Nhina 1 Akorintu 15:8, Paulu heera: “Woomalihera, ahokiphwanya miiva, khampa mwaana ooyariya uhinaphiya ukatyaawe.” Khalayi, ilivuru cihu caataphulelaka wiira apostolu Paulu atthunaka aaca ukati Yesu waamuulumannyaawe naryeene wiirimu. Waakhala khampa apostolu Paulu ahovahiya iparakha yooyariya, awula wunwelelihiya wiira akhale wiirimu ahinaphiya mahuku aahalaawe uvahiya iyo iparakheeyo. Masi, uweheeha wihu ratta iyo iveeruswiiyo, nihoona wiira nihaana nirukunusaka mananna ceeweehu itthu inhimyaaya.

Ninaacuwela wiira khweeli apostolu Paulu aaca ukati waarwaawe u Damasco ni waakhalannyaawe iwooni ya Yesu nari wiirimu. Masi isiyani khweeliini yaapheelaawe uhimya wenryaawe wiira uyova aari “khampa mwaana ooyariya uhinaphiya ukatyaawe”? Moone citthu cinthoonyera itthu atthunaka naapheelaawe uhimya.

Paulu aakhanle nkristau nimananna owaakuvyaaca ni ukati wahaawehereraaya atthu. Mwaana ayariyaka uhinaphiya ukatyaawe inkhala itthu ihinwehereriya. Iyo phi itthu yaamwiirannyenle Saulu (wahoolo ancenre wiihaniya Paulu) ukati waarwaawe u Damasco wiira aalupatthe makristau yaakhala nwo. Uyo khoopuwela wiira anhala ukhalana iwooni ya Yesu onwelelihiye. Paulu ukhala nkristau yaari itthu yahaawehereraawe mwaneene ni ciicammo makristau o Damasco khayaaweherera iyo itthwiyo. Itthu yaamwiirannyenle Paulu yaari itthu yowaakuvyaaca ni yoovara nrima mpaka ahancera uhoona ni yahosivira mahuku hoonaka.—Mite. 9:1-9, 17-19.

Paulu khanle nkristau “unavinre ukati.” Nuulumo noluuka ikereeku nitaphuleliye “ooyariya uhinaphiya ukatyaawe” ciicammo pooti utaphuleliya co: “unavinre ukatyaawe.” Ibiiblya Almeida ineera co: “Toko mwaana ooyariya unavinre ukatyaawe.” Uwakati Paulu ukhanlyaawe nkristau, Yesu ahoturuwela wiirimu. Masi ale aromoliye nhina iveerusu coopacera, yahomoona Yesu ukati waaryaawe watuninyani hinarwaa wiirimu. (1 Akor. 15:4-8) Masi Yesu aamuulumanne Paulu ukati atthu wahaawehereraaya, narweeleene wiirimu ni unkhala khampa “unavinre ukati.”

Paulu oonihera wiiyeviha ukati wo wuuluma makhalelwaawe. Ahaavo anamasoma aneera wiira moolumo a Paulu anthoonyera wiira uyova kheettottopa. Wakhala wiira iyo phi itthu yaamwiirihile Paulu wuuluma cole, maanaaya wiira uyo ankupali wiira uyo khawamphwanela ukhala apostolu. Uyo aheera: “Thi mi kitepale ukhala oohifayita iriyari wo maapostolu ni khunkiphwanela wiihaniya apostolu, kontha khiholupattha nloko na Nluku. Masi unamaana woonironya wa Nluku uhokiiriha ukhala ntthu kiryaaka nna co.”—1 Akor. 15:9, 10.

Phimaana, pooti waneereehu wiira Paulu oolumacile cole atthunaka kontha (1) aakhanle nkristau nimananna owaakuvyaaca ni ukati wahaawehereraawe ntthu, (2) uyo khanle nkristau unavinre ukati ni (3) khaayoona wiira waanamphwanela ukhala apostolu. Hi khanincuwela sana-saana isiyani Paulu yaapheelaawe uhimya, masi ninaacuwela wiira uyo anlemeliha iwooni ya Yesu yaakhalannyaawe. Ni ahaana isariya yoolemeliha iyo iwooniiyo kontha phi itthu yankupalihale wiira Yesu ahonwelelihiya. Hataa phimaana ukati wowaalalyeera atthu wunwelelihiya wa Yesu, uyo khaahiya uttonkaca iyo iwooniiyo.—Mite. 22:6-11; 26:13-18.