1-2. a) Eunice aari tipani, ni marikarikoni yaarinaawe khampa nnyari? b) Ntaphulele ilatarato yo wakaapani.

 IBIIBLYA khinhimya isiyani yeerannyeele ukati Timotiyu waapattisiyaawe. Masi unawoonannya wiira nno nihukunno Eunice, anumwaane Timotiyu wahaatteela nrima cinene. (Miru. 23:25) Nwuupuwele anumwaane Timotiyu anari ootteeliya cinene yamoonaka mwanaya Timotiyu nari mmaacini ahalaka vakaani upattisiya. Nlattu wootteeliya, ayo anaathyaathya anaavarenle moono apiipyaawe Timotiyu, Loide. Anumwa Timotiyu unawaatthapa nrima wammoonaaya Timotiyu acuwennyaka mmaacini. Ni yamoonaka Timotiyu aruuliyaka mmaacini nari ootteeliya, ayo anawaamora miithori. Anumwaane Timotiyu ahoviriha marikariko menci. Khalayi, ayo khayaaweherera wiira mwanaya wanihukuni anhala unfenta Yehova ni Yesu Kristu. Masi marikarikoni yaakhalannyaaya?

² Athumwaane ni anumwaane Timotiyu khayeettela ittiini imocaaru. Athumwaane yaari akereeku; anumwaane ni apiipyaawe yaari ayuuta. (Mite. 16:1) Atthunaka Timotiyu naryeene mwanhima, Eunice ni Loide yahokhala makristau. Masi athumwaane mena. Vano Timotiyu aahala untthara pani? Uyo ahoonuwa ni pooti waalakelaawe veekha cawe ittiini yoohala utthara. Niireke Timotiyu aahala uthanla ittiini yaathumwaane? Niireke aahala ulakela uhihiya nanlelo weettela ittiini ya ayuuta, awula anhala utthuna ukhala ntthari a Kristu?

3. Toko cinthoonyeraaya Miruku 1:8, 9, Yehova noonela cani wiikurumica wo mayamaama otheene antotha uwiitthuciha ikhweeli asaanaaya?

³ Khampa Eunice, mayamaama makristau anawaafenta cinene amucyaaya. Ayo anaapheela waakavihera asaanaaya ukhalana upatthani woolipa ni Yehova. Khweeliini, Yehova unancivela woona  wiikurumica waya ayo mayamaamaayo. (Nsome Miruku 1:8, 9. *) Ukhuma nenne nokhalayi, Yehova nawaakavihera mayamaama enci uwiitthuciha asaanaaya unfenta ni unswalela.

4. Marikarikoni anaakhumelela mayamaama enci ilelo?

⁴ Mayamaama pooti wiikoha wakhala wiira asaanaaya anaahala uthanla unswalela Yehova khampa Timotiyu caathanlilyaawe. Ayari anaacuwela wiira asaanaaya anaakhanyererihiya upanka citthu cootakhala cinci ntuninyani ya Sotwani inkhaleehu. (1 Pet. 5:8) Ciicammo, mayamaama enci anwuunuwiha asaanaaya veekha awula aneekurumica veekha uwiitthuciha ikhweeli asaanaaya kontha awannyaya khanakhala Saahiti a Yehova. Arokorihu aneehaniya Christine * aneera: “Awannyaka akhanle alopwana omaana, masi ayo khayaapheela wiira asaaniihu akhale Masaahiti a Yehova. Mi kihokhala myaakha cinci kunlaka ni kiikohaka wakhala wiira asaaniihu wanihukuni yanhala unswalela Yehova.”

5. Ninhala wiitthucani nhina ula mwahoola?

⁵ Wakhala wiira mwaayari athiyana, nyuuva nnaahala ukhitiri waakavihera asaaniinyu unfenta ni unswalela Yehova, khampa Eunice caakhitinryaawe. Nhina ula mwahoola ninaahala woona manannani nyuuva cinlamuliyeenyu untakiha Eunice ni uwiitthuciha asaaniinyu nicitthu cinoolumeenyu ni cimpankeenyu. Ciicammo ninaahala woona manannani Yehova cinhalaawe wuukaviherani.

6. Toko cinthoonyeraaya 2 Timotiyu 3:14, 15, isiyani yankavihenre Timotiyu ukhala nkristau?

⁶ Ukati Timotiyu waaryaawe mwanhima, Eunice aheekurumica umwiitthuciha “cowantikhiya cowaarya,” ceetthucihiya nhina ittiini ya ayuuta. Ayo khayaacuwela citthu cotheene kontha yaari ahinancuwela Yesu Kristu. Hataa ukhalaka commo, citthu Timotiyu caalakiheriyaawe canhala unkavihera ukhala nkristau. Masi niireke uyo anhala ulakela ukhala nkristau? Timotiyu ahoonuwa ni pooti waalakelaawe veekha cawe ukhala nkristau. Hataa ukhalaka commo, uyo ‘aakhitinri waamini’ ikhweeli ca Kristu nlattu anumwaane wo wiikurumica. (Nsome 2 Timotiyu 3:14, 15. *) Eunice ahokhala ootteeliya cinene nlattu wookhitiri umwiitthuciha ikhweeli mwanawe hataa akhalanaka marikariko! Ncina Eunice maanaaya wiira “utthema” ni khweeliini Eunice ahotthema marikariko yaarinaawe ni ahokhitiri unkavihera Timotiyu unfenta ni unswalela Yehova.

7. Timotiyu upattisiya wawe, isiyani Eunice yaalamuliyaawe upanka wiira nanlelo ankavihere mwanawe?

⁷ Upattisiya wa Timotiyu yaari itthu yuulupale muukumini wawe. Masi hataa ukhalaka wiira Timotiyu ahopattisiya, Eunice nanlelo ampheela umoona mwanawe athanlaka upanka citthu comaana. Isiyani Timotiyu yaahalaawe uhoolelihera upanka muukumini wawe? Uyo anhala waathanla apatthani yaahala unkurumica upanka citthu coohinamaana? Anhala upheela urwaa u Atenas wiira asome ni eetthuce citthu caasomihaaya anafilosofiya yahaamwaamini Nluku? Anhala urihakaca ukatyaawe, ikuru cawe ni umirawaawe atothaka nsurukhu? Eunice kahi phaalamuliya ulakela citthu caahalaawe upanka mwanawe, masi pooti wankaviheraawe. Masi aahala unkavihera cani? Uyo ahaana eekurumicaka umwiitthuciha mwanawe unfenta Yehova ni usukhurweela citthu cotheene Yehova ni Yesu caapankilyaaya wiira yaakavihere amucyaawe. Kahi paahi ayari makristau anwuunuwiha asaanaaya veekha phinkhalana ayo marikarikwaayo. Hataa ukhalaka  wiira alopwanaayo ni athiyanaayo ooyeeli akhanle Masaahiti a Yehova, pooti waarika waakavihera asaanaaya unswalela Yehova. Ntakihero na Eunice ninwiitthuciha isiyani ayari?

8. Mayamaana anhala waakavihera cani asiwannyaya uwiitthuciha asaanaaya?

⁸ Mwaasomihe Ibiiblya asaaniinyu. Yehova nopheela wiira mayamaama yaakavihere asiwannyaya uwiitthuciha ikhweeli asaanaaya. Inanna imoca yoopanka iyo itthwiiyo ukhanle ukavihera uswali waamuci. Nhina moolumacerweenyu, mwaathoonyere asaaniinyu wiira unawuucivelani uswali waamuci. Nyuuva atthunaka pooti waakavihera awannyu upanka iporokaraama yooswali waamuci. Ni wakhala wiira mwaninyu hoonuwa, munsomihe mwaninyu ilivuru Mphwanye Utteeliya Uhimmala! Coo, nyuuva naawannyu pooti uvara nteko nkhayi wiira mwaakavihere asaaniinyu.

9. Isiyani inhala waakavihera mayamaama anwiitthuciha ikhweeli asaanaaya veekha?

⁹ Mayamaama akiina anaasomiha Ibiiblya asaanaaya veekha nlattu wookhala athupa awula nlattu awannyaya woohikhala Saahiti a Yehova. Wakhala wiira iyo phi itthu inookhumelelani nyuuva, nhikhale nimasukhuli. Yehova naahala wuukaviherani. Nvarele nteko ikaruma cinvahiyeehu mumphwinkoni wa Yehova wiira nwiitthucihe asaaniinyu. Nyuuva ciicammo pooti uwuulumana ayari yancenre khalayi uwiitthuciha asaanaaya ni waakoha manannani cinvarelaaya nteko nnyo ikarumannyo ukati wooswali waamuci. * (Miru. 11:14) Munlompe Yehova; munlepele wiira ookavihereni ucuwela ratta mirima caasaaniinyu ni ucuwela citthu cinwiira ni cinoopuwelaaya. (Miru. 20:5) Ukati nkhwaawe, nikoho nankaani toko: ‘Isiyani intepa wuurika ucikolani?’ pooti wuukaviherani umoopana mwaha ratta mwaninyu.

10. Isiyani-tho inlamuliyeenyu upanka wiira mwaakavihere asaaniinyu wiitthuca myaha ca Yehova?

¹⁰ Mwiikurumice uwiitthuciha asaaniinyu myaha ca Yehova khula ukati. Mwakhalaka naasaaniinyu, mmuulume Yehova ni mwaahimyeere citthu comaana cotheene cuupankenlyaaweni. (Deut. 6:6, 7; Isai. 63:7) Iyo ikhanle itthu inhala wuukaviherani cinene utepa wakhalaka wiira ihaavo itthu inoorikihelani waasomiha Ibiiblya asaaniinyu. Arokorihu Christine awuulumaleehu, aneera: “Mi akaakhalana ukati mwinci woowiitthuciha asaanaaka myaha ca Yehova. Phimaana, akaaviriiha khula ukati waakhalanaaka wiira kiwiitthucihe. Ukati waacisaaka wiira neettakace niiparapaara awula niikalawa, mi akaahiya wuuluma citthu cumpilyaawe Yehova ni myaha coominepani. Ni ukati asaanaaka woonuwilyaaya, mi kahaakurumica usoma Ibiiblya veekha.” Ciicammo, nhihiye wuuluma ratta mphwinko wa Yehova ni uwuuluma ratta mayamunna o wanlokoni. Nhiwuulume pusya mahumu. Asaaniinyu yowiiwakani mwawuulumaka pusya mahumu, wahoolo ayo pooti uhaatotha mahumu yapheelaka ukaviheriya.

11. Toko cinthoonyeraaya Tiyaku 3:18, nlattuni unreeraaya utotha ukhala ninnema wapuwani?

¹¹ Ntothe ukhala ninnema wapuwani winyu. Nhihiye uthoonyera wiira nnawaafenta awannyu ni asaaniinyu. Nwuulumane awannyu saana ni niihisima ni nwiitthucihe asaaniinyu upanka commo. Iyo itthwiiyo inaahala wuukaviherani ukhalakhala ninnema wapuwani ni khunhala wuurikani uwiitthuciha asaaniinyu myaha ca Yehova. (Nsome Tiyaku 3:18. *) Muupuwele ntakihero na Jozsef, aavanre nteko weepiyoneeru u Roménia. Athumwaane yahopanka yotheene yaakhitinryaaya wiira uyo munnooyo, anumwaane ni asunnawe ahikhitiri unswalela Yehova. Munna Jozsef neera: “Amaama yaheekurumica cinene wiira nikhalakhale  ninnema wapuwani. Ukati apaapa waamananihaaya unkumihaca nanrokottole, amaama yantepa uthoonyera unamaana. Yanoonaka wiira hiiva khanaahisimu apaapa, ayo yannisomela Efesu 6:1-3. Vano, yaanaanuupusera makhalelo omaana apaapa yaarinaaya ni yaanaanikurumica waafenta ni waahisimu. Nlattu wo iyo itthwiiyo, hi nankhitiri ukhala ninnema wapuwani.”

12. Toko cinthoonyeraaya 2 Timotiyu 1:5, ntakihero na Eunice nankavihenre cani Timotiyu?

¹² Nsome 2 Timotiyu 1:5. * Eunice ahonvaha Timotiyu ntakihero nomaana. Uyo ahomwiitthuciha Timotiyu wiira waamini weekhweeli unthoonyeriya nicitthu cimpankeehu. (Tiya. 2:26) Timotiyu khweeliini ahoona wiira itthu yaakurumica anumwaane upanka citthu comaana waari unfenta Yehova cinene. Ni uyo ankhitiri woona wiira anumwaane yaakhala waatteelaka nrima kontha yaananswalela Yehova. Ntakihero na Eunice nankavihenre cani Timotiyu? Toko apostolu Paulu cihimyalyaawe, Timotiyu ahaana waamini woolipa khampa anumwaane caarinaaya. Timotiyu aakhitinri ukhala waamini woolipa kontha ahoona waamini waarinaaya anumwaane ni aholakela waatakiha. Inanna imocaaru, mayamaama enci anwiitthuciha asaanaaya unfenta Yehova yaavahaka ntakihero. (1 Pet. 3:1, 2) Nyuuva pooti ciicammo upanka iyo itthwiiyo. Manannani?

13. Nlattuni mayamaama anlamuliyaaya ulipihaca upatthannyaaya ni Yehova?

¹³ Nhoolelihere upatthaniinyu ni Yehova muukumini winyu. (Deut. 6:5, 6) Nyuuva ninawiikurumica cinene khampa cimpankaaya mayamaama enci. Wiira mwaawacere asaaniinyu, nyuuva nhaana nvahaka ukatiinyu, nsurukhuwiinyu, uhiya urupa ikhove ni atthunaka nnaapanka citthu cikhwaawe wiira mwaakavihere. Masi hataa nkhalanaka miteko cinci, nyuuva nhaana nkumihaka ukati woolipihaca upatthaniinyu ni Yehova. Nhihiye ulompa, usoma Ibiiblya veekha ni urwaa umikutthaanoni. Mwapankaka commo, nyuuva nnaahala ulipihaca upatthaniinyu ni Yehova ni nnaahala waavaha ntakihero nomaana amuciinyu ni atthu akhwaawe.

14-15. Itthu yaamwiirannyenle Leanne, Maria, ni João iwiitthucihileni isiyani?

¹⁴ Moone matakihero aamirawo yiitthucile unfenta ni unswalela Yehova nlattu wo woona citthu comaana caapankaaya mayamaamaaya. Mwanaya arokorihu Christine neehaniya Leanne neera: “Hi khanaalamuliya usoma Ibiiblya apaapa anari uwaani. Masi amaama yaari athiyana ookhuluvelya ni khayaalova umikutthaanoni. Hi khanaacuwela cinene myaha co mbiiblyani, masi waahookhalaru commo, hi nahaana waamini woolipa nlattu wo woona ntakihero naya. Nihinaaya wancera urwaa umikutthaanoni, hi nahocuwela wiira Masaahiti a Yehova phi ittiini ineetthuciha ikhweeli ca Nluku.”

¹⁵ Athumwanaya arokorihu aneehaniya Maria khayaapheela uwoona amucyaaya yarwaaka umikutthaanoni. Arokorihu Maria aneera: “Amaama akhanle athiyana oolipa nrima cinene. Ukati waaryaaka mwaana, cihaavo citthu cahaapankaaka kontha kaanawoova itthu yaahalaaya wuuluma atthu yaahala ukoona. Masi woona ulipa nrima waamaama ni woona mananna canhooleliheraaya Yehova muukumini waya, uhokikavihera uhiya umoova pinaatamu.” Munneehu João ahaana athumwaane yahaatthunihera amucyaaya wuuluma myaha ca Yehova wapuwani. Uyo munnooyo neera: “Itthu imoca ihinliyalaaka ukhanle uwoona amaama yapankaka citthu cotheene caapheelaaya apaapa, masi yaholakela uhihiya unswalela Yehova, hataa ukhalaka wiira iyo phi itthu apaapa yaapheelaaya.”

16. Ntakihero no mayamaama makristau ninaakavihera cani atthu akhwaawe?

 ¹⁶ Mayamaama, ntakihero ninyu pooti waakavihera cinene atthu akhwaawe. Manannani? Moone mananna ntakihero na Eunice cankavihenryaaya apostolu Paulu. Uyo hantikha wiira ‘waamini weekhweeli’ wa Timotiyu wankhumakhuma Eunice. (2 Tim. 1:5) Masi ukatini apostolu Paulu woonelenlyaawe wiira Eunice ahaana waamini woolipa? Atthunaka ikwaha yeemisiyonaariyu yoopacera yaarwaalyaawe u Listra phancuwenlyaawe Loide ni Eunice. Pooti ukhalaka wiira apostolu Paulu phaakavihenre ayo athiyanaayo ukhala makristau. (Mite. 14:4-18) Muupuwele saana ila itthwiila: Paulu aamwantikhenle iwarakha Timotiyu cinavinre myaakha 15, masi khaaliyanle waamini woolipa wa Eunice ni nanlelo anwehera khampa ntthu ooreera utakihiya nimakristau akhwaawe. Ntakihero na Eunice nahonlipiha venci apostolu Paulu ni nahaalipiha makristau akhwaawe yaakhala ule ukatyuule. Wakhala wiira nyuuva nnowuunuwiha asaaniinyu veekha awula wakhala wiira awannyu khanakhala Saahiti a Yehova, nhiliyale ila itthwiila: waamini winyu unawaalipiha cinene mayamunna o wanlokoni.

17. Isiyani inlamuliyeenyu upanka wakhalaka wiira mwaninyu khampheela unswalela Yehova?

¹⁷ Vano wakhalaka wiira nyuuva nheekurumica cinene, masi mwaninyu khampheela ufenta Yehova, isiyani inlamuliyeenyu upanka? Nhiliyale wiira unlaka mwaana inkhala itthu impheela ukati mwinci. Toko cinthoonyeraaya ilatarato, nyuuva mwaalaka inuku yo mwiri, khannocuwela wakhala wiira iyo inaahala umela ni ukhala mwiri muulupale. Nyuuva khannocuwela wakhala  wiira inaahala wuunuwa awula mena. Masi hataa ukhalaka commo, nyuuva khannohiya umicera ni nnaatafiti saana wiira yuunuwe. (Mark. 4:26-29) Inanna imocaaru, mayamaama pooti wiikoha wakhala wiira wiikurumica waya khweeliini unnaakavihera asaanaaya awula mena. Nyuuva khannocuwela wakhala wiira mwaninyu naahala unswalela Yehova awula mena. Masi mwaahihiyeke wiikurumica unkavihera mwaninyu unfenta Yehova, nyuuva nnaahala unkavihera wuunuwa mminepani.—Miru. 22:6.

18. Yehova nohala waakavihera cani asaaniinyu wuunuwa mminepani?

¹⁸ Ukhuma nenne nokhalayi, Yehova haakavihera atthu enci ukhala asipatthannyaawe. (Isaa. 22:9, 10) Ni wakhala wiira mwaninyu ciicammo naapheela umpatthanana, Yehova pooti unkavihera wuunuwa mminepani. (1 Akor. 3:6, 7) Hataa nyuuva moonihaka wiira mwaninyu khacinoncivela ikhweeli co mbiiblyani, Yehova khanhala uhiya unfenta mwaninyu. (Isaa. 11:4) Ukati mwaninyu unhalaawe upheela, Yehova naahala umwaakhelela ni matata meeli. (Mite. 13:48; 2 Ikor. 16:9) Yehova pooti wuukaviherani wuuluma itthu yooreera ukati mwaninyu umpheelaawe wiiwa iyo itthwiiyo. (Miru. 15:23) Yehova ciicammo pooti unvaha ikuru munna awula nuunu o wanlokoni wiira ankavihere mwaninyu. Ni hataa asaaniinyu yoonuwaka, Yehova naahala uwiiriha wuupuwela itthu iwiitthucihileenyu anari asaana. (Joau 14:26) Khweeliini, Yehova naahala wuucaalihani mwaahihiyeke uwiitthuciha asaaniinyu nicitthu cinoolumeenyu ni cimpankeenyu.

19. Nlattuni nnolamuliyeenyu ukhuluvela wiira Yehova nawuufentani ni naatteeliya nrima ni nyuuva?

¹⁹ Yehova khanhala uhiya wuufentani nlattu mwaninyu woothanla upanka citthu coohinamaana. Yehova noofentani kontha nyuuva nnanfenta. Wakhala wiira nyuuva nnowuunuwiha asaaniinyu veekha, Yehova hohimya wiira naahala ukhala athumwanaya ayo asaanaayo ni naahala wuukhikicerani. (Isaa. 68:5) Nyuuva khannohala ukhitiri ucuwela wakhala wiira asaaniinyu anaahala unswalela Yehova awula mena. Masi mwaahihiyeke unkhuluvela Yehova ni upanka inkhitiriinyu, khweeliini nnaahala untteeliha nrima.