1. Isiyani intepa unitteeliha nrima?

 YEHOVA nopheela unoona unitteelaka nrima. Hi nincuwela iyo itthwiiyo kontha utteeliya nrima uhoheliya nhina makhalelo o nhokorokho wo nnepa wowaarya. (Akalas. 5:22) Hi ninaacuwela wiira uvaha unaatteeliha nrima cinene uvikana uvahiya. Phimaana, hi unaanitteela nrima nakumihaka ukatiihu wiira nilalye ihapari comaana ni wiira naakavihere mayamunneehu.—Mite. 20:35.

2-3. a) Citthuni piili cinhala unikavihera uhihiya ukhala unitteelaka nrima? b) Ninhala wiitthucani nhina ula mwahoola?

² Apostolu Paulu hohimya wiira cihaavo citthu piili cinhala unikavihera uhihiya ukhala unitteelaka nrima. (Nsome Akalasiya 6:4. *) Itthu yoopacera, ukhanle ulakela unvaha awula umpankela Yehova itthu hiiva inkhitiriihu. Nanvahaka Yehova itthu hiiva inkhitiriihu, unaahala unitteela nrima. (Mat. 22:36-38) Itthu yonayeeli ukhanle uhiilattaniha naakhunanihu. Nihaana ninsukhuruku Yehova nlattu wo citthu cinnikhitirihaawe upanka, hataa nihikhitiriki upanka citthu cinci nlattu wooweryaaciya ni uhicuwelaca cinene. Citthu cotheene cirineehu Yehova phinivahile. Ni noonaka wiira wanlokoni nihu haavo ntthu nocuwela ulalya ratta unipwaha hiiva, nihaana nitteeliyaka nrima kontha uyo ntthuuyo naavarela nteko citthu cincuwelaawe wiira anttitthimihe Yehova kahi wiira ooniye. Noopuwelaka commo, hi khaninhala utotha waasintta akhwiihu, masi ninaahala upheela uwiitthucera ayo mayamunnaayo.

³ Nhina ula mwahoola, ninaahala woona citthu cinlamuliyeehu upanka waniriipaka nrima nlattu woohikhitiri upanka citthu cotheene caapheeleehu umpankela Yehova. Ciicammo, ninaahala woona manannani ninlamuliyeehu uvarela nteko citthu cincuweleehu wiira nivare nteko wa Yehova, ni mananna matakihero aakhunanihu cinhalaaya unikavihera.

4. Isiyani inaariipiha nrima aswali akiina a Yehova? Nhimye ntakihero.

⁴ Aswali enci a Yehova unawaariipa nrima kontha khankhitiri uvara cinene nteko wa Yehova nlattu woowerennya awula wuuluvala. Iyo phi itthu yaawiirannyenle arokorihu aneehaniya Carol. Khalayi, ayo yahovara nteko nipuro naapheeliya anamalalyeera. Uyo ukatyuuyo, ayo yaanaasomiha Ibiiblya atthu 35 ni yahaakavihera atthu enci uvaherera ukumyaaya wa Yehova ni upattisiya. Ayo arokorihwaayo yahovara nteko wa Yehova cinene. Masi nuuwakatyaaya, ayo yahowerennya cinene ni khayaakhitiri-tho ukhuma wapuwani. Ayo aneera: “Mi kinaacuwela wiira nlattu woowerennya, akinhala ukhitiri uvara cinene nteko wa Yehova toko cinvaraaya akhunanaka. Phimaana kinawuupuwelaka wiira akinakhala nkristau omaana khampa akhunanaka. Mi unaakiriipaka nrima cinene nlattu woohikhitiri uvara cinene nteko wa Nluku khampa caapheelaaka.” Arokorihu Carol anaapheela wiikurumica unvarela nteko cinene Yehova, phimaana unawaaphwanela uttottopeliya. Pooti waneereehu wiira Yehova unantteeliha nrima cinene nteko unkhitiryaaya unvarela.

5. a) Isiyani inlamuliyeehu wuupuwela waniriipaka nrima nlattu woohikhitiri uvara cinene nteko wa Nluku? b) Toko cinthoonyeriyaaya walataratoni, manannani amunneehu cihihiilyaaya umpankela Yehova inkhitiryaaya?

⁵ Wakhala wiira nyuuva ciicammo unawuuriipani nrima nlattu woohikhitiri uvara cinene nteko wa Yehova toko caapheeleenyu, mwiikohe co: ‘Isiyani Yehova inwehereraawe wiira kipanke?’ Uyo nopheela wiira mpanke inhaleenyu ukhitiri. Muupuwele ila itthwiila: Arokorihu arina myaakha 80 unawaariipa nrima kontha khankhitiri uvara cinene nteko woolalya khampa caavaraaya ukati waarinaaya myaakha 40. Ni hataa yiikurumicaka upanka inkhitiryaaya, ayo anoopuwela wiira Yehova khunontteeliha nrima nteko unvaraaya. Masi niireke khweeli khunontteeliha nrima? Mweemele ni muupuwele: Wakhala wiira ayo arokorihwaayo ukati waarinaaya myaakha 40 yaaneekurumica upanka yaakhitiryaaya ni nanlelo anawiikurumica upanka inkhitiryaaya hataa yakhalanaka myaakha 80, maanaaya wiira ukhuma nenne nokhalayi ayo khahiile upanka inkhitiryaaya muntekoni wa Yehova. Nanceraka wuupuwela wiira nteko unonvareleehu Yehova khuntosa, nihaana nuupuwelaka wiira Yehova phinlamuliya uhimya wakhala wiira nteko unonvareleehu unaatosa awula mena. Pooti wankupaliihu wiira neekurumicaka upanka inkhitiriihu, Yehova unaahala untteela nrima cinene!—Nwehe ciicammo Matewus 25:20-23.

6. Itthu yaakhumelenle arokorihu Maria inniitthuciha isiyani?

⁶ Khunhala unirika ukhala unitteelaka nrima noopuwelaka citthu cinkhitiriihu upanka uhiya wuupuwela citthu cihinkhitiriihu. Muupuwele itthu inwiirannyeela arokorihu aneehaniya Maria. Ayo ahaana iretta ihinaakhitiriha uvara cinene nteko woolalya ihapari comaana. Waapacenryaaya iyo iretteeyo, ayo wahaariipa nrima cinene ni yahancera uhiicoona ukhalana ifayita. Masi yahowuupuwela arokorihu akhwaawe yaawerennya cinene ni yaholakela waakavihera. Arokorihu Maria aneera: “Mi kaholakela wancera urwaa uwannyaya wiira kilalyeere naayo nitelefooni ni niiwarakha. Khula ikwaha yaarwaaka waavarana nteko, mi kaaturuwaka unakittenle nrima cinene nlattu wookhitiri waakavihera anuunwaaka.” Hi ciicammo unaahala utepa unitteela nrima natothaka wuupuwela citthu cinkhitiriihu upanka, kahi cihinkhitiriihu. Vano wakhalaka wiira ninaakhitiri uvara cinene nteko wa Yehova ni ninaacuwelaca cinene, isiyani inlamuliyeehu upanka?

7. Ikanoni apostolu Peturu yaavahilyaawe makristau?

⁷ Nhina iwarakha yoopacera yantikhilyaawe, apostolu Peturu ahaakurumica makristau uvarela nteko ucuwela waya wiira yaakavihere mayamunnaaya wanlokoni. Peturu enre co: “Khula ntthu avarele nteko itthuvo yaakhenlyaawe wiira aakavihere akhwaawe, hihiyaka uvarela nteko saana unamaana woonironya wa Nluku.” (1 Pet. 4:10) Hi khaninlamuliya uhiya uvarela nteko ucuwelaca wihu  nlattu wo woova wiira ahaavo unhala waawerya awula unoonela nttima. Nahiyaka uvarela nteko ucuwelaca wihu nlattu wo iyo itthwiiyo, khaninhala unvaha Yehova inkhitiriihu.

8. Toko cinthoonyeraaya 1 Akorintu 4:6, 7, kontha isiyani khaninlamuliya utotha wooniya wiira nikhanle atthu oocuwelaca?

⁸ Ninaacuwela wiira nihaana nivarelaka nteko ucuwelaca wihu wiira nivare nteko wa Yehova, masi khaninlamuliya utotha wooniya wiira nikhanle atthu oocuwelaca. (Nsome 1 Akorintu 4:6, 7. *) Wootakihera, nyuuva atthunaka nnaacuwela waakuva waaphwanya atthu owaasomiha Ibiiblya. Nyuuva nhaana nvarelaka nteko nwo ucuwelacanwo. Masi nhaana muupuwelaka wiira uhaavo usomiha Ibiiblya, ni uhaavo upheela wooniya wiira nnaacuwela usomiha. Muupuwele ila itthwiila: nyuuva nhokhitiri umphwanya ntthu onsomiha Ibiiblya ni nnoona upica waaphwanya mayamunna akiina anlalyeera nkhayi ni nyuuva wiira mwaahimyeere wiira nhokhitiri umphwanya ntthu oohala unsomiha Ibiiblya. Masi mwakumanacaka naayo mayamunnaayo, nyuuva nnaawiiwa anuunu akiina yiiraka wiira ari ootteeliya cinene nlattu wookhitiri unlalyeera ntthu ni unvaha irevista. Ayo anuunwaayo akhitinri unvaha irevista paahi ntthuuyo, masi nyuuva nhokhitiri wancera unsomiha Ibiiblya. Mwaahala upankani? Nyuuva nnaacuwela wiira mwaahimyeeraka mayamunna wiira nhomphwanya ntthu onsomiha Ibiiblya, ayo anaahala utteeliya. Masi atthunaka phataari uttonka iyo itthwiiyo nihuku nikhwaawe, kontha mwahimyaka uyo ukatyuuyo, nnaahala umaliha utteeliya nrima urinaaya anuunu akhitinri uvaha irevista paahi. Mwapankaka commo, nnaahala uthoonyera ureera nrima. Masi khannolamuliya uhiya waasomiha atthu Ibiiblya nlattu wo iyo itthwiiyo, kontha ikhanle itthu incuweleenyu ni khannolamuliya uhiya uvarela nteko nwo ucuwelacanwo.

9. Manannani ninlamuliyeehu uvarela nteko ucuwela wihu?

⁹ Nihaana nuupuwelaka wiira ucuwelaca urineehu nivahiye ni Nluku. Phimaana nihaana nivarelaka nteko ucuwela wihu wiira naalipihe mayamunna, kahi wiira nooniye. (Afili. 2:3) Navarelaka nteko ikuru cihu ni ucuwelaca wihu wiira nikavihere nteko wa Yehova, ninaahala utteeliya nrima kahi nlattu woomananiha waapwaha akhunanihu, masi nlattu woovarela nteko ucuwela wihu wiira ninttottopele Yehova.

10. Kontha isiyani khunreera wiilattaniha naakhunanihu?

¹⁰ Neetthaalaka, hiiva pooti wancera ulattaniha citthu cinkhitiriihu upanka ni citthu cihinkhitiryaaya  upanka akhunanihu. Wootakihera, pooti ukhalaka wiira haavo munna notaphulela myaha ratta wanlokoni. Iyo phi itthu inkhitiryaawe upanka. Masi pooti ukhalaka wiira wanrimani wawe, uyo munnooyo naamoona uhikhalana ifayita munna nkiina hinkhitiri utaphulela myaha ratta wanlokoni. Masi uyo munna nkiinooyo hataa hikhitiriki utaphulela myaha ratta wanlokoni, uyo atthunaka khanle munna ooreera nrima nowaakhelela mayamunna uwannyawe, nowiitthuciha saana asaanaawe ni hinlova wuulalyaani ihapari comaana. Hi nihaana naasukhuruku mayamunna anvarela nteko citthu cinkhitiryaaya upanka wiira answalele Yehova ni yaakavihere akhunanaya.

11. Nlattuni ninlamuliyeehu untakiha Yesu?

¹¹ Hi khaninlamuliya wiilattaniha naakhunanihu, masi cihaavo citthu cinhaleehu wiitthuca nawehaka meettelo aakhunanihu anreera utakihiya. Ni ntthu muulupale nolamuliyeehu untakiha khanle Yesu. Hi khaninlamuliya wiilattaniha ni Yesu kontha uyo aari ntthu oohimatampi. Masi meettelwaawe omaana ni makhalelwaawe pooti uniitthuciha citthu cinci. (1 Pet. 2:21) Neekurumicaka untakiha Yesu ninaakhala makristau omaana ni ninawiitthuca ulalya saana ihapari comaana.

12-13. Ntakihero na amwene Davidi ninniitthuciha isiyani?

¹² Mbiiblyani ahaavo alopwana ni athiyana enci anlamuliyeehu waatakiha. (Mabere. 6:12) Mmuupuwele mwene Davidi. Yehova aheera wiira Davidi aari ‘nlopwana antteeliha nrima.’ (Mite. 13:22) Masi Davidi aari ntthu oopahuwa ni ahovara matampi moolupale. Waahookhalaru commo, uyo khanle ntthu noreera hiiva untakiha. Kontha isiyani? Kontha ukati waalakiyaawe, uyo khaamananihile uruna awula ukhotta wiira ahovonya. Uyo ahotthuna ulakiya wawe ni ahottharuwa. Phimaana Yehova ahonlevelela.—Isaa. 51:3, 4, 10-12.

¹³ Ukati woosoma ihantisi ya mwene Davidi, mwiikohe co: ‘Kalakiyaka kinkhalaka cani? Kinaamananihaka uruna? Kinaakupaliki wiira kihovonya, awula kimmananihaka waaromola akhunanaka wiira phivonyale? Kinawiikurumicaka wiira kihaakulelihe itthu ivonyalyaaka?’ Nyuuva pooti wiipanka makoho toko ayo mwasomaka ihantisi caatthu akhwaawe anoolumiya mbiiblyani. Ciicammo, nyuuva pooti wiikoha co: ‘Ayo atthwaayo yahaakhumelela masakha toko ankikhumelela miiva? Makhaleloni yaathoonyenryaaya miiva anlamuliyaaka utakiha? Isiyani inlamuliyaaka upanka wiira kaatakihe?’

14. Isiyani inhalaaya uniitthuciha mayamunneehu o wanlokoni?

¹⁴ Ciicammo cihaavo citthu cinci cinhaleehu wiitthuca nawehaka meettelo ommaana o mayamunneehu o wanlokoni, akhale amirawo awula owuuluvala. Mmuupuwele munna o wanlokoni winyu rina masakha. Uyo atthunaka naakhanyererihiya upanka itthu yootakhala ucikolani,  naalupatthiya naamucyaawe awula naaweryaaciya. Makhaleloni uyo munnooyo anthoonyeraawe nyuuva ampheeleenyu utakiha? Khweeliini, ntakihero no mayamunneehu pooti unikavihera cinene. Ni pooti wanvareleehu nteko citthu cinwiitthucereehu wiira naanane marikarikweehu. Khweeliini, ninaakhala ootteeliya cinene nlattu wookhalana mayamunna khampa ayo wiira naatakihe!—Mabere. 13:7; Tiya. 1:2, 3.

15. Ikanoni apostolu Paulu yaavahilyaawe makristau inhala unikavihera unswalela Yehova unitteelaka nrima?

¹⁵ Otheene cihu nihaana nikaviheraka wiira wanlokoni nihihiye ukhala nnema ni wiiwananiya. Nwuupuwele makristau oopacera. Ayo yaarina miteko coovirikana ni ucuwelaca waya khawaalikana. (1 Akor. 12:4, 7-11) Masi ayo khayaatotha usinttana. Apostolu Paulu ahonkurumica khula munna o wanlokoni upanka inkhitiryaawe wiira alipihe nloko na Kristu. Uyo ahowantikhela mayamunna o Efesu co: “Wakhalaka wiira khula mphantte unaavara nteko ratta, unaakavihera irutthu wuunuwa, ukati uneelipihaaya nnifentoni.” (Efesu 4:1-3, 11, 12, 16) Makristau yeettenle ikano ya Paulu yahokavihera ukhala nnema ni wiiwananiya wanlokoni. Iyo phi itthu impankaaya makristau eekhweeli o mahukweehu.

16. Isiyani inlamuliyeehu upanka? (Nwehe Maberewu 6:10.)

¹⁶ Nhiilattanihe naakhunaninyu. Uhiya commo, mwiikurumice untakiha Yesu ni aswali a Yehova akhwaawe okhalayi ni o mahukwaala. Mwiikurumice upanka inkhitiriinyu ni nkupali wiira Yehova “khanakhala ootakhala nrima wiira aliyale miteko cinyu.” (Nsome Maberewu 6:10. *) Munswalele Yehova wuutteelakani nrima ni ncuwelaka wiira unantteela nrima anoonaka niikurumicaka upanka inkhitiriihu wiira ninswalele.