MWAHA WOOSOMIYA 39
Ntthu nonfenteehu ahiyaka unswalela Yehova
“Nyuuva khanreere . . . unriipiha nrima ikwaha cinci!”—ISAA. 78:40.
NCIPO 102 Ajuda Os QueEstão Fracos
NINHALA WIITTHUCANI? *
1. Atthu enci aneecoona cani mmucyaaya akumihiyaka wanlokoni?
NYUUVA nhaana mmuciinyu awula mpatthaniinyu kumihiye wanlokoni? Iyo inkhala itthu inwerya cinene! Arokorihu aneehaniya Hilda aneera: “Ukati awannyaka waakhwilyaaya nahoviriha myaakha 41 ninathelanne, phimaana wahokiwenrya nrima cinene. * Masi umoona mwanaka mmoca anhiyaka Yehova, aahiyaka amwaarawe ni aasaanaawe, phi itthu yaatepile ukiwerya wanrimani.”
Yehova naacuwela itthu inniira mmuciihu awula mpatthaniihu ahiyaka weettela ikhweeli (Nwehe iparaagarafu 2-3) *
2-3. Toko cinthoonyeraaya Isaalimu 78:40, 41, Yehova nokhalaka cani aswalyaawe yanhiyaka?
2 Vano muupuwele inanna Yehova caakhanlyaawe ooriipiya nrima ukati waawonnyaawe amucyaawe, awula malayikha, yamweesaka ittuli! (Yuda 6) Ni muupuwele inanna canripilyaaya nrima ukati waawonnyaawe apoovu yaafentaawe, asarayeli, yanrukunuwelaka ikwaha cinci. (Nsome Isaalimu 78:40, 41. *) Phimaana, nkupali wiira mmuciinyu awula mpatthaniinyu ahiyaka weettela ikhweeli, Yehova ciicammo naakhala ooriipiya nrima venci. Apaapeehu o wiirimu anaacuweleeha inanna nyuuva cinooriipaayani nrima nlattu woowiirannyeelani iyo itthwiiyo. Nkhuluvele wiira Yehova naahala wuulipihani ni wuukaviherani.
3 Nhina ula mwahoola, ninaahala wiitthuca isiyani ninlamuliyeehu upanka wiira Yehova anikavihere. Ciicammo, ninaahala woona mananna o waakavihera akhwiihu wanlokoni yaakhumelenle iyo itthu yoorikeeyo. Masi nihinaaya woopela mwaha nnyo citthunnyo, nttwee noone moopuwelo anlamuliyeehu unyema.
NHIICOOTHERIHE
4. Ayari enci aneecoona cani mwanaya anhiyaka unswalela Yehova?
4 Ikwaha cinci, mwaana ahiyaka unswalela Yehova, ayari pooti wancera wuupuwela wiira mwanaya hiile unswalela Yehova kontha ayo khayiikurumicile unkavihera. Amunneehu aneehaniya Lucas waakumihiyaawe mwanaya wanlokoni, aneera co: “Koopuwelaka wiira thi mi kaarina ikuulupa. Koopuwelaka iyo itthwiiyo, ikhove khacaakiciva. Ukati nkiina, mi kaamakela wunla ni wankiwerya nrima cinene.” Arokorihu yaakhumelenle iyo itthwiiyo aneehaniya Elisabeti yaaneehukhumu ikwaha cinci ni yuupuwela co: “Atthunaka ihaavo itthu ivonyalyaaka. Mi kinoona wiira akiikurumicile umwiitthuciha mwanaka unfenta Yehova.”
5. Ntthu ahiyaka unswalela Yehova, niireke haavo nolamuliyeehu unromola wiira phinhiihile? Ntaphulele.
5 Khaninlamuliya uliyala wiira Yehova honvaha utaphuwa khula ntthu. Iyo maanaaya wiira khula ntthu pooti uthanla umwiiwelela awula mena. Wootakihera, ahaavo amirawo ahikurumiciye naasithumwanaya unvaresesa Yehova; masi ayo ahothanla veekha caya unswalela. Ni amirawo akiina asithumwanaya aheekurumica cinene uwiitthuciha mattharelelo o mbiiblyani. Masi hataa ukhalaka commo, ayo amirawaayo wuunuwa waya, ahonhiya Yehova. Iyo itthwiiyo inthoonyera isiyani? Inthoonyera wiira khula ntthu phinlakela unswalela Yehova, awula mena. (Jos. 24:15) Phimaana, wakhala wiira nyuuva mwaayari ni unawuuriipani nrima nlattu mwaninyu wonhiya Yehova, mweese wanrimani ila itthwiila: kahi thi nyuuva; mwaninyu phithanlile uhiya unswalela Yehova. Yoophwanyakani moopuwelo owiira mwaninyu hiile unswalela Yehova nlattu wawinyu, nkumihe mmuru winyu ayo moopuwelwaayo wowaakuvyaaca!
6. Asaana akhanlaka cani athumwanaya awula anumwanaya yanhiyaka Yehova?
6 Ukati nkiina, pooti ukhalaka wiira nyari naahiya unswalela Yehova ni mpaka waahiya amucyaawe ni uthama wapuwani. (Isaa. 27:10) Iyo itthwiiyo pooti waawereeha nrima cinene asaana, kontha ikwaha cinci asaana anaatakiha asithumwanaya. Nrokorihu neehaniya Ester naahimya inanna caakhanlyaawe ukati athumwaane waakumihiyaaya wanlokoni. Uyo neera: “Ikwaha cinci mi kaamakela wunla paasi kontha apaapa ukumihiya waya wanlokoni yenre wiira khayaahala uhituruwela-tho unswalela Yehova. Mi anaakicivela venci apaapa. Phimaana, ukati waakumihiyaaya wanlokoni, mi kaanaasankaka kiikohaka wakhala wiira yahaavo salaama nipuro naaryaaya. Mi kaakhala ukiriipaka nrima ukati wotheene.”
7. Yehova nonwehera cani mmirawo rina athumaane awula anumwaane ahiile unswalela?
7 Amirawo, athumwaninyu awula anumwaninyu yahiyaka unswalela Yehova, hi ciicammo unaaniriipa nrima venci! Nkupali wiira Yehova naacuwela sana-saana inanna cineecooneenyu. Yehova nawuufentani ni unancivela cinene uwoonani nhihiyaka unswalela. Ni hiiva nikhanle mayamunneenyu ni asirokorinyu o wanlokoni ciicammo unaanitteela nrima nawoonakani nhihiyaka unswalela Yehova. Ni muupuwele wiira kahi thi nyuuva mwaapankihale asithumwaninyu uhiya unswalela Yehova. Khampa ciitthucaleehu, Yehova nanhiya khula ntthu uthanla unswalela awula mena. Khula ntthu eevaherenre wa Yehova ni pattisiye “nhala ucisa nrinttyaawe.”—Akalas. 6:5, niwehero.
8. Isiyani inlamuliyaaya upanka amuci ukati unonwehereraaya ntthu kumihiye wanlokoni uturuwela unswalela Yehova? (Nwehe ikwaaturu “ Munturuwele Yehova.”)
8 Ntthu nonfenteenyu cinene ahiyaka unswalela Yehova, pooti ukhalaka wiira nyuuva nnaaweherera umoona anturuwelaka Yehova wanihukuni. Isiyani inlamuliyeenyu upanka ukati unhaleenyu ukhala munwehereraka uyo ntthuuyo uturuwela wanlokoni? Nhaana nlipihacaka waamini winyu. Mwapankaka commo, amuciinyu anhala uwoonani ni hataa ule kumihiye wanlokoni pooti upheela wuutakihani. Wiikurumica ulipihaca waamini winyu ciicammo unaahala wuuvahani ikuru wiira uhitepe wuuriipani nrima. Vano, nttwee noone citthu cinlamuliyeenyu upanka.
ISIYANI INLAMULIYEENYU UPANKA WIIRA NLIPIHACE WAAMINI WINYU?
9. Isiyani inlamuliyeenyu upanka wiira Yehova oovaheni ikuru? (Nwehe ikwaaturu “ Iveerusu co mbiiblyani cinhala wuumaalihani.”)
9 Mpanke yotheene inhaleenyu ukhitiri wiira waamini winyu ukhale woolipa. Nhaana mwiikurumicaka ulipiha kahi waamini winyu paasi, masi ciicammo waamini waamuciinyu. Nnohala upanka cani iyo? Nkhalane iporokaraama yoosoma Ibiiblya khula nihuku, wuupuwela insomeenyu ni urwaa umikutthaanoni. Upanka nnyo citthunnyo unaahala wuukaviherani waakhela ikuru ca Yehova. Arokorihu Joana arina athumwanaya ni anuunwaaya ahiile weettela ikhweeli, anera: “Itthu inkimaalihaka ukhanle usoma ihantisi co mbiiblyani caatthu toko Apikayili, Ester, Jó, Yusufu ni Yesu. Ihantisi caya ayo atthwaayo cinaacariha wanrimani waka moopuwelo ankimaaliha. Ni icipo co nsayitini wihu ciicammo cinaakilipiha venci.”
10. Mwakhalaka ooriipiya nrima cinene, Isaalimu 32:6-8 inhala wuumaalihani cani?
10 Munhimyeere Yehova inanna cineecooneenyu. Wooriipakani nrima cinene, nhihiye unlompa. Munlepele Yehova wiira ookavihereni uwehera citthu cotheene khampa uyova cinweheraawe. Munlepele ‘ankhili ni uwiitthucihani iphiro inlamuliyeenyu weetta.’ (Nsome Isaalimu 32:6-8. *) Ukati nkiina pooti unirika unhimyera Yehova inanna cineecoonyeenyu. Masi Yehova naacuwela inanna cineecoonyeenyu. Uyo nawuufentani cinene ni nawuulattulani unhimyeera citthu cotheene cinoohelani isukhuli.—Nkw. 34:6; Isaa. 62:7, 8.
11. Khampa cinoolumaaya Maberewu 12:11, nlattuni ninlamuliyeehu ukhuluvela nlako no nifento na Yehova? (Nwehe ikwaaturu “ Ukumihiya wanlokoni unthoonyera nifento na Yehova.”)
11 Nkavihere itthu mahumu ilakenlyaaya upanka. Unkumiha ntthu wanlokoni ikhanle itthu inkhuma wa Yehova. Ankhala mananna omaana onkavihera ntthu varale matampi ni ukavihera nloko notheene. (Nsome Maberewu 12:11. *) Pooti ukhalaka wiira nhopaca umwiiwa ntthu awuulumaka pusya mahumu nlattu wantthu kumihiye wanlokoni, masi uyo ntthuuyo atthunaka khunoncivelaka uhimya citthu cooninamaana cipankalyaawe ntthu kumihiye wanlokoni. Khweeliini hi khanincuwela citthu cotheene. Phimaana, yooreera upanka ukhanle ukupali wiira ikhurupu yo mahumu yuulumacenre uyo mwahooyo ahovarela nteko mattharelelo o mbiiblyani ni aheekurumica uhukhumu toko Yehova cimpheelaawe.—2 Ikor. 19:6.
12. Citthuni comaana caakhumelenle mayamunneehu akiina nlattu wootthuna nlako na Yehova?
12 Nyuuva mwakaviheraka citthu cinlakelaaya upanka mahumu, nnaahala unkavihera ule kumihiye wanlokoni unhokoleela Yehova. Arokorihu Elisabeti aromoliye wiipaceroni, aneera: “Uhiya umuulumana mwanihu omuupale wahonirika cinene. Masi wanhokolenlyaawe Yehova, uyo ahonihimyacera wiira ukumihiya wanlokoni yaari itthu yamphwanenle. Wahoolo, uyo ahohimya wiira aheetthuca meettelo omaana. Iyo itthwiiyo yahokikavihera woona wiira ikano ca Yehova cinkhala comaana.” Marcos, awanuwaya arokorihu Elisabeti ciicammo aneera: “Uvira waya ukati, mwanihu ahokihimyeera wiira itthu yankavihenre cinene unhokoleela Yehova yaari nlattu hiiva woohiya umuulumana. Mi kinansukhuru venci Yehova nlattu woonikavihera wiiwelela mattharelelwaawe.”
13. Isiyani inhala wuukaviherani uvilela itthu inwiirani wanrimani?
13 Nwoopane mwaha apatthaniinyu ancuwela itthu inwiirani. Mwaapatthanane makristau ookhomaala anhala wuukaviherani uwehera ratta itthu yuukhumelenleni. (Miru. 12:25; 17:17) Arokorihu Joana aromoliye wiipaceroni aneera: “Wanrimani waka, mi keecoonaka ukhala veekha. Masi koolumaka naapatthannyaaka ookhuluvelya, kaaneecoona ratta.” Vano isiyani inlamuliyeenyu upanka akhunaninyu wanlokoni yawuulumelakani itthu yowuuriipihani nrima?
14. Isiyani inlamuliyeehu upanka wiira ‘nivilelane ni nilevelelane niiraati’?
14 Mwaavilele mayamunneenyu o munnepani. Hataa wapice, nihaavo nihuku ninhalaaya mayamunneehu wuuluma itthu ihinhala unicivela. (Tiya. 3:2) Otheene cihu nikhanle atthu oopahuwa. Phimaana, nhikhale ootikhinihiya mayamunna akiina yaahicuweleke itthu yowuuluma wiira oomaaliheni awula yoolumaka itthu inhala wuuriipihani nrima. Muupuwele ikano ivahilyaawe apostolu Paulu: “Nhihiye uvilelana ni ulevelelana niiraati, hataa ntthu akhalanaka isariya yonviruwela nkhunanawe.” (Akol. 3:13) Arokorihu amoca arina mmucyaaya kumihiye wanlokoni aneera co: “Mayamunna akhwaawe yahokiriipiha nrima ukati waamananihaaya ukimaaliha, masi Yehova ahokikavihera waalevelela ayo mayamunnaayo.” Isiyani mayamunna o wanlokoni inlamuliyaaya upanka wiira yaakavihere ale arina amucyaaya yoomoliye wanlokoni?
MAYAMUNNA O WANLOKONI POOTI UKAVIHERA
15. Isiyani inlamuliyeehu upanka wiira naakavihere mayamunna kumihiye mmucyaaya wanlokoni mphiyaaruni?
15 Mwaapatthanane mayamunna arina mmucyaaya kumihiye wanlokoni. Arokorihu aneehaniya Miriam aneera wiira ukati anyeennyaaya waakumihiyaaya wanlokoni, wahokela waanyoonya cinene urwaa umikutthaanoni. Ayo aneera: “Mi kaanoova citthu caahalaaya ukuulumela mayamunna. Masi mayamunna yahokuulumana sana-saana ni yahothoonyera uriipiya nrima toko miiva. Ayo ciicammo khayaawuulumale pusya anyeenye yaakumihiye wanlokoni. Kinawaasukhuru venci ayo mayamunnaayo kontha yahokikavihera uhaanana veekha itthu yaakiira.” Arokorihu akhwaawe aneera: “Ukati mwanihu waakumihiyaawe wanlokoni, mayamunna enci yahowa unimaaliha. Mayamunna akiina yahohimya wiira khayaacuwela itthu yoohimya. Hataa ukhalaka commo, ayo yahokunlana ni akhwaawe yahokantikhela iwarakha caakilipihile venci. Ayo khayaareere ukikavihera!”
16. Isiyani mayamunna inlamuliyaaya upanka wiira ahihiye waakavihera amucyaawe ntthu kumihiye wanlokoni?
16 Nhihiye waakavihera mayamunna arina mmucyaaya kumihiye wanlokoni. Ayo anaapheela cinene ufentiya ni ulipihiya uvikana khalayi. (Mabere. 10:24, 25) Ukati nkiina, ahaavo mayamunna anhiya uwuulumana amucyaawe ntthu kumihiye wanlokoni ni ayo amucyaayo pooti wancera wiicoona khampa wiira ayova ciicammo ahokumihiya wanlokoni. Nhihiye iyo itthwiiyo yiirannyaaka wanlokoni winyu! Venci-venci amirawo arina athumwanaya awula anumwanaya akumihiye wanlokoni anaapheela cinene uttottopeliya ni ulipihiya. Arokorihu Maria yaawonne awannyaya yanhiyaka Yehova ni yathamaka wapuwani, aneera: “Apatthannyaaka akiina yahowa uwaani, yahonaapela ni yahonikavihera upanka uswali waamuci. Ayo yahokoonela uthunku ni yahokunlana. Ni yahokaakiha ukati atthu akiina wancenryaaya ukootherihaca citthu coohinamaana. Ayo khayaareere ukilipiha!”—Aroo. 12:13, 15.
Mayamunna otheene wanlokoni pootiwaathoonyera nifento ni waakaviheraamucyaawe ntthu kumihiye wanlokoni (Nwehe iparaagarafu 17) *
17. Isiyani mahumu inlamuliyaaya upanka wiira yaamaalihe amucyaawe ule kumihiye wanlokoni?
17 Mahumu, mwiikurumice ulipiha waamini wo mayamunna arina mmucyaaya kumihiye wanlokoni. Nyuuva nhovahaceriya waamaaliha mayamunna arina mmucyaaya nhiile Yehova. (1 Atesal. 5:14) Nhoolelihere waalipiha makhuva cihinancera mikutthaano awula camalaka. Nwootole ni nlompe nkhayi naayo. Mwaavarane nteko woolalya ihapari ca Nluku, ni wakhitiryaa vale mwaalattule wuuswalini winyu waamuci. Mahumu ookhomaala anaacuwela wiira ahaana yafentaka ni uwacera ratta ikhontwaa cinhuva ca Yehova.—1 Atesal. 2:7, 8.
NHIHIYE UWEHERERA NI UNKHULUVELA YEHOVA
18. Khampa cinhimyaaya 2 Peturu 3:9, isiyani Yehova inaaphelelaawe ale ahiile unswalela?
18 Yehova “khaavo ntthu nompheelaawe umoona atankanyiyaka.” (Nsome 2 Peturu 3:9. *) Hataa ntthu avaraka matampi moolupale, ukumyaawe uyo ntthuuyo Yehova nanlelo unancivela. Phimaana, Yehova holiva ihisapu yuulupale cinene wiira awoopole atthu otheene arina matampi. Iyo ihisapwiiyo ukhanle ukumi wa Mwaamwanawe nonfentaawe cinene. Nlattu wo nifento nawe, Yehova nawaakavihera atthu enci uhokoleela unswalela Yehova. Ni uyo naaweherera wiira atthu otheene atthune ukaviheriya, toko Yesu cithoonyenryaawe waattonkacilyaawe ntakihero na mwaana aalakenle uthama wapuwani waathumwaane. (Luka 15:11-32) Atthu enci yaahiile weettela ikhweeli ca Yehova nuuwakatyaaya yahohokoleela wamphwinkoni wawe ni uyo wahowaakhelela uratteene. Arokorihu Elisabeti awuulumaleehu wiipaceroni wahaatteela nrima waamonnyaaya mwaamwanaya ahokoleelaka wanlokoni. Yawehaka uttuli, ilelo ayo aneera: “Kinawaasukhuru venci cinene otheene ale akikurumicale uhihiya uweherera.”
19. Kontha isiyani nihaana ninkhuluvelaka Yehova?
19 Otheene cihu pooti unkhuluvela Yehova. Ikano cotheene cinnivahaawe cinkhala comaana. Yehova nkhala Paapeehu oowacera, ooreera nrima ni naafenta cinene otheene anonfenta ni anonswalela. Nkupali venci cinene wiira ukati unaananeenyu masakha oorika cinene, Yehova khanhala wuunyanyalani. (Mabere. 13:5, 6) Marcos, ciicammo romoliye wiipaceroni neera co: “Yehova khanatoka uninyanyala. Ukati unniphwanyakaaya masakha, uyo nokhala wakhiviru ni hiiva.” Ni nyuuva ciicammo, Yehova khanhala uhiya wuuvahani ikuru cinci. (2 Akor. 4:7) Phimaana, hataa ntthu nonfenteenyu ahiyaka unswalela Yehova, nkupali wiira nyuuva pooti unvaresesa Yehova ni uhihiya uweherera wiira uyo ntthuuyo naahala unhokoleela Yehova.
NCIPO 44 Oração de Um Servo Aflito
^ par. 5 Ninaakhala ooriipiya nrima cinene namoonaka ntthu nonfenteehu anhiyaka Yehova! Nhina ula mwahoola, ninaahala woona manannani Nluku cinkhalaawe yeerannyaaka iyo itthwiiyo. Ninaahala woona citthu amuci cinlamuliyaaya upanka wiira avilele ni alipe mminepani wakhalaka wiira ntthu owapuwani waya honhiya Yehova. Ciicammo ninaahala wiitthuca isiyani mayamunna otheene inlamuliyaaya upanka wiira yaamaalihe ayo amucyaayo.
^ par. 1 Macina aromoliye nhina ula mwahoola ahaakakhanihiya.
^ par. 2 Isaalimu 78:40 Nyuuva khanreere unrukunuwela ni unriipiha nrima ikwaha cinci muuthakoni! 41 Ikwaha cinci nyuuva mwahontteha Nluku ni mwahonriipiya nrima Nluku Owaarya o Isarayeli.
^ par. 10 Isaalimu 32:6 Phimaana otheene ale ahinhiya uwiiwelela anaahala wuulompa ukati unkhitiryaa uphwanyannya. Co hataa maaci oovira yatthawaka khanhala waaphwanya. 7 Weeva ukhanle ntthawelelo naka; unaahala ukikhikicera kasankaka. Kinaahala utthapa nlattu wookoopola. 8 “Kinaahala wuuvaha ankhili ni uwiitthuciha iphiro inlamuliyaa weetta. Kinaahala wuulaka miithwaaka yuuweheehaka”, neera Yehova.
^ par. 11 Maberewu 12:11 Khweeli, khanivo nlako nintteeliha nrima ukati ninvahiyaaya, masi ninaawerya; nuuwakatyaaya, ale anfunttiya ninlako, nna ninaahala waapankihiiha weettela isariya.
^ par. 18 2 Peturu 3:9 Yehova khampicapica upanka ikhuluvelihalyaawe, kahi toko atthu akiina cinoopuwelayaaya, masi uyo nawuuvilelani, kontha khaavo ntthu nompheelaawe umoona atankanyiyaka, masi nawiira uweherera wiira atthu otheene arukunuse nrimaaya.
