1. Isiyani ninlamuliyeehu upanka otheene cihu?

WAANAAHALA wuucivelani ukela masinttaano ootthawatthawiya oorika nnoocyaale awula nwerennyaka? Unawoonannya wiira mena. Masi apostolu Paulu heera wira makristau eekhweeli otheene ari muutthawani. (Mabere. 12:1) Hataa nikhalaka amirawo awula owuuluvala, ookhomala irutthu awula oowoocya, otheene cihu nihaana nivilelaka mpaka wuumaleloni wiira naakhele itthuvo Yehova impheelaawe univaha.—Mat. 24:13.

2. Toko cinthoonyeraaya 2 Timotiyu 4:7, 8, kontha isiyani Paulu ahaana isariya yowaavaha ikano makristau nhina uvilela muutthawani waya?

² Paulu ahaana isariya yoowaavaha ikano makristau awiirelaka wiira yahaana yavilelaka muutthawani waya, kontha uyova ‘ahomaliha utthawa wawe.’ (Usome 2 Timotiyu 4:7, 8. *) Masi utthawani apostolu Paulu waacaawe?

3. Utthawani apostolu Paulu waacaawe?

³ Ukati nkiina, apostolu Paulu apheelaka wiitthuciha citthu cofayita, uyo anaattonkaka citthu co masinttaano yaapankiya khalayi u Grécia. (1 Akor. 9:25-27; 2 Tim. 2:5) Ikwaha cinci, uyo holattaniha makhalelo o makristau ni masinttaano ootthawatthawiya. (1 Akor. 9:24; Akalas. 2:2; Afili. 2:16) Ntthu nancera “utthawa” eevahereraka wa Yehova ni apattisiyaka. (1 Pet. 3:21) Ni uyo nhala umalihera utthawa wawe avahiyaka ni Yehova itthuvo yookumi woohimala.—Mat. 25:31-34, 46; 2 Tim. 4:8.

4. Isiyani inhaleehu wuuluma nhina ula mwahoola?

⁴ Masi makhalelo o makristau anwa cani ilattanacaka ni masintthaano muulupale ootthawatthawiya? Cihaavo citthu cinci cinthoonyera mananna cinlattanacaaya, ni ninaahala woopela mwaha vakaani citthu tthaaru. Yoopacera, nihaana utthawa nittharaka nttala womaana; yonayeeli,  nihaana uhiitthaala ni uweheeha mpika; ni yoneeraru, nihaana navilelaka marikariko anhaleehu uphwanya niiphiro.

5. Nttalani ninlamuliyeehu utthara, ni kontha isiyani?

⁵ Ale ankela masinttaano ootthawatthawiya ahaana yatthawaka munttalani uhimeriyaaya naatthu atthenkacale masinttaano. Yattharaka nttala nkhwaawe, ayo pooti ukumihiya muutthawani awula pooti uhaakhela itthuvo. Inanna imoca, hiiva nihaana nittharaka nttala womaana, awula, utthara meettelo eekristau. Napankaka commo phinhaleehu waakhela utthuvo yookumi woohimala. (Mite. 20:24; 1 Pet. 2:21) Masi Sotwani ni atthu anonkavihera khampheela wiira nitthare meettelo eekristau. Ayo anaamananiha unisovenriha wiira ‘nitthare meettelo oohinamaana aneettelaaya.’ (1 Pet. 4:4) Ayo anaanithyaa nlattu wo nttala uthanlaleehu utthara; ni aneera wiira nttala ayova unttharaaya phiri womaana ni phimphwanyiha utaphuwa weekhweeli. Masi ayo anawootha.—2 Pet. 2:19.

6. Wiitthucale isiyani ni ntakihero na Brian?

⁶ Khula ntthu naatthawana atthu o ntuninyani ya Sotwani, woohipica nawoonelela wiira nttala uthanlalyaawe khunontaphula, masi unonkhaliha ipottha. (Aroo. 6:16) Woone ntakihero na Brian. Asithumwaane yahonsovenriha utthara nttala wo makhalelo eekristau. Masi ukati woonuwalyaawe, uyo ahancera uhaamini wiira uyo nttalooyo waanaahala untteeliha nrima. Phimaana, Brian aholakela utthawa nkhayi naatthu aneettela ikettelo ca Sotwani. Uyo neera: “Meettelo yoonihaaka wiira yaanaahala ukitaphula, akaacuwelenle wiira khweeliini yaanaahala ukikhaliha ipottha yoviisiyu. . . . Nuukatyaaya, kahancera ulyaalyaaca citthu coohapala, kaanaawurya ni kaanaararuwa. Myaakha cinci caattharelana, kahotteha ulya citthu cinci coohapala cinene ni nnyo citthunnyo cahokikhaliha ipottha. . . . Kahancera utumihaca citthu coohapala wiira kiphwanye nsurukhu woolihera iviisiyu caka.” Nna va, Brian holakela weettela ikano ca Yehova. Uyo hohiya nttala waattharaawe ni hopattisiya mwaakha wo 2001. Ilelo, uyo ntthara nttala wo meettelo eekristau, phimaana khweeliini unantteela nrima. *

7. Toko cinthoonyeraaya Matewus 7:13, 14, iphironi piili cirivo?

⁷ Iyo inthoonyera wiira ikhanle itthu yofayita cinene utthara iphiro yomaana. Sotwani mpheela wiira otheene cihu nihiye utthara iphiro yoophurya “impiiha wuukumini.” Ni mpheela wiira nitthare iphiro yowaatapuwa intthaaraaya atthu enci o ila ituninyeela. Iyo iphirweeyo inaacuwelaciya cinene ni khinrika weetta. Masi “inrwaana wuutankanyiyani.” (Usome Matewus 7:13, 14. *) Naahipheeleke uhapusiya munttalani womaana uriihu, nihaana ninkhuluvelaka  Yehova ni wiiwelela itthu innihimeryaawe.

8. Isiyani namatthawa impankaawe akakathuwaka?

⁸ Ntthu ri mmasinttaanoni ootthawatthawiya haana uhiitthaala ni uweha uhoolo wiira hikakathuwe. Hataa ukhalaka commo, uyo pooti ukakathuwa wanlikittini nankaani awula pooti ukakathuliya ni ntthu nkhwaawe nontthawanaawe. Wakhalaka wiira howuluwa, uyo wowaakuvya naawunwa ni naaturuwela utthawa. Uyo khanweheeha itthu inkakathunle, masi noweheeha mpika uheleliyaawe ni itthuvo inhalaawe waakhela.

9. Nakakathuwaka, isiyani ninlamuliyeehu upanka?

⁹ Muutthawani wihu, hiiva pooti ukakathuwa imaara cinci nlattu wo itthu yuulumaleehu awula ipankaleehu. Awula atthu akhwaawe anaatthawaneehu pooti unipankela itthu yoonirusa. Nihaana nawehereraka ukhumelela iyo. Otheene cihu naatthu oopahuwa ni nintthawa nkhayi iphiro yoophurya inrwaana wuukumini. Phimaana nihaana nawehereraka wiira ukati nkiina ninaahala “ukakhana”. Paulu hohimya wiira ukati nkiina, naanaahala upankelana citthu caahala umwiiriha ntthu ukhalana “isariya yonkasari nkhwaawe.” (Akol. 3:13) Phimaana, mwakakathuwaka, nhiweheehe itthu yuukakathunleni, masi nweheehe itthuvo inhaleenyu waakhela uhoolo. Nlakele wunwa ni uturuwela utthawa. Mwalakelaka uhunwa nlattu woorusiya awula ucukulaca, khannohala uphiya wampikani ni khannohala waakhela itthuvo. Mwaahunweke, ciicammo nnaahala waattiyelela akhwiinyu antthawa mphironi yoophurya inrwaana wuukumini.

10. Isiyani ninlamuliyeehu upanka wiira nihikhale “nluku nowaakakathula” akhwiihu?

¹⁰ Ihaavo itthu ikiina ninlamuliyeehu upanka wiira nihikhale “nluku nowaakakathula” atthu anaatthawaneehu. Wakhalaka wiira ayo inawaacivela itthu hiiva ihinnicivela, phataari waahiya ni uhaakhanyereriha wiira apanke citthu cinnicivela. (Aroo. 14:13, 19-21; 1 Akor. 8:9, 13) Iyo phinnivirikaniha naale ampanka masinttaano ootthawatthawiya. Ayo anaamananiha waasintta atthu anaatthawanaaya, ni khula ntthu nawiikurumica wiira attheme ni aakhele itthuvo veekha. Ayo anamatthawaayo anoopuwela paahi itthu inhala waakavihera utthema. Phimaana anamatthawa akhwaawe anawaakakha akhwaaya wiira yaapwahe ni attheme. Masi hiiva khanintotha usinttana. (Akalas. 5:26; 6:4) Uhiya commo, hiiva nimpheela wiira atthu enci akhitiri utthawa mpaka wampikani ni yaakhele  itthuvo yookumi woohimala. Hataa phimaana waneekurumiceehu weettela ikano ya Paulu, ineera: “[Nhitothe] citthu cinoocivelani paasi, masi ciicammo [ntothe] citthu cinaacivela akhunaninyu.”—Afili. 2:4.

11. Isiyani anamatthawa inweheehaaya, ni nlattuni?

¹¹ Anamatthawa khanweha paahi nttala untthawaaya. Ayo ciicammo anaaweheeha mpika uheleliyaaya. Hataa ukhalaka wiira khankhitiri woona ni miitho mpika uheleliyaaya, ayo anawiicuupuwela anaphiyale wampikani ni yaakhelaka itthuvo. Wuupuwela iyo unawaakavihera anamatthawa uhoocyeela utthawa waya.

12. Isiyani Yehova inikhuluvelihalyaawe?

¹² Nlattu woonamaana wawe, Yehova naakhuluveliha wiira khula ntthu nonswalela nhala utthawa mpaka wiimaleloni, naahala waakhela itthuvo: ukumi woohimala wiirimu awula wapeephoni watuninyani. Ibiiblya inaahimya mananna cinhalaaya ukhala iyo itthuvweeyo, ni wuupuwela iyo unaanikavihera woona mananna ukumiihu cinhalaaya ureera wahoolo. Naahihiyeke wuupuwela citthu Yehova cinnikhuluvelihaawe uhoolo, ninaahala ukhitiri uvilela muutthawani wihu.

13. Isiyani hiiva irineehu ihinkhalanaaya ale ampanka masinttaano ootthawatthawiya?

¹³ Ale yaakela masinttaano ootthawatthawiya u Grécia khalayi, yahaana yavilelaka marikariko menci, toko woocyaa ni waaweryaa irutthu. Masi itthu yaakavihera urwaa uhoolo waari utthenkaciya wiira yakhitiri utthawa ni ciicammo ikuru co mwiirutthuni waya. Toko ayo anamatthawaayo, hiiva ciicammo ninaatthenkaciya wiira nikhitiri urweehela uhoolo utthawa wihu weekristau. Masi ihaavo itthu irineehu ihinkhalanaaya anamasinttaano ootthawatthawiya: ikuru coohimala cinnivahaawe Yehova. Nankhuluvelaka Yehova, uyo heera wiira naahala unitthenkaca ni unikhomaaliha!—1 Pet. 5:10.

14. Manannani 2 Akorintu 12:9, 10 cinnikaviheraaya uvilela marikariko?

¹⁴ Paulu ahaana marikariko menci. Uhiya uruwaniya ni ulupatthiya naatthu akiina, uyo ciicammo aanawiicoonaka uhikhalana ikuru ukati nkhwaawe. Ni ciicammo aanaahuvahuvaca nlattu wo itthu yeeralaawe wiira yaari ‘mwiiwa woohoma mwiirutthuni wawe.’ (2 Akor. 12:7) Masi uyo khoocenle utthawa wawe nlattu wo marikariko yaarinaawe. Yankhumelelaka marikariko, uyo aawehera iyo khampa ukati woothoonyera wiira nankhuluvela Yehova. (Usome 2 Akorintu 12:9, 10. *) Nlattu wowuupuwela commo, Paulu ahokaviheriya ni Yehova nhina marikariko otheene yaarinaawe.

15. Nantakihaka Paulu, isiyani inhaleehu woona?

¹⁵ Hiiva ciicammo atthunaka pooti uruwaniya awula ulupatthiya. Pooti uweryaaciya awula wiicoona uhikhalana ikuru. Masi nantakihaka Paulu, ninhala uwehera marikariko otheennyaayo khampa ukati wowoona wiira Yehova naanifenta ni naanikavihera.

16. Hataa ukhalaka wiira nnaaweryaaciya, isiyani inlamuliyeenyu upanka?

¹⁶ Nyuuva nnokhala wankorini ukati mwinci awula wakhaterani yo maroota ukati wotheene nlattu woowerennya? Cinawuuweryaani meetto awula nhokela uhoona ratta nlattu wowuuluvala? Wakhala wiira nnya phi citthu cinookhumelelani, niireke nyuuva nnaahala ukhitiri waatthawana amirawo ni atthu ahinwerennya? Iyee, nkupali wiira nnaahala ukhitiri! Mayamunna enci yuuluvanle ni anwerennya anaatthawa mphironi inrweeha wuukumini. Masi ayo anaacuwela wiira khanatthawa niikuru caya; ayo ankhuluvela ikuru cinvahiyaaya ni Yehova. Hataa yakhalaka ni marikariko,  ayo mayamunnaayo anaaviriyana mikutthaano ntelefooneni awula anawoona mwinternetini. Ni ayo anawaalalyeera mameetiku awula atthu akhwaawe anvara nteko usipiritaali; ciicammo anawaalalyeera amucyaaya.

17. Yehova nwoonela cani ale anweryaaciya?

¹⁷ Nhihiye masukhuli ni uweryaaciya uwiirihakani wuupuwela wiira nyuuva nkhanle ntthu oohikuru ni khannohala ukhitiri utthawa mphironi inrweeha wuukumini. Yehova nawuufentani kontha nawoona waamini winyu ni uvilela winyu. Nyuuva nhaana nkaviheriyaka ni Yehova ni uyo khanhala wuuhiyani veekha. (Isaa. 9:10) Uhiya commo, Yehova naahala wuuphiyeerani venci. Moone itthu yuulumalyaaya arokorihu anweryaaciya cinene: “Nlattu wooweryaaciya cinene, akinkhalana ukati mwinci woolalyeera. Masi kinaacuwela wiira nteko vakaani unvaraaka unantteeliha nrima Yehova, ni iyo inaakitteeliha nrima miiva ciicammo.” Mwakhalaka ni masukhuli, nhiliyale wiira khanri veekha. Muupuwele ntakihero na Paulu ni moolumwaawe oolipiha makhuva: ‘Unaakitteela nrima nlattu woololova waka, kontha kakhalaka oololova, phintepaaka ukhalana ikuru.’—2 Akor. 12:10.

18. Masakhani ootepa urika anaakhumelela mayamunneehu akhwaawe?

¹⁸ Atthu akiina ari muutthawani weekristau ahaana marikariko makhwaawe. Ayo ahaana masakha ahinooniya ni ahincuweliya naatthu akhwaawe, toko iretta inonwerya ntthu nlattu wowuupuwela cinene awula nlattu wookhala ni masukhuli menci. Kontha isiyani ayo masakhaayo anaatepa waarika mayamunneehu? Kontha, ntthu ontyaaka moono awula wakhalaka wiira neetta niikhatera yo maroota nlattu woowerennya, atthu otheene anawoona masakha arinaawe ni anaapheela unkavihera. Masi wakhalaka wiira ntthu inonwerya iretta yo mmuru nlattu wo masukhuli, imaara cinci khaavo noona uhuva wawe uyo ntthuuyo. Uyo pooti unwerya cinene unvikana ntthu ontyaale moono. Masi ukhala wiira atthu akhwaawe khankhitiri woona itthu inonwerya, ayo pooti uhinfenta venci ni uhinwacera toko cimpheelaawe.

19. Ntakihero na Mefiposeti ninniitthuciha isiyani?

¹⁹ Wakhala wiira nyuuva nnaaweryaaciya ni nnawoona wiira khaavo ncuwela masakha arineenyu, ntakihero na Mefiposeti ninaahala wuuvahani ikuru. (2 Sam. 4:4) Uhiya ukhala nretta, uyo ciicammo ahohukhumwiya woohisariya ni Mwene Davidi. Mefiposeti khiivo itthu yootakhala yaapankalyaawe wiira ankhumelela ayo masakhaayo. Hataa ukhalaka commo, uyo khaakhanle ni masukhuli. Uhiya commo, uyo aahoolelihera wuupuwela citthu comaana cankhumelenle muukumini wawe. Mefiposeti aanaasukhuru cinene citthu comaana caapankeliyaawe khalayi ni Davidi. (2 Sam. 9:6-10) Phimaana ukati waahukhumwiyaawe woohisariya ni Davidi, Mefiposeti ahowehera ratta citthu cotheene. Uyo khaakhanle ntthu ooviruwaca nlattu wo itthu yoohisariya yaapankiyaawe ni Davidi. Ni uyo khaamootherihale Yehova nlattu wo itthu yaapankalyaawe Davidi. Mefiposeti ahohoolelihera wuupuwela itthu  yaalamuliyaawe upanka wiira ankavihere mwene aathanliye ni Yehova. (2 Sam. 16:1-4; 19:24-30) Ni wiira anikavihere hiiva ilelo, Yehova hohiya wiira yantikhiye mbiiblyani ihantisi yo ntakihero nomaana na Mefiposeti.—Aroo. 15:4.

20. Isiyani inaakhumelela mayamunneehu arina masukhuli, ni anlamuliya ukupali isiyani?

²⁰ Mayamunneehu ni asirokorihu akiina arina masukhuli khaneecoona ratta yakhalaka waatthuni. Ayo unawaarika ukhala nipuro naatthu enci. Hataa ukhalaka commo, ayo khanlova umikutthaanoni, mmamithukumanoni cosirikwiitu ni mmakonkereesuni. Ayo unawaarika uwuulumana atthu ahinaacuwelaaya; masi hataa ukhalaka commo, anaawuulumana atthu wuulalyeerani. Waakhala wiira iyo ciicammo ikhanle itthu inwiirani, nkupali wiira khanri veekha. Atthu enci ciicammo anawaakhumelela ayo marikarikwaayo. Nhiliyale wiira Yehova unantteela nrima cinene nlattu woowoonani mwiikurumicaka upanka inkhitiriinyu. Nyuuva mpaka nna va khamoocyaale. Iyo inthoonyera wiira Yehova nawuucaalihani ni nawuuvahani ikuru cimpheeleenyu wiira nkhitiri uvilela. * (Afili. 4:6, 7; 1 Pet. 5:7) Wakhala wiira khannohiya unswalela Yehova hataa mwakhalanaka marikariko, nkupali wiira Yehova unantteela nrima cinene nlattu woowoonani.

21. Nikaviheriyaka ni Yehova, isiyani otheene cihu inhaleehu ukhitiri upanka?

²¹ Wootteeliha nrima, masinttaano ootthawatthawiya ampankiyaka ntuninyani anaavirikana ni masinttaano yuulumalyaawe Paulu. Mmasinttaanoni ootthawatthawiya yaapankiya khalayi, ntthu mmoca paahi phaakhela itthuvo. Masi, muutthawani weekristau, atthu otheene anhala uvilela mpaka wiimaleloni anaahala waakhela itthuvo yookumi woohimala. (Joau 3:16) Ni mmasinttaanoni ootthawatthawiya, atthu otheene ahaana yakhalanaka ukumi womaana; kontha yakhalaka aretta khanhala ukhitiri utthema. Masi muutthawani weekristau, enci ninaaweryaaciya; masi hataa ukhalaka commo, hiiva ninaavilela. (2 Akor. 4:16) Nikaviheriyaka ni Yehova, hiiva ninaahala ukhitiri umaliha utthawa wihu!