1. Isiyani Yehova inonhiyaawe khula ntthu upanka?

YEHOVA naanihiya uthanla mananna cimpheelaawe ukhala. Uyo naanilakihera mananna oothanla upanka citthu comaana. Ni nathanlaka upanka itthu inontteeliha nrima Yehova, uyo naanikavihera wiira impankeehu ineettele saana. (Isaa. 119:173) Neettelaka ikano comaana co Nuulumo na Nluku, citthu cinhaleehu ulakela upanka cinhala ukhala citthu comaana.—Mabere. 5:14.

2. Nalakelaka upanka itthu, isiyani atthunaka innirika?

² Masi hataa ukhalaka wiira nilakenle upanka itthu yomaana, pooti unirikela umalihera itthu ipacenreehu upanka. Woone matakihero: munna mmirawo naalakela usoma Ibiiblya yotheene. Isumana coopacera, uyo naakhitiri usoma woohihiyerera, masi wahoolo naahiya usoma. Nrokorihu mmoca nalakela wancera uvara nteko weepiyoneeru, masi naphiyaka nihuku naalakenlyaawe wancera, uyo khanancera ni naahiya mahuku yaviraka. Ikhurupu yo mahumu inaalekela wancera waathotola cinene mayamunna owanlokoni wiira yaalipihe, masi uvira waya myeeri cinci, ayo khampanka itthu yaalakenlyaaya. Citthu cotheenennyo cikhanle coovirikana, masi nhina matakihero otheene ihaavo itthu ihinvirikana: atthu otheene khayeettenle itthu yaalakenlyaaya upanka. Makristau oopacera yaakhala uKorintu yahaakhumelela itthu toko ila. Woone isiyani ayo inniitthucihaaya.

3. Isiyani mayamunna akorintu yaalakenlyaaya upanka, masi yaakhumelenle isiyani?

³ Mwaakha wo 55, mayamunna akorintu yaholakela upanka itthu yomaana. Ayo yaanowiiwa wiira mayamunnaaya o Yerusalemu ni o Yuteya yaanaathweeya ni ciicammo yaheewa wiira maloko makiina yaanaacanka wiira akaviheriye mayamunna. Yathoonyeraka unamaana ni unamavaha, mayamunna akorintu yaholakela ucanka wiira yaakavihere ayo mayamunnaayo ni yahonkoha apostolu Paulu isiyani yaalamuliyaaya upanka wiira akavihere. Paulu ahoveleeliha mmalokoni iwarakha caavaha malakihero ni ahonvahacera Titu wiira akavihere waakhela micanko. (1 Akor. 16:1; 2 Akor. 8:6) Masi, uvira waya  myeeri, Paulu ahocuwela wiira mayamunna akorintu nanlelo yaari ahinancera uvaha micanko coolumalyaaya wiira yaanaahala uvaha. Nlattu wo iyo, atthunaka khawaahala ukhala ukati wooveleeliha uYerusalemu micanko co mayamunna akorintu nkhayi ni micanko co maloko makiina.—2 Akor. 9:4, 5.

4. Toko cinthoonyeraaya 2 Akorintu 8:7, 10, 11, isiyani Paulu yaasovenrihalyaawe upanka mayamunna o Korintu?

⁴ Mayamunna akorintu yaholakela upanka itthu yomaana, ni Paulu ahaattottopela nlattu wo waamini woolipa waarinaaya ni unamavaha waya. Masi Paulu ahaana aasovenrihaka umalihera itthu yaalakenlyaa upanka. (Usome 2 Akorintu 8:7, 10, 11.) Itthu yaakhumelenle mayamunna akorintu inaniitthuciha wiira hataa makristau ookhuluvelya pooti waarikela weettela itthu yomaana ilakenlyaaya upanka.

5. Ninhala wakhula makohoni nhina ula mwahoola?

⁵ Toko mayamunna akorintu, pooti unirika weettela citthu cinlakeleehu. Kontha isiyani? Kontha hiiva naatthu oopahuwa ni atthunaka unaanicivelaka upanka citthu cilakenleehu ukati nkhwaawe. Awula pooti unikhumelela itthu yahaaweherereehu ni nlattu wo iyo, pooti uhikhitiri upanka itthu yaalakenleehu. (Ekles. 9:11; Aroo. 7:18) Vano, citthuni cinlamuliyeehu upanka wiira nicuwele wakhala wiira nihaana nirukunusaka awula mena itthu ilakenleehu? Ni isiyani inhala unikavihera umalihera itthu ipacenreehu?

6. Kontha isiyani ukati nkhwaawe nihaana nirukunusaka itthu ilakenleehu upanka?

⁶ Citthu cofayita cikhwaawe cinlakeleehu upanka khaninlamuliya urukunusa. Wootakihera, hiiva niholakela unswalela Yehova ni khaninhala uhiya unswalela. Ciicammo, niholakela uhinhiya ntthu nthenleehu awula nithenle. (Mat. 16:24; 19:6) Masi citthu cikhwaawe cilakenleehu, atthunaka nihaana nirukunusaka. Nlattuni? Kontha makhalelo pooti urukunuwa. Citthuni cinhala unikavihera ulakela ratta citthu coopheela upanka?

7. Isiyani inlamuliyeehu ulepela ukati woolompa, ni nlattuni?

⁷ Ulompe ulepelaka ucuwelaca. Yehova ahonruma Tiyaku wantikha: “Wakhala wiira haavo hirina ucuwelaca, hihiye unlepela Nluku—kontha uyo nawaavaha atthu otheene woohimatthepwa.” (Tiya. 1:5) Otheene cihu, ukati nkiina khaninkhalanaka ucuwelaca. Phimaana, unkhuluvele Yehova wapheelaka ulakela upanka itthu ni ukati woopheela urukunusa itthu ilakenlyaa. Uyo naahala wuukavihera uthanla upanka citthu comaana.

8. Isiyani inlamuliyeehu utotha ucuwela nihinaaya ulakela upanka itthu?

⁸ Utothe ucuwela ratta. Usome Nuulumo na Nluku, ilivuru cinkumiheraaya mphwinko woothotokanihiya wa Yehova ni uwuulumane atthu anhala wuuvaha ikano comaana. (Miru. 20:18) Ikhanle itthu yofayita cinene utotha ucuwela uhinaaya ulakela upanka citthu cuulupale, toko uhiya nteko unvaraa wiira wancere uvara nteko nkiina, uthamela nipuro nikiina awula uthanla ikuurusu yoohala usoma inhala wuukavihera uphwanya ipooso ni uhihiya unswalela Yehova.

9. Kontha isiyani ukati woolakela upanka itthu, weeva khunlamuliya wiithepya?

⁹ Wuupewele nlattuni umpheelaa upanka itthu. Yehova khanwacera paahi citthu cinlakeleehu upanka, masi uyo ciicammo naawacera nlattuni ulakenleehu upanka itthu. (Miru. 16:2) Uyo mpheela wiira hiiva nikhale ookhuluvelya nhina citthu cotheene. Phimaana, ukati woolakela upanka itthu, uhiithepye ni uhaathepye akhwaa. Wiikohe co: ‘Nlattuni ulakenlyaaka upanka ila itthwiila?’ Naahikhaleke ookhuluvelya, atthunaka unaahala unirika weettela itthu ilakenleehu. Wootakihera, munna mmirawo atthunaka holakela wancera uvara nteko weepiyoneeru owiicaaverya. Masi wahoolo, uyo nawancera uhikhitiri upiihera iwoora cimpheeliya ni uyo ntekooyo unawanca uhintteeliha nrima. Uyo mmirawooyo atthunaka oopuwenle wiira mpheela ukhala piyoneeru nlattu woopheela untteeliha nrima Yehova. Masi pooti ukhala wiira khweeliini, uyo apheela ukhala piyoneeru nlattu  woopheela waaciveliha asithumwaane awula ntthu nkiina nontikhinacaawe.

10. Wiira ntthu akhitiri urukunusa makhalelwaawe, isiyani inlamuliyaawe upanka?

¹⁰ Umuupuwele ciicammo ntthu nsoma Ibiiblya lakenle uhiya unlya sikaro. Wuupaceroni, hataa unrikaka, uyo naakhitiri ukhala isumana imoca awula piili woohinlya sikaro. Masi wahoolo uyo naaturuwela unlya. Wanihukuni, uyo naakhitiri uhiya unlya sikaro! Unfenta ni upheela untteeliha nrima Yehova phi citthu cinkavihenre uyo ukhitiri uhiya unlya sikaro.—Akol. 1:10; 3:23.

11. Nlattuni unlamuliyaa wiihelela mipika ukati woolakela upanka itthu?

¹¹ Wiihelele mipika. Weehelelaka mipika, khunhala wuurika umalihera itthu ipacenryaa. Wootakihera, atthunaka weeva uholakela usoma Ibiiblya khula nihuku. Masi waahipankeke iporokaraama yoohala utthara, athunaka khunhala ukhitiri upanka impheelaa. * Wuupuwele ntakihero nikhwaawe: mahumu o wanlokoni aholakela waathotola imara cinci mayamunna o wanlokoni wiira yaalipihe. Masi wahoolo, ayo khampanka itthu ilakenlyaaya. Wiira akhitiri weettela itthu ilakenlyaaya, mahumu ahaana yiikohaka: “Niireke ninawaacuwela mayamunneehu ni asirokorihu ampheela uthotoliya? Niireke nihothanla nihuku ni iwoora yoorwaa waathotola?”

12. Isiyani atthunaka weeva inlamuliyaa upanka, ni nlattuni?

¹² Wuupuwele isiyani khweeliini inhalaa ukhitiri upanka. Khaavo ntthu nkhitiri ukhalana ukati ni ikuru wiira panke citthu cotheene cancivenle upanka. Phimaana, wuupuwele isiyani khweeliini inhalaa ukhitiri upanka. Woonaka wiira uholakela itthu ihinhalaa ukhitiri upanka, atthunaka uhaana urukunusaka itthu ilakenlyaa. (Ekles. 3:6) Vano, wuupuwele wiira weeva uhowehacera ratta itthu yaalakenlyaa, uhopanka marukunuso yaapheeliya ni uhoona wiira pooti upanka itthu ilakenlyaa. Isiyani inhala wuukavihera umalihera itthu ipacenryaa? Woone citthu thanu.

13. Isiyani inlamuliyaa upanka wiira ukhitiri ukhalana ikuru coohala wuukavihera upanka itthu ilakenlyaa?

¹³ Ulompe ulepelaka ikuru. Nluku pooti wuuvaha ‘ikuru wiira ukhitiri upanka’ itthu ilakenlyaa. (Afili. 2:13) Ulepele wiira nnepa wowaarya wa Yehova wuuvahe ikuru cimpheelaa. Ni woonaka wiira nivekelo naa ninaapica waakhuliya, uhihiye ulompa. Toko Yesu ciiralyaawe: “nhihiyerere ulepela [nnepa wowaarya], ni nnaahala uvahiya.”—Luka 11:9, 13.

14. Ikano imphwanyannya nlivuruni yo Miruku 21:5, manannani cinhalaaya wuukavihera weeva upanka itthu ilakenlyaa?

¹⁴ Wiitthenkace. (Usome Miruku 21:5.) Wiira ukhitiri upanka khula nteko, weeva uhaana wiitthenkacaka ni upanka khampa ciitthenkacalyaa. Inanna imoca, walakelaka upanka itthu, wantikhe citthu cotheene cinhalaa upanka wiira ukhitiri ilakenlyaa. Wakhala wiira itthu impheelaa upanka ikhanle yuulupale ni yoorikarikaca, umananihe ukawaniha wiira upanke vakaani-vakaani. Commo, khunhala wuurikela uvara uyo ntekooyo ni unaahala woona wiira uri mookhitiri upanka itthu ilakenlyaa. Wootakihera, Paulu ahowiirela makristau akorintu wiira, “nihuku noopacera no khula isumana,” yeese mphanttyaayaru nsurukhu woohala ucanka. Ayo manannaayo, ukati Paulu waahalaawe uwa, khawaahala ukhala nteko mwinci wowaakhelela micanko cotheene weemara imoca. (1 Akor. 16:2) Ukawaniha nteko muulupale wiira upanke vakaani-vakaani, ciicammo unaahala wuukavihera weeva wiira uhooceele itthu ilakenlyaa nlattu wowoona ukhala yuulupale.

15. Ukati wowiitthencaka, isiyani inlamuliyaa upanka?

¹⁵ Ukati wowiitthencaka, wantikhe citthu cinhalaa upanka. Iyo inaahala wuukavihera upanka citthu cilakenlyaa. (1 Akor. 14:40) Wootakihera, mahumu ahaakhela nlakihero ninhimya wiira ukati unthukumanaaya, ahaana yanthanlaka humu  mmoca wiira antikhe citthu cinhalaaya ulakela. Humu nthanliya, naamwantikha tipani vahaceriye uvara nteko mahumu ulakenlyaaya ni ciicammo nawantikha ukati unlamuliyaawe umaliha uyo ntekooyo. Mahumu yattharaka malakihero otheennyaala, anaakhitiri upanka itthu inlakelaaya. (1 Akor. 9:26) Umananihe upanka itthu imocaaru ni citthu cinlakelaa upanka. Wootakihera, wantikhe citthu cotheene cimpheelaa upanka nihuku nimoca. Upacere wantikha citthu cinhalaa wancera upanka, vano wantikhe citthu cinhalaa umalihera. Iyo inaahala wuukavihera umalihera itthu ipacenryaa, ni ciicammo inaahala wuukavihera upanka citthu cinci uwakati vakaani.

16. Itthuni yofayita ninlamuliyeehu upanka wiira neettele itthu ilakenleehu, ni ikano ihimiye nhina Arooma 12:11 inthoonyera cani iyo?

¹⁶ Wiikurumice. Uhaana wiikurumica wiira utthare itthu yantikhalyaa ni wiira umalihere ipacenryaa. (Usome Arooma 12:11.) Paulu ahomwiirela Timotiyu wiira ‘hihiye wiikurumica usoma’ ni wiira hihiye wiikurumica ukhala mwiitthucihi omaana. Hiiva pooti weettela iyo ikwannweeyo nalakela upanka khula itthu yoominepani.—1 Tim. 4:13, 16.

17. Efesu 5:15, 16 inhala unikavihera cani upanka citthu cilakenleehu?

¹⁷ Uvarele nteko ratta ukatyaa. (Usome Efesu 5:15, 16.) Uthanle nihuku ni ukati woohala upanka itthu ilakenlyaa ni uhirukunuse nihuku ni ukati uthanlalyaa. Uhiwerere wiira unaahala uphiya ukati womaana woohala upanka itthu ilakenlyaa. Uyo ukatyuuyo pooti uhiphiya-tho. (Ekles. 11:4) Ratta! Uhihiye citthu coohifayita carihakacaka ukati ni ikuru caahalaa uvarela nteko wiira upanke citthu cofayita. (Afili. 1:10) Wakhitiri, upanke citthu cikiina cilakenlyaa ukati unoonaa wiira khiivo itthu inhala wuuhiiha. Waahimyere atthu akiina wiira, uyo ukatyuuyo, weeva unkhala ni nteko. Unttipihe telefoonnyaa ni uhitthukule e-mail caa awula uwuulumana akhwaa mwinternetini uyo ukatyuuyo. *

18-19. Isiyani inhala wuukavihera uhooceela upanka itthu ilakenlyaa hataa waphwanyaka citthu cowuuttiyelela?

¹⁸ Wuupuwele citthu comaana cinhala wuukhumelela wamalihaka upanka ilakenlyaa. Citthu cinhala wuukhumelela nlattu wo itthu ilakenlyaa upanka cinkhala toko uphiya nipuro ninrwaa wakhalanaka nkwaha. Weeva wapheelaka wiira khweeliini uphiye nipuro ninrwaa, uhaana weettaka woohituruwela uttuli, hataa ukhalaka wiira iphiro inttharaa inoottiyeleliya ni uhaana uviraka iphiro ikiina yowuupiiha nipuro ninrwaa. Inanna imoca, waweheehaka citthu comaana cinhala wuukhumelela nlattu wo itthu ilakenlyaa, weeva khunhala waakuva wooceela waphwanyaka itthu yowuuttiyelela awula yoopheela wuuviriha iphiro ikhwaawe.—Akalas. 6:9.

¹⁹ Uthanla upanka citthu comaana ni weettela, ikhanle itthu yoorika. Masi ukaviheriyaka ni Yehova, weeva pooti ukhalana ucuwelaca ni ikuru cimpheelaa wiira ukhitiri umalihera itthu ipacenryaa!