MWAHA WOOSOMIYA 6
NCIPO 18 Ninnixukhurela Yowoopola
Hi ninaasukhuru cinene nlattu Yehova woonilevelela itampi cihu
“Nluku haafenta cinene apinaatamu, phimaana haavaha Mwanawe mmoca.” —JOAU 3:16.
ITTHU INHALEEHU WIITTHUCA
Ula mwahoola unaahala unikavihera utepa unsukhuru Yehova nlattu woonilevelela ni ucuwela isiyani Yehova impankaawe wiira anilevelele.
1-2. Manannani itthu yaakhumelenle apinaatamu inlikanacaaya niitthu yankhumelenle mmirawo romoliye wiipaceroni?
MMUUPUWELE mmirawo mmoca rina asithumwaane anamisurukhu. Masi nihuku nimoca, inaakhumelela ihasara. Athumwaane ni anumwaane anawaapanka asitente ni anaakhwa. Ukati neewaawe iyo ihapariiyo, uyo naakhala ooriipiya nrima cinene. Masi, inaakhumelela itthu yootepa unriipiha nrima. Uyo mmirawooyo nawoonelela wiira athumwaane ni anumwaane yahorihakaca nsurukhu wotheene waarinaaya, yahokopha nsurukhu mwinci ni ahonhiya alokihiyaka. Vano, uhiya unhiyera mihakhu, asithumwaane anonhiya alokihiyaka. Masi uyo kharina nsurukhu ni hataa itthu yoolya naahuvela.
2 Mananna mamocaaru, makhalelweehu anlikana ni makhalelwaawe uyo mmirawooyo. Asithumwanihu oopacera, Atamu ni Hawa, yaari oohipahuwa ni yaakhala ujardim yo Eeteni. (Upha. 1:27; 2:7-9) Ayo yanhala ukhalana ukumi womaana, woohipahuwa ni woohimala. Masi woohipica, citthu cotheene cahorukunuwa. Ayo ahohaleela iparakha yookhala nipuro nomaana upeephoni ni niweherero naarinaaya nokhalana ukumi woohimala. Vano, isiyani yaahiyenryaaya asaanaaya? Ibiibiliya ineera: “Phimaana nlattu wa nlopwana mmoca ahokela matampi ntuninyani, ni ukhwa nlattu wo itampi, coo ukhwa uhaamwareela apinaatamu otheene, kontha otheene ahaana matampi.” (Aroo. 5:12) Itthu Atamu nihiyenryaawe akhanle matampi. Nlattu wo ayo matampyaayo, hiiva ninaakhwa. Matampi nihiyeriyeehu ankhala toko ulokihiya nsurukhu mwinci uhinkhitiryaawe uliva khula ntthu.—Isaa. 49:8.
3. Kontha isiyani itampi cihu cinlikanacaaya nuulokihiya?
3 Yesu aholattaniha itampi nuulokihiya. (Mat. 6:12; Luka 11:4) Hiiva navaraka itampi, unkhala khampa ninankophela Yehova. Natthunne, Yehova anhala uniliviha itampi cihu ni naahiliveke, nanhala ukhwa woohiweherera-tho uhokoleela ukhala akumi. —Aroo. 6:7, 23.
4. a) Woohikaviheriya nintthu, isiyani yaahala uwiirannyeela atthu otheene? (Isaalimu 49:7-9) b) Mbiibiliyani, nuulumo “itampi” maanaaya isiyani? (Nwehe ikwaaturu “ Itampi.”)
4 Niireke hiiva nanhala ukhitiri ukhalana-tho citthu cotheene Atamu ni Hawa ahalenlyaaya? Veekha cihu khanaahala ukhitiri. (Nsome Isaalimu 49:7-9. a) Hiiva naahala ukhwa paahi woohiwehera wunwelelihiya awula ukhalana ukumi woohimala wahoolo. Khweeliini, naahala ukhwa khampa cinkhwaaya inama.—Ekles. 3:19; 2 Pet. 2:12.
5. Manannani Yehova cinikavihenryaawe uliva itampi cihu? (Nwehe ilatarato.)
5 Mmuupuwele mmiravo muulumileehu wiipaceroni. Isiyani yaahala wiirannya unari wiira hokhumelela nlopwana thaciri aahala upheela unlivela nsurukhu wotheene waalokihiyaawe? Woohaanyihacera, uyo mmirawooyo anhala usukhuru ni utthuna nwo ukaviheriya nwo. Mananna mamocaaru, Apaapeehu oofenta Yehova ahonilivela wiira nihokoleele ukhalana itthu ihalenlyaawe Atamu. Yesu ahotaphulela mananna cinilivenlyaaya: “Nluku haafenta cinene apinaatamu, phimaana haavaha Mwanawe mmoca, wiira ntthu nhala umwaamini hitankanyiye, masi aphwanye ukumi woohimala.” (Joau 3:16) Yehova upanka wawe commo, honikavihera ciicammo wiira nikhalane upatthani womaana nuuyo.
Yesu aholalyeera ihapari comaana cinuuluma ulevelela wa Yehova nlattu wo woopola. (Joau 3:16) Wahoolo uyo ahovaherera irutthwaawe wiira ukhumelele woopoliya (moone iparaagarafu 5)
6. Nikohoni ninhaleehu waakhula nhina ula mwahoola?
6 Manannani hiiva ninhaleehu uphwanyera ifayita itthu Yehova ipankilyaawe wiira anilevelele itampi cihu? Wiira naakhule nna nikohonna, ninaahala woopela mwaha moolumo o mbiibiliyani ni isiyani intaphulelaaya. Wuupuwela itthu Yehova ipankilyaawe wiira anilevelele, unaahala uniiriha utepa unsukhuru.
YEHOVA NOPHEELA WIIRA NIMWAATANANE
7. a) Isiyani Atamu ni Hawa ihalenlyaaya? b) Ukhala wiira nikhanle ucuulu wa Atamu ni Hawa, manannani nimpheeleehu ukaviheriya? (Arooma 5:10, 11)
7 Atamu ni Hawa uvara waya itampi, yahohaleela iparakha yookhalana ukumi woohimala ni ciicammo yahohiya waatanaca ni Yehova. Wiipaceroni, Atamu ni Hawa yahaana iparakha yookhala amuci a Nluku. (Luka 3:38) Masi unrukunuwela waya Yehova, ayo yahohiya ukhala amuci a Nluku ahinaayara asaana. (Upha. 3:23, 24; 4:1) Hiiva nikhanle ucuulu wa Atamu. Phimaana, nihaana nikaviheriyaka wiira nimwaatanane Yehova. (Nsome Arooma 5:10, 11. b) Nimoolumacero makhwaawe, hiiva nihaana nihiyaka ukhala awanani a Nluku wiira nimwaatanane ni nikhale amucyaawe. Wootteeliha nrima, Yehova khaweherenre wiira hiiva nipanke itthu wiira nituruwele ukhala amucyaawe. Uyova mwaneene haavya mananna wiira nimwaatanane. Manannani?
YEHOVA HAAVYA MANANNA WIIRA NIKHALE APATTHANNYAAWE
8. Isiyani Yehova ipankilyaawe wiira apinaatamu oopahuwa akhale apatthannyaawe?
8 Yehova haavya mananna wiira apinaatamu oopahuwa akhale apatthannyaawe. Uyo holiva wiira hiiva nituruwele ukhalana itthu Atamu ni Hawa ihalenlyaaya. Wiira alive, uyo hotthenkaca itthu yaarina ifayita imocaaru niile yaahalenlyaawe Atamu. Mbiibiliyani, mphantte uri Matewus mpaka Apokalipise, inaahimiya itthu Yehova ipankilyaawe wiira apinaatamu oopahuwa akhale apatthannyaawe. —Aroo. 3:25.
9. Isiyani Yehova yaapankilyaawe wiira asarayeli aleveleliye itampi caya?
9 Yehova ahopanka mananna wiira apoovu o Isarayeli aleveleliye itampi caya ni wiira amwaatanane uyova. Apoovu o Isarayeli yahaana yapankaka ifesta yuulupale nihuku nimoca khula mwaakha. Iyo ifesteeyo yeehaniya Nihuku Noolepela Uleveleliya. Nno nihukunno, nankuttho aanaavaherera nkuttho wonama wiira apoovu aleveleliye itampi caya. Masi, unawoonannya wiira nkuttho wonama paahi khawaakhitiri umalamaliha itampi ca ntthu. Kontha apinaatamu ahaana ifayita uvikana nnyo inamannyo. Masi, nsarayeli avahereraka nkuttho nimananna Yehova caapheelaawe, uyo anleveleliya itampi cawe. (Mabere. 10:1-4) Uhiya commo, nkuttho waavahaaya woohihiyerera waanaawuupusera wiira ayo yaari atthu oottheka ni yampheela ukaviheriya cinene wiira cimalamalihiye itampi caya.
10. Isiyani Yehova ipankilyaawe apinaatamu aleveleliye itampi caya?
10 Isiyani Yehova ipankilyaawe wiira apinaatamu aleveleliye itampi caya? Uyo “honvaherera mwanaawe nonfentaawe wiira amalamalihe itampi cotheene.” (Mabere. 9:28) Yesu hovaha ukumyaawe wiira anoopole. (Mat. 20:28) Manannani noopoliyeehu?
WIIVAHERERA WA YESU UHOKHITIRIHA ULEVELELIYA ITAMPI CIHU
11. a) Kontha isiyani Yehova nilevelenlyaawe itampi cihu? b) Tipani aahala ukhitiri uliva wiira nileveleliye?
11 Khampa cinthoonyeraaya Ibiibiliya, Yehova holakela uliva wiira nileveleliye itampi cihu ni wiira nikhale apatthannyaawe. Yehova livile isiyani wiira apinaatamu ahokoleele ukhalana itthu ihalenlyaawe Atamu? Nhiliyale wiira Atamu ni Hawa ahohaleela ukumi woohipahuwa ni ukhalana ukumi woohimala. Phimaana, itthu Yehova yaahalaawe uliva yahaana yakhalaka imocaaru niile ihalenlyaawe Atamu ni Hawa. (1 Tim. 2:6) Maanaaya wiira ahaana akhumelelaka nlopwana muulupale toko Atamu ni uyo ahaana akhalaka (1) oohimatampi; (2) ookhalana ukumi woohimala va watuninyani va; ni (3) aahala waamini uleva awula uhaleela ukumyaawe wiira anoopole. Ala manannaala, phaahalaaya ukhitirya uliviya ile ihalenlyaawe Atamu.
12. Kontha isiyani Yesu waanamphwanela uliva itthu yaahalenlyaawe Atamu?
12 Kontha isiyani Yesu waanamphwanela uliva itthu ihalenlyaawe Atamu ni Hawa? Nlattu wo citthu tthaaru. Nttwee noone. (1) Uyo aari oohipahuwa—“khavanre itampi.” (1 Pet. 2:22) (2) Nlattu woohikhalana itampi, uyo anhala ukhala va watuninyani va mpaka, woohikhwa. (3) Uyo ahaamini ukhwa ni uleva ukumyaawe wiira anoopole. (Mabere. 10:9, 10) Yesu aari nlopwana oohipahuwa, khampa Atamu caaryaawe hinavara itampi. (1 Akor. 15:45) Nlattu wo citthu cotheenennyo, Yesu hokhitiri uliva itthu ihalenlyaawe Atamu. (Aroo. 5:19) Naayo manannaayo, Yesu ahookhala “Atamu oomalela.” Ukhala wiira Yesu holiva ile yaahalenlyaawe Atamu, pooti uhikhumelela-tho nlopwana oohipahuwa wiira alive iyo itthwiiyo. Yesu khwile ikwaha imoca ni “khanhala ukhwa-tho.” —Mabere. 7:27; 10:12.
13. Manannani Yehova khitinryaawe uliva itthu ihalenlyaawe Atamu?
13 Isiyani Yehova ipankilyaawe wiira naatanace nuuyova? Yehova hopanka itthu wiira anilevelele itampi cihu. Wiira ikhitirye iyo, Yehova honvaherera mwanawe Yesu wiira alive itthu ihalenlyaawe Atamu ni anoopole.—Efesu 1:7; Mabere. 9:14.
YEHOVA HONOOPOLA NI NAANOONA UKHALA ATTHU OMAANA
14. Isiyani inhaleehu woona?
14 Iparakhani cinkhalaneehu nlattu Yehova woonoopola? Wiira naakhule nna nikohonna, ninaahala woona citthu piili cinhimiya mbiibiliyani cinnikavihera woona saana iparakha cinkhalaneehu nlattu wooleveleliya ni Yehova.
15-16. a) Manannani wiivaherera wa Yesu cinooponlyaaya? b) Hiiva nineecoona cani nlattu wo woopoliya ayo manannaayo?
15 Ibiibiliya inhimya wiira hiiva nihoopoliya kontha Yehova honilivela itthu yaahalenlyaawe Atamu ni Hawa. Apostolu Peturu hooluma nwo woopoliya nwo. Uyo enre co: “Kontha nyuuva nnaacuwela iperesu iliveliyeenyu, wiira moopoliye nlattu wo makhalelweenyu oohiloka, nhiyeriyeenyu naasithumwaninyu okhalayi. Khamoopoliye nicitthu cimmala toko iwooru awula iparaata. Masi moopoliye niiphome ya Kristu, irina ifayita yuulupale, khampa iphome yo mwaakhontwa omaana ni oohipahuwa.”—1 Pet. 1:18, 19; niwehero.
16 Nlattu wo wiivaherera Yesu, hi nihoopoliya nhina itampi cihu ni ukhwa, unnihuviha cinene. (Aroo. 5:21) Woohaakanyaca, hi ninansukhuru venci Yehova ni Yesu nlattu wonoopola niiphomyaawe yofayita cinene. —1 Akor. 15:22.
17-18. a) Wooniya ukhala atthu omaana maanaaya isiyani? b) Iparakhani inaakheleehu nlattu Yehova woonoona ukhala atthu omaana?
17 Ibiibiliya ineera wiira Yehova naawoona ukhala atthu omaana ale anonswalela. Iyo maanaaya wiira Yehova khanaalokiha wiira alive nlattu wotampi caya. Hataa ukhalaka commo, Yehova khanrukunusa ikano cawe cinhimya ikhanle itthu yomaana ni yoohinamaana. Yehova khannoona ukhala atthu omaana nlattu wiira unaaniphwanela. Uyo khacinoncivela itampi cinvareehu. Masi, Yehova naatthuna niiraati umalamaliha itampi cihu nooniheraka waamini woopoliya wihu ni Yesu. —Aroo. 3:24; Akalas. 2:16.
18 Iparakhani cinkhalaneehu nlattu Yehova woonoona ukhala anasariya? Makristau oothanliya ahaana iparakha yoorwaa ulamulela wiirimu nkhayi ni Yesu. Ayo ahooniya ukhala atthu omaana ni asaana a Nluku. (Titu 3:7; 1 Jo. 3:1) Yehova haalevelela itampi caya. Mpaka ukhala toko wiira ayo khavanre itampi. Phimaana, ayo ahothanliya wiira yakele muumweneni wa Nluku. (Aroo. 8:1, 2, 30) Ale arina niweherero nokhalana ukumi woohimala va watuninyani va, ahooniya ukhala atthu omaana khampa apatthani a Nluku ni aholeveleliya itampi caya. (Tiya. 2:21-23) Ale anhala woopwa ikhotto ya Harmacetom anaahala ukhalana iparakha yoohikhwa-tho. (Joau 11:26) “Ale apankale citthu comaana” ni ciicammo “ale apankale citthu cootakhala” akhwile ahaana iparakha yowunwelelihiya. (Mite. 24:15; Joau 5:28, 29) Nuuwakatyaaya, aswali a Yehova otheene anhala ukhala va watuninyani va ni yeettelaka malakihero a Yehova, anaahala “uphwanya utaphuwa woottitthima waasaana a Nluku.” (Aroo. 8:21) Hi ninaakhala ootteeliya nuupuwelaka ukati unhaleehu ukhala asaana oohipahuwa a Yehova!
19. Manannani Yehova ni Yesu cinikavihenryaaya? (Nwehe ciicammo ikwaaturu “ Ulevelela wa Yehova”)
19 Itthu inikhumelenle inlikanaca khampa itthu yankhumelenle mmirawo romoliye wiipaceroni ula mwahoola. Uyo ahohaleela mihakhu cotheene ni athumwaane ni anumwaane yanhiile alokihiyaka nsurukhu wahaahalaawe ukhitiri uliva. Masi Yehova honikavihera nlattu Yesu wowiivaherera wiira anoopole. Nlattu woomwaamini wihu Yesu, hiiva nihoopoliya nhina itampi ni ukhwa. Hiiva pooti ufutthiya itampi cihu ni Yehova unoona khampa wiira khanivanre itampi. Itthu yofayita cinene uri waatanaca naapaapeehu oofenta, Yehova.
20. Isiyani inhaleehu woona nhina mwaha unttharana nuula?
20 Hi ninansukhuru cinene Yehova ni Yesu nuupuwelaka citthu cotheene cinipankenlyaaya. (2 Akor. 5:15) Uhikhanle ukaviheriya naayo atthu eelyaayo, hi khanaahala ukhalana niweherero! Masi, uleveleliya ni Yehova unniphwanyiha ifayitani? Iyo phi itthu inrweehu woona mwaha unttharana nuula.
NCIPO 10 Ninvuwihe Yehova, Muluku Ahu!
a Isaalimu 49:7 Khaavo nhala ukhitiri umoopola munnaawe, hataa khaavo nokhitiri unliva Nluku wiira amoopole munnaawe, 8 (Iperesu inlamuliya uliviya wiira woopoliye ukumyaaya ikhanle yuulupale cinene, phimaana ayo khanhala ukhitiri uliva) 9 Wiira uyova akhale mpaka ni hirwee ukhwa.
b Arooma 5:10 Hi naari awanani a Nluku, vano nihokhala apatthannyaawe nlattu wookhwa mwanawe. Iyo inaatepa unikupaliha wiira ninaahala woopwa, nna co niriihu apatthani a Nluku. 11 Uhiya ile Nluku ipankilyaawe, masi ciicammo ninaatteeliya nrima nlattu wo Apwiiyeehu Yesu Kristu, ukhala wiira nlattu waawaya, hi nihokhala apatthani a Nluku.
