1-2. Nlattuni Yesu waakhanlyaawe ni masukhuli?

NAARI nihuku noomalela na Yesu watuninyani khampa pinaatamu. Uyo aari ni masukhuli menci. Woohipica, Yesu aanaahala utthukiya ni atthu oohinamaana ni aanaahala uhuvihiya ni wiiviya. Masi ihaavo-tho itthu ikhwaawe yanhiya Yesu ni masukhuli. Uyo aanawaafenta cinene Athumwaane, Yehova, ni apheela waatteeliha nrima. Yesu aanaacuwela wiira ahaana akhalaka ookhuluvelyaa ule ukati wo masakhoole wiira akavihere ureeriha ncina na Yehova awula amalihe citthu cowoothiya cotheene cinoolumeliyaaya nno ncinanno. Uhiya commo, Yesu ciicammo aanawaafenta atthu. Yesu aanaacuwela wiira apinaatamu yaahala uphwanya ukumi woohimala uyova akhalaka ookhuluvelya mpaka waahalaawe ukhwa.

² Unookhalaru wiira aari ni masukhuli menci ule uhiyuule, Yesu ahaana nnema. Uyo ahowiirela maapostolu: “Kinawuuvahani nnema naka.” (Joau 14:27) Yesu ahaana “ineema ya Nluku”—nnema ninkhalanaaya paasi apatthani a Yehova. Iyo ineemeeyo phankavihenre Yesu uhikhala oosanka.—Afili. 4:6, 7.

3. Isiyani inhaleehu usoma nhina ula mwahoola?

³ Hiiva khanhala unikhumelela masakha mamocaaru ni ale yankhumelenle Yesu, masi atthari a Yesu otheene anaahala waakhumelela masakha. (Mat. 16:24, 25; Joau 15:20) Toko Yesu, hiiva ukati nkiina pooti ukhala ni masukhuli. Isiyani ninlamuliyeehu upanka wiira masukhuli ahitepe unisankiha ni unirikihela ukhalana nnema? Nhina ula mwahoola, ninaahala usoma citthu tthaaru caapankalyaawe Yesu ukati waaryaawe watuninyani cankavihenre uhihiya ukhalana nnema. Ciicammo, ninaahala usoma mananna ninlamuliyeehu untakiha Yesu yanikhumelelaka masakha.

4. Wuupuwelaka moolumo ari nhina 1 Atesalonika 5:17, uhimye mathoonyero anoonihera wiira Yesu aholompa imaara cinci nihuku noomalela ukumyaawe watuninyani khampa pinaatamu.

⁴ Usome 1 Atesalonika 5:17. Nihuku noomalela na Yesu watuninyani khampa pinaatamu, uyo aholompa imaara cinci. Ukati waapacerihaawe upanka Nuupuwelelo no nookhwa nawe, Yesu aholompa hinaaya waavaha maapostolu iphaawu ni aholompa hinaaya waavaha iviinyu. (1 Akor. 11:23-25) Vano, hinaaya ukhuma nipuro naamuupuwelelaawe Paasikuwa, Yesu aholompa wamoca ni attharyaawe. (Joau 17:1-26) Ciicammo, ukati Yesu ni attharyaawe waaphiyalyaaya wamwaakoni Olivera, uyo aholompa imaara cinci. (Mat. 26:36-39, 42, 44) Ni moolumo oomalela Yesu oolumalyaawe hinaaya ukhwaa yaari nivekelo. (Luka 23:46) Yesu khaapheela unhiya Yehova uttuli nne nihuku nuulupalenne. Phimaana aholompa imaara cinci.

5. Kontha isiyani maapostolu khayaakhitinri ulipa nrima?

⁵ Itthu imoca yankavihenre Yesu ukhitiri uvilela mpaka waakhwilyaawe ukhalaka wiira uyo khaahiile waalompa Athumwaane wiira ankavihere. Masi maapostolu khayaalompale cinene ule uhiyuule. Phimaana waaphiilyaaya ukati woottehiya, ayo khayaakhitinri ulipa nrima. (Mat. 26:40, 41, 43, 45, 56) Iyo inthoonyera wiira yanikhumelelaka masakha, ninhala ukhitiri ukhala ookhuluvelya napankaka toko Yesu. Nihaana ‘ulompa woohihiyerera.’ Masi isiyani ninlamuliyeehu ulepela ukati woolompa?

6. Waamini unhala unikavihera cani ukhalana nnema?

⁶ Nihaana ulompa nanlepelaka Yehova wiira ‘anivahe waamini mwinci.’ (Luka 17:5; Joau 14:1) Ninaapheela waamini kontha Sotwani  naahala waatteha otheene ale anontthara Yesu. (Luka 22:31) Waamini unnikavihera cani ukhalana nnema, hataa yahihiyaka unikhumelela masakha? Napankaka yotheene inkhitiriihu wiira nivilele masakha, waamini unaahala unikavihera uhiya masakheehu mmatatani wa Yehova. Ninaakhuluvela wiira uyo naahala uwacera ratta masakheehu uvikana mananna caahaleehu uwacera hiivano. Wuupuwela commo, unaaniphwanyiha nnema wanrimani wihu.—1 Pet. 5:6, 7.

7. Isiyani yiitthucalyaa ni ntakihero na Robert?

⁷ Hataa yanikhumelelaka masakhani, ulompa pooti unikavihera ukhalana nnema. Muupuwele ntakihero na Robert, humu o wanlokoni rina myaakha 80. Uyo neera: “Ikano yo Afilipo 4:6, 7 ihokikavihera waanana masankiho menci muukumini waka. Uhaavo ukati waakithwaalyaaya nsurukhu cinene. Ni ciicammo uhaavo ukati waahiilyaaka ukhala humu o wanlokoni.” Isiyani yankavihenre Robert ukhalana nnema? Uyo neera: “Kancaka ukhala ni masukhuli, kinaalompa woohipica. Kalompaka cinene, kinaatepa ukhalana nnema.”

8. Itthuni-tho yankavihenre Yesu ukhalana nnema wanrimani wawe ihimiye nhina Joau 8:29?

⁸ Usome Joau 8:29. Yesu aanaacuwela wiira aanaatteeliha nrima Athumwaane. Phimaana, hataa alupatthiyaka, uyo aanaakhalana nnema wanrimani wawe. Yesu khaahiyale uwiiwelela Athumwaane, hataa wanrikelaka. Uyo aanawaafenta Athumwaane, ni aanaahoolelihera muukumini wawe unswalela Yehova. Hinaaya uwa watuninyani, uyo aari ‘nanteko oocuwelaca’ a Nluku. (Miru. 8:30) Ni  uwa wawe watuninyani, Yesu khaaviriiha ukati woowiitthuciha atthu myaha ca Athumwaane. (Mat. 6:9; Joau 5:17) Uyo ntekooyo wahomwiiriha Yesu ukhala ootteeliya venci.—Joau 4:34-36.

9. Kontha isiyani ninaakhalana nnema wanrimani wihu naahiloveke wuulalyaani ihapari comaana?

⁹ Hiiva ninontakiha Yesu namwiiwelelaka Yehova ni ‘natepaka uvara cinene nteko wa Apwiiya.’ (1 Akor. 15:58) ‘Neevahereraka ni ikuru cihu cotheene ulalyeera’, ninaakhitiri uwehera ratta masakheehu. (Mite. 18:5) Wootakihera, atthu enci mapuro anlalyeereehu ihapari comaana anawaakhumelela masakha menci uvikana masakha annikhumelela. Masi ayo yiitthucaka unfenta Yehova ni weettela ikano cinvahaawe, ukumyaaya unaakhala ratta ni ayo anaaphwanya utteeliya venci. Khula ukati unooneehu yiirannyaaka iyo, ninaatepa unkhuluvela Yehova wiira naahala ni hiivano uniwacera. Ni nna nikhuluvelonna ninaanikavihera uhihiya ukhalana nnema wanrimani wihu. Iyo phi itthu yoonelenlyaawe nrokonihu mmoca. Uyo ahokhala ukati mwinci acukulacaka ni hiicoonaka ukhalana ifayita. Uyo neera: “Kakhalaka wuulalyaani, kinawiicoona ratta ni unaakitteela nrima. Kinoona toko nteko woolalyeera phi nteko unkikavihera umphiyeera cinene Yehova.”

10. Ntakihero na Brenda niwiitthucihale isiyani?

¹⁰ Moone ciicammo ntakihero na nrokorihu neehaniya Brenda. Uyo ni mwanawe inawaawerya iretta yuulupale ineehaniya esclerose múltipla. Brenda neetta ni ikhatera yo maroota, ni kharina ikuru mwiirutthuni wawe. Akhitiriki, Brenda naarwaaka ulalyeera ihapari comaana mmawaani, masi venci-venci uyo nolalyeeraka avarelaka nteko iwarakha. Brenda neera: “Mi akinhala uvona kikhalakoono ila ituninyeela. Ukati waacuwenlyaaka ni waakupanlyaaka iyo, wahokitaphuwa nrima wiira kihoolelihere ulalyeera moolumo a Nluku. Khweeliini, ulalyeera unaakikavihera uhuupuwela cinene masakha arinaaka. Kinkhala kuupuwelaka mananna oohala waakavihera atthu kinwuulumanaaka ncoko unlalyeereehu. Ni khula ukati ulalyeera unaakuupusera niweherero nirinaaka noohoolo.”

11-13. a) Mapostolu ni atthu akiina yaathoonyenre cani ukhala apatthani eekhweeli a Yesu? b) Ni Yesu eecoonale cani ukati waakaviheriyaawe naapatthannyaawe?

¹¹ Nteko waavaraawe Yesu watuninyani waari nteko woorika, masi uyo ahaana apatthannyaawe eekhweeli: maapostolu ookhuluvelya. Ayo yahothoonyera ratta itthu inhimyaaya ilivuru yo Miruku: “Haavo mpatthani nonvaresesa nkhunanawe unvikana ntthu ni mwaamunnawe.” (Miru. 18:24) Yesu aanawaavaha ifayita cinene apatthannyaawe. Ukati Yesu waaryaawe watuninyani, khaavo mena mwaamunnawe mmoca ankupali. (Joau 7:3-5) Ni uhaavo ukati amucyaawe Yesu waamwiirenlyaaya wiira hovahuwa. (Mark. 3:21) Masi maapostolu khayaari toko amucyaawe. Uhiyu mmoca hinaaya wiiviya, Yesu ahowiirela maapostolu ookhuluvelya: “Thi nyuuva nkhanle wamoca ni mi mmasakhani waka.”—Luka 22:28.

¹² Ninaacuwela wiira maapostolu ukati nkiina yaanannyoonyihaka Yesu. Masi Yesu khaatepa uweheeha coottheka caya. Uyo aanaacuwela wiira maapostolu yaanaamwaamini. (Mat. 26:40; Mark. 10:13, 14; Joau 6:66-69) Uhiyu mmoca hinaaya wiiviya, Yesu ahowiirela ayo alopwana ookhuluvelyaayo: “Kinwiihanani apatthannyaaka, kontha kihoohimyerani citthu cotheene ciwiiwalyaaka aPaapa.” (Joau 15:15) Khweeliini,  apatthannyaawe Yesu yahonlipiha nrima cinene. Uyo ahotteeliya venci nlattu wookaviheriya naapatthannyaawe wiira avare ntekwaawe.—Luka 10:17, 21.

¹³ Apatthannyaawe Yesu khayaari maapostolu paasi. Alopwana ni athiyana enci yaanankavihera Yesu wuulalyaani awula ni mananna makiina. Akhwaawe yaananlattulaka unlyaana. (Luka 10:38-42; Joau 12:1, 2) Akiina yaanantthukanaka nkwaha ni yanammeelaka citthu caarinaaya. (Luka 8:3) Yesu ahaana apatthani yaapheela unkavihera kontha ayo yaanaacuwela wiira Yesu ciicammo aanaahala waakavihera. Yesu aanawaapankela citthu comaana apatthannyaawe ni khaalepela citthu cahaakhitiryaaya upanka. Hataa akhalaka oohipahuwa, Yesu aanaasukhurweela citthu comaana cotheene caapankeliyaawe naapatthannyaawe oopahuwa. Unawoonannya wiira ayo apatthannyaayo yahonkavihera Yesu ukhalana nnema.

14-15. Inannani yomaana yookhitiri waaphwanya apatthani omaana, ni ayo anhala unikavihera cani?

¹⁴ Apatthani omaana anaahala unikavihera uhihiya unvaresesa Yehova. Ni inanna imoca yookhitiri ukhalana apatthani omaana, uri hiivano ukhala apatthani omaana. (Mat. 7:12) Wootakihera, Ibiiblya inaanisovenriha uvaha ukatiihu ni ikuru cihu wiira naakavihere akhunanihu, venci-venci ale ‘anthwennya.’ (Efesu 4:28) Niireke wanlokoni waa haavo ntthu unlamuliyaa unkavihera? Niireke weeva pooti urwaa unthumela citthu munneehu hinkhitiri ukhuma wapuwani wawe nlattu woowerennya awula wuuluvala? Awula niireke weeva pooti waavaha iyoolya amuci uhirina nsurukhu mwinci? Awula weeva pooti umwiitthuciha munna mananna oovarela nteko isayiti  jw.org^® awula JW Library^®? Uhiviriihe ukati wowaakavihera akhunanaa ni ala manannaala. Wapanka commo, unaahala utteeliya nrima cinene.—Mite. 20:35.

¹⁵ Apatthaniihu anaahala unikavihera yaniphwanyaka masakha ni anaahala unikavihera ukhalana nnema. Ukati Jó waahimyaawe masakha yaarinaawe, Eliwu ahonviriyana ratta. Apatthaniihu ciicammo anaahala univiriyana napheelaka waahimyacera itthu inniira. (Jó 32:4) Khaninlamuliya uweherera wiira apatthaniihu alakele citthu cimpheeleehu uthanla upanka. Masi yanihimyeraka ikano yombiiblyani, unaareera uwiiwelela. (Miru. 15:22) Ciicammo, wakhala wiira apatthaniihu ampheela unikavihera yanithwaaka itthu, khaninlamuliya wiicoona. Nihaana nipankaka toko mwene Davidi. Uyo aheeyeviha ni ahotthuna ukaviheriya naapatthannyaawe. (2 Sam. 17:27-29) Khweeliini, aphatthani toko ayo ankhala itthuvo ya Yehova.—Tiya. 1:17.

16. Toko cinhimyaaya Afilipo 4:6, 7, ninhala ukhitiri cani ukhalana nnema wanrimani? Utaphulele.

¹⁶ Usome Afilipo 4:6, 7. Woone, Yehova neera nhala univaha nnema nawe “iriyari wa Yesu Kristu.” Kontha isiyani? Kontha ninhala ukhitiri uhihiya ukhalana nnema wanrimani namwaaminiki Yesu ni nacuwelaka ifayitani irinaawe nhina wo citthu cimpheelaawe Nluku upanka. Wootakihera, nlattu Yesu woovaha ukumyaawe wiira anoopole, Yehova naanilevelela matampiihu otheene. (1 Jo. 2:12) Ucuwela ila itthwiila unaaniphwanyiha utaphuwa nrima! Ciicammo, Yesu khanle Mwene o Umwene wa Nluku, ni naahala umalamaliha mahuviho otheene anniwaanelaawe Sotwani ni ituninyaawe. (Isai. 65:17; 1 Jo. 3:8; Apoka. 21:3, 4) Ucuwela ila itthwiila unaanivaha niweherero! Unookhalaru wiira Yesu honivaha nteko woorika, uyo naanikhuluveliha wiira ri wamoca ni hiiva ni wiira naahala unikavihera ukati wo mahuku ookhicera otuninyeela. (Mat. 28:19, 20) Ucuwela ila itthwiila unaaniphwanyiha ulipa nrima! Utaphuwa nrima, niweherero ni ulipa nrima—ala phi mapotto anlipiha nnema no wanrimani wihu.

17. a) Isiyani ninlamuliyeehu upanka wiira nihihiye ukhalana nnema? b) Toko cineeraaya ilivuru ya Joau 16:33, isiyani inhaleehu ukhitiri upanka?

¹⁷ Vano isiyani weeva inlamuliyaa upanka wiira uhihiye ukhalana nnema, hataa yookhumelelaka masakha menci? Upanke yaapankalyaawe Yesu. Woopacera, ulompe—uhihiye ulompa. Yonayeeli, umwiiwelele Yehova ni wiikurumice uvara nteko woolalyeera ihapari comaana, hataa wuurikelaka. Ni yoneeraru, utthune ukaviheriya naapatthannyaa yookhumelelaka masakha. Wapanka commo, ineema ya Nluku inaahala usunka moopuwelelwaa ni nrimaa. Ni toko Yesu, weeva unaahala ukhitiri waanana khula masakha.—Usome Joau 16:33.