MWAHA WOOSOMIYA 35
Mwaalemelihe mayamunna owuuluvala
“Ipwii cinkhala nttitthimiho.”—MIRU. 16:31.
NCIPO 138 A Beleza dos Cabelos Brancos
NINHALA WIITTHUCANI? *
1-2. a) Khampa cinoolumaaya Miruku 16:31, ninlamuliya waawehera cani mayamunna owuuluvala? b) Makohoni anhala waakhuliya nhina ula mwahoola?
IPUWA imoca yo Arkansas, ilapo yo Estados Unidos, ihaavo itthaya ihinrika uphwanyiya maluku oopharela cinene aneehaniya idiamante. Masi ukhala wiira ayo malukwaayo ari niitthaya caya ni khanakukhutthaciya wanooneelaaya, atthu enci pooti uvira waryaaya woohiwacera.
2 Mayamunneehu owuuluvala ari toko ayo malukwaayo; ahaana ifayita cinene. Nuulumo na Nluku nineera wiira ipwii caya nikhanle nttitthimiho. (Nsome Miruku 16:31; * 20:29) Ayo hataa yakhalanaka ifayita cinene, atthu enci pooti uhoona ifayita irinaaya. Mayamunna amirawo anoona irinaaya ayo mayamunnaayo pooti uwiitthucera citthu comaana cinene uvikana nhakhu urinaaya maluku oopharela. Nhina ula mwahoola, anaahala waakhuliya makoho mararu: Kontha isiyani Yehova naawoona ukhalana ifayita ayo mayamunna owuuluvalaayo? Kontha isiyani ayo mayamunnaayo ahaana ifayita cinene nhina mphwinko woothotokanihiya wa Yehova? Ninhala uwiitthucera cani ayo mayamunnaayo?
KONTHA ISIYANI YEHOVA NAAWOONA UKHALANA IFAYITA MAYAMUNNEEHU OOKHULUVELYA YUULUVANLE?
Mayamunna owuuluvala ahaana ifayita cinene uhoolo wa Yehova ni iriyari waapoovwaawe (Nwehe iparaagarafu 3)
3. Toko cinoolumaaya Isaalimu 92:12-15, kontha isiyani Yehova naawoona ukhalana ifayita mayamunna owuuluvala?
3 Yehova anancivela cinene mayamunna owuuluvala. Uyo naakhitiri woona itthu irinaaya wanrimani waya, naacuwela ni anancivela makhalelwaaya omaana. Yehova unancivela cinene uwoona mayamunna owuuluvala yaaphwanyihaka mayamunna amirawo ucuwelaca utthonkomanihalyaaya myaakha cotheene cikhanlyaaya yanswalelaka Yehova. (Jó 12:12; Miru. 1:1-4) Yehova ciicammo nawoonela ukhalana ifayita uvilela waya. (Mal. 3:16) Makhalelo o mayamunneehu owuuluvala khayaari omaana ukati wotheene. Masi hataa ukhalaka commo, umwaamini waya Yehova khuvukuwale. Niweherero nirinaaya noohoolo ninaatepa ulipa nna va, uvikana ukati weetthucalyaaya ikhweli ca Nluku. Ni Yehova nawaafenta cinene, kontha “hataa yuuluvalaka”, khanhiya wuuluma ncina nawe.—Nsome Isaalimu 92:12-15. *
4. Isiyani inhala waapisiha nrima mayamunneehu owuuluvala?
4 Mwakhala wiira nyuuva nhanca wuuluvala, mweese wanrimani wiira Yehova nanlelo nawuupuwela itthu yotheene impankenleenyu mpaka ilelo. (Mabere. 6:10) Nyuuva khanhiile uvara nteko woolalya ihapari ninrimeenyu wotheene, ni iyo inkhala itthu inaatteeliha nrima cinene Apaapeehu o wiirimu. Nyuuva khanreere waanana masakha—hataa ni ale ootepa urikaale. Nheettela ni nhaakihera mattharelelo omaana o mbiiblyani. Nheerannyeeha miteko cuulupale civahaceriyeenyu wamphwikoni woothotokanihiya wa Yehova ni nhaafuntta akhunaninyu. Nyuuva khanhiile upanka ile yotheene inkhitiriinyu wiira nttharihelele marukunuso apankiye mumphwinkoni woothotokanihiya wa Yehova. Ciicammo, nhaakavihera ni nhaakurumica ale aneevaherera ukati wotheene uvara nteko wa Yehova. Ukhuluvelya winyu unaavira wuunuwihaka nifento nirinaawe Yehova ni nyuuva. Uyo naakhuluveliha wiira khanhala ‘waannyanyala ale anontthunela’! (Isaa. 37:28) Ni Yehova nawaakhuluveliha mayamunneehu owuuluvala, co: “Mpaka ikharari cinyu cinhalaaya utathuwa ipwii, mi akinhala uhiya wuuwacerani.” (Isai. 46:4) Phimaana, nhuupuwele wiira nlattu wo wuuluvala, khanrina-tho ifayita mumphwinkoni woothotokanihiya wa Yehova. Khweeliini, nyuuva nhaana ifayita venci cinene!
MIYAMUNNA OWUULUVALA AHAANA IFAYITA CINENE MUMPHWINKONI WOOTHOTOKANIHIYA WA YEHOVA
5. Isiyani mayamunna owuuluvala ihinlamuliyaaya uliyala?
5 Miyamunna owuuluvala khamalana itthu yoopheela uvaha. Khweeli, nna va kharina ikuru toko khalayi. Masi uvira waya myaakha cinci, nna va khamalana itthu yooreera wiitthuciha. Nanlelo ayo pooti unvarela nteko Yehova nimananna oovirikana. Iyo phi itthu inhaleehu woona nhina matakihero aatthu okhalayi ni ophiyaaru anhaleehu uwoopela mwaha.
6-7. Matakiheroni aatthu owuuluvala ahimiye mbiiblyani yaatthuveliye nlattu wo ntekwaaya wookhuluvelya?
6 Nhina Ibiiblya, hiiva pooti uphwanya matakihero omaana aaswali ookhuluvelya a Yehova yahaahiile uvara miteko cawe hataa yuuluvalaka. Wootakihera, Moceesi aarina myaakha 80 waapacenryaawe uvara nteko weeporofeeta a Yehova ni waahoolela asarayeli. Porofeeta Daniele aahookhalanaru myaakha 90, Yehova khaahiile umpanka porofeetaawe. Ni pooti ukhalaka wiira apostolu Joau aarina myaakha 90 ukati waarumiyaawe wantikha ilivuru yo Apokalipise.
7 Khamala aswali ookhuluvelya a Yehova ahinoolumiya cinene mbiiblyani, ni atthunaka nlattu wo iyo itthwiiyo, ayo yaanaavikaniya nlattu woohooniya ifayita yaarinaaya. Masi Yehova aanaawoona ni ahaatthuvela nlattu wookhala atthu ookhuluvelya. Ibiiblya khimmuuluma venci nlopwana mmoca owuuluvala eettela isariya ni aamini cinene. Masi Yehova aanancuwela sana-saana ni ahonvaha iparakha yoomoona Yesu nayaryeele ni upanka inatiri yaamuuluma Yesu ni yaawuuluma anumwaane. (Luka 2:22, 25-35) Muupuwele ciicammo ntakihero naapwiyawe Ana, yaavara nteko weeporofeeta. Hataa yakhalanaka myaakha 84, pooti waneereehu wiira khayaahaleela nanka nkutthaano. Ibiiblya ineera wiira ayo apwiyaawaayo khanivo nihuku naahaleelaaya urwaa utempulu. Phimaana Yehova ciicammo ahaavaha iparakha yuulupale yoomoona mwaana aayaryeele avahiyaka ncina na Yesu. Coo, wanawoonannya wiira Yehova aanaawoona apwaapwaawe yeehaniya Simeau ni apwiyawe Ana ukhalana ifayita.—Luka 2:36-38.
Arokorihu Lois nna va arina myaakha 80, masi nanlelo ananswalela Yehova (Nwehe iparaagarafu 8)
8-9. Ntakiheroni ninthoonyera wiira miyanuunwiihu anankhweli ahaana ifayita cinene mumphwinkoni woothotokanihiya wa Yehova?
8 Ilelo, miyamunneehu enci owuuluvala ankhala ntakihero nomaana naamirawo. Moone ntakihero naarokorihu Lois Didur. Ayo yancenre uvara nteko weepiyoneeru owiivaherera u Canadá, waarinaaya myaakha 21. Wahoolo, ayova nkhayi naawanuwaya, John, yaheevaherera myaakha cinci uvara nteko wo mootoli osirikwiitu. Nuuwakatyaaya, ayo yaahovara nteko u Peteli yo Canadá myaakha 20. Arokorihu Lois waarinaaya myaakha 58, ayova nkhayi ni awanuwaya yaholattuliya urwaa uvara nteko wa Yehova u Ucrânia. Isiyani yaawiirale wanrimani waya? Niireke yoopuwenle co: ‘Hi nihooluvala cinene wahinlamuliyeehu-tho urwaa ilapo ikhwaawe’? Mena. Ayo yahotthuna ulattuliya. Awanuwaya yahovahaceriya upanka mphantte Ikhurupu yo Mahumu Anhoolela Ipeteli yo Ucrânia. Uvira waya myaakha saapa, ayo yahokhwa, masi arokorihu Lois yaholakela uhihiya unswalela Yehova ile ilapweele. Ilelo, urinaaya myaakha 81, arokorihu Lois nanlelo ari monswalela Yehova u Peteli yo Ucrânia ni atthu otheene nwo u Peteli nwo, anaaciveliya cinene naayo.
9 Miyanuunwiihu anankhweli, toko arokorihu Lois, atthunaka khantepa uwaceriya toko caawaceriyaaya uwakati waaryaaya akumi asiwanuwaya. Masi ukhala waya anankhweli khunwukula ifayita irinaaya. Ayo asirokorihwaayo khanreera waakavihera asiwanuwaya myaakha cinci ni mpanka nna khanhiya unswalela Yehova ninrimaaya wotheene. (1 Tim. 5:3) Unawoonannya nlattuni Yehova unwoonaawe ayo ukhalana ifayita cinene. Ni ayova ciicammo akhanle ntakihero nomaana ninaakurumica amirawo.
10. Ntakiheroni nomaana amunna Tony ninnivahaaya?
10 Miyamunna enci owuuluvala ni ookhuluvelya ankhala mmanupani unwaceriya atthu owuuluvala, ciicammo akhanle nhakhu muulupale iriyari yaaswali a Yehova. Wootakihera, amunna Tony ankhala nipuro ninwaceriya atthu owuuluvala. Ayo amunnaayo apattisiye ilapo yo Pensilvânia, u Estados Unidos, mweeri wo Agosto wo 1942 waarinaaya myaakha 20. Woohipica, ayo amunnaayo yahotthukeliya myaakha miili ni nuusu nlattu woohitthuna wiina itoropa. Ayova ni amwaaraya, Hilda, ahowuunuwiha asaanaaya eeli ni waakavihera ukhala aswali a Yehova. Ukati waaviraaya nnyo myaakhannyo, amunna Tony yahovahaceriya waahoolela mahumu mmalokoni mararu ni ukhala nhooleli o nthukumano wosirikwiitu. Ayo amunnaayo yahopanka mikutthaano ni uwiitthuciha Ibiiblya atthu yaatthukeliye nkhatteya. Nna va urinaaya myaakha 98, amunna Tony khanoopuwela hataa vakaani unyonyweela nteko unvaraaya. Nanlelo anawiikurumica upanka ile inkhitiryaaya wiira answalele Yehova nkhayi ni miyamunnaaya wanlokoni.
11. Manannani anlamuliyeehu waathoonyera mayamunneehu owuuluvala ankhala mapuro anwaceriya atthu owuuluvala wiira ahaana ifayita?
11 Ninhala waattitthimiha cani mayamunneehu yuuluvanle ankhala mapuro anwaceriya atthu owuuluvala? Wakhitirya, mahumu pooti waavahacera miteko cinvariya wanlokoni. Hiiva otheene pooti uthoonyera waawacera nawootolaka awula naalikarelaka nivarelaka nteko ivideochamada. Wakhalaka wiira ahaavo amunneehu owuuluvala ankhala nipuro ninwaceriya atthu owuuluvala uttalivanne ni nloko naya, nihaana naakuvelaka waawacera. Kontha naahaakuveke waawacera, hiiva pooti waaliyala ayo mayamunneehwaayo. Mayamunneehu enci owuuluvala, pooti ukhalaka wiira anoopuwela wiira khanlamuliya woopela mwaha citthu caya. Masi hiiva naakohakohaka, ayo unaahala waacivela unittonkacera citthu cowaatteeliha nrima ciwiirannyenle myaakha cinvirihaaya anari wamphwinkoni woothotokanihiya wa Yehova. Ihantisi cinhalaaya unittonkacera ayo, pooti unitteeliha nrima ni unikurumica.
12. Mayamunnaani hiiva atthunaka anhaleehu waaphwanya wanlokoni wihu?
12 Atthunaka wanlokoni wihu pooti uphwanyannyaaka mayamunneehu owuuluvala anhaleehu upheela waatakihera. Arokorihu Harriette o wanlokoni no Nova Jersey, u Estados Unidos, ahoviriha myaakha cinci yanswalelaka Yehova. Nuuwakatyaaya, ayo yahokhuma nno nlokonno wiira yakhale nkhayi ni mwaamwanaya. Miyamunna o wanlokoni naathamenlyaaya yahokumiha ukati wiira yaacuwele saana, ni upanka waya commo, yahokhitiri woona wiira ayo yaari nhakhu muulupale. Arokorihu Harriette yahaattonkacera mayamunna ihantisi cinci co mananna caalalennyaaya ihapari mwaakha wo 1925, uwakati ayova weetthucalyaaya ikhweli ca Yehova. Uyo uwakatyuuyo, ayo yeerwaaka wuulalyeerani yahaana nacisaka nsuwakhi munrupani waya wiira yakhuure uyo nsuwakhyuuyo wakhalaka wiira yanhala uthukeliyaka nkhattya. Khweeliini, ikwaha piili mwaakha wo 1933, ayo yahotthukeliya nkhattyaa isumana imoca. Nnyo imaara piilinnyo, awanuwaya yahaari Saahiti a Yehova ni yaakavihera, yahohala yaawaceraka asaanaaya araru. Khweeli, miyamunna ni asirokorihu ookhuluvelya toko Harriette, unaareera uwoonihera ihisima.
13. Nuupuwelaka ifayita irinaaya mayamunneehu owuuluvala mumphwinkoni woothotokanihiya, isiyani ineetthuceehu?
13 Miyamunna ni miyanuunu owuuluvala ahaana ifayita cinene mumphwinkoni woothotokanihiya wa Yehova. Ayo ahoona nimeethwaaya manannani Yehova citthuvenlyaawe mphwinkwaawe woothotonkanihiya ni mananna ayova citthuveliyaaya. Ciicammo, ayo yahokhalana ukati wo weemela ni wuupuwela citthuni khalayi caapankilyaaka pusya nna va cinlamuliyaaya urehererya. Phimaana, mwaawehere ayo mayamunnaayo khampa atthu oocuwelaca. Nwiitthucere citthu comaana ayova atthonkomanihalyaaya myaakha cinci yanswalelaka Yehova. (Miru. 18:4) Mwakumihaka ukati wiira mwaacuweleehe saana, waamini winyu unaahala uvira utepaka ulipa ni nyuuva nnaahala ukhala nwiitthuceraka ukati wotheene.
NWIITTHUCERE MAYAMUNNA OWUULUVALA
Elisewu ahokaviheriya cinene waavirihalyaawe ukati nkhayi ni Eliyasi. Inanna imocaaru, ilelo hiiva pooti wiitthucera cinene citthu comaana caakhumelenle mayamunna yancenre unswalela Yehova khalayi (Nwehe iparaagarafu 14-15)
14. Nikurumiconi nimphwanyeehu nlivuruni ya Deuteronomiyu 32:7?
14 Nkumihe ukati wiira nwoopane mwaha mayamunna owuuluvala. (Nsome Deuteronomiyu 32:7. *) Ayo pooti ukhala wiira nna va khanoona ratta ni kharina-tho ikuru wiira akhitiri wuuluma ni weetta ratta. Masi nrimaaya nanlelo weemirawo ni ayo ahokhitiri wiipankela “ncina nomaana” uhoolo wa Yehova. (Ekles. 7:1) Muupuwele khula nkwaha nlattuni Yehova unwoonaawe ukhalana ifayita cinene ayo mayamunnaayo. Nhihiye waatafiti ayo mayamunnaayo niihisima. Mpanke toko Elisewu. Uyo ahokhanyerera ukhala mphantte wa Eliyasi nihuku noomalihera naahalaaya ukhalakhala nkhayi. Imaara tthaaru ahomwiirela Eliyasi co: “Akinoohiyani.”—2 Mam. 2:2, 4, 6.
15. Isiyani inlamuliyeenyu waakoha mayamunna owuuluvala?
15 Mwaakohakohe citthu comaana mayamunna owuuluvala. Mwapankaka commo, nyuuva nnaahala uthoonyera wiira nnawaawacera. (Miru. 1:5; 20:5; 1 Tim. 5:1, 2) Nyuuva pooti waakoha co: “Ukati waariinyu mmirawo, isiyani yuukupalihaleni wiira nhophwanya ikhweeli ca Nluku caatotheenyu?” “Ciitthu cuukhumelenleni cuukavihenreni cani utepa umpatthanana Yehova?” “Isiyani yookavihenreni uhihiya unswalela Yehova wuutteelakani nrima?” (1 Tim. 6:6-8) Vano, mwaaviriyane saana ukati wowuuttonkacerani ihantisyaaya.
16. Mayamunna owuuluvala ni amirawo yoopacaka mwaha nkhayi itthuni yomaana inhala waakhumelela?
16 Mayamunna owuuluvala ni mayamunna amirawo yoopaka mwaha, otheene anaakhala oolipihiya. (Aroo. 1:12) Mayamunna amirawaayo anaatepa ukhuluvela wiira Yehova nawaawacera atthu ookhuluvelya ahinhiya unswalela, ni mayamunna owuuluvala anawiicoona ufentiya ni mayamunna amirawo. Mayamunneehu owuuluvala unaahala waacivela venci wuuhimyerani nyuuva amirawo inanna Yehova caatthuvenlyaawe muukumini waya.
17. Nlattuni uneereehu wiira mayamunneehu yuuluvanle anaavira yatepaka ureera ukati unkhalaaya yuuluvalaka?
17 Apinaatamu ukati unviraaya yuuluvalaka, ureera waya unaavira. Masi atthu ookhuluvelya ahinhiya unswalela Yehova anaavira yatepaka ureera uhoolo wawe. (1 Atesal. 1:2, 3) Kontha isiyani? Kontha myaakha cotheene civinre, ayo ahohiya nnepa wowaarya wa Nluku ureerihaka makhalelwaaya awula waakaviheraka uthoonyera makhalelo omaana. Ukati unvireehu nitepaka waacuwela mayamunneehu ni asirokorihu owuuluvala, ninaatepa uwiitthucera ni ninaatepa woona wiira ayo khweeliini akhanle nhakhu muulupale!
18. Isiyani inhaleehu wiitthuca nhina mwaha nkiina unhaleehu usoma?
18 Nloko neekristau ninaakhala noolipa cinene mayamunneehu amirawo yaalemelihaka mayamunneehu owuuluvala. Masi ciicammo ninaatepa ulipa wakhala wiira mayamunneehu owuuluvala anawaalemeliha amirawo. Nhina mwaha nkiina unhaleehu usoma, ninaahala woona manannani mayamunneehu owuuluvala cinlamuliyaaya uthoonyera wiira anawaalemeliha amirawo wanlokoni.
NCIPO 144 Pensa nas Bênçãos de Jeová
^ par. 5 Miyamunneehu owuuluvala ahaana ifayita cinene. Ukati unhaleehu ukhala niitthucaka ucuwelaca ni citthu ciwiirannyenle ayo mayamunnaayo, ula mwahoola unaahlaa wuncerera nifento ni ihisima irineehu ni ayo mayamunneehwaayo. Ula mwahoola ciicammo unaahala waakavihera ayo mayamunnaayo woona manannani cirinaaya ifayita cinene nhina mphwinko woothotokanihiya wa Yehova.
^ par. 2 Miruku 16:31 Ipwii cinkhala nttitthimiho wakhalaka wiira ale arina anaweettela isariya ya Nluku.
^ par. 3 Isaalimu 92:12 Masi ale aneettela isariya anaahala uphuwa khampa nkole ni anaahala wuunuwa khampa mwiri wo Líbano uneehaniya iseeturu. 13 Ayo anaaliya ipuwa ya Yehova; amphuwa nhina ipuwa ca Nlukwiihu. 14 Hataa wanhalaaya wuuluvala, anaahala wiimiha mihokorokho cinci; anaahala ulipa cinene ni uwinciva ukumi, 15 yansipaka Yehova wiira Nluku nasariya. Uyo mwalaaka, ni khanhiya uthoonyera isariya.
^ par. 14 Deuteronomiyu 32:7 Wuupuwele uwakati wokhalayi; uwacerere myaakha caatthu okhalayi. Waakohe athumwana, ni ayo anaahala wuuttonkacera, waakohe mahumu ari iriyaryaa, ni ayo anaahala wuuhimyacera.
