MWAHA WOOSOMIYA 8
NCIPO 130 Nihaana nilevelelanaka
Manannani nyuuva nnohaleenyu utakiha ulevelela wa Yehova?
“Toko Yehova cuulevelenlyaaweni niiraati, nyuuva nhaana mpankaka ciicammo.” —AKOL. 3:13.
ITTHU INHALEEHU WIITTHUCA
Isiyani inlamuliyeehu upanka wiira nikhitiri unlevelela ntthu anitthekelaka.
1-2. a) Masakhani atthunaka anhala unirikela unlevelela ntthu? b) Isiyani anuunu Denise ipankilyaaya?
NYUUVA unawuurikani waalevelela akhwiinyu? Otheene cihu, unaanirika unlevelela ntthu venci-venci anipankelaka itthu yooniriipiha nrima cinene. Masi, pooti unaakhitirya upanka itthu wiira nihikhale nuupuwela itthu ikoseriyeehu ni ulevelela. Moone itthu yaakhumelenle anuunu a neehaniya Denise. a Ayo yahokhitiri ulevelela itthu yuulupale yaapankiyaaya. Mwaakha wo 2017, anuunu Denise naamucyaaya yahorwaa uthotola nipuro ninhooleliya miteko co Masaahiti a Yehova ntuninyani motheene yaatthukuliye phiyaaru. Yaturuwaka, motorista mmoca ahoopwesa ikaaro yaaryaaya anuunu Denise ni naamucyaaya. Anuunu Denise yaahonkhwa naaphuumu. Vano wunwa waya, ayo yaahonenela wiira asaanaaya yahorakalaca cinene ni awannyaya yeehaniya Brian yahokhwa. Yuupuwelaka itthu yaakhumelenle, anuunu Denise yaheera: “Mi kahosanka ni akoona itthu yoopanka.” Vano, ayo yahoona wiira motorista khonne uwerya ni hataa pooti weettihaawe ikaaro. Vano yahonlompa Yehova anlepelaka nnema.
2 Vano, motorista ahotthukiya nlattu wo waapanka asitente ni umwiiva ntthu. Nihuku naahalaawe uhukhumwiinya ooninnyaka wiira howiiva anhala utthukiya mahuku menci. Masi, masuwiisi otiripunaali yahowiirela anuunu Denise wiira itthu yaahalaaya ulakela wiira apankiye uyo nlopwanooyo yanhala upankiya. Anuunu Denise aheera: “Mi keecoonile khampa ntthu utthukulacile ipontu caattottheliya makhwattaka ni wiitthela maakha, kontha kahoopuwela citthu cotheene cakiranyenle nne nihukunne.” Uvira waya isumana, anuunu Denise yaahorwa utiripunali wiira yaamuulumane nlopwana aakumiherenre masakha amucyaaya. Isiyani ayo yaapankilyaaya? Ayo yahonlepela suwiisi wiira anlevelele uyo nlopwanooyo. b Umaaliha waya wuulumaca, suwiisi ahopacera wunla. Uyo heera: “Akinapaca wiiwa wiira amuci yaakhumelenle masakha anaalepela wiira ntthu aaphwanyihile masakha atafitiye niikiriri ni avareliyaka nteko moolumo onifento ni uleveleliya.”
3. Isiyani yankurumicile anuunu Denise wiira anlevelele?
3 Isiyani yaakavihenre anuunu Denise ukhala oolevelela? Ayo yaanoopuwela ulevelela wa Yehova. (Mik. 7:18) Nooniheraka wiira ninaasukhuru mananna Yehova nonilevelenlyaawe, unaanikurumica ukhala atthu oolevelela akhunanihu.
4. Isiyani Yehova impheelaawe wiira hiiva nipanke? (Efesu 4:3)
4 Yehova noopheela wiira hiiva naalevelele akhwiihu khampa nonilevelenlyaawe. (Nsome Efesu 4:32. c) Yehova noweherera wiira naaleveleke ale annitthekela. (Isaa. 86:5; Luka 17:4) Nhina ula mwahoola, ninaahala woona citthu tthaaru ninlamuliyeehu upanka wiira nikhale atthu oolevelela.
NHIHANYURIHE MANANNA ANEECOONEENYU
5. Khampa cinthoonyeraaya Miruku 12:18, manannani cineecooneehu wakhalaka wiira ntthu nanitthekela?
5 Atthunaka unaaniriipa nrima cinene nlattu woowuulumeliya itthu yoohiloka awula upankiya itthu ihinnicivela, venci-venci akhalaka mpatthaniihu ninoncuweleehu saana awula amuciihu. (Isaa. 55:12-14) Ikwaha cikiina, itthu inniwereeha nrima inkhala khampa niihomiye ni mwaalo. (Nsome Miruku 12:18. d) Atthunaka hiiva pooti umananiha ukhala khampa khinikhumelenle hataa itthu yooniriipiha nrima. Masi, upanka commo, unlikanaca nuuhomiye nimwaalo pihinnyaka mwaalooyo waanikhwattani vaava. Ayo manannaayo, khaninlamuliya wuupuwela wiira ninaahala ukhala saana naahanyurika mananna aneecooneehu.
6. Ntthu anitthekelaka, isiyani inhaleehu upanka?
6 Ntthu anitthekelaka, atthunaka itthu yoopacera upanka ukhanle unvirweela ntthuuyo. Ibiibiliya ineera wiira ikwaha cikiina hiiva pooti ukhanla ooviruwa. Masi iyo ciicammo, ineera wiira khaninlamuliya uviruwa ukati wotheene. (Isaa. 4:4; Efesu 4:26) Kontha isiyani? Kontha moopuwelelo pooti uniiriha upanka citthu coohinamaana. Uviruwa khunommalamaliha nanrokottole nimananna omaana. (Tiya. 1:20) Uviruwa ikhanle itthu inkhumelela, masi, uhihiyerera uviruwa ikhanle itthu inthanlaawe khula ntthu.
Uviruwa ikhanle itthu inkhumelela, masi, uhihiyerera uviruwa ikhanle itthu inthanlaawe khula ntthu.
7. Moopuweleloni makhwaawe oohiloka atthunaka anhaleehu ukhalana natthekeliyaka?
7 Ntthu anitafitiki nimananna ahinnicivela, pooti ukhalana moopuwelelo oohiloka. Wootakihera, arokorihu amoca aneehaniya Ann, aheera: “Kinari mwanhima, apaapa yaahomwalana naamaama ni yaahaathela athiyana yaari makayayaaka. Mi kaheecoona uhiwaceriya. Vano, ayo yaahakhalana asaana ni miiva kaheecoona uhikhala mwanaya. Mi kuunuwile kicoonaka uhiwaceriya.” Arokorihu amoca aneehaniya Georgette anaahimya mananna ceecoonaaya ukati awannyaya weettenlyaaya uluva. Ayo aneera: “Hi naathukathukaca nkhayi nenne nokhalayi. Hi naavara nteko weepiyoneeru nkhayi! Mi kahosanka.” Arokorihu aneehaniya Naomi, aneera: “Miiva akopuwela wiira awannyaaka yanhala upanka itthu yaahala ukuriipiha nrima. Uhimya waya wiira yoona ipornografiya, mi keecoona uhikhalana ifayita.”
8. a) Citthuni cikhwaawe cinnikurumica wiira naalevelela akhunanihu? b) Kontha isiyani ikhanlyaaya itthu yomaana ukhala atthu oolevelela? (Nwehe ikwaaturu “ Isiyani inlamuliyeehu upanka wakhalaka wiira ntthu naanitthekela?”)
8 Hiiva khaninlamuliya uweheeha citthu akhunanihu cinnipankelaaya ni cinnuulumelaaya, masi nihaana uweheeha moopuwelelweehu. Ikwaha cikiina, itthu yomaana yoohala upanka ukhanle ulevelela, kontha hiiva ninanfenta Yehova ni uyo noopheela wiira hiiva nihaana ukhala anamalevelela. Vano, hiiva naahihiyerereke ukhala ooviruwaca ni oohilevelela, khunhala unirikela ulakeka upanka citthu coohinamaana ni caahala uhonona muukumini wihu. (Miru. 14:17, 29, 30) Moone ntakihero naarokorihu amoca aneehaniya Christine. Ayo aneera: “Ukati unkhalaaka ooviruwa, mi unaakirika uthyaa, ulya saana, akhinrupa saana ni unaakirika uweheeha saana moopuwelelwaaka. Ni iyo inaakiphwanyiha masakha watthokoni waka ni upatthannyaaka naatthu akhwaawe.
9. Kontha isiyani khaninlamuliya usunka nruukwa?
9 Hataa ukhala wiira ntthu nitthekenle khannilepela unlevelela, pooti wampankeehu itthu wiira niwukule wuupuwela citthu cinipankenlyaawe. Manannani? Arokorihu Georgette aromoliye wuupaceroni aheera: “Yaari itthu yoorika, masi nuuwakatyaaya, mi kahonlevelela nlopwana akithenle. Nlattu wo iyo itthwiiyo, mi kahokhala ninnema ninci.” Nahiyaka vale wuupuwela itthu yootakhala ipankiyeehu, hiiva ninaahiya ukhala atthu ooviruwaca. Naahisunkeke uruukwa, ukhala khampa itthuvo yo mwiirutthuni wihu ni khaninhala uhiyerera urwaa uhoolo ni ukhala ootteeliya muukumini wihu. (Miru. 11:17) Vano, wakhalaka wiira nyuuva khanoopuwela unlevelela ntthu ootthekenleni?
NHIHIYE WAANANA MOOPUWELELWEENYU
10. Kontha isiyani iryaaya itthu yofayita uhiya ukati wiira moopuwelelweehu akhale saana nihinaaya umuulumana ntthu nitthekenle? (Nwehe ciicammo ilatarato.)
10 Isiyani nyuuva inlamuliyeenyu upanka wiira nhikhale ooviruwaca awula oohipica utthekeliya? Wootakihera, ntthu rina nikwatta ahaana uviriha ukati awehereraka wiira amphwanye nafaasi. Inanna imocaaru, hiiva ciicammo, nihaana uviriha ukati naawehereraka ukhala saana nhina moopuwelelweehu nihinaaya urwaa unlevelela ninrimeehu wotheene ule nitthekenle. —Ekles. 3:3; 1 Pet. 1:22.
Narakalaka, nihaana wiiwacera saana ni uweherera wiira nivole. Iyo phiitthu ineerannaya ni moopuwelelweehu (Nwehe iparaagarafu 10)
11. Ulompa waanuunu Ann, isiyani unniitthucihaaya?
11 Munlompe Yehova wiira ookavihereni ukhala namalevelela. e Arokorihu Ann, anaahimya mananna ulompa waakavihenryaaya. Ayo aheera: “Mi kihonlepela Yehova wiira anlevelele wokhula ntthu nlattu wocitthu cipankilyaawe ni cuulumilyaawe coohinamaana. Vano, mi kahowantikhela iwarakha apaapa ni amwaaraya kiiraka wiira kiholeva citthu cipankilyaaya.” Arokorihu Ann, aheera wiira waaharikela upanka commo. Masi, ayo aneera: “Nlattu wootakiha waka ulevelela wa Yehova, niweherero naka ukhanle wiira apaapa ni amwaaraya uwiirihe upheela wiitthuca ikhweeli ca Yehova.”
12. Kontha isiyani ninlamuliyeehu unkhuluvela Yehova uhiya ukhuluvela moopuwelelweehu? (Miruku 3:5, 6)
12 Munkhuluvele Yehova, uhiya uweheeha paahi mananna nneecooneenyu. (Nsome Miruku 3:5, 6. f) Yehova naacuwela itthu yomaana para hiiva. (Isai. 55:8, 9) Ni uyo khannilepela wiira nipanke itthu yaahala unipanka pusya. Vano, anikurumicaka ukhala atthu oolevelela, hiiva pooti wankupaliihu wiira ikhanle itthu yomaana. (Isaa. 40:4; Isai. 48:17, 18) Ukhuluvela moopuwelelweehu, pooti atthunaka hiiva wahinkhitiriihu ukhala atthu oolevelela. (Miru. 14:12; Jer. 17:9) Arokorihu Naomi aromoliye wiipaceroni aheera: “Wuupaceroni, mi koopuwela wiira kihaana isariya yoohalevelela awannyaka nlattu wowoona ipornografia. Mi kahoova wiira yanhala uturuwela woona ipornografia ni uliyaala mananna caakiripihilyaaya nrima. Ni miiva keera wiira Yehova ancuwela sana-saana mananna keecoonaaka. Vano, mi kahoona wiira kahi nlattu Yehova woocuwela mananna keecoonaaka paahi, wiira aciveliye nimoopuwelelwaaka. Masi Yehova naacuwela mananna kineecoonaaka ni unaavira ukati mwinci wiira ivire itthu inniwerya. Masi ciicammo, uyo noopheela wiira kikhale ntthu oolevelela.” g
MANANNANI NINHALEEHU UKHALANA MOOPUWELELO OMAANA?
13. Toko cinthoonyeraaya Arooma 12:18-21, isiyani inlamuliyeehu upanka?
13 Napheelaka unlevelela ntthu nitthekenle, nihaana upanka itthu inkhitiriihu uhiya paahi uhuuluma citthu cikhumelenle. Wakhalaka wiira ntthu nitthekenle khanle munneehu, hiiva nihaana upanka yotheene inkhitiriihu wiira nikhalane nnema. Itthu impheeleehu ukhanle ulevelelana. (Mat. 5:23, 24) Hiiva nimpheela umalamaliha uviruwa ni nruukwa nooniheraka uthunku ni ukhala atthu oolevelela. (Nsome Arooma 12:18-21 h; 1 Pet. 3:9) Isiyani inhala unikavihera upanka iyo?
14. Isiyani inlamuliyeehu wiikurumica upanka ni nlattuni?
14 Hi nihaana wiikurumica waawehera atthu annitthekela khampa Yehova cinaaweheraawe. Yehova noweheeha citthu comaana rinaawe khula ntthu. (2 Ikor. 16:9; Isaa. 130:3) Ntthu nototha citthu comaana ni citthu coohinamaana nawoonanela. Phimaana, natothaka woona makhalelo omaana akhunanihu, khunhala unirikela ukhala atthu oolevelela. Wootakihera, munna mmoca neehaniya Jarrod heera: “Mi khunkirikela unlevelela munna kaweheehaka citthu comaana uhiya uweheeha citthu coohiloka cinvonnyawe.”
15. Kontha isiyani ikhanlyaaya itthu yofayita unhimerya ntthuuyo wiira niholevelela?
15 Itthu ikhwaawe yofayita cinene yoohala upanka ukhanle unhimerya ntthuuyo wiira kihoolevelela. Kontha isiyani? Moone itthu ahimilyaaya anuunu Naomi, ayo aheera: “Awannyaka ahokikoha co: ‘Nyuuva nhookilevelela?’ Ukati khaapheelaka waarumelela, miiva kahopacera ukothomolaca ni akaakhitinri wuuluma. Mi kahoocuwelela wiira akaalevelenle awannyaka ninrimaka wotheene. Masi nuuwakatyaaya, mi kahokhitiri waahimerya: ‘Mi kihoolevelelani.’ Ukati kaalevelenlyaaka awannyaka, ayo yahopacera wunla. Mi kahokhala ootikhinihiya mananna awannyaka yeecoonaaya waalevelela waka. Miiva ciicammo, kaahokhala ninnema. Vano, mi kiheetthuca waakhuluvela awannyaka ni nihokhala-tho apatthani omaana.”
16. Isiyani mwiitthucileenyu nhina ulevelela wa Yehova?
16 Yehova noopheela wiira nikhale atthu oolevelela. (Akol. 3:13) Hataa ukhala commo, hiiva pooti unirikela waalevelela akhunanihu. Masi, hiiva ninaahala ukhitiri ukhala atthu oolevelela nahihanyuriheke mananna nineecooneehu ni niikurumicaka wiira nihikhale atthu ooviruwaca. Vano, hi ninaahala ukhitiri ukhalana moopuwelelo omaana.—Nwehe ikwaaturu “ Citthu tthaaru ninlamuliyeehu utthara wiira nilevelelane.”
MUUPUWELE IFAYITA URINAAYA ULEVELELA
17. Iparakhani ninkhalaneehu naalevelelaka akhunanihu?
17 Moone citthu cinniiriha waalevelela akhunanihu. Yoopacera, nakhalaka atthu oolevelela, ninawaatakiha Apaapeehu Yehova ni iyo inawaatteeliha nrima cinene. (Luka 6:36) Yonayeeli, ninawoonihera usukhuru cinene unamaana wa Yehova woonilevelela. (Mat. 6:12) Ni yoneeraru, ulevelela unaanikhaliha saana muukumini wihu ni upatthaniihu naakhunanihu unaakhala woolipa.
18-19. Citthu comaana cineerannya naalevelelaka akhunanihu?
18 Nalevelelaka, citthu comaana cahaaweherereehu cinawiirannya. Wootakihera, moone itthu yaakhumelenle Arokorihu Denise. Ayo khayaacuwela wiira nlopwana akumiherenre asitente, ukati waahukhumwiinnyaawe oopuwela wiiciva akhumaka utiripunaali. Masi, uyo ahokhala ootteeliya wonnyaawe ulevelela waanuunu Denise, mpaka aholakela usoma Ibiibiliya ni Masaahiti a Yehova.
19 Hiiva pooti wuupuwela wiira unlevelela ntthu ikhanle itthu yoorika inlamuliyeehu upanka—masi iyo pooti ukhala itthu yootteeliha nrima cinene. (Mat. 5:7) Phimaana, nihaana upanka yotheene inkhitiriihu wiira nitakihe ulevelela wa Yehova.
NCIPO 125 Atthu “Òmoriwa Ikharari” Anoohakalala
a Macina makhwaawe ahaakakhanihinya.
b Yeerannyaaka itthu khampa ila , khula nkristau haana ulakela mwaaneennyaawe itthu yoohala upanka.
c Efesu 4:32 Masi, nkhaleke mpankanaka maana, moonelanaka uthunku venci, nlevelelanaka niiraati, toko ciicammo Nluku cilakenlyaawe wuulevelelani niiraati ni Kristu.
d Miruku 12:18 Moolumo oohuupuweliya ratta ankhala toko uhoma wokatana, masi moolumo aatthu oocuwelaca anaavoniha.
e Moone ncipo co ividiyu “Perdoem uns aos outros,” “Me Ajuda a Perdoar,” ni “O Que Passou Ficou pra Trás,” nsayitini jw.org.
f Miruku 3:5 Unkhuluvele Yehova ni nrimaa wotheene; uhikhuluvele ankhilyaa. 6 Umuupuwele mmittalani caa cotheene, ni uyo naahala wookolela iphiro caa.
g Hataa ukhalaka wiira woona ipornografia ikhanle itthu yootakhala ni impanka pusya, iyo khinaakurumica anamathelana umwalanaca.
h Arooma 12:18 Mpanke yotheene inhaleenyu ukhitiri, wiira nkhale ninnema naatthu otheene. 19 Asunnaka oofentiya, nhilivyaaniherane. Masi munhiye Nluku wiira oonihere uviruwa wawe; kontha uhantikhiya co: “Yehova neera: ‘Ulivyaanihera ukhanle wawaka; mi kinaahala waahokolosera.’” 20 Masi, “nwannayaa avoliyaka itala, unvahe iyoolya; avoliya ntthona, unvahe yoowurya; kontha wapankaka commo, unaahala umunkela makhala omooro wamuru wawe.” 21 Uhiihiye utthemiyaka niitthu yoohinamaana, masi wiikurumice upanka itthu yomaana wiira uttheme itthu yoohinamaana.
