commo, apostolu Paulu khaahiile utteeliya nrima. Mahumu yantakihaka apostolu Paulu, anaahala ukhitiri uvilela marikariko anaananaaya ni uhihiya unswalela Yehova waatteelaka nrima. Vano nttwee noone manannani cinlamuliyaaya untakiha apostolu Paulu.
3. Ninhala wiitthucani nhina ula mwahoola?
3 Nhina ula mwahoola, ninaahala woona marikariko macese mahumu anaananaaya: (1) wiikurumica ulalya ihapari ca Nluku hataa yakhalanaka miteko cinci. (2) utotha ukati wo waalipiha mayamunna, (3) uwehera ratta citthu cinvonyaaya, ni (4) uwehera ratta citthu cinvonyaaya akhwaaya. Ciicammo, ninaahala woona isiyani apostolu Paulu yaapankilyaawe ukati waarinaawe ayo marikarikwaayo ni manannani mahumu cinlamuliyaaya untakiha.
WIIKURUMICA ULALYA IHAPARI CA NLUKU HATAA YAKHALANAKA MITEKO CINCI
4. Kontha isiyani ukati nkiina mahumu pooti waarika ulalya ihapari comaana?
4 Kontha isiyani iyo itthwiiyo pooti waarika mahumu? Mahumu phinhoolela nteko woolalya ihapari ca Nluku. Masi ayo ciicammo ahaana miteko cikhwaawe wanlokoni, toko uhoolela nkutthaano weeriyari isumana ni mphantte woosomiya Ibiiblya wanlokoni. Ayo ciicammo anaataphulela myaha ni miphantte cikhwaawe mmikutthaanoni. Anawaalakihera arumiya o wanlokoni ni unawaacivela uwuulumana mayamunna o wanlokoni wiira yaalipihe. (1 Pet. 5:2) Ciicammo, ahaavo mahumu anvara nteko wooteka ni ulokihaca Isalau co Umwene ni inupa cikhwaawe cinvareliya nteko mumphwinkoni wa Yehova. Hataa ukhalaka commo, mahumu akhanle alalyeeri ihapari comaana oopacera wanlokoni khampa mayamunna akiinaayo.—Mat. 28:19, 20.
5. Isiyani apostolu Paulu yaapankaawe yankavihera ukhitiri ulalya ihapari comaana?
5 Itthu yaapankilyaawe Paulu. Nhina Afilipo 1:10, apostolu Paulu naahimya isiyani yaapankaawe yankavihera ukhitiri ulalya ihapari comaana. Uyo enre: “Ncuweleehe citthuni citepale ukhala cofayita.” Paulu ahaakhela nteko wo waalalyeera atthu o ntuninyani ni iyo phaari itthu yootepa ukhalana ifayita. Uyo anlalyeera “waatthuni ni mmawaani.” (Mite. 20:20) Paulu khaathanla iwoora yoolalyeera ni khaalalyeera nihuku nimoca paahi khula isumana. Uyo anvarela nteko khula ukati waakhalanaawe wiira alalye moolumo a Nluku. Nkwaha mmoca, ukati waawehereraawe asipatthannyaawe u Atenas, uyo ahaalalyeera ihapari comaana akhulupale ni ayo yahopheela umwiiwelela. (Mite. 17:16, 17, 34) Paulu ahaalalyeera atthu hataa ukati waatthukiyaawe.—Afili. 1:13, 14; Mite. 28:16-24.
6. Isiyani apostolu Paulu yaafunttalyaawe akhunanawe?
6 Apostolu Paulu anvarela nteko ratta ukati waarinaawe. Uyo aanawaalattula akhunanawe wiira anveleele wuulalyaani. Waapankaawe nkwaha woopacera weemisiyonaariyu, Paulu ahoncisa Joau Markus, ni nkwaha wonayeeli ahoncisa Timotiyu. (Mite. 12:25; 16:1-4) Paulu khweeliini aanawiikurumica waafuntta citthu comaana ayo amirawaayo. Uyo ahaafuntta uthotokaniha nloko, waalipiha mayamunna ni wiitthuciha ratta nuulumo na Nluku.—1 Akor. 4:17.
Muntakihe apostolu Paulu ni mwiitthenkace wiira nlalye moolumo a Nluku khula ukati (Nsome iparaagarafu 7) *
7. Mahumu anhala upanka cani itthu Paulu yuulumilyaawe nhina Efesu 6:14, 15?
7 Itthu ineetthuceehu. Mahumu ahaana yantakihaka apostolu Paulu kahi yalalyaaka mmawaani paahi, masi yiitthenkacaka wiira alalye khula ukati ni khula nipuro. (Nsome Efesu 6:14, 15. *) Ayo pooti ulalya upacari yarwaaka uthuma itthu awula untekoni. Ni ale anvara nteko wootekateka pooti waalalyeera ale ankhala wakhiviru ninipuro nintekatekaaya ni pooti waalalyeera ale anaatumihera ikaruma cootekela. Ni khampa apostolu Paulu, mahumu pooti uvarela nteko ukati unvirihaaya wuulalyaani wiira yaafuntte akhwaaya citthu comaana.
8. Isiyani mahumu inlamuliyaaya upanka ukati nkiina?
8 Humu khanlamuliya uhoolelihera miteko cawe wanlokoni ni wasirikwiitu mpaka wahinkhalanaawe ukati woolalya ihapari. Wiira akhalane ukati woopanka citthu cotheene cimpheelaawe, ukati nkiina humu haana eetthucaka ukhotta miteko cikhwaawe cinlepeliyaawe. Humu oopuwelaka ratta ni alompaka, atthunaka naahala woona wiira khanhala ukhitiri uvara uyo ntekooyo. Uyo haana oopuwelaka citthu cikhwaawe cihinlamuliyaawe uliyala upanka toko uhoolela uswali waamuci, ulalya cinene ihapari ca Nluku ni uwiitthuciha asaanaawe ulompa. Mahumu akhwaawe unawaarika ukhotta miteko cinlepeliyaaya. Masi pooti wankupalyaaya wiira Yehova naacuwela wiira ayo ampheela upanka ratta citthu cotheene.
UTOTHA UKATI WO WAALIPIHA MAYAMUNNA
9. Isiyani inaarika mahumu enci?
9 Kontha isiyani iyo itthwiiyo pooti waarika mahumu? Apoovu a Yehova anawaakhumelela masakha menci. Ni ala mahuku ookhiceraala, otheene cihu ninaapheela ulipihiya, ukaviheriya ni umaalihiya. Ukati nkhwaawe, ninaapheela ukaviheriya wiira nihipanke citthu coohinamaana. (1 Atesal. 5:14) Ninaacuwela wiira mahumu khanhala ukhitiri umaliha masakha otheene arinaaya mayamunna. Hataa ukhalaka commo, Yehova nopheela wiira mahumu ahihiye ulipiha ni ukhikicera ikhontwaa cawe. Ukhala wiira mahumu ankhala nimeteko cinci, anhala ukhitiri cani wiivaha ukati wiira yaalipihe ayo mayamunnaayo?
Mwaattottopele ni mwaalipihe mayamunna o wanlokoni (Nsome iparaagarafu 10, 12) *
10. Toko cinhimyaaya 1 Atesalonika 2:7, apostolu Paulu aatafiti cani mayamunna?
10 Itthu yaapankilyaawe Paulu. Apostolu Paulu khaahiya waattottopela ni waalipiha mayamunna. Mahumu anantakiha Paulu, phimaana anawaafenta ni anawaawacera saana mayamunna. (Nsome 1 Atesalonika 2:7. *) Paulu aanawaahimyeera mayamunnaawe wiira aanawaafenta cinene ni wiira Yehova ciicammo aanawaafenta venci. (2 Akor. 2:4; Efesu 2:4, 5) Paulu anviriha ukati ni mayamunnaawe ni aawoona ukhala apatthannyaawe. Uyo aanawaakhuluvela cinene mayamunna mpaka ahaahimyeera citthu caamoopiha ni citthu cahaakhitiryaawe upanka. (2 Akor. 7:5; 1 Tim. 1:15) Masi Paulu khooluma masakha yaarinaawe. Uyo ampheela waakavihera.
11. Kontha isiyani apostolu Paulu waavahilyaawe ikano mayamunnaawe?
11 Ukati nkhwaawe apostolu Paulu ahaavaha ikano mayamunna akhwaawe. Uyo khaavahile ikano kontha aahowaaviruwela, masi kontha aapheela uwoona yakhalaka saana ni aapheela waakhikicera. Uyo aaneekurumica wiira ikano cawe cihirike wiiwannya ni aanaapheela wiira ayo mayamunnaayo atthune ikano caavahaawe. Wootakihera, nhina iwarakha imoca yaawantikhenlyaawe akorintu, apostolu Paulu ahaavaha ikano mayamunna woohaakhuwakhuwa. Masi wahoolo, uyo ahonveleeliha Titu u Korintu kontha aapheela ucuwela wakhala wiira mayamunna yahotthuna ikano caavahilyaawe. Khweeliini, Paulu wahontteela nrima nlattu woocuwela wiira mayamunna yahotthuna ikano caavahilyaawe!—2 Akor. 7:6, 7.
12. Mahumu anaalipiha cani mayamunna o wanlokoni?
12 Itthu ineetthuceehu. Mahumu anantakiha apostolu Paulu yavirihaka ukati nimayamunna o wanlokoni. Inanna imoca yoopanka iyo itthwiiyo ukhanle uphiya khalayiiru umikutthaanoni. Yapankaka commo, anaahala ukhitiri uwoopana mwaha mayamunna. Pooti wanviriheenyu iminutu vakaani paahi mmoopanaka mwaha munna, nyuuva nnaahala unlipiha. (Aroo. 1:12; Efesu 5:16) Mahumu ciicammo anontakiha Paulu yavarelaka nteko Ibiiblya wiira yaalipihe mayamunna o wanlokoni ni waathoonyera wiira Yehova nawaafenta otheene caya. Mahumu anawiikurumica uwoopana mwaha mayamunna ni khanhiya waattottopela. Humu apheelaka unvaha ikano ntthu, uyo nawiikurumica wiira ikano inhalaawe unvaha ikhale yo mbiiblyani. Mahumu anawaavaha ikano mayamunna woohaakhuwakhuwa, masi khanhiya uthoonyera unamaana kontha ampheela wiira mayamunna atthune ikano cinvahiyaaya.—Akalas. 6:1.
UWEHERA RATTA CITTHU CINVONYAAYA
13. Humu aahala uthoonyera cani uhiwehera ratta citthu cinvonyaawe?
13 Kontha isiyani iyo itthwiiyo pooti waarika mahumu? Mahuku khanakhala atthu oohipahuwa ni ukati nkiina anaavonyaka. (Aroo. 3:23) Pooti ukhalaka wiira mahumu akhwaawe unawaarika uwehera ratta citthu cinvonyaaya. Wootakihera, akhwaawe anaakhala nimasukhuli nlattu wo wuupuwela cinene citthu cinvonyihaaya. Masi akhwaawe, anoopuwela wiira citthu cinvonyaaya cikhanle cankaani ni pooti wahinrukunusaaya meettelwaaya.
14. Toko cinthoonyeraaya Afilipo 4:13, wiiyeviha wankavihenre cani Paulu uwehera ratta citthu caavonyaawe?
14 Itthu yaapankilyaawe Paulu. Apostolu Paulu aanawiiyeviha ni ancuwela wiira khaahala ukhitiri waanana veekha citthu caavonyaawe. Uyo ancuwela wiira ahaana akaviheriyaka ni Nluku. Hinakhala ntthari a Kristu, Paulu aanawaalupattha cinene ni aanawaahuviha makristau. Masi wahoolo, uyo ahorukunusa meettelwaawe. (1 Tim. 1:12-16) Apostolu Paulu ahokaviheriya ni Yehova ukhala humu oofenta, ooreera nrima ni owiiyeviha. Uyo ancuwela wiira ikwaha cinci aanaavonyaka ni khaakhala ukati wotheene oopuwelaka citthu caavonyaawe. Uhiya commo, uyo ankhuluvela wiira Yehova anhala unlevelela. (Aroo. 7:21-25) Uyo ancuwela wiira khaahala ukhitiri unswalela Yehova woohivonyiha hataa itthu. Masi waahookhalaru commo, uyo khaahiya wiikurumica urehererya meettelwaawe wiira akhale nkristau ooloka. Uyo khaahiya wiiyeviha ni unkhuluvela Yehova wiira akhitiri uvara ratta ntekwaawe.—1 Akor. 9:27; nsome Afilipo 4:13. *
Mwiikurumice wiira nhaakulelihe citthu cinvonyeenyu (Nsome iparaagarafu 14-15) *
15. Mahumu anlamuliya uwehera cani citthu cinvonyaaya?
15 Itthu ineetthuceehu. Khaavo ntthu nothanliya ukhala humu nlattu wo wooniya wiira khanvonya. Masi Yehova nopheela wiira mahumu yaamini wiira anaavonya ni yiikurumice uthoonyera ratta meettelo eekristau. (Efesu 4:23, 24) Humu haana eekurumicaka usoma Ibiiblya wiira akhitiri woona citthuni cihimpankaawe ratta cinlamuliyaawe upanka saana. Apankaka commo, unaahala untteela nrima ni Yehova naahala unkavihera ukhala humu omaana.—Tiya. 1:25.
UWEHERA RATTA CITTHU CINVONYAAYA AKHWAAYA
16. Isiyani inhala wiirannya mahumu yaweheehaka cinene citthu cinvonyaaya mayamunna?
16 Kontha isiyani iyo itthwiiyo pooti waarika mahumu? Mahumu yavirihaka ukati mwinci nimayamunna o wanlokoni, khunaarika woona citthu cinvonyaaya. Iyo itthwiiyo pooti uwiiriha mahumu urusiya, uhiwoona mayamunna ukhala atthu ooloka ni uhaawacera saana. Khampa apostolu Paulu cinryaawe, iyo phi itthu Sotwani impheelaawe wiira yiirannye wanlokoni.—2 Akor. 2:10, 11.
17. Apostolu Paulu aawehera cani mayamunna ni mayanuunu o wanlokoni?
17 Itthu yaapankilyaawe Paulu. Paulu aanawiikurumica uweheeha citthu mayamunnaawe caapankaaya ratta, kahi caavonyaaya. Uyo ankhitiri woona citthu caavonyaaya, ni ukati nkhwaawe citthu caavonyaaya caananwereeha nrima. Apostolu Paulu khoopuwela wiira ntthu avonyaka maanaaya wiira uyo khanle ntthu oohinamaana. Wakhalaka wiira ahaavo munna wanrika uhiya upanka itthu yootakhala, Paulu khoopuwela wiira uyo ntthuuyo aapanka imweeni. Uyo ankupali wiira mayamunna yampheela upanka citthu comaana, masi yaapheela ukaviheriya.
18. Mananna apostolu Paulu cankavihenryaawe Evodia ni Sintiki awiitthucihileni isiyani? (Nwehe Afilipo 4:1-3.)
18 Muupuwele mananna apostolu Paulu caawacenryaawe asirokorihu eeli wanlokoni no Filipo. (Nsome Afilipo 4:1-3. *) Evodia ni Sintiki yahonyakulihana ni yahohiya wuulumihana. Apostolu Paulu khaaviruwenle ni khaawuulumale pusya ayo mayanuunwaayo. Uhiya commo, uyo ahohoolelihera wuupuwela citthu comaana caapankaaya. Oyeeli yahoviriha myaakha cinci yanvarelaka nteko Yehova ni apostolu Paulu ancuwela wiira Yehova aanawaafenta cinene ayo asirokorihwaayo. Ni wuupuwela commo, wahomwiiriha Paulu waakurumica ayo mayanuunwaayo ummaliha nanrokottole aarinaaya. Uweheeha citthu comaana caapankaaya akhunanawe wahonkavihera Paulu uhihiya ukhala wantteelaka nrima ni ukhalana upatthani womaana nimayamunna o wanlokoni.
Mwiikurumice wiira nhiwuulume pusya mayamunneenyu nlattu wo citthu cinvonyaaya (Nsome iparaagarafu 19) *
19. a) Mahumu anhala untakiha cani Paulu? b) Ilatarato ya humu nokweca nsalau yo Umwene inwiitthucihani isiyani?
19 Itthu ineetthuceehu. Mahumu, nhoolelihere uweheeha makhalelo omaana o mayamunneenyu ni mayanuunwiinyu. Otheene cihu ninaavonyaka; ni khula munneehu haana makhalelo omaana hiiva ahirineehu. (Afili. 2:3) Ninaacuwela wiira ukati nkiina mahumu ahaana yaavahaka ikano mayamunna o wanlokoni. Masi khampa apostolu Paulu, mahumu ahaana yiikurumicaka wiira ahoone paahi citthu mayamunna cinvonyaaya. Uhiya commo, mwiikurumice woona unfenta waya Yehova, uvilela waya ni citthu comaana cinkhitiryaaya upanka. Mahumu yeekurumicaka waawehera ratta mayamunna, nloko ninaakhala nipuro nomaana atthu otheene nineecoonaaya ufentiya.
NHIHIYE UNTAKIHA PAULU
20. Isiyani inhala waakavihera mahumu wiitthuca citthu cikhwaawe nintakihero na apostolu Paulu?
20 Uhihiyerera usoma ihantisi ya apostolu Paulu pooti waakavihera cinene mahumu. Nhina Índice das Publicações da Torre de Vigia, nyuuva nnaahala uphwanya myaha cinci cimmuuluma Paulu. Ntothe nipuro nantikhiya “Paulo” ni nwehe wantikhiye “Exemplo para os anciãos.” Ukati unsomeenyu nnyo myahannyo, mwiikohe co: ‘Ntakihero na Paulu ninhala ukikavihera cani uvara ntekwaaka khampa humu ukitteelaka nrima?’
21. Isiyani mahumu inlamuliyaaya ukupali?
21 Mahumu, nhiliyale wiira Yehova khanoolepelani wiira nhivonye; masi uyo nopheela wiira nkhale atthu ookhuluvelya. (1 Akor. 4:2) Apostolu Paulu ahovara nteko cinene ni aari nlopwana ookhuluvelya. Phimaana Yehova ammoona ukhala ntthu ofayita. Nyuuva ciicammo pooti wankupaliinyu wiira Yehova naawoonani ukhala ntthu ofayita nlattu wo citthu cinompankeleenyu. Yehova khanhala uliyala “miteko cinyu ni inanna cifentaleenyu ncina nawe, waakavihera winyu ale akhanle owaarya ni uhihiyerera winyu waakavihera.”—Mabere. 6:10.
NCIPO 87 As Reuniões Encorajam-nos
^ par. 5 Khweeliini, ninawaasukhuru cinene mahuku o wanlokoni nihu nlattu wo nteko wotheene unvaraaya. Nhina ula mwahoola, ninaahala wuuluma marikariko macese mahumu anaananaaya. Ciicammo ninaahala woona manannani ntakihero na apostolu Paulu cinhalaaya waakavihera mahumu uvilela ayo marikarikwaayo. Ula mwahoola unaahala unikavihera otheene cihu, ukhala wiira unaahala unithoonyera marikariko arinaaya mahumu ni unaahala unikurumica waatakiha.
^ par. 7 Efesu 6:14 Phimaana, mwiilipihace, nwarelaka isintu yo ikhweeli yootthukiya sana-saana, nware nikhikicero nosariya 15 ni nware ivirattho nnyaani winyu, nkhalaka owiitthenkaceene wiira nlalye ihapari comaana co nnema.
^ par. 10 1 Atesalonika 2:7 Uhiya commo, hiiva nihiiyeviha iriyariinyu, toko nthiyana nowaamwiha ni naamaaliha asaanaawe.
^ par. 14 Afilipo 4:13 Citthu cotheene kinkhitiri nlattu wa ule nokivaha ikuru.
^ par. 18 Afilipo 4:1 Phimaana mayamunnaaka, mi kinawuufentani ni nnaakinukhela cinene. Utteeliya waka nrima ni itthuvwaaka thi nyuuva. Kinwiirelani wiira nhihiye weettela iphiro ya Apwiiya. 2 Kimmwiirela Evodia ni kimmwiirela Sintiki wiira akhalane moopuwelelo mamocaaru nhina wa Apwiiya. 3 Ni kinaawuulepela weeva ciicammo, khampa ntthu khweeliini nonvaranaaka nteko nkhayi wiira uhihiye waakavihera ayo atthiyanaayo yiikurumicale nkhayi ni miiva nlattu wohapari comaana, wamoca ni Klemente ni ciicammo naatthu akhwaawe avanre nteko ni miiva, macinaaya yantikhiye nlivuruni yookumi.
^ par. 65 ILATARATO: Munna mmoca nkhuma untekoni ni nanlalyeera ntthu nonvaranaawe nteko.
^ par. 67 ILATARATO: Humu naarwaa umoopona mwaha munna onkomale veekha neecukulelihale.
^ par. 69 ILATARATO: Munna nanvaha ikano munna nkhwaawe rusiye nlattu wo itthu yiirannyeele.
^ par. 71 ILATARATO: Humu mmoca khanonviruwela munna eetthaalale ni hinvara ratta nteko wiivaherenryaawe ukavihera.
