NYUUVA nnaakhitiri woona wiira atthu enci anoopuwela wiira unawaaphwanela uwaceriya cinene ni ukhalana citthu cinci waavikana atthu akhwaawe? Hataa ukhalaka wiira ayo anaawaceriya naayo manannaayo, ayo anoopuwela wiira nanlelo ahaana ifayita waavikana atthu akhwaawe. Atthu anoopuwela naayo manannaayo akhanle owiicoona ni khanoonihera usukhuru nicitthu cirinaaya. Ibiibiliya ineera wiira ayo mananna owuupuwelaayo, yanhala utepa ala mahuku ookhiceraala.—2 Tim. 3:2.

Masi unawoonannya wiira, wiicoona ni wiittottopa khinakhala itthu yophiyaaru. Wootakihera, Atamu ni Hawa yaholakela itthu yoohala upanka nhina itthu yomaana ni yoohinamaana. Nlattu wo iyo, otheene cihu ninaahuva. Uvira waya myaakha cinci, mwene mmoca o Yuuta oopuwela wiira ahaana isariya yompaha lumpani ntempulu, masi anaaca wiithepya. (2 Ikor. 26:18, 19) Ni mafariseu ni masatuseu, yoopuwela wiira Nluku awoonela ukhala atthu ofayita ayova paahi nlattu wookhala ucuulu wa Aparahaamu.—Mat. 3:9.

Hiiva ninkhala ituninya yaatthu owiicoona ni owiittottopa. Ni ayo moopuwelelwaayo pooti uniiriha ciicammo ukhala owiicoona ni owiittottopa. (Akalas. 5:26) Hiiva pooti upacera wuupuwela wiira unaaniphwanela ukhalana iparakha cikhwaawe ni uwaceriya nimananna omaana waavikana atthu akhwaawe. Isiyani inlamuliyeehu upanka wiira nihikhalane ayo moopuwelelwaayo? Wiira nipacere, ninlamuliya wiiweeha manannani Yehova noonelaawe mwahooyo. Ikano piili co mbiibiliyani cinaahala unikavihera.

Yehova phinlakela isiyani inniphwanela. Nwehe matakihero.

• Yehova holakela wiira watthokoni, ntheli unamphwanela uhisimiya naamwaarawe. Ni athiyana unawaaphwanela wiicoona ufentiya naawannyaya. (Efesu 5:33) Ntthu theliye haana isariya yowaweherera amwaarawe awula awannyawe  uciveliya nuuyova paahi. (1 Akor. 7:3) Vano, ayari pooti wanaakurumicaaya asaanaaya ukhala owiiwelela ni asaana unawaaphwanela ufentiya naasithumwanaya.—2 Akor. 12:14; Efesu 6:2.

• Yehova enre wiira mahumu ahaana yahisimiyaka nlattu wo nteko muulupale unvaraaya. (1 Atesal. 5:12) Masi ukati yooyo, ayo khaarina isariya yoowehaweha citthu mayamunna ni mayanuunu cimpankaaya.—1 Pet. 5:2, 3.

• Yehova haahiya ahooleli ookuveruni yalivihaka nsoko ni uhisimiya naapoovu.—Aroo. 13:1, 6, 7.

Nlattu wo nifento Yehova naanivaha yotheene impheeleehu. Nlattu wookhala atthu oopahuwa, itthu imoca inniphwanela ukhanle ukhwa. (Aroo. 6:23) Hataa ukhalaka commo, Yehova naanivaha iparakha cinci nlattu wo nifento nawe nookhuluvelya. (Isaa. 103:10, 11) Khula iparakha inaakheleehu, inaakhitirya nlattu wo namaana woonironya wa Yehova.—Aroo. 12:6-8; Efesu 2:8.

Nnyeme ukhalana moopuwelelo oohiloka khampa cirinaaya atthu o ntuninyani. Woohicuwelela, hiiva pooti upacera wuupuwela wiira unaaniphwanela ukhalana citthu cinci waavikana atthu akhwaawe. Ikwaha imoca, Yesu ahoohimya ntakihero nimoca ninoonihera mananna cinhaleehu upacera wuupuwela naayo manannaayo. Uyo ahowuuluma atthu yaavara nteko ni yaatthunne uvara nteko nihuku notheene wiira yaakhele itenaariyu imoca. Vano, nhooleli ahowiihanaca-tho atthu akhwaawe wiira yaavare nteko. Uphiya waya ukati wooliviya, ananteko otheene yaavahiye itthu imocaaru ni hataa ale yaavirihale iwoora imoca yavaraka nteko. Masi ananteko yaapacenre uvara nteko wicisu, yuupuwela wiira waanaaphwanela uvahiya citthu cinci waavikana akhwaawyeeyo kontha ayo yahoviriha nihuku notheene yavaraka nteko. (Mat. 20:1-16) Ninno ntakiheronno, Yesu oonihera wiira attharyaawe anlamuliya usukhuru citthu Yehova naavahaawe ni mananna omaana.

Nkhale oosukhuru ni nhikhanyerere. (1 Atesal. 5:18) Muntakihe apostolu Paulu ahaakhanyerenre ulepela ukaviheriya nicitthu canthwya ni mayamunna o Korintu hataa ukhalaka wiira ahaana isariya yoolepela ukaviheriya. (1 Akor. 9:11-14) Nihaana ukhala atthu oosukhuru iparakha cotheene cinvahiyeehu ni uhiya ukhala atthu ookhanyerera ukhalana citthu caatthu akhwaawe.

 Nkhale atthu owiiyeviha. Ntthu noopuwela wiira haana ifayita waavikana atthu akhwaawe, pooti upacera wuupuwela wiira unamphwanela ukhalana citthu cinci uvikana cirinaawe. Wiiyeviha ikhanle ikhalelo imoca inhala unikavihera uhikhalana ayo moopuwelelwaayo.

Porofeeta Daniele khanle ntakihero nomaana nantthu thoonyenre wiiyeviha. Uyo ayariye naasithumwanawe anamihaku, omaana, oocuwelaca ni aacuwela uvara miteko cinci. Phimaana, uyo pooti waahalaawe wuupuwela wiira haana isariya yowaceriya ni mananna omaana ni waakhela iparakha cinci waavikana atthu akhwaawe. (Dan. 1:3, 4, 19, 20) Masi Daniele khaahiyerenre ukhala ntthu owiiyeviha ni iyo ikhalelweeyo, yahomwiiriha Daniele ukhala ntthu owaarya uhoolo wa Yehova.—Dan. 2:30; 10:11, 12.

Nihaana wiikhikicera wiira nihikhale atthu owiicoona ni owiittottopa unooneehu mahukwaala. Uhiya commo, nihaana utteeliya niiparakha cotheene Yehova cinnivahaawe nlattu wo namaana woonironya unooniheraawe.