1. Isiyani otheene cihu impheeleehu upanka, ni nlattuni? (Uwehe ilatarato iri wakaapani.)

YESU KRISTU ahaaruma attharyaawe eeraka: “Nrwee ni mwaapanke eetthuci atthu olapo cotheene.” (Mat. 28:19) Otheene cihu nimpheela wiitthuca mananna ‘oovara ratta nteko wa Nluku.’ (2 Tim. 4:5) Kontha uyo phi nteko mmoca urivo utepale ukhalana ifayita, wooniwaanela iparakha ni unlamuliyeehu uvara wowaakuvya. Masi woocukuliha nrima, ukati nkiina unaanirikela uviriha ukati mwinci nivaraka uyo ntekooyo khampa caapheeleehu.

2. Citthuni atthunaka cinnirikihela uvara ratta nteko wa Nluku?

² Cihaavo citthu cofayita cikiina cimpheela wiira nivahe ukatiihu ni ikuru cihu. Enci nihaana nivaraka nteko ukhuma uwicisu mpaka ucoocilo wiira naalihere amuciihu. Awula pooti ukhala wiira nihaana mirintti cikiina watthokoni wihu, ikwerere, masukhuli awula khaninkhitiri upanka citthu cikiina nlattu wo wuuluvala. Ninhala ukhitiri cani uvara ratta nteko wa Nluku hataa nikhalanaka ayo marikarikwaayo?

3. Isiyani inniitthucihaaya itthu Yesu yoolumalyaawe nhina Matewus 13:23?

³ Wakhala wiira citthu cinookhumelelani cinawuurikihelani uviriha ukati mwinci mwavaraka nteko wa Yehova, nhikhale ni masukhuli. Yesu aanaacuwela wiira khawaahala ukhitiryaa atthu otheene wiimiha mihokorokho Coomwene cimocaaru. (Usome Matewus 13:23.) Masi Yehova naavaha ifayita cinene citthu cotheene cimpankeehu muntekoni wawe, neekurumicaru upanka inkhitiriihu ni ikuru cihu cotheene. (Mabere. 6:10-12) Ciicammo, pooti ukhalaka wiira makhalelweehu yanhala unikhitiriha uvara cinene nteko wa Nluku. Nhina ula mwahoola, ninaahala woopela mwaha manannani ninlamuliyeehu uhoolelihera uvara nteko wa Nluku muukumini wihu. Ciicammo  ninaahala wiitthuca mananna oohirikarikihaca ukumiihu ni citthu cinlamuliyeehu upanka wiira nilalyeere ni nisomihe ratta. Masi woopacera, nttwee nicuwele uvara ratta nteko wa Nluku maanaaya isiyani.

4. Uvara ratta nteko wa Nluku maanaaya isiyani?

⁴ Wo moolumelo makhwaawe, uvara ratta nteko wa Nluku maanaaya wiira wiikurumica uvara nteko woolalyeera ni wowiitthuciha ihapari comaana ni ikuru cihu cotheene. Uvara ratta nteko wa Nluku khunaaciyaka paasi uviriha ukati mwinci nivaraka uyo ntekooyo. Itthu inniiriha hiiva ulalyeera Yehova naavaha ifayita ciicammo. Hiiva ninvara nteko wa Nluku * ni irooho yotheene nlattu wonfenta Yehova ni nlattu wowaafenta atthu. (Mark. 12:30, 31; Akol. 3:23) Uvara nteko wa Nluku ni irooho yotheene maanaaya wiira wiikurumica uvara uyo ntekooyo ni ikuru cihu cotheene, nivahaka ukatiihu, ikuru cihu ni ucuwelaca wihu. Naweheraka nteko woolalyeera toko iparakha, ninaapheela wiikurumica waahimyera atthu ihapari comaana.

5-6. Uhimye ntakihero ninthoonyera mananna ntthu rina ukati vakaani cinlamuliyaawe woonihera wiira ulalyeera phi nteko muulupale muukumini wawe.

⁵ Wootakihera, umuupuwele mmirawo oncivela umoopa viyola. Uyo naakhala ootteeliya khula ukati ummoopaawe. Nihuku nimoca, uyo mmrirawooyo naavahiya nteko woomoopa viyola ubaare khula Isaapatu ni Itominku. Masi nsurukhu unliviyaawe khuntosera wiira athume citthu cinonthwa. Phimaana, uyo nawancera uvara nteko nkiina nlooca, ukhuma Cumaattaattu mpaka Icumaa. Hataa avirihaka ukati mwinci avaraka nteko nlooca, umoopa viyola phi itthu intepa uncivela cinene. Uyo naapheela cinene wiitthuca umoopa viyola ratta wiira wahoolo avare nteko woomoopa viyola ukati wotheene. Awehereraka uphiya uyo ukatyuuyo, nawiikurumica umoopa viyola khula ukati unkhalanaawe, hataa ukhalaka ukati vakaani.

⁶ Inanna imoca, pooti ukhalaka wiira weeva khunkhalana ukati mwinci woolalyeera. Masi hataa ukhalaka commo, ulalyeera phi nteko  unoocivela uvara. Phimaana, unawiikurumica wiitthuca ulalyeera ratta wiira ihapari cinaahimyeraa atthu caavare nrima. Masi ukhala wiira unawuuthwa ukati nlattu wo citthu cikiina, unawuupuwela mananna oohoolelihera nteko woolalyeera muukumini waa.

7-8. Ninlamuliya untakiha cani Yesu nhina mananna oowehera nteko wa Nluku?

⁷ Mananna Yesu caaweheraawe nteko wa Nluku unaareera utakiha. Itthu yuulupale muukumini wa Yesu waari woopela mwaha Umwene wa Nluku. (Joau 4:34, 35) Yesu aheetta ikoloometuru cinci arwaaka mapuro oottayi wiira aalalyeere atthu otheene yaahalaawe ukhitiri waaphwanya. Ukhale waatthuni awula mmapuwani, Yesu khaaviriiha ukati wo waalalyeera atthu. Itthu Yesu yaahooleliheraawe muukumini wawe waari uvara nteko wa Nluku.

⁸ Inanna imoca yontakiha Yesu uri ulalyeera ihapari comaana khula ukati ni khula nipuro wookhitirya ulalyeera. Ciicammo ninaatthuna uleva upuha wiira nilalyeere venci. (Mark. 6:31-34; 1 Pet. 2:21) Enci wanlokoni anaakhitiri ukhala mapiyoneeru owiivaherera (pioneiros especiais), mapiyoneeru owiicaaverya (pioneiros regulares) ni mapiyoneeru ookavihera (pioneiros auxiliares). Akiina anawiitthuca iluuka ikhwaawe awula anaathamela mapuro ampheeliya anamalalyeera. Masi, nteko woolalyeera mwinci anvara anamalalyeera ahiri mapiyoneeru, aneekurumica upanka inkhitiryaaya. Hataa ukhalaka wiira ninvara vakaani nteko woolalyeera awula venci, Yehova khannilepela upanka ihinkhitiriihu. Uyo khanle “Nluku ootteeliya”, ni nopheela wiira hiiva nitteeliye ukati unvareehu nteko woolalyeera “ihapari comaana coottitthima.”—1 Tim. 1:11; Deut. 30:11.

9. a) Hataa avaraka nteko wonvaha ipooso, Paulu oonihenre cani wiira ulalyeera phaatepale ukhalana ifayita muukumini wawe? b) Ilivuru yo Miteko 28:16, 30, 31 inthoonyera cani mananna Paulu caaweheraawe nteko wa Nlluku?

⁹ Ntthu nkiina aahoolelihera uvara nteko wa Nluku ninlamuliyeehu untakiha, aari Paulu. Munkwahani weemisiyonaariyu wonayeeli, Paulu ahovira uKorintu. Ukhala wiira khaarina nsurukhu mwinci, uyo ahaana uviriha ukati aapankaka aheema. Masi Paulu khoopuwela wiira waapanka aheema phaari nteko muulupale muukumini wawe. Paulu aapanka uyo ntekooyo wiira avare nteko wa Nluku “mahala”, awula wiira asuulupalyaawe akorintu ahikumihe nsurukhwaaya wiira anlihere Paulu. (2 Akor. 11:7) Unookhalaru wiira Paulu ahaana avaraka nteko woohala unvaha ipooso, uyo khaahiile uhoolelihera uvara nteko wa Nluku, ni aanaalalyeera khula Isaapatu. Ukati makhalelwaawe waakhanlyaaya ratta, Paulu ahotepa uhoolelihera nteko woolalyeera. Uyo ‘aanawiivaherera ni ikuru cawe cotheene ulalyeera nuulumo, aavahaka usaahiti ayuuta ni ooniheraka wiira Yesu phiri Kristu.’ (Mite 18:3-5; 2 Akor. 11:9) Wahoolo waya, ukati Paulu waatthukiyaawe wapuwani wawe uRooma, aanawaalalyeera ale yaawa umootola ni aanawantikha iwarakha. (Usome Miteko 28:16, 30, 31.) Paulu aanaakhotta khula itthu yaahala unhiiha uhoolelihera uvara nteko wa Nluku. Uyo hantikha: ‘Ukhala wiira nihaana nteko wa Nlukuula, khaninooceela.’ (2 Akor. 4:1) Toko Paulu, atthunaka hiiva ninaaviriha ukati mwinci navaraka nteko woonivaha ipooso. Hataa ukhalaka commo, hiiva ninlamuliya uwehera nteko wo Umwene khampa nteko wootepa ukhalana ifayita muukumini wihu.

10-11. Wakhala wiira ninaawerennya, isiyani ninlamuliyeehu upanka wiira nivare ratta nteko wa Nluku?

¹⁰ Pooti ukhala wiira unaanirikela urwaa ulalyeera mmawaani nlattu woowerennya awula  wuuluvala. Masi ahaavo mananna makiina oolalyeera. Makristau oopacera yaanawaalalyeera atthu khula nipuro yaaphwanyaaya. Wakhumelelaka ukati, ayo yaanaalalyeera—mmapuwani, mapuro yaakhala atthu enci awula yaanaalalyeera khula nipuro naakhala atthu. (Mite. 17:17; 20:20) Wakhala wiira khannokhitiri weetta venci, pooti wonkoma nipuro ninvira atthu enci ni waalalyeera atthu anvira. Awula pooti waalalyeera atthu ni iwarakha awula ni telefoone. Anamalalyeera enci anwerennya anaatteeliya cinene nlattu woolalyeera ni mananna makiina.

¹¹ Hataa nwerennyaka, nyuuva pooti ukhitiri uvara ratta nteko wa Nluku. Mmuupuwele-tho Paulu. Uyo aheera: “Citthu cotheene kinkhitiri nlattu wa ule nokivaha ikuru.” (Afili. 4:13) Paulu ahopheela nnyo ikurunnyo ukati waawerennyaawe munkwahani mmoca weemisiyonaariyu. Uyo ahowiirela akalasiya: “Kipacerihale wuulalyeerani ihapari comaana nlattu woowerennya.” (Akalas. 4:13) Inanna imoca, pooti ukhalaka wiira iretta inooweryaani inawuuvahani ukati wo waalalyeera mameetiku, awula atthu akiina anvara nteko usipiritaali. Ayo atthwaayo ankhalaka untekoni ukati anamalalyeera akhwiihu anviraaya mmapuwani.

12. Niittho nihu ‘uweheeha itthu imoca paasi’ maanaaya isiyani?

¹² Yesu heera: “Nthuko wo mwiirutthuni nikhanle niitho. Phimaana, niittho ninyu naweheehaka itthu imoca paasi, irutthwiinyu yotheene inaahala woonnya.” (Mat. 6:22) Ayo moolumwaayo maanaaya isiyani? Maanaaya wiira nihaana nitothaka itthu imoca paasi, ni  khaninlamuliya uhiya wiira citthu cikiina cinihapuse. Napankaka commo, khaninhala urikarikiha ukumiihu. Iyo phi itthu Yesu yaapankalyaawe. Yesu aatotha paasi uvara nteko wa Nluku, ni uyo ahowiitthuciha attharyaawe uhoolelihera nteko wa Yehova ni Umwene. Ninontakiha Yesu nahooleliheraka muukumini wihu uvara nteko woolalyeera. Nihaana “upacera uhoolelihera Umwene ni isariya ya Nluku.”—Mat. 6:33.

13. Isiyani inhala unikavihera uweheeha nteko unonvareleehu Nluku?

¹³ Inanna imoca yooweheeha nteko unonvareleehu Nluku uri uhiviriha ukati mwinci napankaka citthu coohifayita. Commo ninaahala ukhalana ukati mwinci wiira naakavihere atthu akiina uncuwela ni unfenta Yehova. * Atthunaka nyuuva pooti ukhitiri uthikilela ukati unviriheenyu untekoni iriyari isumana wiira nkhalane ukati woorwaa wuulalyeerani. Awula weeva pooti ulakela ukhotta uvira ukati mwinci uthukaka.

14. Humu ni amwaarawe yaapankale isiyani wiira avirihe ukati mwinci yavaraka nteko wa Nluku?

¹⁴ Iyo phi itthu yaapankalyaawe humu mmoca neehaniya Elias ni amwaarawe. Uyo neera: “Ukati naalakenleehu wuncerera ntekweehu woolalyeera, khanaakuvenle ukhala mapiyoneeru, masi nahaana nipaceraka vakaani-vakaani. Vano, nahorukunusa makhalalweehu wiira nivirihe ukati mwinci wuulalyeerani. Nahohiya urihakaca nsurukhu cinene. Ciicammo nahoona wiira naanaaviriha ukati mwinci nithukaka ni naholakela uvukula ukati naaviriheehu nithukaka. Nahorwaa ciicammo waalepela mapatarawiihu wiira anitthunihere uvara nteko ukati vakaani. Commo, naanaakhitiri urwaa wuulalyeerani uhiyu, urwaa usomiha Ibiiblya ni mpaka urwaa wuulalyeerani iriyari isumana imaara  piili khula mweeri. Upanka commo wahonitteeliha nrima!”

15-16. Toko cinhimyaaya 1 Timotiyu 4:13, 15, isiyani ninlamuliyeehu upanka wiira niitthuce ulalyeera ratta? (Uwehe ikwaaturu “ Coolakela coohala ukikavihera uvara ratta nteko wa Nluku.”)

¹⁵ Mananna makiina oovara ratta nteko wa Nluku uri ucuwela ulalyeera ratta. Wootakihera, khula nanteko haana eetthucihiyaka khula ukati uvara ntekwaawe ratta. Anamalalyeera anlamuliya upanka itthu imocaaru. Ninlamuliya uhihiya wiitthuca ulalyeera ratta.—Miru. 1:5; usome 1 Timotiyu 4:13, 15.

¹⁶ Masi isiyani ninlamuliyeehu upanka wiira nilalyeere ratta? Itthu imoca ninlamuliyeehu upanka uri uviriyana ratta citthu cineetthuceehu unkutthaanoni Vida e Ministério Cristãos. Uyo nkutthaanooyo naanilakihera citthu cofayita ni naanikavihera ucuwela mananna oolalyeera ratta. Ukati nhooleli o nkutthaano unaavahaawe miruku ale apankale miphantte, umananihe ucuwelela mirukuni cinhala wuukavihera weeva wuulalyaani. Ni warwaaka wuulalyaani, wiikurumice uvarela nteko nnyo mirukunnyo. Weeva ciicammo pooti unlepela miruku nhooleli o khurupu yo wuulalyeerani awula pooti unlepela wiira unkhumane wuulalyeerani. Awula weeva pooti unleehanana wiira unkhumane wuulalyaani namalalyeera oocuwelaca, piyoneeru awula mootoli osirikwiitu. Ciicammo wiitthuce uvarela nteko ikaruma cinnikavihera wiitthuciha. Upanka commo unaahala wuukavihera utepa wuucivela ulalyeera ni usomiha.

17. Unhala wiicoona cani wavaraka ratta nteko wa Nluku?

¹⁷ Khweeliini, ‘uvara nteko nkhayi ni Nluku’ iparakha yuulupale! (1 Akor. 3:9) Weeva ‘wacuweleehaka citthuni citepale ukhala cofayita’ ni wahooleliheraka uvara nteko wa Nluku, unaahala ‘unswalela Yehova nuutteeliya’. (Afili. 1:10; Isaa. 100:2) Hataa ukhalaka ni masakha awula ni marikariko, ukupali wiira Nluku naahala wuuvaha ikuru cinhala wuukavihera ukhitiri uvara ratta ntekwaawe. (2 Akor. 4:1, 7; 6:4) Ni wakhala wiira unawiikurumica ulalyeera ni ikuru caa cotheene, hataa ukhalaka vakaani, weeva uhaana “isariya yootteeliya.” (Akalas. 6:4) Wavaraka ratta nteko wa Nluku, unawoonihera wiira khweeliini unanfenta Yehova ni unawaafenta atthu. Ni toko cineeraaya 1 Timotiyu 4:16, “wapanka commo unaahala uyoopola weeva ni unaahala uwoopola atthu anooviriyana.”