MWAHA WOOSOMIYA 39
Ncina ninyu nihantikhiya “nlivuruni yeekumi”?
“Uhoolo wawe, yahokela wantikhiya ilivuru yoowuupuwelela ale yaamoova Yehova ni yoopuwela ncina nawe.”—MAL. 3:16.
NCIPO 61 Avancem, Testemunhas!
NINHALA WIITTHUCANI? *
Ikhumelo uwakati wa Apeli mpaka mahukweehwaala, Yehova nawuncerera macina “nlivuruni yeekumi” (Nwehe iparaagarafu 1-2)
1. Toko cineeraaya Malakiya 3:16, ilivuruni Yehova inantikhaawe ni nhina iyo ilivurwiiyo nantikha isiyani?
YEHOVA neera antikhaka ilivuru, ni iyo ilivurwiiyo ancenre wantikha myaakha cinci uttuli. Khweeliini, iyo ikhanle ilivuru yo macina atthu inancera nincina na nswali ookhuluvelya a Yehova, Apeli. * (Luka 11:50, 51) Ukhuma uyo ukatyuuyo mpaka nna co, Yehova nawantikha macina aatthu akhwaawe ni mahukwaala, iyo ilivurwiiyo ihaana macina menci. Mbiiblyani, iyo ilivurwiiyo ineehaniya ‘ilivuru yowuupuwelela,’ “ilivuru yeekumi,” “iroolu yeekumi.” Nhina ula mwahoola, ninhala wiihana iyo ilivurwiiyo “ilivuru yeekumi.”—Nsome Malakiya 3:16; * Apoka. 3:5; 17:8.
2. Atthuni anantikhiya macinaaya nlivuruni yeekumi, ni isiyani inlamuliyeehu upanka wiira ncina nihu nantikhiye nhina iyo ilivurwiiyo?
2 Iyo ilivurwiiyo irina macina aatthu otheene anonswalela Yehova ninrimaaya wotheene ni anhisima ncina nawe. Ayo atthwaayo ahaana nweherero wookhalana ukumi woohimala. Hiiva ciicammo macineehu pooti wantikhiya nhina ilivuru yeekumi. Wiira yantikhiye, nihaana nikhalanaka upatthani woolipa ni Yehova ni nihaana naaminiki woopoliya wihu nimwaamwanawe, Yesu Kristu. (Joau 3:16, 36) Hataa niwehereraka urwaa ukhala wiirimu awula watuninyani, otheene cihu ninaapheela wiira ncina nihu nantikhiye nhina iyo ilivurwiiyo.
3-4. a) Niireke wiira wantikhiya ncina nihu nlivuruni yeekumi unthoonyera wiira ninaahala waakhela ukumi woohimala? Ntaphulele. b) Ninhala wiitthucani nhina ula mwahoola ni nhina mwaha nkhwaawe unttharanaca nuula?
3 Niireke wiira atthu otheene nantikhiye ncina naya nlivuruni yeekumi anaahala waakhela ukumi woohimala? Nno nikohonno ninawaakhuliya nhina itthu Yehova yaamwiirenlyaawe Moceesi nlivuruni yo Nkwaha 32:33. Yehova enre co: “Kinaahala unfutta ule nohala uvara matampi.” Iyo itthwiiyo maanaaya wiira macina nna co yantikhiye nlivuruni yeekumi pooti ufuttiya. Unkhala khampa Yehova nantikha ayo macinaayo niilaaphi. (Apoka. 3:5, niwehero) Nihaana nipankaka yotheene inhaleehu ukhitiri wiira ncina nihu nihifuttiye nlivuruni yeekumi, mpaka wanhalaaya wantikhiya “niikaneta,” awula mpaka wahinhalaaya ufuttiya-tho.
4 Iyo itthwiiyo atthunaka inaaniiriha wiikoha citthu cinci, toko co: ‘Isiyani-tho Ibiiblya inhimyaaya iwaacaka atthu yantikhiye macinaaya nlivuruni yeekumi ni ale ahantikhiye? Ukatini unhalaaya waakhela ukumi woohimala ale yantikhiye macinaaya nlivuruni yeekumi? Ni atthu akhwile yahincuwelaka Yehova anhala ukhala cani? Niireke wiira macinaaya anaahala wantikhiya nlivuruni yeekumi?’ Ninaahala waakhula ayo makohwaayo nhina ula mwahoola ni nhina mwaha nkhwaawe unttharanaca nuula.
MACINANI ARIVO NLIVURUNI YEEKUMI?
5-6. a) Toko cinthoonyeraaya Afilipo 4:3, phaapani yantikhiye macinaaya nlivuruni yeekumi? b) Ukatini macinaaya ayo atthwaayo unhalaaya wantikhiya nhina iyo ilivurwiiyo woohiweherera-tho ufuttiya?
5 Atthuni anantikhiya macinaaya nlivuruni yeekumi? Wiira naakhule nno nikohonno, ninaahala woopela mwaha ikhurupu thanu ni woona ikhurupuni cinantikhiya macinaaya nlivuruni yeekumi.
6 Ikhurupu yoopacera ikhanle yaatthu anthanliya wiira yalamulele ni Yesu wiirimu. Niireke macinaaya ayo atthwaayo ahantikhiya nlivuruni yeekumi? Iyee, ahantikhiya. Toko apostolu Paulu caawiirenlyaawe mayamunna o Filipo, macina o makristau oothanliya alattuliye wiira arwee yalamulele nkhayi ni Yesu wiirimu ahantikhiya nlivuruni yeekumi. (Nsome Afilipo 4:3. *) Masi ayo ahaana yahihiyaka ukhala atthu ookhuluvelya wiira macinaaya ahifuttiye nhina iyo ilivurwiiyo. Makristau oothanliya anhala wantikhiya macinaaya woohifuttiya-tho waphiyaka uwakati unhalaaya uvahiya ntthitto noomalela. Nno ntthittonno pooti wiirannya ahinaaya ukhwa awula uhaleelaka vakaani wancera ukati wo masakha moolupale.—Apoka. 7:3.
7. Ukatini macina aatthu o mphwinko muulupale unhalaaya wantikhiya nlivuruni yeekumi woohiweherera-tho ufuttiya? (Nwehe Apokalipise 7:16, 17.)
7 Ikhurupu yonayeeli ukhanle mphwinko muulupale wo ikhontwaa cikiina. Niireke wiira atthu o iyo ikhurupwiiyo ahaavo macinaaya nlivuruni yeekumi? Iyee, ahaavo. Ni niireke wiira yaviraka ikhotto yo Harmacetom macinaaya nanlelo anaahala ukhala nhina iyo ilivurwiiyo? Iyee, anaahala ukhala. (Apoka. 7:14) Yesu ahaalattaniha ayo atthwaayo niikhontwaa ni aheera wiira anaahala waakhela “ukumi woohimala.” (Mat. 25:46) Masi ayo khanhala waakhela ukumi woohimala yamalakaru ikhotto yo Harmacetom, kontha macinaaya anhala ukhala nanlelo khampa owantikhiya niilaaphi ni pooti ufuttiya yaahimwiiweleleke Nluku. Ukati wo myaakha 1.000 Yesu Kristu unhalaawe ulamulela, uyo naahala waahoolela ni uweettihera “mapuro amphwanyannya maaci anvaha ukumi.” Ale anhala wiiwelela malakihero a Yesu ni anhala wooniya wiira khahiile umwiiwelela Yehova, anaahala wantikhiya macinaaya nlivuruni yeekumi woohiweherera-tho ufuttiya.—Nsome Apokalipise 7:16, 17. *
8. Atthuni ahantikhiye macinaaya nlivuruni yeekumi, ni isiyani inhala uwiirannyeela ayo atthwaayo?
8 Ikhurupu yoneeraru akhanle atthu anlattanihiya niipuri anhala umalamalihiya ukhottoni yo Harmacetom. Macinaaya ayo atthwaayo khaavo nlivuruni yeekumi. Yesu enre wiira ayo “anhala umalela wuutankanyiyani.” (Mat. 25:46) Apostolu Paulu ahorumiya ni Nluku wantikha wiira ayo atthwaayo “ihukhumwaaya unhala ukhala umalamalihiya mpaka.” (2 Atesal. 1:9; 2 Pet. 2:9) Iyo ciicammo phi itthu inhala uwiirannyeela atthu otheene atthekenle imweeni nnepa wowaarya wa Nluku. Ayo atthwaayo khanhala wunwelelihiya. Ayo anaahala umalamalihiya ni khanhala waakhela ukumi woohimala. (Mat. 12:32; Mark. 3:28, 29; Mabere. 6:4-6) Vano, nttwee noopele mwaha ikhurupu piili caatthu anhala wunwelelihiya wiira akhale watuninyani.
TIPANI NOHALA WUNWELELIHIYA?
9. Toko cinthoonyeraaya Miteko 24:15, ikhurupuni caatthu anhala wunwelelihiya wiira akhale watuninyani, ni nnyo ikhurupunnyo cinvirikana cani?
9 Ibiiblya inawuuluma ikhuru piili caatthu anhala wunwelelihiya ni anweherera ukhalana ukumi woohimala watuninyani, ale “yeettenle isariya ni ale yaheettenle” isariya. (Nsome Miteko 24:15. *) Ale “yeettenle isariya” akhanle atthu answalenle Yehova mpaka wakhwilyaaya. Ni ale “yaheettenle” isariya akhanle atthu akhwaale woohinswalela Yehova. Nhina ikhurupu yaatthu yaheettenle isariya, enci akhanle atthu yaheettela hataa vakaani moolumo a Yehova. Ukhala wiira nnyo ikhurupu piilinnyo cinaahala wunwelelihiya, niireke wiira atthu okhurupu coopiili macinaaya ahantikhiya nlivuruni yeekumi? Wiira naakhule nno nikohonno, nttwee noopele mwaha khula ikhurupu.
10. Nlattuni Yehova unhalaawe uwunweleliha atthu “yeettenle isariya” ni nrinttini unhalaawe waavaha? (Wiira nsome citthu cikhwaawe nhina atthu anhala wunwelelihiya wiira akhale watuninyani, nwehe mphantte wo “Makoho Aanamasoma” nhina yeela irevisteela.)
10 Atthu “yeettenle isariya” phi ikhurupu yoneecese. Ahinaaya ukhwa, macinaaya ayo atthwaayo yaari nlivuruni yeekumi. Niireke wiira uwakati ukhwaalyaaya ncina naya nihofuttiya nhina iyo ilivurwiiyo? Mena, kontha ayo nanlelo akhanle akumi mmoopuweleloni a Yehova. Yehova “khanakhala Nluku aatthu ookhwa, masi khanle Nluku aatthu akumi, kontha otheene nowoona ukhala akumi.” (Luka 20:38) Iyo itthwiiyo maanaaya wiira ukati atthu yeettenle isariya unhalaaya wunwelelihiya, macinaaya anhala ukhala nlivuruni yeekumi. Masi wiipaceroni, pooti waneereehu wiira yantikhiye “niilaaphi.” (Luka 14:14) Ayo atthwaayo yunwelelihiyaka, ahaavo anhala uthanliya ni uvahiya nrintti woovara nteko khampa “akhulupale nlaponi motheene.”—Isaa. 45:16.
11. Isiyani atthu “yaheettenle” isariya inhalaaya ulamuliya wiitthuca wahoolo wiira macinaaya yantikhiye nlivuruni yeekumi?
11 Woomalihera, nttwee noopele mwaha ikhurupu yoneethanu: Ale “yaheettenle” isariya. Ayo atthwaayo atthunaka khayaacuwenle malamulo a Yehova. Phimaana, khayeettenle ayo malamulwaayo. Nlattu wo iyo itthwiiyo, ncina naya khanantikhiye nlivuruni yeekumi. Masi Yehova naahala uwunweleliha wiira ayo akhalane ukati wo wantikhiya macinaaya nhina iyo ilivurwiiyo. Ayo atthu yaheettenle isariyaayo anaahala upheela ukaviheriya cinene. Ahinaaya ukhwa, ahaavo yaapankile citthu cootakhala cinene ni cokhirini. Ayo ahaana yarwaaka wiitthuca weettela malamulo osariya a Yehova. Phimaana, Umwene wa Nluku unaahala uhoolela nteko muulupale woosomihiya atthu malamulo a Nluku uhinapaca thanku uvariya va watuninyani va.
12. a) Tipani nhala waasomiha atthu yaheettenle isariya? b) Isiyani inhala uwiirannyeela ale ahinhala upheela weettela citthu cinhalaaya wiitthucihiya?
12 Masi tipani nhala waasomiha atthu yaheettenle isariya? Anhala ukhala atthu o mphwinko muulupale ni atthu yeettenle isariya anhala wunwelelihiya. Wiira atthu yaheettenle isariya macinaaya yantikhiye nlivuruni yeekumi, ayo ahaana yavahereraka ukumyaaya wa Yehova ni ukhalana upatthani nuuyo. Yesu Kristu ni makristau oothanliya anaahala waaweheeha ratta-raatta wiira yoone mananna cinhalaaya uvarela nteko citthu cinhalaaya wiitthucihiya. (Apoka. 20:4) Ntthu hinhala upheela weettela malamulo a Yehova naahala uhaleela ukumi woohimala, hataa ukhalaka wiira nhala ukhalana myaakha 100. (Isai. 65:20) Yehova ni Yesu anaakhitiri ucuwelela itthu khula ntthu irinaawe wanrimani ni khanhala unhiya hataa ntthu apankaka citthu cootakhala upeephoni.—Isai. 11:9; 60:18; 65:25; Joau 2:25.
WUNWELELIHIYA WAATTHU ANHALA UVAHIYA UKUMI NI ANHALA UHUKHUMWIYA
13-14. a) Khalayi, hiiva naataphulela cani moolumo a Yesu nhina Joau 5:29? b) Isiyani inlamuliyeehu wuupuwela nhina moolumo a Yesu?
13 Yesu ahowuuluma atthu anhala wunwelelihiya va watuninyani va. Uyo enre co: “Unaahala uphiya ukati unhalaaya wiiwa ncu nawe otheene ari mmahiyeni ni anaahala ukhuma, ale apankale citthu comaana, wiira akhale nuukumi, ale apankale citthu cootakhala wiira ahukhumwiye.” (Joau 5:28, 29) Isiyani Yesu yaapheelaawe uhimya wiira wawe commo?
14 Khalayi, hi neeraka wiira moolumo a Yesu yaaca citthu comaana awula cootakhala atthu anhala wunwelelihiya cinhalaaya upanka wahoolo; awula, hiiva neeraka wiira atthu anhala wunwelelihiya ahaavo anhala upanka citthu comaana, ni ahaavo anhala upanka citthu coohinamaana. Masi Yesu khenre wiira atthu anhala wunwelelihiya anaahala upanka citthu comaana awula anaahala upanka citthu coohinamaana. Uyo oolumacile citthu cipankilyaaya khalayi, kahi citthu cinhalaaya upanka wahoolo. Uyo enre “ale apankale citthu comaana” ni “ale apankale citthu cootakhala.” Maanaaya wiira citthu cipankilyaaya ayo atthwaayo apankile ahinaaya ukhwa; khacinakhala citthu cinhalaaya upanka yonwelelihiyaka. Iyo ikhanle itthu yosariya, keera? Kontha upeephoni khaavo ntthu nhala uhinnya apankaka citthu coohinamaana. Phimaana, atthu “yaheettenle” isariya yaapankile nnyo citthu cootakhalannyo ahinaaya ukhwa. Vano isiyani Yesu yaapheelaawe uhimya uwakati woolumilyaawe wunwelelihiya waatthu “wiira akhale nuukumi” ni wunwelelihiya waatthu “wiira ahukhumwiye”?
15. Phaapani anhala wunwelelihiya “wiira akhale nuukumi” ni nlattuni?
15 Atthu yeettenle isariya apankile citthu comaana ahinaaya ukhwa, anhala wunwelelihiya “wiira akhale nuukumi.” Macinaaya ari nlivuruni yeekumi. Iyo itthwiiyo maanaaya wiira wunwelelihiya waatthu “apankale citthu comaana” wantikhiye nhina Joau 5:29 unaalikanaca ni wunwelelihiya waatthu “yeettenle isariya” unoolumiya nhina Miteko 24:15. Iyo itthwiiyo inaavaranaca niitthu inhimyaaya Arooma 6:7, ineera: “Ntthu khwile holeveleliya matampyaawe.” Yehova haalevelela matampyaaya atthu yeettenle isariya ukati ukhwilyaaya, masi nanlelo nawuupuwela citthu comaana cotheene cipankilyaaya ukati waaryaaya akumi. (Mabere. 6:10) Unawoonannya wiira yonwelelihiyaka, ayo nanlelo ahaana yiikurumicaka unvaresesa Yehova yapheelaka wiira macinaaya ahifuttiye nlivuruni yeekumi.
16. Weeriyaka wiira ahaavo atthu anhala wunwelelihiya “wiira ahukhumwiye” inaaciya isiyani?
16 Vano ale apankile citthu coohinamaana ahinaaya ukhwa inhala uwiirannyeela isiyani? Ayo khanswalenle Yehova ukati waaryaaya akumi. Unookhalaru wiira itampi caya cihofuttiya ukati ukhwilyaaya, ncina naya khanantikhiye nlivuruni yeekumi. Wunwelelihiya waatthu “apankale citthu cootakhala” unaalikanaca ni wunwelelihiya waatthu “yaheettenle” isariya unoolumiya nhina Miteko 24:15. Ayo atthwaayo anhala wunwelelihiya “wiira ahukhumwiye.” * Iyo itthwiiyo maanaaya wiira ayo anaahala uweheehiya ni Yesu wiira yooniye meettelwaaya. (Luka 22:30) Waviraka ukati, Yesu naahala ucuwela wakhala wiira unawaaphwanela wantikhiya ncina naya nlivuruni awula mena. Wiira iyo itthwiiyo yiirannye, ayo atthwaayo ahaana yahiyaka khuliiru meettelo oohinamaana yaarinaaya ni ahaana yavahereraka ukumyaaya wa Yehova.
17-18. a) Isiyani atthu otheene anhala wunwelelihiya inlamuliyaaya urwaa upanka? b) Toko cinthoonyeraaya Apokalipise 20:12, 13, atthu anhala wunwelelihiya anhala uhukhumwiya nlattu wosiyani?
17 Wamalaka wunwelelihiya waatthu ookhwa, atthu yeettenle isariya ni atthu yaheettenle isariya ahaana yiiwelelaka malamulo anhala ukhala mmarooluni conaanaano cinhala uhuliya uwakati wo myaakha 1.000. Apostolu Joau ahotaphulela iwooni yaakhalannyaawe, eeraka co: “Kahowoona atthu ookhwa, oolupale ni anamwane, aneemenle uhoolo wohice. Vano cahotthukuliya iroolu. Ciicammo, yahotthukuliya iroolu ikhwaawe: yaari iroolu yookumi. Atthu ookhwa yahohukhumwiya nicitthu cantikhiye mmarooluni yattharihiyaka meettelwaaya.”—Apoka. 20:12, 13.
18 Atthu anhala wunwelelihiya anhala uhukhumwiya nlattu wosiyani? Niireke wiira ayo anhala uhukhumwiya nlattu wo citthu cipankilyaaya ahinaaya ukhwa? Mena! Nhiliyale wiira itampi ca ntthu cinaafuttiya akhwaaka. Phimaana, atthu anhala wunwelelihiya khanhala uhukhumwiya nlattu wo citthu cipankilyaaya ahinaaya ukhwa. Atthu anhala wunwelelihiya anhala uhukhumwiya nlattu wo mananna cinhalaaya uvarela nteko citthu cinhalaaya wiitthucihiya upeephoni. Hataa alopwana ookhuluvelya okhalayi toko Nowee, Samuweli, Davidi ni Daniele ahaana yarwaaka wiitthucihiya myaha ca Yesu Kristu ni uthoonyihera waamini woopoliya wihu nuuyo. Wakhala wiira ayo alopwanaayo ahaana yarwaaka wiitthuca citthu cinci, vano nwuupuwele atthu yaheettenle isariya anhala wunwelelihiya!
19. Isiyani inhala uwiirannyeela ale anhala ukhotta unswalela Yehova?
19 Masi isiyani inhala uwiirannyeela ale anhala ukhotta unswalela Yehova? Apokalipise 20:15 ineera: “Otheene ale maciinaaya yahantikhiye nlivuruni yeekumi yahottikheliya muntthiyani no mooro.” Khweeli, iyo phi itthu inhala wiirannya. Ayo anaahala umalamalihiya wiira ahikhale-tho mpaka. Phimaana, ikhanle itthu yofayita otheene cihu wiikurumica wiira ncina nihu nantikhiye nlivuruni yeekumi ni wiira nihifuttiye!
Munna akaviheraka nteko woosomiya atthu moolumo a Nluku unhalaa uvariya ukati wo myaakha 1.000 (Nwehe iparaagarafu 20)
20. Uwakati wo myaakha 1.000 ntekoni womaana unhala upankiya? (Nwehe ilatarato yo wakaapani.)
20 Ukati wo myaakha 1.000 unhalaawe ulamulela Yesu, unhala ukhala ukati wootteeliha nrima cinene. Citthu cinci comaana cinaahala wiirannya uyo ukatyuuyo. Ni itthu imoca ukhanle nteko muulupale unhala uvariya va watuninyani va wiira asomihiye atthu malamulo a Nluku. Masi ciicammo unhala ukhala ukati atthu “yeettenle isariya ni yaheettenle” unhalaaya uweheehiya meettelwaaya. (Isai. 26:9; Mite. 17:31) Masi uyo nteko wo waasomiha atthuuyo unhala uvariya cani? Nhina mwaha nkhwaawe unhaleehu usoma, ninaahala woopela mwaha uyo nteko womaanooyo.
NCIPO 147 A Vida Eterna – Que Bela Promessa!
^ Nhina ula mwahoola, ninaahala woona nrukunuso nhina mananna ceeweehu moolumo a Yesu yantikhiye nlivuruni ya Joau 5:28, 29. Nhina nnyo iveerusunnyo, Yesu ahowuuluma atthu anhala wunwelelihiya “wiira akhale nuukumi” ni ale anhala wunwelelihiya “wiira ahukhumwiye.” Ninaahala woopela mwaha inanna co wunwelelihiya coopiili.
^ Iyo ilivurwiiyo yancenre wantikhiya yumpeliyo ituninya, ukhuma uwakati apinaatamu waakhenlyaaya iparakha yo woopoliya. (Mat. 25:34; Apoka. 17:8) Phimaana, Apeli atthunaka phi ncina noopacera nantikhiye nhina iyo ilivurwiiyo.
^ Malakiya 3:16 Vano, ale yaamoova Yehova yahokela woopa mwaha khula ntthu ninkhwaawe, ni Yehova anawaaweha ni aanawaaviriyana. Ni uhoolo wawe, yahokela wantikhiya ilivuru yoowuupuwelela ale yaamoova Yehova ni yoopuwela ncina nawe.
^ Afilipo 4:3 Ni kinaawuulepela weeva ciicammo, khampa ntthu khweeliini nonvaranaaka nteko nkhayi wiira uhihiye waakavihera ayo atthiyanaayo yiikurumicale nkhayi ni miiva nlattu wohapari comaana, wamoca ni Klemente ni ciicammo naatthu akhwaawe avanre nteko ni miiva, macinaaya yantikhiye nlivuruni yookumi.
^ Apokalipise 7:16, 17 Khinhala waavola-tho itala, khaninhala waavola-tho ntthona, ni khaninhala waapaha ncuwa ni hataa waavihera nttukhuttha, 17 kontha Mwaana Okhontwaa, ri wariyari ihice, naahala waahoolela ni waarwaana mapuro ari maaci ookumi. Ni Nluku naahala waawuutaca minthoryaaya otheene.
^ Miteko 24:15 Miiva kihaana niweherero ninweela wa Nluku, niweherero ala alopwanaala ciicammo nirinaaya, wiira wahoolo unaahala ukhala wunwelela waatthu ookhwa yeettenle isariya ni ale yaheettenle.
^ Khalayi, hiiva neeraka wiira nuulumo “uhukhumwiya” niromoliye nhina iyo iveeruswiiyo maanaaya wiira uttarusiya, ni khweeli nno nuulumonno pooti uhimya iyo itthwiiyo. Masi nuulumo “uhukhumwiya” Yesu niromonlyaawe nhina Joau 5:29 pooti utaphuleliya nimananna oovirikana ni ninaaca unwehesesa ntthu awula khampa cineeraawe tisiyonaariyu mmoca oluuka ikereeku, nno nuulumonno maanaaya wiira “uweheehiya ntthu wiira ooniye wakhala wiira meettelwaawe akhanle omaana awula mena.”
