MWAHA WOOSOMIYA 10
Nyuuva nnaahala ukhitiri ‘uhiya meettelo okhalayi’
“Nhiye meettelo okhalayi ni citthu caapankeenyu.”—AKOL. 3:9.
NCIPO 29 Que a Nossa Vida Dê Glória ao Teu Nome!
NINHALA WIITTHUCANI? *
1. Nhinancera usomihiya Ibiiblya, makhalelweenyu yaari cani?
NHINAAYA wancera usomihiya Ibiiblya ni Masaahiti a Yehova, meettelweenyu yaari cani? Enci atthunaka khunnicivela wuupuwela mananna caaryaaya makhalelweehu kontha khayaalokile mena vakaani. Moopuwelweehu ni citthu caapankeehu uyo ukatyuuyo caatthariha citthu atthu o ntuninyani cinhimyaaya wiira phikhanle comaana awula coohinamaana. Ule ukatyuule ‘khanaarina niweherero ni khanaarina Nluku.’ (Efesu 2:12) Masi usoma Ibiiblya, uhorukunusa cinene nrimeehu!
2. Isiyani yiitthucileenyu ukati wancenreenyu usoma Ibiiblya?
2 Ukati wancenreenyu usomihiya Ibiiblya, nyuuva mwahiitthuca wiira Yehova khanle khampa Apaapeenyu anoofentani cinene. Nyuuva ciicammo mwahiitthuca wiira mwapheelaka unciveliha Yehova ni upanka mphantte waamucyaawe, mwahaana nrukunusaka meettelweenyu ni moopuwelweenyu. Ciicammo mwahaana mwiitthucaka upanka citthu cinoncivela Yehova ni unyema citthu cinonrusa.—Efesu 5:3-5.
3. Toko cinthoonyeraaya Akolosu 3:9, 10, isiyani Yehova impheelaawe wiira nipanke ni isiyani inhaleehu wiitthuca nhina ula mwahoola?
3 Yehova khanle Apaapeehu ni Mpattusiihu. Phimaana, uyo haana isariya yowaahimyeera ale ampanka mphantte waamucyaawe isiyani inlamuliyaaya upanka ni isiyani ihinlamuliyaaya upanka. Ni nihinaaya upattisiya, Yehova nopheela wiira ‘nihiye meettelo okhalayi ni citthu caapankeehu.’ * (Nsome Akolosu 3:9, 10. *) Ula mwahoola unaahala waakavihera ale ampheela upattisiya ucuwela cinaakhuliyaaya ala makoho mararwaala: (1) “Meettelo okhalayi” akhanle isiyani? (2) Nlattuni Yehova umpheelaawe wiira nihiye ayo meettelwaayo? Ni (3) manannani ninhaleehu ukhitiri uhiya? Ula mwahoola ciicammo unaahala waakavihera ale apattisiye uhituruwela ukhalana meettelo ni moopuwelo okhalayi.
“MEETTELO OKHALAYI” ISIYANI?
4. Ntthu rina meettelo okhalayi nokhala cani?
4 Ntthu rina “meettelo okhalayi” nokhala ntthu rina moopuwelo oohinamaana ni nopanka citthu cinonrusa Yehova. Uyo pooti ukhala ntthu owiithenca, oohipica urusiya, oohisukhuru ni owiicoona. Pooti ukhalaka wiira uyo ntthuuyo unancivela woona ividiyu awula ilatarato caanamatamata (ipornografia), woona ifiilime conttewo ni coothoonyera usece. Hataa apankaka nnyo citthunnyo, uyo ntthuuyo haana makhalelo omaana ni mpaka pooti unriipa nrima nlattu wo citthu coohinamaana cimpankaawe ni cinoolumaawe. Masi khanoopuwela urukunusa moopuwelwaawe ni uhiya citthu coohinamaana cimpankaawe.—Akalas. 5:19-21; 2 Tim. 3:2-5.
Nahiyaka “meettelo okhalayi” ninaahiya uhooleliya nimoopuwelo ni nicitthu coohinamaana (Nwehe iparaagarafu 5) *
5. Nlattu wookhala atthu oopahuwa, isiyani ihinkhitiriihu uhiya upanka ni wuupuwela? (Nwehe Miteko 3:19.)
5 Otheene nikhanle atthu oopahuwa. Phimaana, khaninhala ukhitiri uhiya moopuwelo ni citthu coohiloka cotheene. Ukati nkiina, hiiva pooti wuuluma awula upanka itthu inhaleehu wahoolo uttharuwa. (Jer. 17:9; Tiya. 3:2) Masi nahiyaka meettelo okhalayi, hiiva ninaahiya weettiheriya ni citthu coohiloka. Hiiva ninaarukunusa meettelweehu ni ninaakhala ntthu nkhwaawe.—Isai. 55:7; nsome Miteko 3:19. *
6. Kontha isiyani Yehova nopheelaawe unoona nihiyaka wuupuwela ni upanka citthu coohinamaana caapankeehu nihinancera usomihiya Ibiiblya?
6 Yehova nopheela wiira hiiva nihiye upanka ni wuupuwela citthu coohinamaana kontha naanifenta ni nopheela unoona unitteelaka nrima. (Isai. 48:17, 18) Ni uyo naacuwela wiira naahiikurumiceke uhiya nnyo citthu coohinamaanannyo, ninaahala wiihuviha ni ninaahala waahuviha akhwiihu. Ni hataa Yehova naahuva anoonaka nipankaka citthu coohinamaana.
7. Toko cineeraaya Arooma 12:1, 2, isiyani inlamuliyeehu uthanla?
7 Pooti ukhalaka wiira ahaavo asipatthaniihu ni asimuciihu anhala unithya nanceraka urukunusa meettelweehu. (1 Pet. 4:3, 4) Ayo pooti uwiirelani wiira mwiitaphule ni mpanke khula itthu impheeleenyu, ni nhaahiye atthu akhwaawe wuuhimeeryani isiyani inlamuliyeenyu ni ihinlamuliyeehu upanka. Masi ntthu himmwiiwelela Yehova khweeliini khaneetaphula. Uyo neettiheriya niituninya ya Sotwani. (Nsome Arooma 12:1, 2. *) Otheene cihu nihaana nithanlaka: uthoonyera nanlelo meettelo okhalayi nivaraka matampi ni nittharaka ituninya ya Sotwani, awula unhiya Yehova urukunusa meettelweehu wiira nikhale atthu omaana.—Isai. 64:8.
NNOHALA UKHITIRI CANI UHIYA “MEETTELO OKHALAYI”?
8. Isiyani inhala unikavihera uhiya moopuwelo oohiloka ni citthu coohinamaana?
8 Yehova naacuwela wiira khaninhala ukhitiri wowaakuvya uhiya moopuwelo ni citthu coohinamaana caalemalenleehu upanka. (Isaa. 103:13, 14) Uyo naanikavihera venci urukunusa meettelweehu. Uyo nonikavihera avarelaka nteko Ibiiblya, nnepaawe wowaarya ni mphwinkwaawe woothotokanihiya. Khweeliini, nyuuva nhoona mananna Yehova cuukavihenryaaweni. Vano, nttwee noone isiyani inlamuliyeenyu upanka wiira nkhitiri uhiya meettelo okhalayi ni mwiitthenkace wiira mpattisiye.
9. Ibiiblya inhala wuukaviherani cani?
9 Nvarele nteko Ibiiblya wiira nwehe meettelweenyu. Ibiiblya inkhala khampa iloola. Iyo pooti unikavihera woona wakhala wiira moopuwelweehu, moolumelweehu ni citthu cimpankeehu cikhanle comaana awula mena. (Tiya. 1:22-25) Ntthu noosomihani Ibiiblya awula nkristau ookhomaala nkhwaawe ciicammo pooti wuukaviherani. Ayo pooti uvarela nteko Ibiiblya wiira yuuthoonyereni citthu comaana cinkhitiriinyu upanka ni citthu cinvonyiheenyu cinlamuliyeenyu uhiya. Ayo pooti uwiitthucihani utotha mmalivuruni cihu myaha cinhala wuukaviherani urukunusa meettelweenyu. Ni nhiliyale wiira khula ukati Yehova naapheela wuukaviherani. Khaavo ntthu nkhwaawe nhala ukhitiri wuukaviherani unvikana Yehova, kontha uyo naacuwela sana-saana nrimeenyu. (Miru. 14:10; 15:11) Phimaana, ukhuma nenna co, mwiilemalelihe ulompa ni usoma Ibiiblya khula nihuku.
10. Mwiitthucile isiyani niitthu yankhumelenle Elie?
10 Mwaamini wiira citthu Yehova cinnilepelaawe cinaaniphwanyiha ifayita. Citthu cotheene Yehova cinnirumaawe cinaanikavihera. Ntthu nopanka citthu Yehova cimpheelaawe unantaphuwa nrima, naakhala ootteeliya ni naakhalana ukumi womaana. (Isaa. 19:7-11) Masi atthu ahimpanka citthu Yehova cimpheelaawe anaahuva nlattu woovara matampi. Moone itthu yuulumilyaawe nlopwana mmoca neehaniya Elie. Uyo oonuwihiye naasipaapaawe yanfenta cinene Yehova. Masi woonuwilyaawe, ahancera waapatthanana atthu oohinamaana. Vano ahancera ulya citthu coohapala, uraruwa ni winnya. Elie neera wiira ahokhala ntthu onciva nkhitto ni inttewo. Uyo neera: “Mi kahancera upanka citthu cotheene ceetthucilyaaka wiira nkristau khanlamuliya upanka.” Masi Elie khaaliyanle citthu ceetthucilyaawe ukati waaryaawe mwanhima. Ni wahoolo waya, uyo ahohokoleela usoma Ibiiblya. Elie aheekurumica cinene uhiya upanka citthu coohinamaana ni hopattisiya mwaakha wo 2000. Upanka itthu Yehova impheelaawe wankavihenre cani Elie? Uyo neera: “Nna co, kihaana nnema wanrimani waka ni unaakitaphuwa nrima.” * Iyo itthwiiyo inthoonyera wiira ntthu hineewelela malamulo a Yehova nawiihuviha mwaneennyaawe; masi hataa ukhalaka commo, Yehova naapheela unkavihera uyo ntthuuyo urukunusa meettelwaawe.
11. Citthuni cinonrusa Yehova?
11 Mwiitthuce wuurusani citthu Yehova cinonrusa. (Isaa. 97:10) Ibiiblya inhimya wiira Yehova unrusa “miitho owiithenca, nlimi nowootha, ni matata ammwarusa iphome yaatthu oohittheka.” (Miru. 6:16, 17) Uyo ciicammo unrusa “atthu ampanka ikhirini ni anootha.” (Isaa. 5:6) Yehova cinanrusa cinene nnyo citthunnyo mpaka uyo ahaamalamaliha atthu yaakhala ukati wa Nowee kontha yaari anakhirini. (Upha. 6:13) Ni muupuwele itthu ikhwaawe. Yehova ahonruma porofeeta Malakiya waahimeerya apoovu wiira Nluku unrusa atthu ammananiha umwalanaca naawannyaya awula naamwaaraya ahirina isariya yoomwalanaca. Yehova khanoona ukhalana ifayita uswali waatthu ampanka nnyo citthunnyo. Ni uyo naahala waahukhumu nlattu wo citthu coohinamaana cimpankaaya.—Mal. 2:13-16; Mabere. 13:4.
Upanka itthu inonrusa Yehova uhaana unirusaka cinene khampa cinthanyeehu iyoolya yowuntta (Nwehe iparaagarafu 11-12)
12. ‘Urusiya nicitthu coohinamaana’ maanaaya isiyani?
12 Arooma 12:9 ineera: “nrusiye nicitthu coohinamaana.” Iyo phi itthu Yehova impheelaawe wiira nipanke. “Urusiya” unkhala uthanya itthu. Yanirusaka itthu, hi khinnicivela iyo itthwiiyo hataa vakaani ni inaanihiirya. Unaalikana nimananna caahaleenyu wiicoona ntthu oovahakani iyoolya yowuntta wiira nlye. Nlattu wo wuupuwela paahi iyo itthwiiyo, atthunaka nnohala vakaani uraphya. Nihaana nithanyaka inanna imocaaru citthu Yehova cineeraawe wiira cikhanle coohinamaana.
13. Kontha isiyani nihaana nikhikiceraka moopuwelweehu?
13 Nkhikicere moopuwelweenyu. Noopuwelaka cinene itthu, hi nimmalela upanka iyo itthwiiyo. Phimaana Yesu waaniirenlyaawe wiira nihiye moopuwelo yaahala uniiriha uvara matampi. (Mat. 5:21, 22, 28, 29) Khweeliini, itthu impheeleehu cinene ukhanle untteeliha nrima Yehova. Wiira nikhitiri untteeliha nrima, nihaana nihiyaka woohipicapica khula moopuwelo anhala uniphwanya mmuru wihu.
14. Moolumelweehu anthoonyera isiyani ni makohoni anlamuliyeehu wiipanka?
14 Ratta nicitthu cinoolumeenyu. Yesu aheera: “Citthu cotheene cinkumiheenyu wamalakuni winyu, cinkhuma wanrimani winyu.” (Mat. 15:18) Khweeliini, citthu cinoolumeehu cinaathoonyera mananna ciryaaya nrimeehu. Phimaana, mwiikohe co: ‘Kinneekurumica uhootha hataa kicuwelaka wiira wuuluma ikhweeli pooti ukiwaanela masakha? Kinawaahisimu awannyaka awula amwaaraka kihuulumaka ni kihipankaka hataa itthu yaahala uthoonyera wiira kinaaciveliya ninthiyana awula ninlopwana nkhwaawe? Kinneekurumica unyema myaha coosece? Kinaakhala oomaala ni woohaakuva urusiya katthekeliyaka?’ Wuupuwela ayo makohwaayo pooti wuukaviherani cinene. Khampa cinrikaaya urula ikhamica woohipacera utthukula ipotawu caya, ciicammo unaahala unirika uhiya meettelo okhalayi wakhalaka wiira nanlelo unaanicivela ucaca, wootha ni wuuluma myaha coosece.
15. Ukhomela wanipottoni “meettelweehu okhalayi” maanaaya isiyani?
15 Mwiikurumice cinene. Apostolu Paulu ahopanka nlattanihero nuulupale ninthoonyera wiira urukunusa meettelweehu inkhala itthu yofayita. Uyo enre wiira nihaana nikhomelaka wanipottoni “meettelweehu okhalayi.” (Aroo. 6:6) Yesu aholeva ukumyaawe wiira antteelihe nrima Yehova. Inanna imocaaru, hiiva ciicammo nihaana nipankaka ikuru, wanaaminiihu uleva khula itthu wiira nihiye meettelo okhalayi ni nintteelihe nrima Yehova. Nihaana nipankaka iyo itthwiiyo napheelaka ukhala unitaphuwaka nrima ni ukhalana ukumi woohimala wahoolo. (Joau 17:3; 1 Pet. 3:21) Nihaana nicuwelaka wiira Yehova khanhala urukunusa malamulwaawe wiira anitteelihe nrima, masi thi hi ninlamuliya urukunusa moopuwelweehu wiira nintteelihe nrima uyova.—Isai. 1:16-18; 55:9.
16. Kontha isiyani nhaana nhihiyaka upanka ikuru wiira nnyeme moopuwelo oohiloka?
16 Nhihiye upanka ikuru wiira nnyeme moopuwelo oohinamaana. Hataa mpattisiyaka, nyuuva nanlelo nhaana mpankaka ikuru wiira nhiye moopuwelo oohinamaana. Muupuwele itthu yankhumelenle munneehu neehaniya Maurício. Waaryaawe mmirawo, uyo ahancera uweettana alopwana akhunanawe. Nuuwakatyaaya, uyo ahaacuwela Masaahiti a Yehova ni ahancera usomihiya Ibiiblya. Uyo ahorukunusa meettelwaawe ni hopattisiya mwaakha wo 2002. Hataa avirihaka myaakha cinci answalelaka Yehova, munna Maurício neera: “Hataa ukhalaka wiira kahohiya meettelo okhalayi, uhaavo ukati waakiphwanyaaya moopuwelo oohiloka.” Masi munna Maurício khanhiya iyo itthwiiyo inlolovihaka. Uhiya commo, uyo neera: “Itthu inkilipiha ukhanle ucuwela wiira keekurumicaka ukumiha mmuru waka moopuwelo oohiloka, kinantteeliha nrima Yehova.” *
17. Moopuwelaka itthu yaakhumelenle arokorihu Nabiha, isiyani itepile wuucivelani?
17 Munlepele Yehova wuukaviherani ni nkhuluvele ikuru cawe, kahi ikuru cinyu. (Akalas. 5:22; Afili. 4:6) Wiira nikhitiri uhiya meettelo okhalayi, nihaana niikurumicaka cinene. Muupuwele ntakihero naarokorihu aneehaniya Nabiha. Ayo yahonyanyaliya naathumwanaya anarina myaakha 6 paahi. Arokorihu Nabiha aneera: “Iyo itthwiiyo yahokiwerya cinene.” Phimaana, arokorihu Nabiha yahokhala ntthu oohipica urusiya; yahancera utumihaca citthu coohapala, yahotthukiya ni yahokhala myaakha cinci nkhattya. Anari nkhattya, Saahiti a Yehova mmoca ahowootola ni ahancera waasomiha Ibiiblya. Arokorihu Nabiha yahancera urukunsa cinene meettelwaaya. Ayo aneera: “Iviisiyu caka cikhwaawe khacaakirikile uhiya, masi itthu yaatepile ukirika waari uhiya unlya sikaro.” Uvira waya mwaakha mmoca, arokorihu Nabiha yahokhitiri uhiya unlya sikaro. Yaakhitinri cani? Ayo aneera: “Itthu yaakikavihenre uhiya unlya sikaro waari unlompa cinene Yehova. Mi kinaakupali wiira wakhala wiira mi kihokhitiri, khula ntthu pooti ciicammo ukhitiri urukunusa meettelwaawe!” *
NYUUVA NNAAHALA UKHITIRI WIITTHENKACA WIIRA MPATTISIYE!
18. Toko cinthoonyeraaya 1 Akorintu 6:9-11, isiyani aswali enci a Yehova inkhitiryaaya upanka?
18 Ukati wo makristau oopacera, alopwana ni athiyana yaathanliye ni Yehova wiira arwee yalamulele nkhayi ni Yesu wiirimu yahopanka citthu cinci coohinamaana ahinakhala makristau. Ahaavo yeetta uluva, yaarupihana alopwanaru awula athiyanaru, ni ahaavo yaari malatarawu. Masi, nnepa wowaarya wa Nluku wahaakavihera urukunusa meettelwaaya. (Nsome 1 Akorintu 6:9-11. *) Inanna imocaaru, Ibiiblya inawaakavihera atthu enci mahukwaala urukunusa meettelwaaya. Ayo atthwaayo ahokhitiri uhiya citthu coohinamaana caalemalenlyaaya upanka. * Ukhitiri waya urukunusa meettelwaaya, unthoonyera wiira nyuuva ciicammo nnaahala ukhitiri uhiya upanka citthu coohinamaana wiira mpattisiye.
19. Ninhala wiitthucani nhina mwaha unttharana nuula?
19 Ale ampheela upattisiya yahiyaka meettelo okhalayi, ahaana yapankaka itthu ikhwaawe. Ayo ahaana yiikurumicaka ukhalana meettelo ophiyaaru. Nhina mwaha unttharana nuula, ninaahala woona manannani ninlamuliyeehu uthoonyera meettelo ophiyaaru ni mananna akhwiihu cinhalaaya unikavihera.
NCIPO 41 “Ouve a Minha Oração”
^ par. 5 Ukati wo wiitthenkaca wiira nipattisiye, nihaana niikurumicaka urukunusa meettelweehu. Ula mwahoola unaahala unikavihera ucuwela isiyani inaaciya weeriyaka meettelo okhalayi, nlattuni ninlamuliyeehu uhiya ayo meettelwaayo ni manannani ninhaleehu ukhitiri uhiya. Ni mwaha nkhwaawe unttharana nuula unaahala unikavihera ucuwela mananna oothoonyera meettelo ophiyaaru hataa ukhalaka wiira nihopattisiya.
^ par. 3 NUULUMO NOOTAPHULELIYA: ‘Uhiya meettelo okhalayi’ maanaaya wiira uhiya upanka citthu cinonrusa Yehova. Nihaana nihiyaka upanka nnyo citthunnyo nihinaaya upattisiya.—Efesu 4:22.
^ par. 3 Akolosu 3:9 Nhithepyane. Nhiye meettelo okhalayi ni citthu caapankeenyu 10 ni mwiiwarihe meettelo ophiyaaru anrehereriya nuucuwela ikhweeli, wiira akhaleke khampa mwaneene Nluku cumpilyaawe.
^ par. 5 Miteko 3:19 Nrukunuse nrima, ni nhiye meettelo oohiloka, wiira matampi arineenyu afuttiye, ni wiira wuuphwanyeni ukati wo nnema wa Yehova.
^ par. 7 Arooma 12:1 Miyamunna, ukhala wiira Nluku howoonelani uthunku, kinawuulepelani wiira nvaherere irutthu cinyu toko itthuvo, yowaarya ni inoncivela Nluku, munvarelaka nteko woominepani wamoca nimoopuwelweenyu. 2 Ni nhiye utthara meettelo o ula ulumwenkuula, masi nrukunuse meettelweenyu, nrehereryaka moopuwelelweenyu, wiira mwiithoonyere mwaasineeneenyu itthu ikhanle yomaana, yooreera ni yoohipahuwa impheelaawe Nluku.
^ par. 10 Nwehe mwaha uneera “Ibiiblya Inaarukunusa Makhalelo Aatthu—‘Mi kampheela unhokoleela Yehova,’” umphwanyannya nrevistani Ukhalenla 1 yo Abril yo 2012.
^ par. 16 Nwehe mwaha uneera “Ibiiblya Inaarukunusa Makhalelo Aatthu—‘Ayo yahokiwacera ratta,’” nrevistani Ukhalenla 1 yo Maio yo 2012.
^ par. 17 Nwehe mwaha uneera “Ibiiblya Inaarukunusa Makhalelo Aatthu—‘Mi kahokhala nthiyana oohipica urusiya ni nankhitto,’” nrevistani Ukhalenla 1 yo Outubro yo 2012.
^ par. 18 1 Akorintu 6:9 Awula nyuuva khannocuwela wiira atthu ahineettela isariya khanrwaa ukela wuumweneni wa Nluku? Nhiithepye. Atthu anraruwa, anaaswalela attontto, aneetta uluva, anrupihana alopwanaru ni athiyanaru, 10 malatarawu, ale ankhalela ikhwilu maali, ananhapaliya, atthu ooveeha ni anaanyonka akhwaaya khanrwaa ukela wuumweneni wa Nluku. 11 Atthu akiina iriyariinyu yaanaapankaka nnya citthunnya. Masi nyuuva nhorapihiya; nhoreerihiya; nhooniya ukhala atthu osariya nlattu wo ncina na Apwiiya Yesu Kristu ni ninnepa wowaarya wa Nlukwiihu.
^ par. 18 Nwehe ikwaaturu ineera “ Ibiiblya inaarukunusa makhalelo aatthu.”
^ par. 68 ILATARATO: Uhiya moopuwelo oohiloka ni citthu coohinamaana unaalikana nuurula ikuwo yoonanaraca.
