1. Tipani nivahile iparakha yo wuulumaca?

 WUULUMA ikhanle iparakha inivahilyaawe Nlukwiihu. Wumpiya wawe pinaatamu oopacera, uyo ahancera uwuulumana Athumwaane o wiirimu. Ukati mahuku waaviraaya ni wancenryaawe uvaha macina inama cotheene, uyo aanaakumihera moolumo ophiyaaru. (Upha. 2:19) Muupuwele mananna caatteeliyaawe nrima ikwaha yoopacera yaamuulumannyaawe pinaatamu nkhunanawe: amwaarawe ooreera yeehaniya Hawa!—Upha. 2:22, 23.

2. Ukhuma nenne nokhalayi, atthu anvarela nteko cani iparakha inivahilyaawe Nluku yo wuulumaca?

² Woohipica, iparakha yo wuulumaca inivahilyaawe Nluku yahovareliya nteko pusya. Sotwani ahonthepya Hawa. Ni nwo woothanwo uhowaana matampi ni upahuwa. (Upha. 3:1-4) Atamu ahovarela nteko pusya iparakha yo wuulumaca ukati waamootherihilyaawe Hawa matampi yaavanryaawe, ni mpaka ciicammo ahomootherya Yehova iyo itampiiyo. (Upha. 3:12) Kayini ahonthepya Yehova ukati waamwiivilyaawe mwanhimaawe. (Upha. 4:9) Wahoolo, mwanculawe Kayini eehaniya Lameke ahantikha ncipo naahimya ikhirini caapankaaya atthu ule ukatyuule. (Upha. 4:23, 24) Vano ilelo? Ukati nkhwaawe, ninaawoonaka ahooleli anasiyaasa yoolumaka moolumo oohiloka waatthuni, ni unaarika uphwanya ifiilime ihinoolumiya citthu coonanara. Amirawo anawiiwa moolumo oohinamaana mmacikolani unsomaaya, ni atthu oolupale mapuro anvaraaya nteko. Wooriipiha nrima, ayo moolumacerwaayo anaathoonyera wiira meettelo aapinaatamu anvira yatepaka ukhala oohinamaana.

3. Nlattuni nihinlamuliyeehu wiitthaala, ni isiyani inhaleehu wiitthuca nhina ula mwahoola?

³ Nlattu woolemalela wiiwa moolumo oohinamaana, neetthaalaka hiiva pooti wancera wuuluma citthu coohinamaana. Ninaacuwela wiira hiiva makristau ninaapheela cinene untteeliha nrima Yehova  ni unyema moolumo oohinamaana. Nimpheela uvarela nteko ratta iparakha yo wuulumaca wiira ninttottopele Nlukwiihu. Nhina ula mwahoola, ninaahala wiitthuca mananna oopanka iyo itthwiiyo (1) wuulalyeerani; (2) umikutthaanoni ni (3) nawuulumanaka akhunanihu. Masi nihinaaya, nttwee noone nlattuni Yehova unweheehaawe mananna ninoolumeehu.

4. Toko cinthoonyeraaya Malakiya 3:16, nlattuni Yehova unviriyanaawe citthu cinoolumeehu?

⁴ Nsome Malakiya 3:16. * Ibiiblya ineera wiira Yehova haana ilivuru inantikhaawe macina aatthu anooluma citthu cinthoonyera wiira anaamoova Yehova ni anawuupuwela ncina nawe. Kontha isiyani Yehova rinaawe iyo ilivurwiiyo? Citthu cinoolumeehu cinaathoonyera mananna ciryaaya nrimeehu. Phimaana Yesu wenryaawe co: “Malaku anooluma citthu cincanre ntthu wanrimani.” (Mat. 12:34) Citthu cinlakeleehu wuuluma phinthoonyera wakhala wiira ninanfenta cinene Yehova awula mena. Ni Yehova nopheela wiira ale anonfenta akhalane ukumi woohimala watuninyani.

5. a) Isiyani yaahala umwiiriha Yehova utthuna awula uhitthuna uswali wihu? b) Toko cinthoonyeraaya ilatarato ni moolumo ari walataratoni, isiyani inlamuliyeehu wuupuwela nihinaaya wuuluma?

⁵ Moolumacerweehu pooti umwiiriha Yehova utthuna awula uhitthuna uswali wihu. (Tiya. 1:26) Atthu akhwaawe ahinonfenta Nluku waaciva wuuluma ninkhitto, yaveehaka ni yiithencaka. (2 Tim. 3:1-5) Hi khweeliini khanimpheela waatakiha ayo atthwaayo. Nimpheela wiikurumica untteeliha nrima Yehova. Hi pooti uwuulumana saana mayamunna o wanlokoni ni atthu anaalalyeereehu, masi wakhalaka wiira khaninwuulumana ratta amuciihu uwaani, khaninhala untteeliha nrima Yehova.—1 Pet. 3:7.

6. Itthuni yomaana yankhumelenle nrokorihu Kimberly nlattu wo wuuluma saana?

⁶ Neekurumicaka wuuluma ratta, ninawaathoonyera akhunanihu wiira ninonswalela Yehova. Napankaka commo, ninawaakavihera atthu woona mananna cinvirikanaaya ale ‘anonswalela Nluku naale ahinonswalela.’ (Mal. 3:18) Iyo phi itthu yaamwiirannyenle nrokorihu neehaniya  Kimberly. * Nkwaha mmoca, uyo ahopanka nteko woocikolani nkhayi ni mwanthiyana nkhwaawe ansomanaawe. Uyo mwanthiyanooyo ahoona wiira nrokorihu aanaavirikana naatthu akhwaawe yaasomanaawe. Uyo ahoona wiira nrokorihu khaawuuluma pusya akhunanawe, aari ntthu ooreera nrima ni khooluma citthu cooveeha awula cooruwana. Phimaana, uyo mwanthiyanooyo ahotthuna usomihiya Ibiiblya ninrokorihu Kimberly. Muupuwele inanna Yehova cinontteelaaya nrima noolumaka nimananna anwiiriha atthu upheela wiitthuca ikhweeli cawe!

7. Moolumeloni otheene cihu nimpheeleehu ukhalana?

⁷ Otheene cihu nimpheela ukhalana moolumelo anonttitthimiha Yehova ni annikavihera waapatthanana saana mayamunneehu. Phimaana, nimpheela wiitthuca citthu cinhala unikavihera ‘ukhala atthu ooreera utakihiya nhina moolumacerweehu.’

8. Yesu nithoonyenre cani mananna cinlamuliyeehu uwuulumana atthu ahinnaakhula ratta wuulalyaani ihapari comaana?

⁸ Nwuulumane atthu ratta ni niihisima hataa yowaakhulakani pusya. Yesu ukati waalalyaawe moolumo a Nluku, ahootherihiya citthu coohinamaana, aheereliya wiira aari nlopwana oolya venci, nanhapaliya, nrumiya a Sotwani, ahootherihiya uheettela nlamulo no Isaapatu ni mpaka ahootherihiya uveeha ncina na Nluku. (Mat. 11:19; 26:65; Luka 11:15; Joau 9:16) Waahookhalaru commo, Yesu khaawaakhunle pusya ayo atthwaayo. Khampa Yesu, hiiva khaninhala umwaakhulaca pusya ntthu hinhala unuulumana niihisima. (1 Pet. 2:21-23) Umuulumana ratta ntthu nonaakhula pusya ukati nkhwaawe unaarika. (Tiya. 3:2) Masi isiyani inhala unikavihera?

9. Isiyani inhala unikavihera uhimuulumana pusya ntthu hinnaakhula ratta wuulalyaani ihapari ca Nluku?

⁹ Ntthu aahiwaakhulekeni ratta wuulalyaani, nhirusiye nuuyo ntthuuyo. Munna neehaniya Sam neera: “Mi kinawuupuwela wiira uyo ntthuuyo haana eewaka ikhweeli ca Nluku ni wiira uyo pooti urukunusa nrimaawe.” Ukati nkhwaawe, ntthu khannaakhula ratta wuulalyaani nlattu womphwanya iwoora yahaawehereraawe. Namphwanyaka ntthu hinnaakhula ratta, hiiva pooti waatakiha arokorihu aneehaniya Lucia. Hiiva pooti unlompa Yehova wowaakuvya ni unlepela wiira Yehova anikavihere umaala ni umuulumana niihisima uyo ntthuuyo.

10. Toko cinhimyaaya 1 Timotiyu 4:13, isiyani inlamuliyeehu wiikurumica upanka?

¹⁰ Mwiikurumice wiitthuciha ratta. Timotiyu ancuwela uvara ratta nteko woolalya ihapari ca Nluku. Waahookhalaru commo, uyo ahaana eekurumicaka wiitthuciha ratta. (Nsome 1 Timotiyu 4:13. *) Isiyani inhala unikavihera ucuwela  wiitthuciha ratta ihapari ca Nluku? Nihaana niitthenkacaka ratta. Hi nihaana ikaruma cinci cinhala unikavihera wiitthenkaca. Nyuuva pooti wiitthuca citthu cinci mbroxurani Melhore a Sua Leitura e o Seu Ensino ni mphantte uneera “Empenhe-se no ministério” nhina mwaalivuru o mikutthaano Vida e Ministério Cristãos. Munnovarela nteko ratta nnyo ikarumannyo wiira nkhitiri wiitthuciha ratta? Neetthenkacaka ratta, khaninhala urikarikiya wuulalyaani ni ninaahala wuuluma woohoova.

11. Isiyani yaakavihenre mayamunna akhwaawe ucuwela wiitthuciha ratta wuulalyaani?

¹¹ Itthu ikhwaawe inhala unikavihera ukhitiri wiitthuciha ratta ukhanle waaweha mayamunna akhwaawe o wanlokoni ancuwela wiitthuciha saana. Iyo phi itthu impankaawe munna Sam muulumaleehu. Uyo nawaaweha mayamunna antaphulela ratta myaha wanlokoni ni naamananiha waatakiha. Arokorihu aneehaniya Talia ahocuwela wiitthuciha ratta nlattu wo waaweha mayamunna yaataphulela myaha wanlokoni. Nlattu woopanka commo, ayo aheetthuca utaphulela ratta citthu cinci cinkohiyaaya wuulalyaani.

12. Isiyani inaarikarika atthu akhwaawe?

¹² Otheene cihu pooti ukavihera mikutthaano uciva neepaka ninrimeehu wotheene ni navahaka ikomentaariyu comaana. (Isaa. 22:22) Atthu akhwaawe unawaarika wiipa ni ukomentari umikutthaanoni. Wakhala wiira iyo phi itthu inwiirani, unaahala wuucivelani woona itthu yaakavihenre atthu akhwaawe waarika wiipa ni ukomentari umikutthaanoni.

13. Isiyani inhala wuukaviherani wiipa ninrimeenyu wotheene umikutthaanoni?

¹³ Mwiipe ninrimeenyu wotheene. Ukati wo wiipa Usalauni yo Umwene, itthu impheeleehu cinene ukhanle unttottopela Yehova. Arokorihu aneehaniya Sara khaneecoona wiipa ratta. Hataa ukhalaka commo, ayo anaapheela unttottopela Yehova yamwiipelaka icipo. Ni itthu inaakavihera ukhanle wiitthenkaca uwaani yiipaka icipo cinhala wiipiya umikutthaanoni, khampa cintthenkacaaya miphantte cikhwaawe co mikutthaano. Ukati wo wiitthenkaca, ayo anawiipa macipwaayo ni anaamananiha wiiweeha itthu inhimyaaya yalattanihaka ni myaha cinhala wuulumiya umikutthaanoni. Ayo arokorihwaayo aneera: “Upanka commo unaakikavihera uhoolelihera wuupuwela itthu inhimyaaya ncipo uhiya uhoolelihera wuupuwela uhicuwela waka wiipa.”

14. Wakhala wiira nyuuva muntthu oomaala cinene, isiyani inhala wuukaviherani ukhitiri ukomentari umikutthaanoni?

¹⁴ Mwiikurumice ukomentari mmamikutthaanoni. Iyo itthwiiyo pooti waarika atthu akhwaawe. Arokorihu Talia yaaromonleehu aneera: “Mi unaakirika cinene ukomentari umikutthaanoni. Koolumaka waatthuni kinaattettemela cinene, masi atthu enci khancuwela iyo itthwiiyo kontha ncu naka nankaani.” Hataa ukhala commo, arokorihu Talia khanhiya wiikurumica ukomentari umikutthaanoni. Ukati wootthenkaca  mikutthaano, ayo khanliyala wiira ikomentaariyu yoopacera mparaagarafuni ihaana ikhalaka yankaani ni ihaana yaakhulaka nikoho woohiviraviriha mapuro menci. Ayo aneera: “Iyo itthwiiyo inaakithoonyera wiira ukati wookomentari, pooti wanaakhulaaka nimoolumo vakaani ni woohirikarikiha. Iyo phi itthu impheelaawe munna nohoolela mphantte wookomentariya wankutthaanoni.”

15. Isiyani ihinlamuliyeehu uliyala nhina ukomentari umikutthaanoni?

¹⁵ Masi hataa makristau oowalaala pooti waarika ukomentari umikutthaanoni. Kontha isiyani? Arokorihu aneehaniya Juliet aneera: “Ukati nkhwaawe mi akinkomentariki kontha kinoonihaka wiira itthu impheelaaka ukomentari vakaani cinene ni khaavo inhala uncivela.” Wakhala wiira nyuuva nnawuupuwelaka commo, nhiliyale wiira Yehova khanweherera wiira nvahe ikomentaariyu ihinhaleehu ukhitiri. * Uyo naakhala ootteeliya cinene neekurumicaka ukomentari mmikutthaanoni hataa unirikaka.

16. Moolumoni nkristau anlamuliyaawe unyema?

¹⁶ Nnyeme “moolumo ooveeha.” (Efesu 4:31) Toko ciitthucileehu, nkristau khanlamuliya wuuluma citthu cooveeha awula cooruwana. Masi cihaavo citthu cikhwaawe nkristau cihinlamuliyaawe wuuluma wiira haariipihe nrima akhunanawe. Wootakihera, khaninlamuliya wuuluma nithoonyeraka uthanya ikhapila, ilema ni iluuka caatthu ahinkhala ncokweehu awula ilapweehu. Ciicammo, khaninlamuliya unnavili nkhunanihu nimuulumelaka citthu cinhala unriipiha nrima. Munna mmoca neera: “Ukati nkhwaawe, mi kaanawaanavili akhunanaka kuupuwelaka wiira kinawaathukana paasi, masi citthu coolumaaka caanawaariipiha nrima. Masi amwaaraka yahancera ukikavihera cinene. Khula ikwaha yaawuulumelaaka akhunanaka itthu yowaariipiha nrima, ayo yaanaakikavihera woona wiira itthu yuulumilyaaka khincivenle ntthuuyo awula khayaacivenle ayova.”

17. Toko cinthoonyeraaya Efesu 4:29, ninhala waalipiha cani akhwiihu?

¹⁷ Muulume citthu cinaalipiha akhwiinyu. Uhiya uwuuluma pusya akhunaninyu, mwaattottopeleke. (Nsome Efesu 4:29. *) Asarayeli yahovahiya citthu cinci caalamuliyaaya usukhurweela. Masi uhiya usukhurweela, ayo khayaahiya uroka ni wuuluma pusya. Ntthu anceraka uwuuluma pusya akhunanawe, atthu akhwaawe pooti wancera untakiha uyo ntthuuyo. Nyuuva atthunaka nnawuupuwela wiira ukati anamahottela 10 wahoolumilyaaya ratta ilapo yaarumiyaaya uhottela, “asarayeli otheene yahancera umuuluma pusya Moceesi.” (Manu. 13:31–14:4) Masi uttottopela unawaatteeliha nrima akhunanihu. Wootakihera, mwaana a Jefté nlattu woottottopeliya  naasimpwanaawe, uyo ahiicoona ulipihiya makhuva wiira avare ntekwaawe. (Masuw. 11:40) Sara, romoliye wiipaceroni neera: “Naattottopelaka akhwiihu, ayo anaakhitiri woona wiira Yehova nawaafenta ni mayamunna ciicammo anawaafenta.” Phimaana, mwiikurumice waattottopela akhunaninyu ninrimeenyu wotheene.

18. Toko cinthoonyeraaya Isaalimu 15:1, 2, nlattuni ninlamuliyeehu uhimya ikhweeli, ni isiyani ciicammo ihinlamuliyeehu upanka?

¹⁸ Muulume ikhweeli. Hi khaninhala untteeliha nrima Yehova nakhalaka atthu owootha. Yehova unrusa khula inanna yo wootha. (Miru. 6:16, 17) Ilelo, atthu enci anoopuwela wiira wootha khunnanara ni ikhanle itthu impankaaya atthu otheene. Masi hi khunnicivela wootha khampa Yehova cihinoncivelaaya. (Nsome Isaalimu 15:1, 2. *) Khweeliini, hi khaninlamuliya wootha, masi ciicammo khaninlamuliya uvitha ikhweeli wiira ninthepye nkhunanihu.

19. Myahani cinlamuliyeehu unyema?

¹⁹ Nhiwuulume pusya akhunaninyu. (Miru. 25:23; 2 Atesal. 3:11) Arokorihu Juliet aromoliye, anaahimya inanna cineecoonaaya yamoonaka ntthu amuulumaka pusya nkhunanawe. Ayo aneera: “Unaakiriipa nrima kamoonaka ntthu amuulumaka pusya nkhunanawe. Mi kinaahiya unkhuluvela ntthu nomuuluma pusya nkhunanawe. Wakhala wiira uyo naamuuluma pusya nkhunanawe, wanihukuni khanhala ukuuluma pusya miiva?” Ukati wo woopa mwaha naakhunaninyu moonaka wiira hancera wuulumiya pusya ntthu, nhiye uyo mwahooyo ni nkolokoce mwaha nkhwaawe.—Akol. 4:6.

20. Isiyani inlamuliyeehu ulakela upanka?

²⁰ Hi ninkhala ituninya icanre atthu arina moolumacero oohiloka. Phimaana, nihaana niikurumicaka wuuluma citthu cinontteeliha nrima Yehova. Nhiliyale wiira wuuluma ikhanle iparakha Yehova inivahilyaawe. Uyo nopheela unoona nivarelaka nteko ratta iyo iparakheeyo. Pooti wankhuluveleehu wiira Yehova naahala unicaaliha neekurumicaka uvarela nteko ratta iparakha yo wuulumaca wuulalyaani ihapari comaana, umikutthaanoni ni ukati wo woopa mwaha naakhunanihu. Ukati unhalaaya umalamalihiya ila ituninya yoohinamaaneela, khunhala unirika unttitthimiha Yehova nicitthu cinoolumeehu. (Yuda 15) Nwehereraka uphiya nno nihukunno, nlakele uhihiya untteeliha nrima Yehova ‘nimoolumo o wamalakuni winyu.’—Isaa. 19:14.