1. Ntthu ookhuluvelya nokhala cani?

 NTTHU ookhuluvelya nawiikurumica upanka citthu cinkhuluvelihaawe ni wuuluma ikhweeli. (Isaa. 15:4) Hi ninaacuwela wiira pooti wanonkhuluveleehu uyo ntthuuyo. Hi nimpheela wiira mayamunneehu anikhuluvele. Isiyani inlamuliyeehu upanka wiira ayo anikhuluvele?

2. Ninhala wiitthucani nhina ula mwahoola?

² Hi khaninlamuliya waakhanyereriha akhunanihu wiira anikhuluvele. Masi nihaana nithoonyeraka ukhala atthu ookhuluvelya. Ahaavo aneera wiira ukhuluveliya unkhala khampa nsurukhu—urika uphwanya, masi waakuva umala. Hi pooti wanonkhuluveleehu Yehova ukati wotheene, kontha “citthu cimpankaawe cikhanle cookhuluvelya.” (Isaa. 33:4) Ni Yehova nopheela wiira nintakihe. (Efesu 5:1) Nttwee noone matakihero aaswali a Yehova okhalayi yantakihile ni yaathoonyenre ukhala atthu ookhuluvelya. Ciicammo, nttwee noone makhalelo mathanu anhala unikavihera ukhala atthu ookhuluvelya.

3-4. Porofeeta Daniele aathoonyenre cani ukhala ntthu ookhuluvelya ni isiyani hiiva inlamuliyeehu wiikoha?

³ Porofeeta Daniele hovaha ntakihero nomaana nhina ukhala ntthu ookhuluvelya. Hataa ukhalaka wiira uyo ahorwaaniya u Babilooniya khampa peresu, uyo ahokhitiri ukhuluveliya naatthu enci. Atthu o iyo isittattiiyo yahancera utepa unkhuluvela ukati Yehova wankavihenryaawe utaphulela citthu caalohilyaawe mwene o Babilooniya. Wahoolo, Daniele ahaana anhimyeeraka mwene wiira itthu yaapankilyaawe khayancivenle Yehova.  Iyo yaari itthu yoorika, kontha uyo mwennyooyo aacuweliya ukhala ntthu oohipica urusiya ni khawaahala uncivela mena vakaani uhimyeeriya iyo itthwiiyo! (Dan. 2:12; 4:20-22, 25) Uvira waya myaakha cinci, Daniele ahothoonyera tootho wiira aari ntthu ookhuluvelya. Uyo ahotaphulela ratta-raatta itthu yantikhiye wasirini upalaasiyu yo Babilooniya. (Dan. 5:5, 25-29) Wahoolo, nhooleli Dario ni anantekwaawe yahokupali wiira ‘yahaavo ikuru yuulupale yankavihera Daniele.’ Ayo yahoona wiira Daniele “aari ntthu ookhuluvelya, oohinyoonyaciya ni aanyema upanka citthu cootakhala.” (Dan. 6:3, 4) Ayo ahoolelyaayo unookhalaru wiira khayanswalela Yehova, yahokupali wiira Daniele aari nlopwana ookhuluvelya!

⁴ Muupuwelaka ntakihero na Daniele, mwiikohe co: ‘Atthu ahikhanle Masaahiti a Yehova ankiwehera cani? Ayo anaakoona ukhala ntthu ookhuluvelya ni owiikurumica uvara ratta miteko cawe?’ Nlattuni unreeraaya wiikoha commo? Kontha nakhalaka atthu ookhuluvelya, ninaahala waattitthimiha Apaapeehu, Yehova.

5. Isiyani yankavihenre Hananiya ukhala ntthu ookhuluvelya?

⁵ Mwaakha wo 455 hinawa Kristu, nhooleli Nemiya waamalihilyaawe uteka imuuru co Yerusalemu, ahaatotha alopwana ookhuluvelya yaahala uwacera isittatti yo Yerusalemu. Nhina alopwana yaathanlalyaawe, Nemiya ahonthanla Hananiya wiira akhale nkhulupale o Nipuro Noolipihaciya. Ibiiblya ineera wiira Hananiya aari “nlopwana wamphwanela ukhuluveliya ni aamoova Nluku eekhweeli waavikana atthu akhwaawe.” (Nem. 7:2) Hananiya ahowacera ratta khula nteko waavahaceriyaawe. Uyo aapankile commo kontha aananfenta Yehova ni aapheela untteeliha nrima. Untakiha  uyo nlopwanooyo unaahala unikavihera ukhala atthu ookhuluvelya nhina nteko unonvareleehu Yehova.

6. Manannani Tiikiku canthoonyenryaawe Paulu wiira aari ntthu ookhuluvelya?

⁶ Moone ntakihero na Tiikiku, nkristau apostolu Paulu ankhuluvelaawe cinene. Ukati apostolu Paulu waatthukiyaawe wapuwani wawe, uyo ankhuluvela Tiikiku wiira ankavihere. Phimaana wenryaawe wiira uyo nlopwanooyo “aari nanteko ookhuluvelya.” (Efesu 6:21, 22) Paulu ahonlepela Tiikiku uvira akawaka iwarakha caawantikhenlyaawe mayamunna o Efesu ni o Kolosu, ni ciicammo wiira aalipihe ni aamaalihe ayo mayamunnaayo. Paulu ankhuluvela wiira Tiikiku anaahala uvara ratta uyo ntekooyo. Ntakihero na Tiikiku ninaanupusera alopwana ookhuluvelya mmalokoni anniwacera mminepani.—Akol. 4:7-9.

7. Ukhuluvelya wo mahumu ni waarumiya o wanlokoni unniitthuciha isiyani?

⁷ Ilelo, hi ninaasukhuru cinene nlattu wookhalana mahumu ni arumiya o wanlokoni anlamuliyeehu waakhuluvela. Khampa Daniele, Hananiya ni Tiikiku, ayo anaavara ratta-raatta miteko cinvahaceriyaaya. Wootakihera, hi ninaakhuluvela wiira miphantte cotheene co mikutthaano co khula isumana hothanliya ntthu oohala upanka. Ni mahumu anawaasukhuru cinene mayamunna ni mayanuunu anaakhela miphantte ni aneetthenkaca ratta wiira apanke. Ciicammo, hi naalattulaka atthu anaasomiheehu Ibiiblya wiira yoone nkutthaano wo wuumaleloni isumana, hi ninaakhuluvela wiira haavo ntthu nohala utaphulela mwaha waatthu otheene. Hi ciicammo ninaakhuluvela wiira khaninhala uhiya ukhalana ilivuru coohala uvarela nteko wuulalyeerani. Khweeliini, mayamunna anhoolela miteko co wanlokoni anaaniwacera ratta ni hi ninansukhuru Yehova nlattu wo iyo itthwiiyo. Masi isiyani otheene cihu ninlamuliyeehu upanka wiira nithoonyere ukhala atthu ookhuluvelya?

8. Ukati woowoopana mwaha atthu akhwaawe, nihaana niivaracaka wiira nihihimyace isiyani? (Nwehe Miruku 11:13.)

⁸ Hi ninawaafenta mayamunneehu. Phimaana, ninawaawacera. Masi ratta! Nihaana nicuwelaka wiivaraca wiira nihihimye citthu caya cosiiri. Uwakati wa apostolu Paulu, yahaavo atthu waacivela “waapa ni wiikelakeliha myaha caakhwaaya, yuulumaka citthu cahaalamuliyaaya wuuluma.” (1 Tim. 5:13) Hi khanimpheela ukhala toko ayo atthwaayo. Vano, muupuwele wiira ntthu hoohimyeerani isiiryaawe ni hoolepelani wiira nhinhimyacere ntthu. Wootakihera, atthunaka nrokorihu mmoca nawuuhimyeerani wiira ihaavo iretta inonwerya awula ihaavo itthu immwiira ni nawuulepelani wiira nhinhimyacere ntthu. Yeerannyaaka iyo itthwiiyo, hiiva nihaana nipankaka itthu innilepelaawe. * (Nsome Miruku 11:13. *) Vano nttwee noopele mwaha ukati hiiva uhinlamuliyeehu uhimyaca citthu cosiiri.

9. Manannani khula ntthu watthokoni nohalaawe uthoonyera wiira khanle ntthu ookhuluvelya?

⁹ Ukhala atthu ookhuluvelya watthokoni. Cihaavo citthu cinreera ucuweliya watthokoni paahi. Wootakihera, nlopwana nawoona itthu amwaarawe impankesaaya ni phoonaka ukhala itthu yooteehaca. Niireke uyo haana aahimyaceraka atthu ni uwoonihaca ihaaya amwaarawe? Mena! Uyo nawaafenta amwaarawe ni khantthuna waariipiha nrima. (Efesu 5:33) Amirawo ciicammo anaapheela uhisimiya ni asithumwanaya makristau ahaana wuupuwela iyo itthwiiyo.  Ayo khanlamuliya uwuulihiihaca muru asaanaaya, yaahimyeeracaka atthu akiina citthu cihimpankaaya ratta. (Akol. 3:21) Ni asaana o wapuwani ciicammo ahaana yakhalaka atthu osiiri ni khanlamuliya waahimyeera atthu akiina citthu cinkhumelela wapuwani. (Deut. 5:16) Wakhalaka wiira khula ntthu wapuwani khanvira aahimyeeraka atthu akiina citthu cowapuwani, amuci anaahala wiiwanana ni ukhala ootteeliya.

10. Ukhala mpatthani eekhweeli isiyani? (Nwehe Miruku 17:17.)

¹⁰ Ukhala atthu ookhuluvelya naasipatthaniihu. Ukati nkiina, hi ninaapheelaka waahimyeera asipatthaniihu citthu cinniira muukumini wihu. Uhimya itthu inniira pooti ukhala itthu yoorika. Pooti ukhalaka wiira hiiva khanilemalenle uhimyaca itthu inniira ni ninoopuweleehu. Khweeliini, hiiva nanhala ukhala oonyoonyiya nacuwelaka wiira mpatthaniihu hohimyaca itthu yanhimyenreehu ni naakhuluvenleehu wiira khaahala waahimyacera atthu akiina. Phimaana, unaareera ukhalana apatthani ookhuluvelya. Atthu anoorya usunka isiiri akhanle ‘apatthani eekhweeli.’—Nsome Miruku 17:17. *

11. a) Manannani mahumu ni asaaraya anlamuliyaaya uthoonyera wiira akhanle atthu ookhuluvelya? b) Toko cinthoonyeraaya ilatarato, isiyani immwiitthucereehu humu aawacenre mwaha wosiiri wanlokoni ni uwakati nkiina nowoopana mwaha amucyaawe? (Nwehe ilatarato.)

¹¹ Ukhala atthu ookhuluvelya wanlokoni. Mahumu ahinkhala yahimyacaka isiiri co wanlokoni, ankhala khampa “nikhuku nookhikicera nihuku nophyoo ni khampa nipuro nowiipithya nihuku ninwuka ipula.” (Isai. 32:2) Hi pooti wanaahimyeereehu ayo alopwanaayo citthu cinniira, woohoova wiira anaahala waahimyacera atthu akhwaawe nnyo citthunnyo. Ni hiivano khaninkhala naakhanyererihaka ayo mayamunnaayo wiira anihimyacere citthu cihinlamuliyeehu ucuwela. Uhiya commo, ninawaasukhurwela asaaraya ayo mahumwaayo, kontha khankhala yaakhanyererihaka asiwannyaya uhimya isiiri co wanlokoni cihinlamuliyaaya  ucuwela. Ni ikhanle itthu yomaana asaaraya mahumu yakhalaka woohicuwela citthu cosiiri co mayamunna o wanlokoni. Amwaarawe humu mmoca aheera co: “Mi kinawaasukhurweela cinene awannyaka uhikittonkacera isiiri co mayamunna o wanlokoni ampheela ukavihera nhina mminepani. Awannyaka khankihimyeera phaapani yaayo mayamunnaayo ni woonela waka, ikhanle itthu yomaana uhicuwela itafaawuti cinaavira ayo mayamunnaayo. Commo, mi akinkhala kuupuwelaka itthu yoopanka wiira kaakavihere. Nlattu wo iyo itthwiiyo, mi unaakicivela uviriha ukati nkhayi ni mayamunna otheene o wanlokoni, ni kinaakhuluvela wiira kaattonkaceraka awannyaka isiiri, ayo khanhala unhimyeera ntthu.” Khweeliini, otheene cihu nimpheela ucuweliya wiira naatthu ookhuluvelya. Masi wiira nooryaanihe, makhaleloni ninlamuliyeehu ukhalana? Nttwee noone makhalelo mathanu anhala unikavihera ukhala atthu ookhuluvelya.

12. Kontha isiyani nineereehu wiira nifento ikhanle itthu yuulupale inniiriha ukhala atthu ookhuluvelya?

¹² Nifento phi itthu yuulupale inniiriha ukhala atthu ookhuluvelya. Yesu aheera wiira malamulo moolupale meeli ukhanle unfenta Yehova ni unfenta nkhunanihu. (Mat. 22:37-39) Hiivano ninanfenta Yehova. Phimaana, nimpheela untakiha nikhalaka atthu ookhuluvelya. Wootakihera, naafentaka mayamunneehu, khaninhala uvira naahimyeeraka atthu akiina citthu caya cosiiri, kontha hiiva ninaacuwela wiira napankaka commo, pooti uwoonihaca ihaaya ni uwooniha uwerya.—Joau 15:12.

13. Manannani wiiyeviha cinhalaaya unikavihera ukhala atthu ookhuluvelya?

¹³ Wiiyeviha ciicammo unaahela unikavihera ukhala ntthu ookhuluvelya. Ntthu neeyeviha khantotha wooniya wiira phipacenre uttonkaca mwaha uhincuweliya naatthu akhwaawe. (Afili. 2:3) Uyo ciicammo khammananiha wiithoonya waatthuni wiira naacuwela citthu cosiiri ni khanlamuliya waahimyeera atthu nnyo citthunnyo. Neeyevihaka, ciicammo khaninhala ukhala nimananihaka waahimyera atthu enci moopuwelelweehu nhina itthu ihinoolumiya mbiiblyani ni mmalivuruni cihu.

14. Ukhalana ankhili omaana unhala unikavihera cani ukhala atthu ookhuluvelya?

¹⁴ Ntthu rina ankhili omaana naacuwela wiira uhaavo “ukati woomaala ni ukati wo wuuluma.” (Ekles. 3:7) Ilapo cinci, ahaavo moolumo ancuweliya cinene, aneera: “Wuuluma unkhala iparaata, masi umaala unkhala iwooru.” Ayo moolumwaayo anthoonyera wiira ukati nkhwaawe phataari umala uhiya wuuluma itthu. Phimaana ilivuru yo Miruku 11:12 waneeraaya co: “Ntthu rina ankhili omaana naamaala.” Muupuwele ntakihero naamunna amoca. Ayo ahoviriha myaakha cinci anari humu o wanlokoni ni nlattu woocuwelaca waya, anawiihaniyaka maloko makhwaawe wiira akavihere uwacera myaha cuulupale. Humu nkhwaawe ri nloko naya heera: “Ayo amunnaayo anawiivaraca cinene wiira ahihimye citthu cosiiri co maloko makhwaawe.” Itthu yuulumilyaawe uyo humuuyo inthoonyera wiira ankhili omaana arinaaya ayo amunnaayo anaawiiriha mahumu akiina waakhuluvela.

15. Ntakihere mananna uhootha cinnikaviheraaya ukhala atthu ookhuluvelya.

¹⁵ Uhootha phi itthu ikhwaawe inhala unikavihera ukhala atthu ookhuluvelya. Hi ninankhuluvela ntthu oohootha kontha ukati wotheene uyo nawuuluma ikhweeli. (Efesu 4:25; Mabere. 13:18) Muupuwele ila itthwiila: Nyuuva nnawiikurumica wiira ncuwele waasomiha atthu Ibiiblya ratta. Vano, nnawuupuwela unlepela ntthu wiira oohimyeereni citthu cinhala wuukaviherani ucuwela wiitthuciha Ibiiblya ratta. Tipani aahaleenyu unlepela wiira oolakihereni? Mwaahala unlepela ntthu aahala wuuhimyeerani  ikhweeli woohuuthepyani awula ntthu aahala wuuluma citthu wiira ootteeliheni nrima paahi? Wakhala wiira khweeliini nnopheela wiitthuca usomiha Ibiiblya ratta, nyuuva nnancuwela ntthu aahaleenyu unthanla. Ibiiblya ineera: “Phataari weeva ulakiya uhimyeeriyaka ikhweeli, uhiya ufentiya mmwiitihoni. Urakalihiya nimpatthannya unkhala ureeriya.” (Miru. 27:5, 6) Hiiva pooti uniwerya mpwaniihu anihimyeeraka ikhweeli. Masi wahoolo, itthu innihimyeeraawe pooti unikavihera cinene.

16. Toko cinthoonyeraaya Miruku 10:19, nlattuni ninlamuliyeehu wiivaraca?

¹⁶ Napheelaka wiira akhunanihu anikhuluvele, nihaana niivaracaka. Wiivaraca unaahala unikavihera uhihimya citthu cosiiri. (Nsome Miruku 10:19. *) Hiiva pooti unirika cinene wiivaraca, utepa wakhalaka wiira niri mwinternetini nivarelaka nteko cile cineehaniya redes sociais. Naahiivaraceke, hiiva pooti waacuweliha atthu enci citthu cosiiri cahaalamuliyeehu unhimyeera ntthu. Ni namwaruselaka itthu nhina redes sociais, hi khanincuwela mananna cinhalaaya uvareliya nteko ni khanincuwela masakha iyo itthwiiyo inhalaaya uwaana. Wiivaraca ciicammo pooti unikavihera atthu annilupattha yanikhanyererihaka wiira naahimyeere citthu cinhala waaphwanyiha masakha mayamunneehu. Iyo itthwiiyo pooti wiirannya ilapo unkhottihiyaaya ntekweehu woolalya ihapari ca Nluku ni mayamunneehu unkohakohiyaaya nimapoliisiya. Yaniirannyeelaka iyo itthwiiyo, nihaana neettelaka itthu inhimyaaya Isaalimu 39:1, ineera: “Kinaatthuka malakwaaka wiira kihuulumace.” Ukati wotheene, hi nihaana nikhalaka atthu ookhuluvelya nakhalaka naamuciihu, naasipatthaniihu, nimayamunneehu, nimayanuunwiihu awula naatthu akhwaawe. Ni wiira nikhale atthu ookhuluvelya, nihaana nikhitiriki wiivaraca.

17. Manannani ninhaleehu ukavihera nloko nihu wiira nikhale naatthu ookhuluvelya?

¹⁷ Hi ninansukhuru cinene Yehova nlattu woopanka mphantte muumucini wawe ucanre atthu enci oofenta ni ookhuluvelya. Otheene cihu, nihaana niikurumicaka ukhala atthu ookhuluvelya. Neekurumicakavale uthoonyera nifento, wiiyeviha, ukhalana ankhili omaana, uhootha ni wiivaraca, nloko notheene ninaahala ukhala naatthu ookhuluvelya. Ukhala ntthu ookhuluvelya khinakhala itthu inlamuliyeehu wiikurumica upanka nihuku nimoca paahi. Nihaana niikurumicaka ukhala atthu ookhuluvelya mahuku otheene. Phimaana, nintakihe Nlukwiihu, Yehova, ni ukati wotheene nithoonyere wiira nikhanle atthu ookhuluvelya.