Ulapha inkhala itthu inkhuluvelihaawe ntthu aromolaka ncina na Nluku, ntthu awula itthu inooniya ukhala yowaarya. Ulapha pooti ukhala itthu yowuulumiya wamalakuni awula yowantikhiya.

Atthu akhwaawe aneera wiira ulapha inkhala itthu yootakhala kontha Yesu aheera: “Nhilaphe hataa vakaani . . . Masi mwiikurumice wiira nuulumo ninyu ‘iyee’ nikhaleke iyee, ni nuulumo ninyu ‘mena,’ nikhaleke mena; kontha moolumo otheene anhaleenyu wuncerera, anonkhumakhuma Ntakhali.” (Mat. 5:33-37) Yesu ancuwela wiira nlamulo na Moceesi naanawaaruma asarayeli ulapha ukati nkhwaawe ni ancuwela wiira ahaavo aswali a Yehova yaalaphile. (Upha. 14:22, 23; Nkw. 22:10, 11) Uyo ciicammo ancuwela wiira Yehova mwaneene aholapha. (Mabere. 6:13-17) Phimaana, Yesu khaaphenle wiitthuciha wiira khaavo ntthu nolamuliya ulapha. Masi uyo aapheela wiitthuca wiira ikhanle itthu yootakhala ulaphacera khula itthu. Nihaana niikurumicaka ukati wotheene upanka itthu inoolumeehu kontha iyo phi itthu Yehova impheelaawe wiira nipanke.

Vano isiyani inlamuliyeenyu upanka mwalepeliyaka wiira nlaphe? Nhinaaya ulapha, nyuuva nhaana mpacaka wuupuwela ratta wakhala wiira nnaahala ukhitiri wiirannyeeha itthu impheeleenyu ulapha. Moonaka wiira khannohala ukhitiri wiirannyeeha, phataari uhilapha. Nuulumo na Nluku nineera: “Phataari uhilapha, uhiya ulapha woohiirannyeeha itthu ilaphaleenyu.” (Ekles. 5:5) Ciicammo, muupuwele mattharelelo o mbiiblyani anooluma itthu impheeleenyu ulaphacera ni mweettele itthu nhimyaaya ayo mattharelelwaayo nttharihaka moopuwelweenyu. Matthareleloni anlamuliyeenyu wuupuwela?

Uhaavo ulapha uhinvirikaniha itthu impheelaawe Nluku. Wootakihera, Masaahiti a Yehova anaalapha ukati woothelana ikacamentu. Uhoolo wa Nluku ni uhoolo waatthu enci, nlopwana ni nthiyana ampheela uthelana anaalapha wiira anaahala ufentana, utafitana ni uhisimana ni ‘anhala ukhala irutthu imoca mpaka wanhalaaya ukhwa.’ (Khunakhala wiira anamathelana otheene ahaana yaromolaka ala moolumwaala, masi ayo anlapha uhoolo wa Nluku.) Yalaphaka, ayo anaakupaliya ukhala oothelana ni uthelana waya uhaana ukhalaka mpaka. (Upha. 2:24; 1 Akor. 7:39) Ila inanna yoolapheela inkhala yomaana ni khinvirikaniha itthu impheelaawe Nluku.

Uhaavo ulapha unvirikaniha itthu impheelaawe Nluku. Nkristau khanlamuliya ulapha wiira akhikicere ilapwaawe niikaputthi awula wiira akhotte umwaamini Nluku. Upanka iyo itthwiiyo unkhala uvirikaniha malamulo a Nluku. Makristau ‘khampanka mphantte wotuninya,’ phimaana  khanineekelakeliha ikhotto ni ananrokottole o ntuninyani.—Joau 15:19; Isai. 2:4; Tiya. 1:27.

Makristau ahaana yattharihaka moopuwelwaaya ni ulakela ulapha awula uhilapha. Nihaana nuupuwelaka ratta moolumo a Yesu: “Munvahe César citthu ca César, masi munvahe Nluku citthu ca Nluku.”—Luka 20:25.

Wootakihera, pooti ukhalaka wiira nkristau naarwaa ukuvernu ni ulepela uthamela ilapo ikhwaawe awula uvahiya ipassaporte. Masi naahimyeeriya wiira nohala utthuniheriya citthu cinlepelaawe alaphaka uhirukunuwela ikuvernu. Wakhalaka wiira uyo ukatyuuyo nkristau haana alaphaka upanka itthu invirikaniha malamulo a Nluku, uyo khanla ulapha iyo itthwiiyo. Masi wakhalaka wiira ikuvernu inaahala untthunihera urukunusa moolumelwaawe wiira hivirikanihe malamulo a Nluku, uyo atthunaka aanaahala ukupali ulapha.

Urukunusa moolumwaawe wiira hivirikanihe moolumo a Nluku phi itthu inthoonyeraaya Arooma 13:1 ineera: “Atthu otheene awiiwelele akhulupale anhoolela ilapo.” Coo, nkristau atthunaka naahala ulakela wiira khinakhala itthu yootakhala ulapha upanka itthu Nluku nonilepelaawe. Ciicammo, nhaana nttharihaka moopuwelelweenyu atthenkaciye niitthu inhimyaaya Ibiiblya wakhala wiira ukati woolapha nnaahala ulepeliya uvarela nteko ikaruma awula upanka itthu yoothoonyera uswali.

Anatoropa o Roma ni ale yeehaniya masiita yaanaalapha yavarelaka nteko ikatana caya ukati wonlepela ikuru nlukwaaya ookhottoni. Ayo yaapanka iyo itthwiiyo wiira athoonyere wiira yaahimya ikhweeli. Akereeku yaanawunvusa ntata ukati woolapha. Upanka waya commo, ayo yanthoonyera wiira haavo nluku noona citthu cotheene cinoolumiya ni cimpankiya nohala waahukhumu.

Unawoonannya wiira nswali a Yehova khanlamuliya ulapha yavarelaka nteko itthu ikumihereriye niittiini yowootha. Vano wakhalaka wiira nri utiripunali ni mwalepeliyaka weesa ntata ninyu waculu Ibiiblya ni ulapha wiira nnohimya ikhweeli, nnolamuliya upankani? Yeerannyaaka iyo itthwiiyo, nyuuva pooti ulapha. Mbiiblyani anawuulumiya atthu yaalaphale yooromaka awula yawehaka uculu. (Upha. 24:2, 3, 9; 47:29-31) Masi nhaana muupuwelaka wiira mwapankaka iyo itthwiiyo, nyuuva nnaalapha wiira nnohala wuuluma ikhweeli. Nhaana mwiitthenkacaka wiira mwaakhule khula nikoho nhimyaaka ikhweeli.

Upatthaniihu ni Yehova uhaana ifayita cinene. Phimaana, nihaana nilompaka ni wuupuwela ratta nihinaaya ulapha. Nihaana niikhikiceracaka wiira nihipanke itthu nivirikanihaka mattharelelo o mbiiblyani. Nhinaaya ulapha, nyuuva nhaana ncuweleehaka wiira nnaahala ukhitiri wiirannyeeha itthu impheeleenyu ulapha.—1 Pet. 2:12.