MWAHA WOOSOMIYA 7
NCIPO 15 Munvuwihe Kristu: Mwaana Oopacerya a Yehova
Ulevelela wa Yehova unoophwanyihani ifayitani?
“Kontha nyuuva nnaalevelela weekhweeli.” —ISAA. 130:4.
ITTHU INHALEEHU WIITTHUCA
Nhina ula mwahoola, ninaahala woona malattanihero o mbiibiliyani anoonihera mananna Yehova cinnilevelelaawe ni annikavihera utepa unsukhuru nlattu woonilevelela.
1. Ntthu eeraka: ‘kiholevelelani,’ kontha isiyani unaarika ucuwela itthu impheelaawe uhimya?
“KIHOOLEVELELA.” Unaareera wiiwa ala moolumwaala, venci-venci wakhalaka wiira nyuuva nhooluma awula nhopanka itthu inriipihile nrima nkhunaninyu! Masi, ala moolumwaala maanaaya isiyani? Niireke wiira ntthuuyo aapheela uhimya wiira upatthaniinyu nuuyova uri saana khampa caaryaaya khalayi? Awula, iyo maanaaya wiira ntthuuyo khampheela wuuluma-tho itthu yiirannyeele? Apinaatamu yeeraka “kihoolevelela,” pooti ukhala ulevelela weekhweeli awula mena.
2. Isiyani Ibiibiliya inhimyaaya nhina ulevelela wa Yehova? (Nwehe ciicammo niwehero.)
2 Mananna Yehova cinnilevelelaawe unaavirikana ni mananna cinaaleveleleehu akhunanihu. Khaavo nokhitiri ulevelela khampa Yehova. Nasaalimu ahooluma uyo mwahooyo amwaacaka Yehova. Uyo enre co: “Nyuuva nnaalevelela weekhweeli, wiira nttitthimihiye.” a (Isaa. 130:4) Ulevelela wa Yehova ukhanle “ulevelela weekhweeli.” Uyo paahi phincuwela ulevelela weekhweeli isiyani. Ikwaha cikhwaawe, anamantikha Ibiibiliya yahovarela nteko nuulumo ulevelela niiluka iheperewu, masi khaanapaca uhimya mananna atthu cinlevelelaaya.
3. Kontha isiyani ulevelela wa Yehova unvirikanaaya nimananna cinleveleleehu? (Isaiya 55:6, 7)
3 Yehova anlevelelaka ntthu, itampi cawe naarihela uttayi ni nanlelo pooti ukhalana upatthani woolipa ni Yehova. Hi ninaasukhuru cinene ikwaha cotheene Yehova nonilevelelaawe. —Nsome Isaiya 55:6, 7. b
4. Manannani Yehova cinnikaviheraawe ucuwela isiyani ikhanle ulevelela weekhweeli?
4 Ulevelela wa Yehova unaavirikana nimananna hiiva cinleveleleehu. Ukhala wiira hiiva naapinaatamu oopahuwa, ninhala ucuwela cani isiyani ikhanle ulevelela weekhweeli? Yehova naavarela nteko malattanihero menci wiira anikavihere ucuwela mananna cinnilevelelaawe. Nhina ula mwahoola, ninaahala woona ayo malattaniherwaayo. Ayo malattaniherwaayo anawoonihera mananna Yehova cinfutthaawe itampi caatthu ni unitthunihera uturuwela ukhala apatthannyaawe. Woopela mwaha ayo malattaniherwaayo, unaahala unikavihera utepa unfenta ni usukhuru unamaana ni unakiriri wawe.
YEHOVA NAARIHELA UTTAYI ITAMPI CIHU
5. Ukati Yehova nonilevelelaawe matampiihu, isiyani ineerannya?
5 Ibiibiliya inaalattaniha matampi khampa ninrintti woolemela. Mwene Davidi ahooluma matampi yaavanryaawe, eeraka co: “Itampi caka cihocara mmuru waka; cinkhala khampa nrintti woolemela ni mi akinkhitiri uteesa.” (Isaa. 38:4) Masi Yehova nawaalevelela itampi caya ale anthoonyera uttharuwa. (Isaa. 25:18; 32:5) Nuulumo noluuka iheperewu “ulevelela” nantikhiye wiipaceroni mbiibiliyani, maanaaya wiira “uteesa.” Yehova nokhala khampa ntthu nakuru cinene nonirula nrintti woolemela. Uyo naanirula itampi cihu ni naarihela uttayi.
“Nhookilevelela” (Isaa. 32:5)
6. Yehova ateesaka matampiihu, norwaana vayi?
6 Ibiibiliya inaahimya nlattanihero nikhwaawe ninthoonyera wiira Yehova naacisa itampi cihu ni naarweeha uttayi. Isaalimu 103:12 ineera: “Toko cittalivannyaaya unkhuma ncuwa ni unkela ncuwa, ciicammo uyo naarihela uttayi matampiihu.” Mphantte unkhuma ncuwa khunkumana nimphantte unkela ncuwa. Nnyo miphantte miilinnyo, cinaavirikana iwoora inkhuma ncuwa niiwoora ninkelaaya ni nipuro nineerannyaaya. Phimaana, nhina iyo Isaalimwiiyo, Yehova aapheela uhimya wiira uyo naarihela matampiihu uttayi, wahinhaleehu ukhitiri-tho ukumanana nnyo itampinnyo. Iyo inthoonyera wiira Yehova anilevelelaka itampi cihu, uyo naaliyala ni iyo itthwiiyo inaanimaaliha!
“Toko cittalivannyaaya unkhuma ncuwa ni unkela ncuwa” (Isaa. 103:12)
7. Yehova neerihela isiyani matampiihu? (Mikeya 7:18, 19)
7 Hataa ukhalaka wiira Yehova naateesa matampihu ni naarihela uttayi, niireke wiira uyo naakhala navarelenle ayo matampyaayo? Mena. Mwene Ezekiya ahooluma uyo mwahooyo, eeraka: “Nhovonyera uttuli matampyaaka otheene.” Awula, khampa niwehero ninhimyaaya: “Nhokumiha matampyaaka otheene wiitho winyu.” (Isai. 38:9, 17; niwehero.) Iyo inthoonyera wiira Yehova naarihela uttayi itampi cantthu noonihera uttharuwa ni khanoopuwela-tho iyo itampiiyo. Itthu Ezekiya ihimilyaawe pooti utaphuleliya naala manannaala: “Nyuuva nhokikhaliha khampa ntthu oohipaca uvara matampi.” Ibiibiliya inawuuluma-tho uyo mwahooyo yavarelaka nteko nlattanihero nimphwanyannya nhina Mikeya 7:18, 19. c (Nsome.) Nnyo iveerusunnyo, cinhimya wiira Yehova naarihela matampiihu mpahari. Khalayi, itthu yamorelaka mpahari yanrikarika uphwanyinnya-tho.
“Nhorihela utthayi matampyaaka otheene” (Isai. 38:17)
“Nyuuva nnaahala urihela uttayi itampi caya cotheene wariyari maaci o mpahari” (Mik. 7:19)
8. Isiyani nineetthuceehu?
8 Ala malattaniherwaala, anaaniitthuciha wiira Yehova anilevelelaka, naateesa itampi cihu ni naarihela uttayi. Khampa mwene Davidi enryaawe: “Ootteeliya phaale aaleveleliye citthu cootakhala cipankilyaaya ni aliyaliye matampyaaya; ootteeliya phuule hinooniya ukhala oottheka ni Yehova.” (Aroo. 4:7, 8) Khweeliini, nwo phiri ulevelela weekhweeli!
YEHOVA NAAFUTTA ITAMPI CIHU
9. Malattaniheroni Ibiibiliya impankaaya wiira inikavihere wiiweeha mananna Yehova cinnilevelelaawe?
9 Yehova naavarela nteko nlattanihero nikhwaawe wiira anikavihere uvaha ifayita wiivaherera wawe Yesu wiira anoopole. Uyo naafutta matampi aatthu anthoonyera uttharuwa. Ibiibiliya inaahimya wiira Yehova naarapiha awula naamalamaliha matampi. Iyo inaamwiiriha ntthu vanre matampi uturuwela ukhala omaana uhoolo wa Yehova. (Isaa. 51:7; Isai. 4:4; Jer. 33:8) Ni mwaneene Yehova hohimyaca itthu ineerannya nhina Isaiya 1:18. Iyo ineera: “Hataa matampiinyu akhalaka toko ikoore yookhwiila cinene, anaahala ukhalihiya ootteela khampa ineeve; hataa akhalaka khampa ikuwo yookhwiila cinene, anaahala ukhala ootteela khampa ntthoce.” Unaarika ufutta nihirihiri nookhwiila namorelaka wakuwoni yootteela. Phimaana, Yehova hopanka nno nlattaniheronno, anooniheraka wiira matampiihu anaakhitirya ukhala omaana ni ukhala khampa khanivanre itampi.
Hataa matampiinyu yakhalaka khampa ikoore yookhwiila cinene, anaahala ukhalihiya ootteela khampa ineeve” (Isai. 1:18)
10. Nlattaniheroni Yehova novarelaawe nteko wiira anoonihere mananna cinlevelelaawe?
10 Khampa nisomileehu mwaha uvinre, matampiihu anlattanihiya nuulokihiya nsurukhu mwinci. (Mat. 6:12; Luka 11:4) Vano, khula ikwaha ninvareehu matampi, unkhala khampa ninawuncerera uyo nsurukhuuyo. Pooti waneereehu wiira nsurukhu unnilokihaawe Nluku ukhanle mwinci! Masi ukati Yehova nonilevelelaawe itampi cihu unkhala khampa naaleva nsurukhu unnilokihaawe. Yehova khannilepela-tho uliva matampi anilevelenlyaawe. Khampa ntthu nokhalaawe ootteeliya aleveliyaka iteeni aarinaawe, hiiva ciicammo ninawiicoona ukhala ootaphuwa Yehova anilevelelaka matampiihu!
“Nnilevelele coottheka cihu” (Mat. 6:12)
11. Isiyani Ibiibiliya impheelaaya uhimya yeeraka matampiihu aholeveleliya? (Miteko 3:19)
11 Uhiya Yehova paahi uteesa itampi cihu, uyo naafutta ni mpaka uhonannya-tho. (Nsome Miteko 3:19. d) Ntthu aleveliyaka nsurukhu waalokihiyaawe nlooca, atthunaka mwaneene ilooca naamwantikha X muulupale nipuro nantikhilyaawe ncina nawe ntthuuyo ni nsurukhu wanlokihaawe. Uyo nomwantikha X muulupale para woonihera wiira holeva nsurukhuuyo, masi ncina nawe ntthuuyo ni nsurukhu waalokihiyaawe nanlelo pooti woonnya. Masi Yehova kahi nonhela X; uyo naafuttha para uhoonnya. Wiira niiweehe saana uyo mwahooyo, nttwee nuupuwele co: khalayi, itinta atthu yaavarelaaya nteko wiira yantikhe khayaapica ufuthya. Phimaana, ntthu pooti waakusaawe nsawu woonaana nuufuttha itthu yantikhiye. Hataa phimaana wafutthiyaka nsurukhu waalokihiyaawe ntthu, khawoonnya-tho. Ni atthwaayo khayaakhitiri-tho woona itthu yantikhiyeeyo ni yaakhala khampa khinapaca wantikhiya. Ucuwela wiira Yehova khanteesa paahi itampi cihu, masi uyo ciicammo naafuttha ikhanle itthu yootteeliha nrima! —Isaa. 51:9.
“Wiira matampi arineenyu afuttiye” (Miteko 3:19)
12. Nlattanihero no mahutte ooripeliha intaphulela isiyani?
12 Nhina Isaiya 44:22, Yehova naavarela nteko nlattanihero nikhwaawe wiira anithoonyere mananna cinnilevelelaawe matampiihu. Uyo neera co: “Kinaafuttha citthu cootakhala cotheene cimpankaa ni kinaakhuneela nimahutte, ni kinaafuttha itampicaa nuukhuneela nimahutte ooripeliha.” Yehova anilevelelaka itampi cihu, ukhala khampa nocisa mahutte phikhuneelaka itampi cihu wiira hikhale ntthu nohala ukhitiri woona.
“Kinaafutta mitekoca cootakhala cotheene kikhuneelaka ni mahutte” (Isai. 44:22)
13. Nineecoona cani Yehova anilevelelaka matampiihu?
13 Isiyani nineetthuceehu? Ukati Yehova nonilevelelaawe matampiihu, hiiva khaninkhalana-tho nrintti wooteesa matampiihu ni hataa citthu cinvonyeehu. Wiivaherera wa Yesu Kristu, uhomalamaliha matampiihu otheene. Ni unkhala khampa khaninvare matampi. Nooniheraka uttharuwa weekhweeli nlattu wotampi cihu, Yehova naahala unilevelela weekhweeli.
YEHOVA NAANITTHUNIHERA UTURUWELA UKHALA APATTHANNYAAWE
Ulevelela wapapeehu owiirimu unanikhitiriha ukhalana upatthani woolipa naayova (Nwehe iparaagarafu 14)
14. Kontha isiyani nihaana ukhuluvela ulevelela wa Yehova? (Nwehe ciicammo ilatarato.)
14 Yehova anilevelelaka itampi cihu, hiiva pooti wankhuluveleehu wiira upatthaniihu unaahala uturuwela khampa caaryaaya khalayi. Ucuwela iyo, unaanikavihera uhikhala ooriipiya nrima ni uhikhala nimasukhuli. Ni ciicammo, khaninlamuliya ukhala owoova nuupuwelaka wiira Yehova naahala waavya ukati woopheela unittarusa. Yehova khanoopuwela upanka iyo hataa vakaani. Vano, kontha isiyani ninlamuliyeehu ukhuluvela wiira Yehova honilevelela? Yehova ahomwiirela porofeeta Jeremiya co: “Kinaahala wuulevelela itampi caa ni akinhala wuupuwela-tho coovonya caa.” (Jer. 31:34) Ni apostolu Paulu ahovarela nteko moolumo oolattanaca khampa ayo, eeraka: “Akinhala wuupuwela-tho itampi cinyu.” (Mabere. 8:12) Isiyani ayo moolumwaayo anniitthucihaaya?
“Akinhala wuupuwela-tho itampyaaya.” (Jer. 31:34)
15. Yehova noonihera cani wiira khanoopuwela-tho matampiihu?
15 Mbiibiliyani, nuulumo “wuupuwela” khanaaciya paahi wuupuwela itthu yiirannyeele khalayi. Masi ciicammo, unaaciya upanka itthu, toko unttarusa ntthu awula unkavihera. Nakhirini aakhomeliye nkhayi ni Yesu aahonlepela, eeraka co: “Yesu, [ukuupuwele] wakelaka vale muumweneni waa.” (Luka 23:42, 43) Uyo nlopwanooyo, khaaphenle unlepela Yesu wiira amuupuwele paahi. Masi, aapheela unlepela wiira ankavihere. Mananna Yesu caakhunlyaawe, anawoonihera wiira umunweleliha uyo nakhirinnyooyo. Phimaana, Yehova eeraka akinhala ‘wuupuwela-tho’ itampi cinyu, iyo maanaaya wiira Yehova khanhala upanka itthu wiira anittaruse. Yehova khanrwaa unittarusa uhoolo nlattu wotampi cinilevelenlyaawe.
16. Manannani Ibiibiliya inttonkacaaya utaphuwa urineehu nlattu wooleveleliya weekhweeli?
16 Ibiibiliya inaahimya ciicammo nlattanihero nikhwaawe wiira inikavihere ucuwela saana mananna ninkhanleehu ootaphuwa nlattu wooleveleliya weekhweeli. ‘Itampi ihonikhaliha ipottha,’ masi nlattu Yehova woonilevelela, hiiva ‘nihotaphuliya wiira itampi ihinikhalihe-tho ipottha.’ (Aroo. 6:17, 18; Apoka. 1:5) Khweeliini, ulevelela wa Yehova uhonoopola itampiihu ni iyo ikhanle itthu yomaana!
“Niholeveleliya itampi cihu” (Aroo. 6:18)
17. Manannani ulevelela unlattanacaaya nuuvonihiya?(Isaiya 53:5)
17 Nsome Isaiya 53:5. e Nlattanihero noomalela ninhaleehu woona phi nna: hiiva ninlattanihiya nintthu rina iretta yoohivoniya. Nlattu Yehova wonvaherera mwanaawe wiira anoopole, hiiva nihokhala oovonihinya. (1 Pet. 2:24) Inanna imocaaru, khampa ntthu nokhalaawe ootteeliya nlattu woovona ireetta yaarinaawe, hiiva ciicammo ninaakhala ootteeliya nlattu wookhitiri ukhalana upatthani ni Yehova ni uleveleliya itampi cihu. Nlattu wo wiivaherera wa Yesu wiira anoopole, uhokhitirya wiirannya cotheene nnyo. Nlattu wo uyo, Yehova honilevelela ni unaakhitirya ukhala mpatthannyaawe.
“Nlattu womakhwattaawe, nihovonihiya” (Isai. 53:5)
ULEVELELA WA YEHOVA UNNIPHWANNYIHA IFAYITANI?
18. Isiyani anniitthucihaaya malattanihero nisomileehu anhimya ulevelela wa Yehova? (Nwehe ciicammo ikwaaturu “Mananna Yehova cinnilevelelaawe.”)
18 Isiyani nineetthuceehu nasomaka malattanihero o mbiibiliyani anooluma ulevelela wa Yehova? Niheetthuca wiira ukati Yehova nonilevelelaawe, ninkhala khampa atthu oohipaca uvara matampi. Yehova khanhala uniliviha citthu cootakhala cipankileehu. Nlattu wo iyo itthwiiyo, hiiva ninaakhitiri ukhalana upatthani womaana Naapaapeehu owiirimu. Ciicammo, ulevelela weekhweeli ikhanle itthuvo Yehova inivahilyaawe. Ni ikhanle inanna yowoonihera nifento nuulupale nirinaawe ni unamaana woonironnya unnooniheraawe hiiva apinaatamu oopahuwa. Hi ninaacuwela wiira citthu cotheene Yehova cinipankenlyaawe khacinniphwanela. —Aroo. 3:24.
19. a) Isiyani inlamuliyeehu usukhuru? (Arooma 4:8) b) Isiyani inhaleehu woona mwaha unttharelana?
19 Nsome Arooma 4:8. f Hi nihaana nitepaka unsukhuru cinene Yehova, Nluku “nolevelela weekhweeli!” (Isaa. 130:4) Masi, napheelaka wiira nileveleliye ni Yehova, nihaana nipankaka itthu yofayita cinene. Yesu hohimya iyo itthwiiyo, eeraka: “Mwaahaleveleleke apinaatamu coottheka caya, athumwaninyu ciicammo khanhala wuulevelelani coottheka cinyu.” (Mat. 6:14, 15) Unawoonannya wiira ikhanle itthu yofayita utakiha ulevelela wa Yehova. Vano, manannani ninhaleehu untakiha? Nhina mwaha unttharelana, ninaahala waakhula nna nikohonna.
NCIPO 46 Ninnooxukhuruni Yehova
a Nhina miphantte co mbiiblyani coopacera wantikhiya niiluuka iheperewu, khanantikhiye paahi nuulumo “ulevelela.” Uhiya commo, nahantikhiya ciicammo nuulumo nikiina ninoohihera wiira ukhanle ulevelela weekhweeli. Atthu enci antaphulela Ibiibiliya khanwacera iyo itthwiiyo. Masi Ibiibiliya Tradução do Novo Mundo ihohela nno nuulumonno nhina Isaalimu 130:4.
b Isaiya 55:6 Muntothe Yehova ni nnaahala umphwanya. Mmwiihane, kontha uyo ri wakhiviru. 7 Atthu oohiloka ahiye iphiro caya, ni anakhirini ahiye moopuwelwaaya; anturuwele Yehova nohala uwoonela ikiriri; anturuwele Nlukwiihu, kontha naahala waalevelela niiraati.
c Mikeya 7:18 Tipani khanle Nluku khampa nyuuva, tipani nolevelela coottheka caya ni hinoopuwela-tho itampi ca apoovu? Ayo khanhala ukhala oottheka mpaka, kontha anaatteeliya nlattu wo nifento nookhuluvelya. 19 Uyo naahala unoonela uthunku; naahala utthema coottheka cihu. Nyuuva nnaahala urihela utthayi itampiya caya cotheene
d Miteko 3:19 Nrukunuse nrima, ni nhiye meettelo oohiloka, wiira matampi arineenyu afuttiye, ni wiira wuuphwanyeni ukati wo nnema wa Yehova.
e Isaiya 53:5 Masi, uyo ahottenliya nlattu woottheka wihu, ahonyakatiya nlattu woovonya wihu. Ahottarusiya wiira nikhalane nnema; ni, nlattu womakhwattaawe, nihovonihiya.
f Arooma 4:8 Ootteeliya thuule nooniya ukhala oohittheka ni Yehova.
