MARY ni awannyawe aneehaniya, John, a ankhala ilapo unkhitiryaaya waalalyeera atthu enci o Filipinas arweele utotha nteko. Ukati wo iretta yo COVID-19, Mary aahokhitiri waaphwanya atthu o waasomiha Ibiibiliya uhiya paahi ilapo inkhalaaya, masi ciicammo ilapo cikhwaawe co ntuninyani. Apankile cani iyo?

Mary aanaakoha ale yaasomihaawe Ibiibiliya wiira: “Nyuuva nnancuwela ntthu noopheela usomihiya Ibiibiliya?” Unari wiira ayo yaakhuliye, iyeeni. atthunaka ayo pooti waahalaaya ulepela uthoonyiheriya. Upanka ayo makohwaayo, ikwaha cikhwaawe pooti unikavihera cinene. Kontha isiyani? Kontha atthu enci cinaacivela myaha cineetthucaaya mbiibiliyani ampheela wiira ciicammo amucyaaya yiitthuce. Isiyani yiirannyeele Mary upacera wawe ukoha ayo makohwaayo?

Ntthu mmoca yansomihaaya Ibiibiliya anuunu Mary eehaniya Jasmin, aahahimya asipatthannyaawe 4 yaapheela usomihiya Ibiibiliya. Mmocooyo, eehaniya Kristine waanoncivela cinene usoma ni mpaka aaholepela usomihiya ikwaha piili khula isumana. Anuunu Mary yaahonkoha waakhala wiira ahaavo ntthu ancuwelaawe aapheela usomihiya Ibiibiliya. Uyo aheera co: “Iyeeni ahaavo. Kinaahala uwooniherani mpatthannyaaka mmoca.” Uvira waya isumana, Kristine ahowoonihera asipatthannyaawe 4 yaapheela usoma. Nuuwakatyaaya, Kristine ahowoonihera asipatthannyaawe akhwaawe ciicammo yaapheela usomihiya Ibiibiliya ni naayoca, yaahahimeryaca atthu akhwaawe yaapheela usoma.

Kristine apheela wiira amucyaawe ciicammo u Filipinas yiitthuce myaha co mbiibiliyani. Vano, uyo ahomuulumana mwanawe Andrea. Wiipaceroni, Andrea oopuwela wiira Masaahiti a Yehova khanonkupali Yesu ni anvarela nteko itestamentu yokhalayi. Masi upacera wawe usoma, uyo ahoonenela wiira anaaca wiithepya. Khula ikwaha eetthucaawe citthu cophiyaaru ukati waasomaawe Ibiibiliya, uyo heera co: “Woonaka Ibiibiliya ihimyaka ila, ikhanle ikhweeli!”

Nuuwakatyaaya, Andrea ahowoonihera anuunu Mary asipatthannyaawe eeli ni ntthu mmoca anvaranaawe nteko, yaapheelaca usomaca Ibiibiliya. Uhiya commo, Andrea ahaana atitiyaawe yeehaniya Ângela, yahaakhitiri woona. Anuunu Mary yoopuwela wiira Ângela kheewa citthu cansomihaaya Andrea. Nihuku nimoca, Ângela ahomwiirela Andrea wiira naapheela usoma Ibiibiliya naanuunu Mary. Ângela caanoncivela cinene citthu caasomaawe. Myeeri vakaani paahi, uyo ahokhitiri weeserera nuutta iveerusu cinci co mbiibiliyani. Ni aholepela usomihiya ikwaha 4  khula isumana. Akaviheriyaka na Andrea, Ângela aahopacera woona mikutthaano woohihiyerera avarelaka nteko ividiyu yo conferencia.

Anuunu Mary ucuwela waya wiira awannyaya Kristine yeehaniya Joshua khayaalova ukati waasomihiyaaya amwaaraya, ayo yahaakoha waakhala wiira ciicammo yampheela usoma. Joshua aahaakhula co: “Mi kinhala waaca uviriyana paahi, vano nhikikohakohe. Mwakikohakohaka vale, miiva kinaahala uthama. Wo khula minuutu 5 caapacera ukati waasomiyaaya, ayo yampanka makoho uvikana Kristine. Ni nlattu wo iyo ayo ciicammo, yaaheera yampheela usoma Ibiibiliya.

Yaale makohwaale, yaahowiiriha anuunu Mary ukhalana atthu enci yaasomihaaya Ibiibiliya. Ni ayo yaahavahakaca mayamunna makhwaawe ciicammo. Anuunu Mary yaahokhitiri upacera waasomiha Ibiibiliya atthu 28 olapo 4 coovirikana.

Jasmin, namasoma Ibiibiliya himiye wuupaceroni, pattisiye mweeri wa Abril mwaakha wo 2021. Kristine pattisiye mweeri wo Maio mwaakha wo 2022 ni hoturuwela ilapwaawe u Filipinas wiira akhale wakhiviru naamucyaawe. Myeeri vakaani, Ângela ciicammo ahopattisiya ni nna co nokavihera khampa piyoneera owiicaaverya. Anamasoma eeli Kristine aawoonihenryaawe anuunu Mary, ciicammo ahopattisaciya. Anamasoma akhwaawe, waahela nhina Joshua ni Andrea anawiikurumica.

Iseekulu yoopacera, ihapari comaana caahomwareela woohipica naatthu khampa amucyaaya ni asipatthannyaaya. (Joau 1:41, 42a; Mite. 10:24, 27, 48; 16:25-33) Nnoonela cani waakoha ale anaasomiheenyu Ibiibiliya ni atthu akhwaawe ampheela usoma: “Nyuuva nnancuwela ntthu nopheela usoma Ibiibiliya?” Muupuwele atthu mwaahaleenyu ukhalana o waasomiha Ibiibiliya mwapankaka nna nikoho noohirikanna!