MWAHA WOOSOMIYA 40
‘Atthu enci anaahala ukaviheriya weettela isariya’
“Ale anaakavihera atthu enci weettela isariya anaahala woonnyeela khampa itthonttwa mpaka.”—DAN. 12:3.
NCIPO 151 Ele Chamará
NINHALA WIITTHUCANI? *
1. Citthuni comaana cinhala wiirannya ukati wo myaakha 1.000 unhalaawe ulamulela Kristu?
NYUUVA nhopaca wuupuwela mananna cinhaleehu ukhala ukati atthu akhwile unhalaaya wancera wunwelelihiya uwakati wo myaakha 1.000 unhalaawe ulamulela Kristu? Khweeliini, nno ninhala ukhala nihuku nooreera cinene! Atthu otheene akhweliye anawaanukhela cinene atthu yaacuwelaaya akhwile ni anaapheela cinene uwoona-tho ayo atthwaayo. Yehova ciicammo anannukhela cinene atthu akhwile. (Jó 14:15) Muupuwele mananna atthu otheene cinhalaaya waatteela nrima yaturuwelaka ukhala wamoca naasimucyaaya ni asipatthannyaaya akhwile! Toko ciitthucileehu nhina mwaha uvinre, atthu “yeettenle isariya” yantikhiye nlivuruni yeekumi anaahala wunwelelihiya “wiira akhale nuukumi.” (Mite. 24:15; Joau 5:29) Pooti ukhalaka wiira atthu yaacuweleehu akhwile anhala wunwelelihiya yamalakaru ikhotto yo Harmacetom. * Ciicammo, ihaavo ikhurupu ikhwaawe yaatthu anhala wunwelelihiya: ikhurupu yaatthu “yaheettenle” isariya. Ayo akhanle atthu yahaakhalanne mananna oncuwela ni onswalela Yehova ninrimaaya wotheene ahinaaya ukhwa. Ayo anaahala wunwelelihiya “wiira ahukhumwiye.”
2-3. a) Toko cinthoonyeraaya Isaiya 11:9, 10, ntekoni unhala uvariya ntuninyani motheene upeephoni? b) Ninhala wiitthucani nhina ula mwahoola?
2 Atthu otheene anhala wunwelelihiya ahaana yarwaaka wiitthucihiya. (Isai. 26:9; 61:11) Phimaana, unaahala uvariya nteko muulupale woosomihiya atthu moolumo a Nluku uhinapaca thanku uvariya ntuninyani motheene. (Nsome Isaiya 11:9, 10. *) Kontha isiyani ayo atthwaayo unhalaaya upheela wiitthucihiya? Kontha atthu yaheettenle isariya anhala wunwelelihiya anaahala upheela wiitthucihiya myaha ca Yesu, Umwene wa Nluku, woopoliya wihu, ncina na Yehova ni ukhulupale wa Nluku. Ni hataa ale yeettenle isariya ciicammo anaahala upheela uhimyeeriya myaha Yehova cinicuwelihalyaawe vakaani-vakaani nhina itthu impheelaawe upanka watuninyani. Atthu enci yahaahiile unswalela Yehova akhwile Ibiiblya ihinamalihiya wantikhiya. Phimaana, atthu yeettenle isariya ni ale yaheettenle, otheene caya anrwaa wiitthuca citthu cinci.
3 Nhina ula mwahoola, ninaahala waakhula ala makohwaala: Manannani cinhalaaya uvariya nteko woosomihiya atthu ntuninyani motheene? Uyo ntekooyo unhala waakavihera cani atthu wiira macinaaya yantikhiye nlivuruni yeekumi? Waakhula ayo makohwaayo unaahala uniphwanyiha ifayita cinene. Ni khampa cinhaleehu wiitthuca, cihaavo citthu cantikhiye nlivuruni ya Daniele ni yo Apokalipise cinhala unikavihera ucuwela isiyani inhala wiirannya yunwelelihiyaka atthu ookhwa. Masi woopacera, nttwee noone citthu cootteeliha nrima cinhala wiirannya cihimiye nlivuruni ya Daniele 12:1, 2.
“ENCI ANRUPA WATTHAYANI ANAAHALA WUNWELELIHIYA”
4-5. Toko cinhimyaaya Daniele 12:1, isiyani inhala wiirannya wuumaleloni?
4 Nsome Daniele 12:1. * Ilivuru ya Daniele inaahimya citthu cinhala wiirannya wuumaleloni. Wootakihera, Daniele 12:1 ineera wiira Mikeli, khanle Yesu Kristu, ‘heemela wiira awoopole [apoovo a Nluku]’. Uyo mphantte wonatiryuuyo upacenre wiirannya mwaakha wo 1914 ukati Yesu ukhalihiyaawe Mwene o Umwene wa Nluku.
5 Masi Daniele ciicammo aheera wiira Yesu naahala “wunwa” uwakati “wo masakha ahinapaca thanku ukhumelela, ukhuma ukati wancenryaaya ukhala atthu mpaka uyo ukatyuuyo.” Uyo uwakati wo masakhooyo ukhanle ukati wo “masakha moolupale” wuulumiye nhina Matewus 24:21. Wunwa wa Yesu wuulumiye unaaciya ukati uyo unhalaawe uwaakiha apoovu a Nluku. Uyo nohala uwaakiha wuumaleloni uwakati wo masakha moolupale, ukhottoni yo Harmacetom. Ilivuru yo Apokalipise inwiihana apoovu a Nluku mphwinko muulupale ‘unkhuma mmasakhani moolupale.’—Apoka. 7:9, 14.
6. Nincuwela cani wiira wunwelelihiya unoolumiya nhina Daniele 12:2 ukhanle wunwelelihiya waatthu ookhwa? (Mwapheelaka ucuwela citthu cikiina nhina wunwelelihiya waatthu ookhwa watuninyani, nwehe mphantte wo “Makoho Aanamasoma” nhina yeela irevisteela.)
6 Nsome Daniele 12:2. * Isiyani inhala wiirannya atthu o mphwinko muulupale yoopwaaka nhina ayo masakhaayo? Wunwelelihiya unoolumiya nhina iyo inatiriiyo khunakhala wo ntakihero awula wo mminepani, toko ceereehu khalayi. * Masi khweeliini, inatiri ya Daniele inooluma wunwelelihiya waatthu ookhwa unhala wiirannya upeephoni. Nlattuni nineereehu commo? Nuulumo “watthayani” ciicammo ninaaromoliya nhina Jó 17:16 yaaciyaka “Mahiye.” Iyo itthwiiyo inthoonyera wiira Daniele 12:2 inaaca wunwelelihiya waatthu ookhwa unhala wiirannya yamalaka ikhotto yo Harmacetom.
7. a) Wunwelelihiya waatthu ookhwa wiira akhalane “ukumi woohimala” maanaaya isiyani? b) Nlattuni nwo wunwelelihiyanwo ukhanlyaaya “wootepa ureera”?
7 Masi ilivuru ya Daniele 12:2 yeeraka wiira “ahaavo anhala wunwelelihiya wiira akhalane ukumi woohimala” impheela uhimya isiyani? Iyo itthwiiyo maanaaya wiira ukati wo myaakha 1.000, ale anhala wunwelelihiya ahaana yiitthucihiyaka myaha ca Yehova ni ca Yesu ni ahaana yawiiwelelaka. Yapankaka commo, phinhalaaya uvahiya ukumi woohimala. Phimaana, hataa atthu yeettenle isariya anhala wunwelelihiya ahaana yarwaaka wiikurumica wiira akhalane ukumi woohimala. (Joau 17:3) Nwo unhala ukhala “wunwelelihiya wootepa ureera” uvikana wunwelelihiya waatthu ookhwa weerannyeele khalayi. (Mabere. 11:35) Kontha isiyani? Kontha atthu yonwelelihiye khalayi yahokhwa-tho.
8. Weeriyaka wiira ahaavo anhala wunwelelihiya “wiira waaphwanye wuulihaciya muru ni uhiwaceriya woohimala,” maanaaya isiyani?
8 Masi ahaavo atthu anhala wunwelelihiya ahinhala upheela wiitthucihiya ni Yehova. Inatiri ya Daniele ineera wiira atthu akhwaawe anhala wunwelelihiya “wiira waaphwanye wuulihaciya muru ni uhiwaceriya woohimala.” Nlattu wookhala atthu oohunya maaru, khanhala wantikhiya macinaaya nlivuruni yeekumi ni khanhala uvahiya ukumi woohimala. Masi unhala waaphwanya “uhiwaceriya woohimala.” Maanaaya wiira anaahala umalamalihiya. Phimaana, ilivuru ya Daniele 12:2 inooluma mananna cinhalaaya uttarusiya ayo atthwaayo nlattu wo citthu cinhalaaya upanka wahoolo, yonwelelihiyaka. * (Apoka. 20:12) Akiina anaahala uvahiya ukumi woohimala, masi akhwaawe mena.
‘ATTHU ENCI ANAAHALA UKAVIHERIYA WEETTELA ISARIYA’
9-10. Phaapani anhala “woonnyeela cinene khampa irimu,” ni iyo itthwiiyo inhala wiirannya ukatini?
9 Nsome Daniele 12:3. * Isiyani-tho inhala wiirannya waviraka “ukati wo masakha”? Uhiya itthu yonneehu nhina Daniele 12:2, inawuulumiya itthu ikiina nhina iveerusu 3 inhala wiirannya waviraka uwakati wo masakha moolupale.
10 Phaapani anhala “woonnyeela cinene khampa irimu”? Ilivuru ya Matewus 13:43 inawaakhula. Iyo ineera: “Uyo uwakatyuuyo, atthu aneettela isariya anaahala woonnyeela cinene khampa ncuwa muumweneni wa Athumwanaya.” Unawoonannya wiira nhina iyo iveeruswiiyo, Yesu aawuuluma “asaana o Umwene,” makristau oothanliya anhala ulamulela nkhayi nuuyo muumweneni wawe. (Mat. 13:38) Phimaana, pooti waneereehu wiira ilivuru ya Daniele 12:3 inwaaca makristau oothanliya ni inaaca nteko unhalaaya uvara ukati wo myaakha 1.000.
Makristau oothanliya anaahala uvara nteko nkhayi ni Yesu wiira ahoolele nteko woosomihiya atthu moolumo a Nluku unhala uvariya uwakati wo myaakha 1.000 (Nwehe iparaagarafu 11)
11-12. Ntekoni makristau oothanliya unhalaaya uvara uwakati wo myaakha 1.000?
11 Manannani makristau oothanliya cinhalaaya ‘waakavihera atthu enci weettela isariya’? Makristau oothanliya anaahala uvara nteko nkhayi ni Yesu Kristu wiira ahoolele nteko woosomihiya atthu ntuninyani motheene unhala uvariya ukati wo myaakha 1.000. Makristau oothanliya 144.000 khanhala ukhala mamwene paasi; ayo ciicammo anhala ukhala anankuttho. (Apoka. 1:6; 5:10; 20:6) Khampa anankuttho, ayo anaahala ukavihera “uvonihiya waatthu olapo cotheene.” Iyo itthwiiyo maanaaya wiira ayo anaahala waakavihera apinaatamu otheene ukhala vakaani-vakaani oohipahuwa. (Apoka. 22:1, 2; Ezek. 47:12) Khweeliini, uyo ntekooyo unaahala waatteeliha nrima cinene makristau oothanliya!
12 Masi “atthu enci” anhala ukaviheriya weettela isariya akhanle phaapani? Akhanle atthu anhala wunwelelihiya, atthu anhala woopwa ukhottoni yo Harmacetom ni khula mwaana nohala uyariya upeephoni. Wiimaleloni uwakati wo myaakha 1.000, atthu otheene watuninyani anhala ukhala oohipahuwa. Vano, ukatini ayo atthwaayo unhalaaya wantikhiya macinaaya nlivuruni yeekumi woohiweherera-tho ufuttiya?
UTTEHIYA WOOMALELA
13-14. Isiyani atthu oohipahuwa otheene inlamuliyaaya upanka wiira avahiye ukumi woohimala?
13 Nihaana nihiliyalaka wiira hi khaninhala uvahiya ukumi woohimala nlattu paahi wookhala atthu oohipahuwa. Mmuupuwele Atamu ni Hawa. Ayo yaari atthu oohipahuwa, masi wiira akhalane ukumi woohimala, ayo yahaana yamwiiwelelaka Yehova. Masi wooriipiha nrima, ayo khayaamwiiwelenle.—Aroo. 5:12.
14 Wiimaleloni ukati wo myaakha 1.000, atthu otheene watuninyani anhala ukhala oohipahuwa. Masi niireke wiira atthu oohipahuwa otheene anaahala umwiiwelela Yehova mpaka? Awula ahaavo anhala uhiya umwiiwelela khampa Atamu ni Hawa? Nuuwakatyaaya, ayo makohwaayo anaahala waakhuliya. Masi manannani?
15-16. a) Yaakhani apinaatamu otheene anhalaaya ukhalana ukati woothoonyera unvaresesa waya Yehova? b) Isiyani inhala wiirannya wamalaka uttehiya woomalela?
15 Uwakati wo myaakha 1.000, Sotwani naahala utthukiya. Uyo ukatyuuyo, uyo khanhala ukhitiri unhapusa hataa pinaatamu. Vano, wiimaleloni uwakati wo myaakha 1.000, Sotwani naahala utthukuliya ni naahala umananiha waahapusa apinaatamu anhala ukhala watuninyani. Masi uyo ukatyuuyo, apinaatamu otheene anhala ukhala oohipahuwa. Ukati unhalaawe waatteha, apinaatamu otheene anaahala ukhalana ukati woothoonyera wakhala wiira anaahisimu awula mena ncina na Yehova ni wakhala wiira anawaakihera ukhulupalyaawe. (Apoka. 20:7-10) Citthu cinhalaawe upanka khula ntthu uyo ukatyuuyo phinhala uthoonyera wakhala wiira unamphwanela awula mena wantikhiya nlivuruni yeekumi woohiweherera-tho ufuttiya.
16 Ibiiblya ineera wiira ahaavo atthu anhala uhiya umwiiwelela Nluku khampa Atamu ni Hawa ni ahinhala utthuna ukhulupale wa Yehova. Hi khanincuwela anhala ukhala atthu akavi, masi ninaacuwela wiira phi itthu inhala wiirannya. Isiyani inhala uwiirannyeela ayo atthwaayo? Apokalipise 20:15 ineera: “Atthu otheene ahimphwanyannya macinaaya nlivuruni yeekumi, yahottikheliya muntthiyani no mooro.” Atthu otheene anhala uhunya maaru anaahala umalamalihiya. Masi atthu enci anaahala uviriha uttehiya woomalela, ni macinaaya anaahala wantikhiya nlivuruni yeekumi.
CITTHU CINHALA WIIRANNYA “UKATI WOOMALELA”
17. Isiyani nlayikha nanhimenryaaya Daniele wiira yanhala wiirannya mahuku ankhaleehu? (Nwehe Daniele 12:4, 8-10.)
17 Unaanitteela nrima noopuwelaka citthu comaana cinhala wiirannya wahoolo! Masi hataa nenna co, cihaavo citthu cootteeliha nrima cinooneehu ciirannyaaka. Porofeeta Daniele ahothoonyiheriya ninlayikha citthu caahala wiirannya mahuku ankhaleehu, awula “ukati woomalela.” (Nsome Daniele 12:4, 8-10; * 2 Tim. 3:1-5) Nno nlayikhanno naamwiirenle Daniele co: “Ucuwelaca weekhweeli unaahala winciva.” Iyo itthwiiyo maanaaya wiira apoovu a Nluku yanhala wiiweeha inatiri co nlivuruni ya Daniele. Nno nlayikhanno ciicammo naheera wiira uyo uwakatyuuyo, ‘atthu oohinamaana yanhala upanka citthu cootakhala, ni khaavo ntthu oohinamaana aahala ucuwelela.’
18. Isiyani inhala uwiirannyeela atthu oohinamaana?
18 Ilelo, unkhala toko atthu ampanka citthu coohinamaana khanttarusiya. (Mal. 3:14, 15) Masi woohipica, Yesu naahala waahukhumu atthu anlattanihiya niipuri ni naahala uweesa mphanttyaayaru wiira ahitakaneele naatthu anlattanihiya niikhontwaa. (Mat. 25:31-33) Atthu oohinamaana khanhala woopwa uwakati wo masakha moolupale ni khanhala wunwelelihiya upeephoni. Macinaaya khanhala uphwanyannya ‘nlivuruni yowuupuwelela’ yuulumiye nhina Malakiya 3:16.
19. Ula ukhanle ukati hiivano woopanka isiyani, ni nlattuni? (Nwehe Malakiya 3:16-18.)
19 Ula ukhanle ukati wowoonihera nicitthu cimpankeehu wiira hiiva khaninakhala atthu oohinamaana. (Nsome Malakiya 3:16-18. *) Yehova nawaathukumaniha “atthwaawe” anwoonaawe ukhalana ifayita. Khweeliini, hi nimpheela ukhala nkhayi naayo atthwaayo.
Unaahala unitteela nrima cinene ukati unhaleehu umoona onwelelihiyaka Daniele, asimuciihu, asimpwaniihu ni atthu akiina wiira atthuveliye upeephoni! (Nsome iparaagarafu 20)
20. Isiyani Yehova yankhuluvelihilyaawe Daniele? Nlattuni umpheeleenyu cinene woona yiirannyaaka iyo inatiriiyo?
20 Khweeliini, hi ninkhala ukati uneerannya citthu cootteeliha nrima. Masi woohipica, cinaahala wiirannya citthu cootepa utteeliha nrima. Hi ninaahala woona citthu coohinamaana cimalamalihiyaka. Vano, ninaahala woona yiirannyaaka itthu Yehova yankhuluvelihilyaawe Daniele, amwiirelaka: “[Weeva] unaahala wunwa wiimaleloni mahuku wiira waakhele utthuveliya waa.” (Dan. 12:13) Khweeliini, nyuuva nnoona upica uphiya nihuku ninhaleehu uwoona ‘yunwaka’ asimuciinyu, asimpwaniinyu, hataa ni Daniele. Phimaana, mpanke yotheene inhaleenyu ukhitiri wiira nkhale nswali ookhuluvelya a Yehova nenna co. Mwapankaka commo, ncina ninyu khaninhala ufuttiya nlivuruni yeekumi ya Yehova.
NCIPO 80 “Provem e Vejam Que Jeová É Bom”
^ Nhina ula mwahoola, ninaahala urukunusa mananna caataphuleleehu itthu inhimyaaya Daniele 12:2, 3, inooluma nteko muulupale woosomihiya atthu moolumo a Nluku uhinapaca thanku uvariya. Ciicammo, ninaahala woona manannani uyo ntekooyo cinhalaaya waatthenkaca atthu otheene watuninyani wiira yalipe ukati unhalaaya uttehiya wiimaleloni uwakati wo myaakha 1.000 unhalaawe ulamulela Kristu.
^ Pooti ukhalaka wiira atthu anhala upacera wunwelelihiya phaale akhwile wohihiya umwiiwelela Yehova uwakati wo mahuku ookhicera. Vano, anaahala wunwelelihiya ale yaakhwiile ahinaaya ayova ukhwa. Nimoolumacero makhwaawe, atthu akhicenre ukhwa phinhala upacera wunwelelihiya. Wakhala wiira commo phinhalaaya wiirannya, khula ntthu nohala wunwelelihiya naahala uwaakhelela atthu yaakhalannyaawe ukati umocaaru. Ibiiblya inaahimya wiira ale anonwelelihiya wiira yakhale wiirimu anonwelelihiya “khula ntthu ukatyaaweru,” awula nimananna oothotokannya. Phimaana, pooti waneereehu wiira ale anhala wunwelelihiya wiira akhale watuninyani, ciicammo anhala wunwelelihiya nimananna oothotokannya.—1 Akor. 14:33; 15:23.
^ Isaiya 11:9 Khinhala ukhumelela-tho yootakhala, hataa khinhala ukhala ihasara wamwaakoni waka wotheene wowaarya; kontha Yehova naahala ucuweliya ntuninyani motheene toko maaci wankhuneelaaya ipahari. 10 Nno nihukunno ntithari wa Jesee unaahala weemela khampa nthoonyero naapoovu. Ni ilapo cinaahala untotha wiira cinlepele ankhili, ni nipuro ninrwaawe ukhala ninhala ukhala nowaarya.
^ Daniele 12:1 Uyo ukatyuuyo, Mikeli naahala uwa, nkhulupale muulupale eemenle wiira awoopole apoovwaa. Ni unaahala uwa ukati wo masakha ahinapaca thanku ukhumelela, ukhuma ukati wancenryaaya ukhala atthu mpaka uyo ukatyuuyo. Uyo ukatyuuyo, apoovwaa anaahala woopwa, otheene ale anhala wantikhiya nlivuruni.
^ Daniele 12:2 Ni enci anrupa watthayani anaahala wunwelelihiya; ahaavo anhala wunwelelihiya wiira akhalane ukumi woohimala ni akiina wiira waaphwanye wuulihaciya muru ni uhiwaceriya woohimala.
^ Nna nipuronna, ninaarukunusa mananna ceeweehu iyo inatiriiyo ni caataphulenleehu nlivuruni Preste Atenção à Profecia de Daniel!, ikapiitulu 17, ni nrevistani Ukhalenla 1 yo Julho yo 1987, ipaagina 21 mpaka 25.
^ Masi, atthu “yeettenle isariya” ni ale “yaheettenle” yuulumiye nhina Miteko 24:15 ni atthu “apankale citthu comaana” ni “ale apankale citthu cootakhala” yuulumiye nhina Joau 5:29, cinaaciya citthu cipankalyaaya ahinaaya ukhwa.
^ Daniele 12:3 Ni atthu arina ankhili omaana anaahala woonnyeela cinene khampa irimu, ni ale anaakavihera atthu enci weettela isariya anaahala woonnyeela khampa itthonttwa mpaka.
^ Daniele 12:4 “Masi weeva Daniele, usunke ala moolumwaala ni utthukele ilivurwiiyo mpaka ukati woomalela. Atthu enci anaahala waavyaavya, ni ucuwelaca weekhweeli unaahala winciva.” 8 Mi kaheewa nnyo citthunnyo, masi akaacuwelenle maanaaya isiyani, phimaana kahokoha kiiraka: “Pwiiya, isiyani inhala ukhumelela ceerannyaaka nnya citthunnya?” 9 Vano, uyo ahokaakhula eeraka: “Daniele, urwee, kontha ala moolumwaala ahaana yasunkiyaka khampa isiiri mpaka ukati woomalela. 10 Atthu enci anaahala wiirattela, wiitteeliha ni anaahala ureerihiya. Atthu oohinamaana anaahala upanka citthu cootakhala, ni khaavo ntthu oohinamaana nohala ucuwelela; masi ale arina ankhili omaana anaahala ucuwelela.”
^ Malakiya 3:16 Vano, ale yaamoova Yehova yahokela woopa mwaha khula ntthu ninkhwaawe, ni Yehova anawaaweha ni aanawaaviriyana. Ni uhoolo wawe, yahokela wantikhiya ilivuru yoowuupuwelela ale yaamoova Yehova ni yoopuwela ncina nawe. 17 Yehova neera: “Ayo anhala ukhala atthwaaka nihuku ninhalaaka waakhaliha nhakhwaaka wookicivela. Mi kinaahala uwoonela uthunku toko nlopwana cimmoonelaawe uthunku mwanawe nonvarela nteko. 18 Nyuuva nnaaha woona-tho uvirikana wantthu neettela isariya ni ntthu ohinamaana, ntthu nonswalela Nluku ni hinonswalela.”
